Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2014

Pulakena kewi lyaJehova kehe mpoka wu li

Pulakena kewi lyaJehova kehe mpoka wu li

“Otamu ka uva ewi konima yeni tali ti: ‘Ondjila oyo ndjika.’” —  JES. 30:21.

1, 2. Jehova oha popi naapiya ye momikalo dhini?

JEHOVA okwa kala ta wilike aantu ye momikalo dhi ili nodhi ili monakuziwa. Yamwe okwa popi nayo okupitila maayengeli, momamoniko nenge moondjodhi, opo e ya hololele shoka tashi ka ningwa monakuyiwa. Jehova okwe ya pe wo iinakugwanithwa yokondandalunde okupitila momikalo ndhika. (Num. 7:89; Hes. 1:1; Dan. 2:19) Omathimbo gamwe Kalunga okwa li ha longitha aantu oyo ya gandje etumwalaka lye. Kutya nduno etumwalaka lye olya li lya thiki ngiini koshigwana she, ayehe mboka ya vulika kulyo oya lalekwa nuuyamba.

2 Nena Jehova oha longitha Ombiimbeli, ombepo ondjapuki negongalo e tu wilike. (Iil. 9:31; 15:28; 2 Tim. 3:16, 17) Ewiliko ndyoka hatu pewa olya yela lela, notwa fa nokuli tu ‘uvite ewi konima yetu tali ti: “Ondjila oyo ndjika. Yi landuleni.”’ (Jes. 30:21) Jehova oha longitha wo Jesus e tu wilike, okupitila ‘momumati omwiinekelwa nomunandunge,’ nenge tu tye, momupiya omudhiginini nomunandunge. (Mat. 24:45) Katu na okutala ko ewiliko ndika lya fa uudhano, oshoka otatu ka mona owala omwenyo gwaaluhe ngele otwa vulika kulyo. —  Heb. 5:9.     

3. Oshike tashi vulu oku tu imba tu vulike thiluthilu kuJehova? (Tala kethano lyopetameko.)

3 Satana oha kambadhala oku tu piyaganeka, opo kaatu  landule ewiliko lyaJehova. Oshikwawo, omutima gwetu nenge ‘omwenyo gwetu omunamakoto’ otashi vulika gu tu imbe okuvulika komalombwelo gaJehova. (Jer. 17:9) Onkee ano, natu kundathaneni nkene tatu vulu okutaaguluka omandangalati ngoka hage tu imbi okupulakena kuKalunga. Natu kundathaneni wo nkene okupulakena kuJehova nokupopya naye megalikano tayi vulu oku tu kwathela tu kale popepi naye, kutya nduno otu li monkalo yini.

SINDA OMAKOTO GASATANA

4. Satana oha kambadhala ngiini okupiyaganeka omadhiladhilo gaantu?

4 Satana oha longitha uuyelele wa puka nenge omitoto, a piyaganeke omadhiladhilo gaantu. (Lesha 1 Johannes 5:19.) Iifokundaneki, omambo, iifo, oradio, o-TV nosho wo ointaneta ohayi taandelitha uuyelele muuyuni awuhe. Nonando iikundaneki mbika omathimbo gamwe ohayi taandelitha uuyelele tawu ti sha, olundji ohayi humitha komeho omikalo ndhoka dhi li ompinge nomisindalandu dhaJehova. (Jer. 2:13) Pashiholelwa, ohayi ti kutya inashi puka omashenge ga hokanathane. Edhiladhilo lya tya ngeyi ohali ningitha aantu ya dhiladhile kutya shoka Ombiimbeli tayi popi kombinga yomashenge kashi li pandjele. —  1 Kor. 6:9, 10.    

5. Ongiini tatu vulu okwiikelela kaatu nwethwe mo kuSatana niifundja ye mbyoka ha taandelitha?

5 Mboka ye hole okuvulika komisindalandu dhaJehova otaya vulu ngiini okwiikelela kaaya nwethwe mo kuSatana niifundja ye mbyoka ha taandelitha? Ongiini taya vulu okumona ngele uuyelele wontumba owu li mondjila nenge owa puka? ‘Ongele taya vulika koohapu dhaKalunga’! (Eps. 119:9) Oohapu dhaKalunga ohadhi tu kwathele tu yoolole pokati kaashoka sha puka naashoka shi li mondjila. (Omayel. 23:23) Jesus okwa ti kutya ‘omuntu ota kalekwa nomwenyo kukehe ohapu tayi zi mokana kaKalunga.’ (Mat. 4:4) Otwa pumbwa okwiilonga okutula omakotampango gOmbiimbeli miilonga. Pashiholelwa, Josef okwa li e shi kutya osha puka koshipala shaKalunga okuya momilalo nomukiintu gwaPotifar, manga nokuli ompango ndjoka yi na ko nasha noluhondelo inaayi nyolwa. Ina dhiladhila nokuli oku yi taaguluka. (Lesha Genesis 39:7-9.) Nonando omukiintu ngoka okwa kala te mu kondjitha ethimbo ele a lale naye, Josef okwa tokola okupulakena kewi lyaJehova, pehala lyokupulakena kewi lyomukiintu ngoka. Natse nena otu na okupulakena kewi lyaJehova, pehala lyokupulakena kiifundja yaSatana.     

6, 7. Otu na okuninga shike tu yande enwethomo lyaSatana?

6 Muuyuni omu udha omalongo ga puka, nomolwaashono oyendji yu uvite kutya oshidhigu okumona elongelokalunga lyashili. Ihe oshili yOohapu dhaJehova oya yela, nakehe ngoka a hala oku yi mona ota vulu oku yi mona. Otu na okutokola kutya otatu ka pulakena kulye. Molwaashoka oshidhigu okupulakena kaantu yaali poshikando, onawa ngele  tatu ‘ilongo ewi’ lyaJesus nokupulakena kulyo. Oshoka oye a langekwa po kuJehova a wilike oonzi dhe. —  Lesha Johannes 10:3-5.

7 Jesus okwa tile: “Ndhindhilikeni shoka tamu shi pulakene.” (Mark. 4:24) Omayele gaJehova oga yela noge li mondjila, ihe otu na okulongekidha omitima dhetu, opo tu pulakene kugo. Ngele inatu kotoka otatu ki iyadha tatu pulakene kuSatana, pehala lyokupulakena komayele gaJehova gopahole. Inatu etha nando oomusika, uuvidio, o-TV, omambo, aantu mboka hatu endathana nayo, aalongi nenge mboka hayi iti aanawino ya wilike onkalamwenyo yetu. —  Kol. 2:8.     

8. (a) Omitima dhetu ohadhi shi ningitha ngiini oshipu kuSatana e tu makele? (b) Oshike tashi ka ningwa po, ngele inatu ninga po sha uuna tu wete kutya otu uka moshiponga?

8 Satana oku shi kutya tse aalunde noha kambadhala oku tu makela. Shika ohashi shi ningitha oshidhigu okuvulika kuJehova. (Joh. 8:44-47) Ongiini tatu vulu okupita momamakelo ngoka? Pashiholelwa, dhiladhila komuntu ngoka tashi vulika a ninge oshinima shoka a li ta dhiladhila kutya ke na esiku a ninge. (Rom. 7:15) Mbela oshike she mu gwilitha meyono ndyoka? Otashi vulika kashona nakashona a tameke ihaa pulakene we kewi lyaJehova. Otashi vulika inaa mona sho omutima gwe tagu mu kotokele nenge e shi mono, ihe ina ninga po sha. Pashiholelwa, otashi vulika e etha po okugalikana, a kala ihaa yi we naanaa momapya nenge a tameke ha faula okugongala. Pehulilo omahalo ge oge mu tono oonkondo e ta longo shoka sha puka. Otatu vulu okuyanda oshinima sha tya ngaaka, ngele otwa kala hatu endelele okuninga po sha uuna twa mono tu uka moshiponga. Nongele ohatu pulakene kuJehova, itatu ka pulakena nando kaashunimonima. —  Omayel. 11:9.    

9. Omolwashike sha simana okumonena po omahalo ga puka?

9 Ngele omuntu oku na omukithi omudhigu, oshipu oku gu panga ngele ogwa monikila po. Sha faathana, otatu ka yanda uupyakadhi ngele otwa monene po omahalo ga puka ngoka tashi vulika ge tu fale meyono. Ngele otwe ga monene po, onawa ngele tatu katuka onkatu nziya manga ‘Satana inee tu manga e te tu vulikitha.’ (2 Tim. 2:26) Otu na okuninga po shike, ngele otwa mono kutya omadhiladhilo getu nomahalo getu oga tsa ondumbo nehalo lyaJehova? Otu na okugalukila kuye moompadhi oontalala, e tatu pulakene komayele ge nomutima gwetu aguhe. (Jes. 44:22) Ihe natu dhimbulukwe kutya iizemo yomatokolo getu ga puka, otashi vulika yi tu ehameke nokonima sho twa galukila kuJehova.  Oshihwepo okuvulika aluhe kuJehova nokuyanda omapuko ga kwata miiti.

Okukala hatu longele Kalunga shaa siku otaku tu kwathele ngiini kaatu gwile momwigo gwaSatana? (Tala okatendo 4-9)

HENUKA UUNTSA NOLWIHO

10, 11. (a) Uuntsa ohawu imonikila mo ngiini? (b) Oshike tatu ilongo mokwaavulika kwaKorak, Datan naAbiram?

10 Otu na okudhimbulukwa kutya omitima dhetu otadhi vulu oku tu ethitha po Jehova. Omahalo getu guulunde oge na lela oonkondo. Pashiholelwa, otashi vulika tu kwatwe kuuntsa nenge kolwiho. Uukwatya mbuka otawu vulu oku tu imba tu pulakene kewi lyaJehova noku tu fala meyono lya kwata miiti. Omuntu ngoka e na uuntsa oha dhiladhila kutya oku vule yalwe. Otashi vulika a kale ta dhiladhila kutya ota vulu okuninga kehe shoka a hala, nokapu na nando ogumwe e na uuthemba woku mu lombwela sha, kutya nduno ooitaali ooyakwawo, aakuluntugongalo nenge nokuli ehangano lyaJehova. Omuntu a tya ngawo otashi vulika a thige po Jehova e ta kala kee uvite we ewi Lye.    

11 Jehova okwa li a langeke po Moses naAaron ya wilike oshigwana shaIsraeli mombuga. Ihe molwaashoka Korak, Datan naAbiram oya li ye na uuntsa noya li ya hala okulongela Jehova pamulandu gwawo yene, oye ya tsile ondumbo. Jehova okwa ningi po shike? Okwe ya hanagula po. (Num. 26:8-10) Ehokololo ndika otali tu longo kutya okutsa ondumbo naJehova okwa nika oshiponga. Natu dhimbulukweni wo kutya ‘uuntsa ohawu tetekele ehanagulo.’ —  Omayel. 16:18; Jes. 13:11.

12, 13. (a) Gandja oshiholelwa shankene olwiho talu vulu oku tu fala moshiponga. (b) Yelitha nkene tatu vulu okutonwa kolwiho ngele itatu lu kotokele.

12 Olwiho nalwo olwa nika oshiponga. Olundji omuntu ngoka e na olwiho oha ningi ngaashi a hala. Ohashi vulika a dhiladhile kutya oku na uuthemba wokukutha po iinima mbyoka kaayi shi ye. Sho omupolofeti gwaKalunga Elisa a aludha ondjayi yetangakwiita lyaSiria Naeman kuuvu woshilundu, Naeman okwa li a hala okupa omupolofeti omagano, ihe okwe ga tindi. Ihe omupiya gwaElisa, Gehasi, okwa li a haluka omagano ngoka. Okwi ipopile meni lye a ti: “Oshili, ngaashi OMUWA e na omwenyo, otandi tondoka, ndi mu landule ngaye ndi taambe sha kuye.” Gehasi okwa landula Naeman meholamo e te mu fundju, opo e mu pe “iimaliwa iisiliveli omayuvi gatatu nomitsuhu mbali dhuuyamba.” Oshike sha ningwa po sho Gehasi a ningi oshinima shika e ta fundju omupolofeti gwaJehova? Okwa kwatwa kuuvu woshilundu! —  2 Aak. 5:20-27.     

13 Olwiho ohalu tameke miinima iishona, nongele inalu pangelwa otalu vulu okukoka e talu tono omuntu oonkondo. Shika oshi iwetikile mehokololo lyaAkan. Tala nkene olwiho lwaAkan lwa kokelele. Akan okwa ti: ‘Mokati kiinima mbyoka twa hakana, onda mono ondjatha yOshibabiloni yo opala, okilograma mbali dhoshisiliveli nuutale woshingoli wuudhigu wetata lyokilograma. Onde yi haluka e tandi yi kutha po.’ Pehala lyokukondjitha ehalo ndyoka lya puka, Akan okwa yaka po iinima e te yi holeke motenda ye. Sho Josua u uvu shoka Akan a ningi, okwe mu lombwele kutya Jehova ote ke mu hanagula po. Mesiku ndyoka Akan negumbo lye oya dhipagwa nomamanya. (Jos. 7:11, 21, 24, 25) Olwiho otalu vulu oku tu kwata ko ethimbo kehe. Onkee ano, natu ‘kotokeleni uuhalu weliko’ nenge wolwiho. (Luk. 12:15) Oluhondelo nalwo olwiho. Nokuli nonando omathimbo gamwe ohatu dhiladhila iinima iiwinayi, osha simanenena tu pangele omadhiladhilo getu, opo omahalo ngoka omawinayi kaage tu fale meyono. —  Lesha Jakob 1:14, 15.

14. Otatu vulu okuninga shike ngele otwa mono kutya otu na olwiho nenge uuntsa?

14 Uuntsa nolwiho otayi vulu oku tu etela oshiponga. Ngele otwa dhiladhila kiilanduliko  yomayono getu, otashi ke tu kwathela tu pulakene kewi lyaJehova. (Deut. 32:29) Jehova ote tu lombwele mOohapu dhe kombinga yuuwanawa mboka hawu zi mokuvulika kuye nosho wo iilanduliko yomayono getu. Ngele uuntsa nenge olwiho otayi tu inyengitha tu ninge oshinima shontumba sha puka, onawa tu dhiladhile kiilanduliko. Otu na okudhiladhila kunkene eihumbato lya puka tali ke tu guma nosho wo aaholike yetu, naunene tuu ekwatathano lyetu naJehova.

KALA HO POPI ALUHE NAJEHOVA

15. Oshike tatu ilongo moshiholelwa shaJesus?

15 Jehova okwe tu halela onkalamwenyo ombwanawa. (Eps. 1:1-3) Ohe tu pe omayele omawanawa pethimbo. (Lesha Aahebeli 4:16.) Jesus nando okwa li a gwanenena, okwa li ha popi aluhe naJehova, ta galikana kee na ezimbuko. Jehova okwa li e mu ambidhidha noku mu wilika. Okwe mu tumine aayengeli ye mu yakule, okwe mu pe ombepo ondjapuki nokwe mu wilike sho ta hogolola aayapostoli 12. Jehova okwa popi okuza megulu u ulike kutya ota ambidhidha Jesus nokwe mu hokwa. (Mat. 3:17; 17:5; Mark. 1:12, 13; Luk. 6:12, 13; Joh. 12:28) Natse otwa pumbwa okukala hatu mbumbulile Kalunga omitima dhetu megalikano. (Eps. 62:7, 8; Heb. 5:7) Egalikano ohali tu kaleke popepi naJehova nohali tu kwathele tu ende nondjila ndjoka tayi mu simanekitha.    

16. Jehova ohe tu kwathele ngiini tu pulakene kewi lye?   

16 Jehova ihe tu thiminikile omayele ge, ihe ngoka e ga hala ota vulu oku ga mona nuupu. Uuna tatu pula ombepo ye ondjapuki yi tu wilike, ohe yi tu pe nehalo ewanawa. (Lesha Lukas 11:10-13.) Ihe osha simana tu ‘tale nkene hatu pulakene.’ (Luk. 8:18) Pashiholelwa, ngele ohatu pula Jehova e tu kwathele tu yande omilalo dha nyata, ihe otatu tsikile owala okutala omathano giipala nenge tatu tala oomuvi inaadhi yogoka, nena otatu ulike kutya inatu hala shili e tu kwathele. Otu na okukala hatu kala mpoka ombepo yaJehova yi li, ngaashi pokugongala, opo e tu kwathele. Aapiya yaJehova oyendji oya henuka uupyakadhi sho ya pulakene kwaashoka Jehova ta ti pokugongala kwetu. Oya koneke kutya oye na omahalo ga puka e taye ge etha po. —  Eps. 73:12-17; 143:10.

KALA HO PULAKENE NEITULOMO KEWI LYAJEHOVA

17. Omolwashike sha nika oshiponga okwiinekela omitima dhetu?

17 Natu kundathaneni kombinga yaDavid, omukwaniilwa gwaIsraeli. Sho a li omumati, okwa sindi Goliat, omulumentu omutongolume Omufilisti. Konima David okwa ka ninga omukwiita, nokonima okwa ningi omukwaniilwa. Oshilonga she osha li okugamena oshigwana noku shi ningila omatokolo gopandunge. Ihe sho David i inekele omutima gwe, ogwe mu kotokele e ta gwile meyono lya kwata miiti, ndyoka a yono naBatseba. David okwa li nokuli a dhipagitha Uria, omusamane gwaBatseba. David sho a pukululwa, okwa pulakene neifupipiko e ti itaale kutya okwa yono, e ta panga ishewe uukuume naJehova. —  Eps. 51:4, 6, 10, 11.

18. Oshike tashi tu kwathele tu kale hatu pulakene kewi lyaJehova?

18 Inatu kala twi iyinekela tse yene, ihe natu vulikeni komayele ngoka ge li 1 Aakorinto 10:12. Otu na okutokola kutya otatu pulakene kewi lyaJehova nenge olyaSatana, molwaashoka itatu vulu ‘okuutha okukalamwenyo kwetu.’ (Jer. 10:23) Natu kale hatu galikana twaa na ezimbuko nokulandula ewiliko lyombepo ondjapuki. Eeno, natu kaleni aluhe tatu pulakene nawa kewi lyaJehova.