Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2014

Mbela oho mono ngaa “iikulya pethimbo lyayo”?

Mbela oho mono ngaa “iikulya pethimbo lyayo”?

OTU li pethimbo edhigu mondjokonona ayihe yaantu. (2 Tim. 3:1-5) Esiku kehe ohatu yelekwa ngele otu hole shili Jehova nongele otwa tokola ngaa shili okuvulika komithikampango dhe omiyapuki. Jesus okwa li e shi kutya ethimbo ndika otali ka kala edhigu, nomolwaashono a tsu aalongwa ye omukumo kutya ote ke ya pa shoka ya pumbwa ya vule okwiidhidhimika sigo ehulilo. (Mat. 24:3, 13; 28:20) Opo e ya nkondopaleke, okwa langeke po omupiya nenge omumati omudhiginini e ya pe “iikulya pethimbo lyayo.” —  Mat. 24:45, 46.

Okuza sho omupiya a langekwa po mo 1919, “aalelwa” (OB-1954) omamiliyona haya popi omalaka gi ili nogi ili oye ya mehangano lyaKalunga nohaya palulwa pambepo. (Mat. 24:14; Eh. 22:17) Ihe momalaka ngoka kamu na iikulya yopambepo yi thike pamwe, yo ishewe haayehe haya vulu okumona iinyanyangidhomwa yetu paelektronika. Pashiholelwa, oyendji ihaya vulu okutala uuvidio niileshwa mbyoka hayi adhika owala ko-jw.org. Mbela shika otashi ti kutya ooitaali yamwe ihaya mono iikulya ya gwana, opo ya kale ya paluka pambepo? Opo tu mone eyamukulo lyomondjila, natu taleni komapulo gane ga simana.

 1. Oshinima shini sha simanenena miikulya mbyoka hatu pewa kuJehova?

Sho Satana a makele Jesus a shitukithe omamanya iikwiila, Jesus okwe mu yamukula a ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” (Mat. 4:3, 4) Oohapu dhaJehova otadhi adhika mOmbiimbeli. (2 Pet. 1:20, 21) Onkee ano, oshinima sha simanenena miikulya mbyoka hatu pewa kuJehova, Ombiimbeli. —  2 Tim. 3:16, 17.

Ehangano lyaJehova olya nyanyangidha o-New World Translation of the Holy Scriptures ya gwana po nenge inaayi gwana po momalaka ge vulithe 120, nogendji ohaga gwedhwa ko omumvo kehe. Kakele kOmbiimbeli ndjoka, opwa nyanyangidhwa wo Oombimbeli dhilwe omabiliyona dha gwana po nenge inaadhi gwana po momalaka omayuvi. Shika oshi li lela metsokumwe nehalo lyaJehova ‘ngoka a hala aantu ayehe ya hupithwe noya tseye oshili.’ (1 Tim. 2:3, 4) Molwaashoka “kaku na nando oshinima shimwe sha holekwa Kalunga,” natu kale tu na omukumo kutya Kalunga ota ka nanena ayehe mboka “yu uvite oyo oohepele koomwenyo” kehangano lye noku ya palula pambepo. —  Heb. 4:13; Mat. 5:3, 6; Joh. 6:44; 10:14.

2. Iileshomwa yetu ohayi dhana onkandangala yini mokugandja iikulya yopambepo?

Opo omuntu a kale e na eitaalo lya kola, ke na owala okulesha Ombiimbeli. Oku na wo okuuva ko shoka ta lesha nokwiiyutha kusho. (Jak. 1:22-25) Shika osho elenga enene lyokuEtiopia lya li li na okuninga. Olya li tali lesha Oohapu dhaKalunga sho Filippus e li pula a ti: “Ou uvite ko tuu omadhiladhilo gaashoka to lesha?” Elenga olya yamukula lya ti: “Otandi vulu ngiini okuuva ko, ngele kape na ngoka ta fatululile ndje?” (Iil. 8:26-31) Okuza mpoka Filippus okwe li kwathele li uve ko nawa Oohapu dhaKalunga. Omulumentu nguka okwa li a gumwa noonkondo kwaashoka a longwa e ta tokola a ninginithwe. (Iil. 8:32-38) Sha faathana, iileshomwa yetu yopaMbiimbeli oye tu kwathela tu uve ko nawa oshili yomOohapu dhaKalunga. Oya guma omitima dhetu noye tu inyengitha tu iyuthe kwaashoka tatu ilongo. —  Kol. 1:9, 10.

Aapiya yaJehova oye na iikulya niikunuwa yopambepo ya ha, mbyoka haya pewa okupitila miileshomwa. (Jes. 65:13) Pashiholelwa, Oshungolangelo ndjoka hayi nyanyangidhwa momalaka ge vulithe 210, ohayi tu yelithile omahunganeko gOmbiimbeli, ohayi tu kwathele tu uve ko muule oshili yOmbiimbeli, nohayi tu tsu omukumo tu vulike komakotampango gOmbiimbeli. O-Awake! ndjoka hayi nyanyangidhwa momalaka 100 lwaampoka, ohayi tu kwathele tu uve ko nawa eshito lyaJehova nohayi tu longo nkene tu na okuvulika komayele gOmbiimbeli. (Omayel. 3:21-23; Rom. 1:20) Omupiya omudhiginini ohe tu pe iinyanyangidhomwa yopaMbiimbeli momalaka ge vulithe 680. Mbela oho kongo ngaa ethimbo wu leshe Ombiimbeli esiku kehe? Mbela oho lesha ngaa oshifo kehe tashi piti nosho wo iinyanyangidhomwa yilwe mbyoka hayi piti omumvo kehe melaka lyeni?

Kakele kiileshomwa, ehangano lyaJehova ohali longekidha iipopiwa yopaMbiimbeli mbyoka hayi gandjwa pokugongala nopiigongi. Mbela oho nyanyukilwa ngaa iipopiwa, iinyandwa, omauliko nomapulapulo ngoka haga ningwa pomitumba ndhoka? Jehova ohe tu ningile shili oshituthi shopambepo! —  Jes. 25:6.

 3. Ngele iho mono iinyanyangidhomwa ayihe melaka lyoye, mbela oto ka sa ondjala yopambepo?

Aawe. Nokuli shika kashi na oku tu kumitha, ngele omathimbo gamwe aapiya yamwe yaJehova ohaya mono iikulya oyindji yopambepo ye vule yalwe. Omolwashike? Natu dhiladhileni kaayapostoli. Methelemumvo lyotango aayapostoli oya li ya longwa oshindji ye vule aalongwa yalwe. (Mark. 4:10; 9:35-37) Ashike nonando ongawo, aalongwa yalwe inaya sa ondjala pambepo, oshoka oya li ye na shoka ya pumbwa. —  Ef. 4:20-24; 1 Pet. 1:8.

Jehova oku shi ashihe shoka twa pumbwa nokwe shi tu pa, opo tu kale twa kola pambepo

Natu dhimbulukwe wo kutya ashihe shoka Jesus a popile nenge a ningile manga a li kombanda yevi, inashi nyolwa mo mOmbiimbeli. Omuyapostoli Johannes okwa nyola a ti: “Oku na iinima iikwawo oyindji Jesus e yi ninga. Ando ayihe oya nyolelwe shimwe nashimwe, ondi inekela, ando omambo ngoka itaga gwana mo muuyuni.” (Joh. 21:25) Nonando aalanduli yaJesus pethimbo ndiyaka oya li ye shi nawa Jesus ye tu vule, natse inatu patelwa pondje. Omolwashike? Omolwashoka Jehova okwa shilipaleke kutya otu na uuyelele wa gwana mboka tawu ke tu kwathela tu landule oshinkoti she. —  1 Pet. 2:21.

Dhiladhila ishewe kombinga yoontumwafo ndhoka aayapostoli ya nyolele omagongalo gomethelemumvo lyotango. Ontumwafo yimwe yaPaulus inayi nyolwa mo mOmbiimbeli. (Kol. 4:16) Mbela otwa pangwa iikulya yopambepo sho kaatu na ontumwafo ndjika? Aawe. Jehova oku shi ashihe shoka twa pumbwa nokwe shi tu pa, opo tu kale twa kola pambepo. —  Mat. 6:8.

Nena yamwe yomaapiya yaJehova oye na iikulya yopambepo oyindji ye vule yakwawo. Mbela ngoye oho popi elaka moka mu na owala iileshomwa iishona? Ngele osho, tseya kutya Jehova oku na ko nasha nangoye. Konakona iileshomwa mbyoka wu na e to kala ho gongala megongalo moka hamu popiwa elaka ndyoka hu uvu ko nawa. Kala wu shi shi kutya Jehova ote ke ku koleka pambepo. —  Eps. 1:2; Heb. 10:24, 25.

4. Ngele iho mono iinima mbyoka yi li ko-jw.org, mbela oto ka sa pambepo?

Ko-jw.org ohatu tula ko iifo niileshomwa yilwe yopaMbiimbeli mbyoka to vulu okukonakona. Ohaku kala wo iinima yilwe mbyoka hayi kwathele aaihokani, aagundjuka yoomvula omulongo nasha nosho wo aanona. Aanegumbo ohaya mono mo uuwanawa ngele taya konakona iinima mbika pElongelokalunga lyUukwanegumbo. Kakele kaashoka, ko-jw.org ohaku kala wo omatseyitho gi ikalekelwa, ngaashi egandjo lyoonzapo posikola yaGilead nokugongala kwokomumvo. Ohayi tseyithile wo aamwatate kongonga yevi alihe kombinga yiiponga yopaunshitwe niinima yopaveta mbyoka ya guma oshigwana shaJehova. (1 Pet. 5:8, 9) O-jw.org ohayi kwathele wo okutaandelitha onkundana ombwanawa, nomiilongo moka iilonga yetu yi indikwa.

Ihe oto vulu okukala wa kola pambepo, nonando iho vulu okuya ko-jw.org. Omupiya oha gandja iileshomwa nuudhiginini, opo aalelwa ayehe ya kale ya palulwa nawa pambepo. Onkee ano, ino kala unene wa sa oshimpwiyu shokulanda oshikwaelektronika, opo ando wu kale ho yi ko-jw.org. Yamwe ohaya pilinta ko iinima yimwe ye yi pe mboka kaaye na ointaneta, ashike omagongalo inaga tegelelwa ge shi ninge.

Otatu pandula Jesus sho a gwanitha po euvaneko lye lyoku tu palula pambepo. Sho ehulilo lyomasiku ngaka omadhigu tali hedha popepi, otatu vulu okukala tu na omukumo kutya Jehova ota ka tsikila oku tu pa ‘iikulya yopambepo pethimbo lyayo.’