Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2014

Oyi igandja nehalo ewanawa ya ka longe — koMicronesia

Oyi igandja nehalo ewanawa ya ka longe — koMicronesia

OMUMWAMEME Katherine okwa putukila moAmerika. Sho e na oomvula 16 okwa ninginithwa e ta ningi gumwe gwomOonzapo dhaJehova. Okwa li ha longo nuudhiginini muukalele, ihe ka li a mono naanaa aantu mboka taya pulakene ketumwalaka lyUukwaniilwa moshitopolwa moka a li hu uvithile. Ota ti: “Ohandi lesha iimoniwa kombinga yaantu mboka ya li ya galikana kuKalunga e ya tumine omuntu e ye e ya kwathele ye mu tseye. Onda li handi kala aluhe nda hala okumona omuntu a tya ngaaka, ihe inandi mu mona.”

Konima yoomvula sho a kala nokuuvithila moshitopolwa moka, Katherine okwa li a dhiladhila kombinga yokutembukila koshitopolwa hoka aantu haya pulakene nawa ketumwalaka lyUukwaniilwa. Ihe okwa li e na omaipulo ngele otashi ka za ngaa. Monkalamwenyo ye megumbo okwa zile mo owala oshikando shimwe. Ihe hoka a yile okwa ninga ko owala iiwike iyali. Okwa li ha kala a yuulukwa kegumbo nayi. Kakele kaashono, okwa li a halelela a mone enyanyu ndyoka hali zi mokukwathela mboka taya kongo Jehova shili. Konima sho a dhiladhila iitopolwa yimwe hoka ta vulu okutembukila, okwa nyolele koshitayimbelewa shaGuam nokwa li a mono uuyelele mboka a pumbwa. MuJuli 2007 sho e na oomvula 26, Katherine okwa tembukile kuSaipan, okantuntu ke li mefuta lya Mwena, uule wookilometa 10 000 okuza paandjawo. Oshe mu endele ngiini sho a tumbikile hoka?

EYAMUKULO KOMAGALIKANO GAALI

Konima owala yethimbo efupi sho e ya megongalo epe, Katherine okwa li a tsakanene naDoris, omukulukadhi gwoomvula 40 nasha, ngoka a li a taamba ko ekonakonombiimbeli. Konima sho ya konakona oontopolwa ndatu dhopetameko dhembo Omalongo gashili, Katherine okwa tameke okukala e na omaipulo. Okwa ti: “Doris okwa li omulongwa omwaanawa, nokanda li nda hala oku mu piyaganeka. Inandi kala nale nekonakombiimbeli tali tsikile, nonda li ndu uvite kutya Doris okwa pumbwa omumwameme gumwe ngoka a pyokokalela a konakone naye, tashi vulika ngoka e thike puye.” Katherine okwa pula Jehova megalikano e mu kwathele a mone omumwameme ngoka ta vulu oku mu pa omukonakonimbiimbeli gwe. Opo nduno okwa li a tokola a lombwele Doris kombinga yaagulwe ngoka ta kala ta konakona naye Ombiimbeli.

Katherine okwa ti: “Manga inaandi popya kombinga yasho, Doris okwa li a lombwele ndje kutya okwa hala okupopya nangame kombinga yuupyakadhi wontumba. Konima sho nde mu pulakene, onde mu lombwele nkene Jehova a li a kwathele ndje ndu ungaunge nuupyakadhi wa faathana monkalamwenyo. Okwa pandula ndje.” Opo nduno Doris okwa lombwele Katherine a ti: “Jehova ohe ku longitha wu kwathele ndje. Oshikando shotango  we ya megumbo lyandje, onda kala tandi lesha Ombiimbeli yandje uule woowili. Onda li tandi lili, tandi pula Kalunga a tumine ndje omuntu a kwathele ndje ndu uve ko Ombiimbeli. Opo nduno owa konkola pomweelo gwegumbo lyandje. Jehova okwa yamukula egalikano lyandje!” Katherine okwa li a kengeleka sho ta hokolola ehokololo ndyoka tali gumu omutima. Okwa ti: “Oohapu dhaDoris odha li eyamukulo kegalikano lyandje. Jehova oku ulukila ndje kutya onda li tandi vulu okutsikila nekonakombiimbeli.”

Doris okwa li a ninginithwa mo 2010, nokunena oha ningi omakonakonombiimbeli ge mwene. Katherine okwa ti: “Onda nyanyukwa tuu shili sho ondjodhi yandje yokukwathela omuntu e na omutima omwaanawa a ninge omulongeli gwaJehova ya tsu!” Kunena, Katherine ota longo nenyanyu e li omukokolindjila gwondjigilile kontuntu Kosrae yi li mefuta lya Mwena.

OMASHONGO GATATU NANKENE TO VULU OKUUNGAUNGA NAGO

Aamwatate naamwameme ye vule pethele ya za kiilongo yokondje (ye na oomvula 19 sigo 79) oya longa kiitopolwa hoka ku na ompumbwe onene moMicronesia. Erica ngoka a tembukile kuGuam mo 2006 sho e na oomvula 19, okwa popi nkene aalongi mboka aadhiginini haya kala yu uvite. Okwa ti: “Okukokola ondjila moshitopolwa moka mu na aantu ya sa ondjala yoshili ohaku nyanyudha noonkondo. Onda pandula unene sho Jehova a kwathele ndje ndi longe iilonga mbika. Huka okwo okulamwenyo kwa dhenga mbanda.” Kunena, Erica oku na enyanyu sho ta longo e li omukokolindjila gwondjigilile moEbeye kuuntuntu waMarshall. Eeno, okulonga kiilongo yokondje oku na omashongo. Natu tale gatatu gomugo, nankene mboka ya tembukila koMicronesia yu ungaunga nago.

Erica

Iikala yaantu. Konima sho a thiki kokantuntu kaPalau mo 2007, Simon ngoka pethimbo ndyoka a li e na oomvula 22 okwa li e shi mono mo kutya ota vulu okulongitha okamaliwa okashona hoka a mona koshilongo shaandjawo, koIngilanda. Okukala nonkalamwenyo yanathangwa okwe mu kwathele ngiini? Simon ota ti: “Onda li ndi ilongo okukala ihaandi landa kehe shimwe nda hala. Ngashingeyi ohandi hogolola nuukeka iikulya mbyoka ndi na okulanda, nohandi kongo mpoka pu na iinima yi li nawa noyi na ombiliha. Uuna oshinima shontumba sha teka, ohandi kongo iinima mbyoka ya longithwa nale nohandi kongo ngoka ta vulu okukwathela ndje e shi pangele. Osha kwathela ndje ndi ilonge lela kutya oshike sha pumbiwa monkalamwenyo, nankene tandi vulu oku shi mona kombiliha. Jehova okwa kala nokukwathela ndje iikando niikando. Uule woomvula heyali ndhoka nda kala tandi longo muno, onda kala aluhe ndi na sha shokulya nosho wo olukalwa.” Jehova oha kwathele shili mboka ye na onkalamwenyo yanathangwa, molwaashoka ya hala okukonga tango Uukwaniilwa. — Mat. 6:32, 33.

Ondjuulukwe. Erica okwa ti: “Ondi na ekwatathano lya kola noyaandjetu, nonda li tandi ipula kutya ondjuulukwe otayi ka guma nayi uukalele wandje.” Oshike a li a ningi i ilongekidhe? “Manga inaandi tembuka, onda li nda lesha iitopolwa mOshungolangelo kombinga yondjuulukwe. Shika osha li sha kwathele ndje shili ndi longekidhe omutima gwandje ndu ungaunge neshongo ndyoka. Moshitopolwa shimwe, omumwameme gumwe okwa li a shilipaleke okamwanakadhona kutya Jehova oku na ko nasha nako, a ti kutya, ‘Jehova ota vulu oku  ku sila oshimpwiyu shi vulithe pungame.’ Eshilipaleko ndyoka olya li lya nkondopaleke ndje lela.” Hannah nomusamane gwe Patrick, ohaya longo koMajuro kuuntuntu waMarshall. Hannah okwa pondola mokuungaunga noondjuulukwe mokugandja eitulomo lye kaamwatate naamwameme megongalo. Okwa ti: “Aluhe ohandi pandula Jehova omolwuumwayinathana muuyuni awuhe molwaashoka nayo oyaandjetu. Omolwekwatho lyawo lyopahole, onda vula okulonga moshitopolwa moka mu na ompumbwe onene.”

Simon

Okupanga uukuume: Simon okwa ti: “Shampa wa yi koshilongo kuushi ko nale, iinima ayihe ohayi kala yi ili. Omathimbo gamwe ohandi kala nda hala okuninga iiyolitha nonda hala aantu ya kale yu uvitike shoka nda hala kutya.” Erica ota ti: “Petameko, onda li ndu uvite nda thigala po, ihe shoka osha li sha kwathele ndje ndi tale shoka shi inyengitha ndje ndi tembuke. Inandi tembuka omolwuuwanawa wandje mwene, ihe omolwokulongela Jehova. Okwa gwedha ko a ti: “Mokweendela ko kwethimbo, onda li nda panga uukuume wa dhenga mbanda, mboka nda lenga.” Simon okwa li a longo nuudhiginini okwiilonga Oshipalaua, shoka osha li she mu kwathele e ‘egululile omutima gwe’ aamwatate naamwameme yomegongalo. (2 Kor. 6:13) Oonkambadhala dhe dhokwiilonga elaka ndyoka odha li dhe mu hedhitha kaamwatate. Eeno, uuna pu na yamwe aape, po opu na aamwatate taya longo nayo egongalo alihe ohali nyanyukilwa ekwatathano lyopothingo. Iizemo yilwe iiwanawa yini hayi monika kwaamboka haya ka longa kiitopolwa hoka ku na ompumbwe onene?

‘OTAYA TEYA OSHINDJI’

Omuyapostoli Paulus okwa ti: “Ngoka ta kunu ombuto oyindji, ota ka teya oshindji.” (2 Kor. 9:6) Ekotampango ndyoka lya popiwa moohapu ndhika osha yela kutya olyu ukithwa kwaamboka haya tamununa mo uukalele wawo. Iiyimati yini haya ‘teya oyindji’ moMicronesia?

Patrick naHannah

Shimwe, oompito odhindji dhokutameka omakonakonombiimbeli nokumona yo yene nkene aantu hayi ilongo nokutula miilonga oshili yOohapu dhaKalunga nokuninga ehumokomeho lyopambepo. Patrick naHannah oya li wo yu uvithile mo Angaur, okantuntu okashona ke na aantu 320. Konima sho yu uvithile mo oomwedhi mbali, oya li yi itsu mo omukiintu omuvali inaa hokanwa. Okwa li a taamba ko ekonakonombiimbeli nziya. Okwii longo oshili nomwenyo aguhe, nokwa ningi omalunduluko omanene monkalamwenyo ye. Hannah ota ti: “Aluhe shampa twa konakona naye, uuna tatu zi po pegumbo lye nuuthanguthangu wetu, ohatu itala owala e tatu ti: ‘Tangi Jehova!’” Hannah ota gwedha ko ta ti: “Ondi shi shi kutya Jehova okwa li ta ka nanena omukiintu nguka kuye momukalo gumwe nenge gwi ili. Ihe molwaashoka otwa ka longa koshitopolwa hoka ku na ompumbwe onene, otwa li twa vulu okumona nokukwathela omuntu nguka a fa onzi a tseye Jehova. Shika shimwe shomiimoniwa ya dhenga mbanda mbyoka twa mona monkalamwenyo yetu ayihe!” Erica okwa ti: “Uuna wa kwathele omuntu a tseye Jehova, oho mono enyanyu enenenene!”

MBELA ITO VULU OKUKUTHA OMBINGA?

Miilongo oyindji, omu na ompumbwe yaauvithi yUukwaniilwa. Mbela ito vulu okukala gumwe gwomwaamboka haya tembukile kiitopolwa hoka kwa pumbwa ekwatho? Pula Jehova megalikano a nkondopaleke ehalo lyoye lyokutamununa mo uukalele woye. Kundathana oshinima shika naakuluntugongalo megongalo lyeni, nomutonatelishikandjo, nenge nagumwe ngoka a li e na uuthembahenda woku ka longa koshitopolwa hoka kwa pumbwa ekwatho. Ngele owa tameke okuninga omalongekidho, nyolela koshitayimbelewa shoka hashi tonatele oshitopolwa moka wa hala oku ka longa, e to pula uuyelele owundji. * Otashi vulika nangoye to vulu okuwayimina aamwatate naamwameme omayuvi, kutya nduno aagundjuka nosho wo aakokele. Mboka ya hokana nenge mboka inaaya hokana yi igandja nehalo ewanawa, opo ya ka longe ya lole enyanyu ndyoka hali zi ‘mokuteya oshindji.’

^ okat. 17 Tala oshitopolwa “Mbela oto vulu ‘okutaagulukila kuMakedonia’?” shi li mUukalele Wetu wUukwaniilwa waAuguste 2011.

Tseya oshindji

OOLYE TAYA LONGO EHALO LYAJEHOVA KUNENA?

Iilonga yuutumwa oshike?

Oshike sha kwatelwa mo mokuninga omutumwa? Ohaya mono edheulo lini li ikalekelwa?