Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2014

‘Otamu ka ninga oonzapo dhandje’

‘Otamu ka ninga oonzapo dhandje’

“Jesus okwe ya yamukula a ti: ‘. . .Otamu ka ninga oonzapo [dhandje, NW] . . . sigo omiilongo ayihe yokombanda yevi.’” — IIL. 1:7, 8.

1, 2. (a) Olye e li oshiholelwa sha dhenga mbanda shokukala onzapo yaJehova? (b) Edhina Jesus otali ti shike, nongiini Omwana gwaKalunga a li a kala metsokumwe nedhina lye?

JESUS okwa ti: ‘Onda valwa nonde ya muuyuni mbuka ndi popye oshili.’ (Lesha Johannes 18:33-37.) Oohapu ndhoka Jesus okwa li e dhi lombwele omupangeli Omuroma, gwaJudea sho a li te mu pangula. Jesus Kristus opo owala a adhika a popi kutya ye omukwaniilwa. Konima sho pwa piti oomvula, omuyapostoli Paulus okwa popi kombinga yoshiholelwa shaJesus shuulaadhi, ngoka a li “a hempulula ehempululo ewanawa koshipala shaPontius Pilatus.” (1 Tim. 6:13) Eeno shili, omathimbo gamwe ohashi pula uulaadhi lela, opo tu kale ‘aainekelwa naahokololi aanashili’ muuyuni mbuka waSatana wu udha uutondwe. — Eh. 3:14.

2 Jesus okwa li onzapo yaJehova okuza kevalo, molwaashoka ye Omujuda. (Jes. 43:10) Okwa ka ninga shili onzapo yaKalunga ya dhenga mbanda yokupopila edhina Lye, inaayi kala ko nando nale. Jesus okwa li a tala ko eityo lyedhina lye ndyoka a lukwa kuKalunga li li oshinima sha simanenena. Omuyengeli okwa li a lombwele he Josef, ngoka a li te ke mu putudha kutya Maria okwa simbapalekwa kombepo ondjapuki. Omuyengeli okwa gwedha ko a ti: “Oye ta ka vala okanona  okamati, e to ka luku Jesus, oshoka oye ta hupitha aantu ye moondjo dhawo.” (Mat. 1:20, 21) Omulongwantu gumwe gwOmbiimbeli okwa li a popi kutya edhina Jesus olya za kedhina lyOshihebeli, Jeshua noli li efupipiko lyedhina lyaKalunga; tali ti: “Jehova Ehupitho.” (Mat. 10:6; 15:24; Luk. 19:10) Sigo okunena, Jesus oku li ta gandja uunzapo nuulaadhi kombinga yUukwaniilwa waKalunga. Omunyoli gwEvaangeli Markus okwa nyola a ti: “Jesus okwa yi kuGalilea nokuuvitha elaka ndika etoye lya zi kuKalunga a ti: ‘Ethimbo lya thiki, Oshilongo shaKalunga she ya popepi. Itedhululeni, mu itaale elaka etoye.’” (Mark. 1:14, 15) Jesus okwa li wo a aneke pomutenya nuulaadhi aawiliki yelongelokalunga lyOshijuda, shoka she ya ningitha ye mu dhipagele komuti gwomahepeko. — Mark. 11:17, 18; 15:1-15.

“IILONGA IINENE YAKALUNGA”

3. Oshike sha li sha ningwa mesiku etitatu konima yeso lyaJesus?

3 Kalunga okwa li a longo oshikumithalonga oshinenenene! Mesiku etitatu, konima sho Jesus a si eso tali uvitha omwenyo omutoye, Jehova okwa li e mu yumudha. Jesus ina yamuka nolutu lwopanyama, ihe okwa yumudhwa e li oshishitwa shopambepo ihaashi si. (1 Pet. 3:18) Omolwuunzapo woshinima shika, Omuwa Jesus okwa li a lundulukile molutu lwopantu, nokwa gandja uunzapo kutya okwa yumuka. Mesiku tuu ndyoka lyokuyumuka kwe, okwa li i ihololele aalongwa ye ya yoolokathana lwiikando iitano lwaampo. — Mat. 28:8-10; Luk. 24:13-16, 30-36; Joh. 20:11-18.

4. Okugongala kuni Jesus a li a ningi mesiku lyokuyumuka kwe, noshinakugwanithwa shini a li a pe aalongwa ye?

4 Oshikando oshititano shoka Jesus a li i ihololele aayapostoli ye okwa li e shi ningi, opo a kale nayo nosho wo yalwe mboka ya li ya gongala pamwe naye. Mesiku ndyoka kaali shi okudhimbiwa, okwa li a kwatele komeho ekonakono lyOohapu dhaKalunga. “Okwa patulula omadhiladhilo gawo, yu uve ko Omanyolo.” Kungawo oya li yu uvu ko kutya eso lye ndyoka lye etithwa kaatondi yaKalunga nosho wo eyumuko lye lyopashikumithalonga olya kala lya hunganekwa mOmanyolo. Pehulilo lyesiku moka a li a yumudhwa, Jesus okwa li a lombwele aapulakeni ye nawanawa kutya oshinakugwanithwa shawo oshashike. Okwa li e ya lombwele kutya “medhina lye aantu ayehe oye na okuuvithilwa kutya nayi itedhulule, Kalunga nota dhimi po oondjo dhawo. Tamekeni muJerusalem.” Okwa gwedhwa ko a ti: ‘One aahokololi yiinima mbika ayihe.’ — Luk. 24:44-48.

5, 6. (a) Omolwashike Jesus a li a ti kutya ‘otamu ka ninga oonzapo dhandje’? (b) Aalongwa yaJesus oya li taya ka tseyithila yalwe oshinima shini oshipe shi na ko nasha nelalakano lyaJehova?

5 Konima sho pwa piti omasiku 40, Jesus okwa li i ihololele aayapostoli ye lwahugunina. Aayapostoli ye oya li yu uvu ko shoka a li a hala okutya sho a popi ta ti: “Otamu ka ninga oonzapo [dhandje, NW] paantu ayehe mboka ye li muJerusalem, muJudea alihe nomuSamaria sigo omiilongo ayihe yokombanda yevi.” (Iil. 1:8) Omolwashike Jesus a ti: ‘Otamu ka ninga oonzapo dhandje,’ ihe hadhaJehova? Jesus ka li ta vulu okutya naya kale oonzapo dhaJehova. Omolwashike mbela? Mboka a li ta popi nayo Aaisraeli, yo oya adhika nale ye li oonzapo dhaJehova.

Tu li aalongwa yaJesus ohatu tsikile okutseyithila yalwe elalakano lyaJehova li na ko nasha nonakuyiwa (Tala okatendo 5, 6)

6 Aalongwa yaJesus oya li ye na okulombwela yalwe kombinga yelalakano lyaJehova. Shoka osha li shi vulithe pokuhupithwa kwAaisraeli muupika waEgipiti nomuupongekwa waBabilonia. Eso neyumuko lyaJesus Kristus olye shi ninga tashi wapa tu manguluke mo muupongekwa uunene, ano muupika wuulunde neso. Popentekoste 33 E.N., aalongwa yaJesus mboka opo ya li ya gwayekwa oya tseyithile aantu “iilonga iinene yaKalunga.” Oyendji mboka ya li yu uvu onkundana ndjoka oya katuka oonkatu. Kungawo, sho e li kolulyo lwaHe megulu, Jesus okwa li a tameke okumona nkene eityo lyedhina lye tali gwanithwa, sho aantu omayuvi tayi iyele ombedhi e taya tula eitaalo lyawo muye e li uupitilo waJehova wokuhupitha aantu. — Iil. 2:5, 11, 37-41.

 ‘IIKULILA OPO A HUPITHE OYENDJI’

7. Iiningwanima yomesiku lyaPentekoste 33 E.N., oyu ulike shike?

7 Iiningwanima yomesiku lyaPentekoste mo 33 E.N., oya li yu ulike kutya Jehova okwa li a taamba ko ongushu yeyambo lyolutu lwaJesus lwopantu lwa gwanenena lu li ekwatakanitho nenge ofuto omolwuulunde. (Heb. 9:11, 12, 24) Ngaashi Jesus a li e shi yelitha, ka li e ya “okuyakulwa, ihe okuyakula nokugandja omwenyo gwe, [“gu li iikulila opo,” NW] a hupithe oyendji.” (Mat. 20:28) “Oyendji” mboka ya li taya ka mona uuwanawa mekuliloyambo lyaJesus kaya li owala Aajuda mboka yi itedhulula. Pehala lyaashono, oshi li ehalo lyaKalunga “aantu [yomaludhi agehe, NW] ya hupithwe,” molwaashoka ekulilo olya ‘kutha po oondjo dhuuyuni!’ — 1 Tim. 2:4-6; Joh. 1:29.

8. Aalongwa yaJesus oya li yu uvitha shi thike peni, nongiini shika sha li sha wapa?

8 Mbela aalongwa yaJesus mboka yopetameko oya li ngaa ye na uulaadhi mboka wa pumbiwa opo ya tsikile okuuvitha kombinga ye? Eeno, oya li ye wu na, ihe kaya li ye shi ningi koonkondo dhawo yene. Ombepo ondjapuki yaJehova oyi na oonkondo. Oya li ye ya tsu omukumo noku ya nkondopaleka ya tsikile nokuuvitha. (Lesha Iilonga 5:30-32.) Oomvula 27 lwaampono konima yOpentekoste 33 E.N., okwa li taku vulu okutiwa kutya “elaka etoye nolyoshili” olya thika kAajuda nokwaamboka yi itedhululithwa ya ninge yeitaalo lyOshijuda nosho wo ‘kaantu ayehe yomuuyuni.’ — Kol. 1:5, 23.

9. Ngaashi sha li sha hunganekwa, oshike sha li sha ningilwa egongalo lyopetameko lyopaKriste?

9 Egongalo lyopetameko lyopaKriste olya li lye endele ko tali nyatekwa. (Iil. 20:29, 30; 2 Pet. 2:2, 3; Jud. 3, 4) Ngaashi sha popiwa kuJesus, uushunimonima, mboka wa li tawu humithwa komeho ‘kuMwiinayi,’ Satana. Owa li tawu ka koka nokupengitha Uukriste washili sigo “ehulilo lyonkalelo yiinima.” (Mat. 13:37-43, NW) Opo nduno Jehova okwa li ta ka tula Jesus koshipangelapundi e li Omukwaniilwa gwuuyuni awuhe. Shoka osha li sha ningwa muKotoba mo 1914, moka mwa li mwa tameke “omasiku gahugunina” gonkalelo yaSatana yuukolokoshi. — 2 Tim. 3:1NW.

10. (a) Aakriste aagwayekwa yopethimbo lyetu oya li ya tegelela ethimbo lini? (b) Oshike sha li sha ningwa muKotoba mo 1914, naashoka oshi iwetikile ngiini?

10 Aakriste aagwayekwa pethimbo lyetu oya li ya popi komeho yethimbo kutya Kotoba 1914 ota ka kala omundhindhilikwedhi. Oya li ya kankamekela uuyelele mboka kehunganeko lyaDaniel kombinga yomuti omunene ngoka gwa li gwa  kewa po nogwa li tagu ka koka ishewe konima ‘yomathimbo gaheyali.’ (Dan. 4:16, NW) Jesus okwa li tu ulike kethimbo ndika li li ‘ethimbo lyAapagani’ mehunganeko lye kombinga yokukala po kwe kwomonakuyiwa nosho wo “ehulilo lyonkalelo yiinima.” Okuza kethimbo lyomomumvo 1914, ‘endhindhiliko lyokuholoka kwaKristus’ e li Omukwaniilwa gwevi omupe oli iwetikile kwaayehe. (Mat. 24:3, 7, 14; Luk. 21:24) Onkee ano, okuza mpoka “iilonga iinene yaKalunga” oya kala ya kwatela mo okulangeka po Jesus koshipangelapundi e li Omukwaniilwa gwaantu ayehe.

11, 12. (a) Omukwaniilwa gwevi omupe okwa li a tameke okuninga shike momumvo 1919 ngoka gwa landula iita? (b) Ehumokomeho lini lya ka kala li iwetikile okuza momumvo 1930 wu uka komeho? (Tala kethano ndyoka li li petameko.)

11 E li Omukwaniilwa gwevi omupe, Jesus Kristus okwa li a tameke nziya okumangulula aalanduli ye aagwayekwa muukwatwa ‘waBabiloni oshinene.’ (Eh. 18:2, 4) Omumvo 1919 ngoka gwa landula iita ogwa li gwe shi ningi tashi wapa, opo ku gandjwe uunzapo muuyuni awuhe kombinga yuupitilo mboka Kalunga ta longitha nosho wo onkundana ombwanawa yuukwaniilwa mboka wa dhikwa po. Aakriste aagwayekwa oya li ya longitha ompito ndjika ya gandje uunzapo, shoka sha li sha ningitha aagwayekwa yalwe omayuvi ya gongelwe ya ninge aathigululi pamwe naKristus.

12 Okuza pomumvo 1930 nasha wu uka komeho, osha li sha yela mo kutya Kristus okwa tameka okugongela ‘oonzi dhe dhilwe’ omamiliyona ndhoka dha thikama po ‘mongundu onene’ yaantu yomiigwana ayihe. Mewiliko lyAakriste aagwayekwa, ongundu ndjika onene ohayi landula wo oshiholelwa shaJesus shuulaadhi. Ohayi shi ulike montaneho kutya oyi inekela muKalunga naKristus, oyo ya kale aahupithi yawo. Mokwiidhidhimikila iilonga mbika yokugandja uunzapo nokutsikila okukala neitaalo mekuliloyambo lyaKristus, aantu mbaka otaya ka kala ye na uuthembahenda wokuhupa ‘puudhigu uunene,’ mboka tawu ka hingila mehulitho po lyUuyuni waSatana. — Joh. 10:16; Eh. 7:9, 10, 14.

‘NATU KALE TU NA OMUKUMO GWOKUUVITHA ONKUNDANA OMBWANAWA’

13. Tu li Oonzapo dhaJehova, otwa tokolatoko okuninga shike, nomolwashike tu na uushili kutya otatu ka pondola?

13 Natu tsikile okukala twa lenga uuthembahenda wetu wokukala Oonzapo ‘dhiilonga iinene yaKalunga’ mbyoka a ninga nosho wo dhomalaleko nuuyamba gomonakuyiwa. Odhoshili kutya okugandja uunzapo ihaku kala aluhe okupu. Oyendji yomaamwatate ohaya longo miitopolwa moka mu na aantu kaaye na ko nasha nohaye ya sheke, nenge nokuli haye ya hepeke. Otatu vulu okuninga ngaashi omuyapostoli Paulus nooyakwawo ya li ya ningi. Paulus okwa ti: ‘Kalunga okwe tu pe omukumo oku mú hokololela onkundana ombwanawa ya zi kuye, nonando opwa li omakondjitho ogendji.’ (1 Tes. 2:2, yelekanitha NW.) Onkee ano, inatu tyololoka nando. Pehala lyaashono, natu kale twa tokolatoko tu kale  metsokumwe neiyapulo lyetu sho onkalelo yaSatana tayi hulithwa po. (Jes. 6:11) Itatu vulu oku shi ninga koonkondo dhetu yene. Ihe otu na okulandula oshiholelwa shAakriste yopetameko. Onkee ano, otu na okugalikana, opo Jehova e tu pe “oonkondo dhi vule ndhoka dhopaunshitwe,” (NW) okupitila mombepo ye ondjapuki. — Lesha 2 Aakorinto 4:1, 7; Luk. 11:13.

14, 15. (a) Aakriste yashili oya li ya talika ko ngiini methelemumvo lyotango E.N., nomuyapostoli Petrus okwa li a popi shike kombinga yawo? (b) Otu na okukala tu uvite ngiini ngele otwa ningwa nayi molwaashoka tu li Oonzapo dhaJehova?

14 Kunena, aantu omamiliyona otashi vulika yi itye Aakriste, “ihe iilonga yawo itayi shi holola. Okukala kwawo okwo iikungitha, ihaa vulika yo itaa vulu okulonga uuwanawa nando owasha.” (Tit. 1:16) Oshi li nawa tu dhimbulukwe kutya methelemumvo lyotango, Aakriste yashili oya li ye tondike koyendji, sha hala okutya, kaantu oyendji yopethimbo lyawo. Shoka osha ningitha omuyapostoli Petrus a nyole ta ti: ‘Ngele otamu shekwa molwaasho tamu landula Kristus, one aanelago, oshoka ombepo yaKalunga, oyi li kombanda yeni.’ — 1 Pet. 4:14.

15 Mbela oohapu ndhoka dha nwethwa mo otadhi vulu okuukithwa kOonzapo dhaJehova kunena? Eeno. Ohatu gandja shili uunzapo kombinga yuukwaniilwa waKristus. Okukala tu tondike molwaashoka twa humbata edhina lyaJehova okwa faathana ‘nokushekwa molwaasho tatu landula Jesus Kristus.’ Jesus okwa li a lombwele aapataneki ye a ti: “Ongame onde ya medhina lyaTate, one noinamu taamba ndje.” (Joh. 5:43) Onkee ano, uuna wa tsakaneke omapataneko miilonga yokugandja uunzapo, kala wu na omukumo. Okuningwa nayi hoka oku li euliko kutya Kalunga oti imemeha e ku hokwa nosho wo kutya ombepo ye ‘oyi li kombanda yoye.’    

16, 17. (a) Miilongo oyindji muuyuni Oonzapo dhaJehova otadhi nyanyukilwa shike? (b) Owa tokolatoko okuninga shike?

16 Dhimbulukwa kutya miilongo oyindji kunena omwaalu gwaantu mboka taye ya moshili otagu ende tagu londo. Miitopolwa moka mwa longwa nawa, ohatu adha mo natango aantu mboka ye na ehalo lyokupwilikina nosho wo mboka tatu vulu okulombwela etumwalaka lyehupitho lya dhenga mbanda. Natu kale hatu shuna kwaamboka yu ulika ohokwe. Natu konakene Ombiimbeli nayo ngele otashi wapa, noku ya kwathela ya lalakanene eiyapulo neninginitho. Otashi vulika wu uvite ngaashi Sarie gwokoSouth Africa ngoka a kala i ipyakidhila miilonga yokuuvitha uule woomvula dhi vulithe po 60. Okwa ti: “Onda pandula noonkondo molwaashono okupitila mekuliloyambo lyaJesus, otandi vulu okukala ndi na ekwatathano ewanawa naJehova, Omupangeli gweshito alihe, nonda nyanyukwa sho tandi vulu okutseyithila yalwe edhina lye enene.” Ye nomusamane gwe, Martinus, oya kwathela aantu oyendji mwa kwatelwa aanona yawo yatatu, ya ninge aalongeli yaJehova. Sarie okwa gwedha ko ta ti: “Kapu na iilonga yilwe hayi etele omuntu egwaneno li thike mpaka, nomokupitila mombepo ye ondjapuki, Jehova ohe tu pe atuhe oonkondo ndhoka twa pumbwa, opo tu tsikile niilonga mbika yokuhupitha oomwenyo.”

17 Kutya nduno otwa ninginithwa nenge otatu longo nuudhiginini tu adhe elalakano ndyoka, otu na omatompelo ga kola lela gokupandula omolwuuthembahenda wokweendathana negongalo lyomuuyuni awuhe lyOonzapo dhaJehova. Onkee ano, tsikila nokugandja uunzapo nawanawa sho to kambadhala okukala wa yogoka muuyuni mbuka waSatana wa nyata. Mokuninga ngaaka, oto ka simanekitha Tate yetu gwomegulu omunahole, ngoka tu na uuthembahenda wokuhumbata edhina lye.