Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2014

“One oonzapo dhandje”

“One oonzapo dhandje”

“‘One Oonzapo dhandje,’ Jehova osho ta ti.” — JES. 43:10, NW.

1, 2. (a) Oshitya onzapo otashi ti ngiini, niikundaneki oyindji muuyuni oya ndopa okuninga shike? (b) Omolwashike Jehova ini ikolelela kiikundaneki yuuyuni yi tseyithile aantu kombinga ye?

OSHITYA onzapo otashi ti ngiini? Embwiitya limwe olye shi fatulula tali ti: “Omuntu ngoka ha mono oshiningwanima, ye ta hokolola shoka sha ningwa po.” Pashiholelwa, moshilando Pietermaritzburg, shi li moSouth Afrika omu na oshifokundaneki hashi ithanwa The Witness. Osha kala nokunyanyangidhwa uule womimvo dha konda pe 160 ngashingeyi. Edhina lyoshifokundaneki shoka otali opalele, molwaashoka elalakano lyasho olyo okukundaneka paushili iiningwanima mbyoka tayi ningwa muuyuni. Omutoti gwasho okwa li u uvaneke kutya otashi ka kundaneka “oshili, oshili yi ihwa po, noitashi ka gwedhela nando.”    

2 Ihe shiyemateka, iikundaneki oyindji muuyuni ohayi ipwililike nenge yi pilike uushili wa simanenena kombinga yondjokonona yaantu. Uushili mboka owa popiwa kuKalunga Omunankondoadhihe okupitila momupolofeti gwe, Hesekiel ngoka a li ko nale. Kalunga okwa ti: ‘Iigwana otayi ka tseya kutya ongame Jehova.’ (Hes. 39:7, yelekanitha NW.) Oolye taya ka tseyithila iigwana mbyoka? Oonzapo dhe omamiliyona gahetatu lwaampono ndhoka hadhi tseyithile aantu miigwana ayihe kombinga ye, noyonakuziwa ye. Ohadhi tseyitha wo nkene hu ungaunga naantu ngashingeyi. Onkee ano, Omupangeli gweshito alihe ini ikolelela kiikundaneki yuuyuni yi tseyithile aantu kombinga ye. Oonzapo dhe ohadhi tseyitha wo omalaleko nuuyamba ngoka u uvanekela aantu monakuyiwa. Ngele ohatu pititha komeho iilonga mbyoka otashi  ulike kutya otu li metsokumwe nedhina ndyoka twa lukilwa. Jesaja 43:10 otayi tu popi tayi ti: “One oonzapo dhandje, Jehova osho ta ti, ‘eeno, omupiya gwandje nde mú hogolola.’”

3, 4. (a) Uunake Aakonakoni yOmbiimbeli ya li ya lukwa edhina epe, noya li yu uvite ngiini? (Tala ethano petameko.) (b) Omapulo geni tatu ka kundathana?

3 Oshi li uuthembahenda okukala tatu ithanwa nedhina lyaJehova, molwaashoka ye “omukwaniilwa gwaaluhe.” Jehova ota ti: “Ndika olyo edhina lyandje sigo aluhe. Osho tandi ka tumbulwa komaluvalo nomaluvalo.” (1 Tim. 1:17; Eks. 3:15; yeleknitha Omuuvithi 2:16.) Aakonakoni yOmbiimbeli oya li ya lukwa edhina Oonzapo dhaJehova momumvo 1931. Egongalo limwe moKanada olya nyola lya ti: “Onkundana ombwanawa kutya tse ‘Oonzapo dhaJehova’ oye tu nyanyudha, noye tu zaleke omukumo tu kale metsokumwe nedhina ndyoka epe.” Oshungolangelo yimwe oya li ya nyanyangidha oombapila odhindji dha nyolwa kwaamboka taya pandula.

4 Ongiini to vulu okuulika olupandu lwoye sho wu na uuthembahenda wokwiithana nedhina lyaJehova? Mbela oto vulu ngaa okuyelithila gumwe oovelise ndhoka dhi li muJesaja moka tamu adhika edhina ndyoka?

OONZAPO DHAKALUNGA DHOPETHIMBO LYONALE

5, 6. (a) Omomukalo guni aavali Aaisraeli ya li ya gandja uunzapo kombinga yaJehova? (b) Aavali Aaisraeli oya li ya lombwelwa ishewe ya ninge shike, nomolwashike aavali Aakriste ye na okuninga sha faathana kunena?

5 Omuisraeli kehe pethimbo lyaJesaja okwa li “onzapo” yaJehova. Oshigwana ashihe shaIsraeli osha li “omupiya” gwaKalunga. (Jes. 43:10, NW) Aavali Aaisraeli oya li haya gandja uunzapo koyana moku ya longa nkene Kalunga a li u ungaunga noohekulululwa. Pashiholelwa, aavali oya li ya pewa omalombwelo nkene ye na okudhana Opaasa omumvo kehe. Oya lombwelwa taku ti: “Aana yeni nge taye mú pula taa ti: ‘Iinima mbika otayi ti ngiini?’ otamu yamukula tamu ti: ‘Oyo eyambo lyOpaasa lyokusimaneka OMUWA, molwashoka a pitilila omagumbo gAaisraeli muEgipiti. Okwa dhipaga Aaegipiti, ihe okwe tu hupitha.’” (Eks. 12:26, 27) Ngoka ogwa li omukalo gumwe kaavali okugandja uunzapo. Oya li wo haya lombwele  oyana nkene omukwaniilwa Farao a li a yamukula Moses, sho a yi kuye oshikando shotango. Okwa li e mu pule a mangulule oshigwana shaIsraeli shi ye mombuga, shi ka galikane Jehova. Farao okwa li a pula a ti: “[Jehova, NW] olye, ndi pulakene ewi lye nondi laleke Aaisraeli ya ye?” (Eks. 5:2) Aavali oya li wo taya vulu okuhokololela oyana kutya oshike sha ningwa po sho Aaegipiti ya tuminwa omageelo omulongo. Oya li wo ye ya lombwele nkene Aaisraeli ya hupu miikaha yetangakwiita lyaEgipiti pEfuta Etiligane. Kungawo omukalo nkene Jehova a yamukula epulo lyaFarao ogwa li gwa yelela ayehe. Jehova okwa kala Omunankondoadhihe, nosho e li ngaaka sigo onena. Oshigwana shaIsraeli osha li onzapo, sho shi imonene ko nomeho gasho shene kutya Jehova oye Kalunga kashili nOmugwanithi gwomauvaneko ge.

6 Osha yela kutya Aaisraeli mboka ya li ye na olupandu sho hayi ithanwa nedhina lyaJehova kaya li owala ya lombwele oyana kombinga yiikumithalonga mbyoka. Oya li wo ye yi hokololele aakwiilongo mboka ya li aapika yawo. Aaisraeli oya li ya pewa oshipango ya putudhe oyana ya kale ye shi omithikampango dhaKalunga dhuuyapuki. Jehova okwa ti: “Kaleni aayapuki, oshoka ngame OMUWA Kalunga keni omuyapuki.” (Lev. 19:2; Deut. 6:6, 7) Aaisraeli oya tulila po aavali Aakriste yokunena oshiholelwa oshiwanawa. Oye na wo okuputudha oyana ya kale aayapuki, opo ye ya kwathele ya simanekithe edhina lyaKalunga ekumithi. — Lesha Omayeletumbulo 1:8; Aaefeso 6:4.

Sho tatu longo oyana yetu kombinga yaJehova otashi simanekitha edhina lye (Tala okatendo 5, 6)

7. (a) Sho Aaisraeli ya li aadhiginini kuJehova, oya li ya nwethamo ngiini iigwana yopuushinda? (b) Ayehe mboka hayi ithwanwa nedhina lyaKalunga oye na oshinakugwanithwa shini komapepe gawo?

7 Aaisraeli oya li haya gandja uunzapo uuwanawa shi na ko nasha nedhina lyaKalunga ngele ye li aadhiginini. Oya li ya lombwelwa taku ti: “Nena iigwana ayihe kombanda yevi otayi ka mona kutya OMUWA okwe ku hogolola u ninge oshigwana she mwene, oyo notayi ku tila.” (Deut. 28:10) Shinikitha oluhodhi, Aaisraeli inaya kala adhiginini omathimbo ogendji. Iikando niikando oya kala nokulongela iikalunga mbyoka ya ningwa kaantu. Oya li ya longele iikalunga yomuKaanana. Oya kokeke iikala yonyanya ya fa yiikalunga mbyoka. Aaisraeli osho nokuli ya ka yamba po oyana nokuhepeka oohepele. Otatu ilongo oshiilongomwa sha simana kwaashoka sha li sha ningwa kAaisraeli. Otu na okukambadhala tu holele aluhe Jehova, ngoka e li Omuyapukilela, molwaashoka ohatu ithanwa nedhina lye.

‘TALA OTANDI NINGI IINIMA IIPE’

8. Jehova okwa li a pe Jesaja oshinakugwanithwa shini, na Jesaja okwa li i inyenge ngiini?

8 Jehova okwa hunganeka kutya oshigwana shaIsraeli otashi ka kala onzapo yokumona nkene ta ka longa iikumithalonga sho te ke shi mangulula muupika. (Jes. 43:19) Oontopolwa hamano dhopetameko membo lyaJesaja otadhi gandja omalondodho kombinga yuudhigu mboka tawu ka adha Jerusalem niilando mbyoka ye shi kundukidha. Jehova oha mono okanima kehe ke li momitima dhetu. Okwa li a lombwele Jesaja a tsikile nokulondodha oshigwana, nonando osha li shi na omitse omikukutu. Iikala yAaisraeli oya li ya halutha Jesaja. Okwa li a hala okutseya kutya osigo uunake taya kala ya tangalala. Mbela Kalunga okwa li ngaa e mu yamukula? Eeno. Okwa ti: “Osigo iilando ya kumunwa po noya mbugala — sigo omagumbo taga kala gaa na aantu — sigo oshilongo tashi ningi ombuga yowala.” — Lesha Jesaja 6:8-11.

9. (a) Uunake ehunganeko lyaJesaja li na ko nasha naJerusalem lya li lya gwanithwa? (b) Omolwashike oshigwana shaKalunga shi na okukala sha tonata kunena?

9 Jesaja okwa li a pewa oshilonga shuupolofeti momumvo gwahugunina gwelelo lyOmukwaniilwa Usia lwomo 778  K.E.N. Jesaja okwa tsikile noshilonga she uule womimvo 46 sigo okonima yo 732 K.E.N., pethimbo lyelelo lyomukwaniilwa Hesekiel. Okuza mpono opwa li pwa piti omimvo 125 manga ehanagulo lyaJerusalem inaali ningwa mo 607 K.E.N. Kungeyi oshigwana shaKalunga osha li sha pewa komeho yethimbo uuyelele wa gwana waashoka tashi ke shi ningilwa monakuyiwa. Oshigwana shaKalunga kunena nasho wo osha pewa uuyelele wa gwana lela waashoka tashi ka ningwa po monakuyiwa. Sho oshifo  shOshungolangelo shotango sha li sha nyanyangidhwa omimvo 135 dha ka pita, osha kala nokuladhipika aaleshi yasho ya kale ya tonata. Shika osha pumbiwa molwaashoka epangelo lyaSatana oli li pokuhulithwa po masiku, nokupingenwa po kElelo lyOomvula Eyuvi lyaJesus Kristus. — Eh. 20:1-3, 6.    

10, 11. Aaisraeli mboka ya li muBabilonia oya li ya mono egwanitho lyehunganeko lyaJesaja lini?

10 Aajuda oyendji mboka ya vulika kelombwelo lyaJehova oya li ya hupu sho Jerusalem sha hanagulwa po. Oya li yi igandja komukwaniilwa gwaBabilonia e taya falwa muupongekwa. (Jer. 27:11, 12) Oshigwana shaKalunga osha li sha mono egwanitho lyehunganeko ekumithi konima yomimvo 70. Ehunganeko ndyoka otali ti: “OMUWA, omuhupithi gweni, Omuyapuki gwaIsraeli ota ti: ‘Omolwoye tandi tumu iita yi matukile Babiloni; otandi teyagula po omiyelo dhoshilando.’” — Jes. 43:14.

11 Uusiku wumwe muKotoba mo 539 K.E.N., opwa li pwa ningwa oshinima shimwe shoka sha li metsokumwe nehunganeko lyaJesaja. Oshinima shoka osha li sha halutha uuyuni. Uusiku mboka omukwaniilwa gwaBabilonia pamwe nomalenga ge oya li taya nwine omaviinu miitenga iiyapuki mbyoka ya kuthwa motempeli muJerusalem. Oya li taya tanga iikalunga yawo mbyoka ya ningwa kaantu. Opo ngaa ye li po etangakwiita lyaMedia naPersia olya li lya kwata ko Babilonia ombadhilila. Mo 538 nenge mo 537 K.E.N, sho Kores a sindi Babilonia, okwa li a lombwele Aajuda ya shune koshilongo shawo, ya ka tunge otempeli yaKalunga muJerusalem. Omupolofeti Jesaja okwa adhika a hunganeka nale iinima ayihe mbyoka. Okwa li wo a hunganeke shoka Jehova u uvaneka sho a ti ota ka sila oshimpwiyu nokugamena oshihupe shaantu ye mboka ya li yi itedhulula sho taya galukile kuJerusalem. Kalunga okwe yi ithana ta ti: “Oyo aantu mboka ndi ishitile ngame mwene, oyo notaa ka imbila ndje omahambelelo.” (Jes. 43:21; 44:26-28) Ngele Aaisraeli mboka ya li muupongekwa oya galuka nokutunga otempeli yaJehova muJerusalem, oya li oonzapo kutya Kalunga awike kashili, Jehova, oha gwanitha po lela aluhe oohapu dhe.

12, 13. (a) Oolye ya li pamwe nAaisraeli sho elongelokalunga lyaJehova lya tungululwa? (b) ‘Oonzi dhilwe’ odha tegelelwa dhi ninge shike sho tadhi ambidhidha “Israeli yaKalunga” nodhi na etegameno lini?

12 Aantu omayovi ogendji mboka kaaye shi Aaisraeli oya li ya ningi oshitopolwa shoshigwana shoka oshipe. Konima yethimbo oyendji mboka kaaye shi Aajuda oya li yi itedhululithwa e taya ningi yeitaalo lyOshijuda. (Esra 2:58, 64, 65; Est. 8:17) Kunena “ongundu onene” ndjoka yi li ‘oonzi dhilwe’ dhaJesus ohayi ambidhidha Aakriste aagwayekwa, mboka ye li “Israeli yaKalunga.” (Eh. 7:9, 10, NW; Joh. 10:16; Gal. 6:16, NW) Ongundu onene nayo ohayi ithanwa wo nedhina lyaKalunga, Oonzapo dhaJehova.

13 Pethimbo lyElelo lyOomvula Eyuvi lyaKristus, ongundu onene otayi ka kala yi na enyanyu  kaali shi ku yelekwa nando. Otayi ka lombwela mboka taya ka yumudhwa kutya onkalo oya li ngiini kuyo ye li Oonzapo dhaJehova, pethimbo lyehulilo lyonkalelo yuuyuni waSatana. Ihe opo tu ke shi ninge otu na okukala metsokumwe nedhina lyetu nokukambadhala tu kale aayapuki. Kutya nduno otu kambadhale shi thike peni, tse aalunde. Onkee ano, otu na okukala hatu pula edhiminopo lyoondjo esiku kehe ngele twa ponyo okulonga uuyuuki. Otu na wo okukala tu shi kutya okulukilwa edhina lyaKalunga eyapuki oshi li oshinima sha simana kaaku na we. — Lesha 1 Johannes 1:8, 9.

SHOKA EDHINA LYAKALUNGA TALI TI

14. Edhina Jehova otali ti shike?

14 Oshi li nawa tu kale hatu tedhatedha keityo lyedhina lyaKalunga. Uuna tatu shi ningi otatu ka kala nolupandu omolwesimano lyokwiithanwa nedhina lyaKalunga. Edhina “Jehova” olya za koshityalonga shOshihebeli shoka tashi holola iilonga. Edhina ndyoka otali ti “okuningitha.” Onkee ano, edhina Jehova otali ti kutya “Oha Ningitha.” Jehova okwe eleka lela okwiithanwa ngaaka, molwaashoka oye Omushiti gwewangandjo alihe niishitwa iinandunge. Oku li wo Omugwanithi gwomauvaneko ge. Ota ka tsikila nokuningitha ehala lye nosho wo elalakano lye li gwanithwe. Kapu na omutondi gumwe ta vulu okuya moshipala ehalo lyaKalunga. Satana naye ke na sho ta vulu okuninga po kutya nee nduno okukambadhala shi thike peni.

15. Jehova okwa li u ulike ngiini omaukwatya ge ngoka ge li metsokumwe neityo lyedhina lye? (Tala okampungu “ Edhina ndyoka li na eityo.”)

15 Jehova okwa li a pe Moses oshinakugwanitha shokutembudha oshigwana she muEgipiti. Jehova okwa li a holola uukwatya we wumwe ta longitha oshityalonga shoka shi na eityo lya pambathana nedhina lye. Okwa li a longitha oshitya ngame. Ombiimbeli otayi ti: “Kalunga okwa lombwele Moses a ti: ‘Otandi ka kala shoka nda hogolola okukala’ [nenge, “Ngame otandi ka kala ndi li ngaashi ndi li”]. Okwa gwedha ko ta ti: ‘Lombwela Aaisraeli to ti “Ngoka ha ningitha okwa tumu ndje kune.”’” (Eks. 3:14, NW) Onkee ano, Jehova oha ningi kehe shimwe shoka sha pumbiwa monkalo kehe, a gwanithe po elalakano lye. Okwa li a ningi Omuhupithi, Omugameni, Omuwiliki nosho wo Omusilishimpwiyu gwAaisraeli mboka ya li muupika. Okwa li wo e ya gwanithile po oompumbwe dhawo dhopalutu nodhopambepo.

NATU ULIKE OLUPANDU

16, 17. (a) Ongiini tatu vulu okuulika olupandu lwetu sho tu na uuthembahenda wokwiithanwa nedhina lyaJehova? (b) Oshike tatu ka kundathana moshitopolwa tashi landula?

16 Jehova onkene ngaa ta tsikile okukala metsokumwe nedhina lye moku tu gwanithila po oompumbwe dhetu adhihe dhopambepo nodhopalutu kunena. Ihe eityo lyedhina lyaKalunga inali ngambekelwa owala pwaashoka ye mwene ha hogolola okuninga. Oha ningitha wo shoka a hala shi ningwe shi na ko nasha niilonga mbyoka yi na okulongwa kOonzapo dhe, opo ehalo lye li gwanithwe po. Ngele ohatu tedhatedha kombinga yoshinima shika otashi ke tu ningitha tu kale metsokumwe nedhina lye monkalamwenyo yetu. Omumwatate Kåre ngoka e na omimvo 84, okwa kala ta longo nuulaadhi mokugandja uunzapo moNorway omimvo 70 dha ka pita. Okwa ti: “Ondi uvite kutya oshi li etumba enene okulongela Jehova, Omukwaniilwa gwaaluhe, nokukala ndi li oshilyo shaantu mboka hayi ithanwa nedhina lye eyapuki. Oshi li aluhe uuthembahenda okuyelitha oshili yOmbiimbeli nosho wo okumona aantu ye na omeho gu udha enyanyu noyu uvite ko oshili. Pashiholelwa, ohashi etele ndje enyanyu enene uuna tandi longo aantu nkene ekuliloyambo lyaKristus hali longo, nonkene taya vulu okumona omwenyo gwaaluhe okupitila mulyo nosho wo okuya muuyuni uupe wombili nowuuyuuki.”

17 Odhoshili kutya miitopolwa yimwe oshidhigu okwaadha mo aantu mboka ya hala okwiilonga kombinga yaKalunga. Mbela iho kala wa nyanyukwa, ngaashi omumwatate Kåre, uuna wa adha omuntu ta pulakene nawa, e to mu longo kombinga yedhina lyaJehova? Ongiini tatu vulu okukala Oonzapo dhaJehova nodhaJesus pethimbo limwe? Epulo ndyoka otali ka kundathanwa moshitopolwa tashi landula.