Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2014

“Omuwa oku ya shi mboka ye”

“Omuwa oku ya shi mboka ye”

“Ngoka e hole Kalunga, okwa tseyika wo kuKalunga.” — 1 KOR. 8:3.

1. Hokolola oshimoniwa shimwe shi li mOmbiimbeli shoka tashi ulike kutya yamwe mokati koshigwana shaKalunga shonale oya li ye na omadhiladhilo ga puka. (Tala ethano pombanda.)

ESIKU limwe Omusaaseri Omukuluntu Aaron okwa li a thikama posheelo shetsalihangano lyaJehova ethimbo lyongulonene. Okwa li e na oshikangwa shomulilo a tula mo iitsinino. Popepi naye, opwa li Kora nosho wo aalumentu 250, kehe gumwe e na oshikangwa shiitsinino. Kora naalumentu mboka, nayo oya li taya ningile Jehova omatsinino. (Num. 16:16-18) Petameko aalumentu mboka ayehe oya li taya monika ya fa aadhiginini kuJehova. Ihe nani yalwe oya li aanashipotha. Oya li ya hala okuyuga Aaron uuthembahenda we wuusaaseri mboka a li e na. (Num. 16:1-11) Aalumentu mboka oya li tayi ifundjaleke kutya Kalunga ota ka kala a panda omatsinino ngoka taya ningi. Ihe oshinima shoka osha li oluhindo olunene kuJehova, molwaashoka ye oha mono shoka shi li moomwenyo dhaantu. Okwa li e wete iihelele nenge uufudhime wawo. — Jer. 17:10.

2. Moses okwa li a popi shike, noohapu dhe odha li dha gwanithwa ngiini?

2 Moses okwa li a popi oshinima shimwe esiku ndyoka lya tetekela oshiningwanima shoka. Okwa ti: “OMUWA ota ka ulika, olye ngoka gwe.” (Num. 16:5) Jehova okwa li e shi holola puuyelele kutya oolye aalongeli ye yashili. Okwa li wo u ulike kutya mboka aafudhime oyeni sho a “tumu omulilo gwa hwama, nogwa lungunitha po aalumentu 250 mboka ya li ye na iitsinino.” (Num. 16:35; 26:10) Ihe Jehova okwa li  a hupitha omwenyo gwAaron. Shoka oshu ulike kutya Aaron oye omusaaseri gwolela nota longele Kalunga paushili. — Lesha 1 Aakorinto 8:3.    

3. (a) Onkalo yini ya li ya holoka po pethimbo lyomuyapostoli Paulus? (b) Jehova okwa li u ungaunga ngiini naamboka ya li ya tsu ondumbo naye pethimbo lyaMoses?

3 Aashunimonima oya li ya holoka ishewe konima yomimvo 1 500, pethimbo lyomuyapostoli Paulus. Yamwe mboka ya li tayi iti kutya Aakriste aniwa oya landula omalongo giifundja. Ihe nonando ongaaka, oya tsikile nokukala taye endathana negongalo. Uuna to tala aashunimonima mboka nomeho gokomutse, pokati kawo kapwa li eyooloko lyasha niilyo yilwe yegongalo. Ihe ombepo yawo ndjoka yuushinimonima oya li oshiponga kAakriste aadhiginini. Omambungu ngoka ge li miipa yoonzi oga li ga “yono po eitaalo lyoyendji.” (2 Tim. 2:16-18) Jehova ina fa aantu mboka haya tala nomeho gokomutse. Paulus okwa li a tseya nawa nkene Kalunga a li u ungaunga naatsindumbo nosho wo naKora naayambidhidhi ye, omimvo dha ka pita. Manga tu na oshinima shono momadhiladhilo, natu ka taleni kOohapu tadhi hokitha ndhoka Paulus a li a nyolele Timoteus. Otatu ka tala kutya otatu ilongo mo shike mudho.     

“ONGAME OMUWA, ITANDI LUNDULUKA”

4. Paulus okwa li a tompwa kushike, nokwe shi ulike lela ngiini sho a nyolele Timoteus?

4 Paulus okwa li e na uushili kutya Jehova ota ka kwata mo nuupu aafudhime. Okwa li a tompwa kutya Jehova ota ka mona mo mboka haya vulika kuye. Oshinima shoka Paulus okwa li e shi ulike lela okupitila moohapu dha nwethwamo ndhoka a hogolola sho a nyolele Timoteus. Paulus okwa nyola a ti: “Ihe ekankameno ndyoka lya tungwa kuKalunga, olya kola noitaali tenguka. Kulyo okwa nyolwa oohapu ndhika: ‘Omuwa oku ya shi mboka ye,’ na: ‘Kehe ngoka ta ti kutya ye ogwOmuwa, ne ethe uugoyoki.’” (2 Tim. 2:18, 19) Oohapu ndhoka Paulus okwa li e dhi nyola omanga aashunimonima ye li metifa lyokuyona po uupambepo wa yamwe megongalo.

5, 6. Oshike tashi hokitha kombinga yuutumbulilo “ekankameno ndyoka lya tungwa kuKalunga,” nongiini wa li wa nwethamo Timoteus?

5 Shoka tashi hokitha osho kutya uutumbulilo “ekankameno ndyoka lya tungwa kuKalunga” otawu holoka owala lumwe mOmbiimbeli. Paulus okwa li a hogolola iitya ya tya ngiini sho ta nyola enyolo ndika? Ombiimbeli oya longitha oshitya “ekankamemo” molupe lomufethelamo okuulika kiinima yi ili noyi ili. Osha kwatela mo Jerusalem shoka shi li oshilandopangelo shaIsraeli shonale. (Eps. 87:1, 2) Onkandangala ndjoka Jesus ta dhana yi na ko nasha nokugwanitha po elalakano lyaJehova nayo otayi yelekanithwa wo nekakankameno. (1 Kor. 3:11; 1 Pet. 2:6) Paulus okwa li e na shike momadhiladhilo sho a nyola ta ti: “Ekankameno ndyoka lya tungwa kuKalunga”?

6 Paulus okwa li a popi “ekankameno ndyoka lya tungwa kuKalunga” sho a li a totha moohapu dhaMoses ndhoka dhi li muNumeri 16:5. Oohapu ndhoka otadhi popi kombinga yaKora nosho wo aayambidhidhi ye. Osha yela kutya Paulus okwa li ta popi koshinima shoka sha li sha ningwa pethimbo lyaMoses. Elalakano lyaPaulus olya li okuladhipika Timoteus, noku mu dhimbulukitha kutya Jehova oku na uukwatya wokumona nosho wo okukelela iilonga yaatsindumbo. Elalakano lyaJehova itali ka yiwa moshipala kaashunimonima mboka ya li megongalo, ngaashi owala lya li inali lundululwa kuKora pethimbo lyaMoses. Paulus ina yelitha ombahu nokawawa kutya uutumbulilo “ekankameno ndyoka lya tungwa kuKalunga” otawu ti naanaa shike. Ihe iitya mbyoka a longitha oya li ya shilipaleke Timoteus a kale e na einekelo lya kolelela muJehova.

7. Omolwashike tu na uushili kutya Jehova omudhiginini noha katuka pauyuuki?

7 Omakotampango gaJehova oga dhenga mbanda, go ihaga lunduluka. Episalomi 33:11 otali ti: “Omadhiladhilo ge otaga piti sigo aluhe; omalalakano ge kage na mpoka taga hulu po.” Ombiimbeli otayi popi Jehova e li omukwaniilwa, omudhiginini, omunahole nosho wo omuyuuki nohi idhidhimike aluhe. (Eks. 15:18; Eps. 106:1; 112:9; 117:2) Maleaki 3:6 otayi ti: “Ongame OMUWA, itandi  lunduluka.” Jakob 1:17 okwa popi wo oohapu dha faathana sho a ti kutya puJehova “kapu na nando elunduluko nenge epingathano lyuuyelele nomilema.”

EKANKAMENO LYA “KOLA” NDYOKA TALI TUNGU EITAALO MUJEHOVA

8, 9. Oshike tatu ilongo methaneko lyaPaulus moka a popya ekankameno lya “kola”?

8 Oohapu dhaPaulus ndhoka dhi li muTimoteus omutiyali 2:19 odhi li ekankameno lyetumwalaka ndyoka lya fa lya takelwa koshinima sha kola. Pethimbo lyonale, osha li sha ha okunyola nenge okutakela endhindhiliko lyasha kekankameno lyetungo. Ohashi vulika ku kale kwa takelwa endhindhiliko ndyoka tali ulike kutya olye a tunga etungo ndyoka nenge kutya olyalye. Paulus oye omunyoli gwOmbiimbeli gwotango ngoka a longitha ethaneko ndika. * “Ekankameno [lya kola] ndyoka lya tungwa kuKalunga,” kulyo okwa nyolwa iinima iyali. Shotango, “Omuwa oku ya shi mboka ye.” Oshitiyali, “kehe ngoka ta ti kutya ye ogwOmuwa, ne ethe uugoyoki.” Oohapu ndhoka otadhi tu dhimbulukitha shoka sha nyolwa muNumeri 16:5. — Lesha.

9 Oshike tatu ilongo muutumbulilo enkakameno lya “kola” mboka wa popiwa kuPaulus? Otatu ilongo mo kutya omithikampango dhaJehova nosho wo omakotampango ge oga kankamena kooshili mbali ndhoka dha simanenena: (1) Jehova okuhole mboka aadhiginini kuye nosho wo (2) Jehova oku tonde okwaahenuuyuuki. Oshinima shino osha pambathana ngiini nuushunimonima megongalo?

10. Uushunimonima owa li wa gumu ngiini Aakriste aadhiginini pethimbo lyaPaulus?

10 Timoteus nosho wo yalwe mboka aadhiginini oya li ya haluthwa kevundakano ndyoka lye etwa kaashunimonima mboka ya li mokati kawo. Aakriste yamwe otashi vulika ya li tayi ipula kutya omolwashike nduno oohandimwe mboka ye na okweethiwa ya kale mokati kegongalo. Aadhiginini yamwe otashi vulika ya li ya kumwa ngele Jehova oku wete ngaa eyooloko ndyoka li li pokati kaamboka ye li aadhiginini nosho wo uufudhime waashunimonima. — Iil. 20:29, 30.     

Timoteus ka li a nwethwa mo kiikala yaashunimonima (Tala okatendo 10-12)

11, 12. Ontumwafo yaPaulus oya li ya koleke ngiini eitaalo lyaTimoteus?

11 Eitaalo lyaTimoteus olya li lya kolo sho Paulus e mu nyolele ontumwafo moka a popya shoka sha ningilwa omudhiginini Aaron ngoka a li kee na oshipo. Paulus okwa popi kutya Kora naayambidhidhi ye oya li ya anekwa pomutenya nosho wo kutya oya li ye ekelwahi, nokuhanagulwa po. Paulus okwa li a hala owala okuyelitha kutya nonando mokati kawo omu na aashunimonima, Jehova oku shi mboka taye mu longele moshili, ngaashi owala a li e ya shi pethimbo lyaMoses.

 12 Jehova omwiinekelwa, ye iha landuluka nando. Oku tonde okwaahenuuyuuki koludhi kehe. Pethimbo lye lyo opala, ota ka pangula aayoni mboka inaayi iyela ombedhi. Timoteus okwa li wo a dhimbulukithwa kutya oye mwene e na okweekelahi enwethomo lya nyata ndyoka tali zi kaashunimonima. Shika oku na oku shi ninga molwaashoka ye ohi ithana edhina lyaJehova nenge “ta ti kutya ye ogOmuwa.” *

OKULONGELA JEHOVA MOSHILI KAKU SHI OSIMA

13. Otu na okukala neinekelo lini?

13 Oohapu dha nwethwamo ndhoka Paulus a nyolele Timoteus otadhi vulu wo okukoleka eitaalo lyetu kunena. Ngiini mbela? Shotango, otadhi tu tsu omukumo sho tu shi kutya Jehova okwa tseya nawa uudhiginini wetu. Kakele kokutseya uudhiginini wetu, Jehova oku na ohokwe lela maantu mboka ye. Ombiimbeli otayi ti: “OMUWA ota tonatele uuyuni auhe, a nkondopaleke mboka ye na omitima dhe mu inekela.” (2 Ondjal. 16:9) Onkee ano, natu kale tu na einekelo lyashili kutya shoka tatu ningile Jehova tashi “zi momwenyo gwa yela,” kashi shi osima. — 1 Tim. 1:5; 1 Kor. 15:58.

14. Aantu yeni Jehova ihi idhidhimikile, nonando oya fa taye mu longele?

14 Osha simana wo tu kale tu shi kutya Jehova ihi idhidhimikile mboka taye mu longele nuufudhime. Ye “ota tonatele uuyuni auhe,” noha mono kehe ngoka e na omutima inaagu “mu inekela.” Omayeletumbulo 3:32 otayi ti: “Omugoyoki oye iihuna koshipala shOMUWA.” Aantu ya tya ngaaka, oyo mboka hayi iningitha ya fa haya vulika kuKalunga, ihe ohaya longo uulunde monanguwi. Omuntu ngoka i ishi uukaandje otashi vulika a kengelele yakwawo uule wokathimbo. Ihe Jehova ngoka omunankondoadhihe nomuuyuuki a shiga ko okwa gandja eshilipaleko ta ti: ‘Ngoka ta holeke iilonga ye iiwinayi, oye ke na elago.’ — Omayel. 28:13; lesha 1 Timoteus 5:24; Aahebeli 4:13.     

15. Iikala yini tu na okweekelahi, nomolwashike?

15 Jehova oku na oshigwana she, noyendji otaye mu longele nomwenyo aguhe. Osha pumba lela omuntu megongalo e mu longele nuufudhime ta ningile owina. Ihe yamwe oya li ye shi ningi pethimbo lyaMoses nosho wo pethimbo sho egongalo lyopaKriste opo lya totwa po. Onkee ano, otashi vulu wo okuningwa nokunena. (2 Tim. 3:1, 5) Mbela shino osha hala kutya otu na okukala twa limbililwa Aakriste ooyakwetu, nenge tu ya tale ko aanihelele yo kaaye shi aadhiginini kuJehova? Katu na okuninga ngaaka. Osha puka okukala twa limbililwa aamwatate naamwameme, ngele katu na omakankameno gasha. (Lesha Aaroma 14:10-12; 1 Aakoritno 13:7.) Otatu ka yonagula po uupambepo wetu yene, ngele inatu inekela kutya ooitaali ooyakwetu megongalo oye li aadhiginini.

16. (a) Owu na okuninga shike pauhandimwe wu kandeke uufudhime kawu mene omidhi momutima gwoye? (b) Mokampungu “ ikonakoneni, ne mu iyeleke” otatu ilongo shike?

16 Omukriste kehe na “konakone ye mwene, iilonga ye nkene ya tya.” (Gal. 6:4) Molwaashoka inatu gwanenena, oshipu kutse tu kokeke iikala ya puka yokulongela Jehova netatamutima. (Heb. 3:12, 13) Onawa tu kale hatu ikonakona omathimbo nomathimbo tu tale ngele otatu longele Jehova nomalalakano omawanawa. Otatu vulu okwiipula tatu ti: ‘Mbela ohandi longele ngaa Jehova molwaashoka ndi mu hole nonda hala oye a kale omupangeli gwandje? Nenge ohandi kala owala tandi gandja eitulomo komayambeko ngoka tandi ka mona mOparadisa? (Eh. 4:11) Osha yela kutya atuheni otatu ka mona uuwanawa ngele ohatu konakona iikala yetu, nokukutha mo okauzigo kehe kuufudhime hoka ki iyakela momitima dhetu.       

UUDHIGININI OTAWU TU ETELE ELAGO

17, 18. Omolwashike tu na okulongela Jehova moshili nonomutima aguhe?

17 Otatu ka likola uuwanawa owundji uuna tatu kambadhala okulongela Jehova moshili nonomutima aguhe. Omupisalomi gumwe okwa ti: “Omunelago omuntu ngoka OMUWA itee mu pe uusama  noke na iifundja nando yasha.” (Eps. 32:2) Osha yela kutya mboka taya vudha mo uufudhime mboka wu li momitima dhawo aanelago. Yo oye li wo mondjila ndjoka tayi ke ya petha elago lyashili monakuyiwa.

18 Jehova ota ka aneka pomutenya ayehe mboka haya longo uuwinayi nenge haye mu longele nomitima mbali. Ota ka ninga ‘eyooloko pokati komuyuuki nomukolokoshi, pokati komuntu ngoka te mu longele naangoka itee shi ningi.’ (Mal. 3:18) Ihe manga twa tegelela shoka shi ningwe, natu kale tu shi kutya “omeho gOmuwa oge wete aayuuki, naaluhe ota pulakene omaindilo gawo.” — 1 Pet. 3:12.

^ okat. 8 Ehololo 21:14 ndyoka lya ka nyolwa omimvo odhindji konima sho Paulus a nyolele Timoteus ontumwafo, olya popya “ekuma lyoshilando lya li lya tungilwa komamanya” 12, nokulyo okwa nyolwa omadhina gaayapostoli 12.

^ okat. 12 Oshitopolwa tashi landula ko otashi ka kundathana nkene tatu vulu okuholela Jehova mokweekelahi okwaahenuuyuuki.