Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juni 2014

“Hola Omuwa Kalunga koye”

“Hola Omuwa Kalunga koye”

“Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” —  MAT. 22:37.

1. Oshike sha koleke ohole ndjoka yi li pokati kaKalunga nOmwana?

JESUS KRISTUS, Omwana gwaJehova, okwa ti: “Ngame ondi hole Tate.” (Joh. 14:31) Okwa ti wo: “He oku hole Omwana.” (Joh. 5:20) Shoka kashi na oku tu kumitha, shaashi manga Jesus inee ya kombanda yevi, okwa kala omimvo odhindji ta longo pamwe naKalunga e li “engomba.” (Omayel. 8:30) Sho Jesus a kala ta longo pamwe naHe, okwa tseya nawa uukwatya we nokwa li e na omatompelo ogendji gokukala e mu hole. Ekwatathano ndika lyopothingo olyo lya koleke ohole yawo yokuholathana.

2. (a) Kalunga oku tu holele shike? (b) Omapulo geni tatu ka kundathaneni?

2 Omupisalomi David okwi imbi a ti: “OMUWA, ondi ku hole ngiini! Ongoye omupopili gwandje.” (Eps. 18:1) Oshoka Kalunga oku tu hole, natse wo otu na okukala tu mu hole. Ngele otwa kala hatu vulika kuJehova, nena ote ke tu ulukila kutya oku tu hole. (Lesha Deuteronomium 7:12, 13.) Ihe sho ihaa monika, mbela otatu vulu ngaa okukala tu mu hole? Okuhola Kalunga okwa kwatela mo shike? Omolwashike tu na okukala tu hole Kalunga? Nongiini tatu vulu okuulika kutya otu hole Kalunga?

 OTATU VULU NGAA OKUKALA TU HOLE KALUNGA?

3, 4. Omolwashike tatu vulu okukala tu hole Kalunga?

3 Ihatu vulu okumona Kalunga, oshoka “Kalunga oye Ombepo.” (Joh. 4:24) Ihe otatu vulu okukala tu mu hole. Ombiimbeli otayi tu ladhipike tu ulike kutya otu mu hole. Pashiholelwa, Moses okwa lombwele Aaisraeli a ti: “Hola OMUWA Kalunga koye komutima gwoye aguhe, komwenyo gwoye aguhe nonoonkondo dhoye adhihe.” —  Deut. 6:5.

4 Omolwashike tatu vulu okukala tu hole Kalunga? Kalunga okwe tu shita nehalo lyokukala tu na ekwatathano naye nohatu vulu okuulika ohole. Uuna tu na ekwatathano ewanawa naJehova, ohole yetu yoku mu hola ohayi koko nohashi tu nyanyudha. Jesus okwa yelitha kutya mboka ye na ekwatathano naKalunga oya nyanyukwa sho a ti: “Aanelago oomboka yu uvite oyo oohepele koomwenyo.” (Mat. 5:3) Shi na ko nasha nehalo lyopaunshitwe lyokukala twa hala okulongela Kalunga, embo limwe olya ti: “Otashi kumitha sho aantu muuyuni awuhe koonono haya kala taya kongo Kalunga noye mu itaala.” —  Man Does Not Stand Alone, ku A. C. Morrison.

5. Otu shi shi ngiini kutya okukonga Kalunga kaku shi osima yowala?

5 Mbela okukonga Kalunga otaku kwatha ngaa sha? Otaku kwatha, molwaashoka okwa hala tu mu mone. Omuyapostoli Paulus okwa yelitha oshinima shoka, sho a li ta popi poshigongi shoka sha ningilwe poAreopagi popepi notempeli hayi ithanwa Partenon ya yambelwa oshikalungakiintu Atena shomuAtena shonale. Dhiladhila ando wu li mongundu yaantu mboka sho Paulus ta popi kombinga ‘yaKalunga ngoka a shiti uuyuni niinima ayihe yi li mo’ e ta yelitha kutya Kalunga “iha kala mootempeli dha tungwa kaantu.” Omuyapostoli okwa gwedha ko wo kutya “mokushita kwe Kalunga okwa kutha omihoko adhihe dhaantu momulumentu gumwe nokwe ya tula kombanda yevi alihe. Oye okwe ya uthile wo nale omathimbo gawo noongamba dhomahala gokukala kwawo. Kalunga okwa hala, aantu ya kale taye mu kongo, pamwe taye mu mono mokupampadhala kwawo. Ihe Kalunga ke li kokule nomuntu nando ogumwe.” (Iil. 17:24-27) Eeno, aantu otaya vulu okumona Kalunga. Oonzapo dhaJehova dhi vulithe pomamiliyona gaheyali netata ‘odha mona Kalunga’ nodhi mu hole shili.        

OKUHOLA KALUNGA OKWA KWATELA MO SHIKE?

6. Jesus okwa ti “oshipango oshinene noshotango” oshini?

6 Ohole yetu yokuhola Jehova oyi na okukala hayi zi komutima. Jesus okwa yelitha oshinima shika sho Omufarisayi e mu pula a ti: ‘Muhongi, oshipango oshinene shomompango oshinipo?’ Jesus okwe mu yamukula a ti: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango.” —  Mat. 22:34-38.

7. Otashi ti shike okuhola Kalunga (a) ‘nomutima gwetu aguhe’? (b) ‘nomwenyo gwetu aguhe’? (c) ‘nomadhiladhilo getu agehe’?

7 Jesus okwa li a hala okutya shike sho a ti otu na okuhola Kalunga ‘nomutima gwetu aguhe’? Okwa li ta ti kutya otu na okukala tu hole Jehova nomutima gwetu aguhe gwopathaneko ngoka hagu nwetha mo omahalo getu nomaiyuvo getu. Otu na wo okukala tu mu hole ‘nomwenyo gwetu aguhe’ nenge monkalamwenyo yetu ayihe. Oshikwawo, otu na okukala tu mu hole ‘nomadhiladhilo getu agehe’ nenge noondunge dhetu adhihe. Sha hala okutya otu na okukala tu hole Jehova thiluthilu.

8. Ngele otu hole Kalunga shili, otashi ke tu inyengitha tu ninge shike?

8 Ngele otu hole Kalunga nomutima gwetu aguhe, nomwenyo gwetu aguhe nonomadhiladhilo getu agehe, nena otatu ka kala hatu konakona Oohapu dhe nuudhiginini, hatu longo  ehalo lye nomutima aguhe nohatu uvitha onkundana ombwanawa yUukwaniilwa nuulaadhi. (Mat. 24:14; Rom. 12:1, 2) Ngele otu hole Jehova shili, shika otashi ke tu hedhitha popepyeelela naye. (Jak. 4:8) Itatu vulu okutumbula omatompelo agehe kutya omolwashike tu na okukala tu hole Kalunga. Ihe natu ka taleni kugamwe gomugo.

OMOLWASHIKE TU NA OKUKALA TU HOLE JEHOVA?

9. Omolwashike wu hole Jehova ngoka e tu shita nohe tu sile oshimpwiyu?

9 Jehova oye Omushiti gwetu noye he tu sile oshimpwiyu. Paulus okwa ti: “Muye tse otu na omwenyo, tatu inyenge notu li po.” (Iil. 17:28) Jehova okwe tu pa ehala ewanawa lyokukala kombanda yevi. (Eps. 115:16) Ohe tu pe wo iikulya niinima yilwe, opo tu kale nomwenyo. Nomolwashoka Paulus a lombwele aalongeli yiimenka muListra a ti: ‘Kalunga omunamwenyo okwa kala hi iholola miilonga iiwanawa mbyoka he yi ningile aantu: ohe mú pe omvula tayi zi kegulu niilya pethimbo lyo opala, ohe mú pe iikulya noha nyanyudha oomwenyo dheni.’ (Iil. 14:15-17) Ndyoka kali shi tuu etompelo lyokukala tu hole Omushiti gwetu nOmusilishimpwiyu gwetu! —  Omuuv. 12:1.

10. Elongekidho ndyoka Kalunga a ningi, opo tu vule okudhiminwa po oondjo nokukutha po eso oli na oku tu inyengitha ngiini?

10 Kalunga ota ka kutha po uulunde neso mbyoka twa thigulula kuAdam. (Rom. 5:12) Eeno, “Kalunga okwe tu hololele kutya oku tu hole, Kristus sho a si peha lyetu, manga twa li aalunde.” (Rom. 5:8) Osha yela kutya omitima dhetu ohadhi kala dhu udha ohole yokuhola Jehova molwelongekidho ndyoka a ningi, opo tu vule okudhiminwa po oondjo, ngele otwi itedhulula nokuulika eitaalo mekuliloyambo lyaJesus. —  Joh. 3:16.

11, 12. Jehova okwe tu pa etegameno lini?

11 Jehova oye he tu pe ‘etegameno, enyanyu alihe nombili.’ (Rom. 15:13) Etegameno ndyoka Kalunga e tu pa ohali tu kwathele tu idhidhimikile omayeleko. Aagwayekwa mboka tayi ‘idhidhimike sigo okusa, otaya ka pewa oshishani shomwenyo.’ (Eh. 2:10) Aadhiginini mboka ye na etegameno lyokukala kombanda yevi otaya ka nyanyukilwa okukala nomwenyo gwaaluhe mOparadisa kombanda yevi. (Luk. 23:43) Otu uvite ngiini omolwetegameno ndyoka? Omitima dhetu inadhi udha tuu enyanyu, ombili nohole yokuhola Omugandji ‘gwoshipewa kehe oshiwanawa nomagano kehe ga gwana ga pwa’! —  Jak. 1:17.

12 Kalunga okwe tu pa etegameno lyeyumuko. (Iil. 24:15) Eso lyomuntu ngoka tu hole ohali tu dhenge shili pomutima, ihe omolweyumuko ‘ihatu si oluhodhi ngashika mboka kaaye na etegameno.’ (1 Tes. 4:13) Omolwohole ye, Jehova Kalunga okwa halelela okuyumudha aasi, unene tuu aapiya ye, ngaashi Job. (Job 14:15) Dhiladhila owala kenyanyu ndyoka to ka kala wu na sho to ka tsakanena ishewe nayo huka kombanda yevi! Omitima dhetu inadhi udhilila tuu ohole yokuhola Tate yetu gwomegulu ngoka oye e tu pa etegameno lyeyumuko!

13. Oshike tashi ulike kutya Kalunga oku na ko nasha natse shili?

13 Jehova oku na ko nasha natse shili. (Lesha Episalomi 34:6, 18, 19; 1 Petrus 5:6, 7.) Oshoka otu shi shi kutya Kalunga ketu omunahole oha kwathele aluhe mboka aadhiginini, ohatu kala tu uvite twa gamenwa sho tu li moshigunda ‘shoonzi dhuusita we.’ (Eps. 79:13) Oshikwawo, Kalunga ote ku ulika kutya oku tu hole mwaashihe shoka te ke tu ningila okupitila mUukwaniilwa wopaMesiasa. Konima ngele Omukwaniilwa Jesus Kristus a kutha po omiyonena, ethiminiko nuukolokoshi, aayuuki otaya ka kala mombili yaaluhe. (Eps. 72:7, 12-14, 16) Shoka kashi shi tuu etompelo lyokuhola Kalunga ketu nomutima gwetu aguhe, nomwenyo gwetu aguhe, noonkondo dhetu adhihe nonomadhiladhilo getu agehe! —  Luk. 10:27.         

14. Kalunga okwe tu pa uuthembahenda wuni?

 14 Jehova okwe tu pa uuthembahenda wokukala Oonzapo dhe. (Jes. 43:10-12) Otu hole Kalunga sho e tu pe ompito ndjika yokwaambidhidha epangelo lye nokulombwela aantu muuyuni mbuka wa pilaala kombinga yetegameno lyashili. Natango, otatu vulu okupopya neitaalo nonuulaadhi, oshoka onkundana ombwanawa ndjoka tatu uvitha oya za mOohapu dhaKalunga kashili, ngoka omauvaneko ge ihaaga ponyo. (Lesha Josua 21:45; 23:14.) Omatompelo nomayambeko ngoka hage tu inyengitha tu kale tu hole Jehova, itatu vulu oku ga mana ko. Ihe ongiini tatu vulu okuulika kutya otu mu hole?

ONGIINI TATU VULU OKUULIKA KUTYA OTU HOLE KALUNGA?

15. Okukonakona Oohapu dhaKalunga nokuvulika kudho ohaku tu kwathele ngiini?

15 Konakona Oohapu dhaKalunga nuudhiginini nokuvulika kudho. Mokuninga ngawo, ohatu ulike kutya otu hole Jehova notwa hala shili oohapu dhe dhi kale ‘uuyelele mondjila yetu.’ (Eps. 119:105) Uuna twi iyadha muudhigu, oohapu tadhi landula otadhi vulu oku tu hekeleka. Otadhi ti: “Kalunga, ombepo yi ishonopeka oyo eyambo lyandje, omutima gwi itedhulula ito gu ekelehi.” “OMUWA, owa ambidhidha ndje molwohole yoye. Uuna nda tila nonda sa iimpwiyu, oto hekeleke ndje e to nyanyudha ndje.” (Eps. 51:17; 94:18, 19) Jehova naJesus oyu uvitile aantu mboka taya mono iihuna olukeno. (Jes. 49:13; Mat. 15:32) Okukonakona Ombiimbeli ohaku tu kwathele tu kale tu hole Jehova noonkondo, sho tatu ilongo nkene e tu hole.      

16. Okugalikana aluhe ohaku kokeke ngiini ohole yetu yokuhola Kalunga?

16 Kala aluhe ho galikana kuKalunga. Ngele ohatu galikana aluhe, shika ohashi tu hedhitha popepyeelela ‘Naangoka hu uvu omagalikano.’ (Eps. 65:2) Ohatu kala tu hole Kalunga noonkondo, sho tu wete nkene ta yamukula omagalikano getu. Pashiholelwa, otashi vulika twa mona nkene inee tu ethela momamakelo ge vule oonkondo dhetu. (1 Kor. 10:13) Ngele otu na oshimpwiyu e tatu indile Jehova twa mana mo, otatu vulu okukala tu na ‘ombili yaKalunga.’ (Fil. 4:6, 7) Omathimbo gamwe, otapeya tu galikane momutima ngaashi Nehemia e tatu mono nkene Jehova te tu yamukula.  (Neh. 2:1-6) Ano sho tatu ‘dhiginine okugalikana’ nokumona nkene Jehova ta yamukula omaindilo getu, ohole yetu yoku mu hola otayi kolo nosho wo einekelo lyetu kutya ote ke tu kwathela tu pite momayeleko galwe. —  Rom. 12:12.       

17. Otatu ka tala ko ngiini okugongala, ngele otu hole Kalunga?

17 Shi ninga omukalondjigilile okukala pokugongala kehe nopiigongi iinene niishona. (Heb. 10:24, 25) Aaisraeli oya li haya gongala ya pulakene noyi ilonge kombinga yaJehova, opo ya vulike kuye noku mu simaneka. (Deut. 31:12) Itashi ka kala omutenge okulonga ehalo lyaKalunga ngele otu mu hole shili. (Lesha 1 Johannes 5:3.) Onkee ano inatu etha nando osha shi tu ningithe tu kale twa tala ko okugongala kwa fa uudhano. Notwa halelela okukala tu hole Jehova ngaashi twa li tu mu hole petameko. —  Eh. 2:4.

18. Ohole yokuhola Kalunga ohayi tu inyengitha tu ninge shike shi nasha nonkundana ombwanawa?

18 Uvithila yalwe nuulaadhi “oshili yomevaangeli.” (Gal. 2:5) Ohole yetu yokuhola Kalunga oyo hayi tu inyengitha tu popye kombinga yUukwaniilwa wopaMesiasa wOmwana, ngoka ta ka ‘popila oshili’ puArmagedon. (Eps. 45:4; Eh. 16:14, 16) Ihashi tu nyanyudha tuu sho tatu vulu okukwathela aantu ya ninge aalongwa moku ya longa kombinga yohole yaKalunga nokombinga yuuyuni uupe! —  Mat. 28:19, 20.

19. Omolwashike tu na okukala twa lenga aakuluntugongalo?

19 Ulika kutya owa lenga aakuluntugongalo. (Iil. 20:28) Jehova okwe tu pe aakuluntugongalo mboka aluhe ye tu lile po. Oya fa ‘eshigo lyokushiga ombepo negameno kiikungulu, omilonga dhomeya tadhi tondoka mombuga nomuzile gwetayimanya enenenene mevi lya notelwa.’ (Jes. 32:1, 2) Ihatu pandula tuu sho tu na eshigo lyoku tu shiga kombepo, komvula nenge komutenya! Omipopyothano ndhika otadhi tu kwathele tu uve ko nkene aakuluntugongalo haye tu kwathele noku tu talaleka pambepo. Uuna tatu vulika kuyo, ohatu ulike kutya otwa lenga “omagano” ngoka twa pewa gaakuluntugongalo. Ohatu ulike wo kutya otu hole Kalunga naKristus, ngoka Omutse gwegongalo. —  Ef. 4:8; 5:23; Heb. 13:17.

Jehova okwe tu pa aakuluntugongalo mboka ye na ko nasha noonzi (Tala okatendo 19)

TSIKILA OKUKOKEKA OHOLE YOYE YOKUHOLA KALUNGA

20. Oto ka tula ngiini Jakob 1:22-25 miilonga, ngele owu hole Kalunga?

20 Ngele owu na uukuume wopothingo naJehova, ‘okupulakena kwoye oohapu dhaKalunga otaku ke ku fala miilonga.’ (Lesha Jakob 1:22-25.) ‘Ngoka ha tula oohapu dhaKalunga miilonga,’ eitaalo lye ohali mu kwathele u uvithe nuulaadhi noku kuthe ombinga pokugongala kehe. Molwashoka owu hole Jehova Kalunga shili, oto ka vulika ‘kompango ya gwana’ ndjoka ya kwatela mo ashihe shoka a tegelela wu ninge. —  Eps. 19:7-11.

21. Omagalikano goye otaga faathanithwa nashike?

21 Ohole yoye yokuhola Jehova Kalunga otayi ke ku inyengitha wu kale ho galikana aluhe. Omupisalomi David okwa yelekanitha omagalikano ge nomatsininoyambo ngoka pampango yaMoses ga li haga lungunithwa esiku kehe, sho i imbi a ti: “Taamba omagalikano gandje ngaashi omatsinino; okuyelutha iikaha yandje naku ninge eyambo lyongulohi.” (Eps. 141:2; Eks. 30:7, 8) Onkee ano, omaindilo goye, omahambelelo goye nomapandulo goye naga kale ga fa iitsinino ya nika nawa mbyoka tayi thaneke omagalikano ngoka ga hokiwa kuKalunga. —  Eh. 5:8.      

22. Otatu ka kundathaneni kombinga yohole yini?

22 Jesus okwa ti natu kale tu hole Kalunga nosho wo aantu ooyakwetu. (Mat. 22:37-39) Moshileshwa tashi landula, otatu ka kundathaneni nkene ohole yetu yokuhola Jehova nosho wo omithikampango dhe tadhi ke tu kwathela tu kale tu shi okukala nayalwe nankene tu na oku ya ulukila ohole..