“Kaku na ngoka ta vulu okulongela aawa yaali; . . . Kamu vulu okulongela Kalunga pamwe nemona.” —  MAT. 6:24.

1-3. (a) Uupyakadhi wopashimaliwa wuni oyendji ya taalela kunena, nohaya kambadhala oku wu kandula po ngiini? (Tala kethano ndyoka li li petameko.) (b) Uupyakadhi wuni hawu holoka po ngele tashi ya pokuputudha aanona?

MARILYN okwa ti: “Omusamane gwandje James okwa li ha zi kiilonga a vulwa esiku kehe, ihe kondjambi ye okwa li haku hupu owala okamaliwa okashona konima ngele twa landa iipumbiwa yesiku kehe. * Onda li nda hala okupupaleka omutenge gwe nokukala handi landele okamwanamati ketu iinima iiwanawa mbyoka yi niwe kaanasikola ooyakwawo.” Marilyn okwa li wo a hala okukwathela aapambele ye nokupungula iimaliwa yontumba. Oyendji yomookuume ke oya ka konga iilonga hayi futu nawa kiilongo yilwe. Ihe ye sho e shi dhiladhila muule, ka li e shi kutya na ninge ngiini. Omolwashike mbela?

2 Marilyn ka li u uvite nawa sho ta thigi po yaandjawo, molwashoka oya kala taya longele Jehova nawa pamwe. Nonando ongaaka, okwa li u uvite kutya yalwe nayo oya thigile po yaandjawo uule wokathimbo, ihe natango oye na uupambepo wu li nawa. Ihe okwa kala ti ipula nkene ta ka putudha okamwana Jimmy e li kokule. Mbela okwa li ngaa ta ka vula oku ka ‘putudha noku ka kumagidha paukriste’ okupitila mointaneta? —  Ef. 6:4.

 3 Marilyn okwa li a kongo omayele. Nonando omusamane gwe okwa ti ite mu keelele, ka li a hala a ye. Aakuluntugongalo nayalwe megongalo oya li ye mu ladhipike kaa ye, ihe oomeme oyendji megongalo oye mu lombwele a ye. Oya ti: “Ngele owu na ko nasha noyaandjeni, owu na okuya. Ndishi naahono to yi oto ka longela ngaa Jehova!” Nonando okwa li inaa hala nawa, okwa laleke omusamane gwe James nokamwana Jimmy e ta yi a ka konge iilonga kombanda yomafuta. Sho tayi okwe yu uvanekele ta ti: “Itandi kala ko.”

IINAKUGWANITHWA YOMEGUMBO NOMAKOTAMPANGO GOMBIIMBELI

4. Omolwashike oyendji haya tembukile komahala galwe, nolundji oyana ohaye ya thigile oolye?

4 Jehova ina hala aapiya ye ya kale moluhepo lwamemememe. Okuza nale, oshigwana she osha kala hashi tembukile komahala galwe omolwoluhepo. (Eps. 37:25; Omayel. 30:8) Tatekulululwa Jakob okwa li a tumu oyana ya ka lande iikulya kuEgipiti, opo kaaya se kondjala. * (Gen. 42:1, 2) Oyendji mboka haya tembukile komahala galwe kunena, ihaye shi ningithwa kondjala. Ihe otashi vulika haye shi ningi, oshoka oya hala okufuta oongunga dhawo. Yo yalwe okukutha ko yaandjawo. Opo ye shi ninge, oyendji ohaya thigi po yaandjawo, e taya yi pondje yoshilongo nenge koondoolopa dhilwe ya ka konge iilonga. Olundji gumwe gwomaavali oha thigile mukwawo okanona, nenge e ka thigile omwana ngoka omukuluntu. Nenge e ka thige nayinakulu, nomupambele nenge nakuume ke. Nonando mboka haye shi ningi ohaya kala yu uvite nayi sho taya thigi po ookuume kawo kopandjokana nenge oyana, oyendji oyu uvite kutya kaye na nkene.

5, 6. (a) Jesus okwa longo aantu shike kombinga yenyanyu noyegameno? (b) Jesus okwa longo aalanduli ye ya galikane kombinga yiinima yini yopalutu? (c) Jehova ohe tu yambeke momukalo guni?

5 Pethimbo lyaJesus aantu oyendji nayo oya li ya hepa notashi vulika ya li yu uvite taya ka kala ye na ombili noya gamenwa ngele ando oya li aayamba. (Mark. 14:7) Ihe Jesus okwa li a hala aantu ya kale yi inekela muJehova, Onzo yuuyamba mboka tawu kalelele. Meuvitho lye lyokondundu okwa ti kutya enyanyu negameno lyashili inali ikolelela keliko nenge koonkondo dhetu yene, ihe okekwatathano lyetu naTate yetu gwomegulu.

6 Jesus okwe tu longo tu galikane tatu pula ‘oshithima shetu shesiku kehe,’ ano oompumbwe dhetu dhesiku kehe, ihe hauyamba. Okwa li a lombwele aapulakeni ye a ti: “Inamu ilikolela omaliko kombanda yevi, . . . Ihe ilikoleleni omaliko megulu.” (Mat. 6:9, 11, 19, 20) Otu na einekelo kutya Jehova ote ke tu yambeka ngaashi u uvaneka. Omayambeko gaJehova inaga kwatela mo owala okukala e tu hokwa. Ihe oga kwatela mo wo oku tu pa ashihe shoka twa pumbwa shili. Enyanyu negameno lyashili otatu vulu owala oku li mona ngele otwa kala twi inekela muTate yetu omunahole, ihe hamiimaliwa. —  Lesha Mateus 6:24, 25, 31-34.

7. (a) Jehova okwa pa lye oshinakugwanithwa shokuputudha aanona? (b) Omolwashike aavali ayehe yaali ye na okuputudha oyana?

7 ‘Okukonga tangotango uuyuuki waKalunga’ okwa kwatela mo okukala wu na etaloko lya fa lyaJehova ngele tashi ya pokusila oshimpwiyu aanegumbo lyoye. Ompango yaMoses oyi na ekotampango ndyoka Aakriste ye na okulandula, kutya aavali oyo ye na okulonga oyana iinima yopambepo. (Lesha Deuteronomium 6:6, 7.) Kalunga okwa pa aavali oshinakugwanithwa shika, ihe ine shi pa ooyinakulu nenge omuntu gulwe. Omukwaniilwa Salomo okwa ti: ‘Mumwandje, pulakena omakumagidho gaho, ngoye ino ekelahi omapukululo ganyoko.(Omayel. 1:8) Jehova okwa hala aavali ayehe yaali oyo  ya kale taya wilike nokulonga oyana. (Omayel. 31:10, 27, 28) Aanona ohayi ilongo oshindji kaavali sho taa popi kombinga yaJehova esiku kehe nokoshiholelwa shawo.

IILANDULIKO IIWINAYI

8, 9. (a) Elunduluko lini hali holoka po uuna omuvali e li kokule noyaandjawo? (b) Ngele aavali noyana ihaya kala pamwe, ohashi gumu ngiini aanona pamaiyuvo nopamikalo?

8 Manga inaaya ka konga iilonga kehala lilwe, yamwe ohaya kambadhala okudhiladhila kiilanduliko, ihe ihaya kala naanaa ye shi nkene iilanduliko mbyoka tayi ka guma yaandjawo. (Omayel. 22:3) * Konima owala sho Marilyn a tembuka, okwa tameke okukala a yemata. Omusamane gwe nomwana nayo oya li ya yemata. Okamwana Jimmy oka kala hake mu pula taka ti: “Meme ano owa thigile ndje po shike?” Marilyn okwa li a hala okukala ko owala oomwedhi dhontumba, ihe okwa haluka owala pwa pita oomvula. Okwa ndhindhilike kutya opwe ya elunduluko maanegumbo lye. Jimmy ka li we a hala okupopya naye noka li we naanaa e mu hole. Marilyn okwa li a popi a nika oluhodhi ta ti: “Okamwandje kaka li ke hole ndje we.”

9 Ngele aavali noyana ihaya kala pamwe, ohashi ya gumu pamaiyuvo nopamikalo. * Shika ohashi holoka unene tuu ngele aanona aashona oya kala ethimbo ele kokule naavali yawo. Marilyn okwa li a lombwele Jimmy kutya oye ta ningile sho a ka konga iilonga koshilongo shilwe. Ihe Jimmy okwa li e wete yina e mu ekelahi. Petameko okwa li e mu geela sho kee po. Ihe nuuna e ya oku ya talela po, ka li ha kala e mu nyanyukilwa. Jimmy okwa li u uvite kutya ina pumbwa we okuvulika kuyina noku mu ulukila ohole, ngaashi naanaa aanona oyendji mboka ya thigwa po kaavali yawo haya kala yu uvite. —  Lesha Omayeletumbulo 29:15.

Ito vulu okupapatela okamwoye okupitila mointaneta (Tala okatendo 10)

10. (a) Ngele omuvali oku li kokule noyana, otashi ke ya guma ngiini, nonando ohe ya tuminine omagano? (b) Oshike omuvali ihaa vulu okuninga sho ta kambadhala okuputudha oyana e li kokule nayo?

10 Marilyn okwa li a kambadhala okuhwepopaleka onkalo mokukala ha tumine okamwana oshimaliwa nomagano. Ihe okwa li a mono kutya ekwatathano lyawo otali ende tali kana po nokwa li owala ta longo okamwana ka kale ke hole iinima yopamaliko pehala lyiinima yopambepo. (Omayel. 22:6) Jimmy okwa li ha lombwele yina ta ti: “Ino galuka we, kala owala ho tumine ndje omagano.” Marilyn okwa mono kutya nani ita vulu okuputudha okamwana okupitila moombilive nomongodhi. Marilyn ota ti: “Ito vulu okupapatela okamwoye noku ka thipa komilungu okupitila mointaneta.”

Uupyakadhi wuni hawu vulu okuholoka po, uuna mu lyaathane kokule nakuume koye kopandjokana? (Tala okatendo 11)

11. (a) Ohashi gumu ngiini ondjokana ngele aaihokani oya topoka omolwiilonga? (b) Ongiini omwiitaali gumwe a mono kutya oku na okushuna kegumbo?

 11 Marilyn okwa li a mono wo kutya ke na we ekwatathano lyopothingo naJehova nosho wo nomusamane gwe James. Okwa li owala ha vulu okuya kokugongala nokulonga momapya lumwe moshiwike nenge a kale inee shi ninga. Okwa li wo ha kala ta kondjithwa komuhona gwe a ye naye momilalo. Molwashoka Marilyn naJames oya li ye lyaathane kokule nokaya li taya vulu okukwathathana uuna pwa holoka uupyakadhi, oya tameke okukala ye na iihole naantu yalwe, na okonyala ya ye nayo momilalo. Marilyn okwa ka mona kutya, nonando inaya ya moluhondelo sho ye lyaathane kokule, kaya li taya vulika komayele gOmbiimbeli ge na sha nokugwanithilathana po oompumbwe dhawo mondjokana. Kaya li taya vulu okuulukilathana “ohole,” okupapatelathana nokunyanyudhathana nenge ‘okwiigwanithila po oompumbwe dhawo’ ngaashi aaihokani ye na okuninga. (Ondjimb. 1:2; 1 Kor. 7:3, 5) Nokaya li taya vulu okulongela Jehova pamwe nokamwana. Marilyn ota ti: “Onda li nda tokola okushuna kegumbo, sho ndi ilongo poshigongi kutya okuninga elongelokalunga lyopegumbo pandjigilile osha simanenena, ngele otwa hala okuhupa mesiku enene lyaJehova. Onda li nda hala okukwathela yaandjetu nangame mwene pambepo.”

OMAYELE OMAWANAWA NOMAWINAYI

12. Omayele geni gopamanyolo taga vulu okupewa mboka ye li kokule noyaandjawo?

12 Etokolo lyaMarilyn kalya li lya taambiwa ko kwaayehe. Aakuluntugongalo yomegongalo lye koshilongo hoka a li ta longele oye mu pandula omolweitaalo lye nuulaadhi we. Ihe yalwe megongalo mboka ya li wo ye li kokule nookuume kawo kopandjokana nosho wo nomagumbo gawo inaye shi ninga. Pehala lyokulandula oshiholelwa she oshiwanawa, oya kambadhala oku mu hongolola. Oya li taya ti: “Meni lyethimbo otatu ke ku mona wa galukila ishewe huno. Otamu ka hupa ngiini ngele owa shuna kegumbo?” Aakriste kaye na okupopya omapopyo taga teya yalwe omukumo, ihe oye na okuladhipika “aakiintu aagundjuka, ya kale ye hole aalumentu yawo noyana . . . ye shi kukala nawa nomagumbo” gawo yene, “opo kwaa kale nando omuntu ta sheke elaka lya za kuKalunga.” — Lesha Titus 2:3-5.

13, 14. Omolwashike hashi pula eitaalo okuvulika kuJehova pehala lyokuvulika kuyaandjeni? Shi thaneka.

13 Oyendji mboka ya tembuka oya kokela moonkalo moka aantu ya tala ko aanegumbo lyawo, unene tuu aavali, oyo ya simana ye vule yalwe. Omukriste oku na okukala neitaalo lya kola, opo a nyanyudhe Jehova pehala lyokunyanyudha yaandjawo.

14 Carin ota ti: “Sho okamwandjemati Don ka valwa, ngame nomusamane gwandje otwa  li hatu longo pondje yoshilongo shetu, nonda adhikile opo nda tameke okukonakona Ombiimbeli. Kehe gumwe maandjetu okwa li a tegelela ndi tume Don kegumbo, a ka putudhwe kaavali yandje sigo twa mono oshimaliwa sha gwana.” Sho Carin a ti kutya oye mwene ta putudha Don, aapambele ye, mwa kwatelwa omusamane gwe, oya li taya ti oku na onyalo noye mu yolo. Carin ota ti: “Pethimbo mpoka kanda li ndi wete naanaa sha puka okuthigila aavali yandje okamwandje Don uule woomvula dhontumba. Ihe onda li ndi shi shi kutya Jehova otse a pa iilonga yokuputudha okanona ketu.” Sho Carin a ningi ishewe etegelelo, omusamane gwe ngoka kee shi omwiitaali okwe mu lombwele e li kuthe mo. Etokolo ewanawa ndyoka Carin a ningile nale olya li lya koleke eitaalo lye, nokwa vulika ishewe kuJehova. Ngashingeyi ye nomusamane gwe noyana oya nyanyukwa sho ye li pamwe. Ando Carin okwa tumine okamwana kamwe nenge awuhe wu ka putudhwe kaavali ye, ando inaya kala ya nyanyukwa ngawo.

15, 16. (a) Hokolola ehokololo lyomwiitaali ngoka a putukile kokule naavali ye. (b) Omolwashike a li inaa hala okamwanakadhona ka putudhwe kuyina?

15 Onzapo yedhina Vicky otayi ti: “Onda kokele pukuku uule woomvula dhontumba, omanga onkelo ya putudhwa kaavali yetu. Sho nda ka ya kaavali yandje, kanda li lela ndi na ekwatathano nayo. Okamwamemekadhona oka li ka manguluka okupopya nayo, oku ya ulukila ohole noke na ekwatathano ewanawa nayo. Ihe naasho nda koko, kasha li oshipu oku ya lombwela omaiyuvo gandje. Atuhe otwa li twe ya lombwele kutya otatu ke ya sila oshimpwiyu ngele ya kulupa. Ihe ngame otandi ke shi ninga owala oshoka oshinakugwanithwa shandje ongokanona kawo, omanga ko take ke shi ninga molwashoka ke ya hole.

16 Vicky ota ti: “Ngashingeyi meme okwa hala ndi mu tumine okamwandjekadhona e ka putudhe, ngaashi ye a tumine ndje kumeme gwe, ihe onda tindi. Ngame nomusamane gwandje otwa hala okuputudhila okanona ketu mondjila yaJehova. Sho ishewe inandi hala okuyona po ekwatathano lyetu ewanawa nako.” Vicky okwa mona kutya opo omuntu a pondole okwa pumbwa okupititha Jehova nomakotampango ge komeho yiinima yopamaliko nokomeho yaashoka aapambele ya hala a ninge. Jesus okwa popi sha yela a ti: ‘Kaku na ngoka ta vulu okulongela aawa yaali,’ ano Kalunga pamwe nomaliko. —  Mat. 6:24; Eks. 23:2.

JEHOVA OHA YAMBEKE OONKAMBADHALA DHETU

17, 18. (a) Aakriste yashili otaya vulu okuhogolola shike? (b) Moshileshwa tashi landula, otatu ka kundathana omapulo geni?

17 Tate yetu, Jehova, okwe tu uvanekela kutya ote ke tu pa ashihe shoka twa pumbwa shili, ngele otwa pititha Uukwaniilwa nuuyuuki we komeho. (Mat. 6:33) Onkee ano Aakriste yashili oye na aluhe okutokola shoka ye na okuninga. Jehova okwe tu uvanekela kutya ote ke tu pa “ompito okuza mo” memakelo kehe, opo kaatu taaguluke omakotampango ge. (Lesha 1 Aakorinto 10:13.) Ngele otwa ‘tegelele’ Jehova nokuulika kutya otwe “mu inekela” mokukala hatu mu pula uunongo nomayele nokuvulika kiipango nokomakotampango ge, nena ‘ote ke tu kwatha.’ (Eps. 37:5, 7) Ote ke tu yambeka sho tatu kambadhala oku mu longela noku mu tala ko kutya oye owala tu na okulongela. Ngele Jehova oye twa pititha komeho monkalamwenyo yetu ayihe, ote ke tu yambeka. —  Yelekanitha Genesis 39:3NW.

18 Oshike tashi ka eta ekwatathano ewanawa pokati kaanona naavali mboka ya kala ya topoka uule wethimbo? Oshike tashi vulu oku tu kwathela tu sile yaandjetu oshimpwiyu tu li pamwe nayo? Ongiini tatu vulu okuladhipika yalwe pahole ya ninge omatokolo ge li mondjila shi na ko nasha naashika? Moshileshwa tashi landula, otatu ka kundathana kombinga yomapulo ngoka.

^ okat. 1 Ngoka hago omadhina gawo.

^ okat. 4 Oshikando kehe oyana yaJakob ya yi kuEgipiti kaya li ya thigi po aanegumbo lyawo uule wiiwike yi vulithe pwiitatu. Sho Jakob noyana ya ka tembukila kuEgipiti, oya faalele oyana naakulukadhi yawo. —  Gen. 46:6, 7.

^ okat. 8 Lesha oshileshwa “Immigration — Dreams and Realities” (“Oshili kombinga yokutembukila kehala lilwe”) mo-Awake! yaFebuluali 2013.

^ okat. 9 Omahokololo ga za kiilongo yi ili noyi ili otaga ulike kutya oshe etela yamwe uupyakadhi owundji, sho ya kala kokule nookuume kawo kopandjokana nenge noyana. Uupyakadhi mbuka owa kwatela mo okuya pondje yondjokana, uushenge nomilalo pokati kaapambele. Omanga aanona ihaaya kala we ye na omikalo, haya ndopa mosikola, haya kala ye na onyanya, ye niwe kuumbanda, ya polimana nohaya kala negamo lyokwiidhipaga.