Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2014

Mbela mokupopya kwoye, ‘oeeno yoye ohayi ka ninga aawe’?

Mbela mokupopya kwoye, ‘oeeno yoye ohayi ka ninga aawe’?

Natu tale konkalo ndjika: Omukuluntugongalo gumwe ngoka e li oshilyo shOkomitiye yOkukwatathana nIipangelo okwa li a ninga elongekidho a ka longe pamwe nomumwatate omugundjuka momapya mOsoondaha ethimbo lyongula. Ihe ongula ndjoka omukuluntugongalo okwa dhengelwa ongodhi ye endelela komumwatate gumwe ngoka omukulukadhi gwe a mono oshiponga mekandomo lyoshihauto nokwa li a tuminwa koshipangelo nziyanziya. Okwa pula omukuluntugongalo e mu kwathele ya konge ndohotola ngoka ta ka longela kumwe moshinima shi na ko nasha nombinzi. Onkee omukuluntugongalo okwa kaleke elongekidho lye lyiilonga yomomapya nomumwatate omugundjuka opo a ka kwathele pahole uukwanegumbo mboka wa pumbwa ekwatho meendelelo.

Natu dhiladhile ishewe konkalo onkwawo: Omumwameme ngoka ta tekula oyana yaali oye awike okwa li a hiywa kaaihokani yomegongalo lyawo ya ka tokelwe nayo ongulohi yimwe. Sho e shi lombwele oyana, oya li ya nyanyukwa. Oya li ya tegelela nondjuulukwe ongulohi ndjoka yi thike. Ihe nonando oongawo, manga esiku ndyoka inaali thika, aaihokani mboka oya li ya lombwele omumwameme ngoka kutya opwa holoka oshinima ombaadhilila noitaya ka tokelwa we pamwe ongulohi ndjoka. Konima yethimbo omumwameme okwa li a tseya kutya omolwashike aaihokani mboka ya li ya kaleke ehiyo ndyoka. Konima sho ya li ye mu hiya, aaihokani mboka oya li ya hiywa kookuume yamwe ya ye kegumbo lyawo ongulohi ndjoka, noya li ya taamba ko ehiyo lyawo.

Tu li Aakriste, otu na shili okukala hatu gwanitha po shoka tu uvaneka. Inatu ki iyadha nando twa fa tatu ti ‘eeno tse tatu ka tya aawe.’ (2 Kor. 1:18) Ihe nonando oongawo, ngaashi iiholelwa mbyoka tayi shi ulike, haankalo adhihe hadhi kala dha faathana. Otashi vulika pu kale ethimbo ndyoka tatu ka kala twa fa kaatu na shoka tu na okuninga po notu na owala okukaleka elongekidho ndyoka twa ninga. Omuyapostoli Paulus naye oshikando shimwe okwa li i iyadha monkalo yi li ngaaka.

PAULUS OKWA LI A LUNDILWA KUTYA IHA GWANITHA PO SHOKA A POPYA

Mo 55 E.N., ethimbo Paulus a li muEfeso pethimbo lyolweendo lwe olutitatu lwuutumwa, okwa li a dhiladhila a taaguluke Efuta lyaAegea a ye kuKorinto nokuza hono ta yi kuMakedonia. Mondjila ye yokugaluka okuza kuJerusalem, okwa li a ningi omalongekidho a ka talele po egongalo lyaKorinto oshikando oshitiyali, a fale omagano gaamwatate mboka ye li muJerusalem. (1 Kor. 16:3) Shika oshi iwetikile mAakorinto aatiyali 1:15, 16, moka tatu lesha ngeyi: “Mokwiinekela ayihe mbika onda li nda hala tango okuya kune, opo mu ka mone eyambeko lyetalelopo etiyali. Oshoka onda li nda dhiladhila okupitila pune mokuya nomukugaluka kwandje kuMakedonia, opo mu ka thindikile ndje kuJudea.”

Oshi li ngeyi kutya Paulus montumwafo ye ndjoka ya tetekele okwa li a lombwele aamwatate  yomuKorinto kombinga yondungedhiladhiloye. (1 Kor. 5:9) Ihe konima sho owala opo a li a nyola ontumwafo ndjoka, Paulus okwa li u uvu kuyaandjaKloe kutya megongalo moka omwa li mu na oontamanana. (1 Kor. 1:10, 11) Paulus okwa li a tokola a lundulule ondungedhiladhilo ye, nokwa li a nyola ontumwafo ndjoka ngashingeyi yi li 1 Aakorinto. Montumwafo ndjoka Paulus okwa gandja omayele nomapukululo ge li pahole. Okwa tumbula wo kutya okwa lundulula olweendo lwe, e ya lombwela kutya okwa li ta ka ya tango kuMakedonia opo nduno ta yi kuKorinto. — 1 Kor. 16:5, 6. *

Osha fa shi li ngeyi kutya sho aamwatate yomuKorinto ya yakula ontumwafo ye, “aayapostoli mboka aanene” megongalo ndyoka oya li ya pe Paulus uusama, molwaashoka inaa gwanitha po shoka u uvaneka. Paulus okwi ipopile a ti: “Ano sho nda li nda hala okuninga ngeyi, onde shi ningi nelalakano lyokwiihola? Onda ningi ando omatokolo, ndi mú fundje, ndi kale ndi na oohapu mbali: ‘Eeno, eeno’ na ‘Aawe, aawe?’” — 2 Kor. 1:17; 11:5.

Otashi vulika twi ipule kutya, mbela monkalo ndjino omuyapostoli Paulus okwa li ‘a ningi ando omatokolo, e ya fundje a fa ando kee shi omwiinekelwa, ihaa gwanitha po omauvaneko?’ Osha yela kutya hasho! Epulo lyaPaulus lyuuretori “onde shi ningi nelalakano lyokwiihola?” olya li li na okukala lya yelithila nawa Aakriste yomuKorinto kutya ka li a lundulula etalelopo lye molwaashoka keeshi okwiinekelwa.

Paulus okwa li a pataneke lela elundilo ndyoka sho a nyola a ti: “Ihe Kalunga oye omunashili, onkee oohapu dhandje kune kadhi shi ‘Eeno’ na ‘Aawe.’” (2 Kor. 1:18) Osha yela kutya, Paulus okwa li e na komutima aamwahe naamwayina yomuKorinto sho a lundulula oompangela dhe. MAakorinto aatiyali 1:23, Paulus ota popi kutya ‘okwa gama kuyo’ sho a lundulula ondungedhiladhilo ye gokuya kuKorinto. Okwa li e ya pe shili ompito opo yu ukililithe iinima manga inaaya kuyo. Ngaashi a li i inekela, manga a li muMakedonia, Paulus okwa li u uvu kuTitus kutya ontumwafo ye oya li ye yi inyengitha ya nike oluhodhi noyi itedhulule, shoka sha li she mu nyanyudha noonkondo. — 2 Kor. 6:11; 7:5-7.

OHATU TI KUKALUNGA “AMEN”

Omatamaneko ngoka Paulus a li ta lundililwa gokwaagwanitha po shoka a popya oge na okukala ga li gu ulike kutya ando okwa li inaa gwanitha po omauvaneko ge mokukalamwenyo kwe, ando ina kala i inekelwa miilonga ye yokuuvitha. Ihe nonando oongawo, Paulus okwa li a dhimbulukitha Aakorinto kutya okwa li e yu uvithile kombinga yaJesus Kristus. “Oshoka Jesus Kristus, Omuna gwaKalunga, ngoka u uvithwa mokati keni kuTimoteus naSilvanus nokungame mwene, ke shi ngoka e li ‘Eeno’ na ‘Aawe,’ ihe oye ‘Eeno’ yaKalunga.” (2 Kor. 1:19) Mbela Jesus Kristus ngoka e li oshiholelwa shaPaulus, okwa li keeshi omwiinekelwa? Hasho nando! Monkalamwenyo ye ayihe nomuukalele we, Jesus okwa li aluhe ha popi oshili. (Joh. 14:6; 18:37) Ngele shoka Jesus a li tu uvitha oshoshili noshi shi okwiinekelwa na Paulus okwa li u uvitha etumwalaka lya faathana, nena shoka sha li tashi uvithwa komuyapostoli osha li wo shi shi okwiinekelwa.

Odhoshili kutya, Jehova ‘oKalunga ngoka ihaa fundju.’ (Tit.1:2) Shino otu shi iwetele montumwafo ontiyali yaPaulus ndjoka tayi ti: “Oshoka oye tuu ngoka e li ‘eeno’ yomauvaneko agehe gaKalunga.” Jesus okwa li u ulike uudhiginini we manga a li kombanda yevi nokwa li a yelitha ashihe shoka sha li she etitha omalimbililo shi na ko nasha nomauvaneko gaJehova. Paulus okwa tsikile ko ta ti: “Onkee ano ngele tatu simaneke Kalunga, ohatu tumbula ‘Amen’ medhina lyaJesus Kristus.” (2 Kor. 1:20) Jesus oku li eshilipaleko lyetu, nenge tu tye oye “Amen,” sha yela kutya euvaneko kehe ndyoka Jehova Kalunga ha ningi otali ka gwanithwa shili!

Ngaashi owala Jesus Kristus naJehova Kalunga haya popi oshili, Paulus naye okwa li aluhe ha kala metsokumwe naashoka a popya. (2 Kor. 1:19) Ka li ha fundju, ha ningi ando omauvaneko ‘omolwokwiihola mwene.’ (2 Kor. 1:17) Ihe pehala lyaashono, okwa li ‘he endithwa kombepo.’ (Gal. 5:16) Omukalo ngoka a li u ungaunga nayalwe, ogwa Ii gu ulike kutya oku na ko nasha  lela noompumbwe dhawo. Oeeno ye oya li aluhe oeeno!

OEENO YOYE OHAYI KALA NGAA ALUHE OEENO?

Kunena, aantu mboka ihaaya kala metsokumwe nomithikampango dhOmbiimbeli ohaya ningi omauvaneko nokukala inaaye ga gwanitha po uuna pwa holoka uupyakadhi nenge oshinima shilwe oshiwanawa. Miinima yi na ko nasha nomangeshefelo “oeeno” ihayi kala aluhe “oeeno,” nokuli nonando shoka shu uvathanwa osha kolekwa pombapila. Oyendji inaya tala ko we ondjokana yi li euvathano pokati kaantu yaali, noyi li ekwatathano tali kalelele. Ihe pehala lyaashono, oondjokana odhindji ndhoka tadhi teka otadhi ulike kutya aantu oyendji oya tala ko ondjokana yi li ekwatathano lyopakathimbo ndyoka tali vulu okuhulithwa po nuupu. — 2 Tim. 3:1, 2.

Ongiini kombinga yoye? Mbela oeeno yoye ohayi kala ngaa aluhe oeeno? Odhoshili kutya, ngaashi twe shi konakona petameko lyoshitopolwa shika, otashi vulika wa li wu na okuninga elunduluko melongekidho lyoye, ihe hamolwaashoka ihoo gwanitha po shoka wu uvaneka, ihe omolwaashoka pwa holoka oonkalo ndhoka wu na owala okulundulula shoka wa li wu na okuninga. Ihe ngele ngoye wu li Omukriste owu uvaneke sha nenge wa ningi euvathano, owu na okulonga nuudhiginini opo wu li dhiginine. (Eps. 15:4; Mat. 5:37) Ngele osho wa ningi ngaaka, oto ka kala wu shiwike kutya owu shi okwiinekelwa, ho gwanitha po shoka wu uvaneka, noho popi aluhe oshili. (Ef. 4:15, 25; Jak. 5:12) Uuna aantu ya mono kutya oto vulu okwiinekelwa mukehe shimwe, otaya ka kala ye na ehalo okupulakena kungoye uuna to ya lombwele oshili kombinga yUukwaniilwa waKalunga. Onkee ano, natu shilipaleke aluhe kutya oeeno yetu otayi kala aluhe oeeno.

^ okat. 7 Konima yokathimbo okafupi sho a nyola 1 Aakorinto, Paulus okwa li a yi kuMakedonia a pitile muTroas, hoka a li a nyolele 2 Aakorinto. (2 Kor. 2:12; 7:5) Konima yethimbo, okwa li a ka talela po Korinto.