Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2014

Adha omitima dhaakwanezimo yoye mboka kaaye shi ooitaali

Adha omitima dhaakwanezimo yoye mboka kaaye shi ooitaali

JESUS KRISTUS okwa ti: “Inda kegumbo lyaandjeni, u ke ya hokololele shoka Omuwa e shi ku ningile, sho e ku sile ohenda.” Oohapu ndhoka okwa li e dhi lombwele omulumentu gumwe ngoka a li a hala okuninga omulanduli gwe tashi vulika sho a li muGadara, shoka sha li kuumbugantuzilo wEfuta lyaGalilea. Oohapu dhaJesus otadhi ulike kutya okwa li u uvite ko iikala yopantu, ano ehalo lyokulombwela aakwanezimo yawo iinima mbyoka ye hole naambyoka ya simana. — Mark. 5:19.

Natse olundji kunena ohatu mono iikala ya tya ngaaka, nonando momithigululwakalo dhimwe oyi iwetikile lela shi vulithe momikwawo. Onkee ano, uuna gumwe a ningi omulongeli gwaKalunga kashili, Jehova, aluhe oha kala a hala okulombwela aakwanezimo ye kombinga yeitaalo lye epe. Ihe mbela oku na oku shi enda ngiini? Ongiini ta vulu okwaadha omitima dhaakwanezimo ye mboka kaaye li melongelokalunga lye nenge kaaye li meitaalo nandonando? Ombiimbeli otayi gandja omayele omawanawa nogoshili.

“OTWA MONO KRISTUS”

Methelemumvo lyotango, Andreas oye gumwe gwomwaamboka ya li ya dhimbulula tango kutya Jesus oye Kristus. Andreas okwa li a lombwele lye nziya oshinima shono? “Andreas okwa tsakaneke tangotango omumwayina Simon nokwe mu lombwele a ti: ‘Otse otwa mono Kristus nokutya Omugwayekwa.’” Andreas okwa fala Petrus kuJesus, naashono osha li sha pe Petrus ompito a ninge omulongwa gwaJesus. — Joh. 1:35-42.

Konima yoomvula hamano sho Petrus a li a kala muJoppe, okwa li a hiwa a ye nondjila yokuumbangalantu u uka kuKesarea a ka talele po egumbo lyaKornelius, omukuluntu gwaakwiita. Oolye Petrus a li a adha ya gongala megumbo? “[Petrus naamboka ya li mosheendo naye] oya adha Kornelius e ya tegelela pamwe naanegumbo lye ayehe nookuume mboka Kornelius a adhika e ya hiya.” Onkee Kornelius okwa pe aakwanezimo ye ompito ya pulakene kuPetrus opo ya ninge omatokolo gi ikolelela kwaashono yu uvu. — Iil. 10:22-33.

 Oshike tatu ilongo momukalo ngoka Andreas naKornelius ya li yu ungaunga naakwanezimo yawo?

Andreas naKornelius kapu na nando ogumwe gwomuyo a li e shi etha a tegelele ompito yilwe. Andreas oye mwene a li a tseyitha Petrus kuJesus, naKornelius okwa li a ningi omalongekidho opo aakwanezimo ye ya pulakene kwaashoka Petrus ta ti. Ihe Andreas naKornelius inaya thiminika nando aakwanezimo yawo nenge ya kambadhale miineya ye ya ningithe ya ninge aalanduli yaKristus. Mbela moshinima shika omu na oshiilongomwa sha sha? Oshi li nawa tu katuke momukalo gwa faathana. Otashi vulika tu kale tatu vulu okukundathana naakwanezimo yetu uuyelele wontumba nokukonga oompito opo yu uve ooshili dhOmbiimbeli noya tseyathane nooitaali ooyakwetu. Ihe natango, otu na okusimaneka emanguluko lyawo lyokuninga omatokolo nokuyanda oku ya thiminika. Opo tu tale nkene tu na okukwathela aakwanezimo yetu, natu ka tale koshiholelwa shaJürgen naPetra, aaihokani yokoNdowishi.

Petra okwa li a konakona Ombiimbeli nOonzapo dhaJehova nokonima okwa li a ninginithwa. Omusamane gwe Jürgen, okwa li omukuluntu gwaakwiita. Petameko, Jürgen ka li nando a nyanyukilwa etokolo lyomukulukadhi gwe. Ihe mokweendela ko kwethimbo, okwa li a dhimbulula kutya Oonzapo ohadhi uvitha oshili okuza mOmbiimbeli. Naye wo okwa li i iyapulile Jehova, nongashingeyi oku li omukuluntugongalo megongalo lyomoshitopolwa shawo. Omayele geni ta gandja kombinga yokwaadha omutima gomukwanezimo ngoka e na eitaalo li ili?

Jürgen okwa li a dhimbulula oshinima shoka nokwa ti: “Katu na okukambadhala okukondjithila aakwanezimo yetu oshinima shoka noku ya ndumbila iinima yopambepo. Shoka otashi vulika shi ya ningithe kaaya taambe ko oshili. Mokweendela ko kwethimbo, otashi ka kala shi li nawa tu kale hatu ya nyugulile ko kashona nakashona ethimbo nethimbo. Oshi li wo ekwatho kaakwanezimo yetu ya tseyathane naamwatate mboka yomapipi gawo nosho wo mboka ye hole iinima ya faathana noyawo. Okuninga ngawo otaku ke shi ningitha oshipu oku ya kwathela.”

‘Katu na okukambadhala okukondjithila aakwanezimo yetu oshili noku ya ndumbila iinima yopambepo.’ — Jürgen

Omuyapostoli Petrus nosho wo aakwanezimo yaKornelius oya li ya taamba ko nziya etumwalaka lyOmbiimbeli. Yamwe yomethelemumvo lyotango mboka ya li yu uvu oshili oya li ya pumbwa ethimbo olindji ya ninge omatokolo.

ONGIINI KOMBINGA YAAMWAHE YAJESUS?

Yamwe yomaakwanezimo yaJesus oya li yu ulike eitaalo muye pethimbo lyuukalele we womontaneho. Pashiholelwa, otashi vulika omuyapostoli Jakob naJohannes ya li aamwayinagona yaJesus nosho wo kutya yina yawo, Salome, okwa li yinagona. Otashi vulika a li gumwe ‘gwomaakiintu yalwe mboka ya li ya longitha omaliko gawo e taa yakula Jesus naalongwa ye.’ — Luk. 8:1-3.

Ihe nonando oongawo, aakwanezimo yamwe yaJesus kaya li yu ulike eitaalo nziya. Pashiholelwa, pompito yimwe konima yomvula sho Jesus a ninginithwa, oongundu dhaantu odha li dha gongala megumbo limwe dhi pulakene kuye. “Ihe aakwanezimo lye sho ye shi uvu, oya yi ko, ye ke mu kwate, oshoka oya ti: ‘Ota yi oonkwengu!’” Konima yethimbo, sho aamwahe yaJesus ye mu pula kombinga yoondungedhiladhilo yolweendo lwe, ine ya yamukula shu ukilila. Omolwashike mbela? Omolwaashoka ‘naamwayina aalumentu wo oya li inaaye mu itaala.’ — Mark. 3:21; Joh. 7:5.

Otatu ilongo mo shike momukalo ngoka Jesus a li u ungaunga naakwanezimo ye? Ka li a geye nando sho yamwe ya li ye mu ula kutya ota yi oonkwengu. Nokuli nokonima yokudhipagwa kwe nokuyumuka, Jesus okwa li ishewe a tsu aakwanezimo ye omukumo sho i ihololele omumwahe Jakob. Osha fa shi li ngeyi kutya okuholoka kwe kakwa li owala kwa tompo Jakob ihe naamwahe yaJesus wo yalwe oya li ya tompwa kutya Oye shili Kristus. Onkee ano, oya li ye li naayapostoli nosho wo nayalwe  mondjugo yopombanda muJerusalem nosha yela kutya oya li wo ya pewa ombepo ondjapuki. Mokweendela ko kwethimbo, Jakob naJudas nosho wo aamwahe yalwe yaJesus, oya li ya nyanyukilwa uuthembahenda uukumithi. — Iil. 1:12-14; 2:1-4; 1 Kor. 15:7.

YAMWE OYA PUMBWA ETHIMBO OLINDJI

“Eidhidhimiko, neidhidhimiko, neidhidhimiko lya gwedhwa po otali vulu okweeta iizemo iiwanawa.” — Roswitha

Ngaashi sha li methelemumvo lyotango, aakwanezimo yamwe kunena oya pumbwa ethimbo olindji opo ya ye nawa mondjila ndjoka tayi fala komwenyo. Tala koshiholelwa shaRoswitha, ngoka a li Omukatoolika a ya mo omutse nothingo pethimbo sho omusamane gwe a ninginithwa e li Onzapo yaJehova mo-1978. Petameko Roswitha okwa li a pataneke omusamane gwe molwaashoka okwa li i itaala omalongo gawo thiluthilu. Ihe momukokomoko gwoomvula, okwa li a shuna pevi moku mu pataneka nokwa li a mono kutya Oonzapo otadhi longo oshili. Mo-2003 okwa li a ninginithwa. Oshike sha li she mu kwathele a lunduluke? Pehala lyokuuvithwa nayi kunkene Roswitha a li e mu pataneke petameko, omusamane gwe okwa li e mu pe ompito a lundulule omadhiladhilo ge. Omukulukadhi ota gandja omayele geni? “Eidhidhimiko, neidhidhimiko, neidhidhimiko lya gwedhwa po otali vulu okweeta iizemo iiwanawa.”

Monika okwa li a ninginithwa mo-1974, noyanamati yaali oya ka ninga Oonzapo konima yoomvula omulongo lwaampoka. Nonando Hans, omusamane gwe, ke na esiku a patanekele eitaalo lyawo, okwa ka ninginithwa owala mo-2006. Ye na momadhiladhilo shoka sha li sha ningwa nale, uukwanegumbo otawu gandja omayele geni? “Kaleni aadhiginini kuJehova, na inamu etha po eitaalo lyeni. Eeno, osha li sha simana kuyo okukala taya shilipaleke Hans kutya otaya tsikile okukala ye mu hole. Nokaye na esiku ya kanithile einekelo kutya oku na esiku na ka taambe ko eitaalo lyawo.

OYA LI YA TALALEKWA KOMEYA GOSHILI

Opu na oshikando shimwe Jesus a li a popi kutya etumwalaka lyoshili olya fa omeya ngoka taga gandja omwenyo gwaaluhe. (Joh. 4:13, 14) Otwa hala aakwanezimo yetu ya talalekwa mokunwa omeya omatalala ga yela goshili. Osha yela kutya itatu ka kala twa hala ya henwe molwaashoka twe ya kondjithila omeya ogendji nziya unene. Kutya nduno otaya ka talalekwa nenge otaya ka henwa shono otashi ki ikolelela kunkene tatu ya yelithile eitaalo lyetu. Ombiimbeli otayi ti kutya “omwenyo gwomuyuuki ohagu ipyakidhile neyamukulo,” nosho wo kutya “omutima gwomunawino otagu ningi okana ke okanandunge nokutaandelitha elongo tali zi komilungu dhe.” Ongiini tatu vulu okutula miilonga omayele ngaka? — Omayel. 15:28; 16:23.

Omukulukadhi otashi vulika a kale a hala okulombwela omusamane gwe kombinga yeitaalo lye. Ngele okwi “ipyakidhile neyamukulo,” ota ka hogolola nuukeka oohapu dhe noita ka endelela okupopya. Ke na okuningitha omusamane gwe a dhiladhile kutya okwi iwete uuyuuki nenge kutya oku li pombanda kuye. Okupopya kwe kwa dhiladhilwa nawa otaku vulu okutalaleka nokuhumitha komeho ombili. Uunake omusamane gwe ha kala a thuwa nota vulu okupopiwa naye nuupu? Oha nyanyukilwa okupopya nenge okulesha kombinga yashike? Mbela oku na ohokwe miinima yopaunongononi, mopolotika, nenge momaudhano? Ongiini ta vulu okupendutha ohokwe ye kombinga yOmbiimbeli te shi ningi momukalo ngoka tagu ulike kutya okwa simaneka omaiyuvo ge nosho wo etaloko lye? Okukaleka iinima mbyoka momadhiladhilo otaku ke mu kwathela a popye noku katuke pandunge.

Okuthika komitima dhiilyo yuukwanegumbo mbyoka kaayi shi natango Oonzapo okwa kwatela mo oshindji kaashi shi owala oku ya yelithila eitaalo lyetu mokupopya. Shoka tatu popi oshi na okukala tashi endele pamwe neihumbato lyetu ewanawa.

EIHUMBATO LI SHI OKUHOLELWA

Jürgen ngoka a popiwa metetekelo okwa ti: “Kala aluhe ho tula miilonga omakotampango gOmbiimbeli monkalamwenyo yoye yakehe esiku. Ngoka ogwo omukalo omwaanawa lelalela gwokuningitha omukwanezimo i ikonakone, nokuli nando otashi vulika keeshi zimine naanaa.” Hans, ngoka a ninginithwa tango komukulukadhi oomvula 30 dha ka pita okwe shi zimine a ti: “Eihumbato ewanawa lyOmukriste olya simana, opo omukwanezimo a mone kutya oshili oye tu etela uuwanawa moonkalamwenyo dhetu.” Aakwanezimo yetu oya pumbwa okukala taya vulu okumona kutya eitaalo lyetu ohali tu ningitha tu kale twa yooloka ko kuyalwe, momukalo ngoka tagu tungu ihe haangoka tagu teya omukumo nenge tagu kenyaneke.

“Eihumbato ewanawa lyOmukriste olya simana, opo omukwanezimo a mone uukwatya uuwanawa woshili monkalamwenyo yoye.” — Hans

Omuyapostoli Petrus okwa gandja omayele taga longo kaakulukadhi mboka ye na aasamane kaaye li meitaalo limwe nayo a ti: “Aakiintu, vulikeni kaalumentu yeni, opo aalumentu mboka inaa itaala oohapu dhaKalunga, ya falwe meitaalo komikalo dheni. Itamu pumbwa oku shi ninga noohapu, oshoka oyo otaa ka mona, nkene omikalo dheni dha yogoka nonkene hamu simaneke Kalunga. Inashi pumbiwa okwiiyopaleka nomaulenga gokombanda, ngaashi kombinga yomitse, etheni okuzala omagwe noonguwo dhuuyamba.  Ihe eopalo lyeni nali kale ndyoka lyomeni. Eopalo itaali hulu po lyombepo yi na ombili noya ngungumana, olyo ndyoka li na oshilonga oshinene koshipala shaKalunga.” — 1 Pet. 3:1-4.

Petrus okwa nyola kutya omulumentu ota vulu okwiinyengithwa komikalo omiwanawa dhomukulukadhi gwe. E na ewiliko ndyoka lyopamanyolo momadhiladhilo, omumwameme gwedhina Christa okwa kala ta kambadhala okwaadha omutima gwomusamane gwe neihumbato lye ewanawa okuza ngaa konima sho a ninginithwa mo-1972. Nonando omusamane gwe okwa li a konakona Ombiimbeli nOonzapo, ina ninga natango oshili ye mwene. Okwa li ha yi kokugongala kwopaKriste omathimbo gamwe nokwa li a tseyathana nawa naamboka ye li megongalo. Nayo wo oya simaneka uuthemba we wokuhogolola. Christa oha kambadhala ngiini okwaadha omutima gwomusamane gwe?

“Onda tokola okukala ngaashi Jehova a hala ndi kale. Nopethimbo opo tuu mpoka, ohandi kambadhala okwaadha omutima gwomusamane gwandje nopwaahe na ‘oku shi ninga noohapu’ ihe oneihumbato lyandje ewanawa. Uuna omakotampango gOmbiimbeli kaage li moshiponga, ohandi ningi ngaashi tandi vulu ndi tse kumwe nehalo lye. Eeno shili, onda simaneka emanguluko lye lyokuninga omatokolo nohandi ethele iinima momake gaJehova.”

Shoka Christa ha ningi otashi ulike kutya osha simana okukala hatu tifuka. Ota tsikile okuninga iinima yopambepo, mwa kwatelwa okuya kokugongala pandjigilile nosho wo okukutha ombinga muukalele wopaKriste. Natango, ohu ulike kutya oku na ko nasha naye, mokukala e wete kutya kuume ke okwa pumbwa ohole, ethimbo, nosho wo okupewa eitulomo. Okukala hatu tifuka nokukala tu na ko nasha nayalwe oshinima shi li pandunge kukehe gumwe ngoka tu ungaunga nomukwanezimo ngoka keehe shi omwiitaali. Ombiimbeli otayi yelitha tayi ti: “Ayihe oyi na otundi yayo.” Shika osha kwatela mo okukala tu na ethimbo niilyo yetu yuukwanegumbo, unene tuu ookuume ketu kopandjokana, mboka kaaye li meitaalo lyetu. Okukala ethimbo nayo ohashi koleke oonkundathana dhetu nayo. Iimoniwa ohayi ulike kutya okukala hatu kundathana nawa ohaku kwathele omuntu kaa kale u uvite ezaza unene, kaa kale u uvite kee niwe naye, nenge kaa kale a sa ondumbo. — Omuuv. 3:1.

INO SHOLOLA NANDO

“Osha simana tu ulike kutya otu hole iilyo yuukwanegumbo wetu nokukala hatu yi galikanene,” Holger ngoka tate gwe a ninginithwa konima yoomvula 20 konima yiilyo yilwe yuukwanegumbo we, osho ta ti ngaaka. Christa ota gwedha ko ta ti kutya ‘ita kanitha eitaalo kutya omusamane gwe oku na esiku na taambe ko Jehova nosho wo oshili.’ Otu na okukala aluhe hatu ihumbatele nawa aakwanezimo yetu mboka kaaye li meitaalo lyetu, notu na okukala neitaalo kutya onaye ke ye moshili.

Elalakano lyetu okukaleka ekwatathano naapambele yetu li li nawa, okugandja ompito kaakwanezimo yetu ya dhimbulule mo oshili, nokwaadha omitima dhawo netumwalaka lyOmbiimbeli. Nomiinima ayihe otu na okwiihumbata ‘nombili nonesimaneko.’ — 1 Pet. 3:16.