Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2014

Tu nyanyukweni omolwohango yOnzigona!

Tu nyanyukweni omolwohango yOnzigona!

“Tu [nyanyukweni] tse tu ligoleni, . . . oshoka ethimbo lyohango yOnzigona olya thikana.” — EH. 19:7.

1, 2. (a) Ohango yalye ndjoka tayi ke eta enyanyu megulu? (b) Omapulo geni ga holoka po?

OHASHI pula aluhe ethimbo okwiilongekidhila ohango. Ihe otatu ka gandja eitulomo kohango yi ikalekelwa, ohango yomuuwa. Dhiladhila owala kwaashika! Ohango ndjoka oya kala tayi ilongekidhilwa oomvula 2000 lwaampo. Ngashingeyi esiku otali hedha popepi neendelelo opo Ombushiki yi hanganithwe nomufuko gwayo. Masiku, muuwa wOmukwaniilwa otamu ka hikwa oomusika dhenyanyu, noongundu dhaayengeli megulu otadhi ki imba tadhi ti: “Simanekeni Kalunga! Oshoka Omuwa Kalunga ketu, Omunankondoadhihe, oye Omukwaniilwa! Tu [nyanyukweni] tse tu ligoleni, tu simanekeni uunene we! Oshoka ethimbo lyohango yOnzigona olya thikana nomufuko gwe okwi ilongekidha.” — Eh. 19:6, 7.

2 Ohango ‘yOnzigona’ ndjoka tayi ke eta enyanyu megulu kayi shi ya gulwe kee shi Jesus Kristus. (Joh. 1:29) Okwa zala oonguwo dhohango dha tya ngiini? Olye omufuko gwe? Okwa kala ti ilongekidhile ngiini ohango? Ohango otayi ka ningwa uunake? Ohango ndjika otayi ke eta enyanyu megulu, ihe mbela mboka ye na etegameno  lyoku ka kala kombanda yevi sigo aluhe nayo otaya ka nyanyukwa ngaa pamwe nayo? Tu na ondjuulukwe yaashoka, otatu ka kundathana omapulo ngoka sho tatu tsikile okukonakona Episalomi 45.

‘OMIGWAYO DHA NIKA NAWA ODHA TILWA KOONGUWO DHE’

3, 4. (a) Ombushiki otayi popiwa ya zala oonguwo dha tya ngiini dhohango, noshike tashi yi nyanyudha? (b) Oolye “aana, aakadhona yomukwaniilwa” nosho wo ‘omunyekadhi’ mboka ya nyanyukwa pamwe nOmbushiki?

3 Lesha Episalomi 45:8, 9Ombushiki, Jesus Kristus okwa zala oonguwo dhe dhohango tadhi adhima. Oonguwo dhe otadhi nika ezimba ewanawa lya fa ‘lyiizimba iiwanawa,’ ngaashi omira noakasia, iizimba mbyoka oyo ya li hayi longithwa okuninga omagadhi gomugwayo omuyapuki ngoka gwa li hagu longithwa muIsraeli. — Eks. 30:23-25.

4 Oondjimbo dhomegulu ndhoka tadhi imbwa muuwa we otadhi nyanyudha wo Ombushiki sho ohango yayo yi li pokuthika. Ngoka wo a nyanyukwa, ‘Omunyekadhi’ ngoka ta thaneke oshitopolwa shehangano lyaKalunga shomegulu, shoka sha kwatela mo “aakadhona, aana yaakwaniilwa,” ano aayengeli aayapuki. Itashi nyanyudha tuu okuuva omawi gaayengeli mboka tayi imbi taya ti: “Tu [nyanyukweni] tse tu ligoleni. . . . Oshoka ethimbo lyohango yOnzigona olya thikana”!

OMUFUKO OKWA LONGEKIDHILWA OHANGO

5. Olye “omukiintu gwOnzigona”?

5 Lesha Episalomi 45:10, 11. Otwa mona kutya Ombushiki olye, ihe olye omufuko gwe? Omufuko nguka oku li ongundu ndjoka ya thikama po miilyo yegongalo ndyoka Jesus Kristus oye omutse gwalyo. (Lesha Aaefeso 5:23, 24.) Otaya ka ninga oshitopolwa shUukwaniilwa waKristus wopaMesiasa. (Luk. 12:32) Aakriste mbaka aagwayekwa 144 000 “ohaa landula Onzigona shaa mpoka ta yi.” (Eh. 14:1-4) Ohaya ningi “omukiintu gwOnzigona,” e taya kala pamwe naye megumbo lye megulu. — Eh. 21:9; Joh. 14:2, 3.

6. Omolwashike aagwayekwa tayi ithanwa “omuna gwokombanda omukadhona,” nomolwashike taku tiwa naya dhimbwe oshigwana shaandjawo?

6 Omufuko gwomonakuyiwa ota popiwa kutya ke li owala “omuna omukadhona,” (OB-1954) ihe ota popiwa wo e li “omuna gwokombanda omukadhona.” (Eps. 45:13) ‘Omukwaniilwa’ nguka olye? Aakriste aagwayekwa oya taambiwa ko ye li “aana” yaJehova. (Rom. 8:15-17) Molwaashoka otaya ka ninga omufuko gwomegulu, aagwayekwa oya lombwelwa taku ti: “Dhimbwa po oshigwana shaandjeni negumbo lyaho [gwopantu].” (OB-1954) Oye na okukaleka omadhiladhilo gawo ‘kiinima yaahwiyaka kombanda, haambika yopevi.’ — Kol. 3:1-4.

7. (a) Kristus okwa kala ta longekidhile ngiini omufuko gwe gwomonakuyiwa ohango? (b) Omufuko okwa tala ko ngiini Ombushiki ye yomonakuyiwa?

7 Muule woomvula omathele, Kristus okwa kala ta longekidha omufuko gwe gwomonakuyiwa omolwohango yomegulu. Omuyapostoli Paulus okwa popi kutya Kristus ‘oku hole egongalo lye nokwi igandja meso omolwalyo. Oye okwe shi ningi, opo a yoololele Kalunga egongalo nohapu ye, ngele e li yelitha noku li yoga momeya, opo i iyetele po egongalo lyo opala, lya yogoka, lya yelithwa, lyaana ontongo nenge egonyoto nenge onyata ya sha.’ (Ef. 5:25-27) Paulus okwa li a lombwele Aakriste aagwayekwa yomuKorinto shonale a ti: “Ngame onde mú sila efupa, ndele naKalunga osho e li. Oshoka ne omwa fa omukadhona omuyelele, ngoka nde mu kongela omulumentu gumwe awike, oKristus.” (2 Kor. 11:2) Omukwaniilwa Ombushiki Jesus Kristus oku na olupandu ‘omolweopalo’ lyopambepo lyomufuko gwe gwomonakuyiwa. Nomufuko ohe mu tala ko e li “omuwa” gwe ‘nota vulika kuye’ e li omusamane gwe gwomonakuyiwa.

 OMUFUKO OKWA ‘FALWA POMUKWANIILWA’

8. Omolwashike tashi opalele sho omufuko ta popiwa kutya ‘okwo opala’?

8 Lesha Episalomi 45:13, 14a. Omufuko ota popiwa kutya ‘okwo opala’ omolwohango yomuuwa. MEhololo 21:2, omufuko ota yelekanithwa noshilando, Jerusalem Oshipe, ‘sha zalekelwa okutsakaneka omulumentu gwasho.’ Oshilando shika shomegulu oshi na “eadhimo lyaKalunga” notashi adhima “sha fa emanya lyondilo, ongojaspes, nosha yela sha fa okristali.” (Eh. 21:10, 11) Eopalo lyaJerusalem Oshipe olya popiwa nawa membo lyEhololo. (Eh. 21:18-21) Itashi kumitha sho omupisalomi ta popi omufuko ta ti: “okwo opala ngiini!” Ihe shoka sha dhenga mbanda osho kutya, ohango yomuuwa otayi ka ningilwa megulu.

9. ‘Okomukwaniilwa’ guni kwa falwa omufuko, nomufuko okwa zala ngiini?

9 Omufuko okwe etwa kOmbushiki ye, ano kOmukwaniilwa gwopaMesiasa. Okwa kala te mu longekidha ‘te mu yelitha noku mu yoga momeya nohapu ye.’ Omufuko okwa ‘yogoka noke na onyata ya sha.’ (Ef. 5: 26, 27) Omufuko gwe oku na wo okukala a zala o opalela oshituthi shoka. Ye okwo opala tuu shili! Nokuli, “omuzalo gwe ogwa tungwa noondali dhoshingoli,” nota ‘ka falwa pomukwaniilwa a zala omuzalo guulenga.’ Pohango yOnzigona, “okwa pewa, a zale oonguwo oontokele dholiina dha yela notadhi adhima. Oonguwo ndhika dholiina odho iilonga yuuyuuki yaantu yaKalunga.” — Eh. 19:8.

‘OHANGO YONZIGONA OSHO YA THIKANA’

10. Ohango yOnzigona otayi ka ningwa uunake?

10 Lesha Ehololo 19:7. Ohango yOnzigona otayi ka ningwa uunake? Nonando ‘omufuko gwe okwi ilongekidhila’ ohango, shoka sha popiwa konima yaashoka kashi shi ohango yo yeneyene. Ihe otashi tu pe ethano lya yela lyaashoka tashi ka ningwa poshitopolwa shahugunina shuudhigu uunene. (Eh. 19:11-21) Mbela shika osha hala okutya ohango otayi ningwa manga Ombushiki, ano Omukwaniilwa inaa sindana molugodhi? Aawe. Omamoniko ngoka ge li membo lyEhololo inaga tumbulwa melandulathano. MEpisalomi 45, ohango yomuuwa oya ningwa konima sho Omukwaniilwa, Jesus Kristus a homata egongamwele lye a ‘ka sinde’ aatondi ye. — Eps. 45:3, 4.

11. Kristus ota ka sindana miita ngiini?

11 Ngashingeyi otatu vulu okuthika pehulithodhiladhilo kutya iiningwanima mbika otayi ka ningwa melandulathano ndika: Shotango, “ohonda kamana,” Babiloni oshinene, uukwaniilwa womalongelokalunga giifundja otayi ka hanagulwa po. (Eh. 17:1, 5, 16, 17; 19:1, 2) Opo nduno, Kristus ota ka hanagula po onkalelo ayihe ya kolokosha yaSatana kombanda yevi puArmagedon, “iita mesiku enene lyaKalunga Omunankondoadhihe.” (Eh. 16:14-16; 19:19-21) Lwahugunina, Omukwaniilwa omusindani ota ka sindana miita sho ta ka umbila Satana noompwidhuli dhe molumbogo moka taya ka kala itaaya vulu we okuninga sha. — Eh. 20:1-3.

12, 13. (a) Ohango yOnzigona otayi ka ningwa uunake? (b) Oolye taya ka nyanyukilwa ohango yOnzigona megulu?

12 Sho Aakriste aagwayekwa taya mana olweendo lwawo lwokombanda yevi, ohaya yumudhilwa megulu. Pompito yimwe konima yehanagulo lyaBabiloni oshinene, Jesus ota ka gongela iilyo ayihe mbyoka ya hupu po yongundu yomufuko. (1 Tes. 4:16, 17) Manga iita yaArmagedon inaayi ningwa, iilyo ayihe yongundu ‘yomufuko’ otayi ka kala yi li nale megulu. Konima yiita, opo nduno ohango yOnzigona tayi ka ningwa. Ohango ndjoka itayi ka kala tuu tayi nyanyudha! Ehololo 19:9 olya ti: “Aanelago oomboka ya hiywa koshituthi shohango yOnzigona.” Iilyo yongundu yomufuko mboka ye li 144 000 itayi ka kala tuu ya nyanyukwa. Nombushiki ngoka e li Omukwaniilwa ota ka kala a nyanyukwa noonkondo sho ta ka kala e na omwaalu gwa  gwana po gwaagwayekwa ayehe ‘ta li nota nu nayo poshililo she mUukwaniilwa we’ (NW) pathaneko. (Luk. 22:18, 28-30) Ihe, Ombushiki nomufuko hayo owala taya ka kala ya nyanyukilwa ohango yOnzigona.

13 Ngaashi twe shi mono petameko, aayengeli megulu otayi imbi ya hangana taya ti: “Tu nyanyukweni tse tu ligoleni, tu simanekeni uunene we [waJehova]! Oshoka ethimbo lyohango yOnzigona olya thikana nomufuko gwe okwi ilongekidha.” (Eh. 19:6, 7) Ihe mbela ongiini nduno kombinga yaapiya yaJehova kombanda yevi? Mbela nayo otaya ka kutha ngaa ombinga mohango?

‘OTAYA KA FALWA POMUKWANIILWA YA NYANYUKWA’

14. Ngaashi sha tumbulwa mEpisalomi 45, oolye “iinkumbi” yomufuko?

14 Lesha Episalomi 45:12, 14b, 15. Omupolofeti Sakaria okwa hunganeke kutya pethimbo lyehulilo, aantu yomiigwana oya li taya ka nyanyukilwa okweendathana noshihupe shaIsraeli yopambepo. Okwa nyola a ti: “Momasiku ngeyaka aakwiilongo omulongo otaye ya kOmujuda gumwe notaa ti: ‘Otwa hala okukala pamwe nane, oshoka tse otu uvu kutya OMUWA oku li nane.’” (Sak. 8:23) MEpisalomi 45: 13 OB-1954, “aakwiilongo omulongo” otaya popiwa ye li “aakadhona yaTiro” yo ‘aayamba.’ Ohaye ya kaagwayekwa ye na omagano, taye ya ‘heke’ ya kale ye ya hokwa notaya kongo ekwatho lyopambepo. Okuza mo-1935, aantu omamiliyona oye etha oshihupe shaagwayekwa shi ya ‘longe uuyuuki.’ (Dan. 12:3, OB-1954) Aapiya mbaka aadhiginini ye li Aakriste aagwayekwa oyo opaleka oonkalamwenyo dhawo, noya ninga aakadhona yopambepo. “Iinkumbi” yomufuko mbika oyi iyapulila Jehova noya kala aalelwa aadhiginini yOmukwaniilwa Ombushiki.

15. “Iinkumbi” oya kala tayi longele kumwe ngiini niilyo yongundu yomufuko mbyoka yi li natango kombanda yevi?

 15 Oshihupe shaagwayekwa mboka ye li iilyo yongundu yomufuko osha kala unene shi na olupandu ‘omolwiinkumbi’ mbyoka ya kala tayi kwathele nuuladhi mokuuvitha “onkundana ombwanawa yUukwaniilwa” kombanda yevi alihe. (Mat. 24:14, NW) “Ombepo nomuyalekwa” hayo owala taya ti kutya “Ila!” ihe naamboka taye shi uvu otaya ti wo “Ila!” (Eh. 22:17) Odhoshili kutya ‘oonzi dhilwe’ odhu uva iilyo yongundu iigwayekwa tayi ti: “Ila!” notayi igidha aantu yokombanda yevi pamwe nomufuko taya ti: “Ila!” — Joh. 10:16.

16. Jehova okwa pa oonzi dhilwe uuthembahenda wuni?

16 Oshihupe shaagwayekwa oshi hole yakwawo nosha nyanyukwa okuuva kutya He yOmbushiki, Jehova, okwa pa oonzi dhilwe kombanda yevi uuthembahenda woku ka nyanyukilwa ohango yomegulu yOnzigona. Osha li sha hunganekwa iikutya “iinkumbi” mbika oya li ‘tayi ka nyanyukwa notayi ka ligola.’ Odhoshili kutya, oonzi dhilwe, ndhoka dhi na etegameno lyoku ka kala sigo aluhe kombanda yevi, otadhi ka nyanyukwa wo muuyuni awuhe sho ohango yOnzigona tayi ka ningwa megulu. Otashi opalele sho embo lyEhololo lya popi iilyo ‘yongundu onene’ (NW) ‘ya thikama komeho goshipangelapundi nOnzigona.’ Ohaya yakula Jehova miilonga iiyapuki mehale lyotempeli ye yopambepo ndjoka yi li kombanda yevi. — Eh. 7:9, 15.

Ombushiki ya kwata omufuko gwayo moshikaha (Tala okatendo 16)

‘AAMWOYEMATI OTAYA KA PINGENA PO OOHOKULU’

17, 18. Ongiini ohango yOnzigona tayi ke eta uuwanawa, naKristus ota ka ninga he yoolye pethimbo lyelelo lye lyoomvula eyuvi?

17 Lesha Episalomi 45:16. “Iinkumbi” yaKristus yomufuko gwomegulu otayi ka kala yi na etompelo ekwawo lyokukala ya nyanyukwa sho tayi ka mona nkene ohango tayi ke e ta uuwanawa muuyuni uupe. Omukwaniilwa Ombushiki ota ka gandja eitulomo lye kombanda yevi nota ka yumudha “oohekulu,” yokombanda yevi mboka taya ka ninga ‘oyanamati’ yokombanda yevi. (Joh. 5:25-29; Heb. 11:35) Mwaamboka ota ka hogolola mo mboka ta ka ‘kwaniileka kombanda yevi alihe.’ Nokaapu na omalimbililo, Kristus ota ka hogolola yamwe yomaakuluntugongalo aadhiginini kunena ya ka kwatele komeho muuyuni uupe. — Jes. 32:1.

18 Pethimbo lyelelo lye lyoomvula eyuvi, Kristus ota ka ninga he yayalwe wo. Nokuli, ayehe mboka taya ka kala kombanda yevi otaya ka mona omwenyo gwaaluhe molwaashoka oya kala ye na eitaalo mekuliloyambo lyaJesus. (Joh. 3:16) Nokungawo ota ningi ‘He yawo yomuukwaaluhe.’ — Jes. 9:6, 7.

OKWA LI I INYENGITHWA ‘A TSEYITHE EDHINA LYE’

19, 20. Iiningwanima yini ya tumbulwa mEpisalomi 45 ya guma Aakriste yashili kunena?

19 Episalomi 45:17, NW otali ti. Odhoshili kutya iiningwanima mbyoka yi li mEpisalomi 45 oya guma Aakriste ayehe. Aagwayekwa mboka ya hupa kombanda yevi oya nyanyukwa molwaashoka masiku otaya ka hangana megulu naamwahe nonOmbushiki yawo. Shika oshi inyengitha oonzi dhilwe dhi ka kale hadhi vulika lela kOmukwaniilwa gwadho gweadhimo nodha nyanyukwa sho dhi na uuthembahenda woku kala tadhi endathana niilyo yomufuko mbyoka ya hupa kombanda yevi. Konima yohango yawo, Kristus nosho wo aapangeli pamwe naye yUukwaniilwa otaye ke etela ayehe mboka taya ka kala kombanda yevi omayambeko ogendji. — Eh. 7:17; 21:1-4.

20 Sho twa tegelela egwanitho ‘lyaashoka oshiwanawa’ shi na ko nasha nOmukwaniilwa gwopaMesiasa, mbela shika itashi tu inyengitha tu ‘tseyithe edhina lye’? (Eps. 45:1, NW) Natu kale yomwaamboka taya ka ‘tanga Omukwaniilwa sigo aluhe, nokuli sigo osigo.’