Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2014

 IINIMA MBYOKA YA NINGWA MONDJOKONONA YOONZAPO DHAJEHOVA

Oshinyandwa tashi koleke eitaalo osha gwanitha ngashingeyi oomvula 100

Oshinyandwa tashi koleke eitaalo osha gwanitha ngashingeyi oomvula 100

“Omuntu ngoka ota monika a fa omumwatate Russell, ihe okwa pita po ishewe pomumwatate Russell!” — Omutali gumwe gwoshinyandwa “Photo-Drama” mo-1914, osho a ti ngaaka.

OMVULA ndjika oshinyandwa “Photo-Drama of Creation,” osha gwanitha oomvula 100, okuza sho sha li shu ulikwa ongulohi yotango. Osha li sha longekidhwa shi kwathele aantu ya kale yi itaala Ombiimbeli kutya oyi li Oohapu dhaKalunga. Pethimbo mpoka eitaalo moevolusi, okunyonyodhola nosho wo omalimbililo okwa li kwa nkundipaleka eitaalo lyoyendji, oshinyandwa “Photo-Drama” osha li shu ulike lela kutya Jehova oye Omushiti.

Charles T. Russell ngoka a li ta kwatele komeho Aakonakonimbiimbeli, okwa li aluhe a kongo omikalo ndhoka tadhi longo lela notadhi endelele dhokwaandjaganeka oshili yOmbiimbeli. Aakonakonimbiimbeli oya kala nale taya longitha iileshomwa oomvula dhi vulithe pomilongo ndatu. Ihe opwa li pwa monika omukalo omupe, ano okulongitha omathano tagi inyenge.

OKUTAANDELITHA EVAANGELI OKUPITILA MOMATHANO TAGI INYENGE

Pethimbo lyoomvula dho 1890 nasha opwa li pwa tamekwa okuulukilwa aantu omathano tagi inyenge. Petameko lyo 1903, ofilima yopalongelokalunga oya li yu ulikwa mongeleka yi li moNew York City. Nopethimbo mpono omathano tagi inyenge opo owala ga li ga totwa mo-1912 sho Russell a tameke okulongekidha oshinyandwa “Photo-Drama.” Okwa li e shi mono mo kutya omukalo nguka gwokugandja uuyelele otagu vulu okwaandjaganeka oshili yOmbiimbeli gu vulithe iileshomwa.

Oshinyandwa “Photo-Drama” shoka sha li hashi pula oowili hetatu, osha li hashi ulikwa miitopolwa yi li ine, moka mwa li mu na iipopiwa yopaMbiimbeli 96 iifupi tayi gandjwa komupopi gumwe ngoka e shiwike nawa e na ewi hali mbolongondja nawa. Omathano oga li hage endele pamwe nokamusika okatalala. Mboka ya li haye shi ulike oya li haya dhana omawi nomusika koongalamathona, nokuulika omathano tage endele pamwe newi nosho wo ofilima tayi ulike uunyandwa womahokololo gOmbiimbeli ngoka ge shiwike nawa.

“Osha li shi na omathano okuza peshito lyoonyothi sigo okethimbo lyElelo lyaKristus lyOomvula Eyuvi.”— F. Stuart Barnes, ngoka a li e na oomvula 14 mo-1914 osho a popi ngaaka

Iitopolwa oyindji mofilima ndjoka oya li tayi ulike omathano gomakende ga ningwa moostudio dhopaipindi. Aathaneki mboka ya pyokoka moPhiladelphia, New York, Paris, nosho wo muLondon oya li ya painda olama kehe yomathano gomakende nosho wo yoofilima. Oongundu  dhaaniilonga mboka yomObetel yokondunda yokuthaneka oya li wo ya longo oshindji mokupainda, olundji oya li haya lundulula omathano ngoka ga tatuka. Kakele koofilima ndhoka dha landwa, uukwanegumbo waBetel owa li wa kwatelwa mokavidio popepi naYonkers moNew York, sho tawu dhana oshitopolwa shoshinyandwa shaAbraham, Isak nosho wo shomuyengeli ngoka a li a keelele Abraham kaa yambe po omwana. — Gen. 22:9-12.

Aalongekidhi yoshinyandwa oya li hayu ulike naanaa pethimbo ofilima yookilometa 3.2, noya li haya longitha oongalamathona 26 nomathano gomakende 500 lwaampoka

Gumwe ngoka a li ha kala nomumwatate Russell okwa popi kiifokundaneki a ti kutya omukalo nguka gwokwaandjaganeka uuyelele ogwa li tagu ka “ningitha aantu omayuvi ogendji ya kale ye na ohokwe mOmanyolo, gu vulithe kehe shimwe shoka [sha li] sha ningwa omolwehumokomeho lyomalongelokalunga monakuziwa.” Mbela aasita oya li ngaa taya ka pandula onkambadhala ndjoka yokuthika kaantu oyendji mboka ye na ondjala yopambepo? Kaya li ye shi ningi, ihe pehala lyaashono, aasita yomOmalongelokalunga giifundja gopaKriste oya li ya nyonyodhola oshinyandwa shoka “Photo-Drama,” nokuli yamwe oya li ya longitha omikalo dhiineya nenge tadhi sitha ohoni opo aantu kaaye shi tale. Mehala limwe, aasita yamwe oya li ya tetitha ko olusheno.

Aayakuli yomomagongalo gomoshitopolwa oya li ya gandja oshali uumbo oomiliyona mu na omathano goshinyandwa “Photo-Drama”

Aakalipo oya li wo ya mono ombandi ya nyolwa “Pax” ku na ethano lyaJesus sho a li okamatyona. Oombandi ndhoka odha li hadhi dhimbulukitha mboka ye dhi zala kutya oye na okukala “aana yombili”

Ihe nonando oongawo, aantu oyendji oya li ya yi momahala moka tamu dhanwa oshinyandwa “Photo-Drama” oshali ye ke shi tale. Moondoolopa dhi li 80 moUnited States omwali hamu ulikwa oshinyandwa shoka “Photo-Drama” esiku kehe. Mokulongitha ethano lyokuulika omathano koolimwe noolimwe tage endelele, oya li ya vulu okumona okayuhwena taka tenduka noongala tadhi sheneke nawa. Omathano ngoka ge na ko nasha nuunongononi oga li tagu ulike uunongo waJehova uukumithi. Ngaashi sha popiwa petameko, okumona omumwatate Russell ta popi kosikilina kombinga yoshinyandwa “Photo-Drama,” omutali gumwe okwa li nokuli a dhiladhila kutya omupopi ota monika “a fa omumwatate Russell, ihe okwa pita po ishewe pomumwatate Russell!”

EHUMOKOMEHO NDYOKA LYA NINGWA MELONGO LYOMBIIMBELI

Oshinyandwa “Photo-Drama” osha li shu ulikwa tango mo 11 Januali mo-1914, mehala ewanawa moNew York City ndyoka lya li hali longithwa ko-International Bible Students Association nolya li ehala lyawo yene

Omunyoli gumwe ngoka e li wo omukonakoni gwoofilima Tim Dirks okwa li a hokolola kombinga yoshinyandwa “Photo-Drama” a ti kutya “oshitopolwa shotango oshinene osha li sha kwatela mo omawi (ngoka ga kwatwa), oofilima tadhi inyenge, nosho wo omathano hagu ulikwa neshina.” Oofilima ndhoka dha ka landula oshinyandwa “Photo-Drama” odha li dha longitha omikalo dhimwe dhomwaandhoka, ihe kadha li dha ningwa pompito yimwe, unene tuu ndjoka tayi popi kombinga yOmbiimbeli. Nokapu na nando oyilwe ya li ya talwa kaantu ya adha poomiliyona omugoyi muAmerika lyOkuumbangalantu, Europa, Australia, nomuNew Zealand momvula owala yotango!

Oshinyandwa “Photo-Drama” osha li shu ulikwa tangotango mo 11 Januali 1914 moNew York City. Konima yoomwedhi heyali Iita yoTango yUuyuni mbyoka ya li oshiponga oshinenenene oya li ya tameke. Ihe aantu oyendji muuyuni oya kala nokugongala ya tale oshinyandwa “Photo-Drama,” nomathano tagu ulike omalaleko nuuyamba gUukwaniilwa ngoka tage ke ya oga li ge ya hekeleke. Omumvo 1914 kutya nduno owe gu yeleke nashike, oshinyandwa “Photo-Drama,” osha li shili shu ulikwa momukalo omukumithi.

Iilongitho 20 yokudhana oshinyandwa “Photo-Drama” oya li ya longithwa koongundu muAmerika lyOkuumbangalantu alihe