Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2014

Omuselekadhi gwokuSarepta okwa li a pewa ondjambi omolweitaalo lye

Omuselekadhi gwokuSarepta okwa li a pewa ondjambi omolweitaalo lye

OMUSELEKADHI ohepele okwa papatela okamwanamati hoka oko awike e na. Ita vulu oku shi itaala. Konima owala yethimbo efupi, okwa li e ku ukata ka sa. Ngashingeyi omukiintu okwa tala okamwanamati ka yumuka nokwa nyanyukwa sho taki imemeha. Omuyenda gwe okwa ti: “‘Tala, omumwoye oye ngu e na omwenyo!’”

Eyumuko ndika endhindhilikwedhi olya li lya ningwa oomvula 3 000 dha ka pita. Oto vulu okulesha kombinga yalyo mAakwaniilwa yotango ontopolwa 17. Omuyenda okwa li omupolofeti gwaKalunga Elia. Ye yina? Omuselekadhi ngoka inaa tumbulwa kedhina a kala moshilando Sarepta. Eyumuko lyokamwanamati olya li limwe lyomiiningwanima tayi koleke eitaalo, mbyoka ya ningwa monkalamwenyo ye. Sho to konakona kombinga ye, oto ki ilonga mo iiyilongomwa ya simana.

ELIA OKWA LI I ITSU OMUSELEKADHI NGOKA E NA EITAALO

Jehova okwa li a tseyitha kutya otaku ka kala ondjala ethimbo ele pethimbo lyelelo lyaAhab, omukwaniilwa omwiinayi gwaIsraeli. Konima sho Elia a hunganeke ondjala ndjoka, Kalunga okwa li e mu holeke kaa monike komukwaniilwa Ahab nokwa li a hupitha omupolofeti ngoka pashikumithalonga sho a li he etelwa oshikwiila nonyama komadhilakola. Opo nduno Jehova okwa lombwele Elia a ti: “Ngashingeyi inda koshilando Sarepta popepi naSidoni, u kale ko. Onda lombwele omuselekadhi gumwe, e ku paluthe.” — 1 Aak. 17:1-9.

Elia sho a thiki muSarepta, okwa mono omuselekadhi ohepele ta tyaya iikuni. Mbela oye a li omukiintu ngoka a li ta ka pa omupolofeti ngoka iikulya? Mbela okwa li te ke shi ninga ngiini, ngele okwa hepa unene? Kakele komalimbililo ngoka tashi vulika Elia a li e na, okwa li a tameke oonkundathana nomukiintu. Okwa ti kuye: “Kwatha ndje wo omeya, ndi nwe.” Sho a yi e ke mu talele omeya, Elia okwa gwedha ko a ti: “Ou kwatha ndje wo, u etele ndje ko oshikwiila.” (1 Aak. 17:10, 11) Kasha li oshinima oshidhigu komuselekadhi okupa omukwiilongo omeya, ashike oku mu pa oshikwiila osha li omukundu.

Omuselekadhi okwa yamukula a ti: “Otandi gana kOMUWA, Kalunga koye omunamwenyo, kutya kandi na shikwiila. Ondi na ashike uusila weshambekela limwe moluyo nuugadhi mokayiga. Onde ya nkuka okutyaya uukuni, ngame ndi  shune kegumbo, ndi ka ngalange okathima ketu nokamwandjemati. Otaka ka kala omwiha gwetu gwahugunina, notatu ka zinda kondjala e tatu si.” (1 Aak. 17:12) Natu dhiladhile kutya shika otashi holola shike.

Omuselekadhi okwa li a dhimbulula kutya Elia Omuisraeli ha tila Kalunga. Shika oshi iwetikile moohapu dhe ndhika sho a ti: ‘OMUWA Kalunga koye omunamwenyo.’ Osha fa shi li ngeyi kutya nonando omuselekadhi nguka okwa li e na ontseyo onshona kombinga yaKalunga kAaisraeli, ka li ta vulu okulongitha uutumbulilo “Kalunga kandje” sho a popi kuJehova. Omuselekadhi nguka okwa li a kala muSarepta shoka sha li oshitopolwa shoshilando Sidoni nenge tashi vulika sha li hashi tonatelwa kusho. Aakalimo yomuSarepta oye na okukala ya li haya galikana Baal. Nonando oongawo, Jehova okwa li a hokwa mo sha momuselekadhi nguka.

Nonando omuselekadhi ngoka ohepele a kala muSarepta okwa li mokati kaalongeli yiikalunga, okwa kala e na eitaalo. Jehova okwa li a tumu Elia omolwuuwanawa womuselekadhi nowomupolofeti. Moshinima muno, otatu vulu okwiilonga mo oshiilongomwa sha simana.

Haakalimo ayehe ya li ya yonuka nohaya galikana Baal muSarepta. Sho a tumu Elia komuselekadhi, Jehova oku ulike kutya oha ndhindhilike aantu mboka ye na omitima omiwanawa mboka ihaaye Mu longele. Odhoshili kutya “ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” — Iil. 10:35.

Aantu yangapi moshitopolwa sheni ya fa omuselekadhi gwokuSarepta? Nonando oya kundukidhwa kaantu yomalongelokalunga giifundja, otashi vulika ya halelela sha oshiwanawa. Otashi vulika ye na owala ontseyo onshona kombinga yaJehova nenge nokuli kaaye na sha, onkee ano, oya pumbwa ekwatho opo ya taambe ko elongelokalunga lyashili. Mbela oto kongo ngaa oohandimwe mboka noku ya kwathela?

“TANGO NINGILA NDJE KO OKAKWIILA”

Konakona nawa shoka Elia a li a pula omuselekadhi a ninge. Omuselekadhi okwa li e mu lombwele kutya ngele a ngalanga okathima kawo nokamwanamati hoka ka li taka ka kala omwiha gwawo gwahugunina, otaya ka zinda kondjala e taya si. Ihe mbela Elia okwa li a yamukula ngiini? Okwa ti kuye: “‘Ino tila; inda ngaa, u ka teleke. Ihe tango ningila ndje ko okakwiila, u ka ete kungame. Oshihupe otamu itelekele ne nomumwoyemati. Oshoka OMUWA, Kalunga kaIsraeli, ota ti: “Uusila itau ka pwa mo moluyo, nuugadhi itau ka manuka mo mokayiga, manga ngame OMUWA inaandi lokitha omvula.”’” — 1 Aak. 17:11-14.

Yamwe otashi vulika ya tye, ‘ndi gandje po iikulya yandje yahugunina? Aaye shila oto ningi omashendjo.’ Ashike omuselekadhi hasho nando a li i inyenge ngawo. Nonando omuselekadhi okwa li e na ontseyo onshona kombinga yaJehova, okwa li i itaale Elia nokwa ningi shoka a pula. Shoka kasha li tuu sha makele eitaalo lye, netokolo ndyoka a li a ningi kalya li tuu lyomondjila!

Eitaalo lyomuselekadhi muKalunga kaElia, Jehova, olya li lye mu kwathele a hupe nokamwanamati

Kalunga ka li nando e etha omuselekadhi ngoka ohepele. Ngaashi naanaa Elia a li u uvaneke, Jehova okwa li a gandja iipalutha ya gwana kuElia, komuselekadhi nokokamwanamati sigo ethimbo lyondjala lya pu ko. Odhoshili kutya, “ngaashi OMUWA u uvanekitha Elia, uusila inau pwa mo moluyo, nomagadhi inaga pwa mo mokayiga.” (1 Aak. 17:16; 18:1) Ngele ando omuselekadhi ngoka okwi inyengele momukalo gwi ili, oshikwiila shoka a li a ningi meshambekela lyuusila nuugadhi mboka ando otashi vulika wa kala omwiha gwawo gwahugunina. Pehala lyaashono, okwa li a  katuka neitaalo, i inekele muJehova, nokwa pe tango Elia iikulya.

Oshiilongomwa mehokololo muno osho shono kutya Kalunga oha yambeke mboka ye na eitaalo. Uuna uudhiginini woye tawu makelwa, ihe owu ulika eitaalo, Jehova ote ke ku kwathela. Ota ka kala Omusilishimpwiyu, Omugameni, nosho wo Kuume e ku kwathe wu idhidhimikile uupyakadhi woye. — Eks. 3:13-15.

Mo 1898, o-Zion’s Watch Tower oya popi kombinga yoshiilongomwa mehokololo lyomuselekadhi ohepele ya ti: “Ngele omukulukadhi okwa li e na eitaalo lya gwana lyoku mu inyengitha a vulike, oku na okukala a li a gwana okukwathelwa kOmuwa okupitila mOmupolofeti; ngele okwa li inaa ulika eitaalo, ando opwa monika omuselekadhi gulwe ngoka a li te ke shi ninga. Natse wo, omathimbo nomathimbo molweendo lwetu lwonkalamwenyo Omuwa ohe tu eta ponkatu mpoka ha makele eitaalo lyetu. Ngele otwa kala tu na eitaalo otatu ka mona omayambeko; ngele inatu shi ninga, otatu ke ga kanitha.”

Ngele twa taalela omaupyakadhi gontumba, otwa pumbwa okukonga ewiliko lyaKalunga mOohapu dhe nomiileshomwa yetu ya kankamena kOmbiimbeli. Otu na nduno okukatuka metsokumwe newiliko lyaJehova kashi na nduno mbudhi kutya oshidhigu shi thike peni oku li taamba ko. Eeno odhoshili kutya otatu ka yambekwa ngele otwa katuka metsokumwe nomayele gopandunge ngaka taga adhika mOmayeletumbulo, taga ti: “Inekela OMUWA nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” — Omayel. 3:5, 6.

‘OWE YA OKUDHIPAGA OMUMWANDJE?’

Eitaalo lyomuselekadhi olya li ishewe li li pokumakelwa. Ombiimbeli oya ti: “Konima yethimbo omumati gwomuselekadhi okwa kwatwa koshigombo; uuvu owa geye nohugunina okwa si.” Molwaashono okwa li a hala etompelo lyuupyakadhi mbuka, omuselekadhi ngoka a li a nika oluhodhi okwa lombwele Elia a ti: “‘Muntu gwaKalunga, owa ningi ndje ngiini? Nani owe ya mpaka, u dhimbuluthe Kalunga uulunde wandje, sho shi sithe omumwandje?’” (1 Aak. 17:17, 18) Oohapu ndhika oonkunkutu otadhi ti shike?

Mbela omuselekadhi okwa li e na eiyuvo tali mu nyenyetele molwaashono a dhimbulukwa uulunde wontumba mboka a ninga? Mbela okwa li ta dhiladhila kutya eso lyomwana oli li egeelo lyaKalunga nosho wo kutya Elia omutumwa gwaKalunga e eta onkundana yeso? Ombiimbeli inayi tu lombwela sha kombinga yaashoka, kakele oshitsa shotango osha yela shoka tashi ti: Omuselekadhi ina pa nando Kalunga uusama omolwokwaahenuuyuki huka.

Elia oku na okukala a li a haluka nayi keso lyokamwanamati komuselekadhi nosho wo kedhiladhilo lye kutya okuya kwomupolofeti okwo kwa li kwe mu nikitha oluhodhi. Konima sho a humbata omudhimba gwokamati e te gu fala mondunda yopombanda, Elia okwa galikana muule a ti: “‘OMUWA, Kalunga kandje, oshike wa ningile omuselekadhi nguka iihuna yi thike mpaka? Okwa kala nangame ta sile ndje oshimpwiyu, ndele ngashingeyi owa dhipaga omwana.’” Omupolofeti ka li ta vulu okwiidhidhimikila edhiladhilo kutya edhina lyaKalunga otali ka nyata ngele Okwe etha omukiintu nguka e na ohenda noha yakula nawa aayenda a tsikile nokumona iihuna. Onkee ano Elia okwi indile ta ti: “‘OMUWA, Kalunga kandje, tululula omumati nguka omwenyo.’” — 1 Aak. 17:20, 21.

“‘TALA, OMUMWOYE OYE NGU E NA OMWENYO!’”

Jehova okwa li a pulakena. Omuselekadhi okwa li a sile oshimpwiyu omupolofeti gwe nokwa li u ulike eitaalo. Osha yela kutya, Kalunga okwa li e etha uuwehame wu dhipage okamati, molwaashoka okwa li e shi shi kutya eyumuko lyotango ndyoka lya popiwa mOmanyolo olya li tali ka ningwa opo a gandje etegameno komapipi tage ya. Sho Elia i indile Jehova, Jehova okwa yumudha okanona. Dhiladhila owala kenyanyu ndyoka omuselekadhi a li e na sho Elia a ti: “‘Tala, omumwoye oye ngu e na omwenyo!’” Omuselekadhi okwa lombwele Elia a ti: “‘Ngashingeyi ondi shi shi kutya ngoye omuntu gwaKalunga, nOMUWA ota popi shili mungoye!’” — 1 Aak. 17:22-24.

Ehokololo ndyoka li li mAakwaniilwa yotango ontopolwa 17 inali tsikila ko sha we kombinga yomuselekadhi nguka. Ihe mokutala kunkene Jesus a li e mu popile muuwanawa, oku na okukala a li omulongeli gwaJehova omudhiginini onkalamwenyo ye ayihe. (Luk. 4:25, 26) Ehokololo lye otali tu longo kutya Kalunga oha yambeke mboka haya ningile aapiya ye uuwanawa. (Mat. 25:34-40) Otashi ulike kutya Kalunga oha sile oshimpwiyu aapiya ye aadhiginini, kutya nduno oye li moonkalo oondhigu. (Mat. 6:25-34) Ehokololo ndika otali gandja wo uunzapo kutya Jehova okwa hala noku na oonkondo dhokuyumudha aasi. (Iil. 24:15) Eeno, ngaka oge li omatompelo omawanawa gokudhimbulukwa omuselekadhi gwokuSarepta.