Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo yokukonakonwa  |  Febuluali 2014

Hambeleleni Kristus, Omukwaniilwa gweadhimo!

Hambeleleni Kristus, Omukwaniilwa gweadhimo!

“Osheendo shomukwaniilwa nashi adhe esindano.” — EPS 45:4.

1, 2. Omolwashike tu na ohokwe mEpisalomi eti-45?

OMUKWANIILWA gweadhimo okwa kayile okakambe ke a ka popile oshili nuuyuuki nokwa yi a ka sinde aatondi ye. Sho a sindana olugodhi lwahugunina, okwa hokana omufuko gwe omwaanawa. Omukwaniilwa okwa dhimbulukiwa nokwa hambelelwa komapipi nomapipi tage ya. Ndyoka olyo enenedhiladhilo lyEpisalomi eti-45.

2 MEpisalomi eti-45 omu na oshindji kaashi shi owala ehokololo ndyoka li na ehulilo tali nyanyudha. Iiningwanima mbyoka ya tumbulwa mo otayi ti sha kutse. Oya guma oonkalamwenyo dhetu kunena, nosho wo onakuyiwa yetu. Natu ka konakoneni nuukeka episalomi ndika.

“IITYA IIWANAWA OYI LI KOMUTIMA GWANDJE”

3, 4. (a) “Iitya iiwanawa” mbyoka ye tu guma oyini, nongiini tayi vulu okuguma omitima dhetu? (b) Omomukalo guni ‘ondjimbo yetu tayi popi kombinga yomukwaniilwa,’ nongiini elaka lyetu hali kala lya fa opena yomunyoli onkulungu?

3 Lesha Episalomi 45:1. Opu na “iitya iiwanawa” mbyoka ya zi momutima gwomupisalomi sho ta popi omukwaniilwa. MOshihebeli, episalomi ndika otali vulu okugandja edhiladhilo kutya omutima gwomupisalomi otagu fuluka iinima iiwanawa. Oshinima shika osha li sha ningitha omutima gwomupisalomi gu kale gu na ehwamo nosha ningitha elaka lye li kale lya fa ‘opena yomunyoli onkulungu.’

 4 Ongiini kombinga yetu? Onkundana ombwanawa yUukwaniilwa wopaMesiasa oyi li oshinima oshiwanawa shoka hashi gumu omitima dhetu. Etumwalaka lyUukwaniilwa olya ningi ‘ewanawa’ unene tuu mo-1914. Okuza momumvo ngoka, etumwalaka kalya li we li na ko nasha nUukwaniilwa womonakuyiwa ihe onepangelo lyolela ndyoka ngashingeyi tali pangele megulu. Ndjika oyo ‘onkundana yUukwaniilwa’ ndjoka hatu uvitha ‘muuyuni awuhe yi ningile iigwana ayihe onzapo.’ (Mat 24:14, NW) Mbela omitima dhetu otadhi fuluka ngaa etumwalaka lyUukwaniilwa? Mbela ohatu uvitha ngaa onkundana ombwanawa yUukwaniilwa nuulaadhi? Ngaashi omupisalomi, ‘ondjimbo yetu ohayi popi kombinga yomukwaniilwa,’ ano Omukwaniilwa gwetu Jesus Kristus. Ohatu uvitha kombinga ye e li Omukwaniilwa a langekwa po gwUukwaniilwa womegulu wopaMesiasa. Ishewe, ohatu hiya ayehe, ano aapangeli naapangelwa ya vulike kuukwaniilwa we. (Eps 2:1, 2, 4-12) Nelaka lyetu ohali ningi lya fa ‘opena yomunyoli onkulungu’ meityo ndyoka kutya ohatu longitha lela Oohapu dha nyolwa miilonga yetu yokuuvitha.

Ohatu uvitha nenyanyu onkundana ombwanawa kombinga yOmukwaniilwa gwetu Jesus Kristus

‘OOHAPU OOMBWANAWA ODHI LI KOMILUNGU DHOMUKWANIILWA’

5. (a) Omomikalo dhini Jesus a li ‘ekandeelela’ nenge tu tye omwaanawa? (b) Ongiini ‘oohapu oombwanawa dhi li komilungu dhOmukwaniilwa,’ nongiini tatu vulu okukambadhala tu landule oshiholelwa she?

5 Lesha Episalomi 45:2. Omanyolo oga popya owala kashona keholokopo lyaJesus lyokolutu. Molwaashoka okwa gwanenena, oku na okukala a li ‘ekandeelela’ nenge tu tye omwaanawa. Ihe uuwanaweelela we wi iwetikile owa zi mokukala kwe omudhiginini kuJehova. Kakele kaashono, Jesus okwa li u uvitha etumwalaka lyUukwaniilwa ta popi ‘oohapu oombwanawa.’ (Luk 4:22; Joh 7:46) Mbela ohatu kambadhala ngaa paumwene tu landule oshiholelwa she miilonga yetu yokuuvitha notu kambadhale okulongitha oohapu ndhoka tadhi ka guma omitima dhaantu? — Kol 4:6.

6. Ongiini Kalunga a li a laleke nuuyamba Jesus ‘sigo aluhe’?

6 Molwaashono Jesus okwa li i igandja miilonga ye nomwenyo aguhe, Jehova okwa li e mu laleke nuuyamba pethimbo lyuukalele we kombanda yevi, nokwa li e mu pe ondjambi konima yeso lye lyopayambo. Omuyapostoli Paulus okwa nyola a ti: ‘Jesus okwa holoka molupe lwomuntu. Oye okwi ifupipike nokwe ende ondjila yevuliko sigo omeso lye [lyokomuti gwomahepeko, NW]. Onkee ano Kalunga okwe mu yele pombandambanda nokwe mu luku edhina enene li vule omadhina agehe, opo kehe shimwe megulu nokombanda yevi nomohi shi tse oongolo medhina lyaJesus. Nomokusimanekitha Kalunga He ayihe yi hokolole montaneho kutya Jesus Kristus oye Omuwa.’ (Fil 2:7-11) Jehova okwa li a yambeke Jesus ‘sigo aluhe’ sho e mu yumudhile omwenyo ihaagu si. — Rom 6:9.

OMUKWANIILWA OKWA TULWA PONDONDO YOPOMBANDA E VULE “OMUKWANIILWA KEHE”

7. Omomikalo dhini Kalunga a li a gwayeke Jesus e vule “omukwaniilwa kehe”?

7 Lesha Episalomi 45:6, 7Omolwokukala kwaJesus e hole uuyuuki nokukala e tonde kehe shimwe shoka tashi vulu okudhinitha He, Jehova okwa li e mu gwayeke a ninge Omukwaniilwa gwUukwaniilwa wopaMesiasa. Jesus okwa li a gwayekwa ‘nomugwayo gwenyanyu’ (OB-1954) nenge tu tye a tililwa eyambeko olindji e vule “omukwaniilwa kehe,” ano omukwaniilwa kehe gwaJuda gwomezimo lyaDavid. Ngiini mbela? Etompelo limwe oondyono kutya, Jesus okwa li  a gwayekwa kuJehova mwene. Ekwawo, Jehova okwa li e mu gwayeke e li Omukwaniilwa nosho wo Omuyambimukuluntu. (Eps 2:2; Heb 5:5, 6) Limwe ishewe, Jesus ka li a gwayekwa nomagadhi ihe onombepo ondjapuki, nuukwaniilwa we kawu shi wokombanda yevi ihe owomegulu.

8. Omolwashike taku vulu okutiwa kutya Jesus oku na uuthemba wokupangela,’ nomolwashike tu na uushili kutya uukwaniilwa we owu li pauyuuki?

8 Jehova okwa li a langeke po Omwana e li Omukwaniilwa gwopaMesiasa megulu, mo-1914. ‘Ondhimbo yuukwaniilwa we oyo ondhimbo yuuyuuki,’ onkee ano osha yela kutya melelo lye otamu ka kala uuyuuki. Oku na uuthemba wokupangela, molwaashoka ‘epangelo ndyoka okwe li pewa kuKalunga.’ Shoka otashi ulike kutya Jehova oye ekankameno lyuukwaniilwa we. Shimwe ishewe, oshipangelapundi shaJesus otashi ka kala po “sigo aluhe.” Mbela ku uvite etumba sho to longele Jehova mewiliko lyOmukwaniilwa omunankondo ngoka a langekwa po kuYe?

OMUKWANIILWA OKWA ‘HOMATA EGONGA LYE’

9, 10. (a) Kristus okwa li a homata uunake egonga lye, nongiini a li e li longitha nziya? (b) Kristus ota ka longitha ngiini egonga lye ishewe?

9 Lesha Episalomi 45:3. Jehova okwa lombwele Omukwaniilwa gwe a ‘homate egonga lye.’ Kungawo okwa pe Jesus uuthemba a kondjithe ayehe mboka ye li ompinge nuunamapangelo We noku ya hanagula po. (Eps. 110:2) Molwaashoka Kristus oku li Omukwaniilwa Omusindani, ota popiwa e li “omunankondo.” Mo-1914 okwa li a homata egonga lye nokwa li a sindi Satana noompwidhuli dhe sho e yu umbu mo megulu nokwe ya umbile kombanda yevi. — Eh. 12:7-9.

10 Ndyoka olyo owala lya li etameko lyokusindana kwOmukwaniilwa ngoka. Ihe opo ngaa ta ka ‘sindana’ thiluthilu. (Eh. 6:2) Jehova opo ta ka hulitha po iinima ayihe yonkalelo yaSatana kombanda yevi, na Satana noompwidhuli dhe oye na okukuthwa oonkondo dhokupukitha aantu. Babiloni oshinene osho tashi ka hanagulwa po tango, ano uukwaniilwa wuuyuni womalongelokalunga giifundja. Jehova okwa lalakanena okulongitha aapangeli yopapolotika ya hanagule po “ohonda” ndjoka onkolokoshi. (Eh. 17:16, 17) Shoka tashi ka landula ko, Omukwaniilwa ngoka omusindani ota ka tsikila okukondjitha omapangelo agehe gopapolotika gaSatana note ke ga hulitha po thiluthilu. Opo nduno, Kristus, ngoka ti ithanwa wo kutya “omuyengeli ngoka ta pangele olumbogo [lwomuule],” ota ka mana okuponokela kwe sho ta ka umbila Satana noompwidhuli dhe molumbogo. (Eh. 9:1, 11; 20:1-3) Natu ka tale nkene Episalomi eti-45 lya hunganeka iiningwanima mbika yituntula.

OMUKWANIILWA OKWA YI A KA ‘POPILE OSHILI’

11. Ongiini Kristus a li a yi a ka ‘popile oshili’?

11 Lesha Episalomi 45:4. Omukwaniilwa Omusindani iha hingi iita opo a kwate ko iitopolwa nokuninga aantu aapika. Ihe oha hingi iita mbyoka yi li pauyuuki nomalalakano taga ti sha lela. Ota ka ‘popila oshili neifupipiko nuuyuuki.’ Uushili wa dhenga mbanda mboka wu na okupopilwa owo uuthemba waJehova wokupangela eshito alihe. Satana okwa li a pataneke uuthemba waJehova wokupangela sho a tsu ondumbo naYe. Okuza mpoka, oompwidhuli nosho wo aantu oya kala nokupatana kombinga yoshili ndjoka ya simana. Ngashingeyi ethimbo olya thikana opo Omukwaniilwa omugwayekwa gwaJehova a ye molugodhi, opo u ulike kutya Jehova oye awike e na uuthemba wokupangela.

12. Omomukalo guni Omukwaniilwa a ka ‘popila eifupipiko?’

12 Omukwaniilwa okwa yi wo a ka ‘popile eifupipiko.’ E li Omwana gwaKalunga epona, okwa tula po oshiholelwa sha dhenga mbanda sheifupipiko noshokukala omudhiginini kuunamapangelo waHe. (Jes. 50:4, 5; Joh. 5:19) Aapangelwa ayehe aadhiginini  yOmukwaniilwa ngoka oye na okulandula oshiholelwa she nokuvulika neifupipiko miinima ayihe kuunamapangelo waJehova. Oomboka owala haya ningi ngaaka taya ka pitikilwa muuyuni uupe waKalunga mboka e tu uvanekela. — Sak. 14:16, 17.

13. Ongiini Kristus a ka ‘popila uuyuuki’?

13 Kristus okwa yi wo a ka ‘popile uuyuuki.’ Uuyuuki mboka Omukwaniilwa ngoka ta popile ‘uuyuuki waKalunga,’ sha hala okutya, omithikampango dhaJehova dhaashoka shi li mondjila naashoka sha puka. (Rom. 3:21; Deut. 32:4) Jesaja okwa li a hunganeke kombinga yOmukwaniilwa Jesus Kristus a ti: “Omukwaniilwa ota ka lela nuuyuuki.” (Jes. 32:1) Elelo lyaJesus otali ke eta “egulu epe” nosho wo “evi epe,” moka “tamu ka kala uuyuuki.” (2 Pet. 3:13) Kehe ngoka ta ka kala muuyuni mboka uupe ota ka kala a tegelelwa a vulike komithikampango dhaJehova. — Jes. 11:1-5.

OMUKWANIILWA OKWA LONGO ‘IILONGANKUMWE’

14. Ongiini oshikaha shaKristus shokolulyo tashi ka gwanitha po ‘iilongankumwe’? (Tala kethano ndyoka li li petameko.)

14 Sho a kayile okakambe, Omukwaniilwa okwa li a homata egonga lye. (Eps. 45:3) Ihe ethimbo olya li lya thiki opo a pweye mo egonga lye noshikaha she shokolulyo noku li longitha. Omupisalomi okwa hunganeke a ti: ‘Olulyo lwoye otalu longo iilongankumwe.’ (Eps. 45:5, OB-1954 [45:4, OB-1986]) Sho Jesus Kristus ta ka ya a ka hanagule po uuyuni waSatana puArmagedon, ota ka longela aatondi ye ‘iilongankumwe.’ Katu shi shi kutya ota ka longitha shike a hanagule po onkalelo yaSatana. Ihe onkatu ndjoka ta ka katuka otayi ka dhenga koomwenyo mboka ye li kombanda yevi mboka inaaya taamba ko omalondodho gokuvulika kepangelo lyOmukwaniilwa. (Lesha Episalomi 2:11, 12.) Mehunganeko lye kombinga yethimbo lyehulilo, Jesus okwa ti kutya aantu otaya “ka sa omoluumbanda mokutegelela mbyoka tayi ka adha evi alihe, oshoka oonkondo dhomewangandjo otadhi ka tukuluka.” Okwa gwedha ko wo a ti: “Oyo otaa ka mona Omuna gwOmuntu te ya te endele moshikogo e na oonkondo odhindji neadhimo.” — Luk. 21:26, 27.

15, 16. ‘Momatangakwiita’ ngoka ga landula Kristus molugodhi, omwa kwatelwa oolye?

15 Embo lyEhololo olya popi kombinga yOmukwaniilwa ngoka te ya “e na oonkondo odhindji neadhimo” a hanagule, lya ti: “Nena onda mono egulu lye eguluka nomo mwa li mu na okakambe okatokele. Omukayili gwako ohi ithanwa Omwiinekelwa nOmunashili. Oye ota pangula nuuyuuki nota kondjo olugodhi. Omatanga gaakwiita yomegulu oge mu landula, ya londa kuukambe uutokele noya zala oonguwo oontokele dholiina. Mokana ke omwa zi egongamwele lya tsa, ndyoka ta ka sinda nalyo iigwana. Oye ote ke yi pangela nondhimbo yosheela nota ka kola nokutsipulila moshikolelo shomaviinu gondjahi onene yaKalunga Omunankondoadhihe.” — Eh. 19:11, 14, 15.

16 Oolye taya ka kala aakwiita pamwe naKristus mboka ya kwatelwa ‘momatangakwiita’ gomegulu ngoka ge mu landula molugodhi? Sho Jesus a homata lwotango egonga lye opo u umbe mo Satana noompwidhuli dhe megulu, Jesus okwa li pamwe ‘naayengeli ye.’ (Eh. 12:7-9) Otashi monika shi li pandunge okuthika pehulithodhiladhilo kutya piita yaArmagedon, momatangakwiita gaKristus otamu ka kala mwa kwatelwa aayengeli aayapuki. Mbela momatangakwiita ge omwa kwatelwa yalwe? Jesus okwa li u uvanekele aamwahe aagwayekwa a ti: “Aasindani mboka taa gwanitha ehalo lyandje sigo okehulilo, otandi ke ya pa oonkondo ndhoka nde dhi pewa kuTate: otandi ke ya pa oonkondo dhokupangela iigwana nondhimbo yosheela noku yi tatula, ngaashi omuntu ta tatula oshuma sheloya.” (Eh. 2:26, 27) Onkee ano omatangakwiita gaKristus gomegulu otaga ka kala ga kwatela mo wo aamwahe aagwayekwa, mboka pethimbo ndyoka taya ka  kala ya pewa nale ondjambi yawo yomegulu. Aagwayekwa mboka taya ka pangela pamwe naye otaya ka kala puye sho ta gwanitha po ‘iilongankumwe’ manga ta pangele iigwana nondhimbo yosheela.

OMUKWANIILWA OKWA SINDANA

17. (a) Okakambe okatokele hoka ka kayilwa kuKristus otaka thaneke shike? (b) Egongamwele nosho wo uutati otayi thaneke shike?

17 Lesha Episalomi 45:5. Omukwaniilwa oku li kokakambe okatokele, hoka taka thaneke olugodhi ndwoka lwa yogoka nolu li pauyuuki koshipala shaJehova. (Eh. 6:2; 19:11) Kakele kegongamwele, okwa homata wo uutati. Ehololo 6:2 otali ti: “Ngame onda tala nonda mono ko okakambe okatokele. Omukayili gwako okwa li e na uutati nokwa pewa oshishani. Oye okwa yi, a ka sindane, oshoka oye omusindani.” Egongamwele nosho wo uutati otayi thaneke iinima mbyoka Kristus ta ka longitha a hanagule po aatondi ye.

Oondhila otadhi ki ithanwa dho opaleke evi (Tala okatendo 18)

18. Ongiini “iikuti” yaKristus tayi ku ulika kutya oya “tsa” shili?

18 Omupisalomi okwa li a longitha elaka lyopaitewo a hunganeke kutya Omukwaniilwa oku na ‘iikuti ya tsa, tayi tyuula momitima dhaatondi ye; niigwana otayi ihata poompadhi dhe.’ Aantu oyendji otaya ka dhipagwa muuyuni awuhe. Jeremia okwa hunganeke a ti: “Mesiku ndyoka omidhimba dhaantu mboka ya dhipagwa kOMUWA, otadhi ka langathana okuza kooha dhuuyuni sigo okooha oonkwawo.” (Jer. 25:33) Ehunganeko limwe tali tsu kumwe naandyoka otali ti: “Nena onda mono omuyengeli a thikama ketango. Oye okwi igidha newi enene ta lombwele oondhila ndhoka hadhi tuka mombepo pokati kegulu, a ti: ‘Ileni, gongaleni amuhe koshituthi oshinene shaKalunga! Ileni, mu lye onyama yaakwaniilwa yoondjayi dhiita noyaakwiita, onyama yuukambe noyaakayili yawo, onyama yaantu ayehe, yaapika noyaavalwa, yaanenentu noyaadhinwa.’” — Eh. 19:17, 18.

19. Kristus ota ka ‘sindana’ ngiini nuunake ta ka sindana thiluthilu?

19 Konima ngele a hanagula po onkalelo ya kolokosha yaSatana kombanda yevi, e li ‘meadhimo lye’ (OB-1954) Kristus ota ka ‘sindana.’ (Eps. 45:4) Ota ka sindana thiluthilu sho ta ka umbila Satana noompwidhuli dhe molumbogo lwomuule moka taya ka kala ethimbo alihe lyElelo lyOomvula Eyuvi. (Eh. 20:2, 3) Pethimbo mpoka Ondiapoli nosho wo aayengeli yayo otaya ka kala ya fa ya sa molwaashoka itaya ka vula okweehameka aantu. Aantu mboka ye li kombanda yevi otaya ka kala ya manguluka ko kenwethwomo lyayo notaya ka vula okuvulika thiluthilu kOmukwaniilwa gwawo omusindani nogweadhimo. Ihe manga evi alihe inaali ninga oparadisa, opu na wo natango oshinima shilwe shoka tatu ka nyanyukilwa pamwe nOmukwaniilwa nosho wo naapangeli 144 000. Oshiningwanima shoka tashi nyanyudha otatu ke shi konakona moshitopolwa tashi landula.