Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2014

Ninga omatokolo gopandunge manga wu li omugundjuka

Ninga omatokolo gopandunge manga wu li omugundjuka

‘Aamati naakadhona, hambeleleni edhina lyOMUWA.’ — EPS. 148:12, 13.

1. Aakriste aagundjuka oyendji otaya nyanyukilwa iilonga yini iiwanawa?

OTU li methimbo lituntula. Aantu omamiliyona ya za miigwana ayihe otaya mbombolokele kelongelokalunga lyashili inaashi monika nale. (Eh. 7:9, 10) Aagundjuka oyendji ohaya kala ye na iimoniwa yituntula sho taya kwathele yalwe yu uve ko ooshili dhOmbiimbeli ndhoka tadhi hupitha oomwenyo. (Eh. 22:17) Aagundjuka yamwe otaya kwathele yalwe ya kale ye na onkalamwenyo ombwanawa mokukonakona nayo Ombiimbeli. Yalwe otayu uvitha nuulaadhi miitopolwa moka hamu popiwa omalaka omakwiilongo. (Eps. 110:3; Jes. 52:7) Oshike tashi vulu oku ku kwathela wu kale ho nyanyukilwa lela iilonga yaJehova mbyoka tayi longwa koshigwana she?

2. Oshiholelwa shaTimoteus otashi ulike ngiini kutya Jehova oku na ehalo lyokwiinekelela aagundjuka iinakugwanithwa? (Tala kethano ndyoka li li petameko.)

2 Wu li omugundjuka, oto vulu okuninga omatokolo ngoka taga vulu oku ke ku pa oompito oombwanawa miilonga yaKalunga. Pashiholelwa, Timoteus gwokuListra okwa li a ningi omatokolo gopandunge gi iwetikile ngoka ge ke mu ningitha a pewe oshilonga shuutumwa, tashi vulika sho a li mepipi lyoomvula omulongo nasha nenge sho e na omimvo omilongombali nasha. (Iil. 16:1-3) Osha fa shi li ngeyi kutya konima owala yoomwedhi dhontumba, Paulus okwa li i inekelele omugundjuka Timoteus oshilonga shokushuna kuTessalonika a ka tse aamwatate omukumo, konima sho aapataneki aakwanyanya ya li ya ningitha omuyapostoli Paulus a thige po egongalo lyaTessalonika ndyoka opo lya  li lya totwa. (Iil. 17:5-15; 1 Tes. 3:1, 2, 6) Dhiladhila owala kunkene Timoteus tashi vulika a li u uvite sho a pewa oshilonga shoka!

ETOKOLO LYOYE LYA SIMANENENA

3. Etokolo lini lya simanenena ndyoka to vulu okuninga monkalamwenyo, nuunake to vulu oku li ninga?

3 Ethimbo lyuugundjuka olyo ethimbo lyokuninga omatokolo ga simana. Ihe etokolo lyoye lyokulongela Jehova olyo lya simanenena li vule omakwawo agehe. Mbela uunake shi li nawa okuninga etokolo ndyoka? Jehova ota ti: “Dhimbulukwa Omushiti gwoye momasiku guugundjuka woye.” (Omuuv. 12:1) Omukalo gumwe awike moka to vulu ‘okudhimbulukwa’ Jehova omoku mu longela pakuudha. (Deut. 10:12) Etokolo lyoye lyokulongela Kalunga nomutima aguhe olyo lya simanenena monkalamwenyo yoye. Otali ka guma onkalamwenyo yoye ayihe. — Eps. 71:5.

4. Kakele kokuninga etokolo lyokulongela Jehova, omatokolo gamwe geni ga simanenena taga ka guma nkene ho mu longele?

4 Dhoshili, etokolo lyoye lyokulongela Jehova halyo alike hali gumu onakuyiwa yoye. Pashiholelwa, otashi vulika wo wu ipule shi na ko nasha nokuya mondjokana, kutya olye to yi mo naye, nosho wo nkene to ka hupa monkalamwenyo. Omatokolo ngaka oga simanenena, ihe otashi ka kala pandunge wu hogolole tango ngele owa hala okulongela Jehova pakuudha ngaashi tashi vulika. (Deut. 30:19, 20) Omolwashike mbela? Omolwaashoka omatokolo agehe ngaka oga pambathana. Etokolo lyoye li na ko nasha nondjokana nosho wo niilonga otali ka guma nkene to longele Kalunga. (Yelekanitha Luk. 14:16-20.) Sho natango, ehalo lyoye lyokulongela Kalunga otali ka guma omatokolo goye kombinga yondjokana nokombinga yiilonga. Onkee ano, tokola kutya oshike tashi ka kala sha simanenena monkalamwenyo yoye. — Fil. 1:10.

UUGUNDJUKA WOYE OTO KE WU LONGITHA NGIINI?

5, 6. Gandja oshiholelwa shoka tashi ulike nkene okuninga omatokolo gomondjila taku vulu okweetitha iimoniwa iiwanawa konima. (Tala wo oshitopolwa “Shoka nda hogolola manga nda li okanona” shi li pepandja 32.)

5 Shampa wa hogolola okulongela Kalunga, oto vulu okudhiladhila kutya okwa hala wu ninge shike, noto vulu okutokola nkene to ke mu longela. Omumwatate gumwe Omujapani okwa nyola a ti: “Esiku limwe, sho nda li ndi na oomvula 14, onda li tandi uvitha nomukuluntugongalo gumwe ngoka a li a dhimbulula kutya itandi nyanyukilwa uukalele. Okwa lombwele ndje newi etalala, a ti: ‘Yuichiro, inda kegumbo. Ka kuutumbe e to dhiladhila nawa kombinga yaashoka Jehova e ku ningila.’ Onda li nda ningi ngaashi a lombwele ndje. Onda li nokuli nda tsikile okudhiladhila nokugalikana kombinga yasho uule womasiku gontumba. Mokweendela ko kwethimbo, onda lundulula iikala yandje. Onda li nda mono nziya kutya otandi nyanyukilwa okulongela Jehova. Onda li handi nyanyukilwa okulesha kombinga yaatumwa, nonda li nda tameke okudhiladhila kombinga yokulongela Kalunga pakuudha.”

6 Yuichiro ota tsikile ko ta ti: “Onda li nda tokola ndi tameke okuninga omatokolo ngoka esiku limwe ga li taga ka pa ndje ompito ndi longele Jehova kondje yiilongo. Pashiholelwa, onda li nda tokola ndi ilonge Oshiingilisa. Sho nda mana osikola, onda hogolola iilonga yetatasiku yokulonga Oshiingilisa, opo ndi vule okukokola ondjila. Sho ndi na oomvula 20, onda tameke okwiilonga Oshimongolia nonda li nda mono ompito yoku ka talela po ongundu yaauvithi yelaka lyOshimongolia. Konima yoomvula mbali, mo 2007, onda ka talela po koMongolia. Sho nde ku uvitha naakokolindjila yamwe e tandi mono kutya aantu oyendji oya li taya kongo oshili, onda li nda hala okutembukila hoka ndi ka kwathele. Onda li nda shuna koJapani ndi ka tule iinima pomahala. Onda kala tandi kokola ondjila moMongolia okuza muApilili 2008. Onkalamwenyo kayi shi ompu huka. Ihe aantu otaya taamba ko onkundana ombwanawa, notandi vulu oku ya kwathela ya hedhe popepi naJehova. Ondi uvite kutya onkalamwenyo ndjoka nda hogolola oyo ya dhenga mbanda.”

7. Omatokolo geni tu na okuninga paumwene, na Moses okwe tu tulila po oshiholelwa shini?

7 Kehe gumwe oku na okutokola ye mwene kombinga yankene ta ka longitha onkalamwenyo ye e li gumwe gwomOonzapo dhaJehova. (Jos. 24:15) Itatu vulu oku ku lombwela kutya  inda mondjokana, kutya olye wu na okuya mo naye, nenge kutya iilonga yini wu na okulonga. Mbela oto ka hogolola iilonga mbyoka tayi ku pula owala wu dheulwe ethimbo efupi? Muuyuni awuhe, Aakriste aagundjuka yamwe ohamu kala momikunda dha hepa; yalwe omu li miilando ya huma komeho. Omu na omaukwatya, iitalenti nosho wo iimoniwa ya yoolokathana. Omu hole wo iinima ya yoolokathana neitaalo lyeni kali thike pamwe. Otashi vulika oonkalo dheni dha yoolokathana ngaashi dhaagundjuka Aahebeli mboka ya li muEgipiti shonale ya li monkalo inaayi fa yomugundjuka Moses. Okwa li e na oompito adhihe dhokunyanyukilwa omauwanawa agehe mombala, manga Aahebeli ooyakwawo ya li aapika. (Eks. 1:13, 14; Iil. 7:21, 22) Ngaashi owala ngoye, oya li wo pethimbo lituntula. (Eks. 19:4-6) Kehe gumwe okwa li e na okutokola kutya onkalamwenyo ye ote ke yi longitha ngiini. Moses okwa li a ningi etokolo lyomondjila. — Lesha Aahebeli 11:24-27.

8. Aagundjuka mboka taya dhiladhila kombinga yomatokolo ngoka ye na okuninga otaya vulu okumona ekwatho koolye?

8 Jehova ohe ku kwathele wu ninge omatokolo gopandunge manga wu li omugundjuka. Oha gandja omayele okupitila momakotampango ngoka to vulu okutula miilonga monkalo yoye mwene. (Eps. 32:8) Kakele kaashono, aavali yoye ooitaali naakuluntugongalo otaya vulu oku ku kwathela wu mone kutya ongiini to vulu okutula miilonga omakotampango ngaka. (Omayel. 1:8, 9) Natu ka kundathaneni omakotampango gOmbiimbeli gatatu ngoka taga vulu oku ku kwathela wu ninge omatokolo omawanawa ngashingeyi.

OMAKOTAMPANGO GOMBIIMBELI GATATU NGOKA GE NA OKU KU WILIKA

9. (a) Ongiini Jehova e tu lenga nemanguluko lyokuninga omatokolo? (b) ‘Okukonga tango Uukwaniilwa’ ohaku gandja oompito dhini?

9 Tango konga Uukwaniilwa waKalunga nuuyuuki we. (Lesha Mateus 6:19-21, 24-26, 31-34.) Jehova okwe tu lenga nemanguluko lyokuninga omatokolo. Ihe tu lombwele kutya otu na okulongitha ethimbo lyuugundjuka wetu li thike peni mokuuvitha kombinga yUukwaniilwa. Ihe Jesus okwe tu pa ekotampango tali tu kwathele tu konge tango Uukwaniilwa. Okutula miilonga shoka a ti otaku ke ku pa ompito wu ulike kutya owu hole Kalunga, kutya owu na ko nasha naantu ooyakweni nosho wo kutya owu na olupandu lwetegameno lyomwenyo gwaaluhe. Sho to dhiladhila kombinga yondjokana niilonga, dhiladhila wo ngele omatokolo goye otage ke ku ningitha wu kale wu na omaipulo kombinga yoompumbwe dhoye dhopalutu nenge otaku ku ulika uulaadhi woye wUukwaniilwa waKalunga nuuyuuki we.

10. Oshike sha li sha nyanyudha Jesus, nomatokolo geni tage ke ku nyanyudha?

10 Mona enyanyu mokuyakula yalwe. (Lesha Iilonga 20:20, 21, 24, 35.) Jesus okwe tu longa ekotampango ndika lya simanenena monkalamwenyo. Okwa li ha kala a nyanyukwa molwaashoka okwa li a longo ehalo lyaHe, pehala lyokulonga ehalo lye mwene. Jesus okwa li ha nyanyukilwa okumona aantu aaifupipiki taya taamba ko onkundana ombwanawa. (Luk. 10:21; Joh. 4:34) Otashi vulika wa mona nale nokuli enyanyu ndyoka hali zi mokukwathela yalwe. Ngele owa ningi omatokolo goye omanene monkalamwenyo shi ikolelela komakotampango ngoka Jesus a li a longo, osha yela kutya otashi ke ku nyanyudha nosho wo Jehova. — Omayel. 27:11.

11. Omolwashike Baruk a li a kanitha enyanyu lye, na Jehova okwa li e mu pe omayele geni?

11 Okulongela Jehova ohaku tu etele enyanyu kaali shi okuyelekwa nasha. (Omayel. 16:20) Baruk, amushanga gwaJeremia, okwa fa a li a dhimbwa oshinima shoka, shaashi opu na ethimbo limwe kaali we ta nyanyukilwa iilonga yaJehova. Jehova okwa li e mu lombwele, a ti: “Oto ikongele iinima iinene? Ino yi konga. Oshoka otandi ka undulila aantu ayehe oshiponga, . . . oto kala u na omwenyo, shaa mpoka to yi.” (Jer. 45:3, 5) Oto ti ngiini kwaashoka? Oshike sha li tashi ka nyanyudha Baruk, mbela okukonga iinima iinene nenge okuhupa mehanagulo lyaJerusalem e li omupiya gwaKalunga omudhiginini? — Jak. 1:12.

12. Etokolo lini lya li lya ningitha Ramiro a kale e na onkalamwenyo yinyanyudha?

12 Omumwatate gumwe ngoka a mona enyanyu mokuyakula yalwe oRamiro. Ota ti: “Onda za muukwanegumbo wa hepa wa kala momukunda  gu li koshitopolwa shoondundu dhaAndes. Onkee ano, ompito oya li ye egulukila ndje lela sho omumwamememati omukuluntu a ti kutya ota futile ndje ndi ki ilonge kouniveesiti. Ihe onda adhika opo nda ninginithwa ndi li gumwe gwomOonzapo dhaJehova, nonda li nda hiywa komukokolindjila gumwe tu ka uvithe naye kokandoolopa okashona. Onda yi hoka, nondi ilongo okukulula aantu nonda patulula okakululilo opo ndi vule okwiiyambidhidha. Sho twa tameke okulonga aantu Omanyolo, oyendji oya li ye ga taamba ko nenyanyu. Konima yethimbo, onda ka kala megongalo ndyoka opo lya totwa po moka hamu popiwa elaka lyevalelwamo. Ngashingeyi onda kala omukalele gwethimbo lyu udha oomvula omulongo. Kaku na eithano lilwe lya li tali vulu okweetela ndje enyanyu ndyoka handi mono mokukwathela aantu ya tseye onkundana ombwanawa melaka ndyoka ya yama.”

Ramiro okwa kala ta nyanyukilwa okulongela Jehova okuza kuugundjuka we (Tala okatendo 12)

13. Omolwashike ethimbo lyuugundjuka olyo ethimbo ewanawa lyokulongela Jehova pakuudha?

13 Longela Jehova nenyanyu manga wu li omugundjuka. (Lesha Omuuvithi 12:1.) Ino pumbwa okukala wu uvite kutya owu na tango okumona iilonga iiwanawa opo wu vule okulongela Jehova. Ethimbo lyuugundjuka olyo ethimbo ewanawa lyokutameka okulongela Jehova pakuudha. Aagundjuka oyendji kaye na iinakugwanithwa oyindji yuukwanegumbo noye na uukolele noonkondo dhokulonga iilonga mbyoka ya fa kaayi shi iipu. Owa hala okuningila shike Jehova manga wu li omugundjuka? Otashi vulika wu na elalakano lyokuninga omukokolindjila. Otashi vulika wu kale wa hala okulonga moshitopolwa moka hamu popiwa elaka ekwiilongo. Nenge tashi vulika wu wete omikalo dhontumba wu longe megongalo lyeni pakuudha. Kutya nduno owi itulila po elalakano lini miilonga yaKalunga, oto ka kala wa pumbwa okukala wu na uuhupilo. Oto ka pumbwa edheulo li thike peni? Oto ka hogolola lini?

LONGITHA OMAKOTAMPANGO GOMBIIMBELI WU NINGE OMATOKOLO GOPANDUNGE

14. Owu na okukala wa kotokela shike uuna to ningi omalongekidho gonakuyiwa?

14 Omakotampango gOmbiimbeli gatatu  ngoka twa zi nokukundathana otaga vulu oku ku kwathela wu konakone oompito dhoye dhiilonga. Aalongi yoye oye na okukala ye na uuyelele wontumba kombinga yiilonga mbyoka yi li moshitopolwa. Nenge otashi vulika pu kale pu na omahangano nenge aantu yokukongela aantu iilonga mboka taya vulu oku ku lombwela kutya iilonga yini ya pumbwa aaniilonga moshitopolwa sheni nenge koshitopolwa hoka wa hala oku ka longela. Uuyelele mboka hawu zi kaantu yomuuyuni otawu vulu oku ku kwathela, ihe owu na okukala wa kotoka. Aantu mboka kaaye hole Jehova otashi vulika ya kambadhale oku ku ningitha wu kale wu hole uuyuni. (1 Joh. 2:15-17) Uuna wa tala kwaashoka uuyuni tawu gandja, omutima gwoye otagu vulu oku ku heka nuupu. — Lesha Omayeletumbulo 14:15; Jer. 17:9.

15, 16. Olye ta vulu oku ku pa omayele gopandunge ge na ko nasha niilonga?

15 Uuna nduno wa tseya kutya owu na oompito dhini dhiilonga, owa pumbwa omayele gopandunge. (Omayel. 1:5) Olye ta vulu oku ku kwathela wu konakone oompito ndhoka shi ikolelela komakotampango gOmbiimbeli? Pulakena kaantu mboka ye hole Jehova, ye ku hole, noye ku shi noye shi onkalo yoye nawa. Otaye ke ku kwathela wu konakone uunkulungu woye nosho wo omalalakano goye. Otashi vulika shoka taya ka popya shi ku kwathele wu dhiladhile ishewe komalalakano goye. Kashi shi tuu elaleko nuuyamba ngele aavali yoye oye hole Jehova! Natango, aakuluntugongalo yomegongalo lyeni oye li aalumentu ya pyokoka pambepo mboka taya vulu oku ku wilika. Ishewe, oto vulu wo okupopya naakokolindjila nosho wo naatonateli aayendi. Ya pula kutya, omolwashike ya ningi etokolo lyokuya miilonga yethimbo lyu udha? Osha li she ende ngiini ya tameke okukokola ondjila, nohaya hupu ngiini? Uuwanawa wuni ya mona muukalele wawo? — Omayel. 15:22.

16 Mboka ye ku shi nawa otaya vulu oku ku pa omayele pandunge. Pashiholelwa, natu tye nduno owa hala okweetha osikola ngoye wu tameke okukokola ondjila molwaashoka ku hole iilonga yosikola. Omuntu ngoka e ku hole otashi vulika a mone kutya omolwashike lela wa hala okuthiga po osikola e te ku kwathele wu mone kutya osikola otayi vulu oku ku kwathela wu ilonge okukala ihoo teka omukumo nziya, uukwatya mboka wa simanenena ngele owa hala okulongela Jehova pakuudha. — Eps. 141:5; Omayel. 6:6-10.

17. Omatokolo geni tu na okuhenuka?

17 Kehe gumwe ngoka ha longele Jehova ota ka taalela iinima mbyoka tayi vulu okutula moshiponga uupambepo we, ano omanwethomo ngoka taga vulu oku mu ningitha a thige po Jehova. (1 Kor. 15:33; Kol. 2:8) Ihe iilonga yimwe otayi vulu nokuli okutula moshiponga uupambepo womuntu yi vulithe yilwe. Mbela opu na yamwe moshitopolwa sheni ye etha ‘omutenge gwolweendo lweitaalo gu teke’ konima sho ya hogolola iilonga yontumba? (1 Tim. 1:19) Onawa wu henuke okuninga omatokolo ngoka taga tula moshiponga ekwatathano lyoye naKalunga. — Omayel. 22:3.

NYANYUKILWA OKUKALA OMUKRISTE OMUGUNDJUKA

18, 19. Ngele opu na ngoka e wete kee na natango ehalo lyokulongela Jehova, oku na okuninga shike?

18 Ngele owa kokeka momutima gwoye ehalo lyokulongela Jehova, nyanyukilwa oompito ndhoka to vulu okumona manga wu li omupiya gwaKalunga omugundjuka. Ninga omatokolo ngoka tage ke ku pa ompito wu nyanyukilwe okulongela Jehova pethimbo ndika lituntula. — Eps. 148:12, 13.

19 Mepingathano naashono, oshike wu na okuninga ngele natango owu wete kuu na ehalo lyokulongela Jehova? Ino etha po okukoleka eitaalo lyoye. Konima sho omuyapostoli Paulus a popi oonkambadhala ndhoka a li a ningi, opo a lalakanene onkalamwenyo ndjoka Kalunga ta vulu okulaleka nuuyamba, okwa nyola a ti: ‘Ngele nani oku na yamwe ye na omadhiladhilo gi ili, nena Kalunga ote ke mú yelithila oshinima shoka. Natu humeni owala komeho nondjila naanaa ndjoka twe ende nayo sigo oompaka.’ (Fil. 3:15, 16) Tsikila okudhiladhila kombinga yohole yaKalunga nosho wo komayele ge gopandunge. Jehova ota vulu oku ku kwathela e vulithe kehe gumwe wu ninge omatokolo gopandunge manga wu li omugundjuka.