Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Desemba 2013

Oto ka ninga ngaa omaiyambo omolwUukwaniilwa?

Oto ka ninga ngaa omaiyambo omolwUukwaniilwa?

“Kalunga oku hole ngoka ta gandja nenyanyu.”—2 KOR. 9:7.

1. Aantu oyendji ohaya ningi omaiyambo geni, nomolwashike?

AANTU ohayi iyamba nehalo ewanawa ya ninge iinima mbyoka ye wete kutya oya simana. Aavali ohaya longitha ethimbo lyawo, iimaliwa yawo nosho wo oonkondo dhawo omolwuuwanawa woyana. Aamatuki aagundjuka mboka haya lalakanene okukalela po oshilongo shawo moOlimpika ohaya longitha oowili odhindji esiku kehe tayi idheula ya mana mo, omanga oomakula yawo haya kala taya dhana yo tayi inyanyudha. Jesus okwa li wo a ningi omaiyambo omolwiinima mbyoka ya li ya simana kuye. Ka li i ikongele omaliko ye ka li e na aanona ye mwene. Pehala lyaashono, okwa li a hogolola okugandja eitulomo kokupititha komeho iinima yUukwaniilwa. (Mat. 4:17; Luk. 9:58) Aalanduli ye nayo oya li ye etha po iinima oyindji, opo ya ambidhidhe Uukwaniilwa waKalunga. Okuhumitha komeho Uukwaniilwa oko kwa li kwa simanenena kuyo noya li ya ningi omaiyambo, opo ya ambidhidhe Uukwaniilwa mboka ethimbo lyu udha ngaashi taya vulu. (Mat. 4:18-22; 19:27) Onkee ano otatu vulu okwiipula kutya, ‘Oshike sha simana monkalamwenyo yandje?’

2. (a) Omaiyambo geni ga pumbwa okuningwa kAakriste ayehe yashili? (b) Omaiyambo galwe geni yamwe taya vulu okuninga?

2 Omaiyambo gamwe oga pumbwa okuningwa kAakriste yashili ayehe noga simana opo tu kale tu na ekwatathano ewanawa naJehova notu li kaleke po. Omaiyambo ngoka oga kwatela mo okulongitha ethimbo lyetu noonkondo dhetu mokugalikana, mokulesha Ombiimbeli, mokuninga elongelokalunga lyuukwanegumbo, nomokukala pokugongala kehe nosho wo muukalele. * (Jos. 1:8; Mat. 28:19, 20; Heb. 10:24, 25) Omolwoonkambadhala dhetu nomolwomayambeko gaJehova, iilonga yokuuvitha otayi longwa neendelelo noyendji otaya tsikile  okumbombolokela ‘kondundu yotempeli yaJehova.’ (Jes. 2:2, yelekanitha NW.) Opo ya ambidhidhe iinima yUukwaniilwa, oyendji ohaya ningi omaiyambo ya longe kObetel, ya kwathele mokutunga Iinyanga yUukwaniilwa nIinyanga yIigongi, ya longekidhe iigongi yiitopolwa, nenge ya kwathele uuna pwa holoka iiponga yopaunshitwe. Iilonga mbika ya gwedhwa po kayi shi oshitegelelwa shoku tu petha omwenyo gwaaluhe, ihe oya simanenena mokwaambidhidha iinima yUukwaniilwa.

3. (a) Uuwanawa wuni hatu mono uuna twa ningi omaiyambo omolwUukwaniilwa? (b) Omapulo geni tu na okwiipula?

3 Opu na ompumbwe onene yokwaambidhidha Uukwaniilwa shi vulithe nale. Otashi nyanyudha shili okumona kutya oyendji otaya ningi omaiyambo nehalo ewanawa omolwaJehova. (Lesha Episalomi 54:6.) Okukala nombepo ya tya ngaaka ohaku tu etele enyanyu olindji sho twa tegelela Uukwaniilwa waKalunga. (Deut. 16:15; Iil. 20:35) Ihe atuhe otwa pumbwa okwiikonakona lela paumwene. Mbela omomikalo dhini tatu vulu okuninga omaiyambo ga gwedhwa po omolwUukwaniilwa? Ethimbo lyetu, iimaliwa yetu, oonkondo dhetu nosho wo uunkulungu wetu ohatu wu longitha ngiini? Oshike tu na okukaleka momadhiladhilo sho tatu ningi omaiyambo? Natu ka tale koshiholelwa shimwe shoka tatu vulu okuholela sho tatu ningi omaiyambo gehalo ewanawa, nokungawo otatu ka gwedha ko kenyanyu lyetu.

OMAYAMBO GOMUISRAELI SHONALE

4. Ongiini Aaisraeli ya li ya mono uuwanawa mokugandja Omayambo?

4 Aisraeli yonale oya li ye na okugandja omayambo opo ya dhiminwe po omayono gawo. Oya li ye na okugandja omayambo opo ya kale ya hokiwa kuJehova. Omayambo gamwe oga li oshitegelelwa, omanga galwe oga li owala haga gandjwa uuna omuntu a hala. (Lev. 23:37, 38) Omafikilondjambo oga li haga vulu okuningwa uuna omuntu a hala, nenge ge li omagano kuJehova. Oshiholelwa shimwe sha dhenga mbanda shokugandja omayambo osha li sha monika peyapulo lyotempeli pethimbo lyaSalomo.—2 Ondjal. 7:4-6.

5. Jehova okwa li a tula po elongekidho lini li na ko nasha naamboka ya hepa?

5 Jehova okwa li e shi kutya haantu ayehe ya li taya vulu okugandja shi thike pamwe, nokwa li a tegelela kehe gumwe a gandje owala shoka ta vulu okugandja. Jehova okwa li a tula po ompango kutya ombinzi yoshinamwenyo oyi na okutilwahi, oshinima shoka sha li “efano lya dhimeya lyiinima iiwanawa tayi ke ya” okupitila mOmwana, Jesus. (Heb. 10:1-4) Ihe Jehova okwa li e na ondjaalela naantu uuna taya gwanitha po ompango ndjoka. Pashiholelwa, Kalunga okwa li ha taamba  omayambo goonguti uuna omuntu itaa vulu okugandja eyambo lyoshimuna. Kungawo, naamboka ya hepa oya li haya vulu okugandja omayambo nenyanyu kuJehova. (Lev. 1:3, 10, 14; 5:7) Nonando aantu oya li haya vulu okuyamba iinamwenyo ya yoolokathana, opu na iinima iyali mbyoka omuntu kehe ngoka ta gandja eyambo ndyoka nehalo ewanawa a li a tegelelwa a ninge.

6. Omuntu kehe ngoka ta gandja eyambo okwa li a tegelelwa a ninge shike, nosha li sha simana ngiini opo a gwanithe po iitegelelwa mbyoka?

6 Shotango, omuntu okwa li e na okugandja oshinamwenyo shoka oshiwanaweelela. Jehova okwa li a lombwele oshigwana kutya oshinamwenyo kehe shoka ya li taya ka yamba kashi na okukala shi na oshipo, opo Jehova ‘e shi taambe.’ (Lev. 22:18-20) Oshinamwenyo ngele oshi na okapuko kasha, kasha li sha talika ko sha gwana okuyambelwa Jehova. Oshitiyali, omuntu ngoka ta gandja eyambo ndyoka okwa li e na okukala a yogoka nokee na edhilo lyasha. Ngele ina yogoka, okwa li e na okugandja eyonondjambo omolwoondjo dhe, opo a kale a hokiwa kuJehova manga inaa gandja eyambo lye nehalo ewanawa. (Lev. 5:5, 6, 15) Shika osha li oshinima sha kwata miiti. Jehova okwa li a tula po ompango kutya ngele omuntu inaa yogoka okwa gandja ekwatathanondjambo, ndyoka lya kwatela mo okugandja omayambo nehalo ewanawa, okwa li e na okudhimwa mo maantu yaKalunga. (Lev. 7:20, 21) Ihe ngele omuntu ngoka ta gandja eyambo okwa hokiwa kuJehova nosho wo ngele eyambo lye ka li na edhilo lyasha, omugandji ngoka okwa li ha kala a nyanyukwa noonkondo.—Lesha 1 Ondjalulo 29:9.

OKUGANDJA OMAYAMBO KUNENA

7, 8. (a) Oyendji ohaya mono enyanyu lini uuna taya ningi omaiyambo omolwUukwaniilwa? (b) Iiniwe yetu yini tatu vulu okulongitha?

7 Kunena, aantu oyendji oye na ehalo lyokwiigandja miilonga yaJehova, naJehova oha kala e shi nyanyukilwa. Okuyakula aamwatate ohaku tu petha ondjambi. Omumwatate gumwe ngoka ha kutha ombinga miilonga yokutunga Iinyanga yUukwaniilwa nosho wo yokukwathela mboka ya gumwa kiiponga yopaunshitwe okwa popi kutya ita vulu okupopya kutya enyanyu ndyoka ha mono mokukwathela oli thike peni. Ota ti: “Okumona nkene aamwatate naamwameme ya nyanyukwa noya pandula uuna pwa tungwa Oshinyanga shUukwaniilwa oshipe nenge uuna ya pewa ekwatho konima yoshiponga shopaunshitwe ohashi ulike kutya iilonga ayihe noonkambadhala ndhoka dha ningwa inadhi ya momeya.”

Omayambo ogendji oga li haga gandjwa nehalo ewanawa ga fa naanaa omayambo ngoka hatu gandja kunena (Tala okatendo 7-13)

8 Ehangano lyaJehova kunena olya kala aluhe nokukonga oompito li ambidhidhe iilonga yaJehova. Mo 1904, omumwatate C. T. Russell, okwa li a nyola a ti: “Omuntu kehe ni itale ko a langekwa  po kOmuwa e li omutonateli gwethimbo lye mwene, gwoonkondo dhe, gwiimaliwa ye, nosho tuu. Nakehe gumwe oku na okulongitha uunkulungu mbuka ngaashi ta vulu, a simanekithe Mwene gwe.” Nonando ohatu mono omalaleko nuuyamba ogendji, ohashi tu pula tu ninge sha opo tu gandje omayambo kuJehova. (2 Sam. 24:21-24) Mbela itatu vulu okulongitha nawa iiniwe yetu?

Iilyo yokObetel moAustrali

9. Uuna tashi ya pokulongitha ethimbo lyetu, otatu vulu okutula miilonga ekotampango lini ndyoka li li muLukas 10:2-4?

9 Ethimbo lyetu. Ohashi pula ethimbo nosho wo oonkambadhala tu toloke nokunyanyangidha iileshomwa yetu, okutunga omahala gokulongela Kalunga, okulongekidha iigongi, okukwathela mboka ya dhengwa kiiponga yopaunshitwe, nokukutha ombinga momaipyakidhilo galwe ngoka ge na oshilonga. Mesiku omu na owala oowili 24. Jesus okwa gandja ekotampango ndyoka tali vulu oku tu kwathela. Sho a li a tumu aalongwa ya ye ye ku uvithe, Jesus okwe ya lombwele kaaya ‘mane po ethimbo nokukunda aantu mondjila.’ (Luk. 10:2-4) Omolwashike Jesus a li a gandja elombwelo li li ngaaka? Omulongwantu gumwe gwOmbiimbeli okwa ti: ‘Aantu yomiilongo yokuuzilo kaya li hayi ipopitha owala ngaashi tse mba hatu tifula nenge hatu iminike, ihe oya li hayi ipapatele iikando oyindji, nokukala taya sizimana olundji nokwiinyongamena pevi. Okwiikunda kwa tya ngawo ohaku pula ethimbo olindji.’ Jesus ka li ta ladhipike aalanduli ye ya kale ye na omikalo omiwinayi. Ihe okwa li te ya kwathele ya mone kutya oye na ethimbo lya ngambekwa nosho wo kutya oya li ya pumbwa oku li longitha nawa miilonga ya simanenena. (Ef. 5:16) Mbela natse itatu vulu okutula miilonga ekotampango ndyoka opo tu kale tu na ethimbo olindji tu longe miilonga yUukwaniilwa?

Aauvithi yUukwaniilwa ye li pOshinyanga shUukwaniilwa moKenya, muAfrika

10, 11. (a) Omayambidhidho ngoka hatu gandja kiilonga yomuuyuni awuhe ohaga longithwa ngiini? (b) Ekotampango lini li li mAakorinto yotango 16:1, 2 tali vulu oku tu kwathela?

10 Iimaliwa yetu. Opwa pumbiwa oshimaliwa sha gwana mokwaambidhidha iinima yUukwaniilwa. Omvula kehe oodola oomiliyona omilongo ohadhi longithwa okusila oshimpwiyu oompumbwe dhaatonateli aayendi, dhaakokolindjila yi ikalekelwa nosho wo dhaatumwa. Okuza mo 1999, opwa tungwa Iinyanga yUukwaniilwa yi vulithe 24 500 miitopolwa mbyoka ya hepa. Ihe opwa pumbiwa natango Iinyanga yUukwaniilwa konyala yi li 6 400. Omwedhi kehe ohaku pilintwa iifo yOshungolangelo nosho wo yo-Awake! oomiliyona 100 lwaampo. Iinima ayihe mbyoka ohayi ambidhidhwa komayambidhidho geni gehalo ewanawa.

11 Omuyapostoli Paulus okwa li a gandja ekotampango ndyoka tu na okukaleka momadhiladhilo uuna twa hala okugandja omayambidhidho. (Lesha 1 Aakorinto 16:1, 2.) Okwa li a nwethwa mo a ladhipike aamwahe yomuKorinto kaaya tegelele sigo oshiwike sha pu ko, opo ya mone kutya ingapi ya hupa po, ihe oya li ye na okupungula yimwe petameko lyoshiwike shi thike pwaashoka taya vulu. Ngaashi owala methelemumvo lyotango, aamwatate naamwameme pethimbo lyetu ohayi ilongekidha komeho yethimbo, opo ya kwathele mpoka taya vulu. (Luk. 21:1-4; Iil. 4:32-35) Jehova oha pandula ombepo yokugandja ya tya ngaaka.

Okomitiye yOkutunga yomOshitopolwa muTuxedo, New York, U.S.A.

12, 13. Iinima yini tashi vulika yi ningithe yamwe kaaya longithe oonkondo dhawo nosho wo uunkulungu wawo, ihe Jehova ote ke ya kwathela ngiini?

12 Oonkondo dhetu nuunkulungu wetu. Jehova ohe tu ambidhidha sho tatu ningi oonkambadhala tu longithe oonkondo dhetu nosho wo uunkulungu wetu omolwUukwaniilwa. Okwe tu uvanekela kutya ote ke tu kwathela uuna twa vulwa. (Jes. 40:29-31) Mbela ohatu kala tu uvite kutya katu na ontseyo ya gwana tu kwathele miilonga mbyoka? Mbela ohatu dhiladhila kutya opu na yalwe ya pyokoka ye tu vule? Dhimbulukwa kutya Jehova ota vulu okuhwepopaleka uunkulungu wetu ngaashi owala a li e shi ningile Bezalel naOholiab.—Eks. 31:1-6; tala kethano ndyoka li li petameko.

13 Jehova ote tu ladhipike tu gandje ashihe shoka oshiwanaweelela, ihe haku shi tindila. (Omayel. 3:27) Pethimbo lyokutunga otempeli, Jehova okwa li a lombwele Aajuda muJerusalem ya tedhatedhe kwaashoka ya li taya ningi omolwiilonga yokutunga. (Hag. 1:2-5) Aajuda oya li ya piyaganekwa nokaya li we ya gandja eitulomo kwaashoka.  Oshi li nawa tu dhiladhile kombinga yaashoka twa pititha komeho ngele osho ngaa shoka Jehova a hala tu ninge. Mbela itatu vulu ‘okwiipula noomwenyo dhetu, nkene tu na okukala’ (OB-1954) opo tu longithe ethimbo olindji miilonga yUukwaniilwa momasiku ngaka gahugunina?

OKUNINGA OMAIYAMBO GI IKOLELELA KWAASHOKA TU NA

14, 15. (a) Oshiholelwa shaamwatate mboka kaaye na iiniwe oyindji otashi tu ladhipike ngiini? (b) Otu na okukala twa halelela okuninga shike?

14 Oyendji ohaya kala miitopolwa moka onkalo kaayi shi ompu nenge moka mu na oluhepo. Ehangano lyetu ohali ningi oonkambadhala li ‘kwathele’ aamwatate mboka ye na ompumbwe miilongo moka. (2 Kor. 8:14) Ihe nonando aamwatate mboka kaye na iiniwe oyindji oya lenga uuthembahenda wokugandja. Ohashi nyanyudha Jehova uuna mboka kaaye na iiniwe oyindji taya gandja nenyanyu.—2 Kor. 9:7.

15 Aamwatate yamwe moshilongo shimwe sha hepa noonkondo muAfrika, ohaya topola ko okatopolwa kamwe kiikunino yawo nohaya longitha oshimaliwa shoka sha zi miilandithomwa mbyoka ya za mokatopolwa hoka, ya ambidhidhe iilonga yUukwaniilwa. Moshilongo omo tuu moka, omwa li mwa ningwa elongekidho lyokutunga Oshinyanga shUukwaniilwa shoka sha li sha pumbiwa noonkondo. Aamwatate naamwameme yomoshitopolwa moka oya li ya hala okukwathela. Ihe okutunga hoka okwa li taku ka tamekwa pethimbo mpoka ya li ye na okulonga omapya gawo. Molwaashoka oya li ya tokola toko ya kuthe ombinga, omutenya oya li haya longo ketungo lyOshinyanga shUukwaniilwa yo kongulohi taya ka kuna omapya gawo. Inayu ulika tuu ombepo yeiyambo! Shika otashi tu dhimbulukitha aamwatate yomuMakedonia shomethelemumvo lyotango. Oya li ‘moluhepo olunene,’ ihe oya li yi indile ya pewe ompito yokukwathela miilonga mbyoka ya li po. (2 Kor. 8:1-4) Kehe gumwe gwomutse naye na gandje ‘ngaashi ta vulu pamuthika ngoka OMUWA Kalunga e tu yambekele elikolo lyetu.’—Lesha Deuteronomium 16:17.

16. Ongiini tatu vulu okushilipaleka kutya omayambo getu oga taambiwa ko kuJehova?

16 Ihe otwa pumbwa okukala twa kotoka wo. Otu na okukala twa shilipaleka kutya omayambo getu ngoka tatu pe Kalunga nehalo ewanawa okwe ga hokwa, ngaashi owala sha li pethimbo lyAaisraeli yonale. Otu na okukala nondjele opo tu vule okugwanitha po tango oshinakugwanithwa shetu shokusila oshimpwiyu uukwanegumbo wetu nosho wo okulongela Jehova. Ihe okulongitha ethimbo lyetu nosho wo iiniwe mokukwatha yalwe kaku na oku tu ningitha kaatu gandje eitulomo kuupambepo nenge konkalonawa yopalutu yuukwanegumbo wetu. Ngele osho, otashi ka kala owala twa fa tatu gandja shoka kaatu na. (Lesha 2 Aakorinto 8:12.) Shimwe ishewe, otu na okukala hatu sile oshimpwiyu uupambepo wetu. (1 Kor. 9:26, 27) Kala wa shilipalekwa kutya uuna hatu kala metsokumwe nomithikampango dhOmbiimbeli, omayambo getu ohage tu etele enyanyu olindji nosho wo egwaneno, naJehova ohe ga ‘taamba’ ko.

OMAIYAMBO NGOKA HATU NINGI OGE NA ONGUSHU ONENE

17, 18. Otu uvitile ngiini ayehe mboka haya ningi omaiyambo omolwUukwaniilwa, notu na okudhiladhila kushike atuheni?

17 Aamwatate naamwameme oyendji ohayi ‘itilehi ngaashi iikunwayambo’ okupitila miilonga yawo opo ya ambidhidhe iilonga yUukwaniilwa mbyoka ya pumbwa okulongwa. (Fil. 2:17, NW) Ohatu pandula unene mboka yu ulika ombepo yokugandja ya tya ngaaka. Aakulukadhi naanona yaamwatate mboka haya kwatele komeho miilonga yUukwaniilwa nayo otaya pandulwa wo omolwombepo yawo yokugandja noyokwiiyamba.

18 Otwa pumbwa okulonga nuudhiginini opo tu ambidhidhe iilonga yUukwaniilwa. Atuheni natu ikonakoneni pamwe negalikano nkene tatu vulu okulongitha ethimbo olindji ngaashi tatu vulu. Oto vulu okukala neinekelo kutya ondjambi ndjoka to mono ngashingeyi onene notayi ka kala nokuli yi vule po ‘muuyuni tawu ya.’—Mark. 10:28-30.

^ okat. 2 Tala oshitopolwa “Natu yambeleni Jehova omayambo nomutima aguhe” mOshungolangelo yo 15 Januali 2012, pepandja 21-25.