Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2013

Vulika kaasita mboka ya langekwa po kuJehova

Vulika kaasita mboka ya langekwa po kuJehova

“Vulikeni kaawiliki yeni, [ne] mu landule omalombwelo gawo. Oyo ohaa tonatele oomwenyo dheni yaa na evululuko.” — HEB. 13:17.

1, 2. Omolwashike shi li oshindhindhilikwedhi sho Jehova hi ifaathanitha nomusita gwoonzi?

JEHOVA ohi ifaathanitha nomusita gwoonzi. (Hes. 34:11-14) Shoka oshi li oshindhindhilikwedhi molwaashoka ohashi tu kwathele tu uve ko kutya Jehova oku li ngiini. Omusita gwoonzi omunahole oha kala e na oshinakugwanithwa shokushilipaleka kutya oonzi ndhoka dhi li metonatelo lye odhi li monkalo ombwanawa. Ohe dhi fala kiitunda yomwiidhi nokoondombe (Eps. 23:1, 2); he dhi litha omutenya nohe dhi langele uusiku (Luk. 2:8); he dhi gamene kiilikama (1 Sam. 17:34, 35); ha humbata po oonzigona (Jes. 40:11); ha kongo ndhoka dha kana nokumanga ndhoka dha teka. — Hes. 34:16.

2 Molwaashoka oshigwana shaJehova shopethimbo lyonale osha li pethimbo mpoka aantu oyendji ya li aanamapya naaniimuna, osha li shu uvite ko nawa sho Jehova Kalunga ta yelekanithwa nomusita gwoonzi omunahole. Oya li ye shi shi kutya oonzi odha pumbwa esiloshimpwiyu nohole, opo dhi kale dha paluka nodhi indjipale. Meityo lyopambepo, osha faathana wo naantu. (Mark. 6:34) Aantu ohaya mono iihuna ngele kapu na esiloshimpwiyu newiliko ewanawa lyopambepo. Ohaya ningi iihakanwa nohaya kanitha omikalo ngaashi owala “oonzi dhaa na omusita” hadhi halakana. (1 Aak. 22:17) Ihe Jehova oha sile oshimpwiyu oshigwana she.

3. Otatu ka kundathana shike moshitopolwa shika?

3 Okuthanekwa kwaJehova e li omusita gwoonzi oku na eityo nokuli nopethimbo lyetu. Jehova oha sile natango oshimpwiyu oshigwana she shoka sha fa oonzi. Natu ka kundathaneni nkene ha wilike oonzi dhe nonkene he dhi gwanithile po oompumbwe dhadho. Otatu ka kundathana wo nkene oonzi dhi na okwiinyenga kokukala kwaJehova e na ko nasha nadho.

 OMUSITA OMWAANAWA OKWA LANGEKA PO AASITA YOPEVI

4. Jesus ota dhana onkandangala yini mokusila oshimpwiyu oonzi dhaJehova?

4 Jehova okwa langeka po Jesus e li Omutse gwegongalo lyopaKriste. (Ef. 1:22, 23) E li “omusita omwaanawa,” Jesus oha kala lela e na ko nasha, e na omalalakano nosho wo uukwatya wa fa waHe. Jesus okwa li nokuli ‘a si omolwoonzi.’ (Joh. 10:11, 15) Ekuliloyambo lyaKristus kali li tuu elaleko nuuyamba kaantu! (Mat. 20:28) Omolwashike? Omolwaashoka Jehova okwa hala “shaa ngoka te mu itaale kaa kane, ihe a kale e na omwenyo gwaaluhe.” — Joh. 3:16.

5, 6. (a) Jesus okwa langeka po oolye ya lithe oonzi dhe, noonzi odhi na okuninga shike opo dhi mone uuwanawa melongekidho ndika? (b) Onetompelo lini lya shiga ko tu na okukala twa hala okuvulika kaakuluntugongalo?

5 Oonzi ohadhi inyenge ngiini kewiliko lyOmusita Omwaanawa, Jesus Kristus? Jesus okwa ti: “Oonzi dhandje ohadhi uvu ewi lyandje; ngame ondi dhi shi, odho notadhi landula ndje.” (Joh. 10:27) Okupulakena kewi lyOmusita Omwaanawa okwa hala okutya owu na okulandula ewiliko lye miinima ayihe. Shika osha kwatela mo okulongela kumwe naasita yopevi yopambepo mboka a langeka po. Jesus okwa li u ulike kutya aayapostoli naalongwa ye oya li taya ka tsikila okulonga iilonga mbyoka a li a tameke. Oya li ye na ‘okulonga’ nosho wo ‘okulitha uunzigona waJesus.’ (Mat. 28:20; lesha Johannes 21:15-17.) Sho onkundana ombwanawa tayi taandele naasho aalongwa taya ningi oyendji, Jesus okwa li a longekidha opo Aakriste ya pyokoka pambepo ya lithe omagongalo. — Ef. 4:11, 12.

6 Sho omuyapostoli Paulus a li ta popi naawiliki yegongalo lyomethelemumvo lyotango muEfeso, okwa li a ti ombepo ondjapuki oye ya langeka po ya ninge aatonateli ‘ya lithe egongalo lyaKalunga.’ (Iil. 20:28) Shoka osha faathana naatonateli Aakriste kunena, molwaashoka nayo oya langekwa po shi ikwatelela kiitegelelwa yopamanyolo ga nwethwa mo kombepo ondjapuki. Onkee ano, uuna tatu vulika kaatonateli Aakriste otatu ulike kutya otwa simaneka Aasita aanenenene yaali, Jehova naJesus. (Luk. 10:16) Dhoshili shika osho shi na okukala etompelo lya shiga ko lyokukala twa hala okuvulika kaakuluntugongalo. Ihe, opu na wo omatompelo galwe ngoka hage tu ningitha tu vulike.

7. Aakuluntugongalo ohaye ku kwathele ngiini wu kaleke po ekwatathano lyoye ewanawa naJehova?

7 Uuna taya gandja ewiliko kooitaali ooyakwawo, aakuluntugongalo oye na okuladhipika nokugandja omayele taya longitha Omanyolo nenge gi ikolelela komakotampango gopamanyolo. Elalakano lyawo lyokugandja ewiliko ndyoka ka li shi lyokukala taya thiminikile aamwahe nkene oonkalamwenyo dhawo dhi na okukala. (2 Kor. 1:24) Pehala lyaashono, olyoku pa Aakriste ooyakwawo omayele gopamanyolo ge ya kwathele ya ninge omatokolo omawanawa nokukaleka po elandulathano nombili megongalo. (1 Kor. 14:33, 40) Aakuluntugongalo “ohaa tonatele oomwenyo” meityo ndyoka kutya ohaya kala ya hala okukwathela oshilyo kehe shegongalo shi kale shi na ekwatathano ewanawa naJehova. Kungawo otaya ka kala taya vulu okugandja ekwatho nziya ngele oya mono kutya omumwatate nenge omumwameme oku li pokugwila “meyono lyontumba” nenge a gwila mo nale. (Gal. 6:1, 2; Jud. 22) Mbela ngaka kage shi ngaa omatompelo omawanawa goku tu ningitha tu ‘vulike kaawiliki’? — Lesha Aahebeli 13:17.

8. Aakuluntugongalo ohaya gamene ngiini oshigunda shaKalunga?

8 Omuyapostoli Paulus, omusita gwoonzi gwopambepo, okwa li a nyolele aamwahe muKolossa a ti: “Kotokeni ano, mwaa yulwe nando okomuntu nomalongo guunongo wopantu nomafundjaleko gaa fele. Ogo ogi ikwatelela komithigululwakalo dhaantu noga za moombepo ndhoka tadhi pangele mewangandjo, ihe ne kaleni muKristus.” (Kol. 2:8) Elondodho ndika otali tu pe wo etompelo lilwe ewanawa lyokukala  tatu gandja eitulomo komayele gopamanyolo ngoka tatu pewa kaakuluntugongalo. Ohaya gamene oshigunda mokukwathela aamwahe ya kale ya kotokela mboka tashi vulika ya nkundipaleke eitaalo lyawo. Omuyapostoli Petrus okwa li a londodha kombinga ‘yaahunganeki aafundja’ ‘naalongi aafundja’ mboka tashi vulika ya ‘kwatithe aantu mboka aankundi komwigo’ gwokuyona. (2 Pet. 2:1, 14) Aakuluntugongalo yokunena oye na wo okugandja omalondodho ga faathana uuna sha pumbiwa. Ye li aalumentu Aakriste ya pyokoka pambepo, oye na ontseyo monkalamwenyo. Natango, manga inaaya langekwa po, ohayu ulike kutya oyu uvite ko nawa Omanyolo nosho wo kutya oya gwana okulonga elongo lyashili. (1 Tim. 3:2; Tit. 1:9) Okukala kwawo ya pyokoka, ye na ondjele nosho wo uunongo wopaMbiimbeli ohaku ya ningitha ya gandje ewiliko lyolela koshigunda.

Ngaashi omusita gwoonzi ha gamene oshigunda she, aakuluntugongalo ohaya gamene oonzi ndhoka dhi li metonatelo lyawo (Tala okatendo 8)

OMUSITA OMWAANAWA OHA LITHA NOKUGAMENA OONZI

9. Jesus oha wilike ngiini nokulitha egongalo lyopaKriste kunena?

9 Jehova oha gandja iikulya oyindji yopambepo okupitila mehangano lye kuumwayinathana womuuyuni awuhe. Omayele ogendji gopamanyolo ohaga gandjwa okupitila miileshomwa. Kakele kiileshomwa, omathimbo gamwe ehangano ohali gandja ewiliko okupitila maakuluntugongalo, kutya nduno okupitila moontumwafo nenge okupitila momalombwelo ngoka haga thikithwa komagongalo kaatonateli aayendi. Oonzi ohadhi pewa ewiliko lya yela okupitila momikalo ndhoka.

10. Aasita yoonzi yopambepo oye na oshinakugwanithwa shashike shi na ko nasha naamboka ya za mo moshigunda?

10 Meityo lyopambepo, aakuluntugongalo  oye na oshinakugwanithwa shokugamena, shokutonatela noshokusila oshimpwiyu iilyo yegongalo, unene tuu mbyoka yi iyehameka nenge tayi ehama pambepo. (Lesha Jakob 5:14, 15.) Oohandimwe yamwe mbaka otashi vulika ya za mo moshigunda noye etha po okukutha ombinga momaipyakidhilo gopaKriste. Monkalo ya tya ngaaka, mbela omukuluntugongalo ngoka e na ko nasha ita ka ninga ngaashi ta vulu opo a ladhipike onzi ndjoka yi galukile moshigunda, shoka shi li egongalo? Osha yela kutya osho ta ka ninga! Jesus okwa ti: ‘Kali shi ehalo lyaTate gwomegulu, ku kane nando okamwe kaambuka uushona.’ — Mat. 18:12-14.

OTU NA OKUTALA KO NGIINI OMAPUKO GAASITA YOPEVI?

11. Omolwashike yamwe tashi vulika ye shi mone oshidhigu okulandula ewiliko lyaakuluntugongalo?

11 Jehova naJesus oye li Aasita yoonzi ya gwanenena. Ihe aasita yopevi yopantu mboka ye ya inekelela oshinakugwanithwa shokutonatela egongalo inaya gwanenena. Oshinima shika otashi vulu oku shi ninga oshidhigu kuyamwe ya landule ewiliko lyaakuluntugongalo. Oohandimwe mboka otashi vulika ya tye: ‘Oye li owala aantu inaaya gwanenena ngaashi tse. Omolwashike tu na okupwilikina komayele gawo?’ Eeno shili, inaya gwanenena. Ihe otwa pumbwa okukala tu na etaloko lyomondjila li na ko nasha nomapuko gawo nosho wo nuunkundi wawo.

12, 13. (a) Otatu vulu okutya shike kombinga yomapuko gayamwe mboka Jehova a pa iinakugwanithwa iinene? (b) Omolwashike omapuko gaalumentu yoshinakugwanithwa ga nyolwa mOmbiimbeli?

12 Omanyolo oga popya sha yela omapuko gaamboka Jehova a li a longitha okuwilika oshigwana she monakuziwa. Pashiholelwa, David okwa li a gwayekwa e li omukwaniilwa nomuwiliki gwaIsraeli. Ihe nonando ongawo, okwa li a gwile memakelo e ta kala e na ondjo yoluhondelo noyedhipago. (2 Sam. 12:7-9) Dhiladhila wo komuyapostoli Petrus. Nonando okwa li i inekelelwa oshinakugwanithwa oshinene megongalo lyopaKriste lyomethelemumvo lyotango, okwa li a ningi omapuko ga kwata miiti. (Mat. 16:18, 19; Joh. 13:38; 18:27; Gal. 2:11-14) Okuza kuAdam naEva sigo okunena, inaku kala nando omuntu gumwe a gwanenena, kakele owala kuJesus.

13 Omolwashike Jehova a li a nwetha mo aanyoli yOmbiimbeli ya nyole omahokololo gomapuko gaalumentu mboka a li a langeka po? Limwe lyomomatompelo kutya omolwashike e shi ningile, olyo kutya okwa li a hala u ulike kutya ota vulu okulongitha aalumentu inaaya gwanenena a wilike oshigwana she. Nuushili owo kutya, osho a kala aluhe ta ningi. Onkee ano, katu na okulongitha okwaagwanenena kwaamboka taya kwatele komeho oko ku tu ningithe tu ya ngungutulile nenge kaatu vulike kewiliko lyawo. Jehova okwa tegelela tu kale twa simaneka aamwatate mboka nokuvulika kuyo. — Lesha Eksodus 16:2, 8.

14, 15. Oshike tatu vulu okwiilonga munkene Jehova a li ha popi noshigwana she monakuziwa?

14 Osha simanenena tu kale hatu vulika kwaamboka taya kwatele komeho kunena. Dhiladhila kunkene Jehova a li a popi noshigwana she pomathimbo omadhigu monakuziwa. Sho oshigwana shaIsraeli sha li sha thigi po Egipiti shonale, Kalunga okwa li e shi pe omalombwelo okupitila muMoses naAaron. Opo ya hupe megeyelo etimulongo, Aaisraeli oya li ye na okuvulika komalombwelo gokulongekidha uulalelo wi ikalekelwa nokugwayeka ombinzi kiikulo nopiipamba yomiyelo dhomagumbo gawo. Ewiliko ndyoka kaya li ye li mono okupitila mewi lya zi megulu. Ihe oya li ye na okupwilikina kaawiliki yaIsraeli, mboka nayo ya li ya pewa omalombwelo gokondandalunde kuMoses. (Eks. 12:1-7, 21-23, 29) Moonkalo adhihe ndhoka, Moses naawiliki oya li aatumwa yomalombwelo gaJehova koshigwana she. Aakuluntugongalo Aakriste ohaya gwanitha po wo oshilonga shawo sha simanenena kunena ngaashi mboka.

15 Oto vulu okudhiladhila kiiningwanima oyindji yilwe mondjokonona yopaMbiimbeli sho Jehova a li a gandja omalombwelo gokuhupitha  aantu okupitila maakalelipo ye yopantu nenge maayengeli. Moonkalo adhihe ndhika, Kalunga okwa mono sho opala a pe yalwe oonkondopangelo. Aatumwa oya li ya popi medhina lye, noya li ya lombwele oshigwana she shoka sha li sha pumbwa okuninga opo shi hupe moshiponga shontumba. Mbela itatu vulu okuthika pehulithodhiladhilo kutya Jehova otashi vulika a ka ninge sha faathana puArmagedon? Pakukala, kehe tuu omukuluntugongalo kunena ngoka e na oshinakugwanithwa shokukalela po Jehova nenge ehangano lye oku na okukala a kotoka kaa longithe nayi oonkondopangelo ndhoka a pewa.

‘OSHIGUNDA SHIMWE, OMUSITA GUMWE’

16. Otwa pumbwa okugandja eitulomo ‘kewi’ lini?

16 Oshigwana shaJehova oshi li “oshigunda shimwe” shoka tashi lithwa ‘komusita gumwe,’ Jesus Kristus. (Joh. 10:16) Jesus okwa li a popi kutya ota ka kala pamwe naalongwa ye “omasiku agehe sigo ehulilo lyuuyuni.” (Mat. 28:20) E li Omukwaniilwa megulu, iinima ayihe mbyoka tayi ka fala sigo opokuhanagulwa kuuyuni waSatana oyi li mepangelo lye alihe. Opo tu kale twa hangana notu kale twa gamenwa moshigunda shaKalunga, otwa pumbwa okupulakena ‘kewi konima yetu,’ ndyoka tali tu lombwele kutya otu na okuya nondjila yini. “Ewi” ndika olya kwatela mo shoka ombepo ondjapuki yaKalunga tayi ti okupitila mOmbiimbeli nomwaashoka Jehova naJesus taya ti okupitila mwaamboka ya langekwa po ye li aasita yopevi. — Lesha Jesaja 30:21; Ehololo 3:22.

Aakuluntugongalo ohaya longo nuudhiginini opo ya gamene uukwanegumbo moka mu na omuvali gumwe komanwethwomo omawinayi (Tala okatendo 17, 18)

17, 18. (a) Oonzi odhi li moshiponga shashike, ihe otatu vulu okukala neinekelo lini? (b) Otatu ka kundathana shike moshitopolwa tashi landula?

17 Satana okwa popiwa kutya ota “ndunduma a fa onime, ta kongo omuntu gwontumba, e mu ketsule po.” (1 Pet. 5:8) Ngaashi oshilikama she etwa mo kondjala nayi, okwa landula oshigunda, a tegelela owala a mone ompito yokuponokela oonzi ndhoka inaadhi kotoka nenge ndhoka tadhi zi mo moshigunda. Osho molwaashoka tu na okukala popepi lela noshigunda nosho wo ‘nomusita nomutekuli gwoomwenyo’ dhetu. (1 Pet. 2:25) Ehololo 7:17 olya popi kombinga yaamboka taya ka hupa puudhigu uunene lya ti: ‘Onzigona [Jesus] otayi ka kala omusita gwawo note ke ya wilika noku ya fala koothithiya dhomeya omanamwenyo. Kalunga nota ka theta po omahodhi agehe momeho gawo.’ Ndyoka kali shi ngaa euvaneko lya dhenga mbanda?

18 Ngaashi twa kundathana onkandangala ya simana yaakuluntugongalo ye li aasita yopevi yopambepo, oshi li nawa omukuluntugongalo kehe i ipule ta ti, ongiini tandi vulu okushilipaleka kutya otandi ungaunga noonzi dhaJesus momukalo gu uka? Eyamukulo otali ka kundathanwa moshitopolwa tashi landula.