Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2013

Okulongela Kalunga okwo oopela dhe!

Okulongela Kalunga okwo oopela dhe!

Sho aakokolindjila yaali ya li ye ya megumbo limwe moKenya, oya li ya kumwa sho ya mono omulumentu e na olutu olushona a lala kombete. Olutu lwe olwa li owala lwa hulila poonto nomaako ge oga li omafupi. Sho ya kundathana naye euvaneko lyaKalunga kutya “oshitiningili otashi ka nuka ngomwenye,” omulumentu ngoka okwi imemeha lela. — Jes. 35:6.

Aakokolindjila oya li yu uvu kutya Onesmus, ngoka ngashingeyi e li mepipi lyoomvula 30 nasha, okwa valwa nomukithi gwomasipa omakukutu haga teka nuupu (osteogenesis imperfecta). Omasipa ge oga li haga vulu okuteka nuupu nokuli nando oku pumwe owala kashona. Molwaashoka uuvu we kawu na epango, Onesmus okwa li a tegelela a kale te ehama onkalamwenyo ye ayihe nokukala mokatemba sigo aluhe.

Onesmus okwa li a taamba ko ekonakonombiimbeli. Ihe yina okwa li e mu indike kaaye kokugongala kwopaKriste molwaashoka okwa li ta dhiladhila kutya otashi ke mu etela oshiponga notashi ka gwedha ko kuuwehame we. Onkee ano aamwatate oya li haya kwata omawi goonkundathana dhokugongala, na Onesmus okwa li he dhi pulakene pegumbo. Konima sho a konakona uule woomwedhi ntano, Onesmus okwa li a tokola kutya okwa hala a kale tayi kokugongala kehe kutya nduno otashi pula shike.

Mbela okukala pokugongala kwopaKriste okwa li kwa gwedha ko kuuwehame waOnesmus? Okwa li kwe wu pupaleke. Onesmus ota ti: “Pethimbo lyokugongala uuwehame wandje ohawu kala owala wa fa wa kana po.” Okwa li e wete kutya etegameno lye ndyoka epe olyo lya li lye mu ningitha a kale u uvite e li hwepo. Meme gwaOnesmus okwa li a mono elunduluko monkalo yomwana nokwa li a nyanyukwa noonkondo naashika oshe mu ningitha wo a konakone Ombiimbeli. Yina okwa li ha ti: “Okulongela Kalunga kwomumwandje okwo oopela dhe.”

Inapu pita ethimbo ele, Onesmus okwa li a ningi omuuvithi inaa ninginithwa. Mokweendela ko kwethimbo, okwa li a ninginithwa nongashingeyi oku li omuyakuligongalo. Nonando Onesmus iha vulu okulongitha omagulu ge nokwaako kwe kumwe, okwa kala e na ehalo lyokuninga kehe shoka ta vulu miilonga yaJehova. Okwa li a hala okukutha uukwathelikokolindjila, ihe okwa li ta kwatakwata okuudhitha ofooloma. Omolwashike mbela? Omolwaashoka okwa li e shi shi kutya ota ka pumbwa lela yalwe ye mu kwathele yu undule ko kokatemba ke. Sho a holola omaiyuvo ge kAakriste ooyakwawo, oya li ye mu uvanekele kutya otaye ke mu ambidhidha. Shoka osho ya li ya ningi, ano ya kwathele Onesmus muukwathelikokolindjila.

Molwaashoka Onesmus okwa li a hala okuninga omukokolindjila gwondjigilile okwa li ti ipula natango ngaashi i ipulile shi na sha nuukwathelikokolindjila. Ihe oshikando shimwe, okwa li a tsuwa omukumo kenyolo lyesiku. Enyolo ndyoka olya li Episalomi 34:8 ndyoka tali ti: “Konakona mwene, u mone, nkene OMUWA omwaanawa.” Sho Onesmus a tedhatedha kenyolo ndyoka, okwa tokola a ninge omukokolindjila gwondjigilile. Ngashingeyi oha longo omasiku gane moshiwike momapya noku na aakonakonimbiimbeli oyendji mboka taya humu nawa komeho pambepo. Mo 2010, okwa li a yi kOsikola yIilonga yUukokolindjila. Onesmus okwa li a nyanyukwa tuu shili sho omumwatate gumwe ngoka a li te ya longo a li gumwe gwomaamwatate yaali mboka ya li ye mu talele po oshikando shotango!

Aavali yaOnesmus ngashingeyi oya hulitha, ihe aamwatate naamwameme megongalo ohaya sile oshimpwiyu oompumbwe dhe dhesiku kehe. Okwa pandula omayambeko agehe ngoka ta nyanyukilwa ngashingeyi nokwa tegelela ethimbo ndyoka uuna itaapu ka kala “nando ogumwe muSioni ta ka tya: ‘Otandi ehama.’” — Jes. 33:24.