Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2013

Nkene tatu vulu okukwathela mboka ye li mompumbwe

Nkene tatu vulu okukwathela mboka ye li mompumbwe

FRANÇOIS, omukuluntugongalo gwomoshilongo shimwe opo tashi putuka, ota ti: “Konima yomahogololo opwa li pwa holoka iikolokosha mbyoka ya li ya thiminike Oonzapo dhaJehova omayuvi dhi thige po omagumbo gadho. Omiti niikulya oya li ya pumbu, naambyoka ya li ya hupu po oya li yi na ondilo nayi. Oombaanga odha li dha pata, nuu-ATM owa li wa pu iimaliwa nenge wa kala itaawu longo we.”

Aamwatate mboka ye li koshitayimbelewa oya li ya tameke nziya okutuma oshimaliwa nosho wo iikwatha yomeulumompumbwe kOonzapo ndhoka dha li dha thiga po omagumbo gadho nodha li pIinyanga yUukwaniilwa yi ili noyi ili moshilongo ashihe. Oongundu ndhoka dha li tadhi kondjithathana odha li dha tula po ooboloka moondjila, ihe molwaashoka odha li dhi shi shi kutya Oonzapo ihadhi kutha nando ombinga miita, odha li hadhi etha iihauto yoshitayimbelewa yi pite.

François ota ti: “Sho twa li tu uka kOshinyanga shUukwaniilwa shimwe, oongangala dhimwe odha li dhu umbu noondjembo okaloli ketu. Ihe ooholo odha li owala dha piti pokati ketu. Sho twa mono omukwiita a humbata ondjembo ta tondoka u uka kutse, otwa livesa nziyanziya, twa tanauka, e tatu hingilile tu shune koshitayimbelewa. Otwa li twa pandula Jehova molwaashoka otwa li twa hupu. Esiku lya ka landula, aamwatate ye li 130 mboka ya li mOshinyanga shUukwaniilwa oya li ya thiki pehala lya gamenwa. Yamwe oya li ye ya koshitayimbelewa, hoka twa li twe ya sile oshimpwiyu pambepo nosho wo palutu sigo uupyakadhi mboka wa hulu.”

François ota ti: “Konima yethimbo oshitayimbelewa osha li sha yakula oombilive odhindji dholupandu olunene okuza kaamwatate yokoombinga noombinga dhoshilongo. Einekelo lyawo muJehova olya li lya kolo omolwekwatho ndyoka aamwatate yokiitopolwa yilwe ya li ye ya pe.

Uuna pwa holoka iiponga yopaunshitwe nenge mbyoka hayi etithwa kaantu, ihatu lombwele aamwatate naamwameme mboka ye li mompumbwe kutya, “ki isiikileni e tamu li nawa.” (Jak. 2:15, 16) Pehala lyaashono, ohatu kambadhala oku ya kwathela noompumbwe dhawo dhopalutu. Sha faathana, konima sho kwa li kwa londodhwa kutya otaku ke ya ondjala methelemumvo lyotango, “ooitaali oya tokola kutya kehe gumwe gwomuyo na gandje iikwatha ngaashi ta vulu, opo yi tuminwe aamwayina meitaalo mbeyaka ya kala muJudea.” — Iil. 11:28-30.

Tu li aapiya yaJehova, ohatu kala twa halelela okukwathela oohandimwe mboka ye na oompumbwe dhopalutu. Ihe aantu oye na wo ompumbwe yopambepo. (Mat. 5:3) Opo e ya kwathele ya mone kutya opu na ompumbwe ndjoka, yo ya katuke oonkatu ye yi gwanithe po, Jesus okwa li a lombwele aalanduli ye ya ninge aantu aalongwa. (Mat. 28:19, 20) Tu li oohandimwe ohatu longitha ethimbo lyetu olindji, oonkondo dhetu nosho wo iiniwe yetu, opo tu gwanithe po oshilonga shoka. Tu li ehangano, ohatu longitha omayambidhidho gamwe tu gandje ekwatho lyopalutu, ihe omayambidhidho ohaga longithwa unene mokuhumitha komeho iinima yUukwaniilwa nosho wo okutaandelitha onkundanda ombwanawa. Kungawo ohatu ulike ohole yetu yokuhola Kalunga nosho wo ooyakwetu. — Mat. 22:37-39.

Mboka haya ambidhidha iilonga yomuuyuni awuhe yOonzapo dhaJehova otaya vulu okukala ya shilipalekwa kutya, omayambidhidho gawo ohaga longithwa nawa nomomukalo gwa dhenga mbanda. Mbela owu li ponkatu mpoka to vulu okukwathela aamwaho mboka ye na ompumbwe? Mbela owu na ehalo lyokwaambidhidha iilonga yokuninga aantu aalongwa? Ngele osho, ‘ino tindila eyakulo ewanawa ndyoka to vulu oku li yakulitha.’ — Omayel. 3:27.