Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2013

Oshike tashi vulu oku tu kwathela tu kale twa ‘tegelela’?

Oshike tashi vulu oku tu kwathela tu kale twa ‘tegelela’?

“Ngame otandi tegelele.” — MIKA 7:7.

1. Oshike tashi vulu oku tu ningitha tu kale kaatu na eidhidhimiko?

SHO Uukwaniilwa wopaMesiasa wa li wa dhikwa po mo 1914, onkalelo yaSatana oya li ye ya pomasiku gayo gahugunina. Omolwolugodhi ndwoka lwa li lwa tukuluka megulu, Jesus okwa li u umbile Ondiapoli noompwidhuli dhayo kombanda yevi. (Lesha Ehololo 12:7-9.) Satana oku shi shi kutya oku na ko owala “okathimbo okafupi.” (Eh. 12:12) Ihe “okathimbo” hoka otaki ihilile ngashingeyi poomvula ethele, nayamwe otashi vulika ya kale yu uvite kutya omasiku gahugunina oga kala po ethimbo ele. Sho twa tegelela Jehova a katuke oonkatu, mbela tse paumwene otwa loloka okutegelela?

2. Moshitopolwa shika otamu ka kundathanwa shike?

2 Okukala twaa na eidhidhimiko otaku vulu okukala kwa nika oshiponga, molwaashoka otaku vulu oku tu ningitha tu katuke neendelelo. Oshike tashi vulu oku tu kwathela tu kale tu na iikala yokutegelela? Oshitopolwa shika otashi ke tu kwathela tu kale niikala mbyoka sho tashi yamukula omapulo ngaka taga landula. (1) Moshiholelwa shomupolofeti Mika sheidhidhimiko otatu vulu okwiilonga mo shike? (2) Iiningwanima yini tayi ka holola kutya ethimbo lyetu lyokutegelela olya pwa ko? (3) Ongiini tatu vulu okuulika kutya otu na olupandu omolweidhidhimiko lyaJehova?

OSHIKE TATU ILONGO MOSHIHOLELWA SHAMIKA?

3. MuIsraeli omwa li onkalo ya tya ngiini pethimbo lyaMika?

3 Mika, omupolofeti gwaJehova, okwa li a mono onkalo yopambepo yAaisraeli tayi nayipala sigo ya lulu sho ya li taya lelwa komukwaniilwa omwiinayi Ahas. (Mika 7:2-6) Mika okwa li a yelekanitha Aaisraeli mboka kaaye shi aadhiginini ‘neno’ nosho wo ‘nenkolo lyomano.’ (OB-1954) Ngaashi owala eno nenge enkolo lyomano hali ehameke ngoka ti itakeke mulyo, Aaisraeli mboka ya yonuka pamikalo oya li ye ehameke kehe gumwe ngoka a li e na ekwathano nayo. Eyonuko ndyoka olya li lya taandele apuhe sigo nokuli omakwatathano momagumbo ga teka. Molwaashoka Mika ka li ta vulu  okuninga po sha a lundulule onkalo, okwa li a mbumbulile Jehova omutima gwe. Opo nduno okwa li a tegelele neidhidhimiko Kalunga a katuke oonkatu. Mika okwa li e na einekelo kutya Jehova ota ka ya mo olunyala pethimbo Lye.

4. Omashongo geni hatu tsakaneke?

4 Ngaashi owala Mika a kala mokati kaantu yi ihole yo yene, natse otu na okukala mokati kaantu ya tya ngaaka. Oyendji ‘ihaa pandula noya pota. Yo kaye na olukeno nohenda.’ (2 Tim. 3:2, 3) Ohashi tu ehameke uuna aaniilonga pamwe natse, aanasikola ooyakwetu, naashiinda yi ihole yo yene. Aapiya yaJehova yamwe nokuli oye na eshongo li vule ndyoka. Jesus okwa li a popi kutya aalanduli ye otaya ka hepekwa kuyaandjawo nokwa li a longitha oohapu dha faathana naandhoka dhi li muMika 7:6 a popye kutya etumwalaka lye olya li tali ka guma aantu shi thike peni. Jesus okwa ti: “Ongame nde ya okuhongakanitha omumati nahe, nomukadhona nayina, noshitenya shomukiintu nayinamweno. Aanegumbo yomuntu ngoka otaa ningi aatondi ye.” (Mat. 10:35, 36) Kashi shi tuu oshidhigu okwiidhidhimikila omasheko nomapataneko giilyo yomaukwanegumbo getu mbyoka kaayi li meitaalo lyetu! Uuna iilyo yuukwanegumbo tayi tu thiminike, inatu igandja. Pehala lyaashono, natu kale aadhiginini nokutegelela neidhidhimiko Jehova a pongolole iinima. Ngele otwa kala hatu mu pula ekwatho, ote ke tu pa oonkondo nosho wo uunongo mboka twa pumbwa opo tu idhidhimike.

5, 6. Ongiini Jehova a li a pe Mika ondjambi, ihe oshike Mika a li inaa mona?

5 Jehova okwa li a pe Mika ondjambi molwaashoka okwa li i idhidhimike. Mika okwa li a mono nkene omukwaniilwa Ahas nepangelo lye ekwanyanya tali hulithwa po. Okwa mono nkene omwanamati gwaAhas, omukwaniilwa omwaanawa Hiskija, a thigulula oshipundi shuukwaniilwa nokutamekulula elongelokalunga lyashili. Egwanitho lyehunganeko lyehanagulo lyaSamaria ndyoka lya li lya hunganekwa kuMika olya li lya gwanithwa sho Aayassur ya ponokele uukwaniilwa waIsraeli wokuumbangalantu. — Mika 1:6.

6 Ihe Mika ka li a mono egwanitho lyomahunganeko agehe ngoka Jehova a li e mu nwetha mo a hunganeke. Pashiholelwa, Mika okwa li a nyola a ti: “[‘Pehulilo lyomasiku,’ OB-1954] ondundu hoka kwa tungilwa otempeli, otayi ka ninga ondeendeka yi vule adhihe, otayi ka lelepala kombanda yoondundu adhihe. Iigwana oyindji otayi ke ya tayi matukile kuyo, naantu yayo otaa ka tya: ‘Natu londeni kondundu yOMUWA.’” (Mika 4:1, 2) Mika okwa adhika a sa nale nale sho ehunganeko ndyoka lya gwanithwa. Ihe nonando ongaaka, okwa li a tokola toko a kale omudhiginini kuJehova sigo eso lye, kutya nduno yalwe mboka ya li momudhingoloko gwe oya li taya ningi shike. Mika okwa nyola kombinga yaashika, a ti: “Oshigwana kehe otashi simaneke nokuvulika kuKalunga kasho shene, ihe tse otatu ka longela nokuvulika kOMUWA Kalunga ketu aluhe sigo aluhe.” (Mika 4:5) Mika okwa li a tegelele neidhidhimiko pethimbo ndyoka edhigu molwaashoka okwa li e na einekelo lela kutya Jehova ota ka gwanitha po omahunganeko Ge agehe. Omupolofeti ngoka omudhiginini okwa li inekele muJehova.

7, 8. (a) Etompelo lini tu na lyokukala neinekelo? (b) Oshike tashi ka ningitha ethimbo li endelele?

7 Mbela natse otwi inekela ngaa muJehova ngaashi Mika? Otu na etompelo ewanawa lyokukala twe mu inekela. Otwa mona lela nkene ehunganeko lyaMika tali gwanithwa. ‘Pehulilo lyomasiku,’ aantu omamiliyona ya za miigwana ayihe nomomalaka nomomihoko adhihe oya mbombolokela “kondundu yOMUWA.” Nonando oya za miigwana mbyoka hayi kondjithathana, aalongelikalunga mbaka oya hambula ‘omagongamwele gawo ye ga ninga omatemo,’ nohaya tindi ‘okuya kiita.’ (Mika 4:3) Kashi shi tuu uuthembahenda sho tu li yamwe yomoshigwana shaJehova oshinambili!

8 Shoka shi shi okuuviwa ko osho kutya otwa hala Jehova a hanagule po masiku onkalelo ndjika ya kolokosha. Ihe opo tu kale twa tegelela neidhidhimiko, otwa pumbwa okutala ko iinima ngaashi Jehova he yi tala ko. Oku utha esiku  ndyoka uuna ta ka pangula aantu okupitila ‘momulumentu ngoka e mu hogolola,’ Jesus Kristus. (Iil. 17:31) Ihe manga shoka inaashi ningwa, Kalunga ota pe aantu ayehe ompito ‘ya tseye oshili,’ nokutula miilonga ontseyo ndjoka, yo ya hupithwe. Oomwenyo ndhoka dhi na ongushu kuye odhi li moshiponga. (Lesha 1 Timoteus 2:3, 4.) Ngele otwi ipyakidhila nokukwathela aantu ya mone ontseyo yashili kombinga yaKalunga, ethimbo ndyoka lya hupa ko manga epangulo lyaJehova inaali ya otali ke endelela shi vule po. Masiku, ethimbo otali ka pwa ko, nokuli ombaadhilila. Ngele olya pu ko, itatu ka kala tuu twa nyanyukwa oshoka otwa kala twi ipyakidhila miilonga yokuuvitha Uukwaniilwa!

IININGWANIMA YINI TAYI KA ULIKA KUTYA ETHIMBO LYETU LYOKUTEGELELA OLYA PWA KO?

9-11. Mbela Aatessalonika yotango 5:3 oya gwanithwa? Shi yelitha.

9 Lesha 1 Aatessalonika 5:1-3. Monakuyiwa yi li popepi, iigwana otayi ka tya “Ombili negameno!” (NW) Ngele otwa hala tu adhike twi ilongekidhila etseyitho ndika, otwa pumbwa ‘tu kale twa tonata notu na eidhiliko.’ (1 Tes. 5:6) Opo tu kale twa tonata pambepo, natu ka konakoneni paufupi iiningwanima mbyoka tayi ka ningwa komeho yeigidho ndyoka endhindhilikwedhi.

10 Konima yiita yotango niitiyali yuuyuni, iigwana oya li ya pula pu kale ombili. Konima yIita yoTango yUuyuni, opwa li pwa totwa Oshipandi shIigwana nelalakano lyokweeta ombili. Konima yIita Iitiyali yUuyuni, Iigwana ya Hangana oya li yi inekelwa apuhe kutya otayi ka eta ombili kombanda yevi. Aawiliki yomapangelo noyomalongelokalunga oya kala yi inekela momahangano ngoka kutya otage ke etela aantu ombili. Pashiholelwa, mo 1986, Iigwana ya Hangana oya li ya ningi etokolo okuninga omumvo ngoka Omumvo gwOmbili mUuyuni awuhe (International Year of Peace). Omumvo ngoka, aawiliki ya za miigwana oyindji nosho wo omalongelokalunga ogendji oya li yi imanga uukuni kumwe nomutse gwOngeleka yaKatoolika muAssisi, muItali, ya galikane opo pu ye ombili.

11 Ihe nonando ongaaka, eigidho ndyoka lyombili negameno nosho wo galwe hago ga kala taga gwanitha po ehunganeko ndyoka lya popiwa mAatessalonika yotango 5:3. Omolwashike mbela? Omolwaashoka ‘ehanagulo ndyoka tali  ya adha ohaluka’ ndyoka lya hunganekwa inali ya natango.

12. Oshike tu shi kombinga yetseyitho ‘lyombili negameno’?

12 Olye ta ka igidha eigidho ndika endhindhilikwedhi ‘lyombili negameno’ monakuyiwa? Aawiliki yomalongelokalunga giifundja gopaKriste noyomalongelokalunga galwe otaya ka dhana onkandangala yini? Aakwatelikomeho yomapangelo giilongo yi ili noyi ili otaya ka kutha ngiini ombinga meigidho ndika? Omanyolo inage shi tu lombwela. Shoka tu shi osho shoka owala kutya kutya nduno etseyitho ndyoka otali ka ningwa momukalo guni nenge otali ka tompa aantu ngiini, otali ka kala owala eheka. Onkalelo ndjika onkulu otayi ka tsikila okukala miikaha yaSatana. Onkalelo ndjika oya mbuta noitayi lunduluka. Itashi ka yemateka tuu ngele gumwe gwomutse okwe ki itaala iifundja yaSatana e ta yono po omuthika gwetu gwopaKriste gwokwaakutha ombinga moopolotika!

13. Omolwashike aayengeli ya keelela oombepo dhehanagulo?

13 Lesha Ehololo 7:1-4. Manga twa tegelela egwanitho lyAatessalonika yotango 5:3, aayengeli aanankondo oya keelela oombepo dhehanagulo dhuudhigu uunene. Aayengeli mboka oya tegelela shike? Oshiningwanima shimwe oshindhindhilikwedhi shoka sha popiwa komuyapostoli Johannes oshokundhindhilika lwahugunina aagwayekwa mboka ye li ‘aamati yaKalunga.’ * Konima nduno ngele okundhindhilika kwahugunina kwa pu, aayengeli otaye ke etha nduno oombepo ndhoka dhehanagulo. Oshike nduno tashi ka ningwa konima yaashoka?

14. Oshike tashi ulike kutya ehulilo lyaBabiloni Oshinene oli li popepi?

14 Babiloni Oshinene, uukwaniilwa womalongelokalunga giifundja muuyuni awuhe, otashi ka hanagulwa po. “Iigwana, oongundu, omihoko dhaantu nomalaka,” itaya ka vula oku shi ambidhidha. Otu wete nale kutya ehulilo lyasho oli li popepi. (Eh. 16:12; 17:15-18; 18:7, 8, 21) Nokuli okwaayambidhidha hoka ngashingeyi ohaku popiwa miikundaneki, moka okuponokelwa kwomalongelokalunga naawiliki yago taku indjipala. Ihe nonando oongawo, aawiliki yaBabiloni Oshinene oyu uvite kutya kaye li moshiponga sha sha. Inaya puka tuu! Konima ngele eigidho ‘lyombili negameno’ lya ningwa omapangelo gopapolotika gonkalelo yaSatana otaga ka tanaukila po omalongelokalunga giifundja notage ke ga hulitha po. Babiloni Oshinene itashi ka monika we tuu nando! Dhoshili oshi li nawa tu tegelele neidhidhimiko iiningwanima mbyoka yituntula. — Eh. 18:8, 10.

ONGIINI TATU VULU OKUULIKA OLUPANDU OMOLWEIDHIDHIMIKO LYAKALUNGA?

15. Omolwashike Jehova inaa katuka onkatu nziya?

15 Nonando aantu oya kala taya shekitha edhina lye, Jehova okwa kala aluhe a tegelela neidhidhimiko ethimbo lyo opala opo a katuke onkatu. Jehova ina hala nando omuntu gumwe e na omutima omwaanawa a ka hanagulwe po. (2 Pet. 3:9, 10) Mbela natse osho ngaa tu uvite ngaaka? Manga esiku lyaJehova inaali ya, otatu vulu okuulika olupandu lwetu lwokupandula eidhidhimiko lye momikalo tadhi landula.

16, 17. (a) Omolwashike tu na okukala twa hala okukwathela aauvithi mboka inaayi ipyakidhila we? (b) Omolwashike aauvithi mboka inaayi ipyakidhila we ye na okugalukila kuJehova neendelelo?

16 Kwathela aauvithi mboka inaayi ipyakidhila we. Jesus okwa popile kutya megulu ohamu kala enyanyu uuna onzi yimwe owala ndjoka ya li ya kana ya monika. (Mat. 18:14; Luk. 15:3-7) Dhoshili, Jehova oku na ko nasha lela naayehe mboka ye hole edhina lye, nokuli nonando ngashingeyi inayi ipyakidhila we noku mu longela. Uuna tatu kwathele oohandimwe mboka ya galukile kegongalo, otatu kutha wo ombinga mokunyanyudha Jehova nosho wo aayengeli.

17 Mbela ngoye owu li gumwe gwomwaamboka inaayi ipyakidhila we mokulongela Kalunga? Otashi vulika pamwe gumwe megongalo e ku ninga nayi naashoka oshe ku ningitha wu ethe po  okweendathana nehangano lyaJehova. Molwaashoka otashi vulika pwa pita ethimbo lyontumba, ipula to ti: ‘Mbela ngashingeyi onkalamwenyo yandje oyi na ngaa eityo, nosho wo kutya onda nyanyukwa ngaa shi vulithe nale? Mbela Jehova oye a li a ningi ndje nayi nenge omuntu owala ngoka inaa gwanenena? Mbela Jehova Kalunga oku na esiku a ningile ndje sha opo e ehameke ndje?’ Dhoshili, Jehova okwa kala aluhe te tu ningile iinima iiwanawa. Nokuli nando katu li metsokumwe neiyapulo lyetu, ohe tu etha tu nyanyukilwe iinima iiwanawa mbyoka ha gandja. (Jak. 1:16, 17) Masiku, esiku lyaJehova otali ya. Ngashingeyi olyo ethimbo lyokugalukila kuTate yetu gwomegulu nokegongalo ndyoka olyo owala li li ehala lyegameno momasiku ngaka gahugunina. — Deut. 33:27; Heb. 10:24, 25.

Oshigwana shaJehova ohashi ningi onkambadhala kehe shi kwathele aauvithi mboka inaayi ipyakidhila we ya galukile kuJehova (Tala okatendo 16, 17)

18. Omolwashike tu na okwaambidhidha mboka taya kwatele komeho?

18 Ambidhidha nuudhiginini mboka taya kwatele komeho. E li Omusita omunahole, Jehova ohe tu wilike nohe tu gamene. Okwa langeka po Omwana e li Omusitamukuluntu gwoshigunda. (1 Pet. 5:4) Aakuluntugongalo momagongalo ge vulithe 100 000 ohaya sile oshimpwiyu onzi kehe yaKalunga paumwene. (Iil. 20:28) Uuna tatu ambidhidha nuudhiginini mboka ya langekwa po ye tu wilike, otatu ulike kutya otwa pandula Jehova nosho wo Jesus omolwaayihe mbyoka ye tu ningila.

19. Ongiini tatu vulu okwiimanga kumwe?

19 Hedha popepi naamwaho. Mbela shoka osha hala okutya shike? Uuna etangakwiita lya dheulikikika lya ponokelwa komutondi, aakwiita ohayi imanga kumwe, ano kutya omukwiita kehe oha hedha popepyeelela namukwawo. Mokuninga ngaaka, omutondi gwawo ihe ke ya sinda nuupu. Satana ota nana komupaya mokuponokela oshigwana shaKalunga. Ngashingeyi halyo ethimbo lyokukondja naamwatate. Ihe olyo ethimbo lyokuhedha popepi nayo, lyokukala itaatu konenene okwaagwanenena kwawo, nolyokukala twi inekela mewiliko lyaJehova.

Ngashingeyi olyo ethimbo lyokwiimanga kumwe tu kondjithe Satana noompwidhuli dhe (Tala okatendo 19)

20. Oshike tu na okuninga ngashingeyi?

20 Atuheni natu kale twa tonata pambepo nokukala tu na iikala yokutegelela. Natu tegelele neidhidhimiko etseyitho ‘lyombili negameno!’ nosho wo onkatu yahugunina yokundhindhilika iihako miipala yaahogololwa. Nokomina yaashoka, aayengeli yane otaya ka etha oombepo dhehanagulo, na Babiloni Oshinene otashi ka hanagulwa po. Manga twa tegelela iiningwanima mbika yituntula, natu taambe ko ewiliko ndyoka tatu pewa kwaamboka ya langekwa po ya kwatele komeho mehangano lyaJehova. Natu imange kumwe tu kondjithe Ondiapoli noopwidhuli dhayo. Ngashingeyi olyo ethimbo lyokutula miilonga ekumagidho lyomupisalomi ndyoka tali ti: “Ikoleleni, ne mu kale nomukumo, amuhe mbo mu na etegameno mOMUWA.” — Eps. 31:24.

^ okat. 13 Opo wu mone eyooloko ndyoka li li pokati kokutula endhindhiliko miipala yaagwayekwa kwotango nokwahugunina, tala Oshungolangelo yOshiingilisa 1 Januali 2007, pepandja 30-31.