Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Septemba 2013

Ninga omatokolo gopaumwene noondunge

Ninga omatokolo gopaumwene noondunge

“Inekela OMUWA nomutima gwoye aguhe noino igameka koondunge dhoye mwene.” — OMAYEL. 3:5.

1, 2. Mbela owu hole okuninga omatokolo, nowu uvitile ngiini omatokolo gamwe ngoka wa ninga?

OMATOKOLO! Omatokolo! Kehe esiku ohatu ningi omatokolo ogendji. Mbela oho kala wu uvitile ngiini okuninga omatokolo? Aantu yamwe ohaya kala ya halelela okuninga omatokolo kuyo yene. Ohaya dhiladhila kutya oyo yene ye na uuthemba woku ga ninga, nokuli kaye hole yalwe oyo ye ya tokolele. Ihe opu na wo mboka haya kala ye na uumbanda wokuninga omatokolo galwe ngoka inaaga pambathana niinima yakwalukehe. Yamwe ohaya lesha momambo gomauyelele nenge ya ye kaagandjimayele notashi vulika ya fute iimaliwa oyindji, opo ya mone omayele ngoka yu uvite kutya ogo ya pumbwa.

2 Oyendji yomutse otu li owala pokati. Ohatu mono kutya katu na oonkondo dhokutokola miinima yilwe nokatu na shoka tatu vulu okuninga kombinga yayo, ihe ohatu vulu okuninga omatokolo miinima oyindji monkalamwenyo shi ikwatelela kwaashoka twa hala. (Gal. 6:5) Ihe nonando ongawo, otashi vulika tu zimine kutya hamatokolo agehe ngoka hatu ningi ge li pandunge nenge hage tu etele uuwanawa.

3. Ewiliko lini hali tu kwathele tu ninge omatokolo, ihe opu na eshongo lini?

3 Tu li aapiya yaJehova, otatu vulu okukala twa nyanyukwa molwaashoka okwe tu pa ewiliko lya yela kombinga yiinima oyindji ya simana monkalamwenyo yetu. Otu shi shi kutya ngele otwa landula omalombwelo ngoka, otatu ka vula okuninga omatokolo ngoka taga ka nyanyudha Jehova notage ke tu etela wo uuwanawa. Nonando ongawo, otashi vulika tu tsakaneke oonkalo nenge iinima mbyoka inaayi popiwa kondandalunde mOohapu dhaKalunga. Ongiini nduno tatu vulu okutokola shoka tu na okuninga? Pashiholelwa, otu shi shi kutya katu na okuyaka. (Ef. 4:28) Ihe mbela oshike tashi ulike kutya omuntu okwa yaka shili? Mbela ohashi ulikwa kongushu yoshinima shoka, yegamo lyaangoka e shi yaka, nenge kushimwe shi ili? Ohatu tokola ngiini kutya oshike tu na okuninga miinima mbyoka yamwe haya ti kutya kayu uvite ko? Oshike hashi tu wilike?

 NINGA OMATOKOLO NOONDUNGE

4. Otashi vulika twa li twa pewa omayele geni sho twa li tu na okuninga etokolo?

4 Uuna twa popi kutya otu li pokuninga etokolo lya simana, Omukriste omukwetu otashi vulika a ninge etyokosha kutya otwa pumbwa oku li ninga noondunge. Ngoka omayele omawanawa. Ombiimbeli otayi tu ladhipike kaatu endelele okuninga etokolo, tayi ti: “Ngoka a lungulukwa, otayi moluhepo.” (Omayel. 21:5) Ihe mbela okulongitha oondunge okwa kwatela mo shike? Mbela okwa kwatela mo owala okulongitha ethimbo tu dhiladhile kombinga yoshinima shontumba, tu kale tu na ondjele, noku kambadhala okuuva ko uushili awuhe manga inaatu tokola? Iinima ayihe mbika otayi tu kwathele tu ninge etokolo ewanawa, ihe opu na oshindji tu na okuninga shi vulithe owala okulongitha oondunge. — Rom. 12:3; 1 Pet. 4:7.

5. Omolwashike kaatu na omadhiladhilo ga gwanenena?

5 Otu na okuzimina kutya kapu na nando ogumwe gwomutse a valwa nomadhiladhilo ga gwanenena. Omolwashike mbela? Omolwaashoka atuhe otwa valwa muulunde noina tu gwanenena katu na omalutu nenge omadhiladhilo ga gwanenena. (Eps. 51:5; Rom. 3:23) Shimwe ishewe, oyendji yomutse otwa li yamwe yomwaamboka omadhiladhilo gawo ga li ga “pukithwa” kuSatana, otwa li kaatu na ko nasha naJehova nosho wo nomithikampango dhe dhuuyuki. (2 Kor. 4:4; Tit. 3:3) Onkee ano, nonando omuntu oku dhiladhile ethimbo manga inaa ninga etokolo shi ikwatelela kwaashoka ta dhiladhila kutya osho oshiwanawa nenge shi li mondjila, otashi vulika natango a ninge etokolo lya puka. — Omayel. 14:12.

6. Oshike tashi ke tu kwathela tu kale hatu dhiladhila pandunge?

6 Nonando katu na omalutu nomadhiladhilo ga gwanenena, Jehova, Tate yetu gwomegulu, okwa gwanenena miinima ayihe. (Deut. 32:4) Ihe shoka tashi nyanyudha, okwe shi ninga tashi wapa tu lundulule okudhiladhila kwetu notu ilonge okudhiladhila pandunge. (Lesha 2 Aakorinto 5:13.) Tu li Aakriste, otwa hala tu kale hatu dhiladhila pandunge nokuninga iinima mondjila. Otu na okupangela omadhiladhilo getu nomaiyuvo getu, nokuholela Jehova mokudhiladhila, momaiyuvo nosho wo miilonga.

7, 8. Gandja oshiholelwa nkene omuntu ta vulu okuninga etokolo lyopandunge nonando oku li muudhigu nenge ta thiminikwa.

7 Natu tale koshiholelwa. Oshinima shimwe shoka hashi ningwa kaatembukili osho okugandja uuhanona wawo kaakwanezimo ye ke wu tekule, opo ya vule okutsikila niilonga noya mone oshimaliwa. * Omukulukadhi gumwe e li koshilonga shilwe okwa li a pulumutha okanona okawanawa kokamati. Pethimbo ndyoka, okwa li a tameke okukonakona Ombiimbeli nokwa li a humu komeho nawa pambepo. Ookuume naakwanezimo ye oya li ye mu thiminike ye nomusamane gwe ya tumine okanona kooyinakulu. Ihe okupitila mekonakono lye lyOmbiimbeli omukulukadhi okwa li i ilongo kutya ye, e li omuvali, okwa pewa oshinakugwanithwa kuKalunga shokuputudha okanona ke. (Eps. 127:3; Ef. 6:4) Mbela okwa li ta ka landula omuthigululwakalo ngoka tagu monika koyendji gu li mondjila? Nenge okwa li ta ka landula shoka ti ilongo mOmbiimbeli nokwiitula muudhigu wopashimaliwa nosho wo wokuulwa nayi kaantu yamwe? Andola ongoye wa li monkalo ndjono ando owa ningi ngiini?

8 Omukulukadhi ngoka omugundjuka a gwililwa po noku uvite ta thiminikwa, okwa li a galikana kuJehova nomutima aguhe, opo e mu wilike. Sho a popi naangoka ha konakona naye Ombiimbeli nosho wo nayalwe megongalo kombinga yonkalo ndjoka, okwa li a tameke okuuva ko nkene Jehova e shi tala ko. Okwa dhiladhila wo kunkene hashi ehameke pamadhiladhilo aanona mboka inaaya putukila paavali yawo pethimbo lyoomvula dhokukoka kwawo. Konima sho e shi konakona pamwe nOmanyolo, okwa li a thiki pehulithodhiladhilo kutya kashi li mondjila okutumina okamwana kooyinakulu.  Omusamane gwe okwa li a mono nkene aakwanegongalo yi imanga uukuni kumwe ye mu kwathele nankene okanona ka li taka koko ke na uukolele noka nyanyukwa. Okwa li a taamba ko ekonakonombiimbeli nokwa tameke okuya kokugongala pamwe nomukulukadhi gwe.

9, 10. Okulongitha oondunge otaku ti shike, nongiini tatu vulu oku shi ninga?

9 Shoka oshiholelwa shimwe owala, ihe otashi ulike kutya okulongitha oondunge itashi ti kutya otu na okulandula owala shoka tse nenge yalwe taya dhiladhila nenge yu uvite kutya osho shi li mondjila nenge tashi eta uuwanawa. Omadhiladhilo getu inaaga gwanenena nosho wo omitima dhetu otayi vulu okufaathanithwa nowili ndjoka tayi endelele nayi nenge tayi ende kashona nayi. Ngele otwa wilikwa kuyo otayi ke tu etela uudhigu wa kwata miiti. (Jer. 17:9) Otwa pumbwa okulundulula omadhiladhilo nomitima dhetu shi ikolelela komithikampango dhaKalunga. — Lesha Jesaya 55:8, 9.

10 Netompelo ewanawa, Ombiimbeli otayi tu kumagidha tayi ti: “Inekela OMUWA nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” (Omayel. 3:5, 6) Ndhindhilika uutumbulilo mbuka ‘ino igameka koondunge dhoye mwene.’ Owa landulwa kwaambuka tawu ti kutya, ‘Jehova mu mu tseya.’ Jehova oye awike omunandunge shili. Onkee ano, uuna tu na okuninga etokolo otwa pumbwa okuya mOmbiimbeli, opo tu mone nkene Kalunga a tala ko oshinima shoka. Opo nduno otatu vulu okutokola shi ikolelela kunkene Kalunga e shi tala ko. Kungawo otatu longitha oondunge, ano tatu holele omadhiladhilo gaJehova.

DHEULA OONDUNGE DHOYE DHOKUNONGELA

11. Oshike tashi ke tu kwathela tu ninge omatokolo gopandunge?

11 Okwiilonga okuninga omatokolo gopandunge noku ga tula miilonga ka shi shi oshipu. Shika otashi vulika shi kale unene oshidhigu kwaamboka aape moshili nenge mboka taya tameke okuninga ehumokomeho pambepo. Ihe mboka ye li natango aanona pambepo ngaashi Ombiimbeli tayi shi popi, otaya vulu okuhuma komeho lela. Dhiladhila owala kokanona nkene haki ilongo okweenda itaa ki ihata po. Opo ka tseye okweenda nawa ohaka katuka kashona nakashona ta ke shi ningi lwiikando. Shoka osha faathana naamboka ye li natango aanona pambepo uuna tashi ya pokuninga omatokolo gopandunge. Dhimbulukwa kutya omuyapostoli Paulus  okwa ti kutya mboka ya koka pambepo ‘[oondunge dhawo dhokunongela odha dheulwa moku dhi longitha, NW] okuyoolola uuwanawa nuuwinayi.’ Uutumbulilo ngaashi ‘moku dhi longitha’ nosho wo ‘dha dheulwa’ otawu ulike koonkambadhala tadhi tsikile noku dhi endulula, naashoka osho mboka opo ye ya moshili ya pumbwa okuninga. — Lesha Aahebeli 5:13, 14.

Uuna tatu ningi omahogololo ge li mondjila miinima yesiku kehe, otatu dheula oondunge dhetu dhokunongela (Tala okatendo 11)

12. Ongiini tatu vulu okwiilonga okuninga omatokolo gopandunge?

12 Ngaashi sha popiwa petameko, esiku kehe otu na okuninga omatokolo ogendji, omanene nomashona. Ekonakono limwe olye shi ulike kutya, oonkatu ndhoka hatu katuka dhi vulithe poopelesenda 40 ihatu dhi dhiladhila nuukeka, ihe ohatu dhi katuka owala meendelelo ngaashi twi igilila. Pashiholelwa, ongula kehe otashi vulika wu na okuhogolola kutya oshike to zala. Otashi vulika wu kale we shi tala ko shi li oshinima oshishona, noho ningi etokolo lyoye inoo ipula niinima oyindji, unene tuu ngele owe endelela. Ihe osha simana wu dhiladhile kwaashoka to zala ngele otashi ku opalele ngaa wu li omupiya gwaJehova. (2 Kor. 6:3, 4) Uuna to landa oonguwo, otashi vulika wu dhiladhile kombinga yomuhingo gwoshinanena gwadho, ihe mbela ongiini kombinga yondando yadho nosho wo ngele otadhi opalele? Okuninga omahogololo gomondjila miinima mbika otashi ke tu kwathela tu dheule oondunge dhetu dhokudhiladhila, shoka tashi ke tu kwathela tu ninge omatokolo gomondjila miinima mbyoka ya kwata miiti. — Luk. 16:10; 1 Kor. 10:31.

KOKEKA EHALO LYOKUNINGA SHOKA SHI LI MONDJILA

13. Oshike sha pumbiwa opo tu shilipaleke kutya otwa landula shoka twa tokola tu ninge?

13 Atuheni otu shi shi kutya okuninga omatokolo ge li mondjila osho oshinima shimwe shi ili, ihe oku ga dhiginina noku ga tula miilonga oshinima shimwe ishewe. Pashiholelwa, yamwe mboka ya hala okweetha po okuhila omakaya ohaya nyengwa molwaashoka kaye na lela omukumo. Shoka sha pumbiwa okukala twa tokola toko okulonga nuudhiginini mwaashoka twa tokola. Oshike nduno tashi ke tu kwathela tu kokeke nenge tu kale twa tokolatoko momitima dhetu tu dhiginine nokuninga shoka twa tokola tu ninge? Okupula ekwatho kuJehova otaku ke tu kwathela. — Lesha Aafilippi 2:13.

14. Omolwashike Paulus a li e na oonkondo dhokuninga shoka a li e shi kutya osho e na okuninga?

14 Paulus okwa li e shi imonene ko paumwene. Oshikando shimwe okwa li a popi a nika oluhodhi a ti: “Nonando mungame omu na ehalo okulonga uuwanawa, itandi shi vulu.” Okwa li e shi shoka a hala okuninga nenge shoka e na okuninga, ihe omathimbo gamwe opwa li oshinima shimwe shoka sha li she mu imbi kee shi ninge. Okwe shi koleke a ti: “Meni lyandje onda hokwa ompango yaKalunga. Ihe ondi wete ompango onkwawo yi li molutu lwandje tayi kondjitha ndjoka ya ziminwa komadhiladhilo gandje. Oyo oya kwata ndje, ndi kale omupika gwompango yuulunde yi li molutu lwandje.” Mbela okwa li ngaa e na etegameno lyasha? Eeno, okwa li e li na. Okwa ti: “Kalunga na hambelelwe omolwaJesus Kristus, Omuwa gwetu!” (Rom. 7:18, 22-25) Palwe ishewe, okwa li a nyola a ti: “Ngame otandi vulu shaa shoka, oshoka Kristus ota koleke ndje.” — Fil. 4:13.

15. Okuninga omatokolo gaashoka shi li mondjila nokukala twa tokola toko okushilonga nenge okwaaha shi ninga ohaku vulu okuguma ngiini mboka ya kwatelwa mo?

15 Osha yela kutya, opo tu nyanyudhe Kalunga, otwa pumbwa okuninga omatokolo gaashoka shi li mondjila nokukala twa tokola toko okushilonga. Dhimbulukwa oohapu ndhoka Elia a li a lombwele aalongeli yaBaal nosho wo Aaisraeli aashunimonima pondundu Karmel sho a ti: “Sigo uunake tamu tengukile koombinga noombinga? OMUWA ngele oye Kalunga, mu longeleni, ihe Baal ngele oye Kalunga mu longeleni!” (1 Aak. 18:21) Aaisraeli oya li ye shi kutya oye na okuninga shike, ihe oya li taya ‘tenguka’ mokuninga omatokolo. Mepingathano naashono, nale omimvo dha ka pita, Josua okwa li a tula po oshiholelwa oshiwanawa sho a lombwele Aaisraeli a ti: “Ngele ina mu hala [okulongela] OMUWA, tokoleni  nena ndjika ngoka tamu longele . . . Ihe ngame negumbo lyandje, tse otatu longele OMUWA.” (Jos. 24:15) Oshizemo osha li shini sho a li a tokola toko okuninga ngaaka? Josua nosho wo mboka ya kala aadhiginini pamwe naye oya li ya yambekwa nokuya mEvi lyEuvaneko, “evi ndyoka eyamba noli na omalunza.” — Jos. 5:6.

NINGA OMATOKOLO GOPANDUNGE E TO YAMBEKWA

16, 17. Gandja oshiholelwa shankene hatu mono uuwanawa mokuninga omatokolo ngoka ge li metsokumwe nehalo lyaKalunga.

16 Natu tale koshiholelwa shimwe shokunena. Omumwatate gumwe a hokana, opo a ninginithwa, ye nomukulukadhi gwe oye na aanona yatatu. Esiku limwe omuniilonga pamwe naye okwa li e ya po nedhiladhilo kutya ye naye ya ka longele mofeema yilwe ndjoka hayi futu nawa noyi na omauwanawa ogendji. Omumwatate okwa li a dhiladhila nokugalikana kombinga yasho. Okwa li a hogolola iilonga mbyoka a li ta longo pethimbo ndyoka, mbyoka kaaya li naanaa hayi futu nawa, opo a kale itaa longo momahuliloshiwike, a vule okukala ha kala pokugongala kehe nokuya muukalele womomapya naanegumbo lye. Okwa li a tedhatedha kuushili mboka kutya ita ka kala e na we elandulathano ndyoka ngele okwa tameke iilonga mbyoka iipe. Andola ongoye ando owa ningi po shike?

17 Omumwatate sho a yelekanitha uuwanawa wopambepo mboka ta ka mona niimaliwa oyindji mbyoka a li ta ka mona, iilonga mbyoka ine yi taamba ko. Mbela oto dhiladhila kutya okwa li i ipe ombedhi omolwetokolo ndyoka? Aawe nando. Okwa li u uvite kutya omayambeko gopambepo ngoka ta ka mona omawanawa noonkondo kuye nosho wo kaanegumbo lye shi vulithe oshimaliwa oshindji shoka a li ta ka mona. Ye nomukulukadhi gwe oya li ya nyanyukwa noonkondo sho okamwanakadhona kawo kokasheeli, koomvula omulongo, ke ya lombwele kutya oke hole aavali yako, aamwatate naamwameme, noke hole Jehova noonkondo. Oka li ka ti kutya oka hala ki iyapulile Jehova e taka ninginithwa. Ka kali tuu ka pandula noonkondo oshiholelwa oshiwanawa shahe shokupititha komeho okulongela Jehova monkalamwenyo ye!

Ninga omatokolo gopandunge e to mono enyanyu mokati koshigwana shaKalunga (Tala okatendo 18)

18. Omolwashike sha simana okuninga omatokolo gopaumwene gopandunge esiku kehe?

18 Moses Omunene, Jesus Kristus, okwa kala ta wilike aalongelikalunga yashili yaJehova mombuga yaSatana yuuyuni mbuka uule woomvula omilongo odhindji. E li Josua omunene, ngashingeyi Jesus oku li pokuhulitha po onkalelo ndjika ya kolokosha nokufala aalanduli ye muuyuni uupe moka tamu ka kala uuyuuki. (2 Pet. 3:13) Onkee ano, ndika halyo we ethimbo lyokushuna kokudhiladhila kwetu kwonale, komikalo dhetu dhonale, komithikampango nokomalalakano getu gonale. Ngashingeyi olyo ethimbo lyokumona lela kutya Kalunga okwa hala tu kale tu li ngiini. (Rom. 12:2; 2 Kor. 13:5) Omatokolo nomahogololo ngoka ho ningi esiku kehe naga ulike kutya ngoye omuntu ngoka a gwana okuyambekwa kuKalunga sigo aluhe. — Lesha Aahebeli 10:38, 39.

^ okat. 7 Etompelo limwe kutya omolwashike oshinima shoka hashi ningwa olyo kutya, opo aakulupe ya vule okwiinomena uutekulu wawo kookuume nokaakwanezimo.