Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Septemba 2013

Kala ho nyanyukilwa omalombwelo gaJehova

Kala ho nyanyukilwa omalombwelo gaJehova

‘Iipango yoye [“omalombwelo goye,” NW] ogo uuthiga wandje sigo aluhe.’ — EPS. 119:111.

1. (a) Aantu ohayi inyenge momikalo dha tya ngiini uuna ya pewa omalombwelo, nomolwashike? (b) Uuntsa ota wu vulu okuningitha omuntu a tale ko ngiini omayele?

AANTU ohayi inyenge momikalo dha yoolokathana uuna ya pewa omalombwelo. Ohashi vulika elombwelo ndyoka tali gandjwa kwaangoka e na oonkondopangelo li taambiwe ko nawa, omanga omayele taga zi kumakula nenge kwaangoka e li pevi ga tindwe thiluthilu. Aantu ohayi inyenge ya yoolokathana noonkondo pamaiyuvo uuna ya pukululwa nuuna ya pewa uutekuvuliko. Aantu yamwe ohashi vulika ya nike oluhodhi, ya yemate nenge ya se ohoni, ihe yalwe otashi vulika shi ya inyengithe noku ya ningitha ya kale ye na omukumo nokukala ya hala okulonga uuwanawa. Omolwashike hayi inyenge momikalo dha yoolokathana? Etompelo limwe, omolwuuntsa. Ombepo yuuntsa otayi vulu okuningitha omuntu a kale e na etaloko ewinayi, ndyoka tali mu ningitha a tinde omayele e ta kala inaa mona uuwanawa mepukululo ndyoka a li ta pewa. — Omayel. 16:18.

2. Omolwashike Aakriste yashili haya kala ya pandula omayele ngoka haga zi mOohapu dhaKalunga?

2 Mepingathano naashono, Aakriste yashili ohaya pandula omayele omawanawa, unene tuu uuna ga kankamena kOohapu dhaKalunga. Omalombwelo gaJehova ohage tu pe uuyelele wu na ongushu, ohage tu longo noku tu kwathela opo tu yande okugwila moomwigo ngaashi momwigo gwokuhola omaliko, gwoluhondelo nogwokulongitha iingangamithi nenge gwokulongitha nayi iikolitha. (Omayel. 20:1; 2 Kor. 7:1; 1 Tes. 4:3-5; 1 Tim. 6:6-11) Ishewe, otu na “enyanyu lyokomwenyo” molwaashoka ohatu vulika komalombwelo gaKalunga. — Jes. 65:14, OB-1954.

3. Otashi ka kala shi li nawa tu holele iikala yomupisalomi yini?

3 Opo tu kaleke po ekwatathano lyetu naTate gwetu gwomegulu, otu na okutsikila okutula miilonga omayele gaJehova gopandunge monkalamwenyo yetu. Itashi ka kala tuu shi li nawa  iikala yetu yi kale ya fa mbyoka yomupisalomi ngoka a nyola a ti: “Iipango yoye oyo [nenge “omalombwelo goye ogo,” NW] uuthiga wandje sigo aluhe, oyo enyanyu momutima gwandje”! (Eps. 119:111) Mbela natse ohatu nyanyukilwa ngaa iipango yaJehova, nenge ohatu kala twe yi tala ko yi li omutengi omathimbo gamwe? Nonando ohashi vulika omathimbo gamwe tu kale twa fa tatu ningilwa nayi komayele gamwe ngoka hatu pewa, katu na okukala twa tula omitse komapepe. Otatu vulu okukokeka einekelo lyetu muunongo waKalunga mboka wa shiga ko. Natu ka kundathaneni omikalo dhi li ndatu nkene tatu vulu oku shi ninga.

KOKEKA EINEKELO LYOYE OKUPITILA MEGALIKANO

4. Oshinima shimwe shini shoka David a kala aluhe e na monkalamwenyo?

4 Omukwaniilwa David okwa li a mono omaupyakadhi ogendji monkalamwenyo ye nokwa li wo a nyanyukilwa onkalamwenyo ye, ihe okwa kala aluhe i inekela mOmushiti gwe. Okwa ti: “Otandi ku indile, OMUWA; Kalunga kandje, onde ku inekela.” (Eps. 25:1, 2) Oshike sha li sha kwathele David a kale e na einekelo lya tya ngaaka muTate gwe gwomegulu?

5, 6. Oohapu dhaKalunga otadhi tu lombwele shike kombinga yekwatathano ndyoka lya li pokati kaDavid naJehova?

5 Aantu oyendji ohaya galikana owala kuKalunga uuna ye na uupyakadhi. Ongiini ngele kuume koye nenge omupambele oha kala owala e ku shi uuna a pumbwa oshimaliwa nenge ekwatho lyontumba? Otashi vulika wu ka kale wa limbililwa kutya oku ku hole ngaa nenge oha kala owala e ku shi uuna e na ompumbwe. Ihe, David ka li ngaaka. Ekwatathano lye naJehova olya li lyu ulike kutya oku na eitaalo muye nolyu ulike ohole yokuhola Kalunga monkalamwenyo ye, momathimbo omadhigu nomawanawa. — Eps. 40:8.

6 Tala kunkene David a li a popi ta tanga Jehova noku mu pandula: “OMUWA, OMUWA gwetu, edhina lyoye olya simana ngiini muuyuni auhe! Oto hambelelwa sigo okombanda yomagulu.” (Eps. 8:1) Mbela ku wete kutya pokati kaDavid naHe yomegulu kwa li to tile po omeya? Molwaashoka David okwa li a pandula uuwanawalela noshinge shaJehova Kalunga, oshinima shoka osha li she mu inyengitha e mu tange “esiku alihe.” — Eps. 35:28.

7. Uuwanawa wuni hatu mono uuna tatu hedha popepi naKalunga okupitila megalikano?

7 Ngaashi David, otwa pumbwa okukala hatu popi naJehova pandjigilile opo tu kale tu na einekelo lya kola muye. Ombiimbeli otayi ti: “Hedheni kuKalunga, oye nota hedha kune.” (Jak. 4:8) Okuhedha popepi naKalunga okupitila megalikano oku li wo omukalo gumwe gwa simana moka hatu mono ombepo ondjapuki. — Lesha 1 Johannes 3:22.

8. Omolwashike tu na okuhenuka okugalikana tatu iyendulula?

8 Uuna to galikana, mbela owu na omukalo gwokweendulula iintokotumbulo yontumba nenge uutumbulilo wa faathana omathimbo nomathimbo? Ngele osho, manga inoo galikana, longitha ominute dhontumba wu dhiladhile kombinga yaashoka wa hala okupopya. Ngele otwa kala tatu popi nakuume nenge nomupambele ihe otatu endulula owala shi twe mu lombwelele nale, mbela ote ke shi nyanyukilwa ngaa? Otashi vulika a tameke okukala inaa hala we okupulakena. Dhoshili, Jehova ke na esiku a tinde omagalikano ngoka taga zi komitima dhaapiya ye aadhiginini. Ihe otashi ka kala pandunge tu henuke okukala tatu endulula shoka twa popile nale uuna tatu popi naye.

9, 10. (a) Oshike tatu vulu okukwatela mo momagalikano getu? (b) Oshike tashi vulu oku tu kwathela tu galikane omagalikano taga zi komutima?

9 Osha yela kutya ngele otwa hala okuhedha popepi naKalunga, omagalikano getu oge na okuza komitima. Shi thike ngaa pokumbumbulila Jehova omitima dhetu, opo ngaa tapu ka kala pu thike okuhedha kwetu popepi naye na opo ngaa tapu ka kala pu thike okukala twe mu inekela. Oshike nduno tu na okukwatela momagalikano getu? Oohapu dhaKalunga otadhi yamukula tadhi ti: “Oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo.” (Fil. 4:6) Uushili owo kutya, kehe shimwe shoka tashi gumu ekwatathano lyetu naKalunga nenge onkalamwenyo yetu tu li aapiya  ye osha pumbwa okukwatelwa momagalikano getu.

10 Oshi li ekwatho uuna tatu tala koohapu dhomagalikano gaalumentu naakiintu aadhiginini ngoka ga nyolwa mOmbiimbeli. (1 Sam. 1:10, 11; Iil. 4:24-31) Omapisalomi oge na omagalikano ogendji taga zi komutima nomaimbilo gokutanga Jehova. Omaiyuvo gomuntu kehe guuwehame wokomwenyo nosho wo genyanyu oga hololwa momagalikano nomomaimbilo ngaka. Okusimonona omautumbulilo ngoka ga li ga longithwa kwaamboka aadhiginini otaku vulu oku tu kwathela tu kale hatu galikana kuJehova omagalikano taga ti sha.

KALA HO TEDHATEDHA KOMALOMBWELO GAKALUNGA

11. Omolwashike twa pumbwa okutedhatedha komakumagidho gaKalunga?

11 David okwa ti: “Omalombwelo gOMUWA oge shi kwiinekelwa, taga gandja uunongo kumboka taa u pumbwa.” (Eps. 19:7) Eeno, nokuli nando katu na ontseyo, otatu vulu okuninga aanandunge mokuvulika kiipango yaKalunga. Omakumagidho gopamanyolo gamwe, otaga pumbwa okutedhatedhwa opo tu mone mo uuwanawa mugo thiluthilu. Shoka otashi vulu okupopiwa shi na ko nasha nokukakatela uudhiginini wetu uuna tatu thiminikwa kosikola nenge kiilonga, okudhiginina omuthikampango gwaKalunga gu na ko nasha nombinzi, okukala itaatu kutha ombinga miinima yopapolotika, nokutula miilonga omakotampango gOmbiimbeli ge na ko nasha nokuzala nokwiiyopaleka. Okutala kutya Kalunga okwa tala ko ngiini iinima mbyoka otaku ke tu kwathela tu kale tu shi kutya otapu ka holoka uupyakadhi. Opo nduno otatu vulu okutokola momitima dhetu kutya otatu ka ninga po shike uuna uupyakadhi wa holoka. Okudhiladhila kwa tya ngaaka komeho yethimbo nokukala twi ilongekidha otaku vulu oku tu kwathela tu yande iizemo yiyemateka. — Omayel. 15:28.

12. Omapulo geni tage ke tu kwathela tu dhiginine omalombwelo gaKalunga uuna twa dhiladhila kugo?

12 Manga twa tegelela shoka Kalunga e tu uvanekela shi gwanithwe, mbela okukalamwenyo kwetu otaku ulike ngaa kutya otwa tonata pambepo? Pashiholelwa, mbela otwi itaala ngaa shili kutya masiku Babiloni oshinene ota hanagulwa po? Mbela omalaleko nuuyamba gomonakuyiwa, ngaashi omwenyo gwaaluhe moparadisa kombanda yevi, oge li ngaa golela kutse kunena ngaashi sho twa li twe gi ilongo petameko? Mbela otwa kaleka po ngaa uulaadhi wetu muukalele pehala lyokweetha iinima yopaumwene oyo yi kale yotango monkalamwenyo yetu? Ongiini kombinga yetegameno lyeyumuko, yokuyapulithwa kwedhina lyaJehova, nosho wo yokuyukipalithwa kuunamapangelo we? Mbela iinima mbyoka oya simanenena ngaa natango kutse? Okutedhatedha komapulo ngoka otaku vulu oku tu kwathela tu ninge ngaashi omupisalomi a ti, dhiginina ‘iipango nenge omalombwelo gaKalunga, ga kale uuthiga woye sigo aluhe.’ — Eps. 119:111, yelekanitha NW.

13. Omolwashike Aakriste yopethimbo lyaayapostoli ya li kaayu uvite ko iinima yimwe? Gandja oshiholelwa.

13 Iinima yimwe mbyoka ya tumbulwa mOmbiimbeli otashi vulika yi kale inaayi uviwa ko nawa ngashingeyi molwaashoka ka li shi natango ethimbo lyaJehova lyoku yi yelitha. Jesus okwa li a lombwele aayapostoli ye lwiikando niikando kutya osha li tashi ka pumbiwa a mone iihuna ye a dhipagwe. (Lesha Mateus 12:40; 16:21.) Ihe aayapostoli kaya li yu uvite ko kutya okwa hala okutya shike. Oya li yu uvu ko konima yokusa kwe neyumuko lye sho a li a zala olutu lwopantu, i ihololele aalongwa ye yontumba, ‘nokwa patulula omadhiladhilo gawo, yu uve ko Omanyolo.’ (Luk. 24:44-46; Iil. 1:3) Sha faathana, sigo oosho ombepo ondjapuki ye ya tililwa poPentekoste 33 E.N., aalanduli yaKristus kaya li yu uvite ko kutya Uukwaniilwa waKalunga owa li tawu ka dhikwa po megulu. — Iil. 1:6-8.

14. Petameko lyethelemumvo 20, aamwatate oyendji oya li ya tula po oshiholelwa shini oshiwanawa nonando oya li ye na euvoko lya puka kombinga yomasiku gahugunina?

14 Momukalo gwa faathana, petameko lyomumvo 1900 nasha, Aakriste yashili oya li ye na omataloko gontumba ga puka kombinga ‘yomasiku gahugunina.’ (2 Tim. 3:1, NW) Pashiholelwa, momumvo 1914, yamwe oya li taya dhiladhila kutya  oya li ye li pokufalwa megulu. Sho shoka ya li ya tegamena inaashi gwanithwa nziya, okukonakonununa Omanyolo okwa li kwe ya ningitha ya mone kutya opu na oshikonga oshinene shokuuvitha she ya tegelela. (Mark. 13:10) Onkee ano, mo 1922 J.  F. Rutherford, ngoka a li ta kwatele komeho miilonga yokuuvitha, okwa lombwele mboka ya li poshigongi shopaigwana shoka sha li poCedar Point, Ohio, muAmerika, a ti: “Taleni, Omukwaniilwa ota pangele! Ne aakalelipo ye yoku shi tseyitha. Ano uvitheni, uvitheni, uvitheni Omukwaniilwa nuukwaniilwa we.” Okuza kesiku ndyoka, okuuvitha “onkundana ombwanawa yuukwaniilwa” okwa kala ku li endhindhiliko lyaapiya yaJehova yokunena. — Mat. 4:23; 24:14NW.

15. Ohatu mono ngiini uuwanawa mokutedhatedha komukalo ngoka Kalunga a li u ungaunga noshigwana she?

15 Mokutedhatedha komukalo omukumithi ngoka Jehova a li u ungaunga noshigwana she monakuziwa nosho wo kunena, otatu mono einekelo mokuvula kwe okugwanitha po ehalo lye nosho wo elalakano lye monakuyiwa. Pethimbo opo tuu mpoka, omalombwelo gaKalunga ohage tu kwathele tu kaleke aluhe momadhiladhilo nomomitima dhetu omahunganeko ge ngoka ga tegelela okugwanithwa. Otatu vulu okukala nuushili kutya okuninga ngaaka otaku ke tu kwathela tu kale tu na einekelo momauvaneko ge.

KOLEKA EINEKELO LYOYE OKUPITILA MIILONGA YOMELONGELOKALUNGA

16. Omalaleko nuuyamba geni haga zi mokukala twi ipyakidhila muukalele?

16 Kalunga ketu, Jehova, oku na oonkondo kaaku na we, e li Kalunga ihaa kwatakwata. Omupisalomi okwa tile: ‘OMUWA kaku na omunankondo e ku fa.’ Okwa li a gwedha ko a ti: “Oshikaha shoye osha yeluka shi na oonkondo!” (Eps. 89:8, 13) Molwaashoka osho e li ngaaka aluhe, Jehova oku na olupandu noha laleke nuuyamba oonkambadhala ndhoka hatu ningi mokuhumitha komeho iinima yUukwaniilwa. Oha mono kutya aapiya ye, kutya nduno aalumentu nenge aakiintu, aagundjuka nenge aakokele, ihaya kala owala ya kuutumba  yo taya li “oshikwiila shonyalo.” (Omayel. 31:27) Mokuholela Omushiti gwetu, ohatu kala twi ipyakidhila niilonga yetu yokulongela Kalunga. Okulongela Kalunga nomutima aguhe ohaku tu etele uuwanawa paumwene nohaku ningitha Jehova a yambeke uukalele wetu. — Lesha Episalomi 62:12.

17, 18. Omolwashike tatu vulu okutya iilonga yeitaalo ohayi tu kwathele tu kale tu na einekelo momayele gaJehova? Gandja oshiholelwa.

17 Omomukalo guni iilonga yeitaalo hayi tu kwathele tu kale tu na einekelo muJehova? Tala kehokololo lyopamanyolo lyokuya kwAaisraeli mEvi lyEuvaneko. Jehova okwa li a lombwele aasaseri mboka ya humbata oshikethahangano ya maatshinge yu uka momulonga gwaJordan. Ihe, sho aantu ya thiki po, oya li ya mono kutya omvula yontemuna oyu udhitha omulonga sigo tagu kunguluka. Aaisraeli oya li taya ka ninga po shike? Mbela oya li taya ka yunga ontanda komunkulo gwomulonga ya tegelele iiwike nenge ethimbo ele opo omeya gefundja ga lotele? Aawe, oya li yi inekele thiluthilu muJehova e taya landula ewiliko lye. Oshizemo osha li shini? Ehokololo otali ti: ‘Nziya sho aayambi ya lyata omeya, omeya oga mwena okumatuka, naayambi oya li ya thikama puukukutu pokati komulonga popepi naJeriko, sigo oshigwana ashihe sha piti.’ (Jos. 3:12-17, Contemporary English Version) Dhiladhila owala nkene sha li she ya tsu omukumo okumona omeya ngoka ge na oonkondo ga lotela! Uushili owo kutya, eitaalo lyAaisraeli muJehova olya li lya nkondopalekwa molwaashoka oya li yi inekela momalombwelo ge.

Mbela oto ka kala ngaa wu na einekelo lya fa ndyoka lyoshigwana shaJehova shopethimbo lyaJosua? (Tala okatendo 17, 18)

18 Odhoshili kutya Jehova iha longo iikumithalonga ya tya ngaaka omolwoshigwana she kunena, ihe oha laleke nuuyamba iilonga yasho yeitaalo. Ombepo ondjapuki yaKalunga ohayi shi kumike shi gwanithe po oshilonga shoka she shi inekelelwa shokuuvitha etumwalaka lyUukwaniilwa muuyuni awuhe. NOnzapo yaJehova ya simanenena, Kristus Jesus ngoka a li a yumudhwa, okwa li a shilipaleke aalongwa ye kutya okwa li te ke ya kwathela moshilonga shika sha simana a ti: “Indeni ano, ka ningeni aantu ayehe aalongwa yandje, . . . otandi kala pamwe nane omasiku agehe sigo ehulilo lyuuyuni.” (Mat. 28:19, 20) Oonzapo odhindji ndhoka tashi vulika dha li hadhi kala dhi na ohoni nenge uumbanda otadhi vulu okupopya dho dhene kutya ombepo ondjapuki yaKalunga oye dhi pa omukumo gwokupopya muukalele naantu kaadhi ya shi. — Lesha Episalomi 119:46; 2 Aakorinto 4:7.

19. Eshilipaleko lini tu na nonando otu na omangembeko?

19 Aamwatate naamwameme yamwe oya ngambekwa noonkondo omolwuuwehame nenge molwoomvula ndhoka dha hedha ko. Ihe nonando ongawo, otaya vulu okukala nuushili kutya “Tate omunahenda, Kalunga, ngoka kuye haku zi ekwatho alihe” oku uvite ko oonkalo dhOmukriste gwashili kehe. (2 Kor. 1:3) Oku na olupandu lwaashihe shoka hatu ningi tu humithe komeho iinima yUukwaniilwa. Atuheni otwa pumbwa okudhimbulukwa shoka sha simanenena kutya eitaalo lyetu mekuliloyambo lyaKristus olyo hali tu kaleke nomwenyo sho tatu ningi shoka oonkalo dhetu tadhi pitike. — Heb. 10:39.

20, 21. Omomikalo dhimwe dhini hatu ulike kutya otwi inekela muJehova?

20 Elongelokalunga lyetu olya kwatela mo okulongitha ethimbo lyetu, oonkondo dhetu nosho wo iiniwe yetu ngaashi tatu vulu. Eeno, otwa hala tu ‘longe oshilonga shomuuvithi gwelaka etoye’ nomitima dhetu adhihe. (2 Tim. 4:5) Uushili owo kutya, otwa nyanyukwa oku shi ninga, molwaashoka ohashi kwathele yalwe ya “tseye oshili.” (1 Tim. 2:4) Osha yela kutya, okusimaneka nokutanga Jehova ohaku tu yambapaleke pambepo. (Omayel. 10:22) Nohaku tu kwathele tu kale twi inekela thiluthilu Omushiti gwetu. — Rom. 8:35-39.

21 Ngaashi twe shi kundathana, okukala twi inekela Jehova e tu pe ewiliko lyopandunge ihaku ya po owala ngeyaka, ihe otwa pumba okulonga tu kale tu na einekelo ndyoka. Onkee ano, kala wi inekela Jehova okupitila megalikano. Tedhatedha kunkene Jehova a longa ehalo lye monakuziwa nokunkene te ke shi ninga monakuyiwa. Ngoye to tsikile okukoleka einekelo muJehova okupitila miilonga yomelongelokalunga. Eeno shili, omalombwelo gaJehova otaga kalelele. Nangoye oto vulu wo okukalelela.