Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2013

‘Olye omupiya omudhiginini nomunandunge?’

‘Olye omupiya omudhiginini nomunandunge?’

‘Olye ano omupiya omudhiginini nomunandunge ngoka, omuwa gwe e mu pe, a tonatele aalelwa ye?’— MAT. 24:45, yelekanitha NW.

1, 2. Jesus ote tu palutha okupitila muupitilo wuni kunena, nomolwashike sha simanenena tu kale tu shi kutya uupitilo mbuka olye?

“AAMWATATE, itandi vulu okutameka okuyalula iikando ayihe mbyoka nda mona iitopolwa mbyoka yi na uuyelele mboka nda li nda pumbwa noonkondo.” Osho omumwameme gumwe a li u ulike olupandu lwe ngaaka montumwafo ndjoka a li a nyolele aamwatate mboka haya longo koombelewa dhetu oonene muuyuni awuhe. Mbela nangoye osho ho kala wu uvite ngawo? Oyendji yomutse osho hatu kala tu uvite ngaaka. Mbela shoka oshi na oku tu kumitha? Hasho naanaa.

2 Iikulya yopambepo mbyoka hatu mono pethimbo oyi li euliko kutya Jesus, ngoka e li Omutse gwegongalo, ota gwanitha po euvaneko lye lyoku tu palutha. Ote shi ningi okupitila mulye? Sho Jesus a li ta gandja endhindhiliko lyokukala po kwe, okwa ti kutya okwa li ta ka longitha ‘omupiya omudhiginini nomunandunge’ (NW) a gandje “iikulya pethimbo lyayo” kaalelwa ye. * (Lesha Mateus 24:45-47.) Omupiya ngoka omudhiginini oku li uupitilo mboka Jesus ta longitha a paluthe aalanduli ye yashili pethimbo ndika lyehulilo. Osha simanenena tu kale tu shi kutya omupiya omudhiginini olye. Uupitilo mbuka owo tawu ke tu kwathela tu kale tu na uukolele wopambepo notu kale tu na ekwatathano naKalunga. — Mat. 4:4; Joh. 17:3.

3. Iileshomwa yetu oya li ya popi shike kombinga yeyele lyomupiya omudhiginini?

3 Otu na okuuva ko ngiini nduno eyele lyaJesus kombinga yomupiya omudhiginini? Monale, iileshomwa yetu oya li ya popi ngaashi tashi landula: POpentekoste 33 E.N., Jesus okwa li a langeke po omupiya omudhiginini a tonatele aalelwa ye. Omupiya otu ulike kAakriste ayehe aagwayekwa kombanda yevi ye li ongundu pethimbo kehe, okuza momumvo ngoka. Aalelwa otaya ulike kaagwayekwa oyo tuu mboka ye li oohandimwe. Mo 1919, Jesus okwa li a langeke po omupiya omudhiginini ‘a tonatele iinima ye ayihe,’ sha hala okutya, iinima ye ayihe yUukwaniilwa yokombanda yevi. Ihe okukonakona  nuukeka pamwe negalikano oku ulike kutya euvoko lyetu lyoohapu dhaJesus kombinga yomupiya omudhiginini nomunandunge olya pumbwa okuyelithwa. (Omayel. 4:18) Natu ka konakoneni eyele ndyoka nonkene lye tu kwatela mo, kashi na nduno mbudhi kutya otu na etegameno lyokuya megulu nenge olyokukala kombanda yevi.

EYELE OLYA LI LYA GWANITHWA UUNAKE?

4-6. Omolwashike tatu vulu okuthika pehulithodhiladhilo kutya eyele lyaJesus lyomupiya omudhiginini olya li lya tameke okugwanithwa owala konima yo 1914?

4 Oshikalimo sheyele lyomupiya omudhiginini nomunandunge otashi ulike kutya eyele ndyoka olya li lya tameke okugwanithwa pethimbo ndika lyehulilo, ihe kayi shi pOpentekoste 33 E.N. Natu ka taleni nkene Omanyolo tage tu kwathele tu thike pehulithodhiladhilo ndika.

5 Eyele lyomupiya omudhiginini oli li oshitopolwa shehunganeko lyaJesus kombinga ‘yendhindhiliko ndyoka tali holola, okukala po kwoye nolyehulilo lyuuyuni.’ (Mat. 24:3, yelekanitha NW.) Oshitopolwa shotango shehunganeko ndyoka li li muMateus 24:4-22, oshi na omagwanitho gopaali, lyotango omoomvula dhokuza po 33 E.N. sigo omo 70 E.N., netiyali omomukalo omundhindhilikwedhi pethimbo lyetu. Mbela shika osha hala okutya oohapu dhaJesus kombinga yomupiya omudhiginini odha li tadhi ka kala dhi na omagwanitho gopaali? Aawe.

6 Okutameka noohapu ndhoka dhi li muMateus 24:29, Jesus okwa li u ukitha eitulomo unene kiiningwanima mbyoka ya li tayi ka ningwa pethimbo lyetu. (Lesha Mateus 24:30, 42, 44.) Sho a li ta popi kombinga yaashoka tashi ka ningwa puudhigu uunene, okwa ti kutya aantu ‘otaya ka mona Omuna gwomuntu te ya te ende kiikogo yokegulu.’ Opo nduno, moohapu ndhoka dha li dha nuninwa mboka taya ka kala ye na omwenyo momasiku gahugunina, okwe ya ladhipike ya kale ya tonata, a ti: ‘Inamu tseya, esiku olini Omuwa gweni te ya,’ ye ‘Omuna gwomuntu ote ke ya pethimbo tuu ndyoka inaamu mu tegelela.’ * Moshikalimo shika, sho Jesus a popi kombinga yiiningwanima mbyoka ya li tayi ka ningwa momasiku gahugunina, okwa popi wo eyele lyomupiya omudhiginini. Onkee ano, otatu vulu okuthika pehulithodhiladhilo kutya oohapu dhe kombinga yomupiya ngoka omudhiginini odha li dha tameke okugwanithwa owala konima yaasho omasiku gahugunina ga tameke mo 1914. Oshi li lela pandunge okuthika pehulithodhiladhilo ndyoka. Omolwashike mbela?

7. Epulo lini lya simanenena lya li lya holoka po sho ethimbo lyeteyo lya tameke, nomolwashike?

7 Dhiladhila owala uule wokathimbo kombinga yepulo ndika: ‘Olye ano omupiya omudhiginini nomunandunge?’ Pethimbo lyAakriste yopetameko, kapwa li lela pu na etompelo lyokupula epulo ndyoka. Ngaashi twe shi mono moshitopolwa sha tetekele, aayapostoli oya li haya vulu okulonga iikumithalonga noya li nokuli haya vulu okugalikanena yalwe ya pewe ombepo ondjapuki shoka tashi ulike kutya oya li taya ambidhidhwa kuKalunga. (Iil. 5:12) Onkee ano, kapwa li pu na gumwe a li a pumbwa okupula kutya olye ano a langekwa po kuKristus a kwatele komeho. Ihe mo 1914, onkalo oya li ya yooloka noonkondo. Ethimbo lyeteyo olya li lya tameke momumvo ngoka. Ethimbo osho nduno lya li lya thikana opo omau ga yoololwe mo miilya. (Mat. 13:36-43) Sho ethimbo lyeteyo lya tameke, opwa li pwa holoka epulo lya simanenena: Sho nduno pu na Aakriste oyendji yiifundja mboka taya ti kutya yo aalanduli yaJesus yashili, ongiini nduno iilya, sha hala okutya, Aakriste aagwayekwa, ya li taya ka dhimbululwa mo? Eyele lyomupiya omudhiginini olya gandja eyamukulo. Aalanduli yaKristus aagwayekwa oyo ya li taya ka kala ya palulwa nawa pambepo.

OLYE OMUPIYA OMUDHIGININI NOMUNANDUNGE?

8. Omolwashike shi li pandunge sho omupiya omudhiginini a thikama po mAakriste aagwayekwa?

8 Omupiya omudhiginini oku na okukala a thikama po mAakriste aagwayekwa kombanda yevi. Aakriste mboka otayi ithanwa “aayambi yOmukwaniilwa” noya pewa elombwelo ya ‘hokolole iilonga yaKalunga iinene ngoka e ya ithana mo momilema, ye ye muuyelele we uukumithi.’ (1 Pet. 2:9) Oshi li pandunge okuthika pehulithodhiladhilo  kutya “aayambi yOmukwaniilwa” otaya kutha ombinga shu ukilila mokulonga oshili ooitaali ooyakwawo.— Mal. 2:7; Eh. 12:17.

9. Mbela aagwayekwa ayehe Aakriste kombanda yevi oya thikama po momupiya omudhiginini? Shi yelitha.

9 Mbela aagwayekwa ayehe kombanda yevi oya tunga po omupiya omudhiginini? Aawe. Uushili owo kutya haagwayekwa ayehe taya dhana onkandangala yokutopolela ooitaali ooyakwawo muuyuni awuhe iikulya yopambepo. Mokati kiilya omu na aamwatate aagwayekwa mboka tashi vulika ye li aayakuligongalo nenge aakuluntugongalo momagongalo gawo. Ohaya longo aantu egumbo negumbo nosho wo momagongalo gawo, nohaya ambidhidha nuudhiginini ewiliko ndyoka hali zi koombelewa oonene. Ihe ihaya kutha ombinga mokugandja iikulya yopambepo kaamwatate muuyuni awuhe. Mokati kaagwayekwa mboka omu na wo aamwameme aaifupipiki, mboka kaaye na nando esiku ya kambadhale okukala ya hala oshilonga shokulonga megongalo.— 1 Kor. 11:3; 14:34.

10. Olye omupiya omudhiginini nomunandunge?

10 Olye nduno omupiya omudhiginini nomunandunge? Mokutala komukalo ngoka Jesus a li a longitha a paluthe oyendji okupitila maantu aashona, omupiya ngoka okwa thikama po mokangundu okashona kaamwatate aagwayekwa mboka ya kwatelwa mo shu ukilila mokulongekidha nomokutopola iikulya yopambepo pethimbo lyokukala po kwaKristus. Momukokomoko gwomasiku gahugunina, aamwatate aagwayekwa mboka ya tunga po omupiya omudhiginini ohaya longo pamwe koombelewa oonene. Moomvula omilongo opo dha zi ko, omupiya ngoka okwa li a ndhindhilikwa mo kutya oye Olutuwiliki lwOonzapo dhaJehova. Ihe, ndhindhilika kutya oshitya “omupiya” shoka sha longithwa meyele lyaJesus oshi li paushimwe, tashi ulike kutya omupiya nguka oku na iilyo yi ili noyi ili tayi longo pamwe, ihe kaye shi oohandimwe. Kungawo, iilyo ayihe yOlutuwiliki ohayi ningi omatokolo pamwe.

AALELWA OOLYE?

11, 12. (a) Omupiya omudhiginini nomunandunge okwa li a langekwa po a longe iilonga yopaali yini? (b) Uunake Jesus a li a langeke po omupiya omudhiginini a tonatele aalelwa ye, nokwa li a hogolola oolye?

11 Oshi li oshindhindhilikwedhi kutya meyele lyaJesus, omupiya omudhiginini nomunandunge okwa langekwa po a longe iilonga yopaali ya yoolokathana. Shotango, okutonatela aalelwa; oshitiyali, okutonatela iinima yomuwa ayihe. Molwaashoka eyele ndyoka otali gwanithwa owala methimbo ndika lyehulilo, okulangekwa po akuhe okwa li taku ka tameka konima yokukala po kwaJesus e li omukwaniilwa hoka kwa li kwa tameke mo 1914.

 12 Uunake Jesus a li a langeke po omupiya omudhiginini a tonatele aalelwa ye? Opo tu yamukule epulo ndyoka, natu shuneni komumvo 1914, momumvo moka mwa li mwa tamekwa eteyo. Ngaashi twi ilongo metetekelo, pethimbo ndyoka oongundu odhindji odha li hadhi i ti Oonkriste. Omongundu yini Jesus a li ta ka hogolola nokulangeka po omupiya omudhiginini? Epulo ndyoka olya li lya yamukulwa konima sho ye naHe ya li ye ya okukonakona otempeli, nenge tu tye, omalongekidho gopambepo gelongelokalunga, okuza mo 1914 sigo olwopetameko lyomumvo 1919. * (Mal. 3:1) Oya li ya nyanyukwa sho ya adha ko okangundu kAakonakonimbiimbeli aadhiginini mboka ya li yu ulike kutya oye hole Jehova nosho wo Oohapu dhe. Eeno, oya li ya pumbwa okuyogolwa, ihe oya li ye ku taamba ko neifupipiko pethimbo efupi lyokumakelwa nolyokudhindwa. (Mal. 3:2-4) Aakonakonimbiimbeli mboka aadhiginini oya li Aakriste yashili mboka ye li iilya. Mo 1919, ethimbo lyokuyumuka po pambepo, Jesus okwa li a hogolola aamwatate aagwayekwa ya pyokoka pambepo mokati kAakonakonimbiimbeli ya kale omupiya omudhiginini nomunandunge nokwe ya langeke po ya tonatele aalelwa ye.

13. Oolye ya kwatelwa maalelwa, nomolwashike?

13 Oolye nduno aalelwa? Oku shi popya paunathangwa, oomboka taya paluthwa. Petameko lyomasiku gahugunina, aalelwa oya li aagwayekwa ayehe. Konima, aalelwa oya ka kala ya kwatela mo ongundu onene yoonzi dhilwe. Ngashingeyi oonzi dhilwe odho dhi li mo odhindji ‘moshigunda shimwe’ shoka shi li mewiliko lyaKristus. (Joh. 10:16) Oongundu adhihe mbali ohadhi mono uuwanawa miikulya yopambepo yi li pethimbo mbyoka tayi topolwa komupiya omudhiginini. Ongiini mbela kombinga yiilyo yOlutuwiliki mbyoka kunena ya tunga po omupiya omudhiginini nomunandunge? Aamwatate mboka oya pumbwa wo okupaluthwa pambepo. Onkee ano, ohaya dhimbulula neifupipiko kutya ye li oohandimwe oye li aalelwa ngaashi owala aalanduli yashili yaJesus ayehe.

Kutya nduno otu na etegameno lyokuya megulu nenge olyokukala kombanda yevi atuhe otu li aalelwa notwa pumbwa iikulya yopambepo ya faathana yi li pethimbo

14. (a) Omupiya omudhiginini okwa pewa oshinakugwanithwa shini, naashika osha kwatela mo shike? (b) Elondodho lini Jesus a li a pe omupiya omudhiginini nomunandunge? (Tala oshimpungu “Ihe omumati [“omupiya,” NW] ngoka ngele omwiinayi . . . ”)

14 Jesus okwa li a pe omupiya omudhiginini nomunandunge oshinakugwanithwa sha kwata miiti. Pethimbo lyOmbiimbeli, omupiya omwiinekelwa nenge tu tye omuyakuli oye a li ha tonatele egumbo lyamwene gwe. (Luk. 12:42) Sha faathana, omupiya omudhiginini nomunandunge okwa pewa oshinakugwanithwa shokutonatela egumbo lyeitaalo lyopathaneko. Oshinakugwanithwa shoka osha kwatela mo okutonatela iiniwe yopamaliko, iilonga yokuuvitha, iigongi iishona niinene nosho wo okunyanyangidhwa kwiileshomwa yopaMbiimbeli  yokulongithwa muukalele, yokukonakonwa paumwene nosho wo megongalo. Aalelwa oyi ikolelela kiikulya yopambepo ayihe mbyoka hayi gandjwa kolutu lwomupiya.

UUNAKE TA KA LANGEKWA PO A TONATELE IINIMA AYIHE YOMUWA?

15, 16. Uunake Jesus ta ka langeka po omupiya omudhiginini a tonatele iinima ye ayihe?

15 Uunake Jesus ta ka langeka po omupiya a longe oshilonga oshitiyali ‘shokutonatela iinima ye ayihe.’ Jesus okwa ti: “Omumati [“omupiya,” NW] omunelago oye ngoka, omuwa gwe ngele te ya, te mu adha ta ningi ngaaka. Ongame tandi mú lombwele: Omuwa gwe ote mu pe etonatelo lyiinima ye ayihe.” (Mat. 24:46, 47) Ndhindhilika kutya Jesus okwa langeke po omupiya a longe oshilonga oshitiyali konima sho e ya e ta mono kutya omupiya ngoka okwa kala ta “ningi ngaaka,” ano tu tye, ta gandja iikulya yopambepo nuudhiginini. Onkee ano, opwa li tapu ka pita ethimbo pokati kokulangekwa po kwotango naahoka okutiyali. Opo tu uve ko kutya ongiini nuunake Jesus ta ka langeka po omupiya a tonatele iinima ye ayihe, otwa pumbwa okutseya iinima iyali: uunake te ya nosho wo kutya iinima ye oya kwatela mo shike.

16 Jesus ote ya uunake? Eyamukulo otatu li mono moshikalimo. Dhimbulukwa kutya sho oovelise dha tetekele tadhi popi Jesus ‘te ya,’ uutumbulilo mboka otawu ulike kethimbo sho te ke ya pehulilo a pangule nokuhanagula po onkalelo ndjika. * (Mat. 24:30, 42, 44) Onkee ano, ‘okuya’ kwaJesus, nenge tu tye, ‘okugaluka’ kwe hoka kwa popiwa meyele lyomupiya omudhiginini otaku ka ningwa pethimbo lyuudhigu uunene.

17. Iinima yaJesus oya kwatela mo shike?

17 ‘Iinima yaJesus ayihe’ oya kwatela mo shike? Jesus ina longitha oshitya ‘ayihe’ tu ulike owala kiinima yokombanda yevi. Uushili owo kutya, Jesus oku na oonkondopangelo odhindji megulu. Okwa ti: “Ongame nda pewa epangelo alihe megulu nokombanda yevi.” (Mat. 28:18; Ef. 1:20-23) Iinima ye ngashingeyi oya kwatela mo Uukwaniilwa wopaMesiasa, mboka wa kala miikaha ye okuza  mo 1914 moka ta ka pangela pamwe naalanduli ye aagwayekwa. — Eh. 11:15.

18. Omolwashike Jesus ta ka kala a nyanyukwa okulangeka po omupiya a tonatele iinima ye ayihe?

18 Mokudhiladhila kwaashoka twa kundathana metetekelo, otatu vulu okuthika pehulithodhiladhilo lini? Sho Jesus te ke ya okuhanagula po uukolokoshi pethimbo lyuudhigu uunene, ota ka mona kutya omupiya omudhiginini okwa kala ta gandja nuudhiginini iikulya yopambepo pethimbo kaalelwa. Opo nduno Jesus ota ka kala a nyanyukwa oku mu langeka po olutiyali, ano a tonatele iinima ye ayihe. Mboka ya tunga po omupiya omudhiginini otaya ka langekwa po oshikando shika uuna ya pewa ondjambi yawo megulu, taya ningi aapangeli pamwe naKristus.

19. Mbela omupiya omudhiginini ota ka pewa ondjambi yi vule yaagwayekwa ooyakwawo megulu? Shi yelitha.

19 Mbela omupiya omudhiginini ota ka pewa ondjambi onene megulu yi vule yaagwayekwa ooyakwawo? Aawe. Ondjambi ndjoka yu uvanekelwa okangundu okashona, ohashi vulika yi ka pewe aantu ye vulithe po pwaamboka. Pashiholelwa, natu tale kwaashoka Jesus a li a lombwele aayapostoli ye aadhiginini 11 ongulohi manga inaa sa. (Lesha Lukas 22:28-30.) Jesus okwa li u uvanekele okangundu hoka kaalumentu kutya ondjambi ombwanawa omolwuudhiginini wawo oye ya tegelela. Oya li taya ka pangela pamwe naye muukwaniilwa we. Ihe konima yoomvula dhontumba, okwa li u ulike kutya ayehe 144 000 otaya ka kuutumba kiipangelapundi ya pangele pamwe naye. (Eh. 1:1; 3:21) Sha faathana, ngaashi sha popiwa muMateus 24:47, Jesus okwa li u uvaneke kutya okangundu hoka kaalumentu, sha hala okutya, aamwatate aagwayekwa mboka ya tunga po omupiya omudhiginini otaya ka langekwa po ya tonatele iinima ye ayihe. Muushili wo wene, ayehe 144 000 otaya ka pangela pamwe naye megulu.— Eh. 20:4, 6.

Aantu 144 000 ayehe otaya ka pangela megulu pamwe naJesus (Tala okatendo 19)

20. Omolwashike Jesus a li a langeke po omupiya omudhiginini, nowa tokola toko okuninga shike?

20 Okupitila momupiya omudhiginini nomunandunge, Jesus ota landula omukalo gwokupalutha gwa faathana ngaashi e shi ningile pethimbo lyAakriste yopetameko, ano ta palutha oyendji okupitila maantu aashona. Jesus okwa li a langeke po omupiya ngoka omudhiginini a shilipaleke kutya aalanduli ye yashili, kutya nduno, aagwayekwa nenge oonzi dhilwe, oya li taya ka kala ye na iikulya yopambepo ya gwana yi li pethimbo momukokomoko gwomasiku gahugunina. Natu kale twa tokola toko tu ulike olupandu lwetu mokukala tatu ambidhidha nuudhiginini aamwatate aagwayekwa mboka ya tunga po omupiya omudhiginini nomunandunge.— Heb. 13:7, 17.

 

^ okat. 2 Okatendo 2: Pompito yimwe, Jesus okwa li a popi eyele lya faathana moka a li a popi ‘omupiya’ e li “omuyakuli” nosho wo “aalelwa” ye li ‘olutu lwaayakuli ye.’ — Luk. 12:42-44 yelekanitha NW.

^ okat. 6 Okatendo 6: ‘Okuya’ kwaKristus (erkhomai mOshigreka) okwa yooloka ko ‘kokukala po kwe’ (parousia). Okukala po kwe kaaku wetike okwa tameke manga inee ya a hanagule po onkalelo ndjika.

^ okat. 12 Okatendo 12: Tala oshitopolwa ‘Otandi kala pamwe nane omasiku agehe,’ shi li moshifo shika, pepandja 10-12, okatendo 5-8.

^ okat. 16 Okatendo 16: Tala oshitopolwa ‘Tu lombwela, uunake ano tashi ka ningwa?’ shi li moshifo shika, pepandja 7-8, okatendo 14-18.