Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2013

Mbela owu na ngaa ‘uulaadhi wokulonga uuwanawa’?

Mbela owu na ngaa ‘uulaadhi wokulonga uuwanawa’?

‘Jesus Kristus okwi igandja meso omolwetu, opo e tu yelithe, tu ninge aantu ye mwene ye na uulaadhi wokulonga uuwanawa.’ — TIT. 2:13, 14, yelekanitha NW.

1, 2. Oonzapo dhaJehova odhi na uuthembahenda wi ikalekelwa wuni, nowu wu uvitile ngiini?

AANTU oyendji oye shi tala ko shi li esimano enene okupewa ondjambi omolwoshinima sha dhenga mbanda shoka ya pondola. Pashiholelwa, yamwe oya pewa ondjambi yi ikalekelwa sho ya katuka nuulaadhi ye ete ombili pokati kiigwana mbyoka itaayi longele kumwe. Ihe kashi shi tuu uuthembahenda okutumwa kuKalunga wu li omutumwa nenge omukalelipo wu kwathele aantu ya pange uukuume nOmushiti gwawo!

2 Tu li Oonzapo dhaJehova, otu na uuthembahenda mboka wi ikalekelwa. Mewiliko lyaKalunga naJesus, ohatu indile aantu ‘ya hanganithwe naKalunga.’ (2 Kor. 5:20) Jehova ote tu longitha tu nanene aantu kuye. Aantu omamiliyona ye li miilongo yi vulithe 235 oya kwathelwa momukalo gwa tya ngaaka ya kale ye na ekwatathano ewanawa naKalunga noya kale netegameno lyomwenyo gwaaluhe. (Tit. 2:11) Ohatu hiya nuulaadhi ‘kehe ngoka a hala a taambe omeya gomwenyo omagano.’ (Eh. 22:17) Molwaashoka ohatu nyanyukilwa oshinakugwanithwa shika shi na ondilo nohatu shi longo nuudhiginini, osho opala okwiithanwa kutya tse oshigwana ‘shi na uulaadhi wokulonga uuwanawa.’ (Tit. 2:14, yelekanitha NW.) Ngashingeyi natu ka konakoneni nkene uulaadhi wetu wokulonga uuwanawa hawu tu kwathele tu nanene aantu kuJehova. Omukalo gumwe moka hatu shi ningi, omokupitila miilonga yetu yokuuvitha.

HOLELA UULAADHI WAJEHOVA NOWAJESUS

3. “Uulaadhi wOMUWA” otawu tu shilipaleke shike?

3 Okuulika kombinga yaashoka elelo lyOmwana gwaKalunga ta li ka ninga, Jesaja 9:7 ota ti: “Uulaadhi wOMUWA omunankondoawike otau shi ningi.” Oohapu ndhoka otadhi tsu omuthindo kutya Tate yetu gwomegulu okwa halelela okuhupitha aantu. Oshiholelwa shaJehova shuulaadhi otashi ulike kutya iilonga yetu mbyoka e tu pa tu li aauvithi yUukwaniilwa  otayi pula tu yi longe nomutima aguhe, nehwamo nonuulaadhi. Okukala twa halelela okukwathela aantu ya tseye Kalunga otatu ulike uukwatya waJehova wuulaadhi. Tu li aalongi pamwe naKalunga, mbela otwa tokola toko ngaa paumwene tu kale hatu kutha ombinga pakuudha miilonga yokutaandelitha onkundana ombwanawa shi ikolelela koonkalo dhetu? — 1 Kor. 3:9.

4. Jesus okwa li e tu tulile po ngiini oshiholelwa shokukala aluhe aalaadhi muukalele?

4 Natu tale wo kuulaadhi waJesus. Jesus okwe tu tulila po oshiholelwa oshiwanawa shokukala aalaadhi muukalele. Nonando okwa li a patanekwa noonkondo, okwa kala e na uulaadhi miilonga yokuuvitha sigo opehulilo lyonkalamwenyo ye kombanda yevi. (Joh. 18:36, 37) Sho ethimbo lyokuhepekwa nokusa kwe lya li tali hedha popepi, Jesus okwa li a longo a mana mo a kwathele yalwe ya tseye Jehova.

5. Ongiini Jesus a li a katuka metsokumwe neyele lye lyomukwiyu?

5 Pashiholelwa, pethimbo lyoshikufuthinge mo 32 E.N., Jesus okwa li a gandja eyele lyomulumentu ngoka a li e na omukwiyu moshitsembe sho shomiviinu ngoka gwa li inaagu ima uule woomvula ndatu. Sho a li a lombwelwa e gu ke po, omutonateli gwomiviinu okwa li a pula a pewe ethimbo e gu pe uuhoho. (Lesha Lukas 13:6-9.) Opwa li owala omwaalu omushona gwaantu mboka ya li ya ningi aalongwa yaJesus shoka sha li oshizemo shiilonga ye. Ihe ngaashi shu ulikwa meyele ndyoka lyomutonateli gwomiviinu, Jesus okwa li a longitha ethimbo ehupi ndyoka lya li lya hupa ko lyoomwedhi hamano lwaampono a longe a mana mo shi vulithe nale miilonga yokuuvitha muJudea nomuPerea. Sho kwa li ku na omasiku omashona a se, Jesus okwa li a lili aantu yomoshilongo shawo mboka ya li ‘yu uvu, ihe omitima dhawo odha li dha kukuta.’ — Mat. 13:15; Luk. 19:41.

6. Omolwashike tu na okuninga oonkambadhala tu longe twa mana mo muukalele?

6 Sho tu li popepyeelela nehulilo, mbela inashi simanenena tu ninge oonkambadhala twa mana mo tu uvithe? (Lesha Daniel 2:41-45.) Kashi shi tuu uuthembahenda uunene okukala tu li Oonzapo dhaJehova! Otse owala kombanda yevi hatu kwathele yalwe ya mone etegameno lyankene omaupyakadhi gaantu taga ka kandulwa po. Omathimbo opo ga zi ko, omunyoli gumwe gwoshifokundaneki okwa li a popi kombinga yepulo ndyoka ihaali vulu okuyamukulwa ndyoka kutya “Omolwashike iinima iiwinayi hayi ningilwa aantu aawanawa?” Oshi li oshinakugwanithwa shetu tu li Aakriste noshi li wo uuthembahenda okulombwela mboka ya hala okuuva omayamukulo ga za mOmbiimbeli gomapulo ga tya ngaaka. Otu na omatompelo ogendji tu ‘longe nuupenda’ nenge tu hwame mombepo sho tatu gwanitha po iilonga yetu yopakalunga. (Rom. 12:11) Kalunga ota ka yambeka iilonga yetu yokuuvitha nuulaadhi notatu vulu okukwathela yalwe ya tseye Jehova noya kale ye mu hole.

OMBEPO YEIYAMBO OHAYI SIMANEKITHA JEHOVA

7, 8. Ombepo yeiyambo ohayi simanekitha ngiini Jehova?

7 Ngaashi sha hololwa moshiholelwa shomuyapostoli Paulus, omathimbo gamwe ohatu longo muukalele nohashi vulika pu kale ‘kaape na ompito yokukotha nenge yokulya.’ (2 Kor. 6:5) Uutumbulilo mboka otawu ulike kombepo yeiyambo nohawu tu dhimbulukitha aakokolindjila mboka ya pititha komeho uukalele monkalamwenyo yawo nonando ohayi iyambidhidha yoyene pashimaliwa. Natu dhiladhileni wo kaatumwa aadhiginini mboka ‘yi igandja ongomayambo’ ya ka longe kiilongo yilwe. (Fil. 2:17, OB-1954) Ongiini kombinga yaakuluntugongalo mboka omathimbo gamwe ihaaya li nenge ihaaya kotha opo ya tonatele oonzi dhaJehova? Otu na wo aakokele naamboka kaaye na uukolele mboka haya ningi ngaashi taya vulu ya kale pokugongala kehe kwopaKriste nohaya kutha ombinga muukalele. Omitima dhetu ohadhi kala dhu udha olupandu uuna tatu dhiladhila kombinga yaapiya ayehe yaKalunga mboka ye na ombepo yeiyambo. Oonkambadhala dhi li ngaaka ohadhi gumu etaloko lyayalwe kombinga yuukalele wetu.

8 Omuleshi gumwe ngoka keeshi Onzapo gwokoUnited Kingdom, okwa li a nyolele koshifo Lincolnshire Boston Target, a ti: “Aantu otaya kanitha eitaalo lyawo momalongelokalunga . . . Ano aasita mbaka yomoongeleka ohaya kala taya ningi  shike esiku alihe? Ihaya yi ootu ya ka popye naantu ngaashi Kristus a li ha ningi . . . Oonzapo dhaJehova odho owala elongelokalunga ndyoka hali ulike kutya oli na ko nasha nayalwe, ndyoka iilyo yalyo hayi yi kaantu noyi itula mo lela miilonga yokuuvitha oshili.” Uuyuni mbuka owu udha ombepo yokwiihola mwene, ihe tse otu na ombepo yeiyambo nohatu longo oshindji mokusimaneka Jehova. — Rom. 12:1.

Okukala kwetu muukalele ohaku gandja uunzapo wa kola kwaamboka taye tu mono

9. Oshike tashi ke tu kwathela tu kale aluhe aalaadhi mokulonga uuwanawa muukalele wetu?

9 Oshike tatu vulu okuninga, ngele otwa ndhindhilike kutya otwa fa tatu kanitha uulaadhi wetu womuukalele? Otashi ka kala shi li nawa tu tedhatedhe kwaashoka Jehova ta gwanitha po okupitila miilonga yokuuvitha. (Lesha Aaroma 10:13-15.) Opo aantu ya hupithwe oye na okwiithana edhina lyaJehova ye na eitaalo, ihe otaye ke shi ninga owala ngele twe yu uvithile. Okukala tu shi oshinima shoka oku na oku tu inyengitha tu kale aalaadhi mokulonga uuwanawa nokukala hatu longo nuudhiginini mokuuvitha onkundana ombwanawa yUukwaniilwa.

EIHUMBATO EWANAWA OHALI NANENE AANTU KUKALUNGA

Okukala omunashili nokukala ho longo nuudhiginini ihaku kala inaaku monika kuyalwe

10. Omolwashike taku vulu okutiwa kutya eihumbato lyetu ewanawa ohali nanene aantu kuJehova?

10 Nonando osha simana tu kale aalaadhi muukalele, uukwatya mboka hawo awuke wa pumbiwa opo tu nanene aantu kuKalunga. Oshinima oshitiyali shoka shi li shimwe shomiilonga yuulaadhi mbyoka hayi nanene aantu kuKalunga, osho eihumbato ewanawa lyopaKriste. Paulus okwa li a tsu omuthindo nkene eihumbato lyetu lya simana a ti: “Tse itatu agulitha omuntu nando omoshinima shimwe, oshilonga shetu opo shaa shekwe.” (2 Kor. 6:3) Okupopya kwetu kwa yogoka nosho wo eihumbato lyetu ewanawa ohali simanekitha elongo lyaKalunga, nokuningitha yalwe ya kale ya hala okulongela Jehova. (Tit. 2:10) Nolundji ohatu uvu iizemo iiwanawa ngele aanamitima omiwanawa ya mono eihumbato lyetu lyopaKriste.

11. Omolwashike tu na okukonakona pamwe negalikano nkene eihumbato lyetu tali vulu okuguma yalwe?

11 Nonando ohatu mono kutya oonkatu dhetu ohadhi vulu okunwetha mo yalwe nawa, oonkatu  dhetu oombwiinayi ohadhi vulu wo okunwetha mo yalwe nayi. Onkee ano, kutya nduno otu li kiilonga, megumbo, nenge kosikola, otu na okuyanda shoka tashi ningitha omuntu a mone epuko muukalele wetu nomeihumbato lyetu. Ngele otwa yonene owina, oshilanduliko otashi ka kala oshinyanyalithi. (Heb. 10:26, 27) Oshinima shika oshi na oku tu inyengitha tu ikonakone pamwe negalikano kombinga yaashoka hatu ningi nosho wo kombinga yethano ndyoka onkalamwenyo yetu tayi gandja kuyalwe. Sho eihumbato lyaantu yomuuyuni mbuka tali ende tali nayipala, aanamitima omiwanawa ‘otaa ka koneka eyooloko pokati komuntu ngoka ta longele Kalunga naangoka itee shi ningi.’ (Mal. 3:18) Eeno, eihumbato lyetu ewanawa lyopaKriste ohali dhana onkandangala ya simana mokuhanganitha aantu naKalunga.

12-14. Ngele tatu idhidhimike uuna eitaalo lyetu ta li makelwa ohashi ningitha yalwe ya kale ya tala ko ngiini uukalele wetu? Gandja oshiholelwa.

12 Montumwafo ndjoka omuyapostoli Paulus a li a nyolele Aakorinto, okwa li a nyola mo kutya okwa li a yi muudhigu, miiponga, a dhengwa, nokwe edhililwa mondholongo. (Lesha 2 Aakorinto 6:4, 5.) Ngele otwi iyadha moonkalo ndhoka tadhi makele eitaalo lyetu, eidhidhimiko lyetu otali ki inyengitha mboka haye tu mono ya taambe ko oshili. Pashiholelwa, oomvula dhontumba dha ka pita, aantu yamwe oya li ya kambadhala ya hulithe po Oonzapo dhaJehova moshitopolwa shimwe moAngola. Oonzapo mbali dha ninginithwa nosho wo yalwe 30 mboka ya li haya yi kokugongala oya li ya gongelwa. Opo nduno, aantu yomoshitopolwa shoka oya li ya gongelwa ya tale sho aapataneki taya dhenge aantu mbaka kaaye na ondjo sigo taya zi ombinzi. Nokuli aakulukadhi naanona kaya li ya hupithwa ko. Elalakano lyaapataneki mboka olya li okutilitha aantu kaaya pulakene kOonzapo dhaJehova. Ihe konima sho tuu Oonzapo dha dhengwa, aantu oyendji yomoshitopolwa oya li ye ya kudho noya li ya pula omakonakonombiimbeli! Okuza mpoka, iilonga yokuuvitha Uukwaniilwa oya li ya humu komeho, nomwaalu gwaamboka ya taamba ko oshili ogwi indjipala noonkondo noya li wo ya mono omalaleko nuuyamba ogendji.

13 Oshiholelwa shika otashi ulike kutya sho aantu taya mono tu na uulaadhi sho tatu makelwa, otashi vulika ya taambe ko oshili. Otashi vulika tu ipule kutya yangapi ya li ya hanganithwa naKalunga sho Petrus naayapostoli ooyakwawo ya katuka nuulaadhi. (Iil. 5:17-29) Ngele natse otwa dhiginine shoka shi li mondjila, aalongwa ooyakwetu, aaniilonga pamwe natse, nosho wo aanegumbo yaandjetu otashi vulika ya ka taambe ko oshili.

14 Ethimbo alihe, aamwatate otaya hepekwa. Pashiholelwa, moArmenia, aamwatate ye li 40 lwaampoka oye li mondholongo molwaashoka ya tinda okuya miita, noyendji otashi vulika ya ka ye mo moomwedhi tadhi ya. MoEritrea, aapiya yaJehova ye li 55 oye li mondholongo, nayamwe yomuyo oye na oomvula dha konda po 60. MoSouth Korea, Oonzapo 700 lwaampono odhi li mondholongo omolweitaalo lyadho. Onkalo ndjika osho ya kala ngaaka uule woomvula 60. Natu galikaneni opo uudhiginini waamwatate mboka taya hepekwa miilongo yi ili noyi ili wu simanekithe Kalunga nokukwathela mboka ye hole uuyuuki ya taambe ko elongelokalunga lyashili. — Eps. 76:8-10.

15. Gandja oshiholelwa nkene okukala aanashili monkalamwenyo taku vulu okunanena yalwe koshili.

15 Okukala kwetu aanashili monkalamwenyo, otaku vulu wo okunanena aantu koshili. (Lesha 2 Aakorinto 6: 4, 7.) Pashiholelwa, natu tale koshimoniwa shika: Omumwameme gumwe okwa li ta tula iimaliwa meshina lyuutekete mombesa sho kuume ke gumwe e mu lombwele kutya kasha li sha pumbiwa e ka futile, molwaashoka oshinano oshifupi. Omumwameme okwe mu yelithile kutya oshi li mondjila e ka futile, nonando oshinano oshifupi. Konima yaashono, kuume ke okwa zi mo mombesa. Omuhingi gwombesa okwa li a pula omumwameme a ti: “Ngoye owu li gumwe gwomOonzapo dhaJehova?” Okwa yamukula a ti: “Eeno, oshike she ku ningitha wu pule?” “Onde mu uvu sho tamu popi kombinga yokufuta okatekete kombesa, nondi shi shi kutya Oonzapo dhaJehova odhi li dhimwe dhomaantu aashona mboka haya ningi ngaaka nodhi li oonashili miinima ayihe.” Konima yoomwedhi dhontumba, omulumentu ngoka okwa li a tsakanene nomumwameme  pokugongala e ta ti: “Owu shi ndje? Ongame omuhingi gwombesa ngwiyaka nda li nda popi nangoye kombinga yokufuta okatekete. Sho nda mono eihumbato lyoye, onda li nda tokola ndi tameke okukonakona Ombiimbeli nOonzapo dhaJehova.” Omikalo dhetu dhokukala aanashili ohadhi tu ningitha tu kale aakalele ye shi okwiinekelwa.

ULIKA ALUHE UUKWATYA MBOKA HAWU SIMANEKITHA KALUNGA

16. Omolwashike uukwatya ngaashi eidhidhimiko, ohole nosho wo ohenda hawu gumu omitima dhaantu? Gandja oshiholelwa.

16 Ohatu dhana wo onkandangala mokunanena aantu kuJehova uuna tatu ulike uukwatya ngaashi eidhidhimiko, ohole nosho wo ohenda. Yamwe mboka haye tu mono, otashi vulika ya kale ya hala okwiilonga kombinga yaJehova, yomalalakano ge nokombinga yoshigwana she. Omikalo neihumbato lyAakriste yashili olya yooloka ko thiluthilu kudhaamboka ye na emoniko lyowala lyetilokalunga ndyoka aluhe li na iihelele. Aasita yamwe oya ninga omakenge molwaashoka ohaya kengelele aakwanegongalo yawo, taya longitha iimaliwa yawo mbyoka ya mona ya lande omagumbo gondilo, oohauto, nagumwe nokuli okwa li a tula eshina lyokutalaleka mokandunda kombwa. Nokuli, noyendji mboka hayi i ti kutya aalanduli yaKristus kaye na egamo ‘lyokugandja omagano.’ (Mat. 10:8) Pehala lyaashono, ngaashi owala aasaaseri aawinayi yopethimbo lyAaisraeli, ohaya “hunganeke molwiimaliwa” noshindji shoka haya longo aantu kashi li pamanyolo. (Mika 3:11) Eihumbato li li ngaaka lyopaihelele ihali hanganitha nando omuntu naKalunga.

17, 18. (a) Ongiini hatu simanekitha Jehova uuna tu na uukwatya wa fa we moonkalamwenyo dhetu? (b) Oshike hashi ku inyengitha wu tsikile okulonga uuwanawa?

17 Kombinga onkwawo, aantu ohaya gumwa komitima komalongo gashili gopaKriste nokiilonga iiwanawa mbyoka Aakriste yashili haya ningile ooyakwawo. Pashiholelwa, sho omukokolindjila gumwe a li tu uvitha egumbo negumbo, omukulupe gumwe omuselekadhi okwa li e mu lombwele nziya kutya ke na ohokwe. Omukulupe okwa ti kutya sho omumwatate a dhenge okangendjo kokomweelo, okwa li a londa kompani mokombitha ta kambadhala okutula mo okabiyena okape. Omumwatate okwa ti: “Osha nika oshiponga okuninga ngaaka ongoye awike.” Nomukokolindjila okwa li e mu tulile mo okabiyena okape e ta yi. Sho omwanamati gwomukulupe ngoka u uvu shoka sha ningwa po, okwa li a kumwa noonkondo nokwa kambadhala oku ka konga omumwatate ngoka opo e mu pandule. Lwahugunina, omwanamati ngoka okwa li a taamba ko ekonakonombiimbeli.

18 Omolwashike wa tokola toko okutsikila okulonga uuwanawa? Otashi vulika omolwaashoka wu shi kutya ngele otatu ulike uulaadhi muukalele nokuninga iinima metsokumwe nehalo lyaKalunga, otatu simaneke Jehova notatu ka kwathela yalwe ya hupithwe. (Lesha 1 Aakorinto 10:31-33.) Uulaadhi wetu wokulonga uuwanawa mokuuvitha onkundana ombwanawa nomokwiihumbata metsokumwe nehalo lyaKalunga ohawu etithwa kokukala twa halelela okuulika kutya otu hole Kalunga nosho wo aantu ooyakwetu. (Mat. 22:37-39) Otatu ka kala twa gwanenwa notwa nyanyukwa kunena ngele otwa kala tu na uulaadhi wokulonga uuwanawa. Noshikwawo, otwa tegelela nondjuulukwe ethimbo ndyoka aantu ayehe taya ka kala ye na uulaadhi welongelokalunga lyashili nokusimanekitha Jehova, Omushiti gwetu.