Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2013

 ONDJOKONONA

Etompelo kutya omolwashike onkalamwenyo yetu yi na eityo shili

Etompelo kutya omolwashike onkalamwenyo yetu yi na eityo shili

SHO OWALA omumwandjemati Gary a valwa mo 1958, onda li nda dhimbulula kutya opu na sha sha puka. Ihe osha li sha pula oomwedhi omulongo opo oondohotola dhi mone omukithi gwe, noomvula ntano natango opo ookapyoko yamwe muunamiti moLondona ya koleke omukithi ngoka kutya ogwo shili. Onda li ndu uvu nayi shili sho okamwandjekadhona Louise hoka ka li ka landula Gary konima yoomvula omugoyi, ka li ku ulike omandhindhiliko ga kwata miiti ge vulithe gaGary.

Oondohotola odha li dha lombwele ndje nohenda dha ti: “Aanona yoye ayehe oye na omukithi ngoka hagu ithanwa Laurence-Moon-Bardet-Biedl (LMBB), * naamwoye owu na owala okukala nayo ye na omukithi ngoka.” Pethimbo ndyoka, kapu na naanaa ngoka a li e shi oshindji kombinga yomukithi ngoka. Omandhindhiliko gomukithi nguka oga kwatela mo uunkundi womeho mboka hawu fala sigo omuuposi, eyondo lya pitilila, ominwe dhokoonyala dha gwedhwa po nenge dhokoompadhi, okukoka taku ende kashona, uupyakadhi welongelokumwe lyiilyo yolutu, uuvu woosuuka, uuvu wokuzinda pomatsakeneno gomasipa nosho wo iiti yanathigo kaayi li nawa. Onkee ano, okusila oshimpwiyu aamwandje okwa li taku ka kala eshongo lela. Omakonakono ngoka opo ga li ga ningwa okwa li kwa tengenekwa kutya omuntu 1 gwomaantu 125 000 muBritania oku na omukithi nguka, nonando otashi vulika yalwe oyendji ya kale ye na owala omandhindhiliko gago omashona.

JEHOVA OKWA NINGA “EPOPILONGULU” LYETU

Konima owala yethimbo efupi sho nda hokanwa, onda li nda popi nOnzapo yaJehova yimwe, nonda li nda dhimbulula nziya oshili. Ihe omusamane gwandje ka li e na ohokwe nando. Omolwiilonga ye, olundji otwa li hatu kala tatu tembauka, onkee ano kanda li nda vulu okukala ndi li megongalo lyontumba. Nonando onkalo oya li ngawo, onda li nda tsikile okulesha Ombiimbeli nokugalikana kuJehova. Osha li sha hekeleke ndje shili sho nda li nda lesha kutya “[Jehova, NW] oye eholameno lyaathiminikwa; oye epopilongulu momathimbo guudhigu,” nosho wo kutya ‘ite etha nando ogumwe ngoka te ya kuye.’ — Eps. 9:9, 10.

Gary ka li ha mono ko nawa, onkee ano okwa li a tuminwa kosikola yi ikalekelwa yomuhandjo ndjoka ya li kuumbangalantu waIngilanda. Okwa li ha dhengele ndje pandjigilile opo a pule kombinga yiinima mbyoka a li ti ipula nayo, nonda li handi vulu oku mu kwathela okupitila mongodhi opo u uve ko omalongo gopetameko gomakotampango gOmbiimbeli. Konima yoomvula oonshona sho Louise a valwa, onda li nda kwatwa komukithi hagu kukutike oontumba dholutu hagu ithanwa multiple sclerosis nosho wo uuvu womomasipa, hawu ithanwa fibromyalgia. Gary okwa li a zi ko komuhandjo sho a li e na oomvula 16. Ihe omeho ge oga li taga nayipala nokwa li a ndhindhilikwa kutya okwa ninga omuposi mo 1975. Momumvo 1977 omusamane gwandje okwa li e tu ekelehi.

Konima owala yethimbo efupi sho Gary a galukile kegumbo, otwa li twi ipyakidhila megongalo, nonda li nda ninginithwa momumvo 1974. Onda li nda nyanyukwa shili sho omukuluntugongalo gumwe a li a kwathele Gary u ungaunge nomalunduluko ngoka ga li taga ningwa molutu lwe sho e li poomvula dhokamukondapweyu. Oonzapo dhilwe odha li hadhi ambidhidha ndje niilonga yomegumbo, nokonima, iilonga yopashigwana yokukwathela aantu oya li ya tula po aantu yatano ya kale haye tu kwathele pegumbo lyetu. Shika osha kala lela elaleko nuuyamba kutse.

Gary okwa li a tsikile okuninga ehumokomeho moshili nokwa li a ninginithwa mo 1982. Okwa kala e na momutima gwe iilonga yuukwathelikokolindjila. Onkee ano, onda li nda tokola ndi mu ambidhidhe nonda li nda tsikile okuninga ngaaka uule woomvula dhontumba. Omumwandjemati  okwa li a nyanyukwa noonkondo sho konima omutonatelishikandjo gwetu a li e mu pula a ti: “Gary, omolwashike itoo ningi omukokolindjila gwondjigilile?” Shoka osha li lela eladhipiko ndyoka Gary a li a pumbwa, nomomumvo 1990 okwa li a langekwa po e li omukokolindjila gwondjigilile.

Gary okwa li a tandwa moonto iikando iyali, oshikando shotango omo 1999 noshitiyali omo 2008, ihe uukolele waLouise owa li wa nayipala. Okwa li a valwa omuposi naasho nda li nda mono okanwe ka gwedhwa po kompadhi ye onda li nda dhimbulula kutya oku na omukithi gwo-LMBB. Omakonakono oga li gu ulike kutya iilyo ye oyindji yomeni oya li wo kaayi li nawa. Momukokomoko gwoomvula okwa li a ningilwa omatando ga kwata miiti, mwa kwatelwa gatano kiiti yanathigo. Ngaashi Gary, Louise naye oku na wo uuvu wosuuka.

Molwaashoka Louise oku shi uupyakadhi mboka hawu vulu okuholoka po uuna pwa pumbiwa etando, oha popi noondohotola ndhoka tadhi mu tanda, nosho wo naatonateli yoshipangelo shi na ko nasha nokupangwa itaapu longithwa ombinzi. Shoka ohashi mu ningitha a kale e na ekwatathano ewanawa naayehe mboka haye mu tonatele nawa nohaye mu sile oshimpwiyu palutu.

OTU NA ONKALAMWENYO YI NA EITYO

Maandjetu atuhe otwi ipyakidhila lela niinima oyindji mokulongela Jehova. Manga iikwaelektronika yoshinanena inaayi konda, onda li handi longitha oowili odhindji ndi leshele Gary naLouise. Ngashingeyi uu-CD, uu-DVD, nosho wo iinima mbyoka ya kwatwa momawi yi li ko-www.jw.org oye shi ninga tashi wapa tu kale atuhe tatu nyanyukilwa ekonakono lyOmbiimbeli lyokoshiwike pomathimbo gi ili nogi ili, nohatu vulu okugandja omatyokosha taga ti sha pokugongala kehe.

Inatu nyanyukwa tuu sho tu na oshili ndjoka yi li mOohapu dhaJehova dha nwethwa mo!

Omathimbo gamwe Gary oha koneke omayamukulo ge momutse, nongele oku na oshipopiwa mOsikola yOkudheula Aauvithi oha vulu oku shi gandja ta popi niitya ye mwene. Mo 1995 okwa li a langekwa po e li omuyakuligongalo noha kala aluhe i ipyakidhila pOshinyanga shUukwaniilwa, ta taamba iilyo yegongalo sho tayi ya poshinyanga nokukwathela nomambako.

Oonzapo oonkwetu ohadhi yi naGary muukalele, nolundji ohadhi undula ko kokatemba ke molwaashoka oku na uuwehame wokuzinda pomatsakaneno gomasipa hawu ithanwa arthritis. Onzapo yimwe oya li ye mu kwathele a konakone Ombiimbeli nomulumentu gumwe. Gary okwa li a wo a tsu omukumo Omukriste gumwe ngoka a li a kala inii ipyakidhila we uule woomvula 25. Aantu ayehe mboka ngashingeyi ohaya kala pokugongala kwopaKriste.

Sho Louise e na oomvula omugoyi, okwa li a longwa okutunga noongodhi kuyinakulu, nangame nosho wo gumwe gwomwaamboka haye mu sile oshimpwiyu otwa li twe mu longo okuthaneka noongodhi komalapi. Molwaashoka natango oku hole noonkondo okutunga, oha tungu uukumbatha waanona nosho wo waakokele yomegongalo. Oha ningi wo uukalata womakundo e wu nateka uuthano uushona. Uukalata mboka ohawu talika ko wu na ongushu kwaamboka haye wu pewa kuye. Sho a li e na oomvula omulongo nasha, Louise okwa li i ilongo okutopatopa. Ngashingeyi oha vulu okukwatathana nookuume ke ta longitha okompiuta yi ikalekelwa hayi popi. Okwa li a ninginithwa sho e na oomvula 17. Pethimbo lyiikonga yi ikalekelwa yokuuvitha, ohatu nyanyukilwa uukwathelikokolindjila pamwe. Ngaashi Gary, Louise naye oha koneke omanyolo momutse u ulike eitaalo lye momauvaneko gaKalunga kutya otaku ke ya uuyuni uupe moka ‘omeho gaaposi taga ka tsikuluka’ naamoka kaapu na nando ogumwe ta ka tya “otandi ehama.” — Jes. 33:24; 35:5.

Inatu pandula tuu koshili ndjoka yi li mOohapu dhaJehova dha nwethwa mo! Omitima dhetu odhu udha olupandu omolwekwatho lyopahole ndyoka hatu pewa kaamwatate naamwameme megongalo, molwaashoka andola kalya li po, iinima oyindji mbyoka hatu ningi ando ihatu vulu oku yi ninga. Nuunene tuu molwaashoka Jehova ohe tu kwathele, onkalamwenyo yetu oyi na eityo.

^ okat. 5 Omukithi gwedhina Laurence-Moon-Bardet-Biedl ogwa li gwa lukilwa oondohotola dhi li ne ndhoka dha li dhe gu mono, hagu thigululwa ngele aavali ayehe oya humbata omukithi ngoka. Kunena, omukithi ngoka ohagu ithanwa Bardet-Biedl. Omukithi ngoka kagu na epango.