Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Apilili 2013

Oyi igandja nehalo ewanawa ya ka longe koMeksiko

Oyi igandja nehalo ewanawa ya ka longe koMeksiko

OTASHI nyanyudha omutima shili okumona kutya aagundjuka oyendji yOonzapo otaya ningi oonkalamwenyo dhawo dhi kale dhanathangwa opo ya tamunune mo uukalele wawo wopaKriste, nomwaalu gwaamboka taya ningi ngaaka otagu londo pombanda. (Mat. 6:22) Ohaya ningi omalunduluko geni? Ohaya kala ya taalela omandangalati geni? Opo tu mone omayamukulo, natu ka tseye yamwe yomuyo mboka taya longele Jehova ngashingeyi koMeksiko.

“OTWA LI TU NA OKUNINGA OMALUNDULUKO”

Dustin naJassa mboka ya za koAmerika oya hokanene muJanuali 2007. Konima owala yaashono, oya li ya adha elalakano lyawo ndyoka ya kala nale ya hala, lyokukala ye na ombautu nokukala mo omumvo aguhe. Ombautu yawo oya li ye yi mangele popepi naAstonia, Oregon, U.S.A., okandoolopa okawanawa kaake na omatungo omawinayi goshinanena, ka dhingolokwa kiikulundundu yi li mokuti nosho wo koondundu dhi na olumi koondungu. Okandoolopa hoka oke li owala oshinano oshishona okuza pEfuta lyaPacific. Dustin okwa ti: “Kehe ngaa mpoka to tala, eshito otali tuntula omutima shili!” Aaihokani mboka oya li ye wete ye na onkalamwenyo yanathangwa, yi inekela owala muJehova. Oya li hayi itungile uugumbo taya ti: ‘Ohatu kala mombauto yoometa hetatu, otu na owala iilonga yetatathimbo, otu li megongalo lyelaka ekwiilongo, nomalupita ohatu kutha uukwathelikokolindjila.’ Ihe konima yethimbo lyontumba, oya li ya thiki pehulithodhiladhilo kutya otayi ifundjaleke owala. Dustin okwa ti: “Pehala lyokwaambidhidha egongalo, omathimbo ogendji otwa li hatu kala twi ipyakidhila nokupangela ombautu yetu. Otwa li tu shi shi kutya  ngele otwa hala shili okupititha Jehova komeho monkalamwenyo yetu, otwa li tu na okuninga omalunduluko.”

Jassa okwa gwedha ko ta ti: “Manga inaatu hokana, onda li nda kala moMeksiko, moka nda li megongalo lyOshiingilisa. Onda li handi nyanyukilwa okulongela hoka, nonda li nda halelela okushuna ko.” Opo Dustin naJassa ya koleke ehalo lyawo lyoku ka longa kondje yiilongo, oya li ya tokola opo pethimbo lyelongelokalunga lyuukwanegumbo wawo, ya kale haya lesha oondjokonona dhaamwatate naamwameme mboka ya tembukila kiilongo hoka omapya ga thika okuteywa. (Joh. 4:35) Dustin okwa ti: “Otwa li wo twa hala okumona enyanyu lya fa lyawo.” Sho yu uvu kookuume kawo yomoMeksiko kutya opu na okangundu opo ka totwa ka pumbwa ekwatho, Dustin naJassa oya li ya ningi etokolo. Oye etha po iilonga yawo, noya landitha po ombautu yawo, e taya tembukile koMeksiko.

“OSHINIMA OSHIWANAWA KAAKU NA WE SHOKA INAASHI NINGWA NANDO ONALE MONKALAMWENYO YETU”

Dustin naJassa oya tula mokandoolopa kedhina Tecomán, hoka nako ke li popepi nEfuta lyaPacific noke li ookilometa 4 300 kuumbugantu waAstoria. Dustin okwa ti: “Pehala lyokambepo okatalala nomutalelo gwoondundu, otu li mokati kuupyu tawu ningi omuntu omapuya nakehe mpoka to tala omiti owala dhomasiilemune.” Petameko, kasha li oshipu okumona iilonga. Molwaashoka kaya li ye na oshimaliwa sha gwana, oya li haya li olwiishi nomakunde lwaali mesiku, kehe oshiwike. Jassa okwa ti: “Ihe sho owala kaatwa li we tatu vulu okwiidhidhimikila iikulya mbyoka twa li hatu li, aakonakonimbiimbeli yetu oya li ya tameke oku tu pa omamango, omambanana, omapapawe, noondjato dhu udha omasiilemune.” Mokweendela ko kwethimbo, aaihokani oya li ya mono iilonga kosikola yelaka yokoTaiwan, taye yi longo okupitila mOintaneta. Ngashingeyi oshimaliwa shoka haya mono miilonga mbyoka osha gwana okugwanitha po oompumbwe dhawo dhakehe esiku.

Dustin naJassa oyu uvitile ngiini okukalamwenyo kwawo hoka okupe? Oya ti: “Okutembuka huka oku li oshinima oshiwanawa kaaku na we shoka inaashi ningwa nando onale monkalamwenyo yetu. Ekwatathano lyetu naJehova nosho wo ndyoka li li pokati ketu olya kola kaaku na we nokatwa li tu shi ngele oshi na esiku shi wape. Esiku kehe ohatu ningi iinima oyindji pamwe, ngaashi okuya miilonga yomomapya, okukundathana nkene tu na okukwathela aakonakonimbiimbeli yetu, nosho wo okwiilongekidhila okugongala. Ngashingeyi otwa manguluka ko koothina ndhoka twa li hatu kala tu na nale.” Oya gwedha ko taya ti: “Ngashingeyi otu uvite ko nawa oshinima shoka kaatwa li hatu uvu ko, ano uushili weuvaneko ndyoka li li mEpisalomi 34:9, (OB-1954 [34:8, OB-1986]) ndyoka tali ti kutya ‘makeleni, ne mu tale, Omuwa oye omutoye!’”

OSHIKE SHA LI SHI INYENGITHA AALONGI OMAYUVI MBOKA YA LI YI IGANDJA NEHALO EWANAWA?

Aamwatate naamwameme ye vulithe po 2 900, mboka ye li mondjokana naamboka inaaya ya mo, oyendji mboka ye li poomvula 20 nosho 30 oya tembuka opo ya ka longe koMeksiko hoka ku na natango ompumbwe onene yaauvithi  yUukwaniilwa. Omolwashike Oonzapo ndhika adhihe dha li dhi itakeke iilonga mbika? Sho ongundu yaamwatate naamwameme mboka ya li ya pulwa epulo ndyoka, oya li ya gandja omatompelo gatatu ga simanenena. Omatompelo ngoka ogeni?

Leticia naHermilo

Okuulika ohole yokuhola Jehova nosho wo aantu ooyakwetu. Leticia okwa li a ninginithwa sho e na oomvula 18. Okwa ti: “Sho nda li ndi iyapulile Jehova, onda li ndu uvite kutya shika osha hala okutya ondi na oku mu longela nomutima gwandje aguhe nonomwenyo gwandje aguhe. Onkee ano, opo ndi ulike kutya ondi hole Jehova tashi zi komutima, onda li nda hala okulongitha ethimbo lyandje olindji, noonkondo dhandje miilonga ye. (Mark. 12:30) Hermilo, ngoka ngashingeyi a hokana Leticia okwa li owala e li poomvula 20 nasha sho a li a tembuka a ka longe koshitopolwa hoka kwa li ku na ompumbwe yaauvithi yUukwaniilwa. Okwa ti: “Onda li nda dhimbulula kutya okukwathela aantu ya gwanithe po ompumbwe yawo yopambepo otaku ka kala omukalo gwa dhenga mbanda gwokuulika ohole yandje yokuhola aantu ooyakwetu.” (Mark. 12:31) Onkee ano, okwa thigi po oshilando oshiyamba Monterrey hoka a li ha longo mombaanga nokwa li e na onkalamwenyo ombwanawa, nokwa li a tembukile kokandoolopa okashona.

Essly

Okumona enyanyu lyashili notali kalelele. Konima yethimbo lyontumba okuza peninginitho lye, Leticia okwa li a yi pamwe nomumwameme omukokolindjila a pyokoka kokandoolopa ki ikalela hoka ya li ye ku uvitha uule womwedhi. Leticia ota dhimbulukwa shoka sha li sha ningwa, nokwa ti: “Onda li nda kumwa. Kokutala nkene aantu ya li yi inyenge nawa ketumwalaka lyUukwaniilwa ndyoka twa li twe ya pe osha li she etele ndje enyanyu noonkondo. Pehulilo lyomwedhi ngoka, onda li ndi ilombwele tandi ti: “Shika osho nda hala okulongitha onkalamwenyo yandje! Essly, omumwameme inaa hokanwa ngoka naye e li poomvula 20 nasha, okwa li wo i inyengithwa kenyanyu ndyoka a li a mono kuyalwe a ye miilonga mbika. Manga a li moondondo dhe dhahugunina, okwa li a tsakanene nOonzapo dhi na uulaadhi ndhoka dha li hadhi longo kiitopolwa hoka ku na ompumbwe onene. Okwa ti: “Kokutala kiipala yaamwatate naamwameme mbyoka ya li yu udha enyanyu, osha li sha ningitha ndje ndi kale nda hala okukala nonkalamwenyo ya fa yawo.” Aamwameme oyendji oya li ya katuka oonkatu ngaashi Essly. Uushili owo kutya, moMeksiko omu na aamwameme inaaya hokanwa ye vulithe po 680 taya longo komahala hoka ku na ompumbwe onene. Inaya tulila po tuu aagundjuka naakokele oshiholelwa oshiwanawa!

Okukala nonkalamwenyo yi na elalakano notayi ti sha. Sho Essly a mana ondondo ye yahugunina, okwa li a pewa oshimaliwa shokukiilonga kouniveesiti. Oomakula ye oya li ye mu ladhipike a taambe ko oshimaliwa shoka opo a lalakanene onkalamwenyo ndjoka anuwa ombwanawa, a mone onzapo yopombanda, eithano, ohauto, nokuya momalweendo. Ihe ka li a taamba ko omayele gawo. Essly okwa ti: “Ookuume kandje yontumba Aakriste oya li ya lalakanene iinima mbika, nonda li nda mono kutya kuyo omalalakano gopambepo kaga li we oshinima shotango moonkalamwenyo dhawo. Onda li wo nda mono kutya oya lulilwa komaupyakadhi ngoka ya li ye na sho ngaa taya tsikile nokukutha  ombinga miinima yuuyuni. Onda li nda hala okulongitha ethimbo lyandje lyuugundjuka ndi longele Jehova pakuudha.”

Racquel naPhillip

Essly okwa li a mono edheulo lya gwedhwa po lyosikola uule wethimbo efupi ndyoka lya li lye mu kwathele a mone iilonga opo i iyambidhidhe pashimaliwa sho ta kokola ondjila, e ta tembukile koshitopolwa hoka ku na ompumbwe ye endelela yaauvithi yUukwaniilwa. Okwa li wo i itakeke okwiilonga omalaka gaavalelwamo ngoka haga popiwa kAaotomi nokAatlapaneco. Ngashingeyi ota dhimbulukwa shoka sha li sha ningwa moomvula ndatu ndhoka a kala tu uvitha kiitopolwa mbyoka yi ikalela. Okwa ti: “Okulonga komahala hoka ku na ompumbwe onene okwe etele ndje egwaneno nokukala ndi na onkalamwenyo tayi ti sha lela. Unene tuu, osha nkondopaleka ekwatathano lyandje naJehova.” Phillip naRacquel, aaihokani mboka ye li mepipi lyoomvula 30 nasha ya za koAmerika nayo otaya tsu kumwe nasho. Oya popi ya ti: “Uuyuni otawu lunduluka noonkondo, naashoka osha ningitha aantu oyendji ya kale ye wete kutya oonkalamwenyo dhawo kadhi na omakankameno. Ihe okukala hatu longo moshitopolwa moka hatu adha aantu oyendji taya pulakene ketumwalaka lyOmbiimbeli ohaku ningitha onkalamwenyo yetu yi kale yi na lela elalakano. Ohashi tu etele shili egwaneno!”

NKENE YA LI YU UNGAUNGA NOMASHONGO

Verónica

Eeno shili, okulonga koshitopolwa hoka ku na ompumbwe yaauvithi yUukwaniilwa oku na omashongo. Okwiiyambidhidha pashimaliwa oku li shimwe shomomashongo ngoka. Opo wu vule oku shi ninga, owu na okukala wu na ehalo lyokutaamba ko oonkalo dhomoshitopolwa moka. Verónica omukokolindjila a pyokoka okwa yelitha a ti: “Koshitopolwa shimwe hoka nda li handi longele, onda li handi teleke nokulanditha iikulya mbyoka ihaayi pula oshimaliwa oshindji. Koshitopolwa shilwe, onda li handi landitha iikutu nokukulula aantu. Ngashingeyi ohandi opaleke megumbo limwe nohandi longo aavali aape nkene ye na okukundathana naanona yawo.”

Okutaamba ko eputuko lilwe nosho wo omikalondjigilile dhi ili nodhi ili otaku vulu okukala eshongo uuna wu li mokati kaavalelwamo yomoshitopolwa shi ikalela. Phillip naRacquel oya li monkalo ndjoka sho ya li taya longo koshitopolwa haku popiwa elaka lyOshinahuatl. Phillip okwa ti: “Eyooloko ndyoka lya li po omolweputuko olya li enene noonkondo.” Oshike sha li she ya kwathele ya taambe ko onkalo ndjoka? “Otwa kala tatu gandja eitulomo kiinima tayi tungu mbyoka twa li twa mono kAanahuatl ngaashi kekwatathano lyopothingo ndyoka ye na momagumbo gawo, kohokwe ndjoka haya kala ye na sho taya ungaunga naantu ooyakwawo nosho wo mokugandja kwawo.” Racquel okwa gwedha ko a ti: “Otwa li twi ilongo oshindji sho twa kala moka nomokulonga pamwe naamwatate naamwameme yomomudhingoloko ngoka gwaapopi yelaka lyaavalelwamo.”

NKENE WU NA OKWIILONGEKIDHA

Ngele owa hala wu ka longe koshitopolwa shi ikalela hoka ku na ompumbwe, oshike wu na okuninga ngashingeyi opo wu ilongekidhe? Aamwatate naamwameme mboka ya pyokoka miilonga mbika oya ti: Manga inoo tembuka, tameka okuninga onkalamwenyo yoye yanathangwa nokwiilonga okukala wa gwanenwa. (Fil. 4:11, 12) Oshike ishewe to vulu okuninga? Leticia okwa ti: “Onda li nda henuka iilonga yimwe yokwiikongela omboloto mbyoka ya li tayi kaleke ndje pehala limwe. Onda li nda hala okukala nda manguluka ndi kale te vulu okuya kehe pamwe nopethimbo kehe nda hala uuna sha pumbiwa.” Hermilo okwa ti: “Onda li ndi ilongo okuteleka, okuyoga nokukangula.” Verónica okwa ti: “Sho nda li kegumbo naavali yandje nosho wo naamwayina yandje, onda li handi kwathele mokwoopaleka megumbo nonda li ndi ilongo okuteleka iikulya iiwanawa noihayi kotha ondilo. Onda li wo ndi ilongo okupungula oshimaliwa.”

Amelia naLevi

Levi naAmelia mboka ya za koAmerika noya kala mondjokana uule woomvula hetatu oya popi nkene omagalikano gokondandalunde ga li ge ya kwathele yi ilongekidhile oku ka longa koMeksiko. Levi okwa ti: “Otwa li twa yalula kutya otatu ka kala twa pumbwa oshimaliwa shi thike peni opo tu ka longe kondje yiilongo, notwa pula Jehova megalikano e tu kwathele tu mone oshimaliwa shoka twa pumbwa.” Muule woomwedhi dhontumba, oya li ya vulu okugongela oshimaliwa shoka ya li ya pula megalikano, noya li ya tembuka nopwaahe na okukwatakwata. Levi okwa ti: “Jehova okwa li a yamukula egalikano lyetu lyaashoka twa li twe mu pula kondandalunde, onkee otse nduno twa li tu na okulonga ko ombinga yetu.” Amelia okwa gwedha ko a ti: “Otwa li tatu dhiladhila kutya otatu kala mo owala uule womvula yimwe, ihe ngashingeyi otwa kala mo oomvula heyali, noitatu dhiladhila nando okushuna! Okukala huka okwe tu pa ompito tu mone tse yene oshikaha shaJehova. Esiku kehe ohatu mono iinima mbyoka tayi tu ulukile uuwanawa we.”

Adam naJennifer

Adam naJennifer, aaihokani ya za koAmerika mboka ye li megongalo lyOshiingilisa moMeksiko, oya li ya kwathelwa kegalikano ndyoka lya li lya dhana onkandangala ya simana opo ya vule okuya hoka. Oya gandja omayele ya ti: “Ino kala wa tegelela iinima ayihe yi kale yi li pomahala. Galikana kuJehova e ku kwathele wu vule oku ka longa kondje yiilongo ngoye to katuka metsokumwe negalikano lyoye. Ninga onkalamwenyo yoye yi kale yanathangwa, nyolela koshitayimbelewa shoka tashi tonatele iilonga moshilongo moka wa hala okuya, nongele wa yalula kutya otashi ke ku pula ingapi, inda nziya!” * Ngele owa ningi ngaaka, onkalamwenyo yituntula noyokukala wa yambapala pambepo otayi ka kala ye ku tegelela.

^ okat. 21 Opo wu mone uuyelele wa gwedhwa po, tala oshitopolwa “Mbela oto vulu ‘okutaagulukila kuMakedonia’?” shoka shi li mUukalele Wetu wUukwaniilwa waAuguste 2011.