Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2013

Mbuka uuthiga wetu wopambepo

Mbuka uuthiga wetu wopambepo

‘Mbuka owo uuthiga waantu yOmuwa.’—JES. 54:17, OB-1954.

1. Jehova okwa gamena shike omolwuuwanawa waantu ayehe?

JEHOVA, ‘Kalunga omunamwenyo ngoka ihaa hulu po,’ okwa gamena etumwalaka lye ndyoka tali petha aantu omwenyo. Etumwalaka ndyoka otali kalelele, molwaashoka ‘ohapu yaKalunga oyaaluhe.’ (1 Pet. 1:23-25) Inatu nyanyukwa tuu sho Jehova a gamena uuyelele we wa simanenena mboka wu li mOohapu dhe, Ombiimbeli!

2. Kalunga okwa gamena shike shi kale mOohapu dhe, opo shi longithwe koshigwana she?

2 Kalunga okwa gamena edhina ndyoka i ihogololela ye mwene, li kale mOohapu dhe, opo li longithwe koshigwana she. Edhina lyaJehova olya li lya tumbulwa oshikando shotango mOmbiimbeli petameko sho ya hokolola nkene a shiti egulu nevi. (Gen. 2:4, yelekanitha NW.) Edhina lyaKalunga olya li lya nyolwa pashikumithalonga lwiikando yontumba miipelende yomamanya mbyoka ya li yi na Iipango Omulongo. Pashiholelwa, oshipango shotango osha tameke noohapu tadhi ti: “Ongame [Jehova, NW] Kalunga koye.” (Eks. 20:1-17) Edhina lyaKalunga otali tsikile nokulongithwa, molwaashoka Omuwa Omupangeliawike Jehova, okwa gamena Oohapu dhe nosho wo edhina lye, nonando Satana okwa kala ta ningi oonkambadhala a mana mo a hulithe po Ombiimbeli nosho wo edhina lyaKalunga.—Eps. 73:28.

3. Kalunga okwa gamena shike, nonando omalongo giifundja gomalongelokalunga otaga lundu pombanda?

3 Jehova okwa gamena wo oshili, yi kale mOohapu dhe. Ihe nonando ongawo omalongo giifundja gomalongelokalunga otaga lundu pombanda muuyuni awuhe. Mbela tse inatu pandula tuu sho Kalunga e tu pa uuyelele wopambepo nosho wo oshili ye? (Lesha Episalomi 43:3, 4.) Nonando aantu oyendji otaye ende momilema dhopambepo, tse otwa nyanyukwa sho tatu tsikile okweenda muuyelele wopambepo mboka Kalunga ha pe aapiya ye.—1 Joh. 1:6, 7.

OTWA PEWA UUTHIGA MBOKA TU NA OKUKALA TWA LENGA

4, 5. Okuza mo 1931 otwa li twa mono uuthembahenda wi ikalekelwa wuni?

4 Aakriste atuhe otwa thigulula uuthiga wu na ondilo.  Embwiitya Collins Cobuild English Dictionary otali ti: “Uuthiga woshilongo owo omaukwatya agehe, omithigululwakalo adhihe nenge oohedhi ndhonkalamwenyo ndhoka aantu ya kala nokulandula uule womimvo odhindji nodha kala nokwiitaambekidhwa okuza kepipi nepipi.” Uuthiga wetu wopambepo owa kwatela mo omalaleko nuuyamba gokukala tu na ontseyo yashili yOohapu dhaKalunga nosho wo euvoko lya yela lyOohapu dhe nomalalakano ge. Owa kwatela mo wo uuthembahenda wi ikalekelwa kaaku na we.

Mo 1931, otwa li twa nyanyukwa sho twa pewa edhina Oonzapo dhaJehova poshigongi shetu shoshitopolwa

5 Uuthembahenda mboka owa ningi oshitopolwa sheliko lyetu lyopambepo li na ondilo ndyoka twa li twa pewa poshigongi shoshitopolwa shoka sha li muColumbus, Ohio, U.S.A., mo 1931. Kopolohalama yoshigongi shoka okwa li ku na oondanda “JW,” efupipiko lyedhina Oonzapo dhaJehova mOshiingilisa. Omumwameme gumwe okwa ti: ‘Aamwatate naamwameme oya kala tayi ipula kutya oondanda JW otadhi ti shike?’ Pethimbo mpoka otwa li hatu ithanwa Aakonakoni yOmbiimbeli, ihe mOsoondaha yo 26 Juli 1931, konima yokatokolitho hoka ka li ka leshwa, aapwilikini ayehe mboka ya li poshigongi shoka oya li ya zimine ya kale hayi ithanwa Oonzapo dhaJehova (Jehovah’s Witnesses mOshiingilisa). Kasha li tuu shituntula sho twa lukwa edhina lya za mOmbiimbeli! (Lesha Jesaja 43:12.) Omumwatate gumwe okwa ti: “Itandi dhimbwa nando nkene mboka ya li mehala lyoshigongi ya li yi igidha newi limwe pombanda nokuhakela mokule.” Kakele kutse kapwa li pu na nando ogulwe muuyuni a hala edhina ndyoka, ihe Kalunga okwe tu laleka nuuyamba sho twa kala noku li longitha uule womimvo dha konda 80. Kashi li tuu uuthembahenda wi ikalekelwa sho tu li Oonzapo dhaJehova!

6. Uuthiga wetu wopambepo owa kwatela mo ontseyo yashili yini?

6 Uuthiga wetu wopambepo owa kwatela mo uuyamba wontseyo yashili ndjoka tu na nosho wo uuyelele wu na oshilonga waapiya yaKalunga yonale mboka wa nyolwa mOmbiimbeli. Pashiholelwa, otayi tu lombwele onkalamwenyo yaAbraham, Isak noyaJakob. Ootatekulululwa mbaka nosho wo iilyo yomagumbo gawo oye na okukala ya li haya kundathana nkene ye na okunyanyudha Jehova. Onkee ano, itashi kumitha sho Josef a li a tindi okuya momilalo dha nyata, opo kaa “yone kuKalunga.” (Gen. 39:7-9) Oya li wo haya popi nokutula po iiholelwa yi na ko nasha nomikalondjigilile dhopaKriste. Iinima yimwe mbyoka ya li haya popi ongaashi Uulalelo wOmuwa mboka omuyapostoli Paulus a li a lombwele omagongalo gopaKriste. (1 Kor. 11:2, 23) Kunena, mOmbiimbeli omu na uuyelele mboka wa pumbiwa tawu tu kwathele nkene tu na okulongela Kalunga ‘mombepo nomoshili.’ (Lesha Johannes 4:23, 24.) Ombiimbeli otayi vulu okukwathela aantu ayehe, ihe tse tu li aapiya yaJehova otu na okukala twe yi lenga noonkondo.

7. Uuthiga wetu owa kwatela mo euvaneko lini tali hekeleke?

7 Uuthiga wetu wopambepo owa kwatela mo omahokololo ngoka opo owala ga nyanyangidhwa tagu ulike kutya ‘Jehova oku li pamwe natse.’ (Eps. 118:7) Shoka ohashi tu ningitha tu kale tu uvite twa gamenwa, nokuli nonando otatu hepekwa. Uuthiga wetu wopambepo mboka tu na tawu indjipala owa kwatela mo wo euvaneko tali hekeleke ndyoka li li mOmbiimbeli tali ti: “[Oshikondjitho] kehe  tashi hambulwa, shi ku kondjithe, tashi nyengwa: nokehe elaka tali ku tamaneke, ongoye to li tompele uulunde. Ano oombika oyo uuthiga waantu yOmuwa, oyo uuyuuki wawo womungame. Omuwa osho ta ti.” (Jes. 54:17, OB-1954) Moompungulilo dhiikondjitho yaSatana kamu na oshikondjitho shoka tashi vulu oku tu ehameka sigo aluhe.

8. Otatu ki ilonga shike moshitopolwa shika nomwaashoka tashi landula ko?

8 Satana okwa li a kambadhala okuhulitha po Oohapu dhaKalunga, okwiimba aantu ya tseye edhina Jehova nosho wo oshili. Jehova omunankondoadhihe noku vule Satana. Jehova okwa kala ta keelele oonkambadhala adhihe ndhoka Satana ta ningi. Moshitopolwa shika nosho wo mwaashoka tashi landula ko, otatu ki ilonga (1) nkene Kalunga a gamena Oohapu dhe, (2) nkene a gamena edhina lye opo tu li tseye nosho wo (3) nkene Tate yetu gwomegulu e li Onzo nOmugameni gwoshili ndjoka tatu nyanyukilwa kunena.

JEHOVA OKWA GAMENA OOHAPU DHE

9-11. Iiholelwa yini tayi ulike kutya Ombiimbeli oya hupa, nonando aatondi oya kala ya hala oku yi hulitha po momikalo dhi ili nodhi ili?

9 Jehova okwa gamena Oohapu dhe, opo kaadhi hanagulwe po kaatondi ye ayehe koonono. O-Enciclopedia Cattolica otayi ti: “Mo 1229, olaata yaToulouse oya li yi indike [omatoloko gOmbiimbeli dhomoshilongo] opo ya kondjithe eitaalo lyongundu ya za kondoolopa yaAlbi nosho wo aalanduli yaWaldo . . . Oshigongi shimwe shoka sha li sha ningilwa moTarragona, shaSpania, mo 1234 mewiliko lyaJames I [gwo-1] osha li sha tula po oondjindikila dha fa ndhoka. . . . Ongeleka yaKatoolika oya li ya yi olunyala moshinima shoka oshikando shotango mo 1559, sho omupapa Paul IV [omu-4] i indike aantu ya pilinte nokukala ye na Oombimbeli dha tolokwa momalaka gaavalelwa mo inaaya pewa epitikilo kongeleka.”

10 Nonando opwa kala nokuningwa oonkambadhala odhindji dhi ili nodhi ili dhokuhulitha po Ombiimbeli, sigo okunena oya gamenwa. Omulumentu gwedhina John Wycliffe nosho wo aalanduli ye oya li ya toloka Ombiimbeli mOshiingilisa oshikando shotango lwomomumvo 1382. Omulumentu gulwe naye omutoloki gwOmbiimbeli okwa li William Tyndale, ngoka a li a dhipagwa mo 1536. Otaku tiwa kutya pethimbo sho ta dhipagwa a mangelwa koshiti, okwa li i igidha mokule a ti: “Omuwa, tonatitha omeho gomukwaniilwa gwaIngilanda.” Konima okwa li a pondelwa koshiti shoka nongodhi e ta fikwa po.

11 Ombiimbeli otu yi na sigo okunena, nonando aantu oya kala ya hala oku yi hulitha po. Pashiholelwa, mo 1535, Ombiimbeli yilwe yOshiingilisa oya li ya tolokwa komulumentu gwedhina Miles Coverdale. Omulumentu ngoka okwa li a longitha “Etestamendi Epe” nosho wo “Etestamendi Ekulu” lyaTyndale, okuza muGenesis sigo omOndjalulo. Okwa li a toloka iitopolwa yilwe yomanyolo okuza mOshilatina nosho wo okuza metoloko lyOmbiimbeli yOshindowishi ndjoka ya tolokwa kuMartin Luther. Kunena, aantu oye hole o-New World Translation of the Holy Scriptures, molwaashoka oya yela nawa noyi shi okwiinekelwa, yo oyi li wo oshilongitho oshiwanawa muukalele. Otwa nyanyukwa sho tu shi kutya kapu na nando ompwidhilu yimwe nenge omuntu omunankondo ta vulu okuhulitha po Oohapu dhaJehova molwaashoka odha gamenwa.

 JEHOVA OKWA GAMENA EDHINA LYE OPO TU LI TSEYE

Aalumentu yamwe, ngaashi Tyndale oya li ya dhipagwa omolwOohapu dhaKalunga

12. O-New World Translation oya dhana onkandangala yini mokugamena edhina lyaKalunga?

12 Jehova Kalunga okwa gamena edhina lye nokwa shilipaleka opo li kale mOohapu dhe. O-New World Translation otayi dhana onkandangala onene moku li kaleka po. Mefalomo lyayo, okomitiye yaatoloki yOmbiimbeli mboka ya li yi itula mo shili oya nyola ya ti: “Oshinima sha simanenena metoloko ndika, edhina lyaKalunga ndyoka lya shunwa mpoka li na okukala mOmbiimbeli yOshiingilisa. Shoka osha li sha ningwa mokulongitha omukalo moka haye li nyola mOshiingilisa ‘Jehovah,’ moku li longitha lwiikando 6 973 mOmanyolo gOshihebeli nosho wo lwiikando 237 mOmanyolo gopaKriste gOshigreka.” O-New World Translation ngashingeyi oya tolokwa ayihe nenge oshitopolwa shayo shimwe, momalaka ge vulithe 116, nopwa pilintwa Oombiimbeli ndhoka dhi vulithe 178 545 862.

13. Omolwashike taku vulu okutiwa kutya aantu oya kala ye shi edhina lyaKalunga okuza sho ya shitwa?

13 Aantu oya kala ye shi edhina lyaKalunga okuza petameko sho ya shitwa. Adam naEva oya li ye li shi, noya li ye shi nkene hali tumbulwa. Konima yEyelu, Noowa okwa li a lombwele omwanamati, Ham, ngoka a li inee mu simaneka, a ti: “[Jehova, NW], Kalunga kaSem, na hambelelwe! [Omwanamati gwaHam] Kaanan na kale omupika gwaSem!” (Gen. 4:1; 9:26) Kalunga ye mwene okwa popi a ti: “Ongame [Jehova, NW], olyo edhina lyandje, itandi hala okugandja esimano lyandje kugulwe.” Kalunga okwa ti ishewe: “Ongame [Jehova, NW]; kaku na kalunga gulwe.” (Jes. 42:8, OB-1954; 45:5) Jehova okwa li a shilipaleke kutya edhina lye olya gamenwa nolya tseyithilwa aantu kombanda yevi. Kashi li tuu uuthembahenda sho hatu longitha edhina Jehova nohatu longo tu li Oonzapo dhe! Shika osho Ombiimbeli ya hala okutya sho tayi ti: ‘Medhina lyaKalunga ketu otatu yelutha oombaneri dhetu.’—Eps. 20:5, OB-1954.

14. Kakele mOmbiimbeli, edhina lyaKalunga otali vulu ishewe okwaadhika peni?

14 Edhina lyaKalunga itali adhika owala mOmbiimbeli. Pashiholelwa, otali adhika wo kEmanya limwe lyokuMoab ndyoka lya li lya adhika muDhiban (Dibon), ookilometa 21 kuuzilo wEfuta lya Sa. Kemanya hoka okwa nyolwa wo ehokololo kombinga yomukwaniilwa gwaIsraeli, Omri. Okwa nyolwa wo shoka omukwaniilwa Mesha Omumoab a li a popi kombinga yolugodhi ndoka lwa li pokati ke naAaisraeli. (1 Aak. 16:28; 2 Aak. 1:1; 3:4, 5) Emanya ndyoka li li muMoab otali hokitha unene, molwaashoka kulyo okwa nyolwa mOshihebeli edhina lyaKalunga, YHWH, noondanda hadhi ithanwa o-Tetragrammaton. Oondanda ndhoka dhOshihebeli, YHWH, odha holoka wo lwiikando niikando moondanda dhOshilachish, dha nyolwa kiinima ya fa iikangwa mbyoka ya li ya adhika muIsraeli.

15. O-Septuagint oshike, noshe ende ngiini opo yi tolokwe?

15 Mboka ya li ya toloka Ombiimbeli tango oya li ya kutha ombinga mokugamena edhina lyaKalunga. Konima Aajuda sho ya li muukwatwa waBabilonia uule womimvo 70, oya li ya mangululwa muupika mo 537 K.E.N., oyendji kaya li we ya shuna kuJuda nokuIsraeli. Methelemumvo eti-3 K.E.N., Aajuda oyendji oya li ya tembukile kuAlexandria shi li muEgipiti moka mwa li hamu popiwa Oshigreka. Aajuda mboka oya li ya pumbwa etoloko lyomanyolo li li mOshigreka. Omanyolo ngoka sho ga pu okutolokwa omimvo 2 000 nasha dha ka pita, oga ka kala hagi ithanwa o-Septuagint.

16. Gandja oshiholelwa nkene edhina lyaKalunga lya li lya longithwa membo ndyoka lya nyanyangidhwa tango momumvo 1640.

16 Edhina lyaKalunga otali adhika wo membo hali ithanwa Bay Psalm Book, oshileshomwa shotango shoka sha li sha nyanyangidhwa muIngilanda, shimwe shomiikolonyekwalongo yaAmerika. Embo ndyoka oli na Omapisalomi ga tolokwa oshitya noshitya mOshiingilisa okuza mOshihebeli, nolya li lya pilintwa tango mo 1640. Olya longitha edhina lyaKalunga ngaashi mEpisalomi 1:1, 2 moka tamu popiwa kutya “omulumentu a lalekwa nuuyamba,” oye ngoka ihaa landula oondunge dhaagoyoki, “ihe ompango ya-Iehovah, oha kala e yi halelela nenyanyu.” Opo wu mone uuyelele owundji kombinga yedhina lyaKalunga, tala okabroshure The Divine Name That Will Endure Forever.

 JEHOVA OKWA GAMENA OSHILI YOPAMBEPO

17, 18. (a) “Oshili” oshike? (b) “Oshili yonkundana ombwanawa” oya kwatela mo shike?

17 Ohatu longele “Jehova Kalunga koshili” nenyanyu. (Eps. 31:5, NW) Embwiitya Collins Cobuild English Dictionary olya ti: “Oshili kombinga yoshinima shontumba oyo uuyelele awuhe wolelalela kombinga yoshinima shoka, pehala lyuuyelele mboka womafaafaeko nenge wa totwa.” MOshihebeli shoka sha longithwa mOmbiimbeli, oshitya “oshili” ohashi ulike kedhiladhilo lyoshinima shoka shoshili, shi shi okwiinekelwa, shi shi okudhigininwa nenge oshinima sholelalela. Oshitya shOshigreka shoka sha tolokwa “oshili” otashi ti kutya oshinima shoka sholelalela nenge shu uka noshi li mondjila.

18 Jehova okwa gamena oshili yopambepo nohe tu pe aluhe ontseyo yashili oyindji ethimbo nethimbo. (2 Joh. 1, 2) Euvoko lyetu lyontseyo yashili otali ende tali yele shi vulithe nale, molwaashoka “ondjila yaayuuki oya fa uuyelele weluwa tali tende, mboka tau yele sigo kwa shi.” (Omayel. 4:18) Odhoshili kutya otatu tsu kumwe naashoka Jesus a popi sho a galikana kuKalunga a ti: “Oohapu dhoye odho oshili.” (Joh. 17:17) MOohapu dhaKalunga omu na “oshili yonkundana ombwanawa” ndjoka yi na omalongo agehe gopaKriste. (Gal. 2:14, NW) Gamwe gomomalongo ngoka ongaashi: Oshili kombinga yedhina lyaJehova, yuunamapangelo we, yekuliloyambo lyaJesus, yeyumuko nosho wo yUukwaniilwa. Ngashingeyi natu ka tale nkene Kalunga a gamene oshili nonando Satana okwa li a ningi oonkambadhala e yi hulithe po.

JEHOVA INA PITIKA SATANA A FUMVIKE OSHILI

19, 20. Nimrod okwa li lye, nompangela yini ya li ya hulile mokwena kwa thita pethimbo lye?

19 Konima yEyelu, aantu oya li ye na omupopyo hagu ti: “Ngaashi owala Nimrod omukongo omunene ngoka a li ta kondjitha Jehova.” (Gen. 10:9, NW) Nimrod ngoka a li omukondjithi gwaJehova, osha yela kutya okwa li ha longele Satana nokwa li ngaashi aakondjithi yaKalunga mboka Jesus a popi a ti: “One omu na ho omuhindadhi, one nomwa hala okulandula uuhalu waho. Oye . . . ke na nando oompoka a li moshili.”—Joh. 8:44.

20 Iilando mbyoka ya li tayi pangelwa kuNimrod omwa kwatelwa Babel niilando yilwe mbyoka ya li pokati komulonga gwaTigris nogwaEufrat. (Gen. 10:10) Otashi vulika Babel nosho wo oshungo yasho ya li ya tameke okutungwa mo 2269 K.E.N, mewiliko lyaNimrod. Jehova ka li a hala aantu ya kale pehala limwe, ihe aatungi yaBabel oya lombwelathana ya ti: “Natu umbeni oshilando shi na oshungo ya tsa megulu, opo tu iningile edhina lya simana tse twaa halakane nevi alihe.” Ihe shoka ya li yu unganeka osha hulile mokwena kwa thita sho Kalunga a ‘vundakanitha elaka lyaantu ayehe’ nokwe ya halakanithile kombanda yevi alihe. (Gen. 11:1-4, 8, 9) Ngele Satana okwa li e na edhiladhilo a tote po elongelokalunga limwe, opo aantu ayehe ya kale taye mu longele, nena ompangela ye ndjoka inayi pita. Okuza nalenale Jehova okwa kala nokugamena elongelokalunga lyashili, nokunena onkee ngaa tali humu komeho esiku nesiku.

21, 22. (a) Omolwashike elongelokalunga lyashili kaa li na esiku nando lya li muupyakadhi wu vule oonkondo dhalyo okuza komalongelokalunga giifundja? (b) Moshitopolwa tashi landula ko otatu ka konakona shike?

21 Elongelokalunga lyashili ka li na esiku nando lya li lye etelwa uupyakadhi wu vule oonkondo dhalyo komalongelokalunga giifundja. Omolwashike tatu tile ngawo? Omolwaashoka Omulongi gwetu Omunene okwa kala nokugamena Oohapu dhe, nokutseyithila aantu edhina lye. Shimwe ishewe, oye Onzo yoshili yopambepo inaayi ngambekwa. (Jes. 30:20, 21) Ngele otatu longele Kalunga momukalo ngoka a hokwa shili otashi ke tu etela enyanyu. Ihe opo tu shi ninge otashi pula tu kale twa tonata pambepo nokukala twi inekela thiluthilu muJehova nokulandula ewiliko ndyoka hatu pewa okupitila mombepo ye ondjapuki.

22 Moshitopolwa tashi landula ko, otatu ka tala mpoka pwa tamekela omalongo gamwe po giifundja ngoka haga humithwa komeho koongeleka. Otatu ka mona kutya omalongo ngoka kage li metsokumwe noshili yOmbiimbeli. Otatu ki ilonga wo nkene Jehova, Omugameni gwoshili kaaku na we, e tu laleka nuuyamba moku tu pa omalongo gashili ngoka ge li uuthiga wetu wopambepo mboka tatu nyanyukilwa nokunena.