Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2013

Ino etha sha shi ku imbe wu pewe esimano

Ino etha sha shi ku imbe wu pewe esimano

“Omwiifupipiki ota simanekwa.”—OMAYEL. 29:23.

1, 2. (a) Oshitya shOshihebeli “esimano” oshi na omaityo geni? (b) Otatu ka kundathana omapulo geni moshitopolwa shika?

OSHIKE hashi ya momadhiladhilo goye uuna wu uvu oshitya ‘esimano’? Mbela ohashi ku dhiladhilitha keshito lyaKalunga lyo opala? (Eps. 19:1) Mbela ohashi ku dhiladhilitha kesimano netumbalo ndyoka hali pewa aayamba, aanawino nenge mboka ye shi enditha nawa monkalamwenyo? Oshitya shOshihebeli shoka sha tolokwa “esimano” mOmbiimbeli otashi gandja eityo lyondjundo yoshinima. Pethimbo lyonale, sho iimaliwa iikukutu ya li hayi longwa miitenda yondilo, ongushu yoshimaliwa oshikukutu oya li hayi kala yi ikolelela kondjundo yasho. Iitya mbyoka tayi gandja edhiladhilo lyoshinima shomungunda oya li hayi uviwa ko pathaneko yi na eityo lyoshinima shi na ondilo, oshiwanawelela nenge tashi hokitha.

2 Ohashi vulika tu kale twa fuulwa koonkondo dhomuntu, kondondo ye nosho wo tuu kiikala ye. Ihe mbela Kalunga oha tala shike momuntu opo e mu pe esimano? Omanyolo otaga popi shi na ko nasha nesimano ndyoka Kalunga ha pe aantu. Pashiholelwa, Omayeletumbulo 22:4 otaga ti: “Ondjambi yeifupipiko netilo okutila OMUWA oyo uuyamba, esimano nomwenyo omule.” Omuyapostoli Jakob okwa nyola a ti: “Ifupipikeni koshipala shOmuwa, oye note mú nenepeke.” (Jak. 4:10) Mbela Jehova oha pe aantu esimano lyashike? Oshike tashi vulu oku tu imba kaatu pewe esimano ndyoka? Ongiini tatu vulu okukwathela yalwe ya pewe esimano ndyoka?

3-5. Jehova ohe tu pe esimano momikalo dhini?

3 Omupisalomi okwa li a popi neinekelo kutya Jehova ote ke mu kwata koshikaha she shokolulyo note ke mu wilika a mone eadhimo nenge esimano lyashili. (Lesha Episalomi 73:23, 24.) Jehova oha pe aantu esimano momikalo dhini? Oha simaneke aapiya ye aaifupipiki mokukala e ya lenga momikalo odhindji. Ohe ya laleke nuuyamba moku ya pa ontseyo yu uve ko ehalo lye. (1 Kor. 2:7) Oha gandja esimano kwaamboka haya pulakene koohapu dhe nohaya vulika kuye. Esimano  ndyoka he ya pe olyokukala ye na ekwatathano lyopothingo naye.—Jak. 4:8.

4 Jehova okwi inekelela wo aapiya ye iilonga yuukalele mbyoka yi li eliko lya simanenena. (2 Kor. 4:1, 7) Uukalele mbuka ohawu tu etele esimano. Jehova oku uvanekela mboka haya longitha uuthembahenda mbuka wiilonga yawo ye mu tange, yo ye etele yalwe uuwanawa sho a ti: “Ngame ote simaneke mboka haa simaneke ndje.” (1 Sam. 2:30) Aantu mboka Jehova ohe ya simaneke mokukala ye na ekwatathano ewanawa naye nokukala e ya hokwa. Shimwe ishewe, aapiya yaKalunga ooyakwawo ohaye ya popile muuwanawa.—Omayel. 11:16; 22:1.

5 Mboka hayi ‘inekele OMUWA, nokuvulika kiipango ye’ otaya ka mona onakuyiwa ya tya ngiini? Jehova okwe yu uvanekela kutya ‘ote ke ya lenga, ya lale evi, notaya ka mona okuyonuka po kwaakolokoshi.’ (Eps. 37:34) Oya tegelela oku ka pewa esimano ndyoka kaali shi okuyelekwa nasha lyoku ka mona omwenyo gwaaluhe.—Eps. 37:29.

“ITANDI KONGO ESIMANO LYAANTU”

6, 7. Omolwashike aantu oyendji ya li inaaya hala okwiitaala muJesus?

6 Oshike tashi vulu oku tu imba tu mone esimano ndyoka Jehova i ilongekidha oku tu pa? Oshinima shimwe, ongele tatu gandja unene eitulomo komadhiladhilo gaamboka kaaye na ekwatathano naye. Natu tale shoka omuyapostoli Johannes a nyola kombinga yaamboka ya li aawiliki pethimbo lyaJesus, sho a ti: “Oyendji yomaawiliki yAajuda oyi itaale Jesus; ihe molwaafarisayi inaye shi hempulula montaneho yaantu, opo kaaya kondwe mo mosinagoga. Oshoka oyo oya li ye hole okupandika kaantu komeho gokupandika kuKalunga.” (Joh. 12:42, 43) Aawiliki mboka kaya li ye na okugandja eitulomo kwaashoka Aafarisayi ya li taya dhiladhila.

7 Petameko lyuukalele we, Jesus okwa li a popi kutya omolwashike aantu oyendji itaaye ke mu taamba ko nokukala ye na eitaalo muye. (Lesha Johannes 5:39-44.) Oshigwana shaIsraeli osha li sha kala sha tegelela Mesiasa uule woomvula omathele. Jesus sho a tameke okulonga aantu, yamwe otashi vulika ya li ye shi nale shoka sha nyolwa mehunganeko lyaDaniel kutya Kristus okwa holoka. Oomwedhi dhontumba komeho sho Johannes omuninginithi a li tu uvithile aantu, oyendji yomuyo oya li ya ti: “Pamwe Johannes oye Kristus.” (Luk. 3:15) Ihe Mesiasa sho e ya, mboka ya li aalongihapu kaya li ye mu itaale. Jesus okwa li a popi kutya omolwashike sho e ya pula a ti: ‘Otamu vulu ngiini okwiitaala, ne mboka hamu simanekathana, ihe esimano ndyoka tali zi kuKalunga awike, ihamu li kongo?’

8, 9. Longitha ethaneko lyomalamba, opo wu ulike nkene esimano lyopantu hali vulu okukwidhidhika esimano ndyoka Jehova ha gandja.

8 Uuna tatu yelekanitha esimano nuuyelele, otashi ke tu kwathela tu uve ko nkene esimano ndyoka hali zi kaantu tali vulu okukwidhidhika esimano ndyoka Jehova ha gandja. Ewangandjo lyetu olyu udha omaminikilo ogendjigendji. Mbela oto dhimbulukwa oshikando shahugunina wa li wa tala uusiku kegulu kwa yela e to mono ko oonyothi omayuvi ogendji? Otashi vulika wa li wa fuulwa ‘keadhimo lyoonyothi’ ndhoka wa li wa mono. (1 Kor. 15:40, 41) Mbela ngele to tala kegulu wu li moshilando mu na omalamba ga tema, oonyothi oho kala ngaa wu dhi wete nawa? Aawe. Shika oshi li ngaaka molwaashoka omalamba gomoshilando ohage tu imbi tu mone nawa uuyelele woonyothi ndhoka dhi li kokulekule. Mbela uuyelele womalamba ngoka ge li moopate, muupale nosho wo momatungo owu na oonkondo wu vule uuyelele woonyothi? Hasho nando! Shika ohashi ningwa owala, molwaashoka omalamba ngoka ge li moshilando oge li popepi natse, nohage tu imbi tu nyanyukilwe okutala eshito lyaJehova uusiku. Opo tu mone nawa eadhimo lyoonyothi, otu na okuya kokule nuuyelele womalamba.

9 Sha faathana, ngele opu na esimano lya puka ndyoka li li momitima dhetu, otali vulu oku tu imba tu kale tu na olupandu nokukonga eadhimo tali kalelele ndyoka Jehova i ilongekidha oku tu pa. Aantu oyendji ihaya taamba ko etumwalaka  lyUukwaniilwa, molwaashoka ohaya kala ya tila kutya aatseyikile nosho wo aakwanezimo otaye ya tile ngiini. Mbela ehalo ndyoka lyokupewa esimano kaantu otali vulu okunwetha mo aapiya yaKalunga mboka ye mu iyapulila? Natu tye ando omumwatate omugundjuka otu uvithile moshitopolwa moka mu na aantu ye mu shi nawa, ihe aantu mboka kaye shi ngele ye Onzapo yaJehova. Mbela omumwatate ngoka ota ka shuna omutse miipeta omolwuumbanda? Ongiini mbela ngele gumwe ota shekwa sho ta lalakanene iinima yopambepo? Mbela ota ka pitika mboka kaaye na etaloko lya yela miinima yopambepo ya nwethe mo ehogololo ndyoka e na okuninga monkalamwenyo ye? Natu tye ando Omukriste okwa yona eyono lya kwata miiti. Mbela ne li holeke, molwaashoka a tila okukanitha iinakugwanithwa megongalo nenge molwaashoka a tila okuyemateka yaandjawo nookuume ke? Ngele okwa yona, nokwa hala a tungulule ekwatathano lye naJehova oshi li nawa i “ithane aakuluntu yegongalo,” ye mu kwathele.—Lesha Jakob 5:14-16.

10. (a) Oshike tashi ke ku ningilwa ngele oho kala to ipula unene kutya yalwe otaye ku tile ngiini? (b) Eshilipaleko lini tu na ngele otu li aaifupipiki?

10 Otashi vulika to ningi oonkambadhala wu hume komeho pambepo, ihe aamwatate ohaya kala owala taye ku pe omayele. Omayele ngoka to pewa otaga vulu oku ku kwathela ngele iho kambadhala okwiipopila omolwuuntsa, nenge molwaashoka inoo hala aniwa edhina lyoye li nyatekwe, nenge moolwaashoka owala wa hala okwiiyukipalitha. Natu tye ando oto longo oshilonga shontumba nomwiitaali omukweni. Mbela oto ke etha po okulonga naye, molwaashoka ha pandulwa nokutangwa omolwuunkulungu we nenge omolwiilonga ye yuudhiginini? Ngele owi iyadha muyimwe yomoonkalo ndhoka twa zi nokutumbula, kala wu shi kutya “omwiifupipiki ota simanekwa.”—Omayel. 29:23.

11. Otu na okwiinyenga ngiini momitima dhetu uuna tatu pandulwa, nomolwashike?

11 Aatonateli nosho wo ayehe mboka ‘ya hala’ iinakugwanithwa oye na okukala ya kotoka, opo kaaye shi ninge molwaashoka ya hala okusimanekwa. (1 Tim. 3:1; 1 Tes. 2:6) Omumwatate oku na okwiinyenga ngiini uuna ta pandulwa kugumwe nomutima aguhe, omolwiilonga ye mbyoka a longa nawa? Otu shi kutya ite ki itungila ondhimbulutho, sha hala okutya, okwiikongela esimano ngaashi omukwaniilwa Saul. (1 Sam. 15:12) Mbela omumwatate oku shi ngaa nokutya okwa tompola owala omolwohenda yaJehova, nonokutya opo a tsikile noku shi ninga monakuyiwa okwa pumbwa natango Kalunga e mu kwathele noku mu laleka nuuyamba? (1 Pet. 4:11) Omukalo ngoka hatu inyenge momitima dhetu uuna tatu pandulwa ohagu holola kutya otatu kongo esimano lini.—Omayel. 27:21.

‘OMWA HALA OKULANDULA UUHALU WAHO’

12. Oshike sha li sha kata Aajuda yamwe kaa ya pulakene kuJesus?

12 Oshinima shimwe shoka tashi vulu oku tu imba kaa tu pewe esimano kuKalunga osho omahalo getu. Omahalo ga puka otaga vulu oku tu kata tu uve ko oshili. (Lesha Johannes 8:43-47.) Jesus okwa li a lombwele Aajuda kutya kaya li ya hala oku mu pulakena, molwaashoka ‘oya li ya hala okulandula uuhalu wahe, omuhindadhi.’

13, 14. (a) Aakonakoni yiinima oya ti shike kombinga yankene uuluyi hawu yoolola omawi gaantu? (b) Oshike hashi tu kwathele tu hogolole ngoka twa hala okupalakena kuye?

13 Omathimbo gamwe ohatu taamba ko owala shoka twa hala okuuva. (2 Pet. 3:5) Jehova okwe tu shita nuukwatya uukumithi wokukala ihaatu gandja eitulomo komawi agehe ngoka tu uvite. Mwena po kashona e to pwilikine komawi ngoka wu uvite momudhingoloko gwoye. Mbela owu uvu omawi gi ili nogi ili gangapi? Otashi vulika omawi gamwe ngoka wa li kuu ga uvite nale. Nonando uuluyi woye owu na uukwatya wokuuva omawi gi ili nogi ili, ngashingeyi owa li tawu gandja eitulomo kewi lyoshinima shimwe owala. Uuluyi woye ihawu gandja eitulomo komawi galwe uuna to pulakene kugumwe ngoka ta popi. Ihe aakonakoni yiinima oya mona kutya ngele aantu oyendji taya popile mumwe ohashi kala oshidhigu  okuyoola mo ewi ndyoka wa hala wu pulakene kulyo. Shika osha hala okutya, uuna aantu yaali taya popile mumwe, owu na okuhogolola kutya okulye wa hala okugandja eitulomo. Aajuda mboka ya li ya hala okulandula uuhalu wahe yawo, omuhindadhi, kaya li ya pulakene kuJesus.

14 Ombiimbeli otayi ti kutya, ohashi vulika tu pulakene kewi ‘lyowino’ nosho wo ‘lyuugoya.’ (Omayel. 9:1-5, 13-17) Otu na okuhogolola ewi ndyoka tatu ka pulakena, molwaashoka owino nuugoya otawu tu igidha muule pathaneko. Otatu ka pulakena kewi lini? Okulyaangoka twa hala okunyanyudha. Ngele tse oonzi dhaJesus, otatu ka pulakena kuye e tatu mu landula. (Joh. 10:16, 27) Oonzi dhaJesus ohadhi “kala moshili.” (Joh. 18:37) Shimwe ishewe, ‘dho kadhi shi ewi lyomukwiilongo.’ (Joh. 10:5) Kalunga ota ka pa aalanduli yaJesus aaifupipiki esimano.—Omayel. 3:13, 16; 8:1, 18.

“OTASHI NINGWA OMOLWUUWANAWA WENI”

15. Ongiini okuhepekwa kwaPaulus kwa li taku ke etela yalwe ‘uuwanawa’ nenge tu tye esimano?

15 Ngele otatu tsikile nokulonga ehalo lyaJehova otashi ka kwathela yalwe ya pewe esimano kuye. Paulus okwa li a nyolele egongalo lyokuEfeso a ti: “Otandi mú kumagidha, mwaa se uunye, oshoka ngame otandi hepekwa molweni; ashihe otashi ningwa omoluuwanawa weni,” nenge tu tye omolwesimano lyeni. (Ef. 3:13) Omeityo lini Paulus a li a hepekwa ‘omolwenyanyu lyaEfeso’ nenge tu tye omolwesimano lyawo? Omokukala i ilongekidha oku ya kwathela. Nonando okwa li ta hepekwa okwa li u ulukile Aaefeso kutya uuthembahenda mboka ye na wokukala Aakriste owa kwata miiti nowa dhenga mbanda kaaku na we. Ando Paulus okwa sile uunye sho ta hepekwa, mbela andola inashi holola kutya ekwatathano lyawo naJehova, uukalele wawo nosho wo etegameno lyawo ka li na ongushu yasha? Eidhidhimiko lyaPaulus olya ningitha Uukriste wu hume komeho nolyu ulike kutya okuninga aantu aalongwa oku li eyambo li na ondilo.

16. Paulus okwa li a hepekwa ngiini muListra?

16 Dhiladhila nkene uulaadhi nosho wo eidhidhimiko lyaPaulus lya li lya kwathele aamwatate. Iilonga 14:19, 20 otayi ti: “Aajuda yamwe oya zi kuAntiokia shomuPisidia nokuIkonio e taye ya kuListra. Oyo oyi ihilile ongundu yaantu noya dhenge Paulus nomamanya [e] taye mu kookololele pondje yoshilando, noya li ye shi okwa sa. Ihe ooitaali sho ye mu gongalele, okwa thikama po e ta yi moshilando. Esiku lya landula okwa yi naBarnabas kuDerbe.” Dhiladhila owala komuntu a ale ase molwaashoka a dhengwa, ihe esiku lya landula oku li molweendo, moka te ende uule wookilometa 100 kolupadhi!

17, 18. (a) Ongiini Timoteus a li a landula nawa iiningwanima yi na ko nasha nokuhepekwa kwaPaulus muListra? (b) Eidhidhimiko lyaPaulus olya li lya nwetha mo ngiini Timoteus?

17 Mbela Timoteus omo a li mokati ‘kooitaali’ mbono ya li ye ya kuPaulus sho a dhengwa nomamanya? Otashi vulika opo a li, ihe embo lyIilonga inali shi popya. Paulus okwa popi montumwafo  ontiyali ndjoka a li a nyolele Timoteus a ti: “Ngoye owa landula elongo lyandje, omikalo dhandje nelalakano lyandje; . . . Ngoye owa tseya nawa, nkene nda li nda hepekwa noonkondo muAntiokia [a tidhwa mo moshilando], muIkonia [a ale a dhipagwe nomamanya] nomuListra [a dhengwa nomamanya]. Ihe Omuwa okwa hupitha ndje mo mwaayihe mbika.”—2 Tim. 3:10, 11; Iil. 13:50; 14:5, 19.

18 Timoteus okwa li ‘a landula’ nawa iiningwanima mbyoka nokwa li e shi lela eidhidhimiko lyaPaulus. Timoteus, okwa li i ilongo oshindji moshiholelwa shaPaulus. Sho Paulus a li a talele po muListra, okwa li a mono kutya Timoteus oku li Omukriste e shi okuholelwa, ‘nooitaali ayehe yomuListra nomuIkonia oya li taye mu popile muuwanawa.’ (Iil. 16:1, 2) Mokweendela ko kwethimbo, Timoteus okwa li a gwana okupewa iinakugwanithwa iinene.—Fil. 2:19, 20; 1 Tim. 1:3.

19. Ongiini eidhidhimiko lyetu tali vulu okuguma yalwe?

19 Eidhidhimiko lyetu mokulonga ehalo lyaKalunga otali vulu okuguma yalwe momukalo gwa faathana, unene tuu aagundjuka, mboka oyendji yomuyo taya koko e taya ningi aapiya yaKalunga ye na oshilonga lela mehangano lye. Aagundjuka ihayi ilongo owala kutse uukwatya wokupopya nuunkulungu nowokulonga muukalele, ihe ohaya mono wo uuwanawa sho taya tala nkene tatu ungaunga noonkalo oondhigu monkalamwenyo. Paulus okwa li ‘i idhidhimikile iinima ayihe,’ opo yalwe mboka ya li aadhiginini ya mone ‘ehupitho neadhimo lyaaluhe.’—2 Tim. 2:10.

Aagundjuka ohayi ilongo mo sha meidhidhimiko lyAakriste aakokele

20. Omolwashike tu na okutsikila nokukonga esimano ndyoka Kalunga ha gandja?

20 Mbela katu na owala okutsikila ‘nokukonga esimano ndyoka hali zi kuKalunga’? (Joh. 5:44; 7:18) Osho lela tu na okuninga! (Lesha Aaroma 2:6, 7.) Jehova oha pe ‘mboka taya lalakanene esimano omwenyo gwaaluhe.’ Shimwe ishewe, ngele tatu “dhiginine okulonga uuwanawa” ohashi kwathele yalwe ya kale aadhiginini, yo ya ka mone omauwanawa taga kalelele. Onkee ano, ino etha nando osha shi ku imbe kuu pewe esimano ndyoka Kalunga ha gandja.