Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2013

Oyi igandja nehalo ewanawa ya ka longe koNorway

Oyi igandja nehalo ewanawa ya ka longe koNorway

OOMVULA oonshona dha ka pita, omumwatate Roald nomumwameme Elsebeth, aaihokani mboka ye na omimvo 40 nasha, oya li nonkalamwenyo yuuzeko moBergen, oshilando oshitiyali muunene moNorway. Aaihokani mboka oya li haya kutha ombinga lela miilonga yegongalo pamwe nomwanakadhona Isabel nosho wo nomwanamati gwawo Fabian. Omumwatate Roald okwa li omukuluntugongalo omanga omumwameme Elsebeth a li omukokolindjila, noyana Isabel naFabian oya li aauvithi.

Ihe muSeptemba 2009, uukwanegumbo awuhe owa li wa tokola oku ka uvitha uule woshiwike kehala limwe lyi li kokulekule. Omumwatate Roald nomumwameme Elsebeth, naFabian ngoka a li e na oomvula 18, oya yi koNordkyn, oshimpokovi shi li moshilongo shaFinnmark, shi li pombanda yOngonga ya-Arctic. Koshitopolwa shoka oku na omukunda gwedhina Kjøllefjord. Oya li ya longo pamwe naamwatate naamwameme mboka nayo ya li ye ya koshitopolwa shoka shokokule ya kuthe ombinga miilonga yokuuvitha. Omumwatate Roald okwa ti: “Petameko lyoshiwike shoka onda li ndi ipandula shili sho ndu unganeka iinima yandje nawa, opo ndi vule okukutha ombinga miilonga mbyoka yi ikalekelwa uule woshiwike.” Ihe konima moshiwike osho tuu shoka, Roald okwa tameke okukala u uvite inaa manguluka. Mbela oshike sha ningwa po?

 EPULO NDYOKA KA LI E LI TEGELELA

Omumwatate Roald okwa ti: “Nonando kanda li nde shi tegelela, omumwatate Mario, omukokolindjila moFinnmark, okwe tu pula ngele otatu vulu okuya kondoolopa yedhina Lakselv tu ka kwathele egongalo ndyoka li na aauvithi 23.” Epulo ndyoka olya li lya kumitha omumwatate Roald noonkondo. Okwa yelitha a ti: “Ngame naElsebeth otwa li tu na edhiladhilo lyoku ka longa koshitopolwa hoka kwa li ku na ompumbwe onene, ihe shoka otwa li twa dhiladhila oku ke shi ninga ngele aanona yetu ye li kuyo yene.” Muule womasiku omashona ngoka Roald a li u uvithile koshitopolwa shoka shokokule, okwa li a mono kutya aantu oye na lela ehalo lyokwiilonga kombinga yaJehova. Oya li ya pumbwa ekwatho pethimbo mpoka, ihe hakonima yethimbo. Okwa ti: “Epulo ndyoka olya li lya piyaganeke omadhiladhilo gandje nonda li nda lala ondangala uule womasiku gontumba.” Omumwatate Mario okwa fala uukwanegumbo waRoald kondoolopa yaLakselv, ndjoka yi li ookilometa 240 lwaampono kuumbugantu waKjøllefjord. Omumwatate Mario okwa li a hala ye ki imonene ko yo yene kutya egongalo ndyoka eshona olyi li ngiini.

Pethimbo ndyoka megongalo moka omwa li aakuluntugongalo yaali, gumwe gwomuyo omumwatate Andreas ngoka a li e yu ulukile oshitopolwa shaLakselv nosho wo Oshinyanga shUukwaniilwa. Egongalo olya li lye ya taamba ko nomaako agehe. Aamwatate naamwameme megongalo oya li ya lombwele Roald naElsebeth kutya oya halelela uukwanegumbo wawo wu tembukile koshitopolwa shoka wu ka kwathele egongalo lyawo miilonga yUukwaniilwa. Andreas okwa popi ti imemeha ta ti kutya okwa ninga nale omalongekidho, opo Roald naFabian ya ye kokatutsu! Mbela oya li taya ka ninga po shike?

EHOGOLOLO NDYOKA TWA LI TU NA OKUNINGA

Fabian tango okwa ti: “Inandi hala okutembukila moshitopolwa shika.” Edhiladhilo lyokuthiga po ookuume ke kopothingo mboka a putuka nayo megongalo moshilongo shawo nokutembukila kokandoolopa okashona, ka li e li panda. Natango, ka li a mana neilongo lye miinima yomalusheno. Ihe omumwameme Isabel (ngoka a li e na oomvula 21) sho a pulwa kutya oku shi uvitile ngiini, okwa ti: “Osho naanaa nda kala nda halelela nale!” Opo nduno okwa gwedha ko a ti: “Sho nde ke shi dhiladhila muule, onda kala tandi ipula kutya ‘oshi li tuu pandunge? Mbela itandi ka yuulukwa ookahewa kandje? Mbela nandi kale owala megongalo moka ndi igilila nonkalo yamo tayi opalele ndje nawa?’” Mbela omumwameme Elsebeth okwa li i inyenge ngiini sho a pulwa? Okwa ti: “Onda li ndu uvite kutya Jehova okwe tu pa oshinakugwanithwa tu li uukwanegumbo, ihe onda li tandi ipula negumbo lyetu ndyoka opo lyo opalekwa nawa nosho wo kiinima ayihe mbyoka yi li mo mbyoka twa likola uule woomvula 25.”

Elsebeth naIsabel

Sho oshiwike shi ikalekelwa sha pu ko, Roald naanegumbo lye oya galukile kuBergen, ihe oya kala tayi ipula naamwatate naamwameme mboka ye li muLakselv, ondoolopa ndjoka yi li ookilometa 2 100 okuza mpoka ye li. Elsebeth okwa ti: “Onda kala nokugalikana kuJehova iikando niikando, nonda kala handi kwatathana nookuume mboka twa li twa tsakanene nayo notwa kala hatu itumine omathano nokuhokolelathana iimoniwa.” Roald okwa ti: “Opo edhiladhilo lyokutembuka li ningine mungame onda li nda pumbwa ethimbo lya gwana. Onda li natango ndi na okutala kutya otatu ka hupa ngiini. Otatu ki ikwathela ngiini? Onda kala olundji nokugalikana kuJehova nonda popi noyaandjetu nosho wo naamwatate mboka ya pyokoka.” Fabian okwa ti: “Mpoka ngaa pwa li pu thike okudhiladhila kwandje kombinga yokutembuka, opo ngaa pwa li pu thike okumona kutya kandi na omatompelo gasha gokutinda okutembuka. Onda kala nokugalikana kuJehova, nehalo lyokutembuka olye ende tali koko mungame.” Ongiini mbela kombinga yaIsabel? Opo i ilongekidhile etembu nawa okwa li a tameke okukokola ondjila moshitopolwa shawo. Konima yoomwedhi hamano dhokukokola ondjila, okwa kala wo olundji ha konakona Ombiimbeli paumwene, nokwa li u uvite kutya ota vulu okutembukila koshilongo shilwe.

OONKATU NDHOKA YA KATUKA YA ADHE ELALAKANO LYAWO

Ehalo lyokutembukila koshitopolwa hoka ku na ompumbwe yaauvithi olya li lya koko muukwanegumbo mboka, nowa li wa katuka oonkatu opo wu adhe elalakano lyawo. Roald okwa li e na iilonga hayi futu nawa nokwa li e yi hole. Nonando ongawo, okwa li i indile a pewe efudho lyomvula ayihe nokuli. Ihe omuhona gwe okwa li e mu pula a kale ha longo iiwike iyali, e ta kala pevi iiwike ihamano. Roald okwa ti: “Ofuto yandje oya li ya shunithwa pevi noonkondo, ihe osha li owala she endele ndje nawa.”

Omumwameme Elsebeth okwa ti: “Omusamane gwandje okwa li a pula ndje ndi konge egumbo muLakselv, nondi hiilithe egumbo lyetu lyomuBergen. Osha li sha pula ethimbo olindji noonkambadhala, ihe otwa li twa pondola. Okwa gwedha ko a ti: “Konima yokathimbo, aanona yetu oya li ya mono iilonga, haya longo omasiku gamwe, noya li ye tu kwathele mokulanda iikulya nosho wo nokwaambidhidha noshimaliwa shomahooli.”

Isabel okwa ti: “Sho twa tembukile kokandoolopa hoka okashona, eshongo enene olya li okumona iilonga ndi  ikwathele sho te kokola ondjila. Omathimbo gamwe onda li handi kala nda teka omukumo.” Ihe sho Isabel a longo iilonga yopakathimbo mbyoka a li ta vulu okumona iikando omugoyi momvula okwa li a vulu okukala noshimaliwa shoompumbwe dhe. Fabian okwa li e shi enditha ngiini? Okwa ti: “Opo ndi mane eilongo lyandje miinima yomalusheno, onda li nda pumbwa oku ka longa ndi dheulwe miilonga mbyoka. Onda li nda dheulilwa iilonga mbyoka sho ndi li muLakselv. Konima yethimbo, onda piti ekonakono nonda li nda mono iilonga yopakathimbo ndi li omupangeli gwiikwamalusheno.”

NKENE YAMWE YA TAMUNUNA MO UUKALELE WAWO

Marelius naKesia taya gandja uunzapo komukulukadhi gwOmusami moNorway

Omumwatate Marelius nomukulukadhi gwe Kesia, nayo oya li ye na ehalo lyoku ka longa koshitopolwa hoka kwa li ku na ompumbwe onene yaauvithi. Marelius, ngoka e na ngashingeyi oomvula 29 okwa ti: “Onda li ndi inyengithwa ndi tamunune mo uukalele wandje kiipopiwa poshigongi shoshitopolwa nokomapulapulo ngoka ga li ga ningwa po kombinga yuukokolindjila.” Osha li omukundu omunene komumwameme Kesia, ngoka ngashingeyi e na oomvula 26, okutembuka po paapambele ye. Okwa ti: “Onda li nda tila oku ka kala kokule naantu mboka ndi hole.” Shimwe ishewe, Marelius okwa li ha longo iilonga yokwiikongela omboloto kehe esiku opo a vule okufuta omukuli gwegumbo moka haya kala. Omumwatate Marelius okwa ti: “Otwa li twa vulu okutembuka kekwatho lyaJehova konima sho twa kala nokugalikana ethimbo olindji opo e tu kwathele tu ninge omalunduluko.” Petameko, aaihokani mboka oya li haya longitha ethimbo olindji okuninga omakonakonombiimbeli. Konima, aaihokani mboka oya landitha po egumbo lyawo, nokweetha po iilonga. MuAuguste 2011 oya li ya tembukile kondoolopa yaAlta, yi li muumbangalantu waNorway. Opo yi ikwathele, Marelius oha longo e li omuyaluli gwiimaliwa, omanga omumwameme Kesia ha longo mositola.

Omumwatate Knut nomukadhi Lisbeth, mboka ye li metifa lyoomvula 30, oya li yi inyengithwa komahokololo gomo-Yearbook ngoka ge na ko nasha naamboka haya longo kiitopolwa hoka ku na ompumbwe onene yaauvithi yUukwaniilwa. Lisbeth okwa ti: “Iimoniwa mbyoka oye tu kwathele tu dhiladhile oku ka longa kiilongo yilwe, ihe onda li tandi kwatakwata molwaashoka onda li nda limbililwa ngele otandi vulu ngaa oku shi ninga.” Kakele kaashono, oya li ya katuka oonkatu ya adhe omalalakano gawo. Omumwatate Knut okwa ti: “Opo tu hupithe oshimaliwa, otwa li twa landitha po egumbo lyetu, e tatu tembukile megumbo lyameme. Opo tu lole uutoye wokulonga moshilongo shilwe, otwa li twa tembukile kegongalo lyOshiingilisa lyi li muBergen, hoka twa kala uule womumvo gumwe hatu zi megumbo lyameemweno.” Konima owala yokathimbo, omumwatate Knut nomukadhi Lisbeth oya li ya tembuka e taya yi ya ka longe koUganda. Omumvo kehe ohaya yi koNorway ya ka longe uule woomwedhi mbali. Shoka ohashi ya kwathele ya mone okamaliwa ya vule okukala moUganda, nokuuvitha moka uule womvula ayihe.

“KONAKONA MWENE, U MONE, NKENE OMUWA OMWAANAWA”

Roald okwa ti: “Ngashingeyi uukwanegumbo wetu owu na ekwatathano lyopothingo.”

Iinima oya li ye endele ngiini aaihokani mboka yi igandja nehalo ewanawa? Omumwatate Roald okwa ti: “Ngashingeyi sho tu li kokule negumbo ohatu kala ethimbo olindji pamwe tu li uukwanegumbo mokuyelekanitha naasho twa li moBergen. Uukwanegumbo wetu owa hangana lela. Oshi li elaleko nuuyamba kutse sho aanona yetu taya humu komeho pambepo.” Okwa gwedha ko a ti:  “Ngashingeyi otwa tula ngele tashi ya piinima yopamaliko. Inayi simana we kutse ngaashi twa li tatu dhiladhila.”

Omumwameme Elsebeth okwa li i ilongo elaka lilwe. Omolwashike mbela? Moshitopolwa moka hamu longo Egongalo lyaLakselv nosho wo momukunda gwaKarasjok, ohamu kala unene aantu yomuhoko gwAasami, ngoka gwa thikama po maantu ya za kuumbangalantu waNorway, Sweden, Suomi nosho wo Rusia. Opo Elsebeth a vule okupopya naantu mboka okwa li i ilongo elaka lyOshisami. Ngashingeyi oha vulu okukundathana kashona naapopi yelaka ndyoka. Mbela okwa nyanyukwa ngaa sho ta longo moshitopolwa shoka oshipe? Okwa yamukula ti imemeha ta ti: “Ondi na aakonakonimbiimbeli yahamano. Onda nyanyukwa okulonga moshitopolwa shika!”

Omumwatate Fabian, ngoka ngashingeyi ta longo e li omuyakuligongalo noku li omukokolindjila, okwa ti kutya ye nomumwayina Isabel oya kwathela aagundjuka yatatu yoomvula omulongo nasha megongalo lyawo epe mboka ya li ya pumbwa etsomukumo, opo ya vule okukala haya kutha ombinga pakuudha momaipyakidhilo gegongalo. Ngashingeyi aagundjuka mboka ayehe yatatu ohaya kutha ombinga muukalele shi vulithe nale. Yaali yomuyo oya ninginithwa nokuli, noya li ya kutha uukwathelikokolindjila muMaalitsa 2012. Omumwameme gumwe omugundjuka ngoka a li a falafalwa kokule noshili, okwa pandula Fabian naIsabel sho ye mu kwathele “a penduke pambepo.” Fabian okwa ti: “Osha li sha gumu omutima gwandje sho a popi ngaaka. Ohashi nyanyudha shili okukwathela gumwe!” Isabel okwa ti: “Sho ndi li moshilonga shika onda ‘konakona mwene, nonda mona, nkene OMUWA omwaanawa.’” (Eps. 34:8) Okwa ti ishewe: “Ohashi nyanyudha shili okulonga moshitopolwa shika!”

Omumwatate Marelius naefolo Kesia oye na onkalamwenyo yi li paunathangwa, ihe aayamba pambepo. Megongalo lyaAlta, moka ya tembukila, ngashingeyi omu na aauvithi 41. Marelius okwa ti: “Otashi tsu omukumo okumona nkene onkalamwenyo yetu ya lunduluka lela. Otatu pandula Jehova sho tatu mu longele tu li aakokolindjila moshitopolwa shika. Kapu na shoka tashi vulu okweeta enyanyu shi vulithe shoka.” Kesia okwa gwedha ko a ti: “Ondi ilonga okukala ndi inekela muJehova, nokwe tu sila oshimpwiyu shili. Onde shi mona wo kutya okukala kokule naapambele osha kwathela ndje ndi kale nda lenga ethimbo olindji ndyoka hatu kala pamwe tu li aaihokani. Ihandi ipe uusama omolwetokolo ndyoka twa ninga.”

Knut naLisbeth taya konakona Ombiimbeli nuukwanegumbo wumwe moUganda

Omumwatate Knut nomukadhi Lisbeth otaye shi enditha ngiini koUganda? Knut okwa ti: “Ohashi pula ethimbo okwiigilila omudhingoloko nosho wo oohedhi dhaantu yalwe. Omathimbo nomathimbo ohatu kala tu na ompumbwe yomeya nolusheno, nomathimbo gamwe ohatu kala tatu ehama momapunda. Ihe ohatu vulu okuninga omakonakonombiimbeli ogendji ngaashi twa hala!” Lisbeth okwa ti: “Opu na iitopolwa yimwe mbyoka inaayi uvithilwa nando onale onkundana ombwanawa, oku ka thika ko ohashi pula owala etatawili okuza mpoka hatu kala. Shampa twa yi ko ohatu adha aantu taya lesha Ombiimbeli nohaye tu pula tu ya longe. Okulonga aantu aaifupipiki Ombiimbeli ohashi tu etele enyanyu itaali vulu okuyelekwa nasha!”

Omuwiliki gwetu Jesus Kristus oha kala a nyanyukwa noonkondo sho a tala okuza megulu nkene iilonga yokuuvitha tayi longwa miitopolwa oyindji. Odhoshili kutya aapiya ayehe yaKalunga ohayi igandja nehalo ewanawa ya gwanithe po elombwelo lyaJesus ‘lyokuninga aantu ayehe aalongwa.’ — Mat. 28:19, 20.

Tseya oshindji

OOLYE TAYA LONGO EHALO LYAJEHOVA KUNENA?

Iilonga yuutumwa oshike?

Oshike sha kwatelwa mo mokuninga omutumwa? Ohaya mono edheulo lini li ikalekelwa?