Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2013

Longela Jehova itoo ipe uusama

Longela Jehova itoo ipe uusama

“Otandi dhimbwa shoka shi li konima notandi ningi ashihe shoka tandi shi vulu, opo ndi adhe shoka shi li komeho.” — FIL. 3:13.

1-3. (a) Aantu yamwe oyu uvite ngiini kombinga yiinima mbyoka ya ninga nenge inaaya ninga, naashoka ohashi tu gumu ngiini? (b) Moshiholelwa shaPaulus otatu ilongo mo shike shi na ko nasha nokulongela Kalunga itaa tu ipe uusama?

OMUNYOLI GWIITEYO J. G. Whittier okwa nyola a ti: “Aantu oyendji ohaya nyola nenge ya popye ya nika oluhodhi taya ti: ‘Ando onda ningile ngeyi!’” Aantu ohaya popi ngaaka ngele ya dhiladhila kutya ando onkalamwenyo yawo oyi li ngiini ando oya ningile iinima yimwe momukalo gwi ili. Okwiipa uusama okwo okukala wu uvite oluhodhi omolwiinima mbyoka wa ninga nenge inoo ninga. Atuheni otwa ninga iinima mbyoka hatu kala twa hala ando tu ke yi ningulule momukalo gwi ili. Mbela oho ipe uusama moshinima shini?

2 Aantu yamwe oya ninga omapuko tashi vulika nokuli ya yona sha kwata miiti. Yamwe inaya yona sha kwata miiti, ihe ohaya kala tayi ipula ngele omatokolo gawo gamwe ngoka ya ninga monkalamwenyo ogo ngaa shili ga dhenga mbanda. Aantu yamwe oya vula okweetha po okudhiladhila kiinima mbyoka ya ningile notaya pula komeho. Omanga yamwe haya kala aluhe taya ti kutya “andolee” omolwanakuziwa yawo. (Eps. 51:3) Ngoye owu li monkalo yini? Mbela owa hala ando wu kale to longele Kalunga itoo ipe uusama okuza nena sigo aluhe? Mbela opu na oshiholelwa shagumwe shoka natse tatu vulu okwiilonga mo sha? Eeno, opu na shoka shomuyapostoli Paulus.

3 Monkalamwenyo ye, Paulus okwa li a ningi omapuko ga kwata miiti nokwa li wo a ningi omatokolo gopandunge. Okwa li u uvitile nayi omapuko ngoka a ningile, ihe okwa li a vulu okupondola monkalamwenyo ye mokulongela Kalunga nuudhiginini. Natu tale kunkene oshiholelwa she tashi tu longo kombinga yokulongela Kalunga itaatu ipe uusama.

ONAKUZIWA YAPAULUS

4. Iinima yini omuyapostoli Paulus a li a ningi monakuziwa?

4 Manga a li Omufarisayi omugundjuka, Paulus okwa li a ningi iinima mbyoka e ki ipa uusama konima. Pashiholelwa, okwa li a ningi iikonga yokuhepeka nonyanya aalongwa yaKristus. Ombiimbeli oya popi kutya nziya sho Stefanus a  dhipagwa, “Saulus [ngoka konima a ka ninga Paulus] okwa kambadhala okuhanagula po egongalo. Oye okwe ende nomagumbo agehe nokwa hili mo ooitaali ayehe, aalumentu naakiintu, nokwe ya edhililitha mondholongo.” (Iil. 8:3) Omulongwantu gumwe gwOmbiimbeli Albert Barnes kwa ti kutya oshitya “hanagula” otashi ulike kutya Saulus okwa li a ponokele nonyanya egongalo lyopaKriste a fa “oshilikama.” Barnes okwa ti: “Saulus okwa li a ponokele ongeleka a fa oshilikama.” Molwaashoka Saulus okwa li Omujuuda i itula mo meitaalo lye, okwa li u uvite kutya osha li oshinakugwanithwa she shopaKalunga a hulithe po Uukriste. Onkee ano, okwa li a tsikile nokuhepeka Aakriste nonyanya nokwa li ‘u udha uutondwe nokwa li a hala oku ya dhipaga, ayehe aalumentu naakiintu’ nokambadhala yoku ya hulitha po. — Iil. 9:1, 2; 22:4. *

5. Oshike sha li sha ningitha Saulus e ethe po okuhepeka aalongwa yaJesus e ta tameke okuuvitha kombinga yaKristus?

5 Saulus okwa li e na elalakano lyokuya kuDamasko, a ka kuthe mo Aakriste momagumbo gawo noku ya fala kuJerusalem hoka ya li ye na oku ka pangulwa. Ihe okwa nyengwa, molwaashoka Omutse gwegongalo lyopaKriste ka li e mu etha e shi ninge. (Ef. 5:23) Manga Saulus a li mondjila u uka kuDamasko, Jesus okwa li e mu ihololele nokwa li a tsika kuuyelele pashikumithalonga. Jesus okwa li a tumu Saulus kuDamasko a ka tegelele omalombwelo galwe ga gwedhwa po. Otu shi shi kutya oshike sha ka ningwa po. — Iil. 9:3-22.

6, 7. Oshike tashi ulike kutya Paulus okwa li e shi nawa onakuziwa ye yiyemateka?

6 Omikalo dhaPaulus odha li dha lunduluka nziya sho a ningi Omukriste. Pehala lyokukala e tonde noonkondo Aakriste, okwa tameke okukala tu uvitha nuulaadhi kombinga yaKristus. Nonando ongaaka, okwa li a nyola nokuli kombinga ye mwene a ti: “One omwa hokololelwa okukala kwandje kwonale, nkene nda li ependa meitaalo lyopaShijuda nonda tidhagana egongalo lyaKalunga ndaa na ohenda nonda ningi ashihe shoka tandi vulu oku li hanagula po.” (Gal. 1:13) Montumwafo ye ndjoka a li a nyolele Aakorinto, Aafilipi noomwaandjoka a nyolele Timoteus, okwa li a popi ishewe kombinga yankene i ipa uusama omolwonakuziwa. (Lesha 1 Aakorinto 15:9; Fil. 3:6; 1 Tim. 1:13) Paulus ka li i iyuvitile uuntsa sho a nyola iinima mbyoka kombinga ye mwene, ye ka li wo ti ihumbata andola a fa inaa ninga sha. Okwa li e shi shi nawa kutya okwa ninga omapuko ga kwata miiti. — Iil. 26:9-11.

7 Omulongwantu gumwe Frederic W. Farrar okwa popi kombinga yonkandangala ndjoka Saulus a dhana “miilonga iiwinayi yokuhepeka aantu nonyanya.” Farrar okwa gwedha ko a ti kutya ngele otwa dhiladhila kunkene Paulus a hepeke nonyanya Aakriste, shika otashi ke tu kwathela tu uve ko eyeme ndyoka a li e na nankene yalwe ya li haye mu ula nayi. Omathimbo gamwe otashi vulika Paulus a li a popiwa naye kaamwatate mboka opo taye mu mono lwotango yomomagongalo ngoka a li a talele po tashi vulika ya li taya ti ‘ongoye ndishi Paulus ngoka a li he tu hepeke?’ — Iil. 9:21.

8. Paulus okwa li u uvitile ngiini ohenda nohole ndjoka Jehova naJesus ya li ye mu ulukile, naashoka otashi tu longo shike?

8 Paulus okwa li a mono kutya okesilohenda owala lyaKalunga a li a vulu okugwanitha po uukalele we. Okwa li a popi uukwatya waKalunga wohenda lwiikando 90 moontumwafo dhe 14 shi vulithe aanyoli yalwe yOmbiimbeli. (Lesha 1 Aakorinto 15:10.) Paulus okwa li e na olupandu lwomuule lwankene a li u ungaungiwa naye nohenda nokwa li a hala okushilipaleka kutya ina hepitha ohenda yaKalunga. Onkee ano, okwa li a “longo unene” e vulithe aayapostoli yalwe. Oshiholelwa shaPaulus otashi ulike lela kutya ngele otwa hempulula oondjo dhetu nokulundulula onkalamwenyo yetu, nena Jehova ote ke tu dhimina po nehalo ewanawa, nokuli nomayono getu ga kwata miiti pakankameno lyekuliloyambo lyaJesus. Ndino ka li shi tuu etompelo ewanawa kwaamboka  haye shi mono oshidhigu okwiitaala kutya otaya vulu okumona uuwanawa pauhandimwe meyambo lyaKristus! (Lesha 1 Timoteus 1:15, 16.) Nonando Paulus okwa li a hepeke unene Kristus, okwa li a nyola a ti: ‘Otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje.’ (Gal. 2:20; Iil. 9:5) Paulus okwi ilonga kutya oku na okuninga ngaashi ta vulu miilonga yaKalunga, nopwaahe na okutala konakuziwa ye, opo kaa ka kale ti ipe uusama omolwoshinima shilwe. Mbela ngoye owi ilonga okukala to ningi ngaaka?

Paulus okwa li i ilongo okulongela Kalunga itii ipe uusama

MBELA OHO KALA TO I PE UUSAMA OMOLWOSHINIMA SHONTUMBA?

9, 10. (a) Omolwashike aapiya yaJehova yamwe haya kala tayi ipe uusama omolwiinima yontumba? (b) Omolwashike okukala to ipula aluhe naashoka wa ninga monakuziwa kwa puka?

9 Mbela owa ninga iinima mbyoka ngashingeyi to ipe uusama omolwa yo? Mbela opu na esiku wa manene po ethimbo noonkondo dhoye mokulalakanena oshinima sha puka? Mbela owa ninga oshinima shoka she ehameka yalwe? Nenge tashi vulika wu na omadhiladhilo omawinayi gokukala to ipe uusama omolwetompelo lyontumba. Ngele osho wu uvite ngawo, oto vulu okuninga po shike?

10 Aantu oyendji ohaya kala ye na oshimpwiyu ethimbo kehe. Ohaya kala ya nika oluhodhi notayi ipe uusama omolwokudhiladhila lwiikando kombinga yomapuko gawo. Shoka ohashi ningitha omuntu wu kale wu na oshimpwiyu sha pitilila. Mbela okukala to ipula ohaku kandula po ngaa uupyakadhi? Hasho nando! Dhiladhila andola to kambadhala okuudha omeya moshimbamba. Oonkambadhala dhoye itadhi ka pondola sha nando molwaashoka omeya itaga ka kala mo nando moshimbamba shoka. Pehala lyokukala wa limbililwa, oto vulu okumona iizemo iiwanawa ngele owa katuka pandunge. Oto vulu okupa omuntu ngoka wa ninga nayi ombili, tashi vulika wu pange ishewe naye uukuume uuwanawa mboka mwa li mu na. Oto vulu okuyanda kehe shimwe shoka sha li she etitha uupyakadhi, nokuninga ngaaka otaku ka keelela kaapu ka holoke uupyakadhi monakuyiwa. Ihe otashi vulika wo wu na okwiidhidhimikila iilanduliko yomapuko goye.  Ihe okukala to ipula noshinima showala otashi ke ku nkundipaleka notashi ke ku ningitha wu kale itoo vulu okulongela Kalunga nomutima aguhe. Kapu na shoka tashi ku zile mokukala wu li momalimbililo.

11. (a) Oshike tu na okuninga opo tu mone esilohenda nuuwanawahenda waJehova? (b) Ekotampango lini tali ke tu kaleka tu na ombili nonando otwa yona monakuziwa?

11 Yamwe ohaya kala tayi ipula niinima mbyoka ya ninga nale nokuli sigo oponkatu mpoka ihaaya kala we yu uvite ye na oshilonga momeho gaKalunga. Otashi vulika ya kale yu uvite itaaya vulu okusilwa ohenda kuKalunga molwaashoka ye wete kutya oya ninga unene omapuko ogendji. Oshili oyo kutya, nonando oya ninga omapuko monakuziwa otaya vulu okwiiyela ombedhi, okulunduluka nokupula Kalunga e ya dhimine po. (Iil. 3:19) Jehova ota vulu oku ya sila ohenda noku ya ulukila uuwanawahenda we ngaashi e shi ningila yalwe oyendji. Jehova ota ka sila ohenda omuntu ngoka omwiifupipiki, omunashili naangoka i iyela ombedhi tashi zi komutima. Pashiholewa, okwa li a dhimine po Job ngoka a li i iyele ombedhi omolwomapuko ge ngoka a li a ningi.’ (Job 42:6) Ombiimbeli oye tu ladhipika tayi ti: “Oongoka ta holeke iilonga ye iiwinayi, oye ke na elago, ihe ngoka te yi hempulula noteyi etha, oye ta silwa ohenda.” (Omayel. 28:13; Jak. 5:14-16) Onkee ano, otu na okwiihokolola kuKalunga, nokugalikana e tu dhimine po nokukatuka oonkatu opo tu pukulule omapuko getu. (2 Kor. 7:10, 11) Ngele otwa ningi ngaaka, otatu ka nyanyukilwa esilohenda lyaaNgoka ha “dhimi po oondjo odhindji.” — Jes. 55:7, OB 1954.

12. (a) Oshiholelwa shaDavid otashi tu longo shike kombinga yomukalo gwa dhenga mbanda gwokuungaunga neiyuvo tali tu nyenyetele? (b) Omeityo lini Jehova a li i igaluluka, nokukala tu shi oshinima shoka ohashi tu kwathele ngiini? (Tala oshimpungu.)

12 Egalikano oli na oonkondo, nokupitila mulyo Kalunga ohe tu kwathele tu longe oshindji. David okwa li a holola omaiyuvo ge gomuule megalikano lyeitaalo ndyoka li li mOmapisalomi. (Lesha Episalomi 32:1-5.) Manga David inaa hempulula omayono ge kuKalunga, okwa popi kutya okwa kala u uvite nayi noonkondo omolweiyuvo lye ndyoka lya li tali mu nyenyetele. Okwa li a gwililwa po pamadhiladhilo nopalutu noka li we a nyanyukwa sho ina hempulula omayono ge. Oshike sha li sha ningitha David a dhiminwe po nokumone epepelelo? Okwi ihempulula kuKalunga. Jehova okwa li a yamukula omagalikano gaDavid nokwa li e mu nkondopaleke a tsikile nonkalamwenyo ye noku longe sha shomupondo. Sha faathana, ngele oho kala to ipula nomapuko ngoka wa ninga, galikana kuJehova nomutima aguhe e ku dhimine po nokuninga ngaashi to vulu u ninge omalunduluko. Opo nduno kala nuushili kutya Jehova okwa pulakena komagalikano goye nokwe ku dhimina po. — Eps. 86:5.

DHILADHILA KONAKUYIWA

13, 14. (a) Otu na okukala tatu ipula unene nashike ngashingeyi? (b) Omapulo geni tage ke tu kwathela tu konakone onkalamwenyo yetu kunena?

13 Odhoshili kutya otatu vulu okwiilonga ko sha komapuko ngoka twa ninga monakuziwa, ihe katu na okukala twa limbililwa kwaashoka twa ninga. Onkee ano, pehala lyokukala tatu ipula nonakuziwa, otu na okukala tatu ipula kombinga  yethimbo ndika nokwaandyoka tali ya. Ipula to ti: ‘Mbela okuza ngashingeyi otandi ki ipa uusama omolwomatokolo ngoka tandi ningi? Mbela otandi ka kala tandi dhiladhila kutya onda li ndi na okuninga iinima momukalo gwi ili? Mbela otandi longele ngaa Kalunga nuudhiginini opo kaandi ka kale tandi ipe uusama monakuyiwa?’

14 Sho uudhigu uunene wu li popepi, inatu hala tu kale twa gwililwa po komaipulo ngaashi: ‘Mbela otashi vulika nda li ndi na okulonga oshindji miilonga yaKalunga? Omolwashike inaandi kokola ondjila sho nda li ndi na ompito? Oshike shi imbi ndje kaandi lalakanene okuninga omuyakuligongalo? Mbela onda ninga ngaa oonkambadhala dha mana mo opo ndi zale omuntu omupe? Mbela ngame omuntu ngaa ngoka Jehova a hala ndi ka kale muuyuni we uupe?’ Pehala lyokukala owala tatu ipula nomapulo ngoka ga kwata miiti, otu na oku ga longitha ge tu kwathele twi ikonakone nokushilipaleka kutya otatu longo nuudhiginini miilonga yaJehova. Ngele hasho, otashi vulika tu kale owala tatu tsikile nonkalamwenyo ndjoka tayi ke tu ningitha tu ka kale tatu ipe uusama shi vulithe nale. — 2 Tim. 2:15.

INO IPA UUSAMA MOLWAASHOKA HO LONGO IILONGA MBYOKA IIYAPUKI

15, 16. (a) Oyendji oya ninga omaiyambo geni opo ya longele Kalunga ethimbo lyu udha? (b) Omolwashike kaatu na okwiipa uusama omolwomaiyambo ngoka twa ninga opo tu humithe komeho iilonga yUukwaniilwa?

15 Ongiini kombinga yaamboka mwa ninga omaiyambo mu longele Jehova ethimbo lyu udha? Otashi vulika mwa yamba po eithano ewanawa nenge oongeshefa tadhi shi pondola opo mu kaleke oonkalamwenyo dheni dhanathangwa mu vule okulonga ethimbo olindji miilonga yUukwaniilwa. Nenge tashi vulika inoo ya mondjokana nenge wu li mondjokana ihe owa tokola kuu mone aanona opo wu vule okulonga ethimbo lyuudha ngaashi okulonga moBetel, miilonga yokutunga muuyuni auhe, miilonga yuutonatelishikandjo nenge yuutumwa, iilonga mbyoka wa li itoo vulu okulonga ando owa ningile ngaaka. Mbela owu na okukala to ipe uusama ngashingeyi sho oomvula tadhi hedha ko sho wa ninga etokolo lyokukala miilonga yaJehova? Mbela owu na okukala wu uvite kutya kwa li wu na okuninga omaiyambo ngoka nenge tashi vulika wu uvite kutya owe ga ninga pethimbo lya puka? Aawe nando!

16 Owa li wa ningi omatokolo ngoka molwaashoka owu hole shili Jehova nosho wo molwaashoka owu na ohole yomuule yokukwathela yalwe mboka ya hala oku mu longela. Ino pumbwa okukala to dhiladhila kutya andola owu na onkalamwenyo yi li nawa ngele ando owa lalakanenene iinima yilwe. Oto vulu okukala wu uvite wa gwanenwa shili sho wa ninga shoka wa li wu uvite kutya osho shi li mondjila. Oto vulu wo okukala wa nyanyukwa molwaashoka owa ninga shoka to vulu wu longele Jehova. Ita ka dhimbwa iilonga yoye yeiyambo. Mokukalamwenyo kwashili hoka twa tegelela, Jehova ote ke ku yambeka nomayambeko ge vule pwaangoka to dhiladhila ngashingeyi. — Eps. 145:16; 1 Tim. 6:19.

NKENE TO VULU OKULONGELA JEHOVA ITOO IPE UUSAMA

17, 18. (a) Ekotampango lini lya li lya kwathele Paulus a longele Kalunga itii ipe uusama? (b) Ongiini to vulu okuholela oshiholelwa shaPaulus?

17 Ekotampango lini lya li lya kwathele Paulus kaa longele Kalunga ti ipe uusama noonkondo? Okwa ti kutya okwe etha po okwiipa uusama omolwonakuziwa ye nokwa li ha longo nuudhiginini opo a ka mone ondjambi yomwenyo gwaaluhe. (Lesha Aafilippi 3:13, 14.) Paulus ka li ha kala ti ipula niilonga ya puka mbyoka a li a longo sho a li melongelokalunga lyOshijuda. Pehala lyaashono, okwa kala i itula mo opo a vule oku ka mona ondjambi yomwenyo gwaaluhe.

18 Atuheni otatu vulu okutula miilonga ekotampango ndyoka li li moohapu dhaPaulus. Pehala lyokukala tatu dhiladhila komapuko ngoka twa ninga monakuziwa noitatu vulu oku ga lundulula, otu na okupula komeho opo tu ka mone ondjambi. Ihe shoka itashi ti kutya otatu ka dhimbwa omayono getu, ihe otashi ti kutya katu na okukala twi iyala omolwago. Otatu vulu okukambadhala tu dhimbwe shoka twa ningile, e tatu longele Kalunga ngaashi tatu vulu ngashingeyi nokutala kondjambi ndjoka yi li komeho.

^ okat. 4 Ombiimbeli oya popya olundji kutya aakiintu oyo yamwe mboka ya li ya hepekwa nonyanya kuSaulus. Shika otashi ulike kutya oyo unene ya li haya kutha ombinga miilonga yokuuvitha methelemumvo lyotango, ngaashi owala haye shi ningi kunena. — Eps. 68:11.