Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Desemba 2012

Oshungolangelo yOshiingilisa sha pupalekwa oya nyanyangidhwa nelalakano lyashike?

Oshungolangelo yOshiingilisa sha pupalekwa oya nyanyangidhwa nelalakano lyashike?

AALUMENTU naakiintu muuyuni awuhe oya kala taya mono uuwanawa wopaMbiimbeli okupitila mOshungolangelo uule womimvo omilongo odhindji dha ka pita. MuJuli 2011, opwa li pwa piti oshifo shotango shOshungolangelo yOshiingilisa sha pupalekwa. Moshifo moka omwa nyolwa taku ti: “Oshifo shika oshipe otashi ka ningwa omalolelo uule womvula yimwe, nongele otashi kwathele shili aantu, otashi ka tsikila okukala hashi nyanyangidhwa.”

Otwa hala oku mu tseyithila kutya otatu ka tsikila noku shi nyanyangidha. Otashi ka nyanyangidhwa wo momalaka ngaashi Oshifulaanisa, Oshiputu nosho wo mOshispania.

OMOLWASHIKE SHI HOLIKE?

Konima sho aantu yamwe kUumbugantu wEfuta lya Mwena ya li ya mono oshifo shika oya ti: “Ngashingeyi aamwatate oyu uvite ko nawa Oshungolangelo.” Ontumwafo yilwe oya ti: “Ethimbo ndyoka twa li hatu longitha mokutala eityo lyiitya yOshiingilisa nosho wo mokuyelitha omautumbulilo gamwe, ngashingeyi ohatu li longitha tu uve ko omanyolo ngoka ge etwa mo nosho wo tu mone nkene ga pambathana noshikundathanwa.”

“Ethimbo ndyoka twa li hatu longitha okutala kutya iitya yOshiingilisa otayi ti ngiini nosho wo nkene tu na okuyelitha omautumbulilo gamwe, ngashingeyi ohatu li longitha tu uve ko omanyolo ngoka ge etwa mo nosho wo tu mone nkene ga pambathana noshitopolwa shoka”

Omwiilongi gumwe ngoka a mana elongo lye mokolidji yimwe muAmerika okwa ti: “Uule womimvo 18 onda kala tandi popi nokunyola elaka lyaalongwantu. Onda kala ndi hole okupopya iitya iidhigu nosho wo okudhiladhila momukalo gwa kitakana inaashi pumbiwa. Ihe onde shi mona kutya ondi na okulundulula omukalo gwandje gwokupopya nosho wo gwokudhiladhila. Omumwameme gumwe ngoka e li omuuvithi a pyokoka okwa nyola a ti: “Oshungolangelo yOshiingilisa sha pupalekwa oyi li ekwatho enene. Omukalo  moka ya nyolwa ogwa kwathela ndje ndi kale ndi shi okupopya elaka ndyoka tali uviwa ko nuupu.”

Omumwameme gumwe muIngilanda, ngoka a ninginithwa mo 1972 okwa nyola kombinga yOshungolangelo yOshiingilisa sha pupalekwa a ti: “Sho nda li nda lesha oshifo shoka sha nyanyangidhwa tango, onda li ndi uvite Jehova a fa e li ontega nangame a kwata ndje komapepe notwa li twa fa tatu shi lesha naye. Osha li sha fa omusamane ta leshele okanona ke ehokololo omanga inaaka kotha.”

Omumwameme gumwe moBetel yAmerika, ngoka a ninginithwa ngashingeyi omimvo dha konda 40 okwa ti kutya Oshungolangelo yOshiingilisa sha pupalekwa oye mu kwathela u uve ko iinima nawa. Pashiholelwa, okampungu hoka ke na omautumbulilo gamwe ga yelithwa, moshifo sho 15 Septemba 2011, oka yelitha uutumbululilo “oshikogo oshinene shoonzapo” (NW) shoka sha popiwa mAahebeli 12:1 ka ti: “Aantu mboka oya li oyendjiyendji noitaya vulu okuyalulwa.” Omumwameme okwa ti: Shino osha li sha kwathele ndje ndu uve ko nawa ovelise ndjoka. Okwa gwedha ko ta popi shi na ko nasha nokugongala ta ti: “Nonando okanona otaka yamukula taka kutha moshifo shoka sha pupalekwa, ihashi kala sha fa ngaashi nale uuna taka longitha oshifo shOshungolangelo shoka sha li hashi longithwa koyendji. Onkee ano, omayamukulo gaanona ohaga tungu aapulakeni.”

Omumwameme gumwe moBetel okwa nyola a ti: “Ohandi kala nda tegelela nondjuulukwe oku ka uva omayamukulo gaanona megongalo. Oshungolangelo yOshiingilisa sha pupalekwa oye ya kwathela ya kale haya popi nemanguluko. Omayamukulo gawo oga kala nokutunga ndje shili.”

 Omumwameme gumwe ngoka a ninginithwa mo 1984 okwa gandja olupandu lwe a ti: “Oshifo shika osha fa owala ongame sha nyolelwa. Ohashi kwathele ndje ndi uve ko nawa shoka tandi lesha. Ngashingeyi ondi na omukumo gwokuyamukula pEkonakono lyOshungolangelo.”

OSHILONGITHO KAMANA KAAVALI

Omuvalakadhi gumwe ngoka e na okamati komimvo heyali okwa ti: “Okukala tandi yelithile omumati gwandje omatumbulo ogendji sho tatu ilongekidha Oshungolangelo osha li hashi kutha ethimbo ele nohashi lolodha. Mbela oshifo shOshiingilisa sha pupalekwa oshe mu kwathela? Omukulukadhi ngoka okwa nyola a ti: “Onda kumwa sho omumati gwandje ha kutha ombinga mokulesha uutendo nokukala e wu uvite ko. Iha kala e na uumbanda washa, molwaashoka iitya kayi shi iidhigu, go omatumbulo omafupi. Ngashingeyi ohi ilongekidha omayamukulo ngoka ta ka gandja kuye mwene, noha kala ta gandja eitulomo okuza petameko sigo opehulilo lyekonakono.”

“Onda kumwa sho omumati gwandje ha kutha ombinga mokulesha uutendo nokukala e wu uvite ko”

Omuvalakadhi gumwe ngoka e na omukadhona gwomimvo omugoyi okwa nyola a ti: “Nale otwa li hatu mu kwathele naashoka ta ka tya. Ihe ngashingeyi ohi ilongekidha kuye mwene. Inatu pumbwa we unene okulongitha ethimbo olindji tu mu yelithile nenge tu mu lombwele okanima kehe. Molwaashoka kapu na sha shoka hashi mu nyenge, oku wete a kwatelwa mo lela mEkonakono lyOshungolangelo.”

AANONA OYU UVITE NGIINI?

Aanona oye wete kutya Oshungolangelo yOshiingilisa sha pupalekwa oyo ya nyanyangidhilwa unene. Rebecca okakadhona komimvo 12 oka ti: “Oshifo shika oshipe nashi tsikile nokunyanyangidhwa.” Oka gwedha ko taka ti: “Ondi hole unene okampungu hoka haka kala ke na omautumbulilo gamwe ga yelithwa. Okampungu hoka okapu kaanona.”

Nicolette okakadhona komimvo heyali oka ti: “Oshungolangelo nale oya li hayi kala ondhigu kungame okuuva ko. Ngashingeyi ohandi vulu okugandja omatyokosha ogendji nopwaahe na ekwatho lyagumwe.” Okakadhona komimvo omugoyi Emma oka nyola taka ti: “Oshifo shika osha kwathela ndje unene nosho wo okamwamememati, hoka ke na omimvo hamano. Otu uvite ko iinima oyindji nawa. Tangi unene!”

Osha yela kutya aantu oyendji otaya mono uuwanawa mOshungolangelo ndjoka ya longitha iitya iipu nokuuviwa ko. Otayi kwathele shili, notayi tsikile nokukala hayi nyanyangidhwa pamwe noshifo oshikwawo shoka inaashi pupalekwa shoka sha kala shi na ongushu okuza ngaa sho sha tameke okunyanyangidhwa mo 1879.