Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Desemba 2012

‘Aakwiilongo’ ya hangana melongelokalunga lyashili

‘Aakwiilongo’ ya hangana melongelokalunga lyashili

‘Aakwiilongo otaya ka longa omapya geni niitsambe yeni yomiviinu. Otamu ka ithanwa aayambi yOMUWA.’ — JES. 61:5, 6.

1. Aantu yamwe ohaya kala ya tala ko ngiini aakwiilongo, nomolwashike sha puka okudhiladhila ngaaka?

NGAASHI sha kundathanwa moshitopolwa sha tetekele, aantu yamwe ohaya longitha oshitya “omukwiilongo” momukalo gwokushundula yalwe, oku ya ulila mo nenge okuulika uutondwe. Ihe katu na okukala twa dhina aakwiilongo. Uushili owo kutya kapu na omuntu a simana e vule mukwawo. Okambo kedhina The Races of Mankind oka ti: “Ombiimbeli oya popya kutya aantu yomihoko dhi ili nodhi ili oye li aamwayinathana.” Olundji aantu mboka aamwayinathana ihaya kala ya faathana thiluthilu, ihe nonando ongaaka yo aamwayinathana.

2, 3. Jehova oha tala ko ngiini aakwiilongo?

2 Kapu na oshilongo moka kaamu na aakwiilongo. Nokuli nomokati kAaisraeli yonale, mboka ya li ye na ekwatathano lyi ikalekelwa naJehova Kalunga, omolwehangano lyOmpango, mokati kawo omwa li wo aakwiilongo. Nonando mboka kaaye shi Aaisraeli oya li ye na uuthemba wa ngambekwa, Aaisraeli oya li ye na okuungaunga nayo nesimaneko nosho wo pauyuuki. Aaisraeli yonale inaye tu tulila po tuu oshiholelwa oshiwanawa! Aakriste yashili kaye na okukala nontondo nenge niikala yokakombo noludhi. Omolwashike mbela? Omuyapostoli Petrus okwa ti: “Ngame ngashingeyi onde shi tseya kutya Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” — Iil. 10:34, 35.

3 Aakwiilongo mboka ya li muIsraeli shonale oya li ya mono uuwanawa momukalo gwontumba sho taye endathana nayo. Shika osha li shu ulike nkene Jehova a tala ko aakwiilongo. Omuyapostoli Paulus okwa li e shi popi konima yoomvula a ti: “Kalunga okAajuda ayeke? Ke shi nani Kalunga kaapagani wo? Eeno, okaapagani wo.” — Rom. 3:29; Joel 2:32.

4. Omolwashike taku vulu okutiwa kutya mokati ‘kaantu yaKalunga’ kamu na aakwiilongo?

 4 Okupitila mehangano epe, egongalo lyAakriste aagwayekwa olya li lya pingene po Israeli shonale, oshigwana shoka sha li shi na okukala nekwatathano lyi ikalekelwa naKalunga. Oshigwana shika oshipe ohashi ithanwa ‘aantu yaKalunga’ nenge Israeli yaKalunga. (Gal. 6:16) Ngaashi Paulus e shi yelitha, mokati koshigwana shika oshipe ‘kamu na eyooloko pokati komupagani nOmujuda, kaangoka a fukalekwa naangoka inaa fukalekwa, omupika nomuvalwa, omukwiilongo nomudhinwa, ihe ayihe oKristus ngoka e li mwaayihe.’ (Kol. 3:11) Meityo ndyoka, mokati kegongalo lyopaKriste kamwa li mu na ngoka e na okutalika ko e li omukwiilongo.

5, 6. (a) Epulo lini tashi vulika li holoke po kombinga yaJesaja 61:5, 6? (b) “Aayambi yOMUWA” nosho wo “aakwiilongo” mboka ya popiwa muJesaja oyo oolye? (c) Oongundu ndhoka mbali ohadhi longo iilonga ya faathana yini?

5 Aantu yamwe otashi vulika ya kale tayi ipula noohapu ndhoka dhi li montopolwa 61, membo lyaJesaja, moka mu na ehunganeko ndyoka tali gwanithilwa egongalo lyopaKriste. Montopolwa 61, ovelise 6, omwa popiwa aantu mboka taya ka longa ye li “aayambi yOMUWA.” Ihe movelise 5 omwa popiwa “aakwiilongo” mboka taya ka kwathela “aayambi” nokulonga pamwe nayo. Ehunganeko ndika otu na oku li uva ko ngiini?

6 Otu shi shi nokutya “aayambi yOMUWA,” oyo Aakriste aagwayekwa mboka taya ka mona ompito yokuyumudhwa ‘meyumuko lyotango,’ oyo “otaa ka kala aayambi yaKalunga noyaKristus notaa ka pangela pamwe naKristus uule woomvula eyuvi.” (Eh. 20:6) Kakele kuyo, opu na Aakriste oyendji aadhiginini mboka ye na etegameno lyoku ka kala kombanda yevi. Aakriste mboka oye li aakwiilongo meityo lyopathaneko, nonando otaya longo epepe nepepe pamwe naamboka taya ka pangela megulu. Ohaya ambidhidha nenyanyu “aayambi yOMUWA,” nokulonga wo pamwe nayo ye li ‘aalongi yomapya’ gawo meityo lyopathaneko nosho wo ‘aalongi miitsambe yawo yomiviinu.’ Ohaya simanekitha lela Kalunga mokukwathela aagwayekwa miilonga yokuuvitha noyokulonga yalwe oshili. Odhoshili kutya aagwayekwa ayehe nosho wo ‘oonzi dhilwe’ ohaya longo aantu oshili noku ya kwathela pahole ya kale metsokumwe noshili ndjoka. — Joh. 10:16.

OTU LI “AAKWIILONGO” NGAASHI ABRAHAM

7. Ongiini Aakriste kunena ya fa Abraham nosho wo aalumentu aadhiginini yonale?

7 Ngaashi sha popiwa moshitopolwa sha  tetekele, Aakriste yashili oye li ya fa aakwiilongo nenge oondjendi muuyuni mbuka waSatana wa piyagana. Oye na eitaalo lya fa lyAbraham nosho wo lyaalumentu aadhiginini yonale mboka ya popiwa kutya oya li “oondjendi naakwiilongo [moshilongo, NW].” (Heb. 11:13) Otu na uuthembahenda wokukala nekwatathano li ikalekelwa naJehova ngaashi ndyoka lya li pokati ke naAbraham kutya nduno otu na etegameno lini. Jakob okwa yelitha kutya “‘Abraham okwi itaale Kalunga, nomolweitaalo lye Kalunga okwe mu tala omuyuuki.’ Osho ngaaka Abraham okwi ithanwa kuume kaKalunga.” — Jak. 2:23.

8. Abraham okwa li u uvanekelwa shike, nokwa li u uvite ngiini shi na ko nasha negwanitho lyeuvaneko ndyoka?

8 Kalunga okwa li u uvaneke kutya okupitila muAbraham nosho wo moluvalo lwe aantu yomiigwana ayihe kombanda yevi otaya ka lalekwa nuuyamba. (Lesha Genesis 22:15-18.) Nonando ehunganeko ndyoka olya li tali ka gwanithwa monakuyiwa yi li komeho lela, Abraham okwa li e na einekelo kutya otali ka gwanithwa thiluthilu. Etata lyonkalamwenyo yawo ayihe, Abraham pamwe noyaandjawo oya kala taya tembukatembuka. Ethimbo alihe ndyoka Abraham okwa kala e na ekwatathano lya kola naJehova.

9, 10. (a) Omomikalo dhini tatu vulu okuholela Abraham? (b) Ehiyo lini tatu vulu okupa yalwe?

9 Nonando Abraham ka li e shi kutya shoka u uvanekelwa otashi ka gwanithwa uunake, okwa kala e hole Jehova nokwa kala te mu longele nuudhiginini. Ina kala ta tengauka, ye ina kala a hala okuninga omukwashigwana ta kalele moshilongo shontumba. (Heb. 11:14, 15) Kashi li tuu pandunge kutse tu landule oshiholelwa shaAbraham, tu kale nonkalamwenyo yi li paunathangwa, tse kaatu indumbile iinima yopamaliko, kaatu lalakanene oondondo dha simana nenge omaithano gopombanda! Omolwashike tu na okwiidhipagela po muuyuni mbuka kaawu na siku inaawu hula po? Omolwashike tu na okukala twa pwila miinima mbyoka tayi hulu po? Ngaashi owala Abraham, natse otwa tegelela uuwanawa mboka tawu ya. Otu na ehalo lyokukala twa tegelela neidhidhimiko sigo omauvaneko ngoka twa tegamena ga gwanithwa po. — Lesha Aaroma 8:25.

Mbela oto ka kala ngaa omudhiginini komauvaneko gaKalunga, ngaashi Abraham?

10 Jehova onkee ngaa ta hiya aantu yomiigwana ayihe ye ye ya mone omayambeko okupitila moluvalo lwaAbraham. Aagwayekwa, nenge tu tye “aayambi yOMUWA” nosho wo oonzi dhilwe ndhoka dhi li “aakwiilongo” oyi ipyakidhila nokuhiya aantu muuyuni awuhe momalaka ge vulithe 600.

KALA WU HOLE AANTU YOMIHOKO ADHIHE

11. Salomo okwa li a hiya aantu yomiigwana ayihe ya ninge shike?

11 Pelangeko lyotempeli momumvo 1026 K.E.N., Salomo okwa li a mono kutya aantu yomiigwana ayihe otaye ki imbwanga mumwe nayo ya longele Jehova, oshinima shoka sha li metsokumwe neuvaneko ndyoka Jehova a li u uvanekele Abraham. Okwa li a galikana tashi zi komutima a ti: “Ngele omukwiilongo ngoka a kala mevi lyokokule, ta kundana esimano lyoye niinima iinene we yi ningile aantu yoye, e te ya, e ku longele nokugalikana motempeli ndjika, pulakena omagalikano ge. Mu uva megulu lyoye, moka wa kala mo, nou ninge shoka te shi pula, opo iigwana ayihe yi ku tseye noyi vulike kungoye, ngaashi aantu yoye Aaisraeli taa ningi. Nena otaa ka tseya kutya otempeli ndjika nde yi tungu, oyo ehala moka to simanekelwa.” — 1 Aak. 8:41-43.

12. Omolwashike aantu yamwe ya tala ko Oonzapo dhaJehova dha fa “aakwiilongo”?

12 Omukwiilongo omuntu ngoka e li moshilongo moka haamo a valelwa nenge e ya mo e li ontauki. Oonzapo dhaJehova nadho kunena odha fa aakwiilongo. Ohadhi ambidhidha owala epangelo lyomegulu, Uukwaniilwa waKalunga, mboka Kristus oye omukwaniilwa gwUukwaniilwa mboka. Onkee ano, ihadhi kutha ombinga miinima yopapolotika, oshinima shoka yamwe ya tala ko kutya inashi ukila ko nando.

Kapu na omuntu omukwiilongo momeho gaJehova

13. (a) Oshike tashi ke tu kwathela kaatu tale ko yalwe ye li aakwiilongo? (b) Elalakano lyaJehova lyopetameko olya li lyashike? Shi yelitha.

 13 Olundji aakwiilongo ohayi imonikila mo nuupu, molwaashoka shitunda nohedhi, shilongo nomukalo gwasho. Elaka lyaakwiilongo, oohedhi dhawo, eholokopo lyawo, onkalo yawo nenge okuzala kwawo otashi vulika yi kale yi ili. Ihe iinima mbyoka haya ningi ya faathana naantu yalwe ayehe, oyo unene ya simana yi vulithe omaihumbato nomaukwatya ngoka twa tumbula metetekelo. Onkee ano, ngele itatu gandja eitulomo unene kunkene ya yooloka ko kutse, itatu ke ya tala ko momukalo gwi ili. Ngele otwi ilongo okutala ko aantu mboka ya za kiilongo yilwe momukalo omwaanawa, nena itatu ka kala we twe ya tala ko ye li “aakwiilongo.” Andola uuyuni awuhe owa li tawu lelwa komupangeli gumwe nenge wu li oshilongo shimwe, ando kombanda yevi kaku na omukwiilongo nando ogumwe. Nokuli elalakano lyaJehova lyopetameko olya li kutya aantu ayehe kombanda yevi ya kale egumbo limwe owala, kohi yepangelo limwe, sha hala okutya, kohi yepangelo lye. Mbela kunena otashi vulika ngaa aantu yomiigwana ayihe kombanda yevi ya hulithe po iikala yokwiithana yalwe aakwiilongo?

14, 15. Oonzapo dhaJehova dhi li ongundu odha vula okuninga shike?

14 Aantu oyendji kunena muuyuni oyi ihole noya lenga wo iigwana moka ya za, ihe aantu yamwe hasho ye li ngaaka. Oshidhigu kaantu okuvudha mo iikala yokatongotongo momitima dhawo. Omulumentu gwedhina Ted Turner, ngoka a tota po ositaasi yo-TV hayi ithanwa CNN, okwa popi kombinga yaamboka a longa nayo ye na iipewa yi ili noyi ili ya za kiilongo ya yoolokathana a ti: “Osha li sha kumitha ndje lela okutsakanena naantu mboka. Kanda li we nde ya tala ko ye li ‘aakwiilongo,’ ihe oye li owala aantu ooyakwetu. Onda tameke okukala ndi tonde oshitya ‘aakwiilongo,’ nonda toto po ompango kutya oshitya shoka kashi na okupopiwa mombepo nenge mokati kaaniilonga mositaasi yo-CNN. Pehala lyaashono, oya li ye na owala okulongitha [uutumbulilo] ‘aantu yomiigwana’ yilwe.”

15 Oonzapo dhaJehova dhi li ongundu muuyuni awuhe, odho owala hadhi tala ko aantu yalwe ngaashi Kalunga he ya tala ko. Omolwetaloko ndyoka, dho kadhi na ontondo nenge uukwamuhoko. Pehala lyokukala dha limbililwa aantu yomiigwana yilwe nenge okukala dhi ya tonde, odhi hole aantu ayehe kutya nduno oye na omaukwatya niikala ya yoolokathana. Mbela owa dhiladhila ngaa nale kutya omolwashike Oonzapo dhaJehova hadhi ungaunga nawa nayalwe nosho wo kombinga yuuwanawa mboka to ka mona uuna to shi ningi?

 MUUYUNI MOKA ITAAMU KA KALA AAKWIILONGO

16, 17. Onkalo otayi ka kala ya tya ngiini ngele shoka sha popiwa mEhololo 16:16 nosho wo muDaniel 2:44 sha gwanithwa?

16 Masiku iigwana ayihe otayi ka kondjitha Jesus Kristus netangakwiita lye lyomegulu piita yahugunina mbyoka hayi “ithanwa mOshihebeli Armagedon.” (Eh. 16:14, 16; 19:11-16) Omimvo 2 500 dha ka pita, omupolofeti Daniel okwa li a nwethwa mo a nyole kombinga yaashoka tashi ka ningilwa omapangelo gopantu ngoka ge li ompinge nelalakano lyaKalunga. Okwa nyola a ti: “Pomasiku gaakwaniilwa mbeyaka Kalunga nguka komegulu ota ka dhika uukwaniilwa itaawu ka teka po sigo aluhe nepangelo lyawo itali ka gandjwa koshigwana shilwe. Ihe owo otawu ka nyanyagula notawu ka teyagula omaukwaniilwa agehe noku ga hulitha po, ihe wo wene otawu ka kala sigo aluhe.” — Dan. 2:44NW.

17 Mbela uukwaniilwa mboka otawu ke ku etela uuwanawa washa? Eeno, molwaashoka oongamba ndhoka aantu ya tula po dha topola iilongo, nodha ningitha aantu ya kale aakwiilongo, itadhi ka kala po we. Nonando aantu otaya ka kala natango ya yoolokathana noye na omaholokopo gi ili nogi ili, shoka oshi li owala euliko kutya eshito lyaKalunga ekumithi oli na aantu yomaludhi ga yoolokathana. Etegameno ndyoka ekumithi oli na oku tu inyengitha atuheni tu tsikile nokutanga nokusimaneka Omushiti gwetu, Jehova Kalunga shi thike pokuvula kwetu.

Mbela ino hala oku ka kala muuyuni moka kaamu na oongamba dhasha, moka itaamu ka tumbulwa nando oshitya “omukwiilongo”?

18. Oshiholelwa shini tashi ulike kutya Oonzapo dhaJehova inadhi tala ko aamwahe ye li “aakwiilongo”?

18 Mbela oshi li ngaa pandunge twi itaale kutya opu na esiku uuyuni awuhe nawu ka ninge oshigwana shimwe? Eeno, oshi li pandunge, notu na okukala twe shi itaala lela. Nokuli kunena oshitya ‘aakwiilongo’ mokati kOonzapo dhaJehova ito shi uvu mo naanaa, molwaashoka dho ihadhi gandja lela eitulomo kuukwashigwana womuntu ngoka he endathana nadho. Ethimbo opo owala lya zi ko, iitayimbelewa yadho yimwe mbyoka iishona oya li ya hengumukile mumwe, opo iilonga yokuuvitha onkundana ombwanawa yUukwaniilwa yi kale tayi tonatelwa nuupu, yo yi longwe nawa shi vulithe nale. (Mat. 24:14) Uuna epangelo lyoshilongo shontumba lya pitike aakwiilongo ya longele moshilongo shawo, Oonzapo ihadhi tala kutya aantu mboka oyomuhoko guni. Jesus Kristus ngoka e li Omukwaniilwa gwUukwaniilwa waKalunga, noye ngoka masiku ta ka ‘sindana,’ oku li ta kwathele Oonzapo dhaJehova kaadhi kale dhi na ombepo yuukwashigwana. — Eh. 6:2.

19. Elaka lya yogoka olya ningitha shike tashi vulika?

19 Oonzapo dhaJehova odha za miigwana yi ili noyi ili nohadhi popi omalaka ga yoolokathana, ihe nonando ongaaka, odha hangana molwaashoka ohadhi kambadhala okupopya elaka lya yogoka lyoshili. Pokati kadho opu na uukumwe mboka itoo vulu oku wu teya po nuupu. (Lesha Sefanja 3:9.) Odha hangana nodhi li aamwayinathana, nodha topoka ko kuuyuni waSatana mbuka wa yonana. Uumwayinathana mbuka tu wete kunena, owu li ethano lyuuyuni uupe mboka twa tegelela, muuyuni moka itaamu ka kala aakwiilongo. Muuyuni mboka kehe gumwe ota ka mona egwanitho lyashili lyaashoka sha popiwa mokambo The Races of Mankind hoka taka ti: “Ombiimbeli oya popya kutya aantu yomihoko dha yoolokathana oye li aantu namumwayina.”