Oosikola dhelongo lyopakalunga odhi li euliko kutya Jehova oku tu hole

DHANA

JEHOVA oye ‘Omulongi gwetu Omunenenene.’ (Jes. 30:20, NW) Molwaashoka oku tu hole, ohe tu longo noku tu dheula. Pashiholelwa, okwa li u ulukile Jesus “iinima ayihe mbyoka ye mwene te yi longo,” molwaashoka oku mu hole noonkondo. (Joh. 5:20) Jehova oku tu hole tu li Oonzapo dhe, noshe mu inyengitha e tu pe “elaka lyomulongwa,” sho tatu ningi ngaashi tatu vulu tu mu simanekithe notu kwathele yalwe. — Jes. 50:4, OB-1954.

Okomitiye yOkulonga yOlutuwiliki ohayi holele omukalo gwaJehova gwokuulukila aantu ohole ye, mokulongitha oosikola dhelongo lyopakalunga dhi li omulongo, opo yi dheule mboka ye na ehalo nosho wo mboka oonkalo dhawo tadhi ya pitike ya kuthe ombinga moosikola ndhoka. Mbela Jehova ine tu longekidhila oosikola ndhika molwaashoka e tu hole?

Lesha uuyelele oundji kombinga yoosikola dhelongo lyopakalunga nokutala omatyokosha gayamwe mboka ya li ya kala pudho. Konima yaashono, ipula to ti: ‘Ongiini tandi vulu okumona uuwanawa melongo ndyoka lyopakalunga?’

MONA UUWANAWA MEDHEULO LYOPAKALUNGA

Jehova ngoka e li “Kalunga kohole” ohe tu pe edheulo ndyoka tali tu etele uuwanawa monkalamwenyo yetu, ohe tu longekidha tu sinde omamakelo, nohe tu kwathele tu mone enyanyu lyashili muukalele. (2 Kor. 13:11) Ngaashi aalongwa mboka ya li ko omimvo 2000 nasha dha ka pita, otwa homatekwa nawa iikondjitho opo tu ka kwathele yalwe ‘tu ya longe okudhiginina ayihe’ ngaashi Jesus e tu lombwela. — Mat. 28:20.

Nonando otashi vulika itaatu vulu okukutha ombinga moosikola ndhoka adhihe, otatu vulu okumona uuwanawa mudhimwe po. Otatu vulu wo okutula miilonga omayele gopaMbiimbeli ngoka hatu mono. Otatu vulu wo okukokeka uunkulungu wetu wokulonga muukalele, ngele ohatu longo pamwe naapiya yaJehova mboka ya dheulikikika.

Ipula to ti: ‘Mbela oonkalo dhandje itadhi pitike ndje ndi kuthe ombinga muyimwe yomoosikola ndhika?’

Oshi li uuthembahenda kaapiya yaJehova okwaambidhidha nosho wo okulongwa moosikola ndhika tadhi ti sha. Edheulo ndyoka to mono nali ku hedhithe popepi naKalunga noku ku homateka iikondjitho ye wu gwanithe po iinakugwanithwa yoye mbyoka e ku pa, unene tuu iilonga mbyoka yi na okulongwa neendelelo yokuuvitha onkundana ombwanawa.

UUYELELE PAUFUPI KOMBINGA YOOSIKOLA DHOPAKALUNGA

Osikola yOkudheula Aauvithi

Elalakano: Okudheula aauvithi opo ya kale taye shi enditha nawa miilonga yokulonga aantu noyokuuvitha onkundana ombwanawa.

Ethimbo ndyoka hayi kutha: Otayi tsikile.

Ehala: Oshinyanga shUukwaniilwa shomoshitopolwa.

Iitegelelwa: Kehe gumwe ngoka ha kala pokugongala kwOonzapo dhaJehova pandjigilile, ngoka onkalamwenyo ye yi li metsokumwe nomithikampango dhopaKriste nokwa taamba ko shoka Ombiimbeli tayi ti.

Nkene hashi ende opo omuntu a kuthe ombinga: Mboka ya hala okukutha ombinga ohaye ki inyolitha komutonateli gwosikola. Omumwameme Sharon ngoka a lemanekwa komukithi hagu kukutike nokupwinika oontumba noongodhi dholutu (amyotrophic lateral sclerosis), okwa ti: “Osikola yOkudheula Aauvithi oya kwathela ndje ndi tseye nkene ndi na okukonga uuyelele nokupopya naantu momukalo gu shi okuuviwa ko. Ondi ilonga wo okukala handi ipalutha nawa pambepo nosho wo yalwe.”

Omumwatate Arnie, ngoka a kala omutonateli omweendi ethimbo ele, okwa ti: “Ohandi kokoma nondi na uumbanda wokutala aantu momeho. Ihe osikola ndjika oya kwathela ndje ndi kale ndi na omukumo nokukala ndi uvite ndi na oshilonga. Jehova okwa kwathela ndje okupitila mOsikola yOkudheula Aauvithi ndi tseye nkene ndi na okukala handi fudha nawa sho tandi popi nokukala ndi itula mo uuna tandi gandja uuyelele. Onda nyanyukwa unene sho handi vulu okutanga Kalunga megongalo nosho wo muukalele.”

Osikola yAabetel aape

Elalakano: Osikola ndjika oya nuninwa okukwathela Aabetel aape ye shi endithe nawa miilonga yawo.

Ethimbo ndyoka hayi kutha: Ominute 45 moshiwike kehe, uule wiiwike 16.

Ehala: Betel.

Iitegelelwa: Omuntu oku na okukala oshilyo shaBetel nenge a taambwa e li omwiiyambi gwopakathimbo nokwa kala ta kwathele uule womvula yimwe nenge dhi vulithe po moBetel.

Nkene hashi ende opo omuntu a kuthe ombinga: Aabetel ayehe aape ohaya pewa uuthembahenda mboka nopwaahe na okuninga eindilo lyasha.

Omumwatate Demetrius, ngoka a li mosikola ndjika mo 1980 nasha, okwa ti: “Osikola ndjika oya kwathela ndje ndi hwepopaleke omukalondjigilile gwandje gwokukonakona noya kwathela ndje wo ndi vule okukala ethimbo ele miilonga yaBetel. Aanongeki mosikola ndjika, shoka twa longwa mo nosho wo omayele taga longo ngoka twa mona, oya tompa ndje ndi mone kutya Jehova okuhole ndje nokwa hala oku kwathela ndje ndi pondole miilonga yandje yaBetel.”

Omumwameme Kaitlyn okwa ti: “Osikola ndjoka oya kwathela ndje ndi kale handi ningi iinima momukalo ngoka Jehova a hokwa. Oya kwathela ndje ndi uve ko nawa ehalo lyaJehova, oBetel nosho wo ehangano lye.”

Osikola yUukalele wUukwaniilwa

Elalakano: Okudheula aatonateli aayendi, aakuluntugongalo naayakuligongalo omathimbo gamwe, opo ya sile oshimpwiyu mboka ye li metonatelo lyawo nokuungaunga niinakugwanithwa yilwe mehangano. (Iil. 20:28) Ohapu kundathanwa oonkalo dhomagongalo, iikala yago noompumbwe ndhoka ge na pethimbo ndyoka. Osikola ndjika ohayi ningwa konima yoomvula dhontumba shi ikwatelela ketokolo lyOlutuwiliki.

Ethimbo ndyoka hayi kutha: Moomvula opo dha zi ko aatonateli aayendi oya kala haya kala posikola ndjika omasiku gaali nenge gaali netata, aakuluntugongalo esiku limwe netata, omanga aayakuligongalo esiku limwe.

Ehala: Olundji opOshinyanga shUukwaniilwa nenge pOshinyanga shIigongi.

Iitegelelwa: Omumwatate oku na okukala omutonateli omweendi, omukuluntugongalo nenge omuyakuligongalo.

Nkene hashi ende opo omuntu a kuthe ombinga: Aakuluntugongalo naayakuligongalo ohaya hiywa komutonatelishikandjo. Oshitayimbelewa ohashi hiya aatonateli aayendi.

Omumwatate Quinn, ngoka e li methano, okwa ti: “Nonando osikola ndjoka ohayi kundathana uuyelele oundji methimbo efupi, ohayi kwathele aakuluntugongalo ya kale ye na enyanyu noya ‘tsikile ye li aalumentweelela’ miilonga yaJehova. Aakuluntugongalo mboka ya longa ethimbo ele nosho wo mboka aape oya li ya longwa nkene ye na okulitha nawa oshigunda nokukala ya hangana ‘ye na edhiladhilo limwe nelalakano limwe.’”

Omumwatate Michael okwa ti: “Muule owala wethimbo efupi otwa li twa kwathelwa tu uve ko nawa iinima mbyoka ya kwatela mo eitaalo lyetu, tu henuke iiponga, notwa pewa omayele taga longo nkene tu na okusila oshimpwiyu oshigunda. Jehova omunahenda shili sho he tu kwathele.”

Osikola yIilonga yUukokolindjila

Elalakano: Okukwathela aakokolindjila ya ‘gwanithe po ayihe mokulongela Kalunga.’ — 2 Tim. 4:5.

Ethimbo ndyoka hayi kutha: Iiwike iyali.

Ehala: Ohali tokolwa koshitayimbelewa, ihe olundji ohayi ningilwa pOshinyanga shUukwaniilwa moshitopolwa.

Iitegelelwa: Omuntu oku na okukala omukokolindjila gwondjigilile uule womvula yimwe nenge woomvula dhi vulithe po. *

Nkene hashi ende opo omuntu a kuthe ombinga: Aakokolindjila mboka ya gwana ihaya ningi eindilo lyasha, ihe ohaya hiywa komutonatelishikandjo gwawo.

Omumwameme Lily, methano kolulyo, okwa ti: “Osikola ndjoka oya kwathela ndje ndi ungaunge nomashongo ngoka handi tsakaneke muukalele nosho wo monkalamwenyo yandje. Oya hwepopaleka noonkondo omukalo gwandje gwokukonakona, gwokulonga aantu nogwokulongitha Ombiimbeli. Ngashingeyi otandi vulu okukwathela yalwe, okwaambidhidha aakuluntugongalo nosho wo egongalo li hume komeho.”

Omumwameme Brenda, ngoka a kala posikola ndjika iikando iyali, ota ti: “Oya kwathela ndje ndi gandje eitulomo lyandje alihe kiinima yopambepo, ndi kale ndi na eiyuvo lya dheuka nawa, nondi kale tandi gandja eitulomo kokukwathela yalwe. Osha yela kutya Jehova oha gandja nehalo ewanawa!”

^ okat. 39 Ngele kapu na omwaalu gwa gwana gwaakokolindjila aape mboka ye na okukala posikola, aakokolindjila yamwe mboka inaaya ya kosikola ndjika muule woomvula ntano dha pita otaya vulu okuhiwa ishewe.

Osikola yAakuluntugongalo

Elalakano: Okukwathela aakuluntugongalo ya vule okugwanitha po iinakugwanithwa yawo megongalo noya koleke uupambepo wawo.

Ethimbo ndyoka hayi kutha: Omasiku gatano.

Ehala: Ohali tokolwa koshitayimbelewa, ihe olundji ohayi ningilwa pOshinyanga shUukwaniilwa nenge pOshinyanga shIigongi.

Iitegelelwa: Omumwatate oku na okukala omukuluntugongalo.

Nkene hashi ende opo omuntu a kuthe ombinga: Oshitayimbelewa osho hashi hiya aakuluntugongalo.

Tala kwaashoka yamwe mboka ya li mongundu onti-92 moAmerika taya ti:

“Osikola oye etela ndje uuwanawa noonkondo, oya kwathela ndje ndi ikonakone nondi tseye nkene ndi na okusila oshimpwiyu oonzi dhaJehova.”

“Ngashingeyi onda pyokoka lela okuladhipika ayehe tandi longitha iitsa ya simana okuza mOmanyolo.”

“Edheulo ndika nda mona otandi ke li longitha monkalamwenyo yandje ayihe.”

Osikola yAatonateli Aayendi nAakulukadhi Yawo

Elalakano: Okukwathela Aatonatelishikandjo nAatonateli yIitopolwa ya vule okusila oshimpwiyu nawa omagongalo sho taya ‘longo nuudhiginini mokuuvitha nomokulonga aantu.’ — 1 Tim. 5:17, yelekanitha NW; 1 Pet. 5:2, 3.

Ethimbo ndyoka hayi kutha: Oomwedhi mbali.

Ehala: Oshitayimbelewa osho hashi tokola.

Iitegelelwa: Omumwatate na kale omutonatelishikandjo nenge omutonateli gwoshitopolwa.

Nkene hashi ende opo omuntu a kuthe ombinga: Oshitayimbelewa osho hashi hiya aatonateli aayendi naakulukadhi yawo.

Omumwatate Joel, ngoka a li mongundu yo-1, mo 1999, okwa ti: “Otwa li twa kwathelwa tu mone shili kutya Jesus oye ta wilike ehangano lyaJehova. Otwa li twa mono kutya osha pumbiwa lela tu kale tatu ladhipike aamwatate mboka tatu yakula nokukwathela lela egongalo opo li kale li na uukumwe. Ootundi ndhika odhe tu dhimbulukitha kutya nonando omutonateli omweendi ohe tu pe omayele nosho wo omapukululo omathimbo nomathimbo, elalakano lye lya simanenena olyo okukwathela aamwatate ya mone kutya Jehova oku ya hole.”

Osikola yOmbiimbeli yOkudheula Aamwatate Inaaya Hokana

Elalakano: Okudheula aakuluntugongalo nosho wo aayakuligongalo mboka inaaya hokana ya vule okupewa iinakugwanithwa ya gwedhwa po. Oyendji shampa ya mana ohaya tuminwa komahala hoka ku na ompumbwe miilongo yawo. Yalwe ohashi vulika ya tuminwe kiilongo yilwe ngele oya popi kutya oyi ilongekidha oku shi ninga. Yamwe ohashi vulika ya ninge aakokolindjila yi ikalekelwa yopakathimbo, opo ya ka longe kiitopolwa iipe, nokutaandelitha iilonga kiitopolwa yokuushayi naambyoka yokokule.

Ethimbo ndyoka hayi kutha: Oomwedhi mbali.

Ehala: Oshitayimbelewa osho hashi tokola, ihe olundji opOshinyanga shUukwaniilwa nenge pOshinyanga shIigongi.

Iitegelelwa: Aamwatate inaaya hokana mboka ye li pokati koomvula 23 no 62, ye na uukolele noya hala okukwathela kehe mpoka pu na ompumbwe onene. (Mark. 10:29, 30) Oye na okukala ya longa uule woomvula mbali ye li aakokolindjila yondjigilile noya longa oomvula mbali dha landulathana ye li aakuluntugongalo nenge aayakuligongalo.

Nkene hashi ende opo omuntu a kuthe ombinga: Piigongi yoshikandjo ohapu ningwa okugongala kwaamboka ya hala okuya kosikola ndjika.

Omumwatate Rick ngoka a li mongundu onti-23, moAmerika, okwa ti: “Okukala kwandje ndi itula mo mosikola ndjika okwa li kwa pitike ombepo yaJehova yi ninge omalunduluko mungame. Ngele Jehova e ku pe oshinakugwanithwa ohe ku ambidhidha wu shi gwanithe po. Onda li ndi ilongo kutya ngele onda kala tandi gandja eitulomo kokulonga ehalo lyaKalunga, ihe halyandje mwene, Kalunga ota ka nkondopaleka ndje.”

Andreas ngoka ta yakula kOndowishi, okwa ti: “Onda li ndi ilongo ndi kale ndi uvite ko kutya iilonga mbyoka tayi longwa mehangano lyaKalunga kunena oya fa owala oshikumithalonga. Osikola ndjika oya li ya kwathele ndje ndi ilongekidhile iilonga mbyoka yi li komeho. Natango, iiholelwa oyindji yopaMbiimbeli oya li ya longo ndje oshili ndjika ya simana kutya okuyakula aamwatate nokulongela Jehova ohaku eta enyanyu lyashili.”

Osikola yOmbiimbeli yOkudheula Aaihokani Aakriste

Elalakano: Okupa aaihokani edheulo lyi ikalekelwa ya vule okulongithwa kuJehova nokehangano lye. Oyendji mboka ya mana ohaya ka longa komahala hoka ku na ompumbwe yaauvithi moshilongo shawo. Yamwe ohashi vulika ya tuminwe kiilongo yilwe ngele oya hala okuya ko. Yamwe ohashi vulika ya ninge aakokolindjila yi ikalekelwa yopakathimbo, opo ya ka longe kiitopolwa iipe, nokutaandelitha iilonga kiitopolwa yokuushayi naambyoka yokokule.

Ethimbo ndyoka hayi kutha: Oomwedhi mbali.

Ehala: Osikola ndjika ohayi ningilwa moAmerika, nopetameko lyaSeptemba 2012, otayi ka kala hayi ningilwa miitayimbelewa mbyoka ya hogololwa muuyuni, olundji opOshinyanga shUukwaniilwa nenge pOshinyanga shIigongi.

Iitegelelwa: Aaihokani mboka ye li pokati komimvo 25 no 50, ye na uukolele notaya vulu oku ka longa komahala hoka ku na ompumbwe onene noye na ombepo yeiyambo yokutya “otandi yi! Tuma ndje!” (Jes. 6:8) Naya kale ya kala mondjokana uule woomvula mbali nenge dhi vule po noya kala miilonga yethimbo lyu udha uule woomvula mbali nopwaahe na okweetha. Omusamane na kale a longa e li omukuluntugongalo nenge omuyakuligongalo uule woomvula mbali dha landulathana.

Nkene hashi ende opo omuntu a kuthe ombinga: Piigongi yoshitopolwa ohapu kala okugongala kwaamboka ya hala okuya kosikola ndjika. Uuyelele auhe ohawu gandjwa pokugongala hoka. Ngele poshigongi sheni shoshitopolwa moshilongo sheni inapu ningwa okugongala hoka, oto vulu okunyolela koshitayimbelewa wu pule uuyelele wa gwedhwa po.

Omumwatate Eric nomukadhi Corina, methano kolulyo, mboka ya li mongundu yo-1, mo 2011, oya popi ya nyanyukwa ya ti: Iiwike ihetatu mbyoka oya li ya lundulula onkalamwenyo yetu shili noya li ompito ombwanawa lela kaaihokani mboka ya hala okulonga oshindji miilonga yaJehova! Otwa tokola toko okukala nondjele monkalamwenyo yetu, opo tu longithe ethimbo lyetu nawa.”

Osikola yOmbiimbeli yoWatchtower yaGilead

Elakano: Okudheula aalongwa ya kale aatumwa momagongalo ngoka ge li momahala ngoka ge na aantu oyendji, ya ninge aatonateli aayendi nenge Aabetel. Elalakano lyawo okukwathela iilonga yuukalele nosho wo iilonga miitayimbelewa yi kale tayi ende nawa.

Ethimbo ndyoka hayi kutha: Oomwedhi ntano.

Ehala: Ohayi ningilwa moWatchtower Educational Center, Patterson, New York, moAmerika.

Iitegelelwa: Aaihokani mboka ya kala miilonga yi ikalekelwa yethimbo lyu udha, sha hala okutya, aatumwa yomomagongalo mboka inaaya kala po nale posikola ndjika, aakokolindjila yi ikalekelwa, aatonateli aayendi nenge Aabetel. Oye na okukala miilonga mbyoka uule woomvula ndatu dha landulathana. Naya kale wo haya popi, haya nyola, nohaya lesha nawanawa Oshiingilisa.

Nkene hashi ende opo omuntu a kuthe ombinga: Aaihokani ohashi vulika ya pulwe kokOmitiye yOshitayimbelewa ya ninge eindilo.

Omumwatate Lade nomukadhi Monique mboka ya za koAmerika oye li taya longo ngashingeyi moAfrika. Lade ota ti: “Osikola yaGilead oye tu kwathela tu kale tatu vulu okuya kehe pamwe muuyuni nokukala twi ilongekidha okulonga pamwe naamwatate.”

Monique okwa gwedha ko a ti: “Ohandi mono enyanyu olindji miilonga yandje, ngele tandi tula miilonga shoka tandi ilongo mOohapu dhaKalunga. Onda mona kutya Jehova otu ulukile ndje ohole ye ya gwedhwa po sho ndi na enyanyu ndyoka.”

Osikola yOkudheula Iilyo yOokomitiye dhIitayimbelewa nAakulukadhi Yawo

Elalakano: Okukwathela mboka ye li iilyo yOkomitiye yOshitayimbelewa ya vule okukwatela komeho moBetel, okuungaunga niilonga mbyoka ya pamba omagongalo nokutonatela iikandjo nosho wo iitopolwa mbyoka yi li kohi yetonatelo lyawo. Ohayi ilongo wo kombinga yokutoloka, yokunyanyangidha, nokombinga yokutuma iileshomwa.

Ethimbo ndyoka hayi kutha: Oomwedhi mbali.

Ehala: Ohayi ningilwa moWatchtower Educational Center, Patterson, New York, moAmerika.

Iitegelelwa: Omumwatate na kale oshilyo shOkomitiye yOshitayimbelewa nenge oshilyo shOkomitiye yOshilongo nenge e li pokulangekwa po.

Nkene hashi ende opo omuntu a kuthe ombinga: Olutuwiliki ohalu hiya aamwatate mboka ya gwanitha po iitegelelwa naakulukadhi yawo.

Omumwatate Lowell nomukadhi Cara, mboka ya li mongundu onti-25, oye li taya longo ngashingeyi moNigeria. Lowell ota ti: “Onda li nda dhimbulukithwa kutya nonando ondi kale ndi ipyakidhila shi thike peni nenge kutya nduno iilonga yini nda pewa, shoka sha simana okulonga ehalo lyaJehova opo ndi mu nyanyudhe. Otwa longwa wo kutya otu na okuungaunga nayalwe nohole ngaashi Jehova hu ungaunga naapiya ye.”

Omumwameme Cara okwa gwedha ko a ti: “Onda kala nokutedhatedha shi na ko nasha netyokosha limwe ndika kutya: Ngele itandi vulu okuyelitha oshitsa shontumba momukalo ngoka omupu okuuviwa ko, nena ondi na oku shi konakona manga inaandi ke shi longa yalwe.”

OSHUNGOLANGELO YOKUKONAKONWA