Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Septemba 2017

Holela olukeno lwaJehova

Holela olukeno lwaJehova

‘Jehova, Kalunga omunamutimahenda nomunalukeno.’ — EKS. 34:6, Yelekanitha NW.

OMAIMBILO: 142, 12

1. Omomukalo guni gwi ikalekelwa Jehova a li i ihololele Moses, nomolwashike shika sha simana?

POMPITO YIMWE, Kalunga okwa li i ihololele Moses, sho e mu lombwele edhina Lye nomaukwatya ge. Omaukwatya gotango ngoka a li a tumbula, ohenda nolukeno. (Lesha Eksodus 34:5-7.) Jehova okwa li ta vulu okupopya tango kombinga yoonkondo dhe nuunongo we. Molwaashono Moses okwa li a hala okutseya ngele Jehova ota vulu oku mu ambidhidha, Jehova okwa li a tsu omuthindo omaukwatya ngoka tagu ulike kutya okwa halelela okukwathela aapiya ye. (Eks. 33:13) Mbela owu shi uvitile ngiini sho Kalunga a tumbula tango omaukwatya ngoka komeho gomaukwatya galwe? Oshitopolwa shika otashi ka tsa omuthindo uukwatya wolukeno, ano okuyaalela mboka taya mono iihuna nokukala wu na ehalo lyoku ya kwathela.

2, 3. (a) Omolwashike shi li paunshitwe aantu yu ulukilathane olukeno? (b) Omolwashike tu na okwiilonga oshindji kombinga yaashoka Ombiimbeli ya popya shi na ko nasha nolukeno?

2 Aantu oya shitwa oshifetha shaKalunga. Molwaashono Jehova omunalukeno, okwa shita aantu ye na uukwatya mboka. Nokuli naamboka ihaaye mu longele, olundji ohayu ulike uukwatya mboka. (Gen. 1:27) MOmbiimbeli omu na iiholelwa oyindji yaantu mboka  yu ulika olukeno. Otashi vulika to dhimbulukwa ehokololo lyaakiintu yaali, mboka ya li taya kondjele okanona. Sho Salomo a li a hala okumona kutya olye lela yina yokanona, okwa ti na ka tetwe pokati. Yina yokanona okwa li e ku uvitile ohenda, e ta ti naka pewe omukiintu omukwawo. (1 Aak. 3:23-27) Otashi vulika wo to dhimbulukwa omwanakadhona gwaFarao, ngoka a li a hupitha Moses pethimbo a li okahanona. Nonando okwa li e shi kutya okanona Okahebeli noke na okudhipagwa, okwa tokola e ka putudhe onga ke mwene. — Eks. 2:5, 6.

3 Omolwashike tu na okwiilonga oshindji kombinga yolukeno? Omolwaashono Ombiimbeli otayi tu ladhipike tu holele Jehova. (Ef. 5:1) Tu li oluvalo lwaAdam inaalu gwanenena, otashi vulika tu ulike iikala yokwiihola mwene, nonando otwa shitwa nuukwatya wolukeno. Omathimbo gamwe otashi vulika tu mone oshidhigu okutokola pokati kokukwathela yalwe nokugandja eitulomo kutse yene. Kuyamwe oshinima shoka oshi li uupyakadhi tawu tsikile. Oshike tashi vulu oku ku kwathela wu kale wu na ko nasha nayalwe? Tango, dhiladhila nawa nkene Jehova u ulike olukeno nosho wo nkene yalwe ye lu ulika. Oshitiyali, tala nkene to vulu okuholela oshiholelwa shaKalunga sholukeno nosho wo nkene oku shi ninga tashi vulu oku ku etela uuwanawa shili.

JEHOVA OKWE TU TULILA PO OSHIHOLELWA DHINGI SHOKUULIKA OLUKENO

4. (a) Omolwashike Jehova a li a tumu aayengeli ya ye kuSodom? (b) Oshike tatu ilongo mehokololo lyaLot noyanakadhona?

4 MOmbiimbeli omu na iiholelwa oyindji yankene Jehova u ulika olukeno. Dhiladhila kwaashoka Jehova a ningile Lot. Omulumentu ngoka omuyuuki okwa li “u uvite nayi,” omolweihumbato ewinayi lyaantu yomuSodom naGomorra. Jehova Kalunga okwa li a tokola okuhanagula po aantu mboka. (2 Pet. 2:7, 8) Okwa li a tumu aayengeli ya hupithe Lot. Oye mu londodha nuukwanegumbo we, ya ze mo moshilando shoka sha li pokuhanagulwa po. Ombiimbeli otayi ti: “Lot sho a li ta kakadhala, [aayengeli] oye mu kwata mokwooko, nomukadhi noyanakadhona yaali, e taye ya pititha mo moshilando, oshoka Omuwa okwa li e ya uvitile ohenda.” (Gen. 19:16) Mbela oshiholelwa shoka itashi ulike kutya Jehova oku na ko nasha shili naapiya ye aadhiginini, uuna ye li moonkalo oondhigu? — Jes. 63:7-9; Jak. 5:11; 2 Pet. 2:9.

5. Ongiini Johannes gwotango 3:17, tayi vulu oku tu kwathela tu ulike olukeno?

5 Jehova inu ulika owala olukeno polwe, ihe okwa longo wo aapiya ye yu ulike uukwatya mboka. Dhiladhila kompango ndjoka ya li ya pewa Aaisraeli. Ngele gumwe okwa li oongunga, omulilwangunga okwa li ha kutha ko elwaakani lyomuntu ngoka. Shoka osha li euliko kutya iimaliwa ye ote yi shunithilwa. (Lesha Eksodus 22:26, 27.) Omulilwangunga ngoka kee na ohenda, otashi vulika a tindile elwaakani lyomuntu ngoka e mu lila oongunga, noku mu etha a kale kee na sho ti isiikile, ngele ta kotha. Onkee ano, Jehova okwa li a longo aantu ye ya yande iikala ya tya ngawo. Aantu ye oya li ya pumbwa okukala ye na olukeno. Mbela ekotampango ndyoka lya hololwa mompango ndjoka otali tu longo shike? Otali tu longo kutya katu na okwiidhimbika aamwatate, uuna ye li mompumbwe. Otu na oku ya kwathela mpoka tatu vulu, uuna ye li muudhigu. — Kol. 3:12; Jak. 2:15, 16; lesha 1 Johannes 3:17.

6. Oshike tatu vulu okwiilonga koshiholelwa shaJehova shokuulukila Aaisraeli olukeno, nonando oya li ya yona?

6 Jehova okwa li u uvitile oshigwana she Israeli olukeno, nonando osha li sha yona. Ombiimbeli otayi ti: “Omuwa, Kalunga koohekulu, okwa tsikile okutuma aahunganeki, ya londodhe aantu ye, oshoka okwa li a hala e ya hupithe pamwe notempeli.” (2 Ondjal. 36:15) Sha faathana, otu na okuulukila olukeno mboka kaaye shi natango Kalunga, molwaashoka otashi  vulika ye ke ethe po onkalamwenyo yawo ombwinayi, e taya kala ya hokiwa kuKalunga. Jehova ina hala omuntu nando ogumwe a ka hanagulwe po mesiku lyepangulo. (2 Pet. 3:9) Onkee ano, manga Kalunga inaa hanagula po aakolokoshi, natu tsikile okuulika olukeno mokuuvithila yalwe kombinga yetumwalaka lyelondodho.

7, 8. Omolwashike uukwanegumbo wumwe wa li wi itaala kutya Jehova okwa li e wu ulukile olukeno?

7 Aapiya yaJehova oyendji kunena oya mona nkene e ya ulukila olukeno. Natu tale kwaashoka sha li sha ningilwa uukwanegumbo wumwe, moka mwa li hamu zi okamati komimvo 12, kedhina Milan. Osha li opethimbo lyomaipumomumwe gopamihoko, mo 1990 nasha. Milan, omumwayinamati, aavali ye nosho wo Oonzapo dhilwe, oya li ye li mombesa taya zi koBosnia yu uka koSerbia. Oya li taya yi koshigongi shoshitopolwa, hoka aavali yaMilan ya li taya ka ninginithwa. Sho ngaa ya thiki poongamba, aakwiita oya ndhindhilike kutya uukwanegumbo wooMilan owomuhoko gulwe. Onkene oye ya lombwele ya ze mo mombesa, e taye etha aamwatate yalwe ya tsikile nolweendo lwawo. Aakwiita oye ya kaleke mpoka uule womasiku gaali. Hugunina, omunambelewa ngoka a li miilonga pethimbo ndyoka, okwi ithana omunambelewa omukuluntu, e te mu pula kutya uukwanegumbo mboka nawu ningilwe shike. Okwe ya e ta thikama komeho guukwanegumbo mboka, e ta ti: “Ya kuthii po e tamu ya yaha!”

8 Manga omunambelewa a li ta popi naakwiita ye, aalumentu yaali oye ya puukwanegumbo mboka, e taye wu lombwele kutya yo nayo Oonzapo. Oya ti wo kutya aamwatate mboka ya li mombesa ndjoka ye ethwa yi pite, oye ya lombwele ehokololo lyaashoka sha ningwa po. Aamwatate mboka yaali oya lombwele Milan nomumwayinamati ya londe mohauto yawo, opo ya pite poongamba, oshoka uuthemba waanona kawa li tawu talika. Oya lombwele wo aavali yaanona ya ka pite konima yomweelo gwopoongamba, opo ya tsakanene handiyaka. Milan okwa li a kumwa, noka li e shi kutya na yole nenge na lile. Aavali ye oya pula ya ti: “Otamu dhiladhila kutya aantu mboka otaye tu etha tu pite po?” Ihe sho ya piti pomweelo, aakwiita mboka kaya li nokuli ya fa ye ya wete. Aavali mboka oya ka tsakanena noyana handiya yoongamba, e taya yi koshigongi. Oya li ya tompwa kutya Jehova okwa yamukula omagalikano gawo, sho e ya kwathele. Otwi ilonga mOmbiimbeli kutya haaluhe Jehova ha kwathele aapiya ye momukalo ngoka. (Iil. 7:58-60) Milan okwa popi nkene a li u uvite. Okwa ti: “Onda li ndi wete aayengeli ya fa ya pata omeho gaakwiita, nonokutya Jehova okwe tu hupitha.” — Eps. 97:10.

9. Jesus okwa li i inyenge ngiini koongundu dhaantu ndhoka dha li dhe mu landula? (Tala kethano lyopetameko.)

9 Otatu vulu okwiilonga sha kuJesus. Sho a li a tsakanene noongundu dhaantu, okwa li e ya uvitile olukeno, oshoka “oya li ya hepekwa noya loloka ya fa oonzi dhaa na omusita.” Jesus okwa li a ningi po shike? ‘Okwa tameke oku ya longa iinima oyindji.’ (Mat. 9:36; lesha Markus 6:34.) Jesus ka li u ulike iikala iiwinayi ngaashi Aafarisayi, mboka kaaya li ye hole okukwathela aantu. (Mat. 12:9-14; 23:4; Joh. 7:49) Ngaashi Jesus, mbela nangoye owu na ngaa ehalo lyokukwathela aantu pambepo?

10, 11. Mbela olukeno otalu opalele poompito adhihe? Shi yelitha.

10 Itashi ti kutya kehe monkalo otu na okuulika olukeno. Ngele otwa tala kiiholelwa yomOmbiimbeli mbyoka ya popiwa metetekelo, otu wete kutya Kalunga okwa li u ulike olukeno pandjele. Pashiholelwa, omukwaniilwa Saul ka li a vulika, molwaashono ka li a ningi shoka a lombwelwa, nonando ye okwa li e wete u ulika olukeno. Okwa hupitha Agag, ngoka a li e tonde oshigwana shaKalunga noka li a dhipaga iinamwenyo ayihe yAayamaleki. Kungawo, Jehova okwa kutha Saul uukwaniilwa. (1 Sam. 15: 3, 9, 15) Odhoshili kutya Jehova oku li Omupanguli omuyuuki. Ota vulu okumona shoka shi li momitima dhaantu, noku shi poompito mpoka e na okuulika olukeno. (Oontak. 2:17; Hes. 5:11) Ethimbo otali ya, uuna ta ka pangula ayehe mboka inaaya hala okuvulika kuye. (2 Tes. 1:6-10) Ndyoka itali ka kala ethimbo lyaJehova lyokuulukila aakolokoshi olukeno, ihe pehala lyaashono, ote ku ulukila olukeno mboka haya vulika kuye.

11 Osha yela kutya kashi shi oshinakugwanithwa shetu shokupangula yalwe ngele otaya ka hanagulwa po nenge otaya ka kala nomwenyo. Pehala lyaashono, otwa pumbwa okuninga ngaashi tatu vulu ngashingeyi, tu kwathele aantu. Mbela omomikalo dhini tatu vulu okuulukila yalwe olukeno talu opalele? Natu taleni komaetopo taga landula.

KALA WU NA OLUKENO NOKU LU ULIKA MPOKA TASHI OPALELE

12. Ongiini to vulu okuulika olukeno, sho tu ungaunga nayalwe?

12 Kala wu na ehalo lyokukwathela yalwe esiku kehe. Mboka taya kambadhala okuholela Jesus, oya tegelelwa yu ulukile yalwe olukeno nosho wo aamwatate Aakriste. (Joh. 13:34, 35; 1 Pet. 3:8) Eityo limwe lyoshitya olukeno olyo “okuhepekwa pamwe.” Omuntu ngoka e na olukeno, oha kambadhala a kwathele yalwe, uuna ye li muudhigu. Onawa nangoye wu tale mpoka to vulu okukwathela yalwe! Pashiholelwa, mbela ito vulu okukwathela gumwe moku mu longela oshilonga shontumba? — Mat. 7:12.

Ulukila yalwe olukeno, moku ya kwathela (Tala okatendo 12)

13. Aapiya yaKalunga ohayu ulike uukwatya wuni, uuna yalwe ya gumwa kiiponga yopaunshitwe?

13 Kutha ombinga miilonga yokugandja ekwatho. Uuna tu wete yalwe taya mono iihuna, omolwiiponga yopaunshitwe, ohashi tu inyengitha tu yu ulukile olukeno. Aapiya yaJehova oya tseyika nawa kutya ohaya kwathele poompito dha tya ngawo. (1 Pet. 2:17) Pashiholelwa, omumwameme gumwe Omujapani, okwa li ha kala mehala ndyoka lya li lya yonagulwa po mo 2011, kekakamo lyevi nokekuthikuthi enenenene ndyoka hali zi mefuta. Okwa ti kutya okwa li “u uvite a tsuwa omukumo nokwa hekelekwa,” sho a mono aaiyambi ya za kiitopolwa yi ili noyi ili moJapani nayamwe ya za kiilongo yilwe, ye ya okuninga nawa omagumbo nIinyanga yUukwaniilwa mbyoka ya hanagulwa po. Okwa nyola a ti: “Oshimoniwa shika osha kwathela ndje ndi mone kutya Jehova ohe tu sile oshimpwiyu. Osha kwathela ndje wo ndi  mone kutya Oonzapo ohadhi silathana oshimpwiyu. Aamwatate naamwameme muuyuni awuhe ohaye tu kwatele momagalikano gawo.”

14. Ongiini to vulu okukwathela aakokele nosho wo mboka taye ehama?

14 Kwathela mboka taye ehama nosho wo aakokele. Uuna tu wete yalwe taya mono iihuna, omolwiilanduliko yuulunde waAdam, ohashi tu inyengitha tu yu ulukile olukeno. Otwa tegelela nondjuulukwe ethimbo ndyoka itaapu ka kala we aantu taye ehama nenge ya kulupa. Onkee ano, ohatu galikana Uukwaniilwa waKalunga wu ye. Ngashingeyi natu ninge ngaashi tatu vulu tu kwathele mboka ye li mompumbwe. Tala shoka omunyoli gumwe a ti kombinga yayina ngoka a li a kulupa, nokwa li ta hepekwa komukithi gwomuuluyi hagu ithanwa Alzheimer. Okwa ti kutya esiku limwe yina okwi inyateke. Manga a li ta kambadhala okwiininga nawa, okangendjo kopomweelo oka lili. A ka tye ngeyi, nani Oonzapo mbali ndhoka hadhi mu talele po pandjigilile. Aamwameme mboka oye mu pula ngele otaya vulu oku mu kwathela. Okwa ti kuyo: “Onda pumbwa ekwatho, nonando oshi sitha ohoni.” Aamwameme mboka oye mu kwathele moku mu yogela oonguwo dhe ndhoka a li a nyateka. Opo nduno oye mu ningile otee, e taya kala po uule wokathimbo taya popi naye. Jan Boon okwa li e ya pandula noonkondo. Okwa nyola a ti: “Oonzapo ohadhi tula miilonga shoka tadhi uvitha.” Mbela okukenukila aakokele naamboka taye ehama, ohaku ku inyengitha ngaa wu ninge ngaashi to vulu wu ya kwathele? — Fil. 2:3, 4.

15. Iilonga yetu yokuuvitha ohayi tu pe oompito dha simana dhokuninga shike?

15 Kwathela aantu pambepo. Molwaashono aantu oye na omaupyakadhi niimpwiyu oyindji, shoka ohashi tu inyengitha tu kale twa hala oku ya kwathela pambepo. Omukalo dhingi moka tatu vulu oku ya kwathela, omoku ya longa kombinga yaKalunga nokombinga yaashoka Uukwaniilwa we tawu ya okuninga. Shimwe ishewe, omoku ya kwathela ya mone nkene shi li pandunge okukala metsokumwe nomithikampango dhaKalunga. (Jes. 48:17, 18) Onkee ano, tamununa mo uukalele woye, mboka wu li iilonga tayi simanekitha Jehova nokuulukila yalwe olukeno. — 1 Tim. 2:3, 4.

NANGOYE OTO VULU OKUMONA MO UUWANAWA MUUKWATYA WOLUKENO

16. Uuwanawa wuni omuntu ngoka hu ulike olukeno ta vulu okumona?

16 Aatseyinawa yuukolele wopamadhiladhilo, oya ti kutya okuulukila yalwe olukeno, otaku vulu oku ku kwathela wu kale nuukolele nowu kale nekwatathano ewanawa nayalwe. Uuna to kwathele mboka taya mono iihuna, ohashi ku etele enyanyu nokukala wu na omukumo. Ohashi ku kwathele wo kuu kale wu uvite uuwike nokuu dhiladhile iinima iiwinayi. Eeno, ngele owu ulike olukeno otashi ke ku etela uuwanawa. (Ef. 4:31, 32) Aakriste mboka haya kongo oompito ya kwathele yalwe, oye na eiyuvo ewanawa, molwaashono oye shi kutya otaya katuka metsokumwe nomakotampango gaKalunga. Okukala niikala mbyoka, otashi ke tu kwathela tu ka kale aavali aanahole, aaihokani ye li nawa nenge ookuume aawanawa. Mboka ye hole okuulukila yalwe olukeno, ohaya kwathelwa wo, uuna ya pumbwa ekwatho. — Lesha Mateus 5:7; Lukas 6:38.

17. Omolwashike wa hala okukala wu na olukeno noku lu ulika?

17 Okutseya kutya olukeno uukwatya uuwanawa kungoye, hasho shi kale etompelo lyoye enene lyokukala wa hala okukala nuukwatya mboka. Etompelo enene nali kale okukala wa hala okuholela nokusimaneka Jehova Kalunga, ngoka e li Onzo yohole nolukeno. (Omayel. 14:31) Jehova okwe tu tulila po oshiholelwa dhingi sholukeno. Onkee ano, natu ninge ngaashi tatu vulu, opo tu mu holele mokuhumitha komeho ohole mokati kaamwatate nokukala tu na ekwatathano ewanawa nayalwe. — Gal. 6:10; 1 Joh. 4:16.