Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2017

Onkatu yimwe yolukeno ndjoka ya katukwa kOmukriste

Onkatu yimwe yolukeno ndjoka ya katukwa kOmukriste

TATE gwaJohn okwa ninginithwa mo 1950 nasha, mokandoolopa kedhina Gujarat, moIndia. John naamwayina yatano nosho wo yina, oya li Aakatoolika mboka to ti kaye na siku ya ze mo, noya kala nokupataneka he, ngoka e li Onzapo yaJehova.

Esiku limwe, John okwa tumwa kuhe a fale ekutu kOnzapo yaJehova yimwe yomegongalo moka he ha gongala. Ihe ongula yesiku ndyono, John, okwa li i itete nayi komunwe, sho a li ta patulula ondoloma. Okwa li i imanga poshilalo nelapi, e ta tanga iikwanambwiyu ye a fale ekutu, oshoka okwa li omuvuliki.

Sho a thiki pegumbo mpoka a tumwa, omumwatate ine mu adha mo, omwa li owala omukadhi ngoka naye Onzapo yaJehova. Sho ta taamba ekutu, okwa mono kutya John okwa mona oshiponga komunwe, e te mu kwathele. Okwa kutha omuti mokandjato ke komiti, e to opaleke oshilalo noku shi manga nelapi lyokoshipangelo. Opo ihe okwe mu ningile otee, nokwa kala ta popi naye nombili kombinga yOmbiimbeli.

Oshinima shoka osha lundulula etaloko lyaJohn li na ko nasha nOonzapo dhaJehova nokwa pula omumwameme kombinga yiinima iyali mbyoka Aakatoolika yi itaala, ihe Oonzapo inadhi yi itaala. Shotango, mbela Jesus oKalunga? Oshitiyali, Aakriste oye na ngaa okugalikana kuMaria? Omumwameme okwa li e shi nawa elaka lyOshigujarati ndyoka hali popiwa kuJohn, nokwe mu yamukula okuza mOmbiimbeli. Okwe mu pe wo okambo: “This Good News of the Kingdom.”

Sho e ka lesha, John okwa li u uvite kutya osho oshikando shotango tu uvu oshili okuza mOmbiimbeli. Okwa yi komupristeli gwawo, e te mu pula omapulo gaali ngoka a pulile omumwameme. Omupristeli okwa geye, e te mu umbu nOmbiimbeli, ti igidha ta ti: “Owa ninga Satana! Ulukila ndje mpoka Ombiimbeli tayi ti kutya Jesus ke shi Kalunga. Ulukila ndje wo mpoka tayi ti kutya katu na okugalikana Maria. Ulukila ndje shili!” John okwa haluka nayi, sho omupristeli e mu ngwenyaukile. Okwe mu lombwele a ti: “Kandi na we siku ndi ka lyate mongeleka yaKatoolika.” Ye ina lyata mo we tuu shili.

John okwa tameke okukonakona Ombiimbeli nOonzapo dhaJehova, okwa taamba ko oshili, e ta tameke okulongela Jehova. Konima yethimbo, yamwe maandjawo oya ningi wo Oonzapo. Sigo okunena, omumwatate John oku na oshiyadhi komunwe gwokolulyo, mpoka i itetele omimvo 60 lwaampono dha ka pita. Ihe oha dhimbulukwa aluhe onkatu yimwe yolukeno ndjoka ya katukwa kOmukriste, oshinima shoka she mu eta melongelokalunga lya yogoka. — 2 Kor. 6:4, 6.