Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2017

‘Ohole yetu nayi kale yashili, tayi ulikwa wo nomiilonga’

‘Ohole yetu nayi kale yashili, tayi ulikwa wo nomiilonga’

“Ohole yetu inayi kala ashike moohapu nomokupopya, aawe, nayi kale ohole yashili, ndjoka tayi iholola yo yene miilonga wo.” — 1 JOH. 3:18.

OMAIMBILO: 72, 124

1. Ohole yoludhi luni ya dhenga mbanda, nomolwashike? (Tala kethano lyopetameko.)

OHOLE ya kankamena komakotampango guuyuuki, hayi ithanwa (a·gaʹpe), oyo omagano ga za kuJehova. Jehova oye Onzo yohole ndjoka. (1 Joh. 4:7) Ohole ndjoka oya dhenga mbanda. Oya kwatela mo okukala wu na ko nasha nayalwe noku ya ningila uuwanawa. Embo limwe lyuuyelele olya ti kutya ohole ndjoka hayi ithanwa a·gaʹpe, “ohayi imonikila owala okupitila miilonga mbyoka tayi longwa komuntu ngoka e yi na.” Uuna tatu ulukilwa ohole yashili nenge tatu yi ulukile yalwe, ohashi tu etele enyanyu nokukala nonkalamwenyo yi na eityo.

2, 3. Jehova oku ulike ngiini kutya oku hole aantu shili?

2 Jehova oku ulike kutya oku hole aantu, nokuli manga inaa shita Adam naEva. Okwa shiti evi li kalwe kaantu sigo aluhe. Ine li shita owala aantu ya kale ko, ihe oya nyanyukilwe onkalamwenyo pakuudha. Jehova shika okwe shi ningi nomutima aguhe, molwuuwanawa wetu, ihe hamolwuuwanawa we. Natango, Jehova oku ulike kutya ki ihole mwene, sho a yambeke oluvalo lwe kombanda yevi, lu kale lu na etegameno lyoku ka kala nomwenyo gwaaluhe mOparadisa, ndjoka a li e lu longekidhila.

 3 Konima sho Adam naEva inaaya vulika, Jehova oku ulike ohole yokwaaihola mwene momukalo gwa dhenga mbanda. Okwa ningi po elongekidho, a gandje ekulilo koluvalo lwaAdam naEva, molwaashono okwa li e shi kutya yamwe yomuyo otaya ka kala ye mu hole. (Gen. 3:15; 1 Joh. 4:10) Okuza ngaa sho Jehova u uvaneke ngoka ta ka hupitha aantu monakuyiwa, okwa li a fa e wete eyambo ndyoka lya ningwa nale. Konima yomimvo 4 000 lwaampono, Jehova okwa gandja Omwana awike, opo a sile aantu. (Joh. 3:16) Inatu pandula tuu Jehova, omolwohole ye yashili ndjoka e tu ulukila!

4. Oshike tashi ulike kutya aantu inaaya gwanenena otaya vulu okuulika ohole yashili?

4 Otatu vulu okuulika ohole yashili, molwaashono Kalunga okwe tu shita oshifetha she. Oshidhigu kutse okuulika ohole, molwaashono otwa thigulula uulunde. Ihe nonando ongawo, uulunde inawu kutha po uukwatya wetu woku yi ulika. Abel okwa li u ulike kutya oku hole shili Kalunga, sho e mu yambele eyambo dhingi lyomwaashoka a li e na. (Gen. 4:3, 4) Noa naye okwa li u ulike kutya oku hole shili aantu ooyakwawo, sho e yu uvithile etumwalaka lyaKalunga uule womimvo, nonando aantu kaya li ye mu pulakene. (2 Pet. 2:5) Abraham wo okwa li u ulike kutya oku hole Kalunga shi vulithe puye mwene, sho a lombwelwa a yambe po omwana Isak. (Jak. 2:21) Ngaashi aalumentu mboka aadhiginini, natse otatu vulu okuulika ohole, nonando otu kale twa taalelwa komashongo.

OHOLE YASHILI OYA YOOLOKA KO KOHOLE YIIFUNDJA

5. Omomikalo dhini tatu vulu okuulika ohole yashili?

5 Ombiimbeli oya yelitha kutya ohole yashili ihayi ulikwa ‘owala moohapu nomokupopya, ihe nomiilonga wo.’ (1 Joh. 3:18) Mbela shika otashi ti kutya katu na okuulika ohole yetu mokupopya? Hasho nando. (1 Tes. 4:18) Pehala lyaashono, otashi ti kutya ohole yetu kayi na owala okuulikwa moohapu, ihe nomiilonga wo, unene tuu ngele onkalo otayi pula tu katuke onkatu. Pashiholelwa, ngele Omukriste omukwetu oku na shoka a pumbwa, otu na okukatuka onkatu tu mu kwathele. (Jak. 2:15, 16) Sha faathana, ohole yokuhola Jehova nosho wo aantu ooyakwetu, ihayi tu inyengitha owala tu pule Kalunga a “tume aalongi keteyo lye,” ihe otu kuthe wo ombinga pakuudha miilonga yokuuvitha. — Mat. 9:38.

6, 7. (a) “Ohole yaa na uufudhime” oshike? (b) Iiholelwa yimwe yini tayi ulike ohole yiifundja?

6 Omuyapostoli Johannes okwa a nyola kutya ohole yetu “nayi kale ohole yashili, ndjoka tayi iholola yo yene miilonga wo.” Onkee ano, ohole yetu “nayi kale yashili” nenge tu tye “yaa na uufudhime.” (Rom. 12:9; 2 Kor. 6:6) Shika otashi ti kutya itatu vulu okwiiningitha twa fa tu na ohole yashili, omanga kaatu yi na. Otashi vulika twi ipule tatu ti: ‘Mbela opu na ngaa ohole yashili yi na uufudhime?’ Hasho nando, oshoka ohole ya tya ngawo oyiifundja.

7 Natu taleni kiiholelwa yohole yiifundja. Sho Satana a popi naEva moshikunino shaEden, oku ulike a fa e na ko nasha naye, ihe oonkatu dhe odhu ulike kutya okwi ihole mwene nonokutya ohole ye oyiifundja. (Gen. 3:4, 5) Pethimbo David a li omukwaniilwa, okwa li e na kuume ke Ahitofel. Ihe molwaashono Ahitofel okwa li i ihalela uuwanawa, okwa kotokele David. Shoka oshu ulike kutya uukuume we nomukwaniilwa kawa li woshili. (2 Sam. 15:31) Sha faathana nokunena, aashunimonima naamboka haya eta omatopoko megongalo, ohaya popi “oohapu oombwanawa dhokufundjaleka,” opo yi imonikithe ya fa aantu ye na ohole, ihe paushili wo wene oyi ihole yo yene. — Rom. 16:17, 18.

8. Epulo lini tu na okwiipula?

8 Ohole yiihelele oyi sitha ohoni unene, oshoka oya yooloka ko kohole yashili ndjoka yi li uukwatya wopakalunga. Mboka kaaye na ohole yashili, otashi vulika ya fundjaleke aantu, ihe itaya vulu okufundja Jehova. Jesus okwa ti mboka ya fa aafudhime otaya ka ‘ntimbagulwa.’ (Mat. 24:51) Odhoshili kutya aapiya yaJehova  itaya ka kala ya hala okuulika ohole yiifundja. Onkee ano, onawa tu ipule tatu ti: ‘Mbela ohandi ulike ngaa aluhe ohole yashili nenge oyiifundja?’ Natu ka kundathaneni omikalo omugoyi, moka tatu vulu okuulika ohole “yaa na uufudhime.”

NKENE TATU VULU OKUULIKA ‘OHOLE YASHILI, NDJOKA TAYI IHOLOLA YO YENE MIILONGA’

9. Ohole yashili otayi ke tu inyengitha tu ninge shike?

9 Kala wa nyanyukilwa shoka to longo, nonando kapu na ngoka e ku wete. Natu kale twa hala okulongela aamwatate iinima mbyoka tayi ulike kutya otu ya hole, tatu shi ningi “meholamo,” ano nopwaa na okwiiyulika. (Lesha Mateus 6:1-4.) Ananias nomukadhi Safira oya li ya ndopa okuninga ngawo. Sho ya li ya gandja omayambidhidho, oya li ya hala yalwe ye shi tseye noya li ye ya fundju. Uufudhime wawo owe ya etele iilanduliko yinikitha oluhodhi. (Iil. 5:1-10) Mepingathano naashoka, ngele otu na ohole yashili, otayi ke tu inyengitha tu kwathele aamwatate yetu nenyanyu, tatu shi ningi nopwaahe na okwiiyulika. Pashiholelwa, aamwatate mboka haya ambidhidha Olutuwiliki, moku lu kwathela li tu longekidhile iikulya yopambepo, ohaye shi ningi momukalo omwaanawa. Ihaya gandja eitulomo kuyo yene nenge ya lombwele aantu iilonga mbyoka ya longa.

10. Ongiini tatu vulu okuulika kutya otwa simaneka yalwe?

10 Simaneka yalwe. (Lesha Aaroma 12:10.) Jesus okwe tu tulila po oshiholelwa shokusimaneka yalwe, sho a yogo oompadhi dhaayapostoli ye. (Joh. 13:3-5, 12-15) Otashi vulika tu na okulonga nuudhiginini, opo tu kale neifupipiko ndyoka lya pumbiwa tu simaneke yalwe momukalo gwa faathana. Aayapostoli kaya li taya vulu okuuva ko thiluthilu shoka Jesus a ningi, sigo ya pewa ombepo ondjapuki. (Joh. 13:7) Omukalo gumwe moka tatu vulu okuulika kutya otwa simaneka yalwe, omokukala itaatu gandja unene eitulomo kutse yene, tashi vulika molwelongo lyetu, iiniwe yetu nenge uuthembahenda mboka tu na miilonga yaJehova. (Rom. 12:3) Uuna yamwe taya tangwa, omolwiilonga mbyoka ya longa, ihatu ya sile efupa. Pehala lyaashono, ohatu nyanyukwa pamwe nayo, nonando natse otwa longa shoka sha gwana oku tu pandulitha.

11. Omolwashike twa pumbwa okupandula yalwe tashi zi komutima?

11 Pandula aamwatate naamwameme, to shi ningi tashi zi komutima. Otu na okukonga oompito tu pandule yalwe, molwaashoka okuninga ngawo ohashi “tungu.” (Ef. 4:29) Ihe otwa pumbwa oku shi ninga pahole. Nonando ongawo, katu na okumbembeleka omuntu nenge tu henuke oshinakugwanithwa shetu shokugandja omayele ngoka ga pumbiwa. (Omayel. 29:5) Okupandula gumwe, e to mu ula nayi konima sho a pilamena ko, oshi li oludhi lwuufudhime. Omuyapostoli Paulus okwa li a yanda oshinima shoka, nokwa tula po oshiholelwa oshiwanawa shokuulika ohole yashili, momukalo moka a li a pandula yalwe. Pashiholelwa, okwa li a pandula pahole Aakriste yomuKorinto, omolwiilonga iiwanawa mbyoka ya longa. (1 Kor. 11:2) Ihe poompito mpoka ya li ya longo shoka inaashi uka, ka li e ya pandula. Okwa li e ya pe etompelo kutya omolwashike, ihe okwe shi ningi momukalo omwaanawa nogwa yela. — 1 Kor. 11:20-22.

Okugandja ekwatho kaamwatate naamwameme mboka ye li mompumbwe, ogwo omukalo gumwe gwokuulika ohole yetu noku ya yakula nawa (Tala okatendo 12)

12. Ongiini tatu vulu okuulika ohole yashili, uuna tatu yakula yalwe?

12 Kala ho yakula yalwe. Jehova ote tu lombwele tu kale hatu gandja sha kaamwatate naamwameme. (Lesha 1 Johannes 3:17.) Otu na oku shi ninga neinyengotompelo ewanawa, nokuyanda kehe shimwe shoka tashi tu ningitha tu kale tu ihole tse yene. Otatu vulu okwiipula ngeyi: ‘Mbela kegumbo lyandje ohandi hiya ko owala ookuume kandje kopothingo nenge mboka ndi wete taya vulu okugalulila ndje sha? Mbela ohandi kongo omikalo moka tandi vulu okugandja sha kaamwatate naamwameme mboka kaandi shi nawa nenge mboka ndi wete kutya itaya vulu okugalulila ndje sha?’  (Luk. 14:12-14) Ongiini ngele omumwatate nenge omumwameme okwa pumbwa ekwatho, omolwetokolo ndyoka a ninga kaali li pandunge? Nenge tashi vulika wa hiya gumwe kegumbo lyoye, ihe ine ku pandula? Moonkalo dha tya ngawo, otatu vulu okutula miilonga omayele ngaka taga ti: “Yakuleni aayenda momagumbo geni mwaa na omangungutulo.” (1 Pet. 4:9) Ngele owa landula omayele ngoka, oto ka mona enyanyu ndyoka hali zi mokugandja neinyengotompelo ewanawa. — Iil. 20:35.

13. (a) Opoompito dhini tashi vulika shi kale eshongo okukwathela mboka aankundi? (b) Iinima yini tatu vulu okuninga tu kwathele aankundi?

13 Ambidhidha aankundi. Oshipango shomOmbiimbeli shoka tashi ti “ambidhidheni aankundi ne mu idhidhimikile ayehe,” otashi vulu oku tu kwathela tu mone ngele ohole yetu oyashili. (1 Tes. 5:14) Oyendji mboka ya li aankundi, konima oya kala ye na eitaalo lya kola. Ihe opu na yalwe twa pumbwa oku yi idhidhimikila nokutsikila oku ya ambidhidha. Shika otashi vulu okukwatela mo okukundathana nayo omanyolo taga tungu, okulonga pamwe nayo muukalele nokupulakena kuyo. Oshikwawo, pehala lyokudhiladhila kutya omumwatate nenge omumwameme okwa ‘kola’ nenge ‘omunkundi,’ natu kaleke momadhiladhilo kutya atuheni otu na omaukwatya omawanawa nomaunkundi. Nokuli nomuyapostoli Paulus okwa li e shi zimine kutya oku na omaunkundi. (2 Kor. 12:9, 10) Onkee ano, atuheni otwa pumbwa okuyambidhidhathana nAakriste ooyakwetu.

14. Otwa halelela okuninga shike, opo tu kale nombili naamwatate?

14 Pangeni ombili. Ohatu ningi ngaashi tatu vulu, opo tu kale nombili naamwatate, nokuli nopoompito mpoka tu wete ye tu uva ko papuko nenge tayu ungaunga natse kaashi li pauyuuki. (Lesha Aaroma 12:17, 18.) Ngele otu uvitha gumwe nayi, otwa pumbwa oku mu pa ombili tashi zi komutima. Pashiholelwa, pehala lyokutya “ombili ngele osho wu uvite ngawo,” oto vulu okwiikwatela mo to ti: “Ombili sho nda popi shoka she ku uvitha nayi.” Ombili oya simanenena, unene tuu mondjokana. Aaihokani kaye na okwiiningitha mokati kaantu kutya oye holathane, omanga uuna ye li megumbo haya ulathana iitya iilulu nenge haye ehamekathana palutu.

15. Ongiini tatu vulu okuulika kutya okudhimina po kwetu okwoshili?

15 Dhiminathanii po tashi zi komutima. Uuna gumwe e tu uvitha nayi, ohatu mu dhimine po noihatu kala tu mu nine iikonene. Ohatu dhimine po tashi zi komutima mboka tashi vulika inaaye shi nongela ngele oye tu uvitha nayi, mokutula miilonga enyolo ndika tali ti: ‘Hololeni ohole yeni mokuyakulathana. Ningeni ashihe shoka tamu vulu okukoleka uukumwe weni womombepo ondjapuki omolwombili ndjoka tayi mu mangele kumwe.’ (Ef. 4:2, 3) Opo okudhimina po kwetu ku kale kwashili, otu na okupangela omadhiladhilo getu, opo kaatu ‘dhimbulukwe uuwinayi twe wu ningilwa.’ (1 Kor. 13:4, 5) Ngele otwa kala tu nine omumwatate nenge omumwameme iikonene, itashi ka yona po owala ekwatathano lyetu naye, ihe otashi ka yona po wo ekwatathano lyetu naJehova.  (Mat. 6:14, 15) Omukalo gumwe ishewe tatu vulu okuulika kutya okudhimina po kwetu okwoshili, omokukwatela momagalikano getu mboka ye tu uvitha nayi. — Luk. 6:27, 28.

16. Otu na okutala ko ngiini omauthembahenda ngoka tu na miilonga yaJehova?

16 Natu lalakanene uuwanawa wayalwe. Ngele otwa mono omauthembahenda miilonga yaJehova, otu na okulongitha oompito ndhoka tu ulike kutya otu na ohole yashili ‘mokwaalonga owala shoka she tu opalela, ihe tu tale wo shoka tashi opalele yakwetu.’ (1 Kor. 10:24) Pashiholelwa, piigongi yoshikandjo noyoshitopolwa, aayakuli ohaya yi mo tango mehala moka tamu gongalelwa, ya ka unganeke nawa iinima, manga aantu inaaye ya mo. Ihaya tala ko oshinakugwanithwa shawo shi li ompito yokwiikongela iipundi iiwanawa noyaanegumbo lyawo. Pehala lyaashono, oyendji yomuyo ohaya hogolola okukuutumba kehe pamwe. Kungawo, ohayu ulike kutya oye na ohole yashili. Mbela ito vulu okuholela oshiholelwa shawo oshiwanawa?

17. Ohole yashili otayi ki inyengitha omuntu a ninge shike, ngele okwa yono eyono lya kwata miiti?

17 Hempulula iilonga yoye iiwinayi mbyoka wa ninga meholamo, e to yi etha po. Uuna Aakriste yamwe ya yona eyono lya kwata miiti, ohaya kambadhala oku li holeka, opo ya yande okukala ya sa ohoni nenge okuuvitha yalwe nayi. (Omayel. 28:13) Ihe okuninga ngawo kashi li pahole, molwaashono ohashi tula nakuyona nosho wo yalwe moshiponga. Ngiini mbela? Ombepo yaJehova otashi vulika yi kale kaayi mo megongalo, nokungawo egongalo itali kala li na ombili. (Ef. 4:30) Ohole yashili ohayi inyengitha Aakriste mboka ya yona omayono ga kwata miiti, ya popye naakuluntugongalo, opo ya vule oku ya kwathela. — Jak. 5:14, 15.

18. Ohole yashili oya simana shi thike peni?

18 Ohole oyo uukwatya dhingi komaukwatya agehe. (1 Kor. 13:13) Ohayi tu ndhindhilikitha mo tu li aalanduli yaJesus notu li aantu mboka taya holele Jehova, ngoka e li Onzo yohole. (Ef. 5:1, 2) Paulus okwa nyola a ti: ‘Ngele kandi na ohole, ongame oshinima showala.’ (1 Kor. 13:2) Onkee ano, natu tsikile okuulukila yalwe ohole, ihe kashi shi owala “moohapu,” ihe “nayi kale ohole yashili, ndjoka tayi iholola yo yene miilonga wo.”