Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2017

Nkene omamoniko gaSakaria ge ku guma

Nkene omamoniko gaSakaria ge ku guma

“Galukileni kungame, nangame otandi galukile kune.” — SAK. 1:3.

OMAIMBILO: 120, 117

1-3. (a) Oshigwana shaJehova osha li monkalo yini, sho Sakaria a tameke okuhunganeka? (b) Omolwashike Jehova a li e shi pula shi ‘galukile kuye’?

ONDHINGAMBO tayi tuka, omukiintu a kuutumba meshungu, aakiintu yaali taya tuka ye na omawawa omanene ga fa gakandoko. Ngono ogo gamwe gomomamoniko omahokithi taga adhika membo lyaSakaria. (Sak. 5:1, 7-9) Omolwashike Jehova a li a pe omuhunganeki gwe omamoniko ngoka? Onkalo yAaisraeli oya li ya tya ngiini pethimbo ndyoka? Omamoniko ngoka Sakaria a li a mono, oge tu guma ngiini kunena?

2 Momumvo 537 K.E.N., aapiya yaJehova oya li ya nyanyukwa noonkondo. Oya li muukwatwa muBabilonia uule womimvo 70, ihe ngashingeyi oya li ya mangululwa mo. Oya li ya nyanyukwa okushuna kuJerusalem, opo ya ka totulule elongelokalunga lyashili. Momumvo 536 K.E.N., omakankameno gotempeli oga li ga tulwa po. Pethimbo ndyoka, aantu oya “kaluluka mokule noyu uvika kokulekule.” (Esra 3:10-13) Nziya opwe ya omapataneko ogendji ge na ko nasha niilonga yawo yokutunga. Oge ya teya omukumo noge ya  ningitha kaaya tsikile niilonga yawo yokutunga otempeli. Oya tameke okugandja eitulomo kokutunga omagumbo gawo nokokulonga omapya gawo. Konima yomimvo omulongo nahamano, otempeli yaJehova natango kaya li ya pwa okutungwa. Oshigwana shaJehova osha li sha pumbwa okudhimbulukithwa kutya nashi galukile kuJehova, nokaashi kale sha pititha komeho iinima yasho yopaumwene. Jehova okwa li a hala shi galukile kuye, noshi mu longele nomutima aguhe nopwaa na okutila.

3 Jehova okwa li a kwathele oshigwana she shi dhimbulukwe kutya omolwashike e shi mangulula mo muBabilonia. Okwe shi ningi ngiini? Okwa tumu omuhunganeki gwe Sakaria, mo 520 K.E.N. Shoka oshihokithi osho kutya edhina Sakaria otali ti “Jehova oha dhimbulukwa.” Nonando oshigwana osha li sha dhimbwa shoka Jehova e shi ningila, Jehova okwa li e shi dhimbulukwa. (Lesha Sakaria 1:3, 4.) Okwa li e shi shilipaleke pahole kutya ote ke shi kwathela shi totulule elongelokalunga lyashili. Okwa li wo e shi londodha kutya ite ke shi idhidhimikila, ngele itashi mu longele nomutima aguhe. Natu ka konakoneni emoniko etihamano netiheyali lyaSakaria. Otatu ki ilonga nkene Jehova a li i inyengitha oshigwana she shi katuke oonkatu nosho wo kutya omamoniko ngoka otage tu longo shike kunena.

EGEELO LYAKALUNGA LI NA KO NASHA NOKUYAKA

4. Sakaria okwa li a mono shike memoniko lye etihamano, noshike sha simana kombinga yondhingambo ndjoka ya nyolwa koombinga adhihe? (Tala kethano lyotango lyopetameko.)

4 Ontopolwa 5 yaSakaria oya tameka nemoniko ihaali longithwa naanaa. (Lesha Sakaria 5:1, 2.) Sakaria okwa li a mono ondhingambo tayi tuka, yi na uule woometa omugoyi nomutamo gwoometa ne netata. Ondhingambo ndjoka kaya li ya tonywa, noya li ya longekidhwa okuleshwa. Oya li ya nyolwa etumwalaka lyepangulo oombinga adhihe. (Sak. 5:3) Pethimbo lyonale, ombinga owala yimwe yondhingambo ya li hayi nyolwa. Onkee ano, osha yela kutya ondhingambo ndjika oya li yi na etumwalaka lya kwata miiti nolya simana.

Aakriste kaye na okuyaka (Tala okatendo 5-7)

5, 6. Kalunga okwa tala ko ngiini okuyaka kwoludhi kehe?

5 Lesha Sakaria 5:3, 4Aantu ayehe oye na okwiihokolola koshipala shaJehova, unene tuu mboka hayi ithanwa nedhina lye. Mboka ye hole Kalunga ohaya kaleke momadhiladhilo kutya okuyaka kwoludhi kehe otaku ka ‘kwatitha edhina lyaKalunga kawo oshidhila.’ (Omayel. 30:8, 9) Kutya nduno omuntu ngoka a yaka oku kale netompelo lini, shoka otashi ulike kutya okwa pititha komeho olwiho pehala lyaKalunga, ano a gandja unene eitulomo kiinima yopamaliko. Kungawo otu ulike wo kutya ina lenga Jehova, edhina lye noompango dhe.

6 Ndhindhilika kutya Sakaria 5:3, 4 otayi ti: ‘Etulomutima otali ka adha egumbo lyomufuthi kehe. Otali ka kala momagumbo gawo, notaya ka teka po.’ Onkee ano, Jehova ota vulu okuholola puuyelele nokupangula oshilonga kehe oshiwinayi shi li mokati koshigwana she. Kutya nduno omuntu oku holeke aakwanepangelo, aagandji yiilonga, aakuluntugongalo nenge aavali ye kutya ye iha yaka, shoka ita vulu oku shi holeka Kalunga. Kalunga ota ka shilipaleka kutya okuyaka kwoludhi kehe ote ku eta puuyelele. (Heb. 4:13) Onkee ano, oshi li lela uuthembahenda okweendathana naantu mboka haya kambadhala “aluhe”okupopya oshili. — Heb. 13:18.

7. Emoniko lyondhingambo tayi tuka otali tu longo shike?

7 Okuyaka kwoludhi kehe ohaku yemateke Jehova. Osha simana kutse okutseya nokuvulika komithikampango dhaJehova dhopamikalo nokuninga shoka itaashi shekitha edhina lye. Okuninga ngawo, otaku vulu oku tu kwathela tu yande oku ka pangulwa kuJehova pamwe naamboka ihaaya vulika kuye.

 KALA METSOKUMWE NOOHAPU DHOYE “ESIKU KEHE”

8-10. (a) Egano oshike? (b) Egano lini omukwaniilwa Sedekia a li a ndopa okugwanitha po?

8 Ondhingambo ndjoka ya li tayi tuka oya li wo yi na etumwalaka tali londodha mboka ‘haya gana iifundja medhina lyaKalunga.’ (Sak. 5:4) Egano olyo euvaneko ndyoka tali koleke kutya oshinima shontumba oshoshili. Otatu vulu wo kutya olyo euvaneko lya kwata miiti ndyoka omuntu hu uvaneke kutya ota ka ninga oshinima shontumba nenge hasho.

9 Okugana medhina lyaJehova, oku li oshinima sha kwata miiti. Shoka osho naanaa Sedekia, omukwaniilwa gwahugunina okupangela muJerusalem, a li a ningi. Sedekia okwa li a gana medhina lyaJehova kutya ota ka kala omudhiginini komukwaniilwa gwaBabilonia. Nonando ongawo, Sedekia ka li a gwanitha po egano lye. Oshe mu etele oshizemo shini? Jehova okwe mu geele, a ti: “Oshili ngaashi ngame Kalunga omunamwenyo, . . . omukwaniilwa [Sedekia] nguka ota ka sila muBabilon, oshoka okwa yono egano lye nehangano ndyoka a hangana nomukwaniilwa gwaBabilonia, ngoka e mu tula koshipundi.” — Hes. 17:16.

10 Omukwaniilwa Sedekia okwa li u uvanekele Jehova kutya ota ka kala metsokumwe negano ndyoka a ninga medhina lyaKalunga. (2 Ondjal. 36:13) Ihe Sedekia pehala lyokudhiginina egano lye, okwe li teya e ta pula Aaegipiti ye mu kwathele a ze mo muBabilonia. — Hes. 17:11-15, 17, 18.

11, 12. (a) Egano lini lya simanenena komagano agehe? (b) Ongiini tatu vulu okukala metsokumwe negano lyeiyapulo lyetu esiku kehe?

11 Jehova oha pulakene wo komauvaneko ngoka hatu ningi. Ohe ga tala ko ge li oshinima sha kwata miiti. Onkene natu ga gwanithe po, opo a kale e tu hokwa. (Eps. 76:11) Egano lya simanenena komagano agehe ngoka twa ninga, olyo okwiiyapulila Jehova. Oku mu iyapulila otashi ti kutya otatu ke mu longela kutya nduno oonkalo nadhi kale dha tya ngiini.

 12 Otatu vulu okuulika ngiini kutya otu li metsokumwe negano lyetu lyokwiiyapulila Jehova? Omokukala aadhiginini “esiku kehe,” uuna twa taalela omashongo kutya nduno omashona nenge omanene. (Eps. 61:8) Pashiholelwa, oto ka ninga po shike, ngele omuntu kiilonga yeni nenge kosikola okwa tameke okudhana nomaiyuvo goye? Mbela oto ke mu henuka nokuulika kutya owa ‘hokwa oondjila dhaJehova’? (Omayel. 23:26) Ngele otu li muukwanegumbo wa topoka palongelokalunga, mbela ohatu pula ngaa Jehova e tu kwathele tu kale tu na uukwatya wopaKriste, nonando putse kapu na ngoka ta ningi oonkambadhala dha tya ngawo? Mbela ohatu galikana ngaa kuTate yetu gwomegulu esiku kehe, tatu mu pandula sho tu li kohi yepangelo lye naasho e tu hole? Mbela ohatu kongo ngaa ethimbo tu leshe Ombiimbeli esiku kehe? Sho twi iyapulile Jehova, otwe mu uvanekele kutya otatu ka ninga iinima mbyoka. Uuna tatu yi ningi, otatu vulika kuye. Okuninga ngaashi tatu vulu tu mu longele, otaku ulike kutya otu mu hole notwe mu iyapulila shili. Okulongela Jehova oku li omukalo dhingi monkalamwenyo yetu. Okugwanitha po shoka tu uvaneka otaku tu etele uuwanawa. Ngele otwa kala aadhiginini, otatu ka mona onakuyiwa ombwanawa. — Deut. 10:12, 13.

13. Memoniko etihamano lyaSakaria otatu ilongo mo shike?

13 Emoniko lyaSakaria etihamano, olye tu kwathela tu mone kutya mboka ye hole Jehova, kaye na okuyaka nenge okugana iifundja. Otwe shi mona wo kutya nonando Aaisraeli oya li ya ningi omapuko, Jehova ine etha oku ya kwathela. Okwa li e shi kutya oya taalela omathiminiko okuza kaatondi mboka ya li ye ya kundukidha. Jehova okwe tu tulila po oshiholelwa, sho a kala nokudhiginina omauvaneko ge, note ke tu kwathela wo tu dhiginine getu. Omukalo gumwe e tu kwathela, omoku tu pa etegameno kutya masiku ota ka hulitha po uukolokoshi awuhe kombanda yevi. Emoniko lyaSakaria lya landula ko, otali popi kombinga yetegameno ndyoka.

AANTU AAGOYOKI OYA ‘TULWA MEHALA LYAWO,’ (OB-1954)

14, 15. (a) Sakaria okwa mono shike memoniko lye etiheyali? (Tala kethano etiyali lyopetameko.) (b) Omukiintu ngoka e li meshungu ota thaneke shike, nomolwashike omuyengeli e mu siikilile mo?

14 Konima sho Sakaria a mono ondhingambo tayi tuka, omuyengeli okwe mu lombwele a ti: “Tala” pombanda. Emoniko lye etiheyali olya li tali holola shike? Sakaria okwa mono oshikwatelwa shoka sha li “eshungu.” (Lesha Sakaria 5:5-8.) Eshungu olya li li na uunene wopokati noli na “oshisiikilo sha ningwa moholo.” Sho lya suukululwa, Sakaria okwa mono “omukiintu a kuutumba” mo. Omuyengeli okwa yelithile Sakaria kutya omukiintu ngoka ota thaneke “aantu aagoyoki.” Dhiladhila owala kutya Sakaria okwa li a tila shi thike peni, sho a mono omukiintu ti inyoweke ta zi meshungu. Omuyengeli okwa thindile omukiintu meshungu nziya, e te li siikile noshisiikilo oshidhigu. Emoniko ndino olya hala okutya shike?

15 Oshitopolwa shoka shemoniko, otashi ulike kutya Jehova ite ki idhidhimikila nando uuwinayi kehe mokati koshigwana she. Ngele okwe wu mono, ote ke wu kandula po moompadhi oontalala. (1 Kor. 5:13) Omuyengeli okwe tu shilipalekele oshinima shika, sho a siikile eshungu noshisiikilo oshidhigu.

Jehova okwa ninga ngaashi ta vulu a kaleke elongelokalunga lyashili lya yela (Tala okatendo 16-18)

16. (a) Oshike ishewe Sakaria a li a mono tashi ningilwa eshungu? (Tala kethano etitatu lyopetameko.) (b) Aakiintu yaali mboka ye na omawawa oya li ya fala eshungu peni?

16 Sakaria okwa mono ishewe aakiintu yaali ye na omawawa ge na oonkondo ga fa gakandoko. (Lesha Sakaria 5:9-11.) Osha yela kutya aakiintu mboka oya li ya yooloka ko komukiintu ngoka e li meshungu. Yo oya li ya longitha omawawa gawo ngoka ge na oonkondo, e taya kutha po eshungu ndyoka mu na omukiintu ngoka ta thaneke “aantu aagoyoki,” e taya tuka  po nalyo. Omukiintu oye mu fala peni? Omukiintu ngoka ta thaneke aantu aagoyoki okwa falwa ‘kuBabilonia.’ Omolwashike ya li ye na oku mu fala hoka?

17, 18. (a) Omolwashike Babilonia shi li ‘ehala’ tali opalele okukala “aantu aagoyoki”? (b) Otu na okukala twa tokola okuninga shike shi na ko nasha naagoyoki?

17 Aaisraeli yopethimbo lyaSakaria, oya li ye wete Babilonia ehala tali opalele okukala aantu aagoyoki. Oya li ye na okukondjitha iikala yaapagani esiku kehe, oshoka oya kokela mokati kaantu mboka ye na omikalo dha nyata nohaya longele iikalunga. Osha li sha yela kuSakaria nokAajuda ooyakwawo kutya Babilonia osha li ehala lyaantu aagoyoki pethimbo lyawo. Emoniko ndika olya li lye ya etele shili epepelelo. Jehova okwa li e ya shilipaleke kutya ota ka kaleka elongelokalunga lyashili lya yela.

18 Emoniko olya li wo lya dhimbulukitha Aajuda oshinakugwanithwa shawo shokukaleka elongelokalunga lya yogoka. Aantu aagoyoki itaya vulu noitaya ka pitikwa okukala mokati koshigwana shaKalunga. Konima sho twe ya mehangano lyaKalunga ndyoka lya yogoka, moka tu uvite ohole negameno lye, nena otu na oshinakugwanithwa shoku li kaleka lya yela. Mbela ohatu kaleke ngaa “otempeli” yetu ya yela? Aantu aagoyoki kaye na mo nando ehala moparadisa yetu yopambepo.

AANTU AAYOGOKI OHAYA SIMANEKITHA JEHOVA

19. Omamoniko gaSakaria taga hokitha, otaga ti shike kutse pethimbo lyetu?

19 Emoniko etihamano netiheyali lyaSakaria, otaga londodha aalongi yuuwinayi, nonokutya Jehova ite ki idhidhimikila mboka taya tsikile nomikalo dhawo dhaahe li pauyuuki. Mboka taye mu longele moshili, oye na okukala ye tonde uukolokoshi. Omamoniko ngaka oge li wo eshilipaleko lyopahole okuza kuTate yetu gwomegulu. Ngele ohatu ningi ngaashi tatu vulu tu kale twa hokiwa kuKalunga nokukala megameno lye, nena itatu ka gwila methingo. Pehala lyaashono, ote ke tu laleka nuuyamba. Kala wu na uushili kutya otatu ka pondola kekwatho lyaJehova, nonando otu li muuyuni wu udha uukolokoshi. Ongiini tatu vulu okukala nuushili kutya elongelokalunga lyashili itali hulu po muuyuni mbuka wu udha aakaanakalunga? Eshilipaleko lini tu na kutya Jehova ota ka gamena ehangano lye, sho uudhigu uunene tawu ende tawu hedha popepi? Omapulo ngaka otaga ka kundathanwa moshitopolwa tashi landula.