Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2017

Josef Omwaarimatia okwa ningi po sha

Josef Omwaarimatia okwa ningi po sha

JOSEF OMWAARIMATIA, okwa li a tila oku ka popya nomupangeli Omuroma, Pontius Pilatus, ngoka a li a tseyika nawa kutya iha pitwa momutse. Josef okwa li ta dhiladhila kutya itashi ka pita, a popye oshipala noshipala naPilatus. Opo Jesus a ningilwe efumviko tali simanekitha, opwa li pu na gumwe e na okupula omudhimba gwaJesus kuPilatus. Konima sho Pilatus a shilipaleke kutya Jesus okwa sa, okwa gandja omudhimba gwe kuJosef. Nonando Josef okwa li a yemata, okwa yi kehala hoka kwa dhipagelwa Jesus. — Mark. 15:42-45.

  • Josef Omwaarimatia okwa li lye?

  • Okwa li shike shaJesus?

  • Oshike tashi nywitha omakutsi mehokololo lye?

 OSHILYO SHOMPANGU YOPOMBANDA YAAJUDA

Evaangeli lyaMarkus otali ti kutya Josef okwa li “oshilyo sha simana shoshigongi shaatokoli.” Oshigongi shika oshi li ompangu yopombanda yAajuda, sha hala okutya, olutu ndoka halu wilike oshigwana, epangelo nosho wo elongelokalunga lyAajuda. (Mark. 15:1, 43) Josef okwa li omuwiliki moshigwana, onkee ompito yokupopya nomupangeli Omuroma okwa li ta vulu oku yi mona. Josef okwa li wo omuyambantu. — Mat. 27:57.

Owu na ngaa uulaadhi wokuzimina kutya Jesus oku li Omukwaniilwa gwoye?

Iilyo yOmpangu yopombanda yAajuda oya li yi tonde Jesus. Oya li ya pangele nokuli monanguwi yi mu dhipage. Ihe Ombiimbeli otayi popi Josef e li “omulumentu omwaanawa nomuyuuki.” (Luk. 23:50, OB-1954) Ka li a fa iilyo yilwe oyindji yOmpangu yAajuda. Ye okwa li omunashili, omuyuuki noha vulika kiipango yaKalunga. Okwa li wo “a tegelela Oshilongo shaKalunga.” Shoka otashi tu kwathele tu uve ko kutya omolwashike a ningi omulongwa gwaJesus. (Mark. 15:43; Mat. 27:57) Otashi vulika i inyengithwa ketumwalaka lyaJesus, oshoka okwa li a lenga oshili nosho wo uuyuuki.

OMULONGWA GWAJESUS GWOMEHOLAMO

Johannes 19:38 otayi ti kutya Josef ‘okwa li omulongwa gwaJesus, ihe omeholamo, oshoka okwa li a tila Aajuda.’ Okwa li a tila shike? Aajuda oya li ye tonde Jesus, nohaya kondo mosinagoga kehe gumwe ngoka te mu itaale. (Joh. 7:45-49; 9:22) Uuna Omujuda a kondwa mosinagoga oha kala e tondike, e ekelwahi nokee niwe naye. Onkee ano, Josef okwa li a kwatakwata oku shi ulika montaneho kutya okwi itaala Jesus. Ando okwe shi ningile, ando okwa kanitha ondondo nesimano lye.

Josef haye awike a li a patekena moshinima shoka. Johannes 12:42 otayi ti: “Oyendji yomaawiliki yAajuda oya itaale Jesus; ihe omoIwAafarisayi inaye shi hempulula montaneho yaantu, opo kaaya kondwe mo mosinagoga.” Oshilyo shimwe shOmpangu yopombanda yAajuda sha li monkalo ya fa yaJosef, oNikodemus. — Joh. 3:1-10; 7:50-52.

Nonando Josef okwa li omulongwa gwaJesus, ine shi popya montaneho. Uumbanda mboka kawu li nawa. Jesus okwa ti: “Kehe . . . ngoka ta hempulula montaneho kutya ogwandje, nangame wo osho tandi ka ninga puTate megulu. Ngoka ti idhimbike ndje paantu, nangame wo otandi mu idhimbike puTate megulu.” (Mat. 10:32, 33) Josef ka li naanaa i idhimbike Jesus, ihe okwa li owala a tila oku shi holola kutya okwe mu itaala. Mbela nangoye owu na uumbanda mbono?

Josef okwa li a ningi oshinima shimwe shi shi okupandulwa. Oshike mbela? Ka li a  ambidhidha nando ompangela yOmpangu yAajuda yokudhipaga Jesus. (Luk. 23:51) Yamwe ohaya ti kutya otashi vulika Josef kaa li po, sho Jesus ta pangulwa. Kutya nduno opo a li nenge hasho, Josef oku na okukala a li u uvite nayi, omolwokwaanuuyuuki hoka kwa ningilwa Jesus. Mbela okwa li ngaa ta vulu okuninga po sha? Aawe.

INA KWATAKWATA OKUTOKOLA

Sho Jesus a si, Josef okwa li a tokola okwaambidhidha aalongwa yaJesus. Etokolo lye oli iwetikile moohapu dhaMarkus 15:43, ndhoka tadhi ti: “Okwi itsu omukumo nokwa yi kuPilatus e te mu indile omudhimba gwaJesus.”

Osha fa shi li ngeyi kutya Josef opo a li, sho Jesus a si. Okwa li e shi tseya tango kuPilatus kutya Jesus okwa sa. Sho Josef e mu pula omudhimba gwaJesus, Pilatus okwa li a kumwa “sho u uvu kutya Jesus okwa sa.” (Mark. 15:44) Ngele Josef okwe shi mona sho Jesus ta si, eso ndyoka tali uvitha omwenyo omutoye komuti gwomahepeko, mbela shino osho she mu inyengitha i iholole montaneho kutya ye omulongwa gwaJesus? Otashi vulika osho. Josef okwa katuka onkatu ya simana. Okwa ningi omulongwa gwaJesus, ihe hameholamo we.

JOSEF TA FUMVIKE JESUS

Pampango yAajuda, omudhimba gwomuntu ngoka a tokolelwa eso ogwa li gu na okufumvikwa, manga etango inaali ningina. (Deut. 21:22, 23) Ihe Aaroma oya li haye etha omidhimba dhaakawulinyanga  dhi olele koshiti nenge dhi ku umbilwe melambo. Mbela Josef okwa li a hala omudhimba gwaJesus gu olele koshiti? Aawe nando. Josef okwa adhika i ihokela ombila ye memanya, popepi naampoka pwa dhipagelwa Jesus. Mombila moka inamu tulwa nale omuntu, shoka tashi ulike kutya Josef opo owala a adhika a tembukile muJerusalem okuza kuArimatia. * Otashi vulika a li a hala aanegumbo lye ya kale haya fumvikwa mehala ndyoka. (Luk. 23:53; Joh. 19:41) Sho Josef a tula Jesus mombila ndjoka a li i ihokela, shoka oshu ulike kutya okwa li e mu simaneka. Shoka osha gwanitha po ehunganeko ndyoka tali ti: “Okwa fumvikwa pomuyamba.” — Jes. 53:5, 8, 9.

Mbela opu na oshinima shontumba shono wa lenga komeho yekwatathano lyoye naJehova?

Omavaangeli agehe gane oga ti kutya sho omudhimba gwaJesus gwa kuthwa komuti, Josef okwe gu dhingile melapi, e te gu tula mombila ndjoka a adhika i ihokela. (Mat. 27:59-61; Mark. 15:46, 47; Luk. 23:53, 55; Joh. 19:38-40) Nikodemus okwa kwathele Josef, sho e mu etele omagadhi ga nika nawa. Otashi vulika Josef naNikodemus hayo yene ya kutha ko omudhimba komuti, oshoka oya li ya simana. Otashi vulika ya li ya longitha aapiya yawo ya humbate omudhimba noku ke gu tula mombila. Kutya nduno oya li ya longitha aapiya, oshilonga shoka ya longo osha simanenena. Omuntu ngoka a guma omudhimba, okwa li ha kala a nika oshidhila omasiku gaheyali, na kehe shimwe ta gumu otashi kala sha nyata. (Num. 19:11; Hag. 2:13) Uuna omuntu e li monkalo ndjoka, ka li ha kala po pedhimbuluko nopedhano lyOpaasa. (Num. 9:6) Omolwomalongekidho ngoka Josef a ningi a fumvike Jesus, Aajuda ooyakwawo oya li taye mu sheke. Mbela Josef okwa li a tila? Aawe, pehala lyaashono, okwa ningile Jesus efumviko lya simana, e ti iholola ye mwene kutya oku li omulongwa gwaKristus.

EHULILO LYEHOKOLOLO LYAJOSEF

Konima yefumviko lyaJesus, Ombiimbeli inayi popya sha we kombinga yaJosef Omwaarimatia. Oshike she mu ningilwa? Katu shi wo, ihe okutala kwaashoka twa zi nokukundathana, otashi vulika e shi popi montaneho kutya ye Omukriste. Shoka shi shi okupandulwa osho kutya okwa tsikile okukala e na eitaalo nuulaadhi, nopethimbo e li muudhigu. Oku shi lela okupupulwa kombunda.

Ehokololo ndino otali tu ningitha tu ipule tatu ti: Mbela otwa lenga unene ondondo, eithano, omaliko, aantu yaandjetu nosho wo emanguluko lyetu, shi vulithe pekwatathano lyetu naJehova?

^ okat. 18 Arimatia otashi vulika sha li muRama, kunena ohashi ithanwa Rentis (Rantis). Oshi li ookilometa 35 muumbangalantuninginino waJerusalem, nomuhunganeki Samuel naye omo a li ha kala. — 1 Sam. 1:19, 20.