Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juli 2017

Jehova “na tsakanithe oompangela dhoye adhihe”

Jehova “na tsakanithe oompangela dhoye adhihe”

“Konga uulinawa pOmuwa, note ku pe shoka wa yuulukwa.” — EPS. 37:4.

OMAIMBILO: 89, 140

1. Etokolo lini omugundjuka e na okuninga kombinga yonakuyiwa ye, ihe omolwashike inaa pumbwa okulimbililwa? (Tala kethano lyopetameko.)

AAGUNDJUKA otashi vulika tamu tsu kumwe kutya manga inoo ya molweendo, oshi li pandunge okutseya mpoka to yi. Onkalamwenyo oya fa omuntu e li molweendo. Ethimbo lyokudhiladhila mpoka wa hala okuya, opethimbo wu li omugundjuka. Odhoshili kutya okuninga oompangela, kashi shi oshinima oshipu. Okakadhona kedhina Heather oka ti: “Oshitilithi, molwaashoka owu na okuninga etokolo kutya onkalamwenyo yoye oto ke yi longitha ngiini.” Ngele nangoye osho wu uvite ngawo, dhimbulukwa kutya Jehova ota ti: “Ongame Kalunga koye — ino limbililwa! Otandi ku kankameke e tandi ku kwatha.” — Jes. 41:10.

2. Owu shi shi ngiini kutya Jehova okwa hala wu ninge oompangela ndhoka tadhi ke ku nyanyudha monakuyiwa?

2 Jehova ote mu ladhipike mu ninge oompangela dhopandunge kombinga yonakuyiwa yeni. (Omuuv. 12:1; Mat. 6:20) Okwa hala mu kale mwa nyanyukwa. Shoka oshi iwetikile miinima mbyoka a shita, uuna to yi tala, to yi pulakene nongele to yi lolo. Dhiladhila wo nkene he tu sile oshimpwiyu naasho he tu longo tu kale nonkalamwenyo ya dhenga mbanda. Jehova ota lombwele mboka ihaaya vulika kuye ta ti: ‘Omwa hogolola shoka inaashi opalela ndje. Onkee tandi mu lombwele kutya  mboka haya longele ndje nohaya vulika kungame, otaya ka kala ye na elago, ihe ne otamu ka kala momupya. Otaya ka imba omahambelelo.’ (Jes. 65:12-14) Uuna aapiya ye taya ningi omatokolo gopandunge moonkalamwenyo dhawo, ohashi simanekitha Jehova. — Omayel. 27:11.

OOMPANGELA NDHOKA TADHI KE KU NYANYUDHA

3. Jehova okwa hala wu ninge shike?

3 Oompangela dhini Jehova a hala wu ninge? Okwa shiti aantu ye mu tseye noye mu longele nuudhiginini, opo ya kale ya nyanyukwa. (Eps. 128:1; Mat. 5:3) Tse inatu fa iinamwenyo mbyoka ya shitwa owala nelalakano lyokulya, lyokunwa nolyokuvala. Kalunga okwa hala wu ninge oompangela ndhoka tadhi ke ku etela enyanyu ndyoka kaali niwe kiinamwenyo. Omushiti gwetu oye “Kalunga kohole,” “Kalunga omunyanyukwi” ngoka a shita aantu “oshifetha she.” (2 Kor. 13:11; 1 Tim. 1:11, NW; Gen. 1:27) Oto ka kala wa nyanyukwa, ngele owe mu holele. Ombiimbeli otayi ti: “Okugandja oku na elago ku vule okutaamba.” Mbela enyolo ndyoka olye ku gwanithilwa? (Iil. 20:35) Oohapu ndhoka odha simana monkalamwenyo yomuntu. Onkee ano, Jehova okwa halelela wu ninge oompangela ndhoka tadhi ulike kutya owu mu hole nosho wo aantu ooyakweni. — Lesha Mateus 22:36-39.

4, 5. Oshike sha li hashi nyanyudha Jesus?

4 Aagundjuka, Jesus Kristus okwe mu tulila po oshiholelwa sha dhenga mbanda. Sho a li okanona, naye okwa li ha nyanyukilwa uudhano ngaashi owala aanona ooyakwawo. Ombiimbeli otayi ti kutya opu na ‘ethimbo lyokuyola nethimbo lyokudhana.’ (Omuuv. 3:4) Jesus okwa li wo a hedha popepi naJehova mokukonakona Omanyolo. Pethimbo a li e na owala omimvo 12, aalongimpango kotempeli oya li ya kuminwa “oondunge dhe nomayamukulo ge” ge na ko nasha niinima yopambepo. — Luk. 2:42, 46, 47.

5 Sho Jesus a koko, okwa kala a nyanyukwa monkalamwenyo ye. Oshike she mu etele enyanyu? Okwa li e shi kutya komeho gaayihe, Kalunga okwa hala ‘u uvithile oohepele elaka etoye noku igidhile aaposi ya tonate.’ (Luk. 4:18) Jesus okwa kala a nyanyukwa, sho a ningi shoka Kalunga e mu pula a ninge. MEpisalomi 40:8 omwa hololwa nkene Jesus a li u uvite. Okwa ti: “Kalunga kandje, ondi hole okugwanitha ehalo lyoye!” Jesus okwa li e hole okulonga aantu kombinga yaHe gwomegulu. (Lesha Lukas 10:21.) Sho Jesus a longo omukiintu gumwe kombinga yelongelokalunga lyashili, okwa ti kaalongwa ye: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.” (Joh. 4:31-34) Okuhola Kalunga nosho wo aantu, okwa li haku mu etele enyanyu. Ngele owa ningi sha faathana, otashi ke ku nyanyudha.

6. Omolwashike shi li nawa okukundathana oompangela dhoye nAakriste mboka ye na owino?

6 Aamwatate naamwameme oyendji oya tameka okukokola ondjila okuza kuugundjuka wawo, noshe ye etela enyanyu. Omolwashike itoo kundathana nayamwe yomuyo oompangela dhoye? Ombiimbeli otayi ti: “Omadhiladhilo inaaga kundathanwa nawa otaga ponyo, ihe otaga tompola sha mpoka pe na aagandjindunge oyendji.” (Omayel. 15:22) Aakriste mboka ya pyokoka pambepo, otaya vulu oku ku lombwela kutya iilonga yethimbo lyu udha ohayi pe omuntu elongo ndyoka tali ku etele uuwanawa monkalamwenyo yoye ayihe. Jesus okwa li i ilongo oshindji kuHe megulu, ihe okwa li natango a tsikile okwiilonga oshindji pethimbo lyuukalele we kombanda yevi. Pashiholelwa, okwa li a mono nkene hashi nyanyudha okwaadha omitima dhaantu moku yu uvithila onkundana ombwanawa. Okwa li wo a mono enyanyu, sho a kala omudhiginini, nonando okwa li ta makelwa. (Lesha Jesaja 50:4; Heb. 5:8; 12:2) Natu taleni kutya omolwashike iilonga yethimbo lyu udha tayi vulu oku ku etela enyanyu.

OKUNINGA AANTU AALONGWA OKWA SIMANA

7. Omolwashike aagundjuka oyendji ye hole iilonga yokuninga aantu aalongwa?

7 Jesus okwa ti: ‘Indeni, ka ningeni aantu aalongwa ne mu ya longe.’ (Mat. 28:19, 20) Ngele  owu na elalakano lyokuninga aantu aalongwa, oshi li nawa lela notashi simanekitha Kalunga. Oku shi ninga, ohaku pula ethimbo, opo omuntu a dheuke, ngaashi owala omaithano galwe. Omumwatate Timothy, ngoka a tameke okukokola ondjila sho e na omimvo omulongo nasha, okwa ti: “Ondi hole okulongela Jehova ethimbo lyu udha, oshoka ogwo omukalo handi ulike kutya ondi mu hole. Petameko kanda li ndi na omukonakonimbiimbeli nando ogumwe, ihe konima sho nda tembukile koshitopolwa shilwe, muule womwedhi gumwe, onda mono aakonakonimbiimbeli yontumba. Omukonakonimbiimbeli gwandje gumwe okwa tameke okuya kokugongala. Konima sho nda hiti Osikola yOmbiimbeli yOkudheula Aamwatate Inaaya Hokana * uule woomwedhi mbali, onda tuminwa koshitopolwa shilwe, hoka nda ka mona ko aakonakonimbiimbeli yane. Ondi hole okulonga aantu, molwaashoka ohandi mono nkene taya ningi omalunduluko kekwatho lyombepo ondjapuki.” — 1 Tes. 2:19.

8. Ongiini aagundjuka yamwe Aakriste ya li ya kutha ombinga nuulaadhi mokuninga aantu aalongwa?

8 Aagundjuka yamwe oyi ilonga omalaka galwe. Pashiholelwa, omumwatate Jacob, gwokuAmerika lyokUumbangalantu, okwa nyola a ti: “Sho nda li ndi na omimvo heyali, aalongwa oyendji yomongundu yetu, oya li aapopi yelaka lyOshivietnam. Molwaashoka onda li nda hala oku ya lombwela kombinga yaJehova, onda kambadhala okwiilonga elaka lyawo. Shoka sha kwathela ndje unene, onde li ilongo mokuyelekanitha Oshungolangelo yomOshiingilisa noyomelaka lyOshivietnam. Onda li wo nda panga uukuume naantu yomegongalo lyopopepi, lyaapopi yOshivietnam. Onda tameke okukokola ondjila, sho ndi na omimvo 18. Konima, onda yi kOsikola yOmbiimbeli yOkudheula Aamwatate Inaaya Hokana. Edheulo ndyoka olya kwathele ndje ndi li omukokolindjila, sho nda tuminwa koshitopolwa hoka nda ka kala ongame awike omukuluntugongalo gwongundu yaapopi yOshivietnam. Aantu oyendji moshitopolwa oya li ya kumwa, sho ndi ilonga elaka lyawo. Oya li haya taamba ndje nawa momagumbo gawo, nolundji onda li handi vulu okukonakona nayo Ombiimbeli. Yamwe oya ningi ehumokomeho sigo ya ninginithwa.” — Yelekanitha Iilonga 2:7, 8.

9. Okuninga aantu aalongwa ohaku tu longo shike?

9 Iilonga yokuninga aantu aalongwa otayi tu kwathele tu longe iilonga iiwanawa, tu kale tu shi okupopya naantu, tu kale nomukumo notu kale tu shi okuungaunga naantu. (Omayel. 21:5; 2 Tim. 2:24) Okuninga aantu aalongwa ohaku nyanyudha unene, oshoka ohaku kwathele wu ilonge nkene to vulu okuulika shoka wi itaala mOmbiimbeli. Oho ilongo wo nkene to vulu okulonga pamwe naJehova. — 1 Kor. 3:9.

10. Ongiini to vulu okunyanyukilwa iilonga yokuuvitha, uuna wu li moshitopolwa moka aantu ihaaya pulakene?

10 Oto vulu okunyanyukilwa iilonga yokuuvitha, nonando aantu owala aashona moshitopolwa sheni haya pulakene konkundana ombwanawa. Opo tu ninge aantu aalongwa, egongalo alihe olya pumbwa okulongela kumwe. Kutya nduno otashi vulika omumwatate nenge omumwameme gumwe oye owala a mona omuntu tu ulike ohokwe e ta ningi omulongwa, atuhe ohatu kala twa nyanyukwa, molwaashoka otatu longo oshilonga shimwe. Pashiholelwa, omumwatate Brandon okwa kala ta kokola ondjila uule womimvo omugoyi moshitopolwa moka aantu ihaaya pulakene. Okwa ti: “Ondi hole okuuvitha onkundana ombwanawa, molwaashoka Jehova okwa hala tu shi ninge. Konima owala sho nda mana osikola yongula, onda tameke okukokola ondjila. Ondi hole okuladhipika aamwatate aagundjuka megongalo lyetu nokutala sho taya humu komeho pambepo. Konima sho nda zi kOsikola yOmbiimbeli yOkudheula Aamwatate Inaaya Hokana, onda ka kokola ondjila kehala lilwe. Moshitopolwa moka inandi mona mo nando omuntu ta ningi ehumokomeho sigo a ninginithwa, ihe aauvithi yalwe oya kwathela  yalwe sigo ya ninginithwa. Onda pandula sho nda tokola okukutha ombinga nuulaadhi miilonga yokuninga aantu aalongwa.” — Omuuv. 11:6.

IIZEMO YOOMPANGELA DHOYE

11. Iilonga iiyapuki yini aagundjuka oyendji ya kala nokunyanyukilwa?

11 Opu na oompito odhindji dhokulongela Jehova. Pashiholelwa, aagundjuka oyendji ohaya kwathele miilonga yokutunga. Opwa pumbiwa okutungwa Iinyanga yUukwaniilwa iipe oyindji noonkondo. Iilonga mbyoka iiyapuki ohayi simanekitha Kalunga notayi ku nyanyudha wo. Oto vulu natango okukala wa nyanyukwa, sho to longo pamwe naamwatate naamwameme. Miilonga yokutunga oto vulu okwiilongela mo oshindji, ngaashi okulonga wa gamenwa, okulonga nuudhiginini nokulongela kumwe naamboka taya wilike.

Mboka taya yi miilonga yethimbo lyu udha otaya ka mona omayambeko ogendji (Tala okatendo 11-13)

12. Iilonga yuukokolindjila ohayi vulu ngiini okweegululila omuntu oompito dhilwe dhiilonga?

12 Omumwatate Kevin okwa ti: “Okuza ngaa sho nda li okamatyona, onda kala nda hala okulongela Jehova ethimbo lyu udha. Sho ndi na omimvo 19, onda tameke okukokola ondjila. Opo ndi isile oshimpwiyu, onda kala handi longo iilonga yetatasiku, te kwathele omumwatate ngoka a li ha tungu. Ondi ilongo okutula ko iipeleki, omakende nomiyelo. Konima, onda ka longa omimvo mbali nosipana yokukwathela mboka ya dhengwa kiikungulu, mokutungulula Iinyanga yUukwaniilwa nomagumbo gaamwatate. Sho ndu uvu kutya moSouth Afrika omu na ompumbwe yokukwathela miilonga yokutunga, onda ningi eindilo, e tandi taambwa. Moshilongo moka onda kala nokulonga pIinyanga yUukwaniilwa ya yoolokathana iiwike niiwike. Mboka hatu longo pamwe nayo otwa fa owala aantu yegumbo limwe. Ohatu kala pamwe, ohatu konakona Ombiimbeli pamwe nokulonga pamwe. Ondi hole wo okuuvitha pamwe naamwatate yomoshitopolwa oshiwike kehe. Oompangela ndhoka nda ningi sho ndi li okamatyona, odhe etela ndje enyanyu ndyoka nda li inaandi tegelela.”

13. Iilonga yaBetel ohayi etele ngiini aagundjuka enyanyu?

 13 Yamwe mboka ya tula miilonga oompangela dhawo dhokulongela Jehova ethimbo lyu udha, ngashingeyi otaya longo moBetel. Uuna to longo moBetel, otashi ku etele enyanyu, molwaashoka kehe shimwe to ningi, oto shi ningile Jehova. Omo hamu longekidhwa iikulya yopambepo. Omumwatate Dustin ngoka ha longo moBetel, okwa ti: “Ondi itulile po elalakano lyokuya miilonga yethimbo lyu udha, sho nda li ndi na omimvo omugoyi nonda tameke okukokola ondjila sho nda mana osikola. Konima yomumvo gumwe netata, onda taambwa koBetel, hoka nda longwa okulonga nomashina gokunyanyangidha, nokonima onda longwa ishewe okutula mo oopolohalama mookompiuta. Oshinima shimwe hashi nyanyudha ndje moBetel, okuuva nkene iilonga yokuuvitha tayi humu komeho muuyuni awuhe. Ondi hole okulonga iilonga yaBetel, oshoka otayi kwathele aantu ya hedhe popepi naJehova.”

OWI ITULILA PO OMALALAKANO GENI?

14. Ongiini to vulu okwiitulila po omalalakano wu ye miilonga yethimbo lyu udha?

14 Ongiini to vulu okwiitulila po omalalakano wu ye miilonga yethimbo lyu udha? Owa pumbwa okukokeka omaukwatya gopaKriste, opo wu longele Jehova nomupondo. Kala ho konakona Ombiimbeli pandjigilile nokutedhatedha shoka tayi ti. Ulika wo eitaalo lyoye mokukutha ombinga mokugongala. Manga wu li mosikola yongula, oto vulu okumona owino nontseyo, mokukala to uvithile yalwe onkundana ombwanawa. Kala wu na ko nasha naantu moku ya pula omataloko gawo miinima yontumba nokupulakena nawa shoka taya ti. Kala wo ho kwathele mokwoopaleka Oshinyanga shUukwaniilwa noku shi kaleka monkalo ombwanawa. Jehova oku hole okulongitha aantu mboka aaifupipiki nohaya longo nehalo ewanawa. (Lesha Episalomi 110:3; Iil. 6:1-3) Shaashi ooitaali ayehe “oya li taa popile Timoteus muuwanawa,” Paulus okwa li a yi pamwe naye miilonga yuutumwa. — Iil. 16:1-5.

15. Ongiini to vulu okwiilongekidha wi ikwathele sho to kokola ondjila?

15 Mboka ye li miilonga yethimbo lyu udha oya pumbwa iilonga, opo yi ikwathele monkalamwenyo. (Iil. 18:2, 3) Oshi li nawa wu mone edheulo lyiilonga yontumba mbyoka tayi vulu oku ku kwathela wu longe etatasiku. Sho to ningi omalongekidho, pula omayele komutonatelishikandjo nokaakokolindjila moshikandjo sheni. Ya pula kutya iilonga yini tayi opalele omukokolindjila. Ombiimbeli otayi ti: “Gandja iilonga yoye kOmuwa, nena oompangela dhoye otadhi ka gwanithwa.” — Omayel. 16:3; 20:18.

16. Okulongela Jehova nomutima aguhe pethimbo lyuugundjuka, ohashi palele ngiini omuntu elago monakuyiwa?

16 Oto vulu okukala nuushili kutya Jehova okwa hala wu ‘imonene’ enyanyu monakuyiwa. (Lesha 1 Timoteus 6:18, 19.) Iilonga yethimbo lyu udha, ohayi ku pe ompito wu endathane naamboka ye li mo. Ohayi ku kwathele wo wu koke pambepo. Oyendji oye shi mona kutya okulongela Jehova nomutima aguhe pethimbo lyuugundjuka, ohashi kwathele gumwe a ka kale e na ondjokana tayi ende nawa. Mboka ya kokola ondjila manga inaaya ya mondjokana, olundji ohaya ka tsikila niilonga mbyoka nookuume kawo kopandjokana. — Rom. 16:3, 4.

17, 18. Uuna tatu ningi oompangela, omolwashike shi na okuza komutima?

17 Uuna tatu ningi oompangela, nashi kale tashi zi komutima. Episalomi 20:4 otayi popi Jehova tayi ti: “Ne ku pe shoka wa hala ye na tsakanithe oompangela dhoye adhihe.” Onkee ano, dhiladhila kwaashoka wa hala okuninga monkalamwenyo yoye. Tedhatedha kwaashoka Jehova ta ningi pethimbo lyetu. Ipula nkene to vulu okukutha ombinga miilonga ye. Opo ihe, ninga oompangela wu longe shoka tashi mu opalele.

18 Ngele oto longele Jehova nomutima aguhe, otashi ku etele enyanyu lyashili, molwaashoka oshi li omukalo ngoka tagu simanekitha Kalunga. Onkee ano, “konga uulinawa pOmuwa, note ku pe shoka wa yuulukwa.” — Eps. 37:4.

^ okat. 7 Ngashingeyi ohayi ithanwa Osikola yaauvithi yUukwaniilwa.