Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Desemba 2017

Aagundjuka, ‘kaleni tamu longo, omolwehupitho lyeni’

Aagundjuka, ‘kaleni tamu longo, omolwehupitho lyeni’

‘Ngashika mwa kala hamu vulika aluhe kungame, kaleni tamu longo nokutila nokukakama molwehupitho lyeni.’ — FIL. 2:12.

OMAIMBILO: 133, 135

1. Omolwashike okuninginithwa ku li onkatu ya simana? (Tala kethano lyopetameko.)

OMUMVO kehe, aakonakonimbiimbeli omayovi ohaya ninginithwa. Oyendji yomuyo aagundjuka mboka ye li kohi yomimvo 19, mboka tashi vulika ya kokela moshili. Mbela ngoye ogumwe gwomuyo? Ngele osho, owu shi ku pandulwa. Okuninginithwa oku li oshitegelelwa kAakriste, noku li onkatu ya simana ndjoka tayi kwathele omuntu a ka hupithwe. — Mat. 28:19, 20; 1 Pet. 3:21.

2. Omolwashike omuntu kee na okutila nenge okuyanda okwiiyapulila Jehova?

2 Okuninginithwa ohaku egululile omuntu oompito dhokumona omayambeko ogendji, nokwa kwatela mo wo iinakugwanithwa. Omomukalo guni? Esiku wa ninginithwa, owa li wa zimine sho wa pulwa kutya: “Pakankameno lyeyambo lyaJesus Kristus, mbela owi iyela ombedhi omolwomayono goye nowi iyapulila Jehova wu longe ehalo lye?” Eninginitho lyoye olyu ulika kutya owi iyapulila Jehova. Oli li euvaneko lyolela ndyoka wa ningila Jehova kutya oto kala wu mu hole noto ka pititha ehalo lye komeho gaayihe. Ndjoka onkatu ya kwata miiti lela. Mbela oto ki ipa ombedhi, omolweuvaneko ndyoka wa ninga? Hasho  nando. Okwiitula miikaha yaJehova kaku shi nando onkatu ya puka. Shimwe ishewe, omuntu ngoka kee li kohi yewiliko lyaJehova, oku li kohi yepangelo lyaSatana. Odhoshili kutya Satana ina hala wu ka hupithwe. Ota ka kala a nyanyukwa, ngele owa tindi uunamapangelo waJehova e to kanitha etegameno lyoye lyoku ka mona omwenyo gwaaluhe.

3. Omayambeko geni haga zi mokwiiyapulila Jehova?

3 Pehala lyokwaambidhidha Satana, dhiladhila komayambeko ngoka wa mona wu li Omukriste wa ninginithwa nowi iyapulila Jehova. Molwaashoka ngashingeyi owi igandjela Jehova onkalamwenyo yoye ayihe, oto vulu okupopya wu na omukumo lela shi vulithe nale to ti: “Omuwa oku li pamwe nangame, onkee itandi tila sha; aantu otaa ningi ndje shike?” (Eps. 118:6) Kawa li to vulu okukala nuuthembahenda uunene monkalamwenyo yoye, ando owa li inoo gama kombinga yaKalunga nokukala wa hokiwa kuye.

OSHINAKUGWANITHWA SHOYE MWENE

4, 5. (a) Omolwashike eiyapulo li li oshinakugwanithwa shomuntu mwene? (b) Omashongo geni haga adha aantu ayehe?

4 Wu li Omukriste a ninginithwa, ekwatathano lyoye naJehova kali shi oshinima shoka shi na ‘okulongekidhwa kaanegumbo lyoye,’ ngaashi omuvali ha ningi, uuna a hala okulandela omwana ongodhi yopeke. Mepingathano naashoka, oshi li oshinakugwanithwa shoye okulonga nuudhiginini wu ka hupithwe, kutya nduno owu li natango pamwe naavali yoye. Omolwashike sha simana okudhimbulukwa oshinima shoka? Omolwaashono haaluhe ho kala wu shi kutya omashongo geni tage ke ku adha monakuyiwa. Pashiholelwa, ngele owa ninginithwa wu na omimvo dhi li pokati 9-13, otashi vulika omaiyuvo goye ga ka lunduluke nokukala wu uvite wa thiminikwa shi vulithe nale, pethimbo wu li pomimvo dhokamukondapweyu. Okakadhona kamwe komimvo 18, oka ti: “Haaluhe okanona hoka ke li Onzapo yaJehova taka kala ka geya, molwaashoka owala inaaka pewa ko koshikuki shevalo kosikola. Ihe mokweendela ko kwethimbo, sho omaiyuvo gako gopamilalo tage ende taga koko, oka pumbwa lela okukala ka tompwa kutya okuvulika koompango dhaJehova, oku li aluhe oshinima sha dhenga mbanda.”

5 Odhoshili kutya haagundjuka owala taya vulu okwaadhika komashongo. Nokuli naamboka ya ninginithwa aakuluntu, ohaya adhika komashongo ogendji, ngoka kaaya li ya tegelela ga makele eitaalo lyawo. Omashongo ngoka otashi vulika ge na ko nasha nondjokana, nuukolele nenge niilonga. Uushili owo kutya atuheni, kashi na nduno mbudhi kutya otu na omimvo ngapi, otatu ka adhika koonkalo ndhoka tadhi tu pula tu kale aadhiginini kuJehova. — Jak. 1:12-14.

6. (a) Okwaalundulula euvaneko lyoye ndyoka wu uvanekela Jehova otaku ti shike? (b) Oto ilongo mo shike mAafilippi 4:11-13?

6 Shoka tashi ku kwathele wu kale omudhiginini monkalo kehe, okudhimbulukwa aluhe kutya euvaneko ndyoka wu uvanekela Jehova ito vulu oku li lundulula. Shoka osha hala okutya owa lombwela Omupangeli gweshito alihe kutya oto ka tsikila oku mu longela, nonando ookuume koye nenge aavali yoye oye etha po oku mu longela. (Eps. 27:10) Monkalo kehe, kala wu na omukumo okupula Jehova e ku kwathele wu dhiginine eiyapulo lyoye. — Lesha Aafilippi 4:11-13.

7. Uutumbulilo okulonga “nokutila nokukakama” omolwehupitho lyetu, otawu ti shike?

7 Jehova okwa hala wu ninge kuume ke. Ihe opo wu kale kuume ke nokulonga nuudhiginini wu ka hupithwe, otashi pula oonkambadhala. Aafilippi 2:12 otaya ti: “Kaleni tamu longo nokutila nokukakama molwehupitho lyeni.” Oohapu ndhoka otadhi ulike kutya owa pumbwa okutala nkene to vulu okupanga uukuume naJehova nokukala omudhiginini kuye, nonando owa taalela omashongo. Ino kala wi inekela mungoye mwene. Nokuli naapiya yaKalunga yamwe yopethimbo lyonale, kaya li aadhiginini poompito adhihe. Mbela oonkatu dhini to vulu okukatuka wu longe, opo wu ka hupithwe?

 EKONAKONOMBIIMBELI OLYA SIMANA

8. Ekonakonombiimbeli lyopaumwene olya kwatela mo shike, nomolwashike lya simana?

8 Okukala kuume kaJehova okwa kwatela mo iinima iyali, okupulakena kuye nokupopya naye. Okukonakona Ombiimbeli paumwene, oku li omukalo gwa simana gwokupulakena kuJehova. Shoka osha kwatela mo okulesha nokutedhatedha kOohapu dhaKalunga nosho wo kiileshomwa ya kankamena kOmbiimbeli, opo wu kale wu na ontseyo. Uuna to shi ningi, dhimbulukwa kutya okukonakona Ombiimbeli inaku fa okwiilonga iinima momutse, opo wu ka pite ekonakono lyosikola. Ekonakonombiimbeli ndyoka tali ti sha olya fa olweendo lunyanyudha, moka to vulu okukoneka nokumona iinima iipe kombinga yaJehova. Shika otashi ke ku kwathela wu hedhe popepi naKalunga, ye nota ka hedha wo kungoye. — Jak. 4:8.

Oho popi nokupulakena kuJehova shi thike peni? (Tala okatendo 8-11)

9. Iilongitho yini ye ku kwathela mekonakonombiimbeli lyoye lyopaumwene?

9 Ehangano lyaJehova olya nduluka po iilongitho oyindji, mbyoka tayi vulu oku ku kwathela wu kale wu na ekonakonombiimbeli tali pondola. Pashiholelwa, kepandja lyetu lyokointaneta, jw.org, oku na oshitopolwa Teenagers.Kohi yasho oku na oshitopolwa Bible Study Activities,moka to vulu okwaadha uuyelele mboka tawu vulu oku ku kwathela wu ilonge iinima ya simana miiningwanima mbyoka ya popiwa mOmbiimbeli. Natango, kepandja ndyoka, oku na iitopolwa yokambo “What Does the Bible Really Teach?” (“Ombiimbeli otayi longo shike?”) tayi vulu oku ku kwathela wu kale wu na eitaalo lya kola kombinga yaashoka wi itaala. Iitopolwa mbyoka otayi vulu oku ku kwathela wu ilonge nkene to vulu okuyelithila yalwe eitaalo lyoye. Uuyelele wumwe mboka tawu vulu oku ku kwathela, otawu adhika moshitopolwa “Young People Ask . . . How Can I Make Bible Reading Enjoyable?” (“Aagundjuka taya pula: Ongiini tandi vulu okunyanyukilwa okulesha Ombiimbeli?”) shi li mo-Awake! yaApilili 2009. Okukonakona nokutedhatedha otayi dhana onkandangala ya simana mokulonga, omolwehupitho lyetu. — Lesha Episalomi 119:105.

EGALIKANO OLYA SIMANENENA

10. Omolwashike egalikano lya simanenena kOmukriste ngoka a ninginithwa?

10 Omanga ekonakonombiimbeli lyopaumwene li li omukalo moka to vulu okupulakena kuJehova, egalikano oli li omukalo moka to vulu okupopya naye. Omukriste ke na okutala ko egalikano li li oshinima kaashi na ekwatho lyasha nenge ‘oshikwathi shokweeta elago,’ shoka tashi gwedha ko koompito dhe dhokupondola. Pehala lyaashono, oli li omukalo gwolela gwokupopya nOmushiti  gwetu. Jehova okwa hala okupulakena kungoye. (Lesha Aafilippi 4:6.) Uuna wu na iimpwiyu, Ombiimbeli oya gandja omayele gopandunge taga ti: “Uudhigu woye u fala kOmuwa.” (Eps. 55:22) Mbela oto tsu kumwe nago? Opu na aamwatate naamwameme omamiliyona mboka taya vulu oku ku lombwela lela kutya omayele ngoka oge ya kwathela. Otaga vulu wo oku ku kwathela!

11. Omolwashike wu na aluhe okupandula Jehova?

11 Egalikano ohali ku pe ompito wu ninge oshindji, shi vulithe owala okupula Jehova e ku kwathele. Ombiimbeli otayi ti: “Hambeleleni ihe Kalunga aluhe.” (Kol. 3:15) Omathimbo gamwe ohatu ipula unene nomaupyakadhi getu, notashi vulika shi tu ningithe kaatu kale tu wete omayambeko ogendji ngoka twa mona. Omolwashike itoo kambadhala esiku kehe okudhiladhila kiinima nando itatu, mbyoka to vulu okupandula sho wu yi na? Opo nduno pandula Jehova megalikano, omolwomayambeko ngoka. Omumwameme gwedhina Abigail, gwomimvo 18, ngoka a ninginithwa sho e na omimvo 12, okwa ti: “Ondu uvite kutya Jehova oye owala twa pumbwa okupandula, shi vulithe kehe gumwe meshito. Otu na oku mu pandula ethimbo kehe, omolwomagano ngoka e tu pa. Oshikando shimwe ondu uvile epulo ewanawa tali ti: Ngele ongula ndji tayi pi ontaku otwa penduka tu na owala iinima mbyoka twa pandulila Jehova nena, oyinipo tashi vulika tu ki iyadhe tu na?” *

OSHIMONIWA SHOYE MWENE OSHA SIMANA

12, 13. Omolwashike sha simana okudhiladhila nkene wa mona Jehova omwaanawa kungoye?

12 Omukwaniilwa David, ngoka naye a li a piti momashongo ogendji, okwa popi oohapu ndhika tadhi ti: “Konakona mwene, u mone, nkene Omuwa omwaanawa. Aanelago oomboka taa mono egameno puye.” (Eps. 34:8) Ovelise ndjoka otayi tu ulukile kutya otwa pumbwa okumona tse yene nkene Jehova omwaanawa. Uuna to lesha Ombiimbeli, iileshomwa yetu nokuya komakugongala, oho uvu iimoniwa tayi tsu omukumo nkene Kalunga a kwathela yalwe ya kale aadhiginini. Ihe sho to koko pambepo, owa pumbwa okumona nkene Jehova te ku kwathele paumwene. Ongiini wa mona nkene Jehova omwaanawa kungoye?

13 Opu na omukalo gumwe moka Aakriste ayehe ya mona nkene Jehova omwaanawa kuyo. Oguni mbela? Oosho ya hiwa ya kale ye na ekwatathano naKalunga nosho wo nOmwana. Jesus okwa ti: “Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame.” (Joh. 6:44) Mbela nangoye owu uvite wa kwatelwa mo moohapu ndhoka? Omugundjuka otashi vulika a dhiladhile ta ti: ‘Molwashoka Jehova okwa nanena aavali yandje kuye, ngaye onda landula mo owala.’ Ihe dhimbulukwa kutya sho wi iyapulila Jehova e to ninginithwa, owu ulike kutya owa mona uuthembahenda wokukala wu na ekwatathano naye. Ngashingeyi owa tseyika kuye lela. Ombiimbeli oye tu shilipaleka tayi ti: “Ngoka e hole Kalunga, okwa tseyika wo kuKalunga.” (1 Kor. 8:3) Kambadhala aluhe okukala wa lenga nowa pandula, sho wu li mehangano lyaJehova.

14, 15. Uukalele otawu vulu ngiini oku ku kwathela wu kale neitaalo lya kola?

14 Omukalo gulwe to vulu okumona nkene Jehova omwaanawa, omokumona nkene te ku ambidhidha, sho to tseyithile yalwe eitaalo lyoye. Oto vulu oku shi ninga, muukalele nenge kosikola. Aagundjuka yamwe ohaye shi mono oshidhigu okuuvithila oomakula yawo kosikola. Otashi vulika wu shi uvite ko kutya omolwashike. Omuntu iho kala wu shi nkene aanasikola ooyakweni taye ki inyenga. Ohashi kala eshongo, unene tuu ngele to popi nongundu onene yaantu pehala lyokupopya nomunasikola gumwe. Mbela oshike tashi vulu oku ku kwathela?

15 Tango, dhiladhila kutya omolwashike wa tompwa kwaashoka wi itaala. Mbela iitopolwa mbyoka yi li kepandja lyetu kointaneta, jw.org, oya tolokwa melaka lyoye? Ngele ku shi shi, mona ethimbo wu yi konge. Oya nuninwa oku ku kwathela  wu dhiladhile kwaashoka wi itaala, nomolwashike we shi itaala nankene to vulu okuyelithila yalwe eitaalo lyoye. Ngele owa kala wu na eitaalo lya kola nokukala wi ilongekidha nawa, oto ka kala wa halelela okugandja uunzapo kombinga yaJehova. — Jer. 20:8, 9.

16. Oshike tashi vulu oku ku kwathela wu popye wa manguluka kombinga yeitaalo lyoye?

16 Ethimbo limwe otashi vulika wu kale wi ilongekidha nawa, ihe natango otashi vulika wu kale wa tila okuyelithila yalwe kombinga yeitaalo lyoye. Omumwameme gwomimvo 18, ngoka a ninginithwa sho e na omimvo 13, okwa ti: “Ondi shi shoka ndi itaala, ihe omathimbo gamwe ohandi nyengwa oku shi popya.” Mbela omumwameme ngoka ohu ungaunga ngiini nuupyakadhi mboka? Okwa ti: “Ohandi kambadhala okupopya paunshitwe. Aalongwa yomongundu yandje ohaya popi ya manguluka kombinga yiinima mbyoka haya ningi. Ondi na okukala nda manguluka okuninga sha faathana. Onkee ano, ohandi popi oshinima inaashi hula nawa, ngaashi: ‘Onda li tandi longo Ombiimbeli esiku limwe, nonda . . . ,’ opo ihe tandi tsikile nehokololo lyandje. Nonando shoka tandi popi inashi pamba Ombiimbeli, olundji yalwe ohaya kala ya hala okuuva kombinga yaashoka handi ningi, uuna tandi longo Ombiimbeli. Ethimbo limwe ohaya pula ndje omapulo kombinga yasho. Shi thike ngaa mpoka tandi popi nayo kombinga yOmbiimbeli, opo ngaa pu thike tashi ningile ndje oshipu. Konima yaashono, ohandi kala aluhe ndu uvite nawa!”

17. Omukalo moka wa tala ko eitaalo lyoye, otagu vulu ngiini oku ku kwathela wu popye nayalwe?

17 Uuna to simaneke yalwe nokuulika kutya owu na ko nasha nayo, otashi vulika ye ki inyenge momukalo omwaanawa. Omumwameme Olivia, ngoka e na omimvo 17 nokwa ninginithwa pethimbo a li omushona lela, okwa ti: “Onda li handi kala nda tila kutya ngele onda kundathana naantu kombinga yOmbiimbeli, otaya ka tala ndje ko omupwidhi.” Opo nduno okwa tameke okudhiladhila momukalo gulwe. Pehala lyokugandja eitulomo unene kuumbanda we, Olivia okwa dhiladhila ngeyi: “Aagundjuka oyendji kaye shi sha kombinga yOonzapo dhaJehova. Otse atuke ye shi tu li Oonzapo dhaJehova. Onkee ano, otaye ke tu ihumbatela shi ikolelela kunkene tatu yi ihumbatele. Ongiini ngele otu na ohoni, uutile nenge oshidhigu kutse okupopya kombinga yeitaalo lyetu, nenge hatu nyengwa okupopya twa manguluka? Kungawo otashi vulika ye ke tu tale ko twa fa kaatu iyuvitile uuntsa, sho tu li Oonzapo dhaJehova. Ngele katu na omukumo, otashi vulika nokuli ya kale inaaya simaneka shoka tatu ya lombwele. Ihe ngele otwa popi nomukumo notu na uushili kombinga yaashoka twi itaala, noku shi ninga oshitopolwa shoonkundathana dhetu dha kehe esiku, kungawo otashi vulika ye ke tu simaneke.”

KALENI TAMU LONGO, OMOLWEHUPITHO LYENI

18. Okukala tatu longo, omolwehupitho lyetu, okwa kwatela mo shike?

18 Ngaashi twe shi mono, okukala tatu longo, omolwehupitho lyetu, oshinakugwanithwa sha kwata miiti. Shoka osha kwatela mo iinima ngaashi okulesha Oohapu dhaKalunga, okutedhatedha kudho, okugalikana kuJehova Kalunga nosho wo okudhiladhila komikalo moka Jehova e ku yambeka. Okuninga iinima mbyoka, otaku ke ku kwathela wu kale wi inekela mekwatathano lyoye naJehova. Shoka otashi ke ku inyengitha wu popye wa manguluka kombinga yeitaalo lyoye. — Lesha Episalomi 73:28.

19. Omolwashike oonkambadhala dhoye dhokulonga, omolwehupitho lyoye, dha simana?

19 Jesus okwa ti: “Ngele ku na ngoka, a hala okulandula ndje, oye ni idhimbwe ye mwene, ni itsike [omuti gwomahepeko, NW], ye na landule ndje.” (Mat. 16:24) Osha yela kutya opo tu kale aalongwa, Omukriste kehe oku na okukala i iyapulila Jehova nokwa ninginithwa. Shoka ohashi mu egululile oompito dhokumona omayambeko ogendji ngashingeyi noku ka mona omwenyo gwaaluhe muuyuni uupe waKalunga. Odhoshili kutya owu na omatompelo ogendji gokukala to longo, omolwehupitho lyoye!

^ okat. 11 Opo wu mone uuyelele owundji, tala oshitopolwa “Young People Ask — Why Should I Pray?” pamwe niinima mbyoka ye shi pamba (worksheet), kepandja lyetu lyokointaneta, jw.org.