Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2017

 IINIMA MBYOKA YA NINGWA MONDJOKONONA YOONZAPO DHAJEHOVA

“Uunake ishewe tatu ka kala tu na oshigongi?”

“Uunake ishewe tatu ka kala tu na oshigongi?”

OSHA li okuuka pehulilo lyaNovomba, mo 1932. Pethimbo mpoka moMexico City omwa li aakalimo ye vulithe pemiliyona. Omwa adhika owala opo mwa tulwa omaroobota oshiwike sha tetekele. Ihe aantu pethimbo mpoka, oya li ya nyanyukilwa oshinima shilwe. Aatoolinkundana ye na omathano oya li positaasi yomashina, ya tegelela omuyenda i ikalekelwa a thike. Omuyenda ngoka omumwatate Joseph F. Rutherford, omupresidende gwo-Watch Tower Society. Oonzapo dhomoshitopolwa nadho opo dha li dhe ya oku mu hambelela. Omumwatate Rutherford okwa li te ya koshigongi shopashigwana shomasiku gatatu.

Oshifo The Golden Age osha ti: “Kapu na omalimbililo kutya oshigongi shika otashi ka kala sha simanenena mondjokonona, oshoka osha kwathela mokutaandelitha oshili muMeksiko.” Ihe mbela oshike sha ningitha oshigongi shika shi kale sha simana, nonando opwa li owala aantu 150 lwaampono?

Manga oshigongi shoka inaashi ningwa, oshili kaya li naanaa ya taandela moMeksiko. Okuza mo 1919, opwa kala hapu ningwa iigongi iishona, ihe omwaalu gwomagongalo ogwe ende tagu shuna pevi momimvo dha landula ko. Sho moMexico City mwa patululwa oshitayimbelewa mo 1929, onkalo oya li tayi monika ya fa tayi hwepopala. Ihe nonando ongaaka, opwa li natango iiyimbi. Sho aakokolindjila ya lombwelwa kehangano kutya kaye na okukala taya ngeshefa uuna tayu uvitha, omukokolindjila gumwe okwa geye nokwe etha po oshili e ta toto po ongundu ye yokukonakona Ombiimbeli. Pethimbo mpoka opwa li wo omutonateli gwoshitayimbelewa gumwe ngoka a li ihii ihumbata nawa e ta pingenwa po. Oonzapo ndhoka oondhiginini moMeksiko odha li dha pumbwa okuladhipikwa.

Sho omumwatate Rutherford a li ta talele po moMeksiko, okwa ladhipike mboka aadhiginini, sho a gandja iipopiwa iyali tayi gumu omutima poshigongi nosho wo itano koradio. Osha li oshikando shotango ooradio moMeksiko tadhi taandelitha onkundana ombwanawa moshilongo ashihe. Konima yoshigongi, opwa langekwa omutonateli gwoshitayimbelewa omupe ngoka a li u unganeke nawa iilonga. Oonzapo odha li dhi na uulaadhi nodha tsikile okuuvitha kekwatho lyaJehova.

Oshigongi shoshitopolwa shomo 1941 moMexico City

Momumvo gwa landula ko moMeksiko omwa ningwa iigongi iyali yoshitopolwa. Shimwe omoshilando shetulilosikepa Veracruz noshikwawo omoMexico City. Iilonga yuudhiginini yaauvithi muukalele oye eta iizemo iiwanawa. Mo 1931 moMeksiko omwa li aauvithi 82. Konima yomimvo omulongo, omwaalu ogwa kondo po lwiikando omulongo. Aantu 1 000 lwaampono oya li ye ya koshigongi shoka sha ningilwe mo 1941, moMexico City.

“OMAPANDAANDA TAGA PONOKELWA”

Mo 1943 Oonzapo odha tseyithile aantu kombinga yoshigongi shedhina “Free Nation” (Oshigwana sha manguluka) shoka sha ningilwa miilando 12 yaMeksiko. * Kehe yimwe oya li ya zala omapulakata gaali, limwe okomeho na limwe okonima. Omukalo ngoka gwokutseyithila  aantu, ogwa kala hagu longithwa kOonzapo okuza mo 1936.

Oshifo shomo 1944, tashi ulike ethano lyaamwatate ya zala omapulakata moMexico City

Okulongithwa kwomapulakata okwa li kwa pondola lela moMeksiko, nomolwaashono oshifo La Nación sha popi kombinga yOonzapo ndhoka dha li poshigongi shoka, sha ti: ‘Esiku lyotango lyoshigongi, Oonzapo odha li dha lombwelwa dhi hiye aantu oyendji koshigongi. Esiku lya landula ko, aantu kaya li we taya gwana mo mehala lyoshigongi.’ Ongeleki yaKatoolika kaya li ya nyanyukilwa oshinima shika. Onkee ano, oya ningi oshikonga, opo yi ye Oonzapo moshipala. Nonando opwa li omapataneko, aamwatate naamwameme mboka aalaadhi oya tsikile nokutseyithila aantu momapandaanda kombinga yoshigongi. Oshifo osha ti ishewe ngeyi: ‘Aantu ayehe moshilando oye ya mona, aalumentu naakiintu ya zala omapulakata taya tseyithile aantu.’ Moshitopolwa shoka shi li moshifo La Nación, omu na ethano tali ulike aamwatate ye li momapandaanda gaMexico City. Pevi lyethano opu na oohapu tadhi ti: “Omapandaanda taga ponokelwa.”

“OOMBETE NDHIKA OOMBWANAWA DHI VULE OKULALA POSAMENDE”

Momimvo ndhoka Oonzapo odhindji odha li dhi na okuninga omaiyambo omanene, opo dhi ye kiigongi yoshitopolwa mbyoka hayi ningwa moMeksiko. Odhindji odha li hadhi zi kiitopolwa yokuushayi yi li kokule, hoka ihaaku yiwa komashina nenge nokuli kaaku na oondjila. Egongalo limwe olya nyola tali ti: “Popepi noshitopolwa shetu opwa pita owala oopaala dhoongodhi dhokutuma oondelekelama.” Onkee ano, aamwatate naamwameme oya li ye na okukayila omamulutiya nenge okweenda uule womasiku gontumba, opo ya ye hoka ku na eshina lyokolutenda ndyoka tali ke ya fala hoka taku ningilwa oshigongi.

Oonzapo odhindji odha li dha hepa nodha li owala tadhi vulu okufuta olweendo lwokuya koshigongi, ihe halwokugaluka. Ngele dha thiki, odhindji odha li hadhi kala momagumbo gOonzapo dhomoshitopolwa. Dhimwe odha li hadhi lala mIinyanga yUukwaniilwa. Oshikando shimwe, Oonzapo 90 lwaampono odha ka kala koshitayimbelewa, moka dha li dha lala kombanda yiipakete yomambo. Mo-Yearbook omwa hokololwa kutya aayenda oya li ya pandula noyu uvite kutya “oombete ndhika oombwanawa dhi vule okulala posamende.”

Oonzapo ndhoka odha li dha pandula nodhu uvite kutya omaiyambo ngoka dha ninga, opo dhi gongale pamwe poshigongi dha nyanyukwa, kage shi gosima. Kunena, naasho omwaalu gwaauvithi moMeksiko tagu ihilile pemiliyona, natango aamwatate oye na ombepo yolupandu. * Olopota ndjoka ya li ya gandjwa koshitayimbelewa shaMeksiko mo 1949, oya popi kombinga yaamwatate ya ti: “Oonkalo oondhigu ndhoka ya li mudho inadhi ya shololitha, ya kale kaaye shi aalaadhi moshili, oshoka uuna pwa ningwa oshigongi ohaya kala taya popi kombinga yasho uule wethimbo nokonima ngele sha pu, nolundji ohaya kala taya pula kutya, Uunake ishewe tatu ka kala tu na oshigongi?” Shoka sha popiwa molopota ndjoka sigo okunena osho shi li ngawo. — Iinima mbyoka ya ningwa mondjokonona yOonzapo dhaJehova moAmerika lyoPokati.

^ okat. 9 Embo 1944 Yearbook olya popi kutya oshigongi shika “osha ningitha Oonzapo dhaJehova dhi kale dha tseyika nawa moMeksiko.”

^ okat. 14 Aantu 2 262 646 oya li pEdhimbuluko moMeksiko mo 2016.