Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2017

‘Ombili yaKalunga, oyi vule uunongo awuhe wopantu’

‘Ombili yaKalunga, oyi vule uunongo awuhe wopantu’

‘Ombili yaKalunga, ndjoka yi vule uunongo auhe wopantu, otayi gamene oomwenyo.’ — FIL. 4:7.

OMAIMBILO: 76, 141

1, 2. Oshike sha li sha ningilwa Paulus naSilas muFilippi? (Tala kethano lyopetameko.)

KALA ando wa fa wu wete aatumwa yaali, Paulus naSilas, ye li mondholongo muFilippi lwopokati kuusiku. Oompadhi dhawo odha tulwa meti, noombunda dhawo otadhi ehama natango kokudhengwa. (Iil. 16:23, 24) Mesiku tuu ndyoka manga inaaya tulwa mondholongo, ongundu yaantu oya li ye ya kookololele kehalandjandja lyokutokolela, e taye ya fala koshipala shaapangeli. Oonguwo dhawo odha tuulwa noya li ya dhengwa noongola. (Iil. 16:16-22) Shoka ya ningilwa kasha li nando pauyuuki! Paulus okwa li omukwashigwana gwaRoma, noka li a gwana okuungaungiwa naye ngawo. *

2 Sho Paulus e li mondholongo, otashi vulika a li ta dhiladhila kwaashoka ya ningilwa mesiku ndyoka. Otashi vulika wo a li ta dhiladhila kaantu yomuFilippi. MuFilippi kamwa li osinagoga yAajuda, ihe miilando yilwe oyindji mbyoka Paulus a li a talele po, omwa li mu na. Onkee ano, Aajuda oya li ye na okugongala kondje yoshilando, pooha dhomulonga. (Iil. 16:13, 14) Mbela oya li ye na oku shi ninga,  molwaashoka moshilando kaamwa li aalumentu omulongo Aajuda, ano omwaalu ngoka gwa li gwa pumbiwa, opo pu kale osinagoga? Aantu yomuFilippi oya li yu uvitile uuntsa noonkondo oshilongo shawo Roma. (Iil. 16:21) Mbela shoka osho sha li she ya ningitha ya dhiladhile kutya aalumentu mbaka Aajuda, Paulus naSilas itaya vulu okukala aakwashigwana yaRoma? Kutya nduno etompelo olini, uushili owo kutya oya li ya tulwa mondholongo kaashi li pauyuuki.

3. Omolwashike tashi vulika Paulus a li a limbililwa, sho a tulwa mondholongo, ihe okwa li i inyenge ngiini?

3 Otashi vulika Paulus a li ta dhiladhila wo kombinga yaashoka a li a ningilwa moomwedhi ndhoka opo dha adhika dha pita. Okwa li handiyaka yEfuta lyaAegea muAsia Eshona. Manga a li hoka, ombepo ondjapuki oya li ye mu keelele kaa uvithile momahala gontumba. Osha li sha fa ombepo ondjapuki tayi mu undula a ye kehala lilwe. (Iil. 16:6, 7) Mbela kehala hoka openi? Eyamukulo okwe li pewa okupitila memoniko, manga a li muTroas. Paulus okwa li a lombwelwa ngeyi: “Taagulukila huka kuMakedonia.” Mbalambala konima yemoniko ndyoka, Paulus okwa thikama e ta yi kuMakedonia. (Lesha Iilonga 16:8-10.) Oshike sha ningwa po konima? Nziya owala sho a thiki muMakedonia, okwa tulwa mondholongo. Omolwashike Jehova e etha shoka shi ningilwe Paulus? Mondholongo okwa li ta ka kala mo ethimbo li thike peni? Nonando Paulus otashi vulika a li ti ipula nomapulo ngoka, ka li e etha ga nkundipaleke eitaalo lye noge mu imbe a kale a nyanyukwa. Paulus naSilas oya tameke ‘okugalikana nokwiimbila Kalunga omahambelelondjimbo.’ (Iil. 16:25) Ombili yaKalunga oya li ya talaleke omitima dhawo nomadhiladhilo gawo.

4, 5. (a) Omomukalo guni onkalo yetu tayi vulu okukala ya faathana noyaPaulus? (b) Ongiini onkalo yaPaulus ya li ya lunduluka inee shi tegelela?

4 Otashi vulika poompito dhimwe wa li wu uvite to wilikwa kombepo yaKalunga ngaashi Paulus, ihe iinima inayi ke enda ngaashi wa li wa tegelela. Otashi vulika wa li wa taalelwa komashongo nenge konkalo ndjoka ye ku ningitha wu ninge omalunduluko monkalamwenyo yoye. (Omuuv. 9:11) Uuna to dhiladhila kwaashoka, otashi vulika wu kale wa kumwa kutya omolwashike Jehova e etha shoka shi ningwe. Ngele osho wu uvite ngawo, oshike tashi vulu oku ku kwathela wu tsikile nokwiidhidhimika, wu na einekelo thiluthilu muJehova? Opo wu mone eyamukulo, natu taleni kehokololo lyaPaulus naSilas.

5 Manga Paulus naSilas taya imbile Kalunga omahambelelondjimbo, iiningwanima oyindji inaayi tegelelwa oya tameke okuholoka. Tango, evi olya tameke okukakama noonkondo. Omiyelo dhondholongo odhe eguluka nomalyenge goonkwatwa adhihe oga dhituluka. Paulus okwa li wo a keelele omulangeli gwondholongo kii idhipage. Konima, omulangeli ngoka pamwe naanegumbo lye ayehe oya ninginithwa. Ongula yesiku lya landula, aapangeli Aaroma oya tumu aambala komulangeli, opo a mangulule Paulus naSilas, noku ya lombwele ya ze mo moshilando nombili. Sho aapangeli ya mono kutya Paulus naSilas aakwashigwana yaRoma, oya mono kutya epuko olyawo, noye ya kuyo ye ya thindikile ya ze mo moshilando. Ihe Paulus naSilas oya li ya halelela okulaleka tango omumwameme Lidia, ngoka opo a adhika a ninginithwa. Ompito ndjoka oya li wo ye yi longitha ya ladhipike aamwatate. (Iil. 16:26-40) Odhoshili kutya iinima oya li ya lunduluka mbala.

OMBILI YAKALUNGA “NDJOKA YI VULE UUNONGO AUHE WOPANTU”

6. Oshike tatu ka kundathaneni ngashingeyi notatu ka taleni kushike?

6 Oshike tatu ilongo kiiningwanima mbika? Jehova ota vulu oku tu ningila shoka inaatu tegelela. Onkee ano, inatu pumbwa okukala tatu  ipula unene, uuna tu li muudhigu. Kapu na omalimbililo kutya oshinima shika osha li sha gumu lela Paulus. Shoka okwe shi ulike, sho a nyolele aamwatate yomuFilippi kombinga yiimpwiyu nosho wo yombili yaKalunga. Tango natu kundathaneni kombinga yoohapu dhaPaulus, ndhoka dhi li mAafilippi 4:6, 7. (Lesha.) Opo nduno, tatu taleni ishewe kiiholelwa yimwe yOmbiimbeli yankene Jehova a li a longo shoka inaashi tegelelwa. Hugunina, otatu ka taleni nkene “nombili yaKalunga” tayi vulu oku tu kwathela tu idhidhimike, tu na einekelo thiluthilu muJehova.

7. Paulus okwa li a tsu omuthindo oshinima shini montumwafo ndjoka a nyolele aamwatate yomuFilippi, noshike tatu vulu okwiilonga mo moohapu dhe?

7 Sho aamwatate yomuFilippi ya lesha ontumwafo ndjoka ya zi kuPaulus, oya dhimbulukwa shike? Oyendji otashi vulika ya dhimbulukwa shoka sha li sha ningilwa Paulus nankene Jehova a li e mu kwathele momukalo inaagu tegelelwa. Paulus okwa li te ya longo shike? Okwa li te ya longo kaaya kale tayi ipula unene noya kale taya galikana, opo ya mone ombili yaKalunga. Ndhindhilika kutya ‘ombili yaKalunga, oyi vule uunongo awuhe wopantu.’ Mbela shoka osha hala okutya ngiini? Aatoloki yamwe, uutumbulilo mboka oye wu toloka kutya ombili yaKalunga “oyi vule oondjodhi dhetu adhihe” nenge “oyi vule oompangela adhihe dhopantu.” Onkee ano, Paulus okwa li a hala kutya ‘ombili yaKalunga’ onkumithi shimwe to nyengwa. Nonando otashi vulika tu kale tu wete itaatu vulu okukandula po omaupyakadhi getu, Jehova ota vulu oku shi ninga, nokuli nomomukalo inaagu tegelelwa. — Lesha 2 Petrus 2:9.

8, 9. (a) Nonando Paulus okwa li a ningilwa okwaanuuyuuki muFilippi, shoka oshe mu etele uuwanawa wuni? (b) Omolwashike aamwatate yomuFilippi ya li taya vulu okwiinekela oohapu dhaPaulus?

8 Ontumwafo yaPaulus oyi na okukala ya li ya tsu omukumo aamwatate yomuFilippi, sho ya dhiladhila kombinga yaashoka Jehova a li e mu ningile, muule womimvo omulongo dha ka pita. Shoka Paulus a li a nyola oshoshili. Nonando Jehova okwa li e etha Paulus a ningilwe okwaanuuyuuki, oshizemo osha ka kala “okupopila nokukoleka evaangeli.” (Fil. 1:7) Aapangeli oya li ye na okudhiladhila muule, manga inaaya katukila onkatu egongalo epe lyopaKriste, ndyoka lya li lya totwa moshilando shawo. Otashi vulika sho Paulus a popi kutya ye omukwashigwana gwaRoma, osho sha ningitha omweendi pamwe naye Lukas, ngoka a li ndohotola, a thigale muFilippi, sho Paulus naSilas ya zi mo. Kungawo, Lukas okwa li a vulu okukwathela Aakriste aape mboka ya li muFilippi.

9 Sho aamwatate yomuFilippi ya lesha ontumwafo yaPaulus, oya li ye shi kutya ina nyola mo owala omadhiladhilo ge mwene. Paulus okwa li i iyadha moonkalo oondhigu noonkondo, ihe okwa li u ulike kutya oku na ‘ombili yaKalunga.’ Pethimbo Paulus a nyolele aamwatate mboka, okwa li mondholongo muRoma. Nonando ongawo, okwa li u ulike kutya oku na ‘ombili yaKalunga.’ — Fil. 1:12-14; 4:7, 11, 22.

“INAMU KALA MU NA NANDO OSHIMPWIYU SHASHA”

10, 11. Uuna twa gwililwa po kiimpwiyu oshike twa pumbwa okuninga, noshike tatu vulu okukala twa tegelela?

10 Oshike tashi vulu oku tu kwathela kaatu kale tu na iimpwiyu notu mone ‘ombili yaKalunga’? Oohapu ndhoka Paulus a li a nyolele Aafilippi, otadhi ulike kutya egalikano olyo ekandulopo lyuupyakadhi. Onkee ano, uuna tu na iimpwiyu, otwa pumbwa oku yi tseyithila Jehova megalikano. (Lesha 1 Petrus 5:6, 7.) Uuna to galikana kuJehova, kala wi itaala thiluthilu kutya oku na ko nasha nangoye. Mu galikana “nomwenyo gu udha ehambelelo,” omolwomayambeko ngoka wa mona. Einekelo lyetu muJehova otali ka kola, ngele otwa kala tu shi kutya  ota vulu “okulonga oshindji shi vulithe pushoka tatu shi indile nenge tatu shi dhiladhila.” — Ef. 3:20.

11 Ngaashi Paulus naSilas muFilippi ya li ya ningilwa shoka inaaya tegelela, natse otashi vulika tu kumwe kwaashoka Jehova te tu ningile. Shoka te tu ningile, otashi vulika shi kale oshishona, ihe ooshoka twa pumbwa. (1 Kor. 10:13) Shika itashi ti kutya otu na okukala owala twa mwena, twa tegelela Jehova u ukithe iinima nenge a kandule po uupyakadhi wetu. Otwa pumbwa okukatuka metsokumwe nomagalikano getu. (Rom. 12:11) Ngele otwa ningi ngawo, Jehova ote ke tu yambeka. Inatu dhimbwa wo kutya Jehova ota vulu oku tu ningila shi vulithe pwaashoka tatu mu pula, tatu dhiladhila nenge twa tegelela. Odhoshili kutya omathimbo gamwe ohe tu ningile iinima mbyoka inaatu tegelela. Natu kundathaneni iiholelwa yimwe mOmbiimbeli, mbyoka tayi ke tu kwathela tu kale neinekelo lya kola kutya Jehova ota vulu oku tu ningila shoka inaatu tegelela.

IIHOLELWA MBYOKA TAYI ULIKE SHOKA JEHOVA A LONGA MOMUKALO INAAGU TEGELELWA

12. (a) Omukwaniilwa Hiskia okwa ningi po shike, sho omukwaniilwa gwaAssur, Sennakerib, a li a hala okuponokela Jerusalem? (b) Omukalo moka Jehova a kandula po uupyakadhi, otagu tu longo shike?

12 MOmbiimbeli omu na iiholelwa mbyoka tayi ulike kutya Jehova oha ningi iinima momukalo inaagu tegelelwa. Pashiholelwa, pethimbo Hiskia a li omukwaniilwa gwaJuda, omukwaniilwa Sennakerib gwaAssur okwa li a ponokele Juda, e ta kwata po iilando ayihe yasho kakele kuJerusalem. (2 Aak. 18:1-3, 13) Lwanima, Sennakerib okwa li a hala okuponokela Jerusalem. Omukwaniilwa Hiskia okwa ningi po shike? Okwa galikana kuJehova, e ta ka pula omayele komuhunganeki Gwe, Jesaja. (2 Aak. 19:5, 15-20) Hiskia okwa kambadhala wo okuulika ondjele, sho a futu shoka a pulwa kuSennakerib. (2 Aak. 18:14, 15) Mokweendela ko kwethimbo, Hiskia okwa ningi elongekidho, opo yi igamene, sho oshilando sha kondekwa. (2 Ondjal. 32:2-4) Uupyakadhi mboka ya li ya taalela, owa li wa kandulwa po ngiini? Jehova okwa tumu omuyengeli e ta dhipaga aakwiita yaSennakerib 185 000 muusiku wumwe. Uushili owo kutya Hiskia ka li nando a dhiladhila ngele onapu ka ningwe oshinima sha tya ngawo. — 2 Aak. 19:35.

Oshike tatu vulu okwiilonga kwaashoka sha ningilwa Josef? — Gen. 41:42 (Tala okatendo 13)

13. (a) Oshike tatu vulu okwiilonga kwaashoka sha ningilwa Josef? (b) Sara okwa ningilwa shike shoka a li inaa tegelela?

13 Natu taleni koshiholelwa shomugundjuka Josef, omwanamati gwaJakob. Sho Josef a li mondholongo muEgipiti, mbela okwa li ngaa e shi kutya ona ka kale elenga ekuluntu muEgipiti? Nenge okwa li e shi kutya Jehova ote ke mu longitha a hupithe aanegumbo lye kondjala? (Gen. 40:15; 41:39-43; 50:20) Kapu na omalimbililo kutya Jehova okwa li a ningile Josef oshinima shoka a li inaa tegelela. Dhiladhila wo kombinga yaSara, yinakulululwa yaJosef. Mbela Sara ngoka a li a kulupa, okwa li ngaa a tegelela a ka mone okanona kokamati, kaake shi hoka a valelwa komupika gwe? Sara ka li nando  e shi dhiladhila kutya ona ka mone Isak. — Gen. 21:1-3, 6, 7.

14. Otatu vulu okukala tu na einekelo lini muJehova?

14 Katu na okukala twa tegelela Jehova a kandule po omaupyakadhi getu pashikumithalonga muuyuni mbuka waSatana. Katu na wo okukala tatu pula e tu ningile iinima iinene monkalamwenyo. Nonando ongawo, otu shi kutya Jehova Kalunga oha kwathele aapiya ye momikalo omikumithi. (Lesha Jesaja 43:10-13.) Shoka otashi tu kwathele tu kale tu na eitaalo muye. Otu shi kutya ota vulu okuninga kehe shoka sha pumbiwa, opo e tu kwathele tu longe ehalo lye. (2 Kor. 4:7-9) Oshike tatu ilongo kiiholelwa mbyoka yomOmbiimbeli? Ngaashi oshiholelwa shaHiskia, shaJosef noshaSara tayi shi ulike, Jehova ota vulu oku tu kwathela tu pondole mukehe shimwe shoka tu wete itaashi shiwa, ngele otwa kala aadhiginini kuye.

Jehova ota vulu oku tu kwathela tu pondole mukehe shimwe shoka tu wete itaashi shiwa, ngele otwa kala aadhiginini kuye

15. Oshike tashi vulu oku tu kwathela tu kale tu na ‘ombili yaKalunga,’ nongiini shika tashi wapa?

15 Ongiini tatu vulu okukala “nombili yaKalunga,” nonando otu li muupyakadhi? Omokukala tu na ekwatathano ewanawa naKalunga ketu, Jehova. Ekwatathano ndyoka otali vulu owala okukala po, omolwekuliloyambo ‘lyaKristus Jesus.’ Ekuliloyambo olyo limwe lyomiilonga iikumithi yaJehova. Jehova okwa longitha ekulilo, opo a dhime po oondjo dhetu, e tu kwathele tu kale tu na eiyuvo lya yela notu hedhe popepi naye. — Joh. 14:6; Jak. 4:8; 1 Pet. 3:21.

OTAYI GAMENE OOMWENYO DHETU NOMADHILADHILO GETU

16. Oshizemo otashi ka kala shini, ngele otwa kala tu na ‘ombili yaKalunga’? Gandja oshiholelwa.

16 Ngele otwa kala tu na ‘ombili yaKalunga, ndjoka yi vule uunongo awuhe wopantu,’ oshizemo otashi ka kala shini? Ombiimbeli otayi ti kutya ‘otayi ka gamena oomwenyo dhetu nomadhiladhilo getu muKristus Jesus.’ (Fil. 4:7) Oshitya shomelaka lyopetameko shoka sha tolokwa ‘gamena,’ osha li tashi ulike kuukwiita. Osha li tashi ulike kongundu yaakwiita mboka ya tulwa po, opo ya gamene oshilando oshinene pethimbo lyonale. Filippi osho oshilando sha li hashi kala sha gamenwa kaakwiita. Aakalimo yomoshilando moka oya li haya kotha taya mbonyoka, molwaashono oye shi kutya oshilando shawo osha gamenwa kaakwiita. Sha faathana, ngele otu na ‘ombili yaKalunga,’ omitima dhetu nomadhiladhilo getu ohaga kala ga gundjila. Otu shi kutya Jehova oku na ko nasha natse nokwa hala tu pondole. (1 Pet. 5:10) Shoka ohashi tu kwathele kaatu gwililwe po kiimpwiyu nokaatu teke omukumo.

17. Oshike tashi ke tu kwathela tu taalele onakuyiwa tu na omukumo?

17 Masiku aantu otaya ka taalela uudhigu unene, mboka itaawu ka kala ko we kombanda yevi. (Mat. 24:21, 22) Katu shi kutya oshike tashi ke tu ningilwa paumwene. Nonando ongawo, inatu pumbwa okukala tatu ipula unene. Nonando katu shi ashihe shoka Jehova ta ka ninga, uushili owo kutya otu mu shi. Kutya nduno oonkalo odhi kale dha tya ngiini, otwe shi mona kutya Jehova ota ka gwanitha po elalakano lye. Omathimbo gamwe, ohe shi ningi momukalo ngoka inaatu tegelela. Onkee ano, kehe shoka Jehova te tu ningile ngashingeyi, ohashi tu kwathele tu mone ‘ombili ye, ndjoka yi vule uunongo awuhe wopantu’ momukalo gwi ili.

^ okat. 1 Otaku tiwa wo kutya Silas naye okwa fa a li omukwashigwana gwaRoma. — Iil. 16:37.