Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2017

Ohole oyo uukwatya wu na ondilo

Ohole oyo uukwatya wu na ondilo

OMUYAPOSTOLI PAULUS okwa wilikwa kombepo ondjapuki a nyole kombinga yomaukwatya omugoyi ngoka hagi imikwa kombepo ndjoka. (Gal. 5:22, 23) Omaukwatya agehe ngoka omawanawa okwe gi ithana ‘iiyimati yombepo.’ * Iiyimati mbika ohayi ulike kutya omuntu okwa zala “omuntu omupe.” (Kol. 3:10) Ngaashi naanaa omuti hagu imi iiyimati ngele tagu silwa oshimpwiyu nawa, osho wo nomuntu hu ulike iiyimati yombepo ngele ombepo ondjapuki tayi longo nawa monkalamwenyo ye. — Eps. 1:1-3.

Ohole oyo oshiyimati shotango shomiiyimati yombepo ondjapuki mbyoka Paulus a popi, noyi li uukwatya wu na ondilo. Mbela oyi na ondilo shi thike peni? Paulus okwa ti kutya ngele ke na ohole, oye “oshinima showala.” (1 Kor. 13:2) Ihe mbela ohole oshike, nongiini tatu vulu oku yi kokeka noku yi ulika esiku kehe?

NKENE OHOLE HAYU ULIKWA

Nonando kashi shi oshipu okuyelitha kutya ohole oshike, Ombiimbeli oya popya omukalo moka hayu ulikwa. Pashiholelwa, otayi ti kutya ohole ohayi “idhidhimikile ayihe noyi na olukeno.” Natango, ohayi “nyanyukilwa oshili” noihayi ‘tonyala, ihe ohayi itaale, ohayi tegamene nohayi idhidhimike sigo okehulilo.’ Ohole oya kwatela mo wo okukala tu hole aantu nomutima aguhe, tu na ko nasha nayo shili notu na ekwatathano lyopothingo nayo. Mepingathano naashono, iikala ngaashi ondumbo, uuntsa, eihumbato ewinayi, okwiihola mwene, okukwatela yalwe onkone niikala yokwaadhimina po ohayi ulike okwaanohole. Pehala lyokuulika omaukwatya ngoka omawinayi, otwa hala okukokeka ohole ndjoka ‘ihaayi kongo shayo yene.’ — 1 Kor. 13:4-8.

JEHOVA NAJESUS OYE TU TULILA PO OSHIHOLELWA SHOKUULIKA OHOLE

Ombiimbeli otayi ti: “Kalunga oye ohole.” Osha yela kutya ohole oyo uukwatya waJehova wa simanenena. (1 Joh. 4:8) Iilonga ye ayihe noonkatu dhe otadhi ulike ohole ye. Omukalo gwa dhenga mbanda moka u ulika kutya oku hole aantu, oosho a tumu Jesus a hepekwe e ta si molwetu. Omuyapostoli Johannes okwa ti: “Kalunga okwe tu hololele ohole ye, sho a tumu Omuvalwa gwe awike muuyuni, opo tu kale tu na omwenyo omolwe. Ohole hayo ndjoka kutya ando twa li tu hole Kalunga, aawe, ihe Kalunga oye kwa li e tu hole tango nokwa tumu Omwana, a ninge eyambo lyokudhima po oondjo dhetu.” (1 Joh. 4:9, 10) Otatu vulu okudhiminwa po, okukala netegameno noku ka mona omwenyo gwaaluhe, molwaashoka Kalunga oku tu hole.

Jesus oku ulike kutya oku hole aantu sho a longo ehalo lyaKalunga nehalo ewanawa. Paulus okwa nyola a ti: “[Jesus] okwa ti: ‘Ongame nguka tandi ya okulonga ehalo lyoye, Kalunga.’ . . . Onkee ano tse otwa yelithwa lumwe aluke koondjo molwaJesus Kristus, ngoka a gwanitha ehalo lyaKalunga, sho a yamba olutu lwe mwene.” (Heb. 10:9, 10) Kapu na omuntu ta vulu okuulika ohole onenenene yi thike mpoka. Jesus okwa ti: “Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe molwawo.” (Joh. 15:13) Mbela tu li aantu inaatu gwanenena, otatu vulu ngaa okukala tu na ohole ngaashi ndjoka tu ulukilwa kuJehova naJesus? Eeno, otatu vulu! Natu taleni nkene tatu vulu okukala tu yi na.

 ‘OKUKALAMWENYO KWENI NAKU PANGELWE KOHOLE’

Paulus okwe tu kumagidha a ti: “Kambadhaleni ano okuholela Kalunga, oshoka one oyana aaholike. Okukalamwenyo kweni naku kale taku pangelwa kohole, ngashika Kristus a li e tu hole e ta gandja omwenyo gwe omolwetu, gu ninge eyambo lya nika nawa nolyo opalela Kalunga.” (Ef. 5:1, 2) Uuna tatu ulike ohole mukehe shimwe tatu ningi, otashi ti kutya ‘okukalamwenyo kwetu otaku pangelwa kohole.’ Ohatu ulike ohole ndjoka miilonga yetu, ihe hamoohapu owala. Johannes okwa nyola a ti: “Aamwandje! Ohole yetu inayi kala ashike moohapu nomokupopya, aawe, nayi kale ohole yashili, ndjoka tayi iholola yo yene miilonga wo.” (1 Joh. 3:18) Pashiholelwa, ngele tatu pangelwa kohole yokuhola Jehova naantu ooyakwetu, otatu ki inyengithwa tu uvithile aantu ‘elaka etoye lyOshilongo.’ (Mat. 24:14; Luk. 10:27) Ohatu pangelwa wo kohole, uuna tu na eidhidhimiko, ohenda nohatu dhimine po yalwe. Onkee ano, Ombiimbeli otayi tu ladhipike tayi ti: “Dhiminathanii po oondjo naanaa, ngashika Omuwa e mu dhimine po.” — Kol. 3:13.

Ohole yashili kayi na okukala ya pitilila. Pashiholelwa, ngele okanona otaka lili, omuvali ngoka e ka hole sha pitilila, oha ningi kehe shoka ka hala a ninge, opo ka mwene. Ihe omuvali ngoka e hole shili okamwana ite ke ka lila okathima koluko, mpoka sha pumbiwa. Sha faathana, Kalunga oye ohole, ihe “oha geele kehe ngoka e holike kuye.” (Heb. 12:6) Onkee ano, ngele ohatu pangelwa kohole, otatu ka pukulula aantu momukalo omwaanawa, mpoka sha pumbiwa. (Omayel. 3:11, 12) Ihe uuna tatu shi ningi, otu na okudhimbulukwa kutya natse ohatu yono notu na egamo lyokuninga iinima kaayi li pahole. Onkee ano, atuheni otu na mpoka tu na okuhwepopaleka omikalo moka hatu ulike ohole. Ongiini tatu vulu oku shi ninga? Natu ka taleni omikalo ndatu.

ONGIINI TATU VULU OKUKOKEKA OHOLE?

Omukalo gwotango, otu na okupula Kalunga e tu pe ombepo ye, ndjoka hayi tu kwathele tu kale tu na ohole. Jesus okwa ti kutya Jehova oha gandja “Ombepo Ondjapuki kumboka taye mu indile.” (Luk. 11:13) Ngele otwa galikana tu pewe ombepo ondjapuki e tatu kambadhala ‘okweendithwa kuyo mokukalamwenyo kwetu akuhe,’ otatu ku ulika ohole miilonga yetu shi vulithe nale. (Gal. 5:16) Pashiholelwa, ngele owu li omukuluntugongalo megongalo lyopaKriste, oto vulu okupula Kalunga ombepo ondjapuki, yi ku kwathele wu pe yalwe omayele ga za mOmbiimbeli momukalo gu li pahole. Nenge ngele owu li omuvali, oto vulu oku mu pula e yi ku pe, yi ku kwathele wu putudhe nowu pukulule aamwoye nohole, ihe hanongeyo.

Omutiyali, tedhatedha kunkene Jesus u ulukile aantu ohole, nokuli naasho ya li taye mu hindi. (1 Pet. 2:21, 23) Otwa pumbwa okudhiladhila kombinga yoshiholelwa shaJesus, unene tuu ngele otwa ningwa nayi nenge twa ningilwa okwaanuuyuuki. Ngele otwi iyadha monkalo ndjoka, epulo ewanawa tatu vulu okwiipula olyo: ‘Mbela ando Jesus oye a li mo, ando okwa ningi po shike?’ Omumwameme Leigh okwa mona kutya okwiipula epulo ndyoka okwe mu kwathela a dhiladhile manga inaa katuka. Ota hokolola ta ti: “Oshikando shimwe, omuniilonga omukwetu okwa li a tumine aaniilonga ooyakwetu o-e-mail tayi popi nayi kombinga yandje nokombinga yiilonga yandje. Osha li she ehameka ndje noonkondo. Ihe ondi ipula ngeyi: ‘Ongiini tandi vulu okuholela Jesus, opo ndi ungaunge nomuntu nguka?’ Konima yokudhiladhila kwaashoka Jesus a li ta vulu okuninga po, onda tokola ndi shi ethe nokaandi tamanane kombinga yasho. Konima yethimbo, onda ka tseya kutya omuniilonga omukwetu ngoka okwa kala ti idhidhimikile uuvu wa kwata miiti nowa li we mu gwilila po noonkondo. Onda ka thika pehulithodhiladhilo kutya ka li a hala okweehameka ndje naashoka a nyola mo-e-mail. Sho nda dhiladhila koshiholelwa shaJesus shokuulika ohole naasho a li ta hindwa, osha kwathele ndje ndi ulukile omuniilonga omukwetu ohole.” Osha yela kutya ngele otwa holele Jesus, otatu ku ulukila aluhe yalwe ohole.

Omutitatu, kokeka ombepo yohole yeiyambo, ndjoka hayi ndhindhilikitha mo Aakriste yashili. (Joh. 13:34, 35) Ombiimbeli otayi tu ladhipike kutya ‘okukala kwetu’ nenge okudhiladhila kwetu naku kale kwa fa kwaJesus. Sho Jesus a zi megulu “okwi ihula” olutu lwe lwopambepo molwetu, nokuli “sigo omeso.” (Fil. 2:5-8) Uuna tatu holele ohole ye yeiyambo, omadhiladhilo getu nomaiyuvo getu  otaga ka kala ga fa ge, notayi ke tu inyengitha tu pitithe komeho uuwanawa wayalwe, pehala lyowetu. Omauwanawa galwe geni haga zi mokuulika ohole?

UUWANAWA MBOKA HAWU ZI MOKUULIKA OHOLE

Uuna tatu ulukile yalwe ohole, ohashi eta omauwanawa ogendji. Natu tale kiiholelwa iyali:

Uuwanawa wuni hatu mono mokuulika ohole?

  • UUMWAYINATHANA WOMUUYUNI AWUHE: Molwaashoka otu holathane, otu shi shi kutya kehe egongalo tatu ka talela po muuyuni, aamwatate naamwameme otaye ke tu taamba ko nombili. Kashi li tuu elalekonuuyamba sho tu holike ‘kooitaali ooyakwetu yomuuyuni auhe’! (1 Pet. 5:9) Openi ishewe tatu vulu okumona ohole ya tya ngawo, kaashi shi mokati koshigwana shaKalunga?

  • OMBILI: Uuna tatu ‘holola ohole yetu’ mokwiidhidhimikilathana, ohashi tu kwathele tu nyanyukilwe ‘ombili ndjoka hayi tu mangele kumwe.’ (Ef. 4:2, 3) Ombili ndjoka ohatu yi mono kutse yene uuna tu li pokugongala, piigongi yoshikandjo noyoshitopolwa. Mbela ito zimine kutya ombili ndjoka tu na oyi ikalekelwa shili, nonando otu li muuyuni mbuka wa topauka? (Eps. 119:165; Jes. 54:13) Uuna tatu lalakanene okukala tu na ombili nayalwe, otatu ulike kutya otu ya hole noonkondo, naashoka ohashi nyanyudha Tate yetu gwomegulu. — Eps. 133:1-3; Mat. 5:9.

‘OHOLE OHAYI TUNGU’

Paulus okwa nyola a ti: ‘Ohole ohayi tungu.’ (1 Kor. 8:1) Mbela ohayi tungu momukalo guni? Montopolwa 13 yontumwafo yotango ndjoka Paulus a nyolela Aakorinto, hayi ithanwa “Ondjimbondjimbo yohole,” omuyapostoli okwa yelitha nkene ohole hayi tungu. Omukalo gwotango, ohayi lalakanene shoka tashi opalele yalwe. (1 Kor. 10:24; 13:5) Omukalo omutiyali, molwaashoka ohole ohayi dhiladhila kombinga yayalwe, oyi na ko nasha nayalwe, ohayi idhidhimike noyi na ohenda, ohayi kwathele aanegumbo ya kale ye na ekwatathano ewanawa nosho wo aantu ya kale ya hangana momagongalo. — Kol. 3:14.

Ohole yetu yokuhola Kalunga oyi na ondilo nohayi tu tungu shili. Kapu na ohole ya fa ndjoka. Ohayi hanganitha aantu yomomaputuko agehe, yomomihoko adhihe noyomomalaka agehe, ya longele Jehova “ayehe” nenyanyu. (Sef. 3:9) Natu kale twa tokola toko okuulika esiku kehe uukwatya mbuka wu na ondilo, mboka wu li oshiyimati shombepo ondjapuki yaKalunga.

^ okat. 2 Oshitopolwa shika osho shotango shomiitopolwa omugoyi ya landulathana mbyoka tayi kundathana uukwatya kehe nenge oshiyimati kehe shomiiyimati yombepo.