Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2017

Mbela owu na ngaa ehalo lyokutegelela neidhidhimiko?

Mbela owu na ngaa ehalo lyokutegelela neidhidhimiko?

“Nane wo omu na okwiidhidhimika.” — JAK. 5:8.

OMAIMBILO: 78, 139

1, 2. (a) Oshike tashi vulika shi tu ningithe tu ipule kutya “sigo uunake?” (b) Omolwashike tatu vulu okutsuwa omukumo kiiholelwa yaapiya aadhiginini yonale?

“SIGO uunake?” Epulo ndyono olya li lya pulwa kaahunganeki aadhiginini, Jesaja naHabakuk. (Jes. 6:11; Hab. 1:2) Sho omukwaniilwa David a li i ipyakidhila nokunyola Episalomi 13, naye okwa li a pula lwiikando itano a ti: “Sigo uunake?” (Eps. 13:1, 2) Jesus Kristus naye nokuli okwa li a pula epulo ndyoka, sho a li tu ungaunga naantu mboka ye na iikala iiwinayi. (Mat. 17:17) Onkee ano, inashi tu kumitha, uuna omathimbo gamwe tatu iyadha tatu ipula epulo ndyoka.

2 Oshike tashi vulu oku tu ningitha tu ipule kutya “sigo uunake?” Uuna tashi vulika tatu ungaungiwa natse shaa li pauyuuki. Nenge tashi vulika tu li methimbo lyuukulupe, tatu ehama nenge tatu ungaunga nomathiminiko monkalamwenyo ‘momathimbo ngaka omadhigu okukaliwa mugo.’ (2 Tim. 3:1, Yelekanitha NW.) Otashi vulika wo omolwiikala iiwinayi yayalwe ye tu lulila. Kutya nduno etompelo olini, otashi tsu omukumo okutseya kutya Jehova ka li a pangula aapiya ye yonale aadhiginini, sho ya pula epulo ndyoka  natse tashi vulika tu kale tu na momadhiladhilo.

3. Oshike tashi vulu oku tu kwathela, uuna tu li moonkalo oondhigu?

3 Oshike tashi vulu oku tu kwathela, uuna tu li moonkalo oondhigu? Omulongwa Jakob, omumwayina gwaJesus, okwa li a nwethwa mo a nyole ngeyi: “Aamwameme, kaleni nokwiidhidhimika, sigo uuna Omuwa te ya.” (Jak. 5:7) Odhoshili kutya atuhe otwa pumbwa eidhidhimiko. Mbela okukala tu na uukwatya mboka osha kwatela mo shike?

EIDHIDHIMIKO OSHIKE?

4, 5. (a) Eidhidhimiko olya kwatela mo shike? (b) Omulongwa Jakob okwa yelitha ngiini eidhidhimiko? (Tala kethano lyopetameko.)

4 Shi ikolelela kOmbiimbeli, eidhidhimiko olyo oshiyimati shombepo ondjapuki. Omuntu inaa gwanenena ita vulu okukala nuukwatya mboka ngaashi sha pumbiwa, kaashi shi kekwatho lyaKalunga. Eidhidhimiko olyo omagano ga za kuKalunga, nuuna tu li na otashi ulike kutya otu mu hole notu hole yalwe. Ngele katu na eidhidhimiko, otashi vulu okunkundipaleka ekwatathano lyetu nayalwe, ihe ngele otu li na otashi vulu oku li koleka. (1 Kor. 13:4; Gal. 5:22) Eidhidhimiko olya kwatela mo omaukwatya galwe gopaKriste ga simanenena. Pashiholelwa, olya kwatela mo okukala netaloko ewanawa, nonando otatu idhidhimikile oonkalo oondhigu. (Kol. 1:11; Jak. 1:3, 4) Eidhidhimiko olya kwatela mo wo okwiidhidhimikila uudhigu nopwaahe na okushunithila omuntu uuwinayi. Natango, olya kwatela mo okukala omudhiginini kutya nduno onkalo oyi kale ondhigu ya fa peni. Ombiimbeli otayi tu ladhipike tu kale hatu tegelele nehalo ewanawa. Eidhidhimiko olya tsuwa omuthindo muJakob 5:7, 8. (Lesha.)

5 Omolwashike tu na okukala nehalo lyokutegelela Jehova a katuke onkatu? Jakob okwa yelekanitha onkalo yetu nonkalo yomunepya. Nonando omunepya oha longo nuudhiginini a kune iimeno ye, iha vulu nando okuwilika onkalo yombepo nenge okukokitha iimeno. Ita vulu okweendelelitha ethimbo. Oha tegelele neidhidhimiko “epya lye li mu pe eteyo olindji.” Sha faathana, opu na iinima mbyoka itaatu vulu okuninga, sho twa tegelela omauvaneko gaJehova ga gwanithwe. (Mark. 13:32, 33; Iil. 1:7) Ngaashi omunepya, natse otwa pumbwa okutegelela neidhidhimiko.

6. Oshike tatu vulu okwiilonga moshiholelwa shomuhunganeki Mika?

6 Oonkalo ndhoka twa taalela kunena odha faathana naandhoka dhopethimbo lyomuhunganeki Mika. Okwa li ko pethimbo lyelelo lyomukwaniilwa omukolokoshi, Ahas, sho uukolokoshi wa li wa vuka. Aantu oya li ookapyoko ‘mokulonga uuwinayi.’ (Lesha Mika 7:1-3.) Mika okwa li a mono kutya ita vulu okulundulula oonkalo ndhoka kuye mwene. Okwa ningi po shike? Okwa ti: “Ngame otandi tegelele Omuwa; ondi inekela Kalunga, ngoka ta hupitha ndje. Kalunga otu uvu ndje.” (Mika 7:7) Ngaashi Mika, natse wo otwa pumbwa ‘okutegelela.’

7. Omolwashike kaatu na okutegelela owala shampa twa tegelela, Jehova a gwanithe po omauvaneko ge?

7 Ngele otu na eitaalo lya fa lyaMika, otatu ka kala tu na ehalo lyokutegelela Jehova. Okutegelela kwetu inaku fa kwomunandholongo ngoka a tegelela a ka dhipagwe. Oha thiminikwa a kale a tegelela, noiha kala a tegelela nenyanyu. Onkalo yetu hasho ya tya ngaaka. Ohatu kala twa tegelela Jehova nenyanyu, molwaashoka otu shi kutya ota ka gwanitha po euvaneko lye lyoku tu pa omwenyo gwaaluhe, pethimbo naanaa lyo opala. Onkee ano, ohatu ‘idhidhimikile iinima ayihe nokudhiginina nenyanyu.’ (Kol. 1:11, 12, OB-1954) Sho twa tegelela, inatu pumbwa okukala tatu nyenyeta nokungungutula, tu wete ando Jehova itaa katuka nziya. Ngele otwa ningi ngawo, itashi ke mu nyanyudha. — Kol. 3:12.

 IIHOLELWA YAAPIYA AADHIGININI MBOKA YA LI YI IDHIDHIMIKE

8. Oshike tu na okudhimbulukwa, sho tatu tedhatedha kiiholelwa yaalumentu naakiintu aadhiginini yonale?

8 Aalumentu naakiintu yonale aadhiginini, oya li ya tegelele neidhidhimiko Jehova a gwanithe po omauvaneko ge. Ngele otwa dhimbulukwa iiholelwa yawo, otatu ka kala tu na ehalo lyokutegelela shi vulithe nale. (Rom. 15:4) Sho tatu tedhatedha kiiholelwa yawo, onawa tu dhimbulukwe omapulo taga landula: Oya li ya tegelele ethimbo li thike peni? Omolwashike ya li ye na ehalo lyokutegelela? Omayambeko geni ya mona, omolweidhidhimiko lyawo?

Abraham okwa li e na okutegelela uule womimvo odhindji, sigo aatekulu ye, Esau naJakob ya valwa (Tala okatendo 9, 10)

 

9, 10. Abraham naSara oya li ye na okutegelela Jehova ethimbo li thike peni?

9 Natu taleni koshiholelwa shaAbraham naSara. Oya li yamwe ‘yomwaambeyaka yi itaale noyi idhidhimike, sigo ya pewa shoka Kalunga e shi uvaneka.’ Omanyolo otaga ti kutya “Abraham okwi idhidhimike” e ta pewa shoka Kalunga e mu uvanekela. Jehova okwa li u uvaneke kutya ote ke mu yambeka note ki indjipaleka oluvalo lwe. (Heb. 6:12, 15) Omolwashike Abraham a li a pumbwa okwiidhidhimika? Omolwaashoka osha li tashi ka kutha ethimbo, euvaneko ndyoka li gwanithwe. Ehangano ndyoka Jehova a ningi naAbraham, olya tameke okutulwa miilonga mo 14 Nisan 1943 K.E.N. Shoka osha ningwa sho ye naSara pamwe naanegumbo lyawo ya taaguluka omulonga gwaEufrat, e taya yi mEvi lyEuvaneko. Abraham okwa li e na okutegelela uule womimvo 25, sigo omwanamati, Isak a valwa mo 1918 K.E.N. Okwa li natango e na okutegelela uule womimvo 60, sigo aatekulu ye, Esau naJakob ya valwa mo 1858 K.E.N. — Heb. 11:9.

10 Abraham okwa li a thigulula oshitopolwa shi thike peni mEvi lyEuvaneko? Ombiimbeli otayi ti: “Kalunga ina thikila ta pe Abraham nando okatopolwa okashona kevi ndika, ka ninge  ke mwene. Ihe Kalunga oku uvaneke ashike kutya ote ke li mu pa; olyo notali ka kala lye nolyoluvalo lwe konima yeso lye. Abraham okwa li kee na omunona, Kalunga sho e mu pe euvaneko ndika.” (Iil. 7:5) Oluvalo lwe olwa ka ninga owala oshigwana shoka sha li tashi ka thigulula evi, konima yomimvo 430, sho Abraham a taaguluka nale omulonga gwaEufrat. — Eks. 12:40-42; Gal. 3:17.

11. Omolwashike Abraham a li e na ehalo lyokutegelela Jehova, nota ka mona kutya eidhidhimiko lye olye etitha omayambeko geni?

11 Abraham okwa li e na ehalo lyokutegelela, molwaashono eidhidhimiko lye olya li lya kankamena keitaalo lye muJehova. (Lesha Aahebeli 11:8-12.) Abraham okwa li a tegelela nenyanyu, nonando ina mona shoka a li u uvanekelwa tashi gwanithwa po thiluthilu pethimbo lye. Dhiladhila owala kenyanyu ndyoka Abraham ta ka kala e na, ngele a yumudhilwa meviparadisa. Ota ka kala a kumwa okumona nkene Ombiimbeli ya hokolola kombinga ye noyoluvalo lwe. * Dhiladhila wo kenyanyu ndyoka ta ka kala e na, sho te ku uva ko oshikando shotango onkandangala ya simana, ndjoka a dhana mokugwanithwa kwelalakano lyaJehova li na ko nasha noluvalo lu uvanekwa. Kapu na omalimbililo kutya ota ka kala u uvite kutya okutegelela ethimbo ele oku na ondjambi.

12, 13. Omolwashike Josef a li a pumbwa eidhidhimiko, nokwa li e na iikala yini iiwanawa?

12 Josef, omutekulululwa gwaAbraham, naye okwa li i idhidhimike nehalo ewanawa. Okwa li u ungaungiwa naye shaa li pauyuuki. Tango, sho e na omimvo 17 lwaampono, aamwahe oya li ye mu landitha po a ka ninge omupika. Oshitiyali, okwa li a lundilwa kutya okwa li ta kambadhala okukwata onkonga omukulukadhi gwamwene gwe. Shoka oshe mu tulitha mondholongo. (Gen. 39:11-20; Eps. 105:17, 18) Nonando okwa li a katuka pandunge, iinima kaya li ye mu endele nawa. Ihe konima yomimvo 13, onkalo oya ka lunduluka meendelelo. Okwa mangululwa mo mondholongo, e ta pewa ondondo yopombanda muEgipiti. — Gen. 41:14, 37-43; Iil. 7:9, 10.

13 Mbela okwaanuuyuuki hoka Josef a ningilwa okwa li kwe mu geyitha? Mbela okwa li a kanitha einekelo lye muJehova Kalunga? Hasho nando. Oshike sha li sha kwathele Josef a tegelele Jehova neidhidhimiko? Eitaalo lye muJehova. Okwa li a mono nkene Jehova e mu kwathele monkalo ye. Shoka oshi iwetikile mwaashoka a li a lombwele aamwahe, sho a ti: “Inamu tila. Kandi li peha lyaKalunga. Omwa ningile shili uuwinayi, ihe Kalunga okwe u mu galulile uuwanawa, opo a gamene oomwenyo dhaantu oyendji mboka ye na omwenyo pethimbo ndika molwashoka sha ningwa po.” (Gen. 50:19, 20) Hugunina, Josef okwa li a mono kutya okutegelela neidhidhimiko oshinima oshiwanawa.

14, 15. (a) Oshike oshindhindhilikwedhi kombinga yeidhidhimiko lyaDavid? (b) Oshike sha li she mu kwathele a tegelele neidhidhimiko?

14 Omukwaniilwa David naye okwa li a ningilwa okwaanuuyuuki okundji. Okwa li a hogololwa kuJehova manga e li omugundjuka a ka ninge omukwaniilwa gwaIsraeli monakuyiwa. Nonando ongawo, okwa li e na okutegelela pu pite omimvo 15, opo a ninge omukwaniilwa. (2 Sam. 2:3, 4) Pethimbo ndyoka, omukwaniilwa Saul ngoka kaa li omudhiginini, okwa li ta kongo David e mu dhipage. * Shoka osha ningitha David a kale ontauki, nomathimbo gamwe okwa kala a holama momakololo mombuga. Nokuli naasho Saul a dhipagwa molugodhi, David okwa li e na natango okutegelela uule womimvo heyali lwaampono, opo nawa a ninge  omukwaniilwa gwoshigwana ashihe shaIsraeli. — 2 Sam. 5:4, 5.

15 Omolwashike David a li e na ehalo lyokutegelela neidhidhimiko? Okwe tu pa eyamukulo mepisalomi olyo tuu ndyoka, moka a pula lwiikando itano ta ti: “Sigo uunake?” Okwa ti wo kutya: “Ngame ondi inekela ohole yoye; otandi nyanyukwa, sho to hupitha ndje. Omuwa, otandi ku imbile, oshoka owa ningile ndje uuwanawa.” (Eps. 13:5, 6) David okwa li i inekela mohole yaJehova yuudhiginini. Okwa li a dhiladhila nkene Jehova e mu kwathele monakuziwa nokwa li a tegelele a hulithe po uupyakadhi we. Eeno, David okwa li e wete kutya okutegelela ohaku eta omayambeko.

Jehova okwa tegelela tu kale nuukwatya weidhidhimiko, oshoka naye oku wu na

16, 17. Jehova Kalunga naJesus Kristus oye tu tulila po ngiini iiholelwa iiwanawa yi na ko nasha nokukala nehalo lyokutegelela?

16 Jehova okwa tegelela tu kale nuukwatya weidhidhimiko, oshoka naye oku wu na. Okwe tu tulila po oshiholelwa dhingi shokukala tu na ehalo lyokutegelela. (Lesha 2 Petrus 3:9.) Jehova okwa kala a tegelela neidhidhimiko uule womimvo omayovi, nota tsikile okutegelela, sigo ompata ndjoka ya holokele moshikunino shaEden ya kandulwa po. Okwa “tala onteni” nokwa “tegelela” ethimbo sho edhina lye tali ka yapulithwa thiluthilu. Oshizemo otashi ka kala shini? Mboka ye mu “tegelela” otaya ka mona omalaleko nuuyamba. — Jes. 30:18, OB-1954.

17 Jesus naye okwa li e na ehalo lyokutegelela. Jesus sho a li kombanda yevi, okwa kala omudhiginini sigo omeso lye. Mo 33 E.N., okwa gandja ongushu yekuliloyambo lye kuJehova. Nonando ongawo, okwa li e na okutegelela sigo omomumvo 1914, opo a tameke okupangela. (Iil. 2:33-35; Heb. 10:12, 13) Jesus oku na natango okutegelela sigo okonima yElelo lye lyOomvula Eyuvi, opo aatondi ye ya hanagulwa po thiluthilu. (1 Kor. 15:25) Oku na okutegelela ethimbo ele, ihe otatu vulu okukala nuushili kutya okutegelela kwe oku na ondjambi.

OSHIKE TASHI KE TU KWATHELA TU IDHIDHIMIKE?

18, 19. Oshike tashi ke tu kwathela tu kale tu na ehalo lyokutegelela neidhidhimiko?

18 Kapu na omalimbililo kutya kehe gumwe gwomutse okwa pumbwa okukala e na ehalo lyokutegelela, ano okuulika eidhidhimiko. Mbela oshike tashi ke tu kwathela tu shi ninge? Otwa pumbwa okugalikana kuJehova e tu pe ombepo ye. Dhimbulukwa kutya eidhidhimiko oli li oshiyimati shombepo. (Ef. 3:16; 6:18; 1 Tes. 5:17-19) Pula Jehova e ku kwathele wi idhidhimike.

19 Dhimbulukwa wo shoka sha li sha kwathele Abraham, Josef naDavid ya tegelele neidhidhimiko Jehova a gwanithe po shoka e yu uvanekela. Eitaalo lyawo neinekelo lyawo muJehova, olyo lya li lye ya kwathele. Kaya li owala ya gandja eitulomo kuyo yene nokuuwanawa wawo. Sho tatu dhiladhila kunkene iinima ya li ye ya endele nawa, shika otashi ke tu inyengitha tu ulike uukwatya weidhidhimiko.

20. Otu na okukala twa tokola toko okuninga shike?

20 Nonando otu kale twa taalela omashongo, otu na okutokola toko tu ulike eidhidhimiko mokukala tu na “etegameno” nenge iikala yokutegelela. Odhoshili kutya omathimbo gamwe otashi vulika tu pule tatu ti: “Omuwa, sigo uunake?” (Jes. 6:11) Koonkondo dhombepo ondjapuki yaKalunga, kehe gumwe gwomutse ota ka kala a tokola okupopya oohapu dhaJeremia ndhoka tadhi ti: “Omuwa oye oshitendelwa shandje; ongame nonde mu inekela.” — Oontak. 3:21, 24.

^ okat. 11 Oontopolwa 15 dhembo lyaGenesis, odha popya unene kombinga yaAbraham. Oshikwawo, aanyoli yOmanyolo gopaKriste gOshigreka, oya popya kombinga yaAbraham lwiikando yi vulithe po 70.

^ okat. 14 Nonando Saul ka li a hokiwa kuJehova konima sho a lele omimvo dhi vulithe pumbali, okwa li a pitikwa natango a tsikile okupangela uule womimvo 38, sigo a si. — 1 Sam. 13:1; Iil. 13:21.