Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juni 2017

Ambidhidha uunamapangelo waJehova

Ambidhidha uunamapangelo waJehova

“Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe.” —  EH. 4:11.

OMAIMBILO: 112, 133

1, 2. Kehe gumwe gwomutse oku na okukala e na uushili washike? (Tala kethano lyopetameko.)

NGAASHI twe shi kundathana nale moshitopolwa sha tetekele, Ondiyapoli oya ti kutya Jehova ota longitha uunamapangelo we momukalo inaagu uka. Oya ti wo kutya aantu otaya ka kala nawa ngele tayi ipangele yo yene. Mbela Satana oku li mondjila? Natu tye ando aantu mboka ya hogolola okwiipangela yo yene otaya vulu okukala nomwenyo sigo aluhe. Mbela otaya ka kala ngaa shili ye li nawa ngele itaya pangelwa kuKalunga? Mbela ando owa li to ipangele mwene, ando owa kala ngaa wa nyanyukwa lela nowu na omwenyo sigo aluhe?

2 Kapu na ngoka ta vulu oku ku yamukulila omapulo ngoka. Kehe gumwe oku na okudhiladhila nawa kombinga yago. Ngele owe shi ningi, oto kala wu na uushili kutya uunamapangelo waKalunga owu li epangelo li li mondjila. Owo epangelo dhingi, notwa gwana oku li ambidhidha nomutima aguhe. Ombiimbeli otayi gandja omatompelo ge shi okwiinekelwa. Pashiholelwa, natu taleni shoka Omanyolo tage tu lombwele kombinga yokukala kwaJehova e na uuthemba wokupangela eshito alihe.

JEHOVA OKU NA UUTHEMBA WOKUPANGELA

3. Omolwashike Jehova oye owala e na uuthemba wokukala Omupangeli gweshito alihe?

3 Jehova oku na uuthemba wokukala Omunamapangelo gweshito  alihe, molwaashoka oye Kalunga Omunankondoadhihe nOmushiti. (1 Ondjal. 29:11; Iil. 4:24) MEhololo 4:11, mboka taya ka pangela pamwe naKristus 144 000 oya popiwa memoniko tayi igidha taya ti: “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe, nokehalo lyoye oyi li po noyi na omwenyo!” Eeno, molwaashoka Jehova oye a shita iinima ayihe, oku na uuthemba wokupangela aantu nosho wo iishitwa yopambepo.

4. Omolwashike emanguluko lyokuninga omatokolo itaali tu pe uuthemba wokupataneka uunamapangelo waKalunga?

4 Satana ke na shoka a shita. Onkee ano, ke na uuthemba wokupangela uuyuni. Ye naaihokani yotango oya katuka nuuntsa sho ya pataneke uunamapangelo waJehova. (Jer. 10:23) Ye li iishitwa yi na emanguluko lyokuninga omatokolo, oya longitha nayi emanguluko lyawo sho ya hogolola okukala ya manguluka ko kuKalunga. Mbela emanguluko ndyono olya li lye ya pe uuthemba wokuninga ngawo? Hasho nando. Uuthemba wokuninga omatokolo ohawu kwathele aantu ya ninge omatokolo ogendji tago opalele esiku kehe. Onkee ano, itali ya ningitha ya kale ye li ompinge nOmushiti gwawo nOmugandjimwenyo gwawo. Osha yela kutya uuna tatu shi ningi otashi ulike kutya otatu longitha nayi emanguluko ndyoka. Tu li aantu, otu na okukala kohi yepangelo lyaJehova li li pauyuuki.

5. Omolwashike tatu vulu okukala nuushili kutya omatokolo gaKalunga oge li pauyuuki?

5 Etompelo lilwe, Jehova oye e na uuthemba wokukala Omunamapangelo agehe. Oha longitha oonkondopangelo dhe pauyuuki. Okwa ti: “Ohole yandje kayi na ondjele, nohandi longo shoka oshiwanawa noshu uka. Iinima mbika otayi opalele ndje. Ongame Omuwa nda popi.” (Jer. 9:24) Jehova iha tokola shi ikolelela koompango ndhoka dha totwa po kaantu inaaya gwanenena. Pehala lyaashono, okwa tulila po aantu omithikampango dhe dhi li pauyuuki dhaashoka shi li mondjila. Omupisalomi okwa ti: ‘Epangelo Lye olya tungilwa kuuyuuki nokoshili.’ Onkee ano, otatu vulu okukala neinekelo kutya oompango dhe adhihe, omakotampango ge nomatokolo ge oge li pauyuuki. (Eps. 89:14; 119:128) Mepingathano naashoka, nonando Satana okwa popi kutya uunamapangelo waJehova kawu li nawa, ita vulu okweeta po uuyuni moka hamu longwa uuyuuki.

6. Omolwetompelo limwe lini Jehova e na uuthemba wokupangela uuyuni?

6 Oshikwawo, Jehova oku na uuthemba wokukala Omunamapangelo gweshito alihe, molwaashono oku na ontseyo nuunongo wokusila oshimpwiyu eshito alihe. Pashiholelwa, natu taleni kunkene a li a kwathele Omwana a aludhe omikithi ndhoka dha nyenga oondohotola. (Mat. 4:23, 24; Mark. 5:25-29) Pataloko lyaJehova, shino kasha li oshikumithalonga. Oku shi ashihe shoka sha kwatelwa mo nota vulu okwaaludha kehe pamwe tapu ehama. Ota vulu wo okuyumudha aasi nokukeelela iiponga yopaunshitwe.

7. Uunongo waJehova owu vule kokule shi thike peni uunongo wuuyuni mbuka wu li kohi yepangelo lyaSatana?

7 Uuyuni mbuka wu li kohi yenwethomo lyaSatana otawu ningi natango oonkambadhala wu kandule po oontamanana dhiigwana nodhopaigwana. Ihe Jehova oye awike e na uunongo wokweeta ombili muuyuni. (Jes. 2:3, 4; 54:13) Sho tatu ilongo ontseyo nuunongo waJehova, otatu ka kala tu uvite ngaashi omuyapostoli Paulus ngoka a nyola a ti: “Ano uuwindji wuuyamba waKalunga ou thike peni! Uunongo noondunge dhe odha hulila peni! Olye ta vulu okufatulula omatokolo ge? Olye ta vulu okuuva ko oondjila dhe?” —  Rom. 11:33.

EPANGELO LYAJEHOVA OLYO DHINGI

8. Omukalo gwaJehova gwokupangela ogwa guma ngiini omutima gwoye?

8 Ombiimbeli oya popya oshindji kaashi shi owala uuthemba waJehova wokupangela. Otayi ulike kutya omolwashike uunamapangelo we  wu vule kokule waapangeli yalwe. Etompelo limwe olyo kutya Jehova oha pangele nohole. Odhoshili kutya omitima dhetu ohadhi gumwa kunkene ha hogolola okulongitha uunamapangelo we. Jehova ‘omunamutimahenda, omunalukeno nomutalanteni, iha geye mbala noku udha ohole noshili.’ (Eks. 34:6, yelekanitha NW.) Ohu ungaunga naapiya ye yopanyama nesimaneko. Ohe tu sile oshimpwiyu shi vulithe punkene hatu isile oshimpwiyu tse yene. Mekondjithathano naashoka Ondiyapoli ya popi, Jehova iha tindile aalongeli ye aadhiginini shoka oshiwanawa. Okwe tu pa nokuli omagano ge na ondilo, Omwana, opo tu vule okukala tu na etegameno lyokumona omwenyo gwaaluhe. —  Lesha Episalomi 84:11; Aaroma 8:32.

9. Otu shi shi ngiini kutya Kalunga oku na ko nasha naantu ayehe?

9 Jehova oku hole aantu ayehe, noku na ko nasha lela nakehe gumwe. Pashiholelwa, natu taleni shoka sha li sha ningwa po muule womathelemimvo omathele gatatu sho Jehova a li a langeke po aapanguli nokwe ya pe oonkondopangelo okumangulula oshigwana shaIsraeli miikaha yaathiminiki yasho. Pethimbo ndyoka edhigu Jehova okwa li a dhimbulula omukiintu ngoka kee shi Omuisraeli gwedhina Rut, ngoka a thigi po iinima oyindji, opo a ninge omulongeli gwe. Jehova okwa li e mu laleke nuuyamba, sho e mu pe omusamane nokanona kokamati. Ihe shoka hasho owala Jehova e mu ningile. Sho Rut ta ka yumudhwa, ota ka mona kutya omwanamati okwa za mezimo moka mwa za Mesiasa. Dhiladhila owala nkene Rut ta ka kala u uvite, ngele a yumuka, sho ta ka mona kutya ondjokonona ye oya nyolwa memboMbiimbeli lye mu lukilwa! —  Rut 4:13; Mat. 1:5, 16.

10. Omolwashike tatu vulu okutya Jehova ihaa pangele nonyanya?

10 Jehova iha pangele nonyanya. Mboka haya vulika kuye ohaya kala ya manguluka noya nyanyukwa. (2 Kor. 3:17) David okwe shi popi a ti: “Eadhimo nesimano olye mu kunduka, oonkondo nenyanyu olyu udha otempeli ye.” (1 Ondjal. 16:7, 27) Sha faathana, Omupisalomi Etan okwa nyola a ti: “Aanelago oomboka haye ku simaneke noondjimbo; oomboka haa ende muuyelele wesilohenda lyoye. Ongoye enyanyu lyawo esiku alihe, notaye ku hambelelele uuwanawa woye.” —  Eps. 89:15, 16.

11. Ongiini tatu vulu okukoleka uushili wetu kutya epangelo lyaJehova olyo dhingi?

11 Ngele otwa kala hatu dhiladhila aluhe kuuwanawa waJehova otatu ka kala tu na uushili wa kola kutya epangelo lye olyo dhingi. Otatu ka kala tu uvite ngaashi omupisalomi a li u uvite sho a ti: “Okukala esiku limwe motempeli yoye oku vule okukala omasiku geyuvi palwe.” (Eps. 84:10) E li Omuumbi gwetu nOmushiti gwetu, Jehova oku shi shoka twa pumbwa, opo tu kale twa nyanyukwa shili noha gwanitha po ompumbwe yetu onene. Kehe shimwe shoka Jehova te tu pula oshi na ko nasha nuuwanawa wetu. Nonando otashi tu pula tu ninge omaiyambo, otatu ka kala twa nyanyukwa lela ngele otatu vulika kuJehova. —  Lesha Jesaja 48:17.

12. Ohatu ambidhidha uunamapangelo waJehova unene tuu molwashike?

12 Ombiimbeli otayi ulike kutya konima yOmimvo eyovi limwe dhElelo lyaKristus, aantu yamwe otaya ka kala ye li ompinge nuunamapangelo waJehova. (Eh. 20:7, 8) Oshike tashi vulika tashi ke yi inyengitha ya ninge ngawo? Molwaashoka Ondiyapoli otayi ka kala ya mangululwa mo molumbogo, otayi ka kala ya hala okupukitha aantu. Kapu na omalimbililo, natango otayi ku ulika uukwatya wokwiihola mwene ngaashi ya kala hayi shi ningi shito. Otashi vulika tayi ka makela aantu, opo yi ya itaalithe kutya otaya vulu okukala nomwenyo sigo aluhe, nonando ihaya vulika kuJehova. Osha yela kutya shoka kashi shi shoshili. Mbela otu na okwiitaala iifundja mbyono? Ngele otu hole Jehova nohatu mu longele molwuuwanawa we nomolwaashoka oye e na uuthemba wokukala Omunamapangelo gweshito alihe, ano iifundja ya fa mpono otayi ka kala iinyanyalithi kutse.  Itatu ka kala nando twa hala onkalamwenyo yilwe kaayi shi ndjoka yi li kohi yuunamapangelo waJehova ngoka ta pangele pahole nopauyuuki.

AMBIDHIDHA NUUDHIGININI UUNAMAPANGELO WAJEHOVA

13. Ongiini tatu tu vulu okuulika kutya otatu ambidhidha uunamapangelo waKalunga?

13 Oshoshili kutya uunamapangelo waJehova owo twa gwana okwaambidhidha nomutima aguhe. Ngaashi twe shi mona nale, Jehova oku na uuthemba wokupangela, noha pangele momukalo gwa dhenga mbanda. Otatu vulu okwaambidhidha uunamapangelo waJehova mokukala twa kakatela uudhiginini wetu nomoku mu longela twa mana mo. Ongiini ishewe tatu vulu okuulika kutya otatu ambidhidha uunamapangelo mboka? Omokuninga iinima momukalo moka Jehova a hala. Uuna tatu ungaunga niinima ngaashi Jehova a hala, otatu ulike kutya otu hole omukalo gwe gwokupangela notatu ka ambidhidha uunamapangelo we. —  Lesha Aaefeso 5:1, 2.

14. Ongiini aakuluntugongalo nomitse dhomagumbo taya vulu okuholela Jehova?

14 Ohatu ilongo mokukonakona kwetu Ombiimbeli kutya Jehova oha longitha oonkondopangelo dhe momukalo gwohole. Metsokumwe naashoka, omitse dhomagumbo naakuluntugongalo mboka ye hole uunamapangelo waJehova ihaya pangele aantu nonyanya ya fa taya longitha oonkondopangelo dhawo yene. Pehala lyaashono, ohaya holele Jehova. Paulus okwa li ha holele lela Kalunga nOmwana. (1 Kor. 11:1) Paulus ka li a sitha yalwe ohoni nenge e ya thiminike ya longe shoka shu uka. Pehala lyaashono okwe ya kumagidha. (Rom. 12:1; Ef. 4:1; Filem. 8-10) Ano Jehova osho hu ungaunga niinima ngawo. Ayehe mboka ye hole omukalo gwaJehova gwokupangela nohaya ambidhidha uunamapangelo we osho ye na okuninga.

15. Ohatu ambidhidha ngiini uunamapangelo waJehova, mokusimaneka mboka a pa oonkondopangelo?

15 Ohatu inyenge ngiini kwaamboka ya pewa oonkondopangelo kuKalunga? Uuna tatu longele kumwe nayo nesimaneko otatu ulike kutya  otatu ambidhidha uunamapangelo waJehova. Nokuli ngele itatu tsu kumwe naanaa netokolo lyontumba nenge kaatu li uvite ko, otatu ka kala twa hala okwaambidhidha omukalo moka Jehova ha ningi iinima. Shika osha yooloka ko lela komukalo guuyuni, ihe kohi yepangelo lyaJehova otwa tegelelwa tu yambidhidhe uunamapangelo we. (Ef. 5:22, 23; 6:1-3; Heb. 13:17) Otashi ke tu etela uuwanawa ngele tatu shi ningi, oshoka Kalunga ota ka kala e tu hokwa.

16. Aayambidhidhi yuunamapangelo waKalunga ohaya ningi ngiini omatokolo gawo?

16 Otatu vulu wo okuulika kutya otatu ambidhidha uunamapangelo waKalunga momatokolo getu ngoka tatu ningi. Jehova ina tula po oompango dhokondandalunde moshinima kehe. Pehala lyaashono, ohe tu lombwele nkene ha dhiladhila. Pashiholelwa, ina tula po omusholondondo gwankene Aakriste ye na okuzala. Pehala lyaashono, okwe tu lombwela kutya Aakriste otu na okuzala oonguwo dhi shi okutalwa nodha yogoka. (1 Tim. 2:9, 10) Okwa hala wo tu kale hatu ningi omatokolo ngoka itaaga pundukitha nenge itaaga piyaganeke yalwe. (1 Kor. 10:31-33) Uuna tatu ningi omatokolo, naga kale ga kankamena kwaashoka Jehova ta dhiladhila, nokungawo otatu ku ulika kutya otu hole omukalo gwe gwokupangela nohatu gu ambidhidha.

Ambidhidha uunamapangelo waKalunga uuna to ningi omatokolo nomomaipyakidhilo guukwanegumbo (Tala okatendo 16-18)

17, 18. Omomikalo dhimwe dhini aaihokani taya vulu okuulika kutya otaya ambidhidha uunamapangelo waJehova?

17 Dhiladhila kunkene aaihokani Aakriste taya vulu okwaambidhidha uunamapangelo waJehova. Ongiini ngele ondjokana oyi na omaupyakadhi ogendji ngoka ga li inaaga tegelelwa, tashi vulika nokuli ga kwata miiti? Omolwashike itaamu dhiladhila kunkene Jehova a li u ungaunga noshigwana shaIsraeli shonale. Okwa li i ipopi mwene kutya okwa li a fa omusamane gwasho. (Jes. 54:5; 62:4) “Ondjokana” ya tya ngawo kaya li tuu ondhigu! Ihe nonando ongawo, Jehova ka li a sholola. Okwa li e shi sile ohenda lwiikando nokwa li a dhiginine ehangano lye nasho. (Lesha Episalomi 106:43-45.) Mbela inatu hililwa kuJehova kohole ya tya ngawo?

18 Aaihokani mboka ye hole uunamapangelo waJehova ohaye mu holele. Ihaya kambadhala okuhulitha po ondjokana yawo momukalo itaagu popilwa komanyolo. Oye shi kutya Jehova oye e ya tula kumwe noye shi kutya okwa hala ya kale ya ‘hangana.’ Oluhondelo olwo owala etompelo limwe lyopamanyolo tali mangulula omuntu a kale ta vulu ishewe okuya mondjokana. (Mat. 19:5, 6, 9) Uuna aaihokani taya ningi kehe shoka taya vulu okuhwepopaleka ondjokana yawo, kungawo otaya ambidhidha uunamapangelo waJehova.

19. Ngele twa ningi epuko li na ko nasha nokwaambidhidha uunamapangelo waKalunga, oshike tu na okuninga?

19 Molwaashoka inatu gwanenena, omathimbo nomathimbo ohatu ningi iinima mbyoka tayi yemateke Jehova. Jehova oha kala e shi shi nokwe tu ningila po esiloshimpwiyu lyopahole okupitila mekuliloyambo lyaKristus. Onkee ano, ngele twa ningi epuko lyasha, otu na okupula Jehova e tu dhimine po. (1 Joh. 2:1, 2) Pehala lyokwiiyukipalitha tse yene, otu na okuninga oonkambadhala tu ilonge sha momapuko getu. Ngele otwa kala popepi naJehova, ote tu dhimine po note tu kwathele tu pondole notu ungaunge nawa noonkalo dha fa mpono monakuyiwa. —  Eps. 103:3.

20. Omolwashike tu na okwaambidhidha uunamapangelo waJehova ngashingeyi?

20 Muuyuni uupe, aantu ayehe otaya ka kala kohi yuunamapangelo waJehova, notaye ki ilonga oondjila dhe dhuuyuuki. (Jes. 11:9) Ihe nongashingeyi tse otatu mono mo oshindji melongo ndyoka. Masiku ompata yi na ko nasha nuunamapangelo waJehova otayi ka kandulwa po. Ngashingeyi olyo ethimbo lyokwaambidhidha uunamapangelo waKalunga okupitila muudhiginini wetu, miilonga yetu nomokuninga oonkambadhala twa mana mo, opo tu mu holele mukehe shimwe tatu ningi.