Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Septemba 2016

Mona uuwanawa mewiliko lyaJehova kunena

Mona uuwanawa mewiliko lyaJehova kunena

ONDA NINGI EHOGOLOLO LYOMONDJILA SHO NDI LI MOPOLANDA

OMUMWAMEME gumwe okwa ti: “Onda li ndi na omimvo 15 sho nda ninginithwa, nokonima yoomwedhi hamano onda kutha uukwathelikokolindjila. Sho nda mana osikola, onda pula ndi ka longe mpoka pu na ompumbwe onene yaauvithi yUukwaniilwa. Onda li nda hala okuya kokule nondoolopa yetu nosho wo nakuku ngoka nda li handi kala naye, ngoka kee shi Onzapo yaJehova. Onda li ndu uvu nayi, sho omutonatelishikandjo a lombwele ndje kutya oshitopolwa shoka tandi ka longa oshi li mondoolopa moka nda valelwa. Onda kambadhala kaandi mu hololele nkene nda li ndu uvite. Onda zi po nda sizimana, nonda ka dhiladhila kombinga yaashoka a popi. Onda lombwele kuume kandje ngoka hatu longo naye muukalele nda ti: ‘Ondi wete kutya otandi ihumbata nda fa Jona. Ihe pehulilo Jona okwa ka ya kuNinive. Onkee ano, nangame ondi na oku ka longa hoka nda tuminwa.’”

“Ngashingeyi onda kala te kokola ondjila uule womimvo ne mondoolopa yetu, nondi wete nkene shi li pandunge okulandula omalombwelo ngoka nda pewa. Etaloko lyandje ewinayi olyo lya li uupyakadhi uunene. Ngashingeyi onda nyanyukwa noonkondo. Momwedhi gumwe onda li nda vulu okuninga omakonakonombiimbeli 24. Kekwatho lyaJehova, onda tameke nokuli okukonakona nakuku, ngoka a li ha pataneke ndje nale.”

OSHIZEMO SHINYANYUDHA MOFIJI

Omukulukadhi gumwe ha konakona Ombiimbeli moFiji okwa li e na okuhogolola pokati kokuya koshigongi shoshitopolwa nokuya nomusamane gwe koshituthi shevalo lyomukwanezimo. Omusamane gwe okwe mu pitike a ye koshigongi. Omukulukadhi okwa lombwele omusamane kutya konima yoshigongi ote ke ya koshituthi. Sho a galuka koshigongi, okwa li e wete kutya oshihwepo a yande onkalo ndjoka tayi vulu okutula uupambepo we moshiponga, onkene okwa tokola kaa ye ko.

Omusamane manga e li koshituthi okwa lombwele aakwanezimo ye kutya omukadhi ote ke ya konima ngele a zi koshigongi shawo shOonzapo. Aakwanezimo oya yamukula ya ti: “Aaye, ngoka ite ya po mpaka, oshoka Oonzapo dhaJehova ihadhi dhana omavalo.” *

Oshizemo osha li shini? Omusamane okwa li u uvite uuntsa nuunambano sho omukadhi a kala metsokumwe naashoka i itaala noneiyuvo lye. Uudhiginini we, owe mu pe ompito a vule okuuvithila omusamane gwe nosho wo yalwe. Oshizemo? Omusamane gwe okwa taamba ko ekonakonombiimbeli nokwa tameke okukala ha yi pamwe naye kokugongala.

^ okat. 7 Tala oshitopolwa “Omapulo ga za kaaleshi,” shi li mOshungolangelo yOshiingilisa yo 15 Desemba 2001.