Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Septemba 2016

“Ino etha, omaako goye ga yululuke!”

“Ino etha, omaako goye ga yululuke!”

“Ino etha, omaako goye ga yululuke!” — SEF. 3:16.

OMAIMBILO: 81, 32

1, 2. (a) Omaupyakadhi geni oyendji ya taalela kunena, noshizemo oshini? (b) Etegameno lini lya popiwa muJesaja 41:10, 13?

OMUMWAMEME ngoka a hokanwa komululuntugongalo noku li omukokolindjila gwondjigilile, okwa ti: “Nonando onda kala nda dhiginina elandulathano ewanawa lyokuninga iinima yopambepo, onda kala ndi na uupyakadhi wokukala ndi na oshimpwiyu sha pitilila uule womimvo odhindji. Shika osha ningitha ndje ndaa kothe we nawa, osha gumu uukolele wandje, omukalo moka handi ungaunga nayalwe nosha ningitha ndje ndi kale nda teka omukumo nonda hala okufumvama mevi.”

2 Mbela oto vulu ngaa okuuva ko nkene omumwameme ngoka u uvite? Shi nikitha oluhodhi, muuyuni mbuka waSatana wa kolokosha, onkalamwenyo oyi na omaupyakadhi ogendji, ngoka taga vulu okuningitha omuntu a kale e na iimpwiyu nokukale u uvite a thindilwa pevi. Shoka otashi vulu okukala sha fa ohangela ya kwata ombautu, opo kaayi ye komeho. (Omayel. 12:25) Oshike tashi vulu oku ku ningitha wu kale wu uvite ngawo? Otashi vulika wa silwa omuntu ngoka wu hole, wu na uuwehame wa kwata miiti, to kambadhala okusila aanegumbo yoye oshimpwiyu methimbo ndika lyuuhupilo tawu nyangwanyangwa nenge wa taalela omapataneko. Iinima mbyoka ngele oye ku gwilile po, otayi vulu yi ku tone oonkondo nowu kanithe enyanyu. Ihe oto vulu  okukala nuushili kutya Kalunga okwiilongekidha oku ku kwathela. — Lesha Jesaja 41:10, 13.

3, 4. (a) Oshitya “omaako” shoka sha longithwa mOmbiimbeli otashi ulike kushike? (b) Oshike tashi vulu okuningitha omaako getu ga yululuke?

3 Ombiimbeli oya longitha olundji iilyo yolutu, tayi ulike komaukwatya nenge kiilonga ya yoolokathana. Pashiholelwa, omaako oga popiwa mo iikando oyindji. Okunkondopaleka omaako gagumwe otashi ulike koku mu tsa omukumo, koku mu nkondopaleka nokoku mu ladhipika a ninge sha. (1 Sam. 23:16; Esra 1:6) Otashi ulike wo kokukala wu na etaloko ewanawa netegameno lyonakuyiwa.

4 Okweetha omaako gopathaneko ga yululuke ohashi longithwa shi ulike komuntu ngoka a teka omukumo, a tyololoka nenge kee na etegameno. (2 Ondjal. 15:7; Heb. 12:12) Olundji omuntu ngoka e li monkalo ndjoka oha teka omukumo. Ngele owa taalela oonkalo ndhoka tadhi ku etele omaipulo nenge tadhi ku ningitha wu kale wu uvite wa thindilwa pevi palutu, pamaiyuvo nenge nokuli pambepo, ongiini to vulu okumona etsomukumo ndyoka wa pumbwa? Oshike tashi vulu oku ku kwathela wu idhidhimike nowu kale wa nyanyukwa?

‘JEHOVA ITA NYENGWA OKU MU HUPITHA’

5. (a) Uuna pwa holoka uupyakadhi, oshike tashi vulika tu ninge, ihe oshike tu na okukaleka momadhiladhilo? (b) Oshike tatu ka kundathana?

5 Lesha Sefania 3:16, 17. Pehala lyokwiigandja kuumbanda nokukala twa teka omukumo, shoka sha fa tatu etha omaako getu ga yululuke, otwa hiwa komusilishimpwiyu gwetu, Tate yetu Jehova, tu ‘mu tsike iimpwiyu yetu ayihe.’ (1 Pet. 5:7) Otatu vulu okukaleka momadhiladhilo shoka Kalunga a lombwela Aaisraeli, kutya ‘ita nyengwa okuhupitha’ aapiya ye aadhiginini. (Jes. 59:1) Otatu ka kundathana iiholelwa itatu mOmbiimbeli mbyoka tayi ulike kutya Jehova okwa hala okunkondopaleka aantu ye ya longe ehalo lye nota vulu oku shi ninga, nonando oye li monkalo moka ya fa itaaya vulu okuza mo. Tala nkene iiholelwa mbika tayi vulu oku ku tunga.

6, 7. Oshike sha simana tatu vulu okwiilonga mesindano lyAaisraeli sho ya sindi Aayamaleki?

6 Nziya konima sho Aaisraeli ya mangululwa muupika waEgipiti pashikumithalonga, oya ponokelwa kAayamaleki. Josua okwa landula omalombwelo ngoka a pewa kuMoses, e ta kwatele Aaisraeli komeho molugodhi. Pethimbo opo tuu mpoka, Moses, Aaron naHur oya yi koshikulundundu shi li popepi, hoka taya vulu okumona nawa olugodhi. Mbela aalumentu mbaka yatatu oya li taya fadhuka po olugodhi omolwuumbanda? Hasho nando!

7 Moses okwa tula miilonga ompangela ndjoka ye ya kwathele ya sindane. Okwa kala a yelutha ondhimbo ndjoka Kalunga e mu lombwele e yi humbate. Sho Moses a ningi ngawo, Jehova okwa nkondopaleke Aaisraeli ya sinde Aayamaleki molugodhi. Sho omaako gaMoses ga dhigupala e taga tameke okuyululuka, Aayamaleki oya tameke oku shi enditha nawa molugodhi. Aaron naHur oya tokola ya ‘kuthe emanya e taye mu kuutumbike ko, manga yo ya thikama kombinga nombinga ya yelutha omaako ge noye ga yelutha sigo etango tali ningine.’ Kungawo, oshikaha shaKalunga oshinankondo, osha kwathele Aaisraeli ya sindane molugodhi. — Eks. 17:8-13.

8. (a) Asa okwi inyenge ngiini sho Aaetiopia ya li taya ponokele Juda? (b) Ongiini tatu vulu okuholela omukalo moka Asa a kala i inekela muKalunga?

8 Pethimbo lyOmukwaniilwa Asa, Jehova okwa li wo u ulike kutya ina nyengwa okuhupitha oshigwana she. MOmbiimbeli omwa tumbulwa omalugodhi ogendji, ihe etangakwiita lyaSera, Omuetiopia, olyo lya li enene lya shiga ko. Okwa li e na aakwiita 1 000 000 ya pyokoka. Etangakwiita lyaAsa olya li li vulike konyala lwaali ketangakwiita lyAaetiopia. Otashi vulika wu dhiladhile kutya osha li tashi ka kala oshipu kuAsa a tameke okwiipula unene, a kale a tila nokweetha omaako ge ga yululuke kee ya  kondjithe. Pehala lyaashono, Asa okwa pula ekwatho kuJehova nziya. Pakutala kiita mbyoka, Aaetiopia oya li taya monika ya fa itaaya vulu okusindika, ihe “Kalunga iha nyengwa kusha.” (Mat. 19:26) Kalunga okwa li a holola oonkondo dhe oonene ‘nokwa dhenge etangakwiita lyAasudani, ndyoka lya li lya homonwa kuAsa’ ngoka ‘a kala i itula mOmuwa nuudhiginini okukala kwe akuhe.’ — 2 Ondjal. 14:8-13; 1 Aak. 15:14.

9. (a) Oshike shoka inaashi imba Nehemia a tungulule omadhingililokuma gaJerusalem? (b) Kalunga okwa li a yamukula ngiini egalikano lyaNehemia?

9 Dhiladhila nkene Nehemia tashi vulika a li u uvite sho a yi kuJerusalem. Oshilando kasha li sha gamenwa nAajuda ooyakwawo oya li ya teka omukumo noonkondo. Omathiminiko okuziilila kaapataneki aakwiilongo oga ningitha Aajuda ya teke omukumo, opo kaaya tungulule omadhingililokuma gaJerusalem. Mbela Nehemia okwe etha onkalo ndjoka yi yululukithe omaako ge, ano a teke omukumo naye? Aawe! Nehemia okwa adhika nale i inekela muJehova nokwa kala he mu galikana, ngaashi owala Moses, Asa nosho wo aapiya yalwe yaJehova aadhiginini. Nopethimbo ndika okwa li a ningi sha faathana. Okutala koonkalo oondhigu ndhoka Aajuda ya li ye wete ya fa itaaya vulu okuza mo, Jehova okwa li a yamukula Nehemia, sho e mu pula ekwatho. Kalunga okwa li a longitha ‘oonkondo dhe oonene’ ‘noshikaha she sha kola,’ a nkondopaleke omaako gAajuda ngoka ga li ga yululuka. (Lesha Nehemia 1:10, (OB-1954); 2:17-20; 6:9.) Mbela owi itaala ngaa kutya Jehova oha longitha ‘oonkondo dhe oonene’ ‘noshikaha she sha kola,’ a nkondopaleke aapiya ye kunena?

JEHOVA OTA KA NKONDOPALEKA OMAAKO GOYE

10, 11. (a) Satana oha kambadhala ngiini okuningitha omaako getu ga yululuke? (b) Jehova oha longitha shike, opo e tu nkondopaleke? (c) Owa mona mo uuwanawa wuni melongo nomedheulo lyopakalunga?

10 Otatu vulu okukala nuushili kutya Ondiyapoli kayi na siku yi ethe omaako gayo ga yululuke, opo ando kaayi kambadhale okukeelela iilonga yetu yopaKriste. Ohayi longitha iifundja nomapataneko okuziilila komapangelo, kaawiliki yomalongelokalunga nokaashunimonima. Elalakano lyayo olini? Olyo oku tu ningitha tu teke omukumo miilonga yokuuvitha onkundana ombwanawa yUukwaniilwa. Nonando ongawo, Jehova ota vulu nokwa hala oku tu nkondopaleka nombepo ye ondjapuki. (1 Ondjal. 29:12) Osha simana okukala tu na ombepo ndjoka, opo tu vule okutaalela eshongo kehe ndyoka Satana nuuyuni we wa kolokosha tawu tu etele. (Eps. 18:39; 1 Kor. 10:13) Shimwe ishewe, otatu vulu okukala nolupandu, sho tu na Oohapu dhaKalunga ndhoka dha nyolithwa kombepo ondjapuki. Dhiladhila wo kiikulya yopambepo mbyoka hatu pewa omwedhi kehe ya kankamena kOmbiimbeli. Oohapu ndhoka dhi li muSakaria 8:9, 13 (lesha) odha li dha popiwa manga otempeli muJerusalem ya li tayi tungululwa, noohapu ndhoka odhe tu opalela noonkondo.

11 Ohatu nkondopalekwa wo kelongo lyopakalunga ndyoka hatu pewa pokugongala kwetu kwopaKriste, piigongi nopoosikola dhetu dhokudheula aauvithi. Edheulo ndyoka ohali tu kwathele tu kale tu na omukumo, twi itulile po omalalakano gopambepo notu gwanithe po iinakugwanithwa yetu yopaKriste. (Eps. 119:32) Mbela oho kambadhala ngaa wa mana mo, opo wu mone uuwanawa melongo lyoludhi ndoka?

12. Oshike tu na okuninga, opo tu kale twa kola pambepo?

12 Jehova okwa li a kwathele Aaisraeli ya sinde Aayamaleki nAaetiopia. Okwa li wo a pe Nehemia naatungi pamwe naye oonkondo, opo ya mane iilonga yokutungulula. Sha faathana, Kalunga ote ke tu nkondopaleka tu vule okukondjitha omapataneko, okwaanakonasha kwaantu muukalele nosho wo omaipulo, opo tu vule okutsikila niilonga yetu yokuuvitha. (1 Pet. 5:10) Inatu tegelela Jehova e tu longele iikumithalonga. Pehala lyaashono, natu longe  ngaashi tatu vulu tu kale hatu lesha Oohapu dhaKalunga esiku kehe, hatu ilongekidhile okugongala nokukala puko oshiwike kehe. Natu kale hatu konakona Ombiimbeli paumwene, hatu ningi elongelokalunga lyuukwanegumbo nokukala aluhe hatu galikana Jehova. Inatu etha nando omalalakano galwe nenge sha shilwe shi ye moshipala omikalo ndhoka Jehova ha longitha, opo e tu nkondopaleke noku tu ladhipike. Ngele owa mono kutya omaako goye oga yululuka mudhimwe dhomomikalo ndhika, pula Jehova e ku kwathele. Opo nduno tala nkene ombepo ye ‘ta yi longo mungoye yi ku pe ehalo noonkondo, opo mu tsakanithe elalakano lye ewanawa.’ (Fil. 2:13) Oshike to vulu okuninga wu nkondopaleke omaako gayalwe?

NKONDOPALEKA OMAAKO NGOKA GA VULWA

13, 14. (a) Omumwatate gumwe okwa li a tsuwa omukumo ngiini konima sho a silwa omukulukadhi gwe? (b) Omomikalo dhini tatu vulu okukwathela yalwe?

13 Jehova okwe tu pa aamwatate naamwameme muuyuni awuhe, mboka taya vulu oku tu ladhipika. Dhimbulukwa kutya omuyapostoli Paulus okwa nyola a ti: “Yelutheni ano omaako geni ga vulwa ne mu koleke oongolo dheni dha loloka. Tsikileni okweenda moondjila dhu ukilila.” (Heb. 12:12, 13) Methelemumvo lyotango, oyendji oya li ya kolekwa pambepo, nokunena osho shi li ngawo. Konima sho omumwatate gumwe a silwa omukulukadhi gwe, e ta taalele oonkalo dhilwe oondhigu, okwa ti: “Ondi ilonga kutya itatu vulu okuhogolola omamakelo getu, ethimbo ndyoka ge na oku tu adha nenge kutya naga kale ge thike peni. Egalikano nekonakonombiimbeli lyopaumwene oya kwathela ndje, ngaashi owala okandjatha kokukaama kombanda yomeya haka kwathele omuntu kaa ningine kohi yomeya. Ekwatho ndyoka nda pewa kaamwatate naamwameme olya hekeleka ndje noonkondo. Onda mona kutya osha simana okukokeka ekwatathano ewanawa naJehova, manga inaapu holoka oonkalo oondhigu.”

Kehe gumwe megongalo ota vulu okuladhipika yalwe (Tala okatendo 14)

14 Aaron naHur oya li ya ambidhidha lelalela omaako gaMoses pethimbo lyolugodhi. Natse otu na okukonga omikalo moka tatu vulu okwaambidhidha nokugandja ekwatho li na oshilonga kuyalwe. Oolye mbela tatu vulu okukwatha? Oomboka taya kondjo nuukulupe, nuukolele, taya patanekwa kuyaandjawo, yu uvite uuwike nenge ya silwa. Otatu vulu wo okukwathela aagundjuka mboka taya thiminikwa ya ninge iinima ya puka nenge ya konge “esimano” muuyuni mbuka, kutya nduno omelongo, opashimaliwa nenge omiilonga yontumba. (1 Tes. 3:1-3; 5:11, 14) Konga omikalo moka to vulu okuulukila yalwe kutya owu na ko nasha nayo, uuna mu li pOshinyanga shUukwaniilwa, tamu uvitha, tamu li pamwe nenge tamu popi mongodhi.

15. Oohapu dhoye oombwanawa otadhi vulu ngiini okuguma Aakriste ooyakweni?

15 Konima sho Asa a sindana, omuhunganeki Azaria okwe mu ladhipike pamwe naantu ye noohapu ndhika: “Ikoleleleni ne inamu tyololoka nando. Iilonga mbyoka tamu longo, oyi na ondjambi.” (2 Ondjal. 15:7) Shika oshi inyengitha Asa a ninge omalunduluko ogendji, opo a tamukulule elongelokalunga lyashili. Momukalo gwa faathana, oohapu dhoye oombwanawa otadhi vulu okuguma yalwe noonkondo. Kungawo, oto vulu oku ya kwathela ya longele Jehova ya mana mo. (Omayel. 15:23) Uuna wu li pokugongala, kala wu shi kutya oto vulu okukwathela yalwe mokugandja etyokosha tali tungu.

16. Ngaashi Nehemia, ongiini aakuluntugongalo taya vulu okunkondopaleka omaako gaantu megongalo? Gandja oshiholelwa shankene aamwatate naamwameme ye ku kwathela paumwene.

16 Kekwatho lyaJehova, omaako gaNehemia nogaalongi pamwe naye oga li ga nkondopalekwa, opo ya vule okutungulula edhingililokuma lyaJerusalem. Kungawo, oya li ye li mana muule owala womasiku 52. (Neh. 2:18; 6:15, 16) Nehemia ka li owala omutonateli gwiilonga, ihe naye okwa li a kutha ombinga mokutungulula  edhingililokuma lyaJerusalem. (Neh. 5:16) Sha faathana, aakuluntugongalo oyendji oya vula okuholela Nehemia mokukwathela miilonga yokutunga, mokwoopaleka nomokukaleka po Iinyangwa yUukwaniilwa yomoshitopolwa. Ohaya kwathele wo mboka omaako gawo ga loloka noya tyololoka, uuna taya longo pamwe nayo muukalele nuuna taya ningi etalelopo lyuusita.— Lesha Jesaja 35:3, 4.

“INO ETHA, OMAAKO GOYE GA YULULUKE!”

17, 18. Oshike wu na okukaleka momadhiladhilo, uuna wa taalela uupyakadhi nenge to ipula unene?

17 Okulonga pamwe naamwatate naamwameme ohaku humitha komeho uukumwe. Ohaku tu kwathele wo tu pange uukuume tawu kalelele nokukala tu na einekelo lya kola momalaleko nuuyamba, ngoka twa tegelela tu ka mone kohi yUukwaniilwa waKalunga. Sho tatu koleke omaako gayalwe, otatu ya kwathele ya kondjithe oonkalo ndhoka tadhi ya ningitha ya teke omukumo. Otatu ya kwathele wo ya kale ye na etaloko ewanawa netegameno lyonakuyiwa. Shimwe ishewe, okuningila yalwe ngawo otashi tu kwathele tu kale twa tonata pambepo notu kale tu uvite lela kutya shoka Jehova e tu uvanekela otashi ka gwanithwa po shili. Kungawo, ohashi nkondopaleke wo omaako getu.

18 Okumona nkene Jehova a li a gamene nokwaambidhidha aapiya ye aadhiginini monakuziwa, ohashi koleke eitaalo lyetu neinekelo lyetu muye kunena. Onkee ano, uuna wa taalela omathiminiko nomaupyakadhi “ino etha, omaako goye ga yululuke!” Pehala lyaashono, galikana Jehova e to etha a nkondopaleke omaako goye noku ku kwathele wu ka mone omalaleko nuuyamba gUukwaniilwa. — Eps. 73:23, 24.