Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2017

Ino etha ohole yoye yi huhwe

Ino etha ohole yoye yi huhwe

“Uulunde otau ka lunda pombanda, nohole yoyendji otayi huhwa.” —  MAT. 24:12.

OMAIMBILO: 60, 135

1, 2. (a) Oohapu dhaJesus ndhoka dha popiwa muMateus 24:12 tango odha li tadhi popi kombinga yoolye? (b) Embo lyIilonga olyu ulike ngiini kutya Aakriste oyendji yonale oya li hayu ulike ohole? (Tala kethano lyopetameko.)

OMBINGA yimwe yendhindhiliko ndyoka lya gandjwa kuJesus yi na ko nasha ‘nehulilo lyuuyuni,’ oyo kutya ‘ohole yoyendji otayi ka huhwa.’ (Mat. 24:3, 12) Methelemimvo lyotango, Aajuda mboka ya li yi iti oshigwana shaKalunga, oye etha ohole yawo yokuhola Kalunga yi huhwe.

2 Mepingathano naashono, Aakriste oyendji yopethimbo ndyono oya li yi ipyakidhila “okuuvitha elaka etoye ndyoka tali ti kutya Jesus oye Kristus.” Oya li yu ulike ohole yokuhola Kalunga, yokuhola Aakriste ooyakwawo nosho wo mboka kaaye shi ooitaali. (Iil. 2:44-47; 5:42) Nonando ongaaka, aalanduli yaJesus yamwe yomethelemimvo lyotango oya li ye etha ohole yawo yi huhwe.

3. Oshike tashi vulika osho sha li sha huhwitha ohole yAakriste yamwe?

3 Jesus Kristus omuyumudhwa sho a li ta popi kombinga yAakriste yomuEfeso yomethelemimvo lyotango okwa ti: “Ondi na oohapu nangoye: sho waa hole ndje we ngaashi wa li petameko.” (Eh. 2:4) Mbela oshike tashi vulika sha li she ya ningitha ya kale kaaye hole we Jesus? Otashi vulika aalongwa mbano yaKristus yonale ya li ya nwethwa mo komadhiladhilo guuyuni. (Ef. 2:2, 3) Ngaashi iilando oyindji kunena, oshilando Efeso shomethelemimvo lyotango  osha li oshiyamba noonkondo, naantu yamo oya li ye na olwiho oluwinayi. Aantu yomoshilando moka oya li wo haya gandja unene eitulomo kiinima yondilo, komainyanyudho nokonkalamwenyo yuuzeko. Oya li yi ihole yo yene pehala lyokukala ye hole Kalunga naantu ooyakwawo. Oshikwawo, eihumbato ewinayi noluhondelo oya li ya vuka moshilando moka.

4. (a) Omomikalo dhini ohole ya huhwa kunena? (b) Omiinima itatu yini ohole yetu tayi vulu okumakelwa?

4 Ehunganeko lyaJesus ndyoka tali popi ohole tayi talala, otali gwanithwa sigo okunena. Aantu kunena kaye na nando ohole yokuhola Kalunga. Aantu omamiliyona oya pilamena Kalunga nohaya ka pula omahangano gopantu ogo ge ya kandulile po omaupyakadhi. Onkee ano, aantu mboka ihaaya longele Jehova Kalunga, ohole yawo otayi tsikile nokuhuhwa. Niishewe, ngaashi ohole yomegongalo lyomethelemimvo lyotango muEfeso ya li ya talala, Aakriste yashili yokunena nayo otaya vulu okweetha ohole yawo yi talale. Ngashingeyi otatu ka kundathana iinima itatu moka ohole yetu tayi vulu okumakelwa: (1) Ohole yokuhola Jehova, (2) ohole yokuhola oshili yOmbiimbeli nosho wo (3) ohole yokuhola aamwatate.

OHOLE YOKUHOLA JEHOVA

5. Omolwashike tu na okukala tu hole Kalunga?

5 Nale mesiku omo tuu moka Jesus a li a londodha aantu shi na ko nasha nohole tayi huhwa, okwa li a tsu omuthindo ohole ya simanenena a ti: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango.” (Mat. 22:37, 38) Odhoshili kutya okukala nohole ya kola yokuhola Kalunga otaku tu kwathele tu vulike kiipango yaJehova, tu idhidhimike notu tonde shoka oshiwinayi. (Lesha Episalomi 97:10.) Ihe Satana nuuyuni we otaya kambadhala okunkundipaleka ohole yetu yokuhola Kalunga.

6. Oshike sha ningilwa aantu mboka kaaye na ohole yokuhola Kalunga?

6 Muuyuni muka tu li omu na aantu ye na etaloko lya puka li na ko nasha nohole. Ombiimbeli oya ti: “Aantu otaa ka kala nokwiihola” pehala lyokukala ye hole Omushiti gwawo. (2 Tim. 3:2) Uuyuni mbuka tawu pangelwa kuSatana otawu humitha komeho “uuhalu wopantu okuhola mbyoka aantu taye yi tala notaye yi itangele.” (1 Joh. 2:16) Omuyapostoli Paulus okwa li a londodha Aakriste ooyakwawo shi na ko nasha nokunyanyudha omahalo gawo gopanyama a ti: ‘Okukala pamadhiladhilo guuntu otashi eta eso. Omuntu ngoka e na omadhiladhilo taga wilikwa kuuntu, oku tonde Kalunga.’ (Rom. 8:6, 7) Mboka taya longitha onkalamwenyo yawo mokulalakanena iinima yopamaliko nenge muuhalu wopamilalo, oye ki iyadha ya yemata noyu uvite nayi noonkondo. —  1 Kor. 6:18; 1 Tim. 6:9, 10.

7. Aalanduli yaKristus oya taalelwa komashongo geni kunena?

7 Miilongo yimwe, mboka yi itaala kutya Kalunga ita vulu okutseyika, mboka yi itaala kutya ke ko naamboka yi itaala moevolusi, ohaya humitha komeho omadhiladhilo ngoka taga vulu okuyona po ohole yokuhola Kalunga nokuningitha aantu ya kale inaayi itaala muye. Oyi itaalitha aantu oyendji kutya, omuntu owala ngoka egoya nenge kee na oondunge ta vulu okwiitala mOmushiti. Aantu oyendji oya simaneka aanongononi pehala lyokusimaneka Omushiti. (Rom. 1:25) Ngele otwa kala tatu pulakene komalongo ga tya ngaaka, otatu vulu okuthiga po Jehova, nohole yetu otayi vulu okuhuhwa. —  Heb. 3:12.

8. (a) Aapiya yaJehova oyendji oya taalela oonkalo dhini tadhi teya omukumo? (b) Eshilipaleko lini tatu adha mEpisalomi 136?

8 Okukala tatu gandja eitulomo kiinima mbyoka tayi tu teya omukumo, otaku vulu okunkundipaleka eitaalo lyetu nokuhuhwitha ohole yetu yokuhola Kalunga. Molwaashoka otu li muuyuni uuwinayi waSatana, atuheni omathimbo gamwe ohatu adhika koonkalo  ndhoka tadhi tu teya omukumo. (1 Joh. 5:19) Otashi vulika mongashingeyi tu kale twa taalelwa komaupyakadhi ngoka ge etithwa kuukulupe, kokwaanuukolele nenge komathiminiko gopamahupilo. Nenge tashi vulika tu kale tu uvite nayi, molwaashoka itaatu vulu okuninga iinima yontumba ngaashi twa li twa hala oku yi ninga. Ihe nonando ongawo, katu na nando okweetha oonkalo ndhoka nenge omadhiladhilo ngoka ge tu itaalithe kutya Jehova okwe tu thiga po. Pehala lyaashono, otu na okukala tatu tedhatedha koohapu ndhoka tadhi tu ladhipike kutya esilohenda lyaJehova otali kala aluhe. Oohapu ndhoka otatu dhi adha mEpisalomi 136:23 ndyoka tali ti: “Oye ngoka e tu dhimbulukwa muudhigu wetu, oshoka esilohenda lye otali kala aluhe.” Eeno, esilohenda lyaJehova ohali kala sigo aluhe kaapiya ye. Onkee ano, otatu vulu okukala nuushili kutya Jehova ohu uvu ‘omagalikano getu’ nohe ga yamukula. —  Eps. 116:1; 136:24-26.

9. Oshike sha li sha nkondopaleke Paulus a kale e hole Kalunga?

9 Ngaashi omupisalomi, Paulus naye okwa li a nkondopalekwa kokudhiladhila kutya Jehova ote mu ambidhidha sigo aluhe. Paulus okwa nyola a ti: “Omuwa oye omukwathi gwandje, itandi tila sha. Omuntu ota ningi ndje shike?” (Heb. 13:6) Okwiinekela thiluthilu mesiloshimpwiyu lyaJehova lyopahole okwa li kwa kwathele Paulus u ungaunge nomaupyakadhi gonkalamwenyo. Ine etha nando oonkalo ndhoka dhi mu gwilile po ye a teke omukumo. Odhoshili kutya manga a li onkwatwa, okwa li a nyolele komagongalo oontumwafo odhindji tadhi ga ladhipike. (Ef. 4:1; Fil. 1:7; Filem. 1) Eeno, nokuli naasho oonkalo dha li dha kwata miiti kuye, okwa tsikile okukala e hole Jehova. Mbela oshike sha li she mu nkondopaleke a vule oku shi ninga? Okwa li a tsikile okwiinekela “Kalunga, ngoka kuye haku zi ekwatho alihe. Oye ngoka he tu kwatha muudhigu wetu auhe.” (2 Kor. 1:3, 4) Ongiini tatu vulu okulandula oshiholelwa shaPaulus nokukaleka ohole yetu yokuhola Jehova ya kola?

Ulukila Jehova ohole (Tala okatendo 10)

10. Ongiini tatu vulu okukaleka ohole yetu yokuhola Jehova ya kola?

10 Omukalo gumwe gwa simanenena tagu vulu okukaleka ohole yetu yokuhola Jehova ya kola ogwa popiwa kuPaulus. Okwa li a nyolele ooitaali ooyakwawo a ti: “Galikaneni aluhe.” Konima yethimbo okwa li e ya nyolele a ti: “Dhiginineni okugalikana.” (1 Tes. 5:17; Rom. 12:12) Okupopya naKalunga megalikano otaku tu kwathele tu kale tu na ekwatathano ewanawa naye. (Eps. 86:3) Uuna tatu kongo ompito ya gwana tu mu lombwele omadhiladhilo getu nomaiyuvo getu gomuule, otashi tu hedhitha popepi naTate yetu gwomegulu, ‘ngoka hu uvu omagalikano.’ (Eps. 65:2) Kakele kaashono, uuna twa mono kutya omagalikano getu okwe ga yamukula, ohole yetu yoku mu hola ohayi kolo. Ohatu mono kutya “Omuwa oku li popepi naayehe mboka taye mu ithana.” (Eps. 145:18) Okwiinekela mekwatho lyaJehova lyopahole otaku ke tu kwathela tu ungaunge nomamakelo ngoka taga ka makela eitaalo lyetu.

OHOLE YOKUHOLA OSHILI YOMBIIMBELI

11, 12. Ongiini tatu vulu okukokeka ohole yetu yokuhola oshili yOmbiimbeli?

11 Tu li Aakriste, otwa lenga notu hole oshili. Oshili ndjoka otayi adhika mOohapu dhaKalunga. Jesus okwa li a galikana kuHe a ti: “Oohapu dhoye odho oshili.” (Joh. 17:17) Onkee ano, ohole yokuhola oshili ohayi tamekele kokukala nontseyo yashili yOohapu dhaKalunga. (Kol. 1:10) Inatu pumbwa owala okukala tu na ontseyo yowala, ihe otwa pumbwa wo okutula miilongo shoka twi ilonga. Ndhindhilika nkene omunyoli gumwe gwEpisalomi 119 a nwethwa mo te tu kwathele tu uve ko kutya osha hala okutya shike okukala tu hole oshili yomOmbiimbeli. (Lesha Episalomi 119:97-100.) Mbela ohatu kongo ngaa ethimbo lyokudhiladhila shoka twa lesha mOmanyolo momukokomoko gwesiku? Uuna tatu dhiladhila kunkene tatu vulu okutula  miilonga oshili yOmbiimbeli monkalamwenyo yetu, otashi ke tu kwathela tu kale tu yi hole noonkondo.

12 Omupisalomi okwa tsikile ko a ti: “Oohapu dhoye oontoye ngiini kelaka lyandje! Odho oontoyelela dhi vule omagadhi goonyushi.” (Eps. 119:103) Sha faathana, natse otatu vulu okulya iikulya yopambepo ya kankamena kOmbiimbeli mbyoka hatu mono okuza kehangano lyaKalunga. Nongele otwa ningi ngawo otatu ka nyanyukilwa lela “oohapu dho opala” dhoshili notatu ka vula oku dhi longa yalwe. —  Omuuv. 12:10.

13. Oshike sha li sha kwathele Jeremia a kale e hole oshili yOmbiimbeli nosha li she mu gumu ngiini?

13 Omupolofeti Jeremia okwa li e hole oshili yOmbiimbeli. Ndhindhilika nkene Oohapu dhaKalunga dha li dha gumu omutima gwe, sho a ti: “Owa lombwele ndje, nonda pulakene ohapu kehe. Ngame ogwoye, Omuwa Omunankondoawike, nomolwashoka oohapu dhoye dhu udhitha omwenyo gwandje enyanyu nelago.” (Jer. 15:16) Jeremia okwa li pathaneko Oohapu dhaKalunga dhi na ondilo nokwa dhiladhila muule kombinga yadho. Momukalo gwa tya ngaaka okwa li a pandula nomutima aguhe sho e na uuthembahenda wokwiithanwa nedhina lyaKalunga. Mbela ohole yetu yokuhola oshili yOmbiimbeli itayi tu inyengitha tu mone kutya otu na uuthembahenda wa dhengambanda wokuhumbata edhina lyaKalunga, nokutseyithila aantu Uukwaniilwa we pethimbo ndika lyehulilo?

Ulika kutya owu hole oshili yOmbiimbeli (Tala okatendo 14)

14. Ongiini tatu vulu okukokeka ohole yetu yokuhola oshili yOmbiimbeli?

14 Kakele kokulesha Ombiimbeli niileshomwa yetu mbyoka ya kankamena kuyo, oshike iishewe tashi vulu okukokeka ohole yetu yokuhola oshili yOmbiimbeli? Otatu vulu wo okukokeka ohole yetu yokuhola oshili yOmbiimbeli mokukala hatu yi kokugongala aluhe. Okukonakona Ombiimbeli kwokoshiwike pamwe nOshungolangelo okwo omukalo gumwe gwa simanenena moka hatu longwa. Opo tu uve ko nawa oshitopolwa shoka tashi kundathanwa, otwa pumbwa okwiilongekidha nawa Oshungolangelo kehe yokukonakonwa. Omukalo gumwe moka tatu vulu oku shi ninga okulesha omanyolo agehe ngoka ga tothwa mo mOmbiimbeli. Kunena Oshungolangelo otayi vulu nokuli okutapwa kepandja lyetu lyokointaneta, jw.org nenge tayi vulu okwaadhika ko-JW Library momalaka ogendji. Iikwaeletronika yimwe ohayi tu kwathele tu mone mbala omanyolo ngoka ga tothwa mo moshitopolwa kehe shokukonakonwa. Kutya  nduno omukalo guni tatu longitha, okulesha omanyolo nuukeka nokutedhatedha kugo otashi ka kokeka ohole yetu yokuhola oshili yOmbiimbeli. —  Lesha Episalomi 1:2.

OHOLE YOKUHOLA AAMWATATE

15, 16. (a) Johannes 13:34, 35 okwa ti kutya otu na oshinakugwanithwa shini? (b) Ohole ndjoka tu hole nayo aamwatate oya faathana ngiini naandjoka tu hole nayo Kalunga nosho wo Ombiimbeli?

15 Jesus okwa lombwele aalongwa ye ongulohi ye yahugunina kombanda yevi a ti: “Oshipango oshipe otandi shi mu pe, mu holathane. Ngaashi naanaa nangame nda kala ndi mu hole, osho nane wo omu na okuholathana. Ngele omu holathane, nena aantu ayehe otaa ka dhimbulula kutya one aalongwa yandje.” —  Joh. 13:34, 35.

16 Ohole yokuhola aamwatate naamwameme oyi na ekwatathano nohole yokuhola Jehova. Onkee ano, itatu vulu kutya otu hole Kalunga tse tu tonde aantu ooyakwetu. Omuyapostoli Johannes okwa nyola a ti: “Ngele pe na ngoka ta ti kutya oku hole Kalunga, ihe oku tonde natango mukwawo, oye omufundja. Oshoka ita vulu okukala e hole Kalunga, ngoka kee mu wete, ngele kee hole omuntu mukwawo ngoka e mu wete.” (1 Joh. 4:20) Niishewe, ohole yetu yokuhola Jehova nosho wo aamwatate oya faathana nohole yokuhola Ombiimbeli. Omolwashike mbela? Omolwaashoka ohole yokuhola Ombiimbeli ohayi tu inyengitha tu vulike nomutima aguhe kwaashoka tatu lombwelwa momanyolo gomOmbiimbeli kutya natu kale tu hole Kalunga nosho wo aamwatate. —  1 Pet. 1:22; 1 Joh. 4:21.

Ulukila aamwatate naamwameme ohole (Tala okatendo 17)

17. Omomikalo dhimwe dhini tatu vulu okuulika ohole?

17 Lesha 1 Aatessalonika 4:9, 10. Omomikalo dhimwe dhini dhi na oshilonga tatu vulu okuulika ohole yetu megongalo? Omumwatate nenge omumwameme omukokele otashi vulika a kale a pumbwa osheenditho okuya kokugongala. Omuselekadhi otashi vulika a kale a pumbwa gumwe ngoka te mu kwathele okupangela iinima yontumba megumbo lye mbyoka ya teka. (Jak. 1:27) Aamwatate naamwameme mboka ya teka omukumo nenge ya polimana nenge mboka ya taalela oonkalo dhilwe oondhigu, otwa pumbwa oku ya tsa omukumo, oku ya hekeleka nokukala tu na ko nasha nayo. (Omayel. 12:25; Kol. 4:11) Ohatu ulike kutya otu hole shili aamwatate naamwameme moohapu nomiilonga “mboka tu li nayo meitaalo limwe.” —  Gal. 6:10.

18. Oshike tashi ke tu kwathela tu kandule po okwaauvathana hoka haku holoka pokati ketu nooyitaali ooyakwetu?

18 Ombiimbeli oya huganeka kutya ‘momasiku gahugunina,’ (NW) guuyuuni mbuka wa kolokosha aantu otaya ka kala yi ihole yo yene noye na olwiho. (2 Tim. 3:1, 2) Onkee ano, tu li Aakriste otwa pumbwa okulonga nuudhiginini tu kokeke ohole yetu yokuhola Kalunga, yokuhola oshili yOmbiimbeli noyokuhola aantu ooyakwetu. Odhoshili kutya poompito dhimwe otashi vulika pu holoke okwaauvathana pokati ketu nooitaali ooyakwetu. Ihe itashi kala tuu eyambeko kwaayehe megongalo uuna tatu inyengithwa kohole tu kandule po okwaauvathana momukalo gwopahole! (Ef. 4:32; Kol. 3:14) Onkee ano, inatu etha nando ohole yetu yi talale. Pehala lyaashono, natu tsikileni okukala tu hole Jehova, Oohapu dhe nooyitaali ooyakwetu.