Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2016

Oho ningi ngiini omatokolo gopaumwene?

Oho ningi ngiini omatokolo gopaumwene?

“Kambadhaleni okukonakona kutya Omuwa okwa hala, mu ninge shike.” — AAEFESO 5:17.

OMAIMBILO: 69, 57

1. Jehova okwe tu pa oompango dhini mOmbiimbeli, nomolwashike okuvulika kudho haku tu etele uuwanawa?

JEHOVA okwe tu pa oompango dhe mOmbiimbeli ndhoka hadhi tu lombwele shoka a hala tu ninge. Pashiholelwa, ohe tu lombwele kutya inatu simaneka iimenka, inatu yaka, inatu kolwa tse inatu hondela. (1 Aakorinto 6:9, 10) Jesus okwa li a pe aalanduli ye oshipango tashi ti: “Indeni ano, ka ningeni aantu ayehe aalongwa yandje, mu ya ninginithe medhina lyaHe nolyOmwana nolyombepo ondjapuki. Ne mu ya longe okudhiginina ayihe mbyoka nde yi mu lombwele. Ihe ngame otandi kala pamwe nane omasiku agehe sigo ehulilo lyuuyuni.” (Mateus 28:19, 20, NW) Kehe shimwe shoka Jehova naJesus taye tu lombwele tu ninge, otashi tu etele uuwanawa. Oompango dhaJehova ohadhi tu longo nkene tu na okwiisila oshimpwiyu nosho wo yaandjetu. Ohadhi tu kwathele tu kale tu na uukolele notwa nyanyukwa. Uuna tatu vulika koompango ndhoka, mwa kwatelwa oshipango shokuuvitha, Jehova oha kala e tu hokwa nohe tu laleke nuuyamba.

2, 3. (a) Omolwashike Ombiimbeli inaayi tu tulila po oompango moshinima kehe? (b) Omapulo geni tatu ka kundathana moshitopolwa shika? (Tala kethano lyopetameko.)

 2 Nonando mOmbiimbeli omu na oompango, ihayi tu pe oompango kombinga yaashoka tu na okuninga mokanima kehe. Pashiholelwa, Ombiimbeli inayi tu tulila po omalombwelo gokondandalunde kombinga yaashoka tu na okuzala. Shika otashi ulike kutya Jehova oku na uunongo. Nonando aantu muuyuni awuhe ohaya zala oonguwo dha yoolokathana nodhindji dhomudho ohadhi zi momoode, Ombiimbeli ihayi ngushuluka. Kayi na oompango odhindjidhindji kombinga yiilonga nenge yomainyanyudho ngoka tu na okuhogolola. Ihayi tu lombwele wo kutya oshike tu na okuninga, opo tu kale tu na uukolele. Jehova okwe etha aantu yo yene nosho wo omitse dhomagumbo odho dhi ninge omatokolo miinima mbyoka.

3 Uuna tu na okuninga omatokolo ga simana ngoka taga ka guma onkalamwenyo yetu, ihe kapu na ompango yokondandalunde tayi popi kombinga yaashoka tu na okuninga, natu ipule ngeyi: ‘Mbela Jehova oku na ko nasha netokolo ndyoka tandi ningi? Mbela ota ka kala a hokwa etokolo kehe tandi ningi, shampa owala itaandi teya oompango dhOmbiimbeli? Ongiini tandi vulu okushilipaleka kutya Jehova ota ka kala a hokwa omatokolo ngoka tandi ningi?’

OMATOKOLO GETU OHAGE TU GUMU NOHAGA GUMU WO YALWE

4, 5. Omatokolo getu ohage tu gumu ngiini nosho wo yalwe?

4 Aantu yamwe oyu uvite kutya otaya vulu okuninga kehe shoka ya hala okuninga. Ihe tse otwa hala okuninga shoka tashi nyanyudha Jehova. Onkee ano, manga inaatu ninga etokolo, otwa pumbwa okudhiladhila kwaashoka Ombiimbeli tayi ti, tse tatu vulika kuyo. Pashiholelwa, Ombiimbeli oye tu lombwela kombinga yankene Jehova a tala ko ombinzi, nomolwaashono hatu landula shoka tayi ti. (Genesis 9:4; Iilonga 15:28, 29) Otatu vulu okugalikana kuJehova e tu kwathele tu ninge omatokolo ngoka tage mu nyanyudha.

5 Omatokolo getu ohage tu gumu. Etokolo ewanawa otali vulu oku tu hedhitha popepi naJehova. Omanga etokolo ewinayi tali vulu okuteya po uukuume wetu naye. Omatokolo getu ohaga gumu wo yalwe. Inatu hala tu ninge sha shoka tashi ka uvitha nayi aamwatate nenge tashi ka nkundipaleka eitaalo lyawo. Inatu hala wo tu etithe omaupyakadhi pokati kaamwatate megongalo. Onkene, osha simanenena tu kale hatu ningi omatokolo omawanawa.  — Lesha Aaroma 14:19; Aagalati 6:7

6. Oshike shi na oku tu kwathela uuna tatu ningi omatokolo?

6 Ongiini tatu vulu okuninga omatokolo ge li mondjila, uuna Ombiimbeli inaayi tu lombwela kondandalunde shoka tu na okuninga? Pehala lyokuninga owala shoka twa hala, natu dhiladhile nawa kombinga yonkalo yetu, e tatu ningi etokolo ndyoka tali nyanyudha Jehova. Ngele otwa ningi ngawo, otatu ka kala tu na uushili kutya Jehova ote ke tu kwathela. — Lesha Episalomi 37:5.

JEHOVA OKWA HALA NDI NINGE SHIKE?

7. Uuna kaapu na ompango yokondandalunde ya za mOmbiimbeli, oshike tashi tu kwathele tu mone kutya Jehova okwa hala tu ninge shike monkalo ndjoka?

7 Oshike tashi tu kwathele tu mone shoka tashi nyanyudha Jehova? Aaefeso 5:17 otayi ti: “Kambadhaleni okukonakona kutya Omuwa okwa hala, mu ninge shike.” Uuna kaapu na ompango yokondandalunde  ya za mOmbiimbeli, otwa pumbwa okukonakona nenge okuuva ko kutya Jehova okwa hala tu ninge shike monkalo ndjoka. Ongiini tatu vulu oku shi ninga? Otu na oku mu galikana nokweetha ombepo ye ondjapuki yi tu wilike.

8. Jesus okwa li ha konakona ngiini shoka Jehova a hala a ninge? Gandja oshiholelwa.

8 Jesus okwa li aluhe ha konakona shoka Jehova a hala a ninge. Pashiholelwa, iikando ayihe iyali sho oongundu dhaantu dha li dha sa ondjala, Jesus okwa li a galikana e te dhi palutha pashikumithalonga. (Mateus 14:17-20; 15:34-37) Oshikando shimwe sho Jesus a li a sa ondjala mombuga, Omuhindadhi okwe mu makele a shitukithe omamanya iikwiila, ihe okwa tindi. (Lesha Mateus 4:2-4.) Jesus okwa li e shi He nawa lela. Onkee ano, okwa li a tseya kutya Jehova ka li a hala Jesus a longithe ombepo ondjapuki, opo i igwanithile po oompumbwe dhe dhopaumwene. Okwa li e na uushili kutya He ote ke mu wilika noku mu pa iikulya uuna e yi pumbwa.

9, 10. Oshike tashi ke tu kwathela tu ninge omatokolo ge li mondjila? Gandja oshiholelwa.

9 Ngaashi Jesus, natse otatu vulu okuninga omatokolo omawanawa ngele otwe etha Jehova e tu wilike. Ombiimbeli otayi ti: “Inekela Omuwa nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha. Ino kala omunawino momeho goye mwene; tila Omuwa, gamuka kuuwinayi.” (Omayeletumbulo 3:5-7) Uuna tatu konakona Ombiimbeli nokwiilonga omukalo moka Jehova ha dhiladhila, otatu ka vula okumona kutya okwa hala tu ninge shike monkalo yontumba. Ngele otwa tsikile okwiilonga oshindji kombinga yankene Jehova ha dhiladhila, otashi ka kala oshipu kutse okuninga omatokolo ngoka tage mu nyanyudha. Kungawo, otatu ka kala tu na “omwenyo hagu vulika.”— Hesekiel 11:19

10 Natu tye ando omukulukadhi gwontumba oku li mositola, e ta mono mo oongaku oombwanawa, ihe odhi na ondilo. Nonando ka li nomusamane gwe, oku shi shi kutya ota ka kala u uvite ngiini ngele okwa landa oshinima shi na ondilo. Oku shi shi ngiini? Molwaashoka oya kala ya hokana uule wethimbo, oku shi shi kutya omusamane gwe okwa hala ya longithe ngiini iimaliwa yawo. Sha faathana, otu na okwiilonga kombinga yomukalo moka Jehova ha dhiladhila naashoka a ninga monakuziwa. Ngele otwe shi ningi, otatu ka kala tu shi shoka a hala tu ninge monkalo kehe tatu iyadha muyo.

ONGIINI TO VULU OKUMONA SHOKA JEHOVA TA DHILADHILA?

11. Omapulo geni tu na okwiipula uuna tatu lesha nenge tatu konakona Ombiimbeli? (Tala okampungu “ Omapulo ngoka wu na okwiipula uuna to konakona Ombiimbeli.”)

11 Ongiini tatu vulu okumona shoka Jehova ta dhiladhila? Oshinima sha simanenena shoka tu na okuninga osho okulesha nokukonakona Ombiimbeli pandjigilile. Uuna tatu shi ningi, natu ipule ngeyi: ‘Shoka tandi lesha otashi longo ndje shike  kombinga yaJehova? Omolwashike Jehova a katuka ngeyi?’ Ngaashi David, otu na okupula Jehova e tu kwathele tu mu tseye nawa. David okwa nyola a ti: “Omuwa, longa ndje oondjila dhoye; dhi yelithila ndje. Longa ndje okukala moshili yoye, oshoka ongoye Kalunga kandje, omuhupithi gwandje. Ngame onde ku inekela aluhe.” (Episalomi 25:4, 5) Uuna twi ilongo sha kombinga yaJehova, otatu vulu okudhiladhila oonkalo moka tatu vulu okulongitha uuyelele mboka. Mbela otatu vulu oku wu longitha megumbo, kiilonga, kosikola nenge muukalele? Uuna tatu dhiladhila konkalo yokondandalunde, otashi ka kala oshipu okumona kutya Jehova okwa hala tu longithe ngiini uuyelele mboka.

Opo tu mone shoka Jehova ta dhiladhila, otu na okulesha nokukonakona Ombiimbeli pandjigilile

12. Iileshomwa yetu nosho wo okukala pokugongala, otaku vulu ngiini oku tu kwathela tu kale tu shi nkene Jehova ha dhiladhila?

12 Omukalo gulwe moka tatu vulu okumona nkene Jehova ha dhiladhila ogwo okugandja eitulomo kwaashoka ehangano hali tu longo okuza mOmbiimbeli. Pashiholelwa, uuna twa pumbwa okuninga etokolo, omambo ngaashi Watch Tower Publications Index nosho wo Embo lyokukonga uuyelele lyOonzapo dhaJehova, otaga vulu oku tu kwathela tu mone shoka Jehova ta dhiladhila. Okukala pokugongala nako  otaku vulu oku tu kwathela, ngele otwa kala hatu pulakene nawa, hatu kutha ombinga nohatu tedhatedha kwaashoka tatu longwa puko. Shika otashi tu kwathele twi ilonge okudhiladhila ngaashi Jehova. Kungeyi, otatu ka vula okuninga omatokolo ngoka tage ke mu nyanyudha note ke ga yambeka.

DHILADHILA TANGO KUTYA JEHOVA OTA DHILADHILA NGIINI MANGA INOO NINGA ETOKOLO

13. Gandja oshiholelwa shankene tatu vulu okuninga etokolo lyopandunge, uuna twa tseya nkene Jehova ta dhiladhila.

13 Natu tale koshiholelwa shankene tatu vulu okuninga etokolo lyopandunge, konima ngele twa mono shoka Jehova ta dhiladhila. Natu tye ando owa hala okuninga omukokolindjila. Owa ninga omalunduluko gontumba, opo wu vule okukala ethimbo olindji muukalele. Otashi vulika natango to ipula ngele oto ka kala ngaa shili wa nyanyukwa ngele owa kala wu na iimaliwa iishona nosho wo iinima iishona. Ombiimbeli inayi popya kutya otu na okukokola ondjila, opo tu longele Jehova. Otatu vulu oku mu longela nuudhiginini tu li owala aauvithi. Nonando ongawo, Jesus okwa ti kutya Jehova oha laleke nuuyamba mboka taya ningi omaiyambo omolwUukwaniilwa. (Lesha Lukas 18:29, 30.) Ombiimbeli nayo otayi ti kutya Jehova oha kala a nyanyukwa uuna tatu ningi ngaashi tatu vulu tu mu hambelele. Jehova okwa hala tu mu longele twa nyanyukwa. (Episalomi 119:108; 2 Aakorinto 9:7) Ngele otwa galikana e tatu tedhatedha kombinga yiinima mbika, otatu ka ninga etokolo ndyoka tali opalele onkalo yetu, na Jehova ote ke li yambeka.

14. Ongiini tatu vulu okumona ngele omukalo gwontumba gwokuzala ogwa hokiwa Jehova?

14 Natu tale natango koshiholelwa shilwe. Natu tye ando owu hole okuzala momukalo gwontumba, ihe owu shi shi kutya yamwe megongalo otashi vulika ya kale inaaye gu hokwa. Yo Ombiimbeli inayi popya sha kombinga yomukalo ngoka gwokuzala. Ongiini to vulu okumona kutya Jehova ota dhiladhila ngiini? Ombiimbeli otayi ti: “Onda hala wo, aakiintu ya dhiladhile nawa kombinga yomizalo dhawo, yo ya zale oonguwo dhi shi kutalwa nodha yogoka. Inaa panda omafufu ya zalekwe oombandi dhiingoli nomagwe taga adhima nenge oonguwo dhi na ondilo. Peha lyaambika kaleni mu udha iilonga iiwanawa, ngaashi sho opalela aakiintu ooitaali.” (1 Timoteus 2:9, 10) Omayele ngoka oga nuninwa aapiya ayehe yaJehova, mwa kwatelwa naalumentu. Ngele otu na eifupipiko, otatu ka dhiladhila nkene yalwe taya ka kala yu uvite ngele otwa hogolola tu zale oonguwo dhontumba. Ngele otu hole aamwatate, otatu ka yanda oku ya yemateka nenge oku yu uvitha nayi. (1 Aakorinto 10:23, 24; Aafilippi 3:17) Ngele otwa kala hatu dhiladhila kwaashoka Ombiimbeli tayi ti nokunkene Jehova ta dhiladhila, otatu ka ninga omatokolo ngoka ta ka kala a hokwa. 

15, 16. (a) Jehova oha kala u uvite ngiini uuna tatu dhiladhila kombinga yiinima inaayi yogoka? (b) Uuna tatu hogolola omainyanyudho, ongiini tatu vulu okumona kutya ogeni ga hokiwa kuJehova? (c) Omatokolo ga simana oge na okuningwa ngiini?

15 Otwi ilonga mOmbiimbeli kutya Jehova oha kala u uvite nayi nokwa yemata noonkondo, uuna aantu taya longo notaya dhiladhila iinima iiwinayi. (Lesha Genesis 6:5, 6.) Osha yela kutya Jehova ina hala tu kale hatu dhiladhila iinima inaayi yogoka. Ngele otwa kala nokuli hatu yi dhiladhila, otashi vulika tu ke yi ninge. Jehova okwa hala tu dhiladhile iinima mbyoka iiwanawa noya yogoka. Omulongwa Jakob okwa  nyola kombinga yuunongo waJehova a ti: “Tango owa yogoka, ou na wo ombili, olukeno nuukuume. Ou udha ohenda niilonga iiwanawa nokau na omalimbililo nuufudhime.” (Jakob 3:17) Ombiimbeli otayi tu longo kutya otu na okuyanda omainyanyudho kehe ngoka tage ke tu ningitha tu dhiladhile nenge tu kale twa hala iinima iiwinayi yo inayi yogoka. Otwa pumbwa okukala tu shi nawa shoka Jehova e hole naashoka e tonde. Shoka otashi ke shi ningitha oshipu kutse tu mone kutya omambo geni, oomuvi dhini nomaudhano geni tu na okuhogolola. Itatu ka pumbwa okupula yalwe kutya oshike tu na okuhogolola.  

16 Uuna twa pumbwa okuninga etokolo, olundji ohapu kala iinima oyindji mbyoka tatu vulu okuhogolola, mbyoka tayi ka nyanyudha Jehova. Uuna tatu ningi etokolo lya simana, otashi ka kala pandunge okupula omukuluntugongalo e tu pe omayele. Otatu vulu wo okupula omumwatate nenge omumwameme a pyokoka. (Titus 2:3-5; Jakob 5:13-15) Shoka inashi hala okutya otu na oku ya pula ye tu ningile etokolo. Pehala lyaashoka, otu na okudhiladhila nawa kombinga yaashoka twi ilonga mOmbiimbeli e tatu ningi etokolo. (Aahebeli 5:14) Omuyapostoli Paulus okwa ti: “Kehe gumwe oku na okuhumbata ye mwene omutenge gwe.” — Aagalati 6:5.

17. Omauwanawa geni tatu ka mona ngele otwa kala hatu ningi omatokolo ngoka ga hokiwa kuJehova?

17 Uuna tatu ningi omatokolo ngoka taga nyanyudha Jehova, otatu ka hedha popepyeelela naye. Otatu ka kala twa hokiwa kuye note ke tu laleka nuuyamba. (Jakob 4:8) Eitaalo lyetu muye otali ka kala lya kola. Onkee ano, otwa pumbwa okutedhatedha kwaashoka hatu lesha mOmbiimbeli, opo tu uve ko omukalo moka ha dhiladhila. Otatu ka kala aluhe tatu ilongo iinima iipe kombinga ye. (Job 26:14) Ngele otwa longo nuudhiginini tu tseye Jehova ngashingeyi, otatu ka kala tu na uunongo notatu ka vula okuninga omatokolo ngoka ge li mondjila. (Omayeletumbulo 2:1-5) Omadhiladhilo noompangela dhaantu ohadhi lunduluka, ihe Jehova iha lunduluka. Omupisalomi gumwe okwa ti: “Omadhiladhilo ge otaga piti sigo aluhe; omalalakano ge kage na mpoka taga hulu po.” (Episalomi 33:11) Osha yela kutya, otatu ka ninga omatokolo omawanawa lela ngele otwi ilongo okukala hatu dhiladhila ngaashi Jehova, e tatu ningi shoka tashi mu nyanyudha.