Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2017

Asa, Jehosafat, Hiskia naJosia

Longela Jehova nomutima aguhe!

Longela Jehova nomutima aguhe!

“Omuwa, dhimbulukwa kutya onde ku longele nuudhiginini neinekelo.” — 2 AAK. 20:3.

OMAIMBILO: 36, 54

1-3. Oshike sha kwatelwa mokulongela Jehova “nomutima aguhe”? Shi yelitha.

MOLWAASHOKA inatu gwanenena, ohatu ningi omapuko. Ihe shoka oshiwanawa noonkondo, Jehova “ihe tu ningile paondjo dhetu,” okwe tu pa ekulilo nokwi ilongekidha oku tu dhimina po ngele otwi iyele ombedhi e tatu pula edhiminopo kuye. (Eps. 103:10, OB-1954) Ihe ngaashi David a lombwele Salomo, opo okulongelakalunga kwetu ku taambwe ko kuJehova, otu na oku “mu longela nomutima aguhe.” (1 Ondjal. 28:9) Tu li aantu inaatu gwanenena, ongiini tatu vulu oku shi ninga?

2 Opo tu shi uve ko nawa, natu yelekanithe onkalamwenyo yomukwaniilwa Asa naandjoka yomukwaniilwa Amazia. Aakwaniilwa ayehe mbaka yaJuda oya li ya longo shoka sho opalela Jehova, ihe Asa okwa li e shi ningi lela nomutima aguhe. (2 Ondjal. 15:16, 17; 25:1, 2; Omayel. 17:3) Aakwaniilwa ayehe mboka kaya li ya gwanenena noya li ya ningi omapuko. Ihe Asa ye mwene ka li a pilamene Jehova, okwa li e mu igandjele “nomutima aguhe.” (1 Ondjal. 28:9) Mepingathano naashono, Amazia ka li a longele Jehova naanaa nomutima aguhe. Konima sho a sindi aatondi yaKalunga, okwe etelele ko iimenka yawo e ta tameke oku yi longela. —  2 Ondjal. 25:11-16.

 3 Okulongela Kalunga nomutima aguhe okwa kwatela mo oku mu igandjela thiluthilu. MOmbiimbeli oshitya “omutima” olundji ohashi longithwa okuulika kuuntu womeni. Osha kwatele mo omahalo getu, omadhiladhilo, shoka kaatu hole, iikala yetu, okuvula kwetu, shoka tashi tu inyengitha nosho wo omalalakano getu. Ano omuntu ngoka ta longele Jehova nomutima aguhe, ihe mu longele niihelele, noihe mu longele owala molwaashoka e na oku shi ninga. Ongiini kombinga yetu? Nonando inaatu gwanenena, otatu vulu okwiigandja thiluthilu kuJehova kaatu na iihelele, notatu ka vula oku mu longela nomutima aguhe. —  2 Ondajl. 19:9.

4. Oshike tatu ka kundathana ngashingeyi?

4 Opo tu uve ko kutya okulongela Kalunga nomutima aguhe otaku ti shike, natu taleni onkalamwenyo yaAsa noyaakwaniilwa yalwe yaJuda mboka ya li ya longele Kalunga nomutima aguhe. Aakwaniilwa mboka ongaashi, Jehosafat, Hiskia naJosia. Ayehe yane oya li ya ningi omapuko, ihe natango Jehova okwa kala e ya hokwa. Omolwashike Jehova a li e ya tala ko ye mu longela nomutima aguhe, nongiini tatu vulu oku ya holela?

ASA “OKWA KALA I ITULA MOMUWA NUUDHIGININI OKUKALA KWE AKUHE”

5. Asa okwa li a ningi po shike sho a ningi omukwaniilwa?

5 Asa okwa li omukwaniilwa omutitatu gwaJuda okuza sho uukwaniilwa waIsraeli womazimo omulongo gokuumbangalantu wa topoka. Moshilongo okwa kutha mo iimenka ayihe nokwa tidha mo oohonda adhihe dha kalele miihuna pomahala giinonoma yuupagani. Okwa kutha yinakulu Maaka uuthemba “wuuvalekele, sho a hambulitha oshiyelekela oshinyanyalithi.” (1 Aak. 15:11-13) Niishewe Asa okwa lombwele oshigwana she shi ‘gwanithe ehalo lyOmuwa noshi vulike komalongo nokiipango ye.’ Ano Asa okwa li a humitha komeho elongelokalunga lyashili. —  2 Ondjal. 14:4.

6. Asa okwa li i inyenge ngiini sho Aasudani ya ponokele oshilongo?

6 Jehova okwa li a yambeke Juda a kale nombili muule womimvo omulongo dhotango dhokupangela kwaAsa. Opo ihe Omuetiopia nenge Omusudani Sera okwa homona Juda e na aakwiita 1 000 000 nomatembakwiita 300. (2 Ondjal. 14:1, 6, 9, 10) Mbela Asa okwa li i inyenge ngiini sho a homonwa? Asa okwa li u ulike lela kutya okwi inekela muJehova. (Lesha 2 Ondjalulo 14:11.) Kalunga okwa li a yamukula egalikano lyaAsa tali zi komutima, sho e mu kwathele a dhenge etangakwiita lyAasudani. (2 Ondjal. 14:12, 13) Nokuli naasho aakwaniilwa mboka ya li kaaye shi aadhiginini, Jehova okwa li e ya kwathele ya sinde omutondi omolwedhina lye. (1 Aak. 20:13, 26-30) Asa okwa kala i inekela Jehova Kalunga, nokwa li a yamukala egalikano lye. Ihe iikando ya ka landula ko, Asa okwa li a katuka kaashi li pandunge. Pashiholelwa, Asa okwa li a ka konga ekwatho komukwaniilwa gwaSiria, pehala lyoku ke li konga kuJehova. (1 Aak. 15:16-22) Niishewe, pataloko lyaKalunga Asa “okwa kala i itula mOmuwa nuudhiginini okukala kwe akuhe.” Mbela ongiini tatu vulu okuholela Asa mokulonga shoka oshiwanwa? —  1 Aak. 15:14.

7, 8. Ongiini to vulu okuholela Asa mokulongela Jehova?

7 Kehe gumwe gwomutse ota vulu okukonakona omutima gwe a tale ngele okwi igandja ngaa lela kuKalunga. Ipula ngeyi: ‘Mbela onda tokola ngaa toko okukala nda hokiwa kuJehova, okupopila elongelokalunga lyashili nosho wo okugamena oshigwana she komanwethomo omawinayi?’ Dhiladhila kutya Asa okwa li a pumbwa okukala e na uulaadhi wu thike peni, opo a vule oku ka dhenga Maaka, ngoka a li “oshikalungakiintu sholuvalo” moshilongo moka. Otashi vulika kuu shi omuntu ngoka a li a katuka ngaashi Asa, ihe otashi vulika pu na onkalo yimwe moka to vulu okuholela  uulaadhi we. Pashiholewa, ongiini ngele oshilyo shuukwanegumbo nenge kuume koye kopothingo ngoka a yona, ina hala okwiiyela ombedhi e ta kondwa? Mbela oto ka kala ngaa wa tokola toko waa endathane naye? Mbela omutima gwoye otagu ke ku inyengitha wu ninge shike?

8 Ngaashi Asa, uuna wa taalela omapataneko ngoka tashi vulika nokuli ga kwata miiti, oto vulu okuulika kutya owi inekela thiluthilu muJehova nomutima gwoye aguhe. Otashi vulika wu kale to hindwa nenge to shekwa kosikola, molwaashono wu li Onzapo yaJehova. Nenge aaniilonga ooyakweni taye ku sheke sho ho tula mo omafudho molwiinima yopambepo nenge sho ihoo longo omalutayima olundji. Uuna to iyadha moonkalo dha fa mpono, galikana Kalunga, ngaashi Asa a li a ningi. Inekela Jehova, e to kala wa dhiginina shoka wu shi kutya osho shi li mondjila noshi li pandunge. Dhimbulukwa kutya Kalunga okwa li a nkondopaleke Asa nota vulu wo oku ku nkondopaleka.

9. Ongiini tatu vulu okuulika kutya otwi inekela Jehova nomutima aguhe uuna tatu uvitha?

9 Aapiya yaJehova ihayi idhiladhidhila owala yo yene. Asa okwa li a humitha komeho elongelokalunga lyashili. Natse otatu vulu okukwathela yalwe “ya gwanithe ehalo lyOmuwa Kalunga.” Itashi nyanyudha tuu Jehova oku tu mona tatu popi naashiinda nonayalwe kombinga ye, tatu shi ningi tatu inyengithwa kohole nokokunakonasha naantu ooyakwetu!

JEHOSAFAT OKWA KONGO JEHOVA

10, 11. Ongiini to vulu okulandula oshiholelwa shaJehosafat?

10 Omwanamati gwaAsa, Jehosafat “okwa ningi shoka shu uka momeho gOmuwa a fa he.” (2 Ondjal. 20:31, 32) Okwe shi ningi ngiini? Ngaashi he, Jehosafat okwa li a ladhipike oshigwana shi gwanithe ehalo lyaJehova. Okwa li u unganeke oshikonga shokulonga aantu, ta longitha “embo lyompango yOmuwa.” (2 Ondjal. 17:7-10) Okwa li a yi nokuli koshitopolwa shuukwaniilwa waIsraeli wokuumbangalantu sigo okoshitopolwa shaEfraim shokoondundu i “igidhile aantu, ya galukile kOmuwa.” (2 Ondjal. 19:4) Jehosafat okwa li omukwaniilwa “ngoka a longele Omuwa pankondo dhe adhihe.” —  2 Ondjal. 22:9.

11 Atuheni otatu vulu okukutha ombinga moshikonga oshinene shoka Jehova ta ningi kunena. Mbela oshi li ngaa elalakano lyoye okulonga aantu Oohapu dhaKalunga omwedhi kehe, nelalakano lyokwiinyengitha omitima dhawo ya longele Kalunga? Ngele owa ningi oonkambadhala, Kalunga ote ku yambeke, notashi vulika wu mone gumwe ngoka a hala okukonakona Ombiimbeli. Mbela osho ho kala to galikana shi ningwe? Mbela owu na ehalo okukonakona nagumwe, nonando otashi vulika to ka longitha ethimbo lyoye lya gwedhwa po? Ngaashi naanaa Jehosafat a yile koshitopolwa shaEfraim a ka kwathele aantu ya galukile kelongelokalunga lyashili, natse otatu vulu okuya kwaamboka inaayi ipyakidhila we. Kakele kaashono, aakuluntugongalo ohaya ningi elongekidho okutalela po nokukwathela mboka ya kondwa moshitopolwa shawo, mboka tashi vulika ye etha po iilonga yawo iiwinayi yonale.

12, 13. (a) Jehosafat okwa li i inyenge ngiini sho a li a taalelwa konkalo tayi tilitha? (b) Omolwashike tu na okuholela Jehosafat mokupopya megalikano kutya tse aankundi?

12 Ngaashi he, Asa, Jehosafat okwa kala omudhiginini kuKalunga nokuli naasho a li a tila etanga lyomutondi gwe. (Lesha 2 Ondjalulo 20:2-4.) Jehosafat okwa li a haluka, ihe nonando ongawo, okwa “galikana Omuwa, e mu wilike.” Megalikano lye okwa li a zimine neifupipiko kutya aantu ye itaya “vulu okukondjitha etangakwiita li thike mpoka” nonokutya aantu ye kaye shi nokuli shoka ye na okuninga. Okwa kala i inekela lela muJehova, e ta ti: “Otatu kongo ekwatho kungoye.” —  2 Ondjalulo 20:12.

 13 Omathimbo gamwe natse otashi vulika tu kale kaatu shi shoka tu na okuninga ngaashi Jehosafat, tashi vulika nokuli tu kale twa tila. (2 Kor. 4:8, 9) Ihe natu dhimbulukwe kutya Jehosafat okwe shi popi megalikano lyomontaneho kutya ye noshigwana she aankundi. (2 Ondjal. 20:5) Mboka taya kwatele komeho pambepo momaukwanegumbo otaya vulu okuholela Jehosafat, mokukonga ewiliko noonkondo kuJehova, opo ya vule okuungaunga nuupyakadhi mboka we ya taalela. Ino sa ohoni okuuvika kuyaandjeni to galikana omagalikano ga tya ngaaka. Otaya ka tseya kutya owi inekela muJehova. Kalunga okwa li a kwathele Jehosafat, natse ote ke tu kwathela wo.

HISKIA OKWA TSIKILE NOKULONGA SHOKA SHU UKA

14, 15. Hiskia okwa li u ulike ngiini kutya okwi inekela thiluthilu muKalunga?

14 Mepingathano naJehosafat, omukwaniilwa Hiskia ngoka a li a tseyika nawa e li “omwiinekelwa gOmuwa,” okwa li e na okukondjitha enwethomo ewinayi lyahe, ngoka a li ha longele iikalunga. Okwa li a “yonagula po omahala giinonoma yuupagani, okwa kumuna po oongundhimanya nokwa kumagula po iiyelekela yakalungakiintu Asheera. Okwa tatula po eyoka lyoshikushu ndyoka lya hambulilwe kuMoses,” ndyoka ya li haya galikana kulyo. Hiskia okwa li i igandjele Jehova nomutima aguhe, molwaashoka “okwa dhiginine iipango mbyoka Omuwa e yi pele Moses.” —  2 Aak. 18:1-6.

15 Hiskia okwa kala i inekela Jehova nomutima aguhe, nokuli naasho Assur, epangelo enankondo muuyuni lyopethimbo ndyono, lya li lya homona Juda nolya li lya tilitha kutya otali ka hanagula po Jerusalem. Omukwaniilwa gwAayassur Sennakerib okwa li a sheke Jehova nokwa kambadhala okutilitha Hiskia, opo a sholole. Ihe Hiskia okwa li u ulike megalikano kutya okwi inekela thiluthilu moonkondo dhaJehova tadhi hupitha. (Lesha Jesaja 37:15-20.) Kalunga okwa li a yamukula egalikano lye, sho e mu tumine omuyengeli a dhipage Aayassur 185 000. —  Jes. 37:36, 37.

16, 17. Ongiini to vulu okuholela Hiskia sho to longele Kalunga?

16 Hiskia konima yethimbo okwe ke ehama, aale nokuli a se. Okwa li a galikana Jehova a dhimbulukwe nkene a li e mu longele nuudhiginini. (Lesha 2 Aakwaniilwa 20:1-3.) Jehova okwa li a yamukula e galikano lye sho e mu aludha. Otu shi shi okupitila mOmanyolo kutya inatu tegelela Kalunga e tu aludhe pashikumithalonga nenge a lelepeke onkalamwenyo yetu. Ngaashi Hiskia a li a ningi, natse otatu vulu okulombwela Jehova megalikano tatu ti: “Onde ku longele nuudhiginini neinekelo.” Mbela owe shi itaala ngaa kutya Jehova ota vulu noku na ehalo oku ku kwathela nuuna wu li muuvu? —  Eps. 41:3.

17 Uuna tatu tedhatedha nenge tatu dhiladhila koshiholelwa shaHiskia, otashi vulika tu mone kutya otwa pumbwa okweekelahi shoka tashi yono po ekwatathano lyetu naKalunga nenge tashi tu imbi tu gandje eitulomo lyetu kelongelokalunga lyashili. Osha yela kutya inatu hala okuholela aantu yomuuyuni mboka haya longitha omakwatathano gopaintaneta, ngoka hage ya ningitha ya tale ko aantu yalwe ya fa ookalunga. Odhoshili kutya Aakriste yamwe otashi vulika haye shi nyanyukilwa okukala nekwatathano noyaandjawo nenge nookuume kopothingo okupitila momakwatathano ngoka. Ihe oyendji muuyuni ohaye ga longitha sha pitilila, taya holele aalumentu nenge aakiintu mboka kaaye ya shi nando onale. Nenge haya longitha ethimbo olindji okutala omathano gaantu mboka nenge okulesha kombinga yawo. Osha nika oshiponga okukala tatu longitha ethimbo lyetu olindji kointaneta. Omukriste otashi vulika a kale a nyanyukilwa shoka aantu taya popi kombinga yomathano ngoka a tula kointaneta  noyaashoka a popya, nenge shi mu geyithe ngele aantu oye etha okutala shoka a tula ko nenge a popya. Mbela oto dhiladhila kutya omuyapostoli Paulus nenge Priskila naAkula oya li haya kala yi ipyakidhila nokutala omathano nenge taye endathana naantu mboka ihaaya longele Jehova? Otatu lesha kutya Paulus okwa li “i ipyakidhila ethimbo alihe nokuuvithila aantu oohapu dhaKalunga.” Priskila naAkula oya li ya longitha ethimbo lyawo okuyelithila aantu “nawalela ondjila yaKalunga.” (Iil. 18:4, 5, 26). Otatu vulu okwiipula ngeyi: ‘Mbela ohandi yanda ngaa okutala ko aantu ya fa oyo ookalunga nenge okulongitha ethimbo lyandje olindji miinima kaayi na oshilonga?’ —  Lesha Aaefeso 5:15, 16.

JOSIA OKWA LI A DHIGININE IIPANGO YAJEHOVA

18, 19. Omomikalo dhini wa hala okukala wa fa Josia?

18 Omukwaniilwa Josia, omutekulululwa gwaHiskia, naye okwa li a dhiginine lela iipango yaJehova “nomutima aguhe.” (2 Ondjal. 34:31) Manga a li omugundjuka, “okwa tameke okusimaneka Kalunga kahekulu David.” Sho a li e na omimvo 20, okwa tameke okuhanagula po iiyelekelakalunga muJuda. (Lesha 2 Ondjalulo 34:1-3.) Josia okwa li omulaadhi mokulonga shoka tashi nyanyudha Kalunga e vule aakwaniilwa oyendji yaJuda. Sho omanyolo gopetameko gomOmpango yaMoses ga monika e te ga leshelwa, okwa li a mono kutya okwa pumbwa lela okulonga ehalo lyaKalunga. Okwa ladhipike wo yalwe ya longe ehalo lyaJehova. Oshizemo, manga a li e na omwenyo, aantu “oya simaneke Omuwa, Kalunga.” —  2 Ondjal. 34:27, 33.

19 Ngaashi Josia, aagundjuka oye na okukonga Jehova manga ye li aagundjuka. Omukwaniilwa Manasse otashi vulika oye a li a longo Josia kombinga yesilohenda lyaKalunga. Aagundjuka kaleni hamu kala pamwe naakokele aadhiginini mboka ye li maandjeni nomegongalo e tamu ilongo kuyo iinima oyindji iiwanawa mbyoka Jehova e ya ningila. Oshikwawo dhimbulukweni kutya okulesha Omanyolo okwa li kwa gumu omutima gwaJosia nokwe mu inyengitha a katuke oonkantu. Okulesha Oohapu dhaKalunga otaku ke ku inyengitha wu katuke oonkantu ndhoka tadhi ku etele enyanyu notadhi koleke ekwatathano lyoye naKalunga. Otaku ke ku kwathela wo wu kale wa hala okukwathela yalwe ya konge Kalunga. (Lesha 2 Ondjalula 34:18, 19.) Okukonakona Ombiimbeli otaku vulu wo oku ku kwathela wu mone mpoka wa pumbwa okuninga omalunduluko miilonga yoye yokulongela Jehova. Ngele owe shi ningi, ninga ngaashi to vulu wu ninge omalunduluko ngaashi Josia a li a ningi.

LONGELA JEHOVA NOMUTIMA AGUHE

20, 21. (a) Aakwaniilwa yane mboka twa kundathana kombinga yawo oya li ya ningi shike? (b) Oshike tatu ka kundathana moshitopolwa tashi landula?

20 Mbela ku wete oshiwanawa okutalulula nkene aakwaniilwa yane yaJuda mboka twa kundathana ya li ya longele Jehova nomutima aguhe? Oya li aalaadhi mokulonga ehalo lyaKalunga noye li gwanitha po nomutima aguhe. Oya tsikile oku li longa, nokuli naasho ya li ya taalelwa kaatondi aanankondo. Shoka sha simana noonkondo, okulongela Jehova kwawo okwa li kwa yogoka.

21 Ngaashi tatu ke shi mona moshitopolwa tashi landula, aakwaniilwa yane mboka twa konakona kombinga yawo ayehe oya li ya ningi omapuko. Niishewe, sho Omukonakoni gwomitima e ya konakona, okwa mono kutya omitima dhawo odhi igameka kuye thiluthilu. Natse inatu gwanenena. Ngele Jehova te tu konakona, mbela oha thiki ngaa pehulithodhiladhilo kutya otatu mu longele nomutima aguhe? Natu ke shi taleni moshitopolwa tashi landula.